ʻAi ʻa Sihova ko Ho Falalaʻanga

“Ko koe, Atonai Sihova, ʻoku tuʻu ai ʻeku ʻamanaki: ko hoku falalaʻanga talu ʻeku kei siʻi.”—Sāme 71:5.

 1. Ko e hā ʻa e pole naʻe fehangahangai mo e tamasiʻi tauhi-sipi ko Tēvitá?

KO E tangatá naʻe meimei mita ʻe tolu hono lōloá. Tā neʻineʻi ke manavahē ʻa e kau sōtia kotoa ʻo ʻIsileli ʻi he malaʻe taú ʻi he fehangahangai mo iá! ʻI he ngaahi uike lahi hokohoko, ʻi he pongipongi kotoa mo e efiafi kotoa naʻe luma ai ʻa e saiāniti Filisitia ko Kolaiaté ki he kau tau ʻa ʻIsilelí, ʻo poleʻi kinautolu ke fekauʻi mai ha toʻa ke na tau. Naʻe faifai pē ʻo tali ʻene polé, ʻikai ʻe ha sōtia, ka ko ha kiʻi talavou. Ko e tamasiʻi tauhi-sipi ko Tēvitá naʻe hangē ʻoku toe hā nounou ange ia mei hono hoa taú. Ko hono moʻoní, ʻoku ngalingali naʻá ne maʻamaʻa ange ʻi he teunga tau mo e meʻatau ʻa Kolaiaté! Neongo ia, naʻe fehangahangai pē ʻa e talavoú mo e saiānití pea hoko ko ha fakatātā tuʻuloa ʻo e loto-toʻá.​—1 Samiuela 17:​1-​51.

2, 3. (a) Ko e hā naʻe malava ai ʻa Tēvita ke fehangahangai mo Kolaiate ʻi he falala moʻoni? (e) Ko e hā ʻa e ongo sitepu ʻe ua te tau lāulea ki ai ke ʻai ai ʻa Sihova ko hotau falalaʻangá?

² Ko e hā naʻá ne ʻoange kia Tēvita ʻa e loto-toʻa peheé? Fakakaukau angé ki he ngaahi lea ʻe niʻihi ʻoku hā mahino naʻe hiki ʻe Tēvita ʻi hono ngaahi taʻu ki muí: “Ko koe, Atonai Sihova, ʻoku tuʻu ai ʻeku ʻamanaki: ko hoku falalaʻanga talu ʻeku kei siʻi.” (Sāme 71:5) ʻIo, ʻi heʻene kei talavoú, naʻe falala kakato ʻa Tēvita kia Sihova. Naʻá ne fehangahangai mo Kolaiate, peá ne pehē: “ʻOku ke haʻu koe kiate au mo e heleta, mo e ongo tao: ka ko au ʻoku ou ʻalu kiate koe ʻi he huafa ʻo Sihova Sapaoti, ko e ʻOtua ʻo e ngaahi matatau ʻo Isileli, ʻa ia kuo ke luki ki ai.” (1 Samiuela 17:45) Ka ko e falala ia ʻa Kolaiaté naʻe ʻi hono fuʻu mālohí mo ʻene meʻataú, ko e falala ia ʻa Tēvitá naʻe ʻia Sihova. ʻI heʻene faʻahi mo e ʻEiki Hau ʻo e ʻunivēsí, ko e hā ka manavahē ai ʻa Tēvita ki he meʻa noa ko e tangata, neongo pe ko e hā nai hono lahi mo e mateuteu lelei ʻene meʻataú?

³ ʻI hoʻo lau fekauʻaki mo Tēvitá, ʻokú ke fakaʻamua pehē ange mai ʻoku toe mālohi ange hoʻo falala kia Sihová? Ngalingali, ko e tokolahi ʻo kitautolu ʻoku pehē. Ko ia ai tau sivisiviʻi angé ha ongo sitepu ʻe ua ʻe lava ke tau fai ke ʻai ai ʻa Sihova ko hotau falalaʻanga. ʻUluakí, ʻoku fiemaʻu ke tau maʻu mo tauhi maʻu hono mapuleʻi ʻo ha taʻofiʻanga maheni ki he falala peheé. Uá, ʻoku fiemaʻu ke tau ako ki he meʻa tofu pē ko ia ʻoku kaunga ki he falala kia Sihová.

Ikuʻi ha Taʻofiʻanga Maheni ki he Falala kia Sihová

4, 5. Ko e hā ʻoku ʻilo ai ʻe he kakai tokolahi ʻoku faingataʻa ke tuku ʻa e falalá ki he ʻOtuá?

⁴ Ko e hā ʻokú ne taʻofi ʻa e kakaí mei he tuku ʻenau falalá ki he ʻOtuá? ʻOku hoko lahi, ko e niʻihi ʻoku nau puputuʻu fekauʻaki mo e ʻuhinga ʻoku hoko ai ʻa e ngaahi meʻa koví. Kuo akoʻi ki he tokolahi ko e ʻOtuá ʻoku tupu mei ai ʻa e faingataʻá. ʻI he taimi ʻoku hoko ai ha fakatamaki, ʻoku pehē nai ʻe he kau faifekaú “kuo ʻave” ʻe he ʻOtuá ia ʻa e kau maté ke fakataha mo ia ʻi hēvani. ʻIkai ko ia pē, ʻoku akoʻi ʻe he kau taki lotu tokolahi ne fuoloa pē hono tomuʻa fokotuʻu pau ʻe he ʻOtuá ia ʻa e meʻa kotoa pē​—kau ai ʻa e fakatamakí mo e ngāue fulikivanu kotoa pē​—ʻa ia ʻoku hoko ʻi he māmani ko ení. ʻE faingataʻa ʻaupito ke tuku ha falala ki ha ʻOtua loto-fefeka pehē. Ko Sētane, ʻa ia ʻokú ne fakakuihi ʻa e ʻatamai ʻo e kau taʻetuí, ʻokú ne vēkeveke ke pouaki ʻa e faʻahinga ‘tokateline [pehē kotoa pē] ʻa e kau tevoló.’​—1 Timote 4:1; 2 Kolinito 4:4.

⁵ ʻOku loto ʻa Sētane ke mole ʻa e falala ko ia ʻa e kakaí kia Sihová. Ko e fili ko ia ʻo e ʻOtuá ʻoku ʻikai ke ne loto ke tau ʻilo ki he ngaahi tupuʻanga moʻoni ʻo e faingataʻaʻia ʻa e tangatá. Pea kapau kuo tau ako ha ngaahi ʻuhinga Fakatohitapu ki he faingataʻá, ʻe saiʻia ʻa Sētane ke tau fakangaloʻi ia. Ko ia ai, ʻoku lelei kia kitautolu ke fakamanatu mei he taimi ki he taimi ʻa e ʻuhinga tefito ʻe tolu ʻoku ʻi ai ai ʻa e faingataʻaʻia ʻi he māmaní. ʻI he fai peheé, te tau fakapapauʻi ai ki hotau lotó ʻoku ʻikai tupu meia Sihova ʻa e ngaahi faingataʻa ʻoku tau fehangahangai mo ia ʻi he moʻuí.​—Filipai 1:​9, 10.

 6. ʻOku anga-fēfē hono tuhuʻi mai ʻe he 1 Pita 5:8 ʻa e ʻuhinga ʻe taha ʻo e faingataʻaʻia ʻa e faʻahinga ʻo e tangatá?

⁶ Ko e taha e ʻuhinga ki he faingataʻaʻia ʻa e tangatá he ʻoku loto ʻa Sētane ia ke maumauʻi ʻa e anga-tonu ʻa e kakai faitōnunga ʻa e ʻOtuá. Naʻá ne feinga ke maumauʻi ʻa e anga-tonu ʻa Siopé. Naʻe ʻikai lavameʻa ai ʻa Sētane, ka kuo ʻikai te ne tuku ai. ʻI he tuʻunga ko e pule ʻo e māmani ko ení, ʻokú ne kumi ke “folo” ʻa e kau sevāniti faitōnunga ʻa Sihová. (1 Pita 5:8) ʻOku kau ai ʻa e tokotaha taki taha ʻo kitautolu! ʻOku loto ʻa Sētane ke ʻai kitautolu ke tuku ʻetau tauhi kia Sihová. Ko ia ai, ʻokú ne faʻa fakaʻaiʻai ha fakatanga. Neongo ʻoku fakamamahi ʻa e faingataʻaʻia peheé, ʻoku ʻi ai ʻa e ʻuhinga lelei ke tau kītaki ai. ʻI he fai peheé, ʻoku tau tokoni ai ke fakamoʻoniʻi ko e tokotaha loi ʻa Sētane pea ʻoku tau fakafiefiaʻi ai ʻa Sihova. (Siope 2:4; Palovepi 27:11) ʻI hono fakaivia kitautolu ʻe Sihova ke kātekina ʻa e fakatangá, ko ʻetau falala kiate iá ʻoku tupulaki ai.​—Sāme 9:​9, 10.

 7. Ko e Kaletia 6:7 ʻokú ne tokoniʻi kitautolu ke tau ʻiloʻi ko e hā ʻa e ʻuhinga ki he faingataʻaʻiá?

⁷ Ko e ʻuhinga hono ua ki he faingataʻaʻiá ʻoku maʻu ia ʻi he tefitoʻi moʻoni ko ení: “ʻIlonga pe meʻa ʻoku to ʻe ha tangata, ko ia ia te ne utu foki.” (Kaletia 6:7) ʻI he taimi ʻe niʻihi ʻoku to ʻa e kakaí ʻaki ʻenau fai ha ngaahi fili kovi pea utu ha tuʻunga faingataʻaʻia ko hono nunuʻá. Te nau fili nai ke fakaʻuli taʻetokanga, ʻo iku ai ki ha fakatamaki. ʻOku fili ʻa e tokolahi ke nau ifi sikaleti, ʻo taki atu ai ki he mahaki mafu mo e kanisā ʻo e maʻamaʻá. Ko e faʻahinga ko ia ʻoku nau fili ke fai ʻa e tōʻonga fehokotaki fakasino taʻetāú ʻoku tuku ai ʻenau moʻuí ke faingataʻaʻia ʻi he ngaahi vahaʻangatae fakafāmili kuo maumau, mole ʻa e tokaʻi-kitá, ngaahi mahaki pipihi mei he fehokotaki fakasinó, pea mo e ngaahi feitama taʻefiemaʻu. ʻE kumi nai ʻa e kakaí ke tukuakiʻi ʻa e ʻOtuá ki he ngaahi faingataʻaʻia peheé, ka ko e kau maʻukovia moʻoni kinautolu ʻo e ngaahi fili kovi pē ʻanautolú.​—Palovepi 19:3.

 8. Fakatatau ki he Koheleti 9:​11, ko e hā ʻoku faingataʻaʻia ai ʻa e kakaí?

⁸ Ko ha ʻuhinga hono tolu ki he faingataʻaʻiá ʻoku fakahaaʻi ia ʻi he Koheleti 9:11: “Foki au, ʻo u vakai ʻi he lalo laʻa, ta ko e pue ʻoku ʻikai ko e meʻa ʻa e veʻevave pe, pea ko e tau ʻoku ʻikai ko e meʻa ʻa e kau mafi pe; pehe foki ko e meʻakai ʻoku ʻikai ko e meʻa ʻa e poto pe, mo e koloa ʻoku ʻikai ko e meʻa ʻa e maʻu ʻatamai pe, kaeʻumaʻa ʻa e tokangaʻekina ʻoku ʻikai ko e meʻa ʻa e kakai ʻilomeʻa pe; he ʻoku hokonoa ki he faʻahinga kotoa pe ʻa e faingamalie mo e tuʻutamaki.” ʻI he taimi ʻe niʻihi, ko e kakaí ko ʻenau ʻi he feituʻu hala pē ʻi he taimi hala. Neongo ai hotau ngaahi mālohinga pe vaivaiʻanga fakafoʻituituí, ko e faingataʻaʻiá mo e maté te ne maʻu taʻeʻamanekina pē ha taha ʻo kitautolu ʻi ha faʻahinga taimi pē. Hangē ko ení, ʻi he ʻaho ʻo Sīsuú naʻe holo ai ha taua ʻi Selusalema ʻo mate ai ha kakai ʻe toko 18. Naʻe fakahaaʻi ʻe Sīsū naʻe ʻikai ko hono tauteaʻi ʻona ia kinautolu ʻe he ʻOtuá ki haʻanau ngaahi angahala ki muʻa. (Luke 13:4) ʻIkai, heʻikai tukuakiʻi ʻa Sihova ia ki ha faingataʻaʻia pehē.

 9. Ko e hā ʻoku ʻikai mahinoʻi ʻe he tokolahi fekauʻaki mo e faingataʻaʻiá?

⁹ Ko hono mahinoʻi ʻa e niʻihi ʻo e tupuʻanga ʻo e faingataʻaʻiá ʻoku mahuʻinga. Kae kehe, ʻoku ʻi ai ʻa e tafaʻaki ʻe taha ʻo e meʻá ʻoku ʻilo ʻe he tokolahi ʻoku faingataʻa ke mahinoʻi. Ko eni ia: Ko e hā ʻoku fakaʻatā ai ʻe Sihova ko e ʻOtuá ʻa e faingataʻá?

Ko e Hā ʻOku Fakaʻatā Ai ʻe Sihova ʻa e Faingataʻá?

10, 11. (a) Fakatatau ki he Loma 8:​19-22, ko e hā naʻe hoko ki he ‘meʻa fakatupú kātoa’? (e) ʻE anga-fēfē nai haʻatau fakapapauʻi pe ko hai naʻá ne fakamoʻulaloa ʻa e meʻa fakatupú ki he muná?

¹⁰ Ko e potutohi ʻi he tohi ʻa e ʻapositolo ko Paulá ki he kakai Lomá ʻokú ne huluhulu mai ʻa e maama ki he kaveinga mahuʻinga ko ení. Naʻe tohi ʻe Paula: “Ko e ʻamanakituʻu ʻa Natula [“ʻa e meʻa fakatupú,” NW] ʻoku ne nofoʻaki tali ki he fakaeʻa ʻo e ngaahi foha ʻo e ʻOtua. He naʻe fakamoʻulaloa [ʻa e meʻa fakatupú] ki he muna: ka talaʻehai ko hono loto, ka koeʻuhi pe ko ia naʻa ne fai ʻa e fakamoʻulaloa: ka naʻe tuku ke ne ʻamanaki pe, ʻo pehe, Naʻa mo ia, [ʻa e meʻa fakatupú], ʻe faifai pea fakaʻataʻatā mei heʻene popula ki he ʻauha, kae fakahoko ia ki he tauʻataina fakalangi ʻa e fanau ʻa e ʻOtua. Seuke, ʻoku tau lāuʻilo pe, ʻoku fai ʻo aʻu ki he taimi ni ʻa e fetoʻeaki mo langā [ʻa e meʻa fakatupú] katoa.”—Loma 8:​19-22.

¹¹ Ke mahinoʻi ʻa e poini ʻo e ngaahi veesi ko ení, ʻoku tomuʻa fiemaʻu ke tau hanga ʻo veteki ha ngaahi fehuʻi tefito. Hangē ko ení, Ko hai naʻá ne fakamoʻulaloa ʻa e meʻa fakatupú ki he muná? Kuo tuhu ʻa e niʻihi kia Sētane; ko e niʻihi kia ʻĀtama. Ka heʻikai lava ʻe ha taha ʻo kinaua ke fai ʻa e fakamoʻulaloá. Ko e hā ʻoku ʻikai aí? Koeʻuhi ko e tokotaha ʻokú ne fakamoʻulaloa ʻa e meʻa fakatupú ki he muná ʻokú ne fai ia ʻi he “ʻamanaki.” ʻIo, ʻokú ne ʻomai ʻa e ʻamanaki ko e faʻahinga faitōnungá ʻe faifai pē ʻo ‘fakaʻatā mei heʻenau nofo popula ki he ʻauhá.’ ʻOku ʻikai lava ke ʻomai ʻe ʻĀtama pe ko Sētane ha ʻamanaki pehē. Ko Sihova pē te ne lavá. ʻOku hā mahino leva, ko ia naʻá ne fakamoʻulaloa ʻa e meʻa fakatupú ki he muná.

12. Ko e hā ʻa e puputuʻu kuo malanga hake fekauʻaki mo hono ʻiloʻi pau ʻo e ‘meʻa fakatupú kātoa,’ pea ʻe lava fēfē ke tali ʻa e fehuʻi ko ení?

¹² Ko e hā leva ʻa e ‘meʻa fakatupú kātoa’ ʻoku lave ki ai ʻi he konga tohi ko ení? ʻOku pehē ʻe he niʻihi ko e ‘meʻa fakatupú kātoa’ ko e lave ia ki he māmani matelie fakalūkufua ko ení, kau ai ʻa e fanga manú mo e ʻakaú. Ka ʻoku ʻamanaki ʻa e fanga manú mo e ʻakaú ke maʻu ʻa e “tauʻataina fakalangi ʻa e fanau ʻa e ʻOtua”? ʻIkai. (2 Pita 2:12) Ko e ‘meʻa fakatupú kātoa’ leva, ʻe lava ke lave pē ia ki he faʻahinga ʻo e tangatá. Ko e meʻa fakatupu eni ʻoku uesia ʻe he angahalá mo e maté koeʻuhi ko e angatuʻu ʻi ʻĪtení pea ʻoku nofo ia mo e fiemaʻu vavale ki ha ʻamanaki.​—Loma 5:12.

13. Ko e hā naʻe fai ʻe he angatuʻu ʻi ʻĪtení ki he faʻahinga ʻo e tangatá?

¹³ Ko e hā ʻa e meʻa tofu pē ko ia, naʻe fai ʻe he angatuʻu ko ení ki he faʻahinga ʻo e tangatá? ʻOku fakamatalaʻi ʻe Paula hono ngaahi nunuʻá ʻaki ʻa e foʻi lea pē taha: muna.a Fakatatau ki ha maʻuʻanga fakamatala ʻe taha, ʻoku fakamatalaʻi ʻe he foʻi lea ko ení “ko e muna ʻo ha meʻa ʻa ia ʻoku ʻikai ngāue ʻo fakatatau ki he meʻa naʻe ngaohi ia ki aí.” Ko e tangatá naʻe faʻu ia ke moʻui taʻengata, ʻo ngāue fakataha ko ha fāmili haohaoa mo fāʻūtaha ʻi hono tokangaʻi ʻo ha māmani palataisi. Ko hono kehé, ʻoku nau tataki ʻe kinautolu ha moʻui fuonounou, fakamamahi mo faʻa feifeitamaki. Hangē ko hono fakalea ia ʻe Siopé, “ko e tangata kuo fanauʻi ʻe he fefine ʻoku fuonounou ʻene moʻui, pea ʻoku fonu ʻi he mamahi.” (Siope 14:1) Ko e muna moʻoni!

14, 15. (a) Ko e hā ʻa e fakamoʻoni ʻo e fakamaau totonu ʻoku tau maʻu ʻi he tautea ko ia ʻe Sihova ʻa e faʻahinga ʻo e tangatá? (e) Ko e hā naʻe pehē ai ʻe Paula ko e meʻa fakatupú naʻe fakamoʻulaloa ia ki he muna “talaʻehai ko hono loto”?

¹⁴ ʻOku tau aʻu mai eni ki he fehuʻi tefitó: Ko e hā naʻe hanga ai ʻe he “Fakamāu ʻo mamani katoa” ʻo fakamoʻulaloa ʻa e faʻahinga ʻo e tangatá ki he moʻui fakamamahi mo feifeitamaki ko ení? (Senesi 18:25) Naʻá ne faitotonu ʻi heʻene fai peheé? Sai, manatuʻi ʻa e meʻa naʻe fai ʻe heʻetau ʻuluaki mātuʻá. ʻI heʻena angatuʻu ki he ʻOtuá, naʻá na faʻahi ai kinaua mo Sētane, ʻa ia naʻá ne langaʻi ha pole lahi ki he tuʻunga-hau ʻo Sihová. ʻI heʻena ngaahi ngāué, naʻá na poupouʻi ai ʻa e taukaveʻi ko ia ʻe lelei ange ʻa e tangatá ʻi he taʻekau ai ʻa Sihová, ʻo puleʻi pē ʻe ia ia ʻi he malumalu ʻo e tataki ʻa ha meʻamoʻui laumālie angatuʻu. ʻI hono tautea ʻo e ongo angatuʻú, naʻe hanga ai ʻe Sihova ʻo ʻoange kia kinaua ʻa e meʻa naʻá na holi ki aí. Naʻá ne fakaʻatā ʻa e tangatá ke ne puleʻi pē ia ʻi he tākiekina ʻa Sētané. ʻI he malumalu ʻo e ngaahi tuʻunga ko iá, ko e hā ha fili ʻe toe lava ke totonu lahi ange ka ko hono fakamoʻulaloa ʻa e faʻahinga ʻo e tangatá ki he muna ka ʻi he makatuʻunga ʻo e ʻamanaki?

¹⁵ Ko e moʻoni, ʻoku ʻikai ko e “loto” ia ʻo e meʻa fakatupú. ʻOku fanauʻi kitautolu ko e kau pōpula ki he angahalá mo e ʻauhá ʻo ʻikai haʻatau toe fili ke fai ʻi he meʻá ni. Ka ko Sihova ʻi heʻene mēsí naʻá ne fakaʻatā ʻa ʻĀtama mo ʻIvi ke na moʻui atu pea fanauʻi ha fānau. Neongo ko kitautolú, ʻa hona hakó, ʻoku fakamoʻulaloa ki he muna ʻo e angahalá mo e maté, ʻoku tau maʻu ʻa e faingamālie ke fai ʻa e meʻa naʻe taʻemalava ʻa ʻĀtama mo ʻIvi ke faí. ʻE lava ke tau fanongo kia Sihova mo ako ko hono tuʻunga-haú ʻoku māʻoniʻoni pea haohaoa, lolotonga ia ko e pule ʻa e tangatá ʻo mavahe meia Sihová ʻokú ne ʻomi pē ʻa e mamahi, feifeitamaki mo e muna. (Selemaia 10:23; Fakahā 4:11) Pea ko e tākiekina ʻa Sētané ʻokú ne ʻai pē ʻa e ngaahi meʻá ke toe kovi ange. ʻOku fakamoʻoni ʻa e hisitōlia ʻo e tangatá ki he ngaahi moʻoni ko ení.​—Koheleti 8:9.

16. (a) Ko e hā ʻe lava ke tau fakapapauʻi ai ko Sihova ʻoku ʻikai tupu mei ai ʻa e faingataʻa ʻoku tau sio ki ai ʻi he māmaní he ʻaho ní? (e) Ko e hā ʻa e ʻamanaki kuo tokonaki anga-ʻofa mai ʻe Sihova ki he kakai faitōnungá?

¹⁶ ʻOku hā mahino, naʻe maʻu ʻe Sihova ha ngaahi ʻuhinga totonu ki hono fakamoʻulaloa ʻa e faʻahinga ʻo e tangatá ki he muná. ʻOku ʻuhinga leva ia, ko Sihova ʻa e tupuʻanga ʻo e muna mo e faingataʻa ʻoku tofanga ai ʻa e tokotaha taki taha ʻo kitautolu ʻi he ʻaho ní? Sai, fakakaukau atu ki ha fakamaau ʻokú ne hilifaki ha tautea totonu ki ha tokotaha faihia. Ko e tokotaha faihiá te ne faingataʻaʻia lahi lolotonga ʻene ngāueʻi hono tauteá, ka ʻe lava ke tonu ʻene tukuakiʻi ʻa e fakamāú ki he tupuʻanga ʻo ʻene faingataʻaʻiá? ʻIkai ʻaupito! ʻIkai ko ia pē, ʻoku ʻikai ʻaupito ko Sihova ia ʻa e tupuʻanga ʻo e fulikivanú. ʻOku pehē ʻe Semisi 1:13: “Ko e ʻOtua ʻoku ʻikai maʻahiʻahiʻi ʻe he kovi, pea ʻoku ʻikai ke ʻahiʻahiʻi ha taha ʻe he ʻEne ʻAfio.” Tau toe manatuʻi foki, naʻe fakahā ʻe Sihova ʻa e tautea ko ení ʻi he “ʻamanaki.” Kuó ne fai anga-ʻofa ha ngaahi fokotuʻutuʻu ki he ngaahi hako faitōnunga ʻo ʻĀtama mo ʻIví ke nau sio ki hono fakangata ʻo e muná pea ke fiefia ʻi he “tauʻataina fakalangi ʻa e fanau ʻa e ʻOtua.” ʻI he kotoa ʻo ʻitānití, ʻe ʻikai ʻaupito ha toe fiemaʻu ke hohaʻa ʻa e faʻahinga faitōnunga ʻo e tangatá ki ha toe tūʻulu hifo nai ʻa e meʻa fakatupú kātoa ki ha tuʻunga fakamamahi ʻo e muná. Ko hono fakaleleiʻi totonu ʻe Sihova ʻa e ngaahi meʻá ʻe ʻosi fokotuʻu leva ai ʻa e totonu ʻo ʻene tuʻunga-haú ʻi he kotoa ʻo taimí.​—Aisea 25:8.

17. ʻOku totonu ke fēfē hono uesia kitautolu ʻe hono sivisiviʻi ko ia ʻa e ngaahi ʻuhinga ki he faingataʻaʻia ʻi he māmaní?

¹⁷ ʻI heʻetau sivisiviʻi ʻa e ngaahi ʻuhinga ko eni ki he faingataʻaʻia ʻa e tangatá, ʻoku tau sio ai ki ha faʻahinga makatuʻunga ke tukuakiʻi ai ʻa e fulikivanú kia Sihova pe mole ai ʻetau falala kiate iá? ʻI hono kehé, ko ha faʻahinga ako pehē ʻokú ne ʻomi ai ha ʻuhinga ke tau loto-tatau ai mo e ngaahi lea ko eni ʻa Mōsesé: “Ko Makatuʻu ia—ʻoku haohaoa ʻene ngaue; ko ʻene ngaahi founga kotoa ʻoku fakakonisitutone: ko e ʻOtua ʻo e Moʻoni, pea taʻe haʻane hala, ko e faitotonu ia mo haohaoa.” (Teutalonome 32:4) ʻI he fakalaulauloto ki he ngaahi meʻa ko ení, tau fakafoʻou angé ʻi he taimi ki he taimi ʻetau mahinoʻi ko ia kinautolú. ʻI he founga ko iá, ʻi he taimi ʻoku tau fehangahangai ai mo e ngaahi ʻahiʻahí, te tau talitekeʻi ai ʻa e ngaahi feinga ko ia ʻa Sētane ke tō ʻa e veiveiuá ki hotau ʻatamaí. Ko e hā leva, ʻa e sitepu hono ua naʻe lave ki ai ʻi he kamataʻangá? Ko e hā ʻoku kaunga ki he falala kia Sihová?

ʻUhinga ʻo e Falala kia Sihová

18, 19. ʻAki ʻa e ngaahi lea fē ʻoku hanga ai ʻe he Tohitapú ʻo fakalototoʻaʻi kitautolu ke falala kia Sihová, ka ʻi he tuʻunga ko iá, ko e hā ʻa e ngaahi fakakaukau hala ʻoku maʻu ʻe he niʻihi?

¹⁸ ʻOku naʻinaʻi mai kia kitautolu ʻa e Folofola ʻa e ʻOtuá: “Falala kia Jihova aki ho loto kotoa; bea oua naa ke faaki ki ho boto oou. Ke ke fakaogoogo kiate ia i ho hala kotoabe, bea e fakatonutonu eia ho gaahi aluaga.” (Palovepi 3:​5, 6, PM) Ko e ngaahi lea fakaʻofoʻofa mo fakafiemālie ia. ʻOku pau moʻoni ʻoku ʻikai ha taha ʻi he kotoa ʻo e ʻunivēsí ʻoku toe alafalalaʻanga ange ʻi heʻetau Tamai ʻofa fakahēvaní. Neongo ia, ʻoku faingofua ange hono lau ʻo e ngaahi lea ko ia ʻi he Palovepí ʻi hono faí.

¹⁹ Kuo maʻu ʻe he tokolahi ʻa e fakakaukau hala fekauʻaki mo e meʻa ʻoku ʻuhinga ki ai ʻa e falala kia Sihová. ʻOku fakakaukau ʻa e niʻihi ko e falala peheé ko ha foʻi ongo pē ia, ko ha faʻahinga ongo māfana ʻoku totonu ke tupu fakanatula hake pē ʻi he lotó. Ko e niʻihi ʻoku hā ʻoku nau tui ko e falala ki he ʻOtuá ʻoku ʻuhinga ia ʻoku lava ke tau ʻamanekina ia ke maluʻi kitautolu mei he faingataʻa kotoa pē, ke fakaleleiʻi ʻetau palopalema kotoa pē, ke ʻai ʻa e pole fakaʻaho kotoa pē ke iku ʻo hangē tofu pē ko e meʻa ʻoku tau ʻamanaki ki aí​—pea ʻi he taimi pē ko iá! Ka ko e ngaahi fakakaukau peheé ʻoku taʻehamakatuʻunga. Ko e falalá ʻoku mahulu mamaʻo atu ia ʻi ha foʻi ongoʻi pē, pea ʻoku ʻikai ke taʻemoʻoni. ʻI he kakai lalahí, ko e falalá ʻoku felāveʻi ia mo hono fai ha ngaahi fili ʻiloʻilo pau mo ʻosi fakakaukauʻi.

20, 21. Ko e hā ʻoku kaunga ki he falala kia Sihová? Fakamatalaʻi.

²⁰ Toe fakatokangaʻi ʻa e meʻa ʻoku leaʻaki ʻe he Palovepi 3:5 (PM). ʻOkú ne fakafaikehekeheʻi ʻa e falala kia Sihová mo e faaki ki he poto pē ʻotautolú, ʻo fakahaaʻi mai ai ʻoku ʻikai malava ke tau fai fakatouʻosi kinaua. ʻOku ʻuhinga iá ʻoku ʻikai fakaʻatā kitautolu ke tau ngāueʻaki ʻetau ngaahi mafai fakaefakakaukaú? ʻIkai, he ko Sihová, ʻa ia naʻá ne foaki mai kia kitautolu ʻa e ngaahi mālohi ko iá, ʻokú ne ʻamanekina ke tau ngāueʻaki kinautolu ʻi he tauhi kiate iá. (Loma 12:1) Ka ko e hā ʻoku tau faaki, pe fakafalala ki aí? Kapau ʻoku ʻikai ke feongoongoi ʻetau fakakaukaú mo e fakakaukau ʻa Sihová, ʻoku tau tali hono potó koeʻuhi ko hono tuʻungá​—ʻene māʻolunga ange taʻefakangatangata ʻi hoʻotautolú? (Aisea 55:​8, 9) Ke falala kia Sihova ʻoku ʻuhinga ia ko hono fakaʻatā ʻene fakakaukaú ke ne tataki hoʻotautolú.

²¹ Ko e fakatātaá: Fakakaukau atu ki ha kiʻi tama ʻoku taʻutu ʻi he sea mui ʻo ha kā, kae nofo ʻi muʻa ʻene ongo mātuʻá. Ko ʻene tamaí ʻoku fakaʻulí. ʻI he malanga hake ha ngaahi faingataʻa lolotonga ʻa e fonongá​—ko ha fehuʻi fekauʻaki mo e hala totonú pe mahalo ko ha palopalema fekauʻaki mo e ʻeá pe ko e tuʻunga ʻo e halá​—ʻoku anga-fēfē ʻa e anga-fai ʻa ha kiʻi tama ʻoku talangofua mo loto-falala? ʻOkú ne kaikaila atu ha ngaahi fakahinohino mei he sea muí, ʻo tala ki heʻene tamaí ʻa e anga hono fakaʻuli ʻo e kaá? ʻOkú ne fehuʻia ʻa e ngaahi fili ʻene ongo mātuʻá pe fakafetau ʻi he taimi ʻokú na fakamanatu ai kiate ia ke fakamaʻu maʻu pē hono leta seá. ʻIkai, ʻokú ne falala fakanatula pē ki heʻene ongo mātuʻá ke na fakaleleiʻi ʻa e ngaahi meʻa peheé, neongo ʻena taʻehaohaoá. ʻIa Sihova, ʻoku tau maʻu ha Tamai haohaoa. ʻIkai ʻoku totonu ke tau falala kakato kiate ia, tautautefito ʻi he taimi ʻoku tau fehangahangai ai mo e ngaahi tuʻunga faingataʻá?​— Aisea 30:21.

22, 23. (a) Ko e hā ʻoku totonu ai ke tau tuku ʻetau falalá kia Sihova ʻi he taimi ʻoku tau fehangahangai ai mo e ngaahi palopalemá, pea ʻe lava fēfē ke tau fai pehē? (e) Ko e hā ʻe lāulea ki ai ʻi he kupu hono hokó?

²² Kae kehe, ʻoku fakahaaʻi ʻe he Palovepi 3:6 ʻoku totonu ke tau ‘fakaongo kiate ia ʻi hotau hala kotoa pe,’ ʻo ʻikai ngata pē ʻi he taimi ʻoku tau fehangahangai ai mo e ngaahi tuʻunga faingataʻá. Ko ia ko e ngaahi fili fakaʻaho ʻoku tau fai ʻi he moʻuí ʻoku totonu ke tapua ai ʻetau falala kia Sihová. ʻI he malanga hake ha ngaahi palopalemá, ʻoku ʻikai totonu ke siva ai ʻetau ʻamanakí, hohaʻatuʻu, pe talitekeʻi ʻa e tataki ʻa Sihova fekauʻaki mo e founga lelei taha ke fakaleleiʻi ai ʻa e ngaahi meʻá. ʻOku fiemaʻu ke tau vakai ki he ngaahi ʻahiʻahí ko ha faingamālie ia ke poupouʻi ai ʻa e tuʻunga-hau ʻo Sihová, ke tokoni ke fakamoʻoniʻi ko e tokotaha loi ʻa Sētane, pea ke langa hake ʻa e talangofuá mo e ngaahi ʻulungaanga kehe ko ia ʻoku fakahōifua kia Sihová.​—Hepelu 5:​7, 8.

²³ ʻE lava ke tau fakahāhā ʻetau falala kia Sihová neongo ai pē pe ko e hā ha ngaahi fakafaingataʻaʻiaʻanga ʻoku maluʻaki mai kia kitautolu. ʻOku tau fai pehē ʻi heʻetau ngaahi lotú pea ʻi he founga ʻoku tau hanga ai ki he Folofola ʻa Sihová pea ki heʻene kautahá ki ha tatakí. Ko e meʻa tefitó leva, ʻoku lava fēfē ke tau fakahāhā ʻa e falala kia Sihová ʻi he taimi ʻoku tau fehangahangai ai mo e ngaahi palopalema ʻoku malanga hake ʻi he māmani ʻo e ʻaho ní? Ko e kupu hokó ʻe lāulea ai ki he kaveinga ko iá.

[Fakamatala ʻi lalo]

ʻE Fēfē Haʻo Tali?

• Naʻe anga-fēfē hono fakahāhā ʻe Tēvita naʻá ne ʻai ʻa Sihova ko hono falalaʻangá?

• Ko e hā ʻa e tupuʻanga ʻe tolu ʻo e faingataʻaʻia ʻa e tangatá ʻi he ʻaho ní, pea ko e hā ʻoku lelei ai ʻi he taimi ki he taimi ke fakamanatu kinautolú?

• Naʻe fakahā ʻe Sihova ʻa e tautea fē ki he tangatá, pea ko e hā ko ha tautea totonu ai iá?

• Ko e hā ʻoku kaunga ki he falala kia Sihová?

[Fakatātā ʻi he peesi 8]

Naʻe ʻai ʻe Tēvita ʻa Sihova ko hono falalaʻanga

[Fakatātā ʻi he peesi 10]

Naʻe fakahā ʻe Sīsū ko e taimi naʻe holo ai ha taua ʻe taha ʻi Selusalema, naʻe ʻikai ko Sihova ia naʻe tupu mei aí