ʻE Maʻu Koā ʻe he Kau Faingataʻaʻiá ha Nonga?

TE KE saiʻia ke ke sio ki ha ngataʻanga ʻo e faingataʻá, ʻo ʻikai kiate koe pē ka ki he faʻahinga ʻo e tangatá kotoa? Fakakaukau ange ki he ngaahi fakatātā ko ʻení:

Naʻe faingataʻaʻia lahi ʻa Sōnia.a ʻUluakí, naʻá ne toki ʻilo tā ko hono husepānití kuó ne tono he taʻu ʻe hongofulu. Naʻe hoko leva ʻa ʻene kiʻi tamasiʻi siʻisiʻi tahá ʻo pihia he HIV pea mate ai ʻi he ʻeitisí. Taʻu ʻe ua mei ai naʻe hoko ai ʻa ʻene toe tamasiʻi ʻe tahá ʻo puke, pea ʻikai fuoloa kuo toe mate mo ia ʻi he ʻeitisí. “Ko e tafaʻaki fakaʻosi ʻo hono mahakí naʻe tolonga ia ʻo fuʻu fuoloa,” ko e manatu ia ʻa Sōnia. “Naʻe tofanga ʻa e kiʻi tamá ʻi he loto-mafasia lahi ʻaupito, naʻe ngangana hono louʻulú, pea ʻikai malava ke ne sio lelei. Naʻe hoko ia ko ha meʻa fakamamahi ʻaupito.”

Ko Fapiana, ko ha tokotaha ako ʻunivēsiti Pelēsila, naʻe hohaʻa ʻo fekauʻaki mo e ngaahi fakamaau taʻetotonu fakasōsiale ʻa e māmaní. Naʻe uesia leva ʻe ha meʻa fakamamahi ʻa ʻene moʻuí tonu. Naʻe faingataʻaʻia ʻa hono tuongaʻané tupu mei he loto-mafasia, pea taonakita ai. ʻI he taimi naʻe mole ai ʻa e ngāue ʻa Fapiana, naʻe fokotuʻu ange ʻe hano kaungāfefine ke ne fekumi ki ha pai-​de-​santo (toketā fakatēvolo) ʻi he fakakaukau ʻo pehē ko e faingataʻaʻia ʻa Fapiana ʻi he mala peheé kuo pau pē ko hano talatukiʻi ia ʻe ha taha! Ka naʻe ʻikai ke ʻomai ʻe he pai-​de-​santo ha nonga. Kae kehe, naʻe ongoʻi ʻe Fapiana ia ʻoku fakamamahiʻi ia, ʻo ʻikai malava ke mohe koeʻuhi ko hono ngaahi faingataʻaʻiá.

Naʻe tōmuʻa ange ʻa e kamata ʻa e faingataʻaʻia ʻa ʻAna ʻi he moʻuí. “ʻI heʻeku taʻu tahá,” ko ʻene fakamatalá ia, “naʻe liʻaki au ʻe heʻeku faʻeé, ko ia ai naʻe tokangaʻi au ʻe heʻeku kui fefiné.” Pea ʻi he taʻu tolu pē ʻa ʻAná, naʻe mate ʻa ʻene kui fefiné. Naʻe ʻave ʻa ʻAna ki ha fale tauhi-paea ʻi Rio de Janeiro, ʻa ia naʻá ne nofo ai ʻo aʻu ki hono taʻu 13. “Naʻe ngaohikoviʻi ʻaupito kimautolu ai, pea naʻá ku hoko ʻo angatuʻu,” ko ʻene leá ia. “ʻI heʻeku tupu haké, naʻá ku fakafepakiʻi ʻa e meimei meʻa kotoa pē.”

ʻOku hangehangē ʻoku uesia ʻe he faingataʻaʻiá ʻa e moʻui ʻa e faʻahinga ʻo e tangatá kotoa ʻi he founga ko ē pe ko ē. Ko hono moʻoní, ʻoku tau fetaulaki mo e ngaahi talanoa fekauʻaki mo e meʻa fakamamahi ʻoku hoko ki he faʻahinga ʻo e tangatá kotoa ʻi he ʻaho kotoa pē​—ʻi ha taimi pē ʻoku tau sio ai, lau, pe fanongo ki he ngaahi ongoongó. “Naʻe toki hoko pē ʻi hotau . . . kuonga ʻo e fetuʻutaki kāfakafá ʻa e ʻikai malava ke tau hao mei hono nafui tuʻumaʻu ʻaki ʻa e ngaahi ongoongo koví,” ko e tohi ia ʻa Dr. Mary Sykes Wylie. “Ko e ngaahi taú, ngaahi fakatamaki fakanatulá, ngaahi fakatuʻutāmaki fakaengāué, ngaahi fakatuʻutāmaki ʻi he halá, faihiá, anga-fakaaoaó, pāʻusiʻi fakaefehokotaki fakasinó, tohotohó, anga-fakamālohi ʻi he fāmilí​—ʻoku nau ʻai kotoa ʻa e mafasia fakaeongó ʻo hoko ko ha meʻa fakalilifu mo toutou hoko ia ʻo e senituli hono 20 ní.” Ko hono moʻoní, naʻe fakanounouʻi mai ʻe he ʻaposetolo Kalisitiane ko Paulá ʻa e meʻa ʻoku hokosia ʻe he tangatá: “ʻOku fai ʻo aʻu ki he taimi ni ʻa e fetoʻeaki mo langā ʻa natula katoa.”​—Loma 8:​22.

Fēfē koe? ʻOkú ke hokosia ha faingataʻaʻia? Ko e hā ʻa e nonga ʻoku lava ke ke ʻamanekiná? Te ke maʻu koā ʻa e melino moʻoní? Ko Sōnia, Fapiana, mo ʻAna naʻa nau maʻu ʻa e fiemālie moʻoní mo ha melino moʻoni! ʻE lava ke ke lau ʻo fekauʻaki mo ia ʻi he kupu hono hoko maí.

[Fakamatala ʻi lalo]