“Mou Hoko Kimoutolu Foki ko e Maʻoniʻoni ʻi Hoʻomou Toʻonga Kotoa Pe”

“Ka mou anga ki he Toko Taha Maʻoniʻoni ne ne ui kimoutolu, ʻo mou hoko kimoutolu foki ko e maʻoniʻoni ʻi hoʻomou toʻonga kotoa pe: koeʻuhi kuo tohi ʻo pehe, Te mou maʻoniʻoni, he ʻoku ou maʻoniʻoni.”​—1 PETER 1:​15, 16.

 1. Ko e hā naʻe fakalototoʻaʻi ai ʻe Pita ʻa e kau Kalisitiané ke māʻoniʻoní?

KO E HĀ naʻe ʻomai ai ʻe he ʻaposetolo ko Pitá ʻa e akonaki ʻi ʻolungá? Koeʻuhi naʻá ne sio ki he fiemaʻu ki he Kalisitiane taki taha ke maluʻi ʻene ngaahi fakakaukaú mo ʻene ngaahi tōʻongá koeʻuhi ke tauhi maʻu kinautolu ʻo fakatatau ki he tuʻunga māʻoniʻoni ʻo Sihová. Ko ia ai, naʻá ne leaʻaki ki muʻa he ngaahi lea ʻi ʻolungá ʻo pehē: “Ko ia mou ʻai ʻa e noʻo homou loto, mo laka fakaʻehiʻehi . . . Fai ʻo ngali mo ha fanau talangofua, ʻo ʻoua te mou tuku kimoutolu ke anga ki hoʻomou ngaahi holi muʻa, fai ʻi he taʻeʻilo.”​—1 Pita 1:​13, 14.

 2. Ko e hā naʻe taʻemāʻoniʻoni ai ʻetau ngaahi holí ki muʻa ke tau ako ʻa e moʻoní?

² Ko ʻetau ngaahi holi ki muʻá naʻe taʻemāʻoniʻoni. Ko e hā hono ʻuhingá? Koeʻuhi ko e tokolahi ʻo kitautolú naʻa tau muimui ʻi ha ʻalunga ʻo e tōʻonga fakamāmaní ki muʻa ia ʻi heʻetau tali ʻa e moʻoni faka-Kalisitiané. Naʻe ʻiloʻi ʻe Pita ʻa e meʻá ni ʻi heʻene tohi fakapatonu: “Seuke, kuo lahi pe ʻa e taimi kuo hili ke fai ʻaki ʻa e loto ʻo e Senitaile; ʻa ia naʻa mou fou ʻi he ngaahi pauʻu fakalielia, mo e ngaahi holikovi, mo e faʻa uaineʻia, mo e ngaahi katoanga kai, mo e ngaahi katoanga inu kava; pea mo e meʻa ko ia ʻoku tapuhā ʻa e feingalotu ki he aitoli.” Ko e moʻoni, naʻe ʻikai ke fokotuʻu mai ʻe Pita ia ʻa e ngaahi tōʻonga taʻemāʻoniʻoní ʻo toe kehe mo e tuʻunga ʻi hotau māmani ʻi onopooní, he naʻe ʻikai ke ʻiloʻi ia ʻe hoko he ʻahó ni.​—1 Pita 4:​3, 4.

3, 4. (a) ʻE malava fēfē ke tau fakafepakiʻi ʻa e ngaahi holi fehālaakí? (e) ʻOku totonu ke ʻoua ʻe ʻi ai ha ngaahi ongoʻi ia ʻo e lotó ʻi he kau Kalisitiané? Fakamatalaʻi.

³ Naʻá ke fakatokangaʻi ko e ngaahi holi ko ʻení ko kinautolu ia ʻoku fakamānako ki he kakanó, ki he ngaahi ongoʻangá, pea ki he ngaahi ongo ʻo e lotó? ʻI heʻetau fakaʻatā ʻa e ngaahi meʻá ni ke pulé, ʻoku fuʻu faingofua leva ai ke hoko ʻo taʻemāʻoniʻoni ʻetau ngaahi fakakaukaú mo ʻetau ngaahi tōʻongá. ʻOku fakatātaaʻi ʻe he meʻá ni ʻa e fiemaʻu ke tuku ʻa e mafai ʻo e fakakaukaú ke ne puleʻi ʻetau ngaahi toʻongá. Naʻe fakamatalaʻi ia ʻe Paula ʻo pehé ni: “Koeni, e kaiga, oku ou kole ai kiate kimoutolu, koe mea i he gaahi aloofa ogogofua ae Otua, ke mou atu ho mou jino koe feilaulau moui, mo maonioni, mo lelei ki he Otua, aia koe gaue oku tāu mo kimoutolu ke fai.”​—Loma 12:​1, 2, PM.

⁴ Ke ʻoatu ki he ʻOtuá ha feilaulau māʻoniʻoni, kuo pau ke tau tuku ʻa e mafai fakaefakakaukaú ke pule, ʻo ʻikai ko e ngaahi ongo ʻo e lotó. Ko e toko fiha ē kuo tafia atu ki he ʻulungaanga taʻetāú koeʻuhi ko ʻenau fakaʻatā ke puleʻi honau ʻulungaangá ʻe heʻenau ngaahi ongó! ʻOku ʻikai ke ʻuhinga iá kuo pau ke lōmia ʻa e ngaahi ongo ia hotau lotó; he ka pehē, ʻe lava fēfē ke tau fakahaaʻi ʻa e fiefia ʻi he ngāue ʻa Sihová? Kae kehe, kapau ʻoku tau loto ke fakatupu ʻa e fua ʻo e laumālié kae ʻikai ko e ngaahi ngāue ʻa e kakanó, tā kuo pau leva ke liliu ʻetau ngaahi fakakaukaú ki he founga ʻo e fakakaukau ʻa Kalaisí.​—Kalētia 5:​22, 23; Filipai 2:5.

Moʻui Māʻoniʻoni, Totongi Māʻoniʻoni

 5. Ko e hā naʻe tokanga ai ʻa Pita ki he fiemaʻu ʻo e tuʻunga māʻoniʻoní?

⁵ Ko e hā naʻe fuʻu tokanga ai ʻa Pita ki he fiemaʻu ke ʻi he tuʻunga māʻoniʻoni faka-Kalisitiané? Koeʻuhi he naʻá ne ʻilo lelei ki he totongi māʻoniʻoni ko ia kuo fai ke huhuʻi ʻa e faʻahinga ʻo e tangata talangofuá. Naʻá ne tohi: “Ko hoʻomou ʻilo, naʻe ʻikai fai ʻaki ʻa e ngaahi meʻa ʻauha, ha siliva pe ha koula, homou huhuʻi mei he anga taʻeʻaonga ne tukufakaholo mai mei he matuʻa; ka naʻe fai ʻaki ha taʻataʻa maʻongoʻonga, he ko e toto ʻo ha lami taʻemele mo taʻeʻila, ko e taʻataʻa ʻo Kalaisi.” (1 Pita 1:​18, 19) ʻIo, ko e Matavai ʻo e tuʻunga māʻoniʻoní, ʻa Sihova ko e ʻOtuá, kuó ne fekau mai hono ʻAlo tofu-pe-taha-ne-fakatupú, “ko e Tokotaha Māʻoniʻoní,” ki māmani ke totongi ʻa e huhuʻi ko ia ʻe fakaʻatā ai ʻa e kakaí ke maʻu ha vā lelei mo e ʻOtuá.​—Sione 3:​16; 6:​69, NW; ʻEkisoto 28:36; Mātiu 20:28.

 6. (a) Ko e hā ʻoku ʻikai faingofua ai kiate kitautolu ke tuli ki he ʻulungaanga māʻoniʻoní? (e) Ko e hā ʻoku lava ke ne tokoniʻi kitautolu ke tauhi maʻu hotau ʻulungaanga māʻoniʻoní?

⁶ Kae kehe, ʻoku pau ke tau ʻiloʻi ʻoku ʻikai faingofua ke iku ki ha moʻui māʻoniʻoni lolotonga iá ʻoku tau ʻi he lotolotonga ʻo e māmani fakameleʻi ʻo Sētané. ʻOkú ne fakatoka ʻa e ngaahi tauhele ki he kau Kalisitiane moʻoní, ʻa ē ʻoku nau feinga ke hao mei heʻene fokotuʻutuʻu ko ʻení. (ʻEfesō 6:​12; 1 Tīmote 6:​9, 10) Ko e ngaahi fakafeʻātungia ʻo e ngāue ʻi he māmaní, ko e fakafepaki ʻa e fāmilí, ko e manukiʻi he akoʻangá, pea mo e fakaʻaiʻai ʻa e toʻumeʻá ʻoku fiemaʻu ai ʻa e tuʻunga fakalaumālie mālohi ki ha taha ke ne puke maʻu ʻa e tuʻunga māʻoniʻoní. ʻOku fakamamafaʻi ai ʻa e ngafa mahuʻinga ko ʻetau ako fakafoʻituituí, pea mo ʻetau maʻu maʻu pē ʻa e ngaahi fakataha faka-Kalisitiané. Naʻe akonaki ʻa Paula kia Tīmote: “Buke ke maʻu ae jino oe gaahi lea haohaoa, aia naa ke fanogo ai iate au, i he tui moe ofa aia oku ia Kalaisi Jisu.” (2 Tīmote 1:​13, PM) ʻOku tau fanongo ki he ngaahi lea foaki-moʻui ko iá ʻi hotau Fale Fakatahaʻangá pea ʻi heʻetau ako fakaekitautolu ʻa e Tohitapú. ʻOku malava ke nau tokoniʻi kitautolu ke māʻoniʻoni ʻi ha tuʻunga fakaʻaho ʻi hotau ʻulungaangá ʻi he ngaahi ʻātakai kehekehe.

ʻUlungaanga Māʻoniʻoni ʻi he Fāmilí

 7. ʻOku totonu ke anga-fēfē hono uesia ʻe he tuʻunga māʻoniʻoní ʻetau moʻui fakafāmilí?

⁷ ʻI he lave ʻa Pita ki he Livitikō 11:44, naʻá ne ngāueʻaki ʻa e foʻi lea faka-Kalisi ko e haʹgi·os, ʻa ia ʻoku ʻuhingá ko e “mavahe mei he angahalá pea ko ia naʻe fakatapui ai ki he ʻOtuá, ʻo toputapu.” (An Expository Dictionary of New Testament Words, ʻa W. E. Vine) ʻOku totonu ke anga-fēfē hono uesia ʻe he meʻá ni kitautolu ʻi heʻetau moʻui fakafāmili faka-Kalisitiané? ʻOku pau pē ko e moʻoni ʻoku ʻuhingá ko ʻetau moʻui fakafāmilí ʻoku totonu ke makatuʻunga ia ʻi he ʻofa, he ko e “ʻOtua ko e ʻOfa.” (1 Sione 4:8) Ko e ʻofa feilaulauʻi-kitá ko e lolo ia ʻokú ne fakalolo ʻa e ngaahi vā ʻi he vahaʻa ʻo e ngaahi hoa malí pea ʻi he vahaʻa ʻo e ngaahi mātuʻá mo e fānaú.​—1 Kolinitō 13:​4-8; ʻEfesō 5:​28, 29, 33; 6:4; Kolose 3:​18, 21.

8, 9. (a) Ko e hā ʻa e tuʻunga ʻoku tupu ʻi he taimi ʻe niʻihi ʻi ha ʻapi Kalisitiane? (e) Ko e hā ʻa e akonaki fakapotopoto ʻoku ʻomai ʻe he Tohitapú ʻi he meʻá ni?

⁸ ʻOku tau fakakaukau nai ko hono fakahaaʻi ʻa e ʻofa peheé ʻe ʻotomētiki pē ia ʻi ha fāmili Kalisitiane. Ka neongo ia, ʻoku pau ke fakamoʻoniʻi ia ko e ʻofá ʻoku ʻikai ke pule maʻu pē ia ki he lahi taha ʻoku totonu ke ʻi aí ʻi he ngaahi ʻapi Kalisitiane ʻe niʻihi. ʻE ngali hā nai ʻoku fai pehē ʻi he Fale Fakatahaʻangá, ka he toki meʻa faingofua ē ke tamatemate nai ʻetau tuʻunga māʻoniʻoní ʻi ʻapi. ʻE ngalo fakafokifā nai leva ʻiate kitautolu ko e uaifí ʻoku kei hoko pē ia ko hotau tuofefine Kalisitiane pe ko e husepānití ʻoku kei hoko pē ia ko e tuongaʻane tatau (pea mahalo pē ko ha sevāniti fakafaifekau pe ko ha mātuʻa) ʻa ē naʻe hā ʻoku fakaʻapaʻapaʻi ʻi he Fale Fakatahaʻangá. ʻOku tau loto-moʻua ʻo ʻiteʻita, pea ʻoku lava ke fakatupunga ai ʻa e ngaahi kē fakakikihi. ʻE lava ke totolo mai ki heʻetau moʻuí ha tuʻunga lōua. ʻO ʻikai ke kei hoko ko e husepāniti mo e uaifi hangē ko Kalaisí ʻi hona vaá ka ko ha tangata pē mo ha fefine ʻokú na kē. ʻOku ngalo ia ʻiate kinaua ʻoku totonu ke ʻi ai ha ʻatimosifia māʻoniʻoni ʻi he ʻapí. Mahalo pē ʻoku kamata ke na lea hangē ko e kakai ʻo e māmaní. He meʻa faingofua ē ko e lava ke hū mai mei he ngutú, ha lea palakū, fakatupu loto-mamahi!​—Palōvepi 12:18; fakafehoanaki mo Ngāue 15:37-​39.

⁹ Kae kehe, ʻoku akonaki mai ʻa Paula: “ʻIlonga ha lea ʻe ʻikai siaʻa [faka-Kalisí, loʹgos sa·prosʹ, ko e “lea ʻuli,” ko ia ai ʻoku taʻemāʻoniʻoni] pea tapu ʻene hu atu mei homou ngutu: ka ʻoka ai ha meʻa ʻoku ngali ʻaonga ʻi he faingataʻa ʻoku fai, ke ʻalu atu ia, heiʻilo ʻe maʻu tokoni mei ai ʻe he kakai ʻoku fanongo.” Pea ʻoku ʻuhinga ia ki he kau fanongo kotoa pē ʻi he ʻapí, ʻo kau ai ʻa e fānaú.​—ʻEfesō 4:​29; Sēmisi 3:​8-​10.

10. ʻOku anga-fēfē hono ngāueʻaki ki he fānaú ʻa e akonaki ki he tuʻunga māʻoniʻoní?

¹⁰ Pehē foki ko e tataki ko ʻeni ki he tuʻunga māʻoniʻoní ʻoku ngāueʻaki tatau pē ia ki he fānau ʻi ha fāmili Kalisitiane. He toki meʻa faingofua ia kiate kinautolu ke foki mai ki ʻapi mei he akó pea kamata ke faʻifaʻitakiʻi ʻa e talanoa angatuʻu mo taʻefakaʻapaʻapa ʻa honau ngaahi toʻumeʻa ʻi he māmaní! Fānau, ʻoua ʻe saiʻia ʻi he ngaahi fakakaukau ko ia naʻe fakahaaʻi ʻe he tamaiki tangata anga-fakamanu naʻa nau fakalotomamahiʻi ʻa e palōfita ʻa Sihová pea ko ʻenau lea kovi fakalieliá ʻoku tatau ia mo ē he ʻaho ní. (2 Tuʻi 2:​23, 24) ʻOku totonu ke ʻoua naʻa ʻuliʻi hoʻo leá ʻi he leaʻaki ʻa e ngaahi sīpinga lea ko ia ʻoku ngāueʻaki ʻe he kakai ʻi he hala puleʻangá, ʻa ia ʻoku nau fuʻu fakapikopiko pe taʻefakaʻatuʻi ke ngāueʻaki ʻa e ngaahi lea taau. ʻI hotau tuʻunga ko e Kalisitiané, ʻoku totonu ke māʻoniʻoni ʻa ʻetau leá, lelei, langa hake, anga-ʻofa, pea “fakaifo ʻaki ha masima.” ʻOku totonu ke ne fakaʻilongaʻi kitautolu ʻoku tau faikehekehe mei he kakai kehé.​—Kolose 3:​8-​10; 4:6.

Tuʻunga Māʻoniʻoní mo e Ngaahi Mēmipa Taʻetui ʻi Hotau Fāmilí

11. Ko e hā ʻoku ʻikai ʻuhinga ai ʻa e māʻoniʻoní ia ko e fuʻu fie māʻoniʻoni faú?

¹¹ Lolotonga ʻoku tau feinga loto-tōnunga ke fai ki he tuʻunga māʻoniʻoní, ʻoku totonu ke ʻoua ʻe hā ʻoku tau hoko ʻo loto-mahikihiki mo fuʻu fie māʻoniʻoni fau, tautefito ʻi he taimi ʻoku tau feangainga ai mo e ngaahi mēmipa taʻetui ʻi hotau fāmilí. Ko ʻetau anga-ʻofa ʻi hotau ʻulungaanga faka-Kalisitiané ʻoku totonu ke ne tokoniʻi kinautolu ʻi ha tuʻunga pē ke sio ʻoku tau makehe ʻi ha founga lelei, ʻa ia ʻoku tau ʻilo ʻa e founga ki hono fakahāhaaʻi ʻa e ʻofa mo e kaungāongoʻi, ʻo hangē ko ia naʻe fai ʻe he Samaletani leleí ʻi he talanoa fakatātā ʻa Sīsuú.​—Luke 10:30-​37.

12. ʻOku malava fēfē ki he ngaahi hoa mali Kalisitiané ke ʻai ʻa e moʻoní ke fakamānako ange ki honau ngaahi hoá?

¹² Naʻe fakamamafaʻi ʻe Pita ʻa e mahuʻinga ʻo ha fakakaukau totonu ki he ngaahi mēmipa taʻetui ʻi hotau fāmilí ʻi heʻene tohi ki he ngaahi uaifi Kalisitiané: “Pehe foki, ʻa kau fefine, mou anganofo ki homou ngaahi husepaniti; koeʻuhi ka ai ha niʻihi ʻoku talangataʻa ki he folofola, heiʻilo ʻe maʻu mai kinautolu ʻaki ʻa e ngaahi toʻonga ʻa honau ngaahi uaifi, kae ʻikai ʻaki ha lea; heʻenau mamata ki he maʻa ʻo hoʻomou fakafeangai mo taka ʻapasia.” Ko ha uaifi Kalisitiane (pe husepāniti ʻi he meʻa ko iá) ʻoku lava ke ne ʻai ke fakamānako ange ʻa e moʻoní ki hano hoa taʻetui kapau ʻoku anga-maʻa ʻi hono ʻulungaangá, ʻo fakaʻatuʻi, mo fakaʻapaʻapa. ʻOku ʻuhinga ʻení ʻoku totonu ke ʻi ai ha ngaofengofua ʻi heʻene taimi-tēpile fakateokalatí koeʻuhi ke ʻoua naʻa fakalīlīʻaki pe taʻetokangaʻi ʻa hono hoa taʻetuí.a​—1 Pita 3:​1, 2.

13. ʻOku malava fēfē ki he kau mātuʻá mo e kau sevāniti fakafaifekaú ʻo tokoniʻi ʻi he taimi ʻe niʻihi ʻa e ngaahi husepāniti taʻetuí ke nau houngaʻia ʻi he moʻoní?

¹³ ʻE lava ke tokoni ʻi he taimi ʻe niʻihi ʻa e kau mātuʻá mo e kau sevāniti fakafaifekaú ʻaki ʻenau feinga ke maheni mo e husepāniti taʻetuí ʻi ha fakamaheni ki ai. ʻI he foungá ni ʻe lava ke ne sio ai ko e kau Fakamoʻoní ʻoku nau tatau pē mo e kakai kehé, ko e kakai taau pea ʻoku lahi mo e ngaahi meʻa kehekehe ʻoku nau mahuʻingaʻia ai, ʻo kau ai ʻa e ngaahi kaveinga kehe mei he Tohitapú. ʻI he tafaʻaki ʻe tahá, naʻe mahuʻingaʻia ai ha mātuʻa ʻi he manako taumātaʻu ʻa e husepānití. Naʻe feʻunga pē ia ke ne holoki ʻa e ʻā vahevahé. Naʻe faifai atu pē ʻo hoko ko ha tokoua ʻosi papitaiso ʻa e husepāniti ko iá. ʻI ha toe tafaʻaki ʻe taha, naʻe mahuʻingaʻia ai ha husepāniti taʻetui ʻi he fanga kiʻi hengá. Naʻe ʻikai ke foʻi ai ʻa e kau mātuʻá. Naʻe ako ki heni ha taha ʻo kinautolu koeʻuhi pē ke lava ke ne kamata ha pōtalanoa mo e tangatá he taimi ko ia hono hoko te na fetaulaki aí, ʻi he kaveinga ʻa ia ko e manako ia ʻo e husepāniti ko iá! Ko ia ai, ko e hoko ʻo māʻoniʻoní, ʻoku ʻikai ʻuhinga iá ke fuʻu tōtuʻa ʻa e fakataputapuí pe sio nounou.​—1 Kolinitō 9:​20-​23.

ʻE Lava Fēfē ke Tau Māʻoniʻoni ʻi he Fakatahaʻangá?

14. (a) Ko e hā ʻa e taha ʻo e ngaahi founga ʻa Sētane ki hono maumauʻi ʻo e fakatahaʻangá? (e) ʻE malava fēfē ke tau talitekeʻi ʻa e tauhele ʻa Sētané?

¹⁴ Ko Sētane ko e Tēvoló ko ha tokotaha lauʻikovi loi ia, he ko e hingoa faka-Kalisi ki he Tēvoló, ko e di·aʹbo·los, ko hono ʻuhingá ko e “tokotaha talatalaaki” pe ko e “tokotaha lauikovi loi.” Ko e lauʻikovi loí ko e taha ia ʻo hono ngaahi faivá, pea ʻokú ne feinga ke ngāueʻaki ia ʻi he fakatahaʻangá. Ko e founga ʻokú ne manako aí ko e laú. ʻOku tau fakaʻatā kitautolu ke hoko ko e faʻahinga ʻokú ne kākaaʻi ʻi he ʻulungaanga taʻemāʻoniʻoni ko ʻení? ʻE lava fēfē ke hoko ia? ʻAki hono kamataʻi iá, ʻi hono toe fai, pe fanongo ki ai. ʻOku fakamatala ʻa e palōvepi potó: “Ko e tangata makaka ʻoku ne humaki atu ni kē: Pea ko e tama ʻave lau te ne lava ke veteki ha kaumeʻa fetohotohoi.” (Palōvepi 16:28) Ko e hā ʻa e faitoʻo ki he laú mo e lauʻikovi loí? ʻOku totonu ke tau fakapapauʻi ʻoku fakatupu langa hake maʻu pē ʻetau leá pea makatuʻunga ʻi he ʻofa. Kapau ʻoku tau siofi ʻa e ngaahi leleí kae ʻikai ko e ngaahi hala ʻa hotau ngaahi tokouá, ʻe lelei maʻu pē mo fakalaumālie ʻa ʻetau fetalanoaʻakí. Manatuʻi ko e hau he faingofuá ʻa e fakaangá. Pea ko e tokotaha ko ia ʻoku lau atu kiate koe ʻo kau ki he niʻihi kehé ʻe toe lau nai ia ki he niʻihi kehé fekauʻaki mo koe!​—1 Tīmote 5:​13; Taitusi 2:3.

15. Ko e hā ʻa e ngaahi ʻulungaanga hangē ko ia ʻoku ʻia Kalaisí ʻe tokoni ki hono tauhi ke māʻoniʻoni ʻa e faʻahinga kotoa ʻi he fakatahaʻangá?

¹⁵ ʻOku fiemaʻu kitautolu hono kotoa ke maʻu ʻa e fakakaukau ʻa Kalaisí, koeʻuhi ke tauhi ʻa e fakatahaʻangá ke māʻoniʻoni, pea ʻoku tau ʻiloʻi ko hono ʻulungaanga tuʻu-ki-muʻá ko e ʻofa. Ko ia ai, naʻe enginakiʻi ʻe Paula ʻa e kau Kolosé ke nau kaungāongoʻi hangē ko Kalaisí: “Koia ko kimoutolu, koe maonioni moe ofeina, mou ai, o tāu moe kakai fili ae Otua, ae manavaofa, moe agalelei, moe loto agavaivai, moe agamalu, moe kataki fuoloa . . . , mo fefakamolemoleaki be . . . Bea ke ufiufi aki ae gaahi mea ni kotoabe ae ofa aia koe noo oe haohaoa.” Naʻá ne toki tānaki atu ki ai: “Bea tuku ke bule i ho mou loto ae melino oe Otua.” ʻOku papau ʻe lava ke tau tauhi maʻu ʻa e fāʻūtaha mo e tuʻunga māʻoniʻoni ʻi he fakatahaʻangá ʻaki ʻa e laumālie faʻa fakamolemole ko ʻení.​—Kolose 3:​12-​15, PM.

ʻOku Hā ʻEtau Tuʻunga Māʻoniʻoní ʻi Hotau Feituʻú?

16. Ko e hā ʻoku totonu ai ke hoko ʻetau founga-lotu māʻoniʻoní ko e founga-lotu fiefiá?

¹⁶ Fēfē hotau ngaahi kaungāʻapí? ʻOku fēfē ʻa e anga ʻo ʻenau vakai mai kiate kitautolú? ʻOku tau fakahaaʻi ʻa e fiefia ʻi he moʻoní, pe ʻoku tau ʻai ia ke hā hangē ha kavengá? Kapau ʻoku tau māʻoniʻoni ʻo hangē ko ia ko Sihová ʻoku māʻoniʻoni, tā ʻoku totonu leva ke hā ia ʻi heʻetau leá pea ʻi hotau ʻulungaangá. ʻOku totonu ke mahino ko ʻetau founga-lotu māʻoniʻoní ko e founga-lotu fiefia. Ko e hā ʻoku pehē ai iá? Koeʻuhi ko Sihova ko hotau ʻOtuá ko ha ʻOtua fiefia ia, ʻokú ne fiemaʻu ʻene kau lotú ke nau fiefia. Ko ia, naʻe lava ai ke lea ʻa e tokotaha-tohi-sāmé fekauʻaki mo e kakai ʻa Sihova he kuonga muʻá: “Monuʻiaā ka ko e kakai ʻoku ʻotua ʻaki ʻa Sihova!” ʻOku tapua atu ʻiate kitautolu ʻa e fiefia ko iá? ʻOku toe fakahā ʻe heʻetau fānaú ʻa e fiemālie ʻi heʻenau ʻi he lotolotonga ʻo e kakai ʻa Sihová ʻi he Fale Fakatahaʻangá pea ʻi he ngaahi ʻasemipilií?—Sāme 89:15, 16; 144:15e.

17. Ko e hā ʻoku lava ke tau fai ʻi ha founga ʻaonga ke fakahaaʻi ai ʻa e mafamafatatau ʻi he tuʻunga māʻoniʻoní?

¹⁷ ʻOku lava ke tau toe fakahā ʻetau mafamafatatau ʻi he tuʻunga māʻoniʻoní ʻi he laumālie ʻo ʻetau fetokoniʻaki mo e anga-ʻofa fakakaungāʻapi. ʻOku fiemaʻu ʻi he taimi ʻe niʻihi ke ngāue fakataha ʻa e ngaahi kaungāʻapí, mahalo nai ke fakamaʻa honau feituʻú pe, hangē ko ia ʻi he ngaahi fonua ʻe niʻihi, ke tokoni ki hono fakaleleiʻi ʻo e ngaahi hala puleʻangá mo e ngaahi motoueí. ʻI he fekauʻaki mo ʻení ʻe lava ke hā ʻetau tuʻunga māʻoniʻoní ʻi he founga ʻo ʻetau tokangaʻi ʻetau ngaahi ngoué, loto ʻapí, pe ko e koloa kehé. Kapau ʻoku tau tuku noaʻia pē ʻo ʻikai hiko ʻa e vevé pe ʻoku taʻemaau mo felefele ʻa e loto ʻapí, mahalo ʻoku aʻu ki he ʻi ai ʻa e ngaahi meʻalele motuʻa kuo ʻosi maumau ʻo sio ki ai ʻa e tokotaha kotoa, ʻe lava ke tau pehē ʻoku tau tōʻongafai ʻaki ʻa e fakaʻapaʻapá ki hotau ngaahi kaungāʻapí?​—Fakahā 11:18.

Tuʻunga Māʻoniʻoni ʻi he Ngāué pea ʻi he Akoʻangá

18. (a) Ko e hā ha tuʻunga faingataʻa ki he kau Kalisitiane he ʻaho ní? (e) ʻE lava fēfē ke tau kehe mei he māmaní?

¹⁸ Naʻe tohi ʻa e ʻaposetolo ko Paulá ki he kau Kalisitiane ʻi he kolo taʻemāʻoniʻoni ko Kolinitoó: “Ne u tohi atu ʻi heʻeku ipiseli, ke ʻoua te mou feʻiloaki mo e kakai fakamaama ʻoku feʻauaki. Ka naʻe ʻikai ko e taʻofi ʻaupito mei he feʻiloaki mo e kakai fakamaama ʻoku feʻauaki, pe ʻoku manumanu mo fai fakamalohi, pe ʻoku lotu ki he aitoli: he ka ne ko ʻeku tuʻutuʻuni ia, ta ko e hiki mei māmani ʻe fai.” (1 Kolinitō 5:​9, 10) Ko ha tuʻunga faingataʻa ʻeni ki he kau Kalisitiané, ʻa ē kuo pau ke nau feohi ʻi ha tuʻunga fakaʻaho mo e kakai ʻulungaanga taʻetaaú pe taʻeʻatamaí. Ko ha ʻahiʻahiʻi lahi ʻeni ʻo e mateaki-angatonú, tautefito ʻi he ngaahi anga-fakafonua ʻa ia ʻoku fakaʻaiʻai ai pe fakamolemoleʻi pē hono failahia ʻo e fakaʻaiʻai ki he fehokotaki fakasinó, fakameleʻí, mo e taʻefaitotonú. ʻI he tuʻunga ko ʻení ʻoku ʻikai lava ke tau tuku hifo hotau ngaahi tuʻungá koeʻuhi ke hā “tatau ai pē” kiate kinautolu takatakai ʻiate kitautolú. ʻI hono kehé, ko ʻetau anga-ʻofá kae kehekehe ʻi hotau ʻulungaanga faka-Kalisitiané ʻoku totonu ke ne ʻai ke tau ʻiloa ki he kakai ʻiloʻiló, kiate kinautolu ko ia ʻoku nau ʻiloʻi ʻa ʻenau fiemaʻu fakalaumālié pea ko ia ʻoku nau kumi ki he meʻa ʻoku lelei angé.​—Mātiu 5:3; 1 Pita 3:16, 17.

19. (a) Ko e hā ʻa e ngaahi ʻahiʻahi ʻoku maʻu, ʻe kimoutolu fānaú, ʻi he akoʻangá? (e) Ko e hā ʻoku lava ke fai ʻe he ngaahi mātuʻá ke poupouʻiʻaki ʻenau fānaú pea mo honau ʻulungaanga māʻoniʻoní?

¹⁹ Pehē foki, ʻoku lahi ʻa e ngaahi ʻahiʻahi ʻoku fehangahangai mo ʻetau fānaú ʻi he akoʻangá. Ngaahi mātuʻa, ʻoku mou ʻaʻahi ki he akoʻanga ʻoku ʻi ai hoʻomou fānaú? ʻOku mou ʻiloʻi ʻa e faʻahinga ʻatimosifia ʻoku mālohi taha aí? ʻOku ʻi ai hamou vā fekoekoeʻi mo e kau faiakó? Ko e hā ʻoku mahuʻinga ai ʻa e ngaahi fehuʻí ni? Koeʻuhi ʻi he ngaahi ʻēlia fakakolo lahi ʻi he māmaní, kuo hoko ai ʻa e ngaahi akoʻangá ia ko e ngaahi vaotā ʻo e fakamālohí, faitoʻo kona tapú, mo e fehokotaki fakasinó. ʻE malava fēfē ke tauhi ʻe hoʻomou fānaú ʻenau mateaki-angatonú mo honau ʻulungaanga māʻoniʻoní kapau ʻoku ʻikai te nau maʻu ʻa e poupou manavaʻofa kakato ʻenau ngaahi mātuʻá? Naʻe tonu ʻa e akonaki ʻa Paula ki he ngaahi mātuʻá: “ʻA e ngaahi tamai, ʻoua te mou fakahohaʻasi hoʻomou fanau, naʻa faifai pea nau loto kina.” (Kolose 3:​21) Ko e founga ʻe taha ʻoku fakahohaʻasi ai ʻa e fānaú ko e ʻikai lava ke mahino kiate kitautolu ʻenau ngaahi palopalema fakaʻahó mo e ngaahi ʻahiʻahí. Ko e mateuteu ki he ngaahi ʻahiʻahi ʻi he akoʻangá ʻoku kamata ia ʻi he ʻatimosifia fakalaumālie ʻo ha ʻapi Kalisitiane.​—Teutalōnome 6:​6-9; Palōvepi 22:6.

20. Ko e hā ʻoku fiemaʻu ai kiate kitautolu kotoa ʻa e tuʻunga māʻoniʻoní?

²⁰ ʻI he fakamulitukú, ko e hā ʻoku fiemaʻu ai kiate kitautolu kotoa ʻa e tuʻunga māʻoniʻoní? Koeʻuhi he ʻoku ngāue ia ko ha maluʻi ʻo fakafepakiʻi ʻa e ngaahi ʻohofi mei he māmani ʻo Sētané mo ʻene fakakaukaú. Ko ha tāpuaki ia he taimí ni pea ʻi he kahaʻú. ʻOku tokoni ia ke fakapapauʻi ai kiate kitautolu ʻa e moʻui ʻa ia ko e moʻui moʻoni ia ʻe ʻi ai ʻi he māmani foʻou ʻo e māʻoniʻoní. ʻOkú ne tokoniʻi kitautolu ke tau hoko ko e kau Kalisitiane mafamafatatau, fotungofua, anga-fakamaheni​—ʻo ʻikai ko e faʻahinga loto-taʻeʻunua tōtuʻa. Ko hono moʻoní, ʻokú ne ʻai kitautolu ke tau hangē ko Kalaisí.​—1 Tīmote 6:​19.

[Fakamatala ʻi lalo]

ʻOkú Ke Manatuʻi?

◻ Ko e hā naʻe ʻilo ai ʻe Pita ʻoku fiemaʻu ke akonakiʻi ʻa e kau Kalisitiané ki he tuʻunga māʻoniʻoní?

◻ Ko e hā ʻoku ʻikai faingofua ai ke taki ki ha moʻui māʻoniʻoní?

◻ Ko e hā ʻoku lava ke tau fai ʻe kitautolu kotoa ke fakaleleiʻi ʻa e tuʻunga māʻoniʻoni ʻi he fāmilí?

◻ Ke tauhi maʻu ʻa e māʻoniʻoní ʻi he fakatahaʻangá, ko e hā ʻa e ʻulungaanga taʻemāʻoniʻoni ʻoku totonu ke tau fakaʻehiʻehi mei ai?

◻ ʻOku lava fēfē ke tau nofo maʻu ʻi he māʻoniʻoní ʻi he ngāueʻangá pea ʻi he akoʻangá?

[Fakatātā ʻi he peesi 28]

ʻI hotau tuʻunga ko ia ko e Kau Fakamoʻoni ʻa Sihová, ʻoku totonu ke tau fiefia ʻi he tauhi ʻa e ʻOtuá pea ʻi he ngaahi ngāue kehé