Ko Hai ʻOkú Ne Fakafuo Hoʻo Fakakaukaú?

1, 2. (a) Naʻe anga-fēfē ʻa e tali ʻa Sīsū ʻi he tala ange ʻe Pita ke ne anga-ʻofa kiate iá? (Sio ki he ʻuluaki fakatātā ʻi he kupú ni.) (e) Ko e hā naʻe tali pehē ai ʻa Sīsuú?

NAʻE ʻohovale ʻa e kau ākonga ʻa Sīsuú! Naʻa nau fakakaukau ʻe toe fakafoki mai ʻe Sīsū ʻa e puleʻanga ʻo ʻIsilelí, ka naʻe pehē ʻe Sīsū kuo vavé ni ke ne faingataʻaʻia peá ne mate. Naʻe muʻaki lea ʻa e ʻapositolo ko Pitá: “Anga-ʻofa muʻa kiate koe, ʻEiki; ʻe ʻikai teitei hoko ʻa e meʻá ni kiate koe.” Naʻe tali ange ʻe Sīsū: “ʻAlu ki mui Sētane! Ko ha tūkiaʻanga koe kiate au, koeʻuhi ʻokú ke fakakaukau, ʻo ʻikai ko e ngaahi fakakaukau ʻa e ʻOtuá, ka ko e ngaahi fakakaukau ʻa e tangatá.”​—Māt. 16:21-23; Ngā. 1:6.

² ʻI hono leaʻaki iá, naʻe ʻai ʻe Sīsū ke mahino ʻoku kehe ʻa e fakakaukau ʻa Sihová mei he fakakaukau ʻa e māmani ko eni ʻoku puleʻi ʻe Sētané. (1 Sio. 5:19) Naʻe fakaʻaiʻai ʻe Pita ʻa Sīsū ke ne maʻu ʻa e fakakaukau siokita ʻoku maʻu ʻe he kakai tokolahi ʻi he māmaní. Ka naʻe ʻiloʻi ʻe Sīsū naʻe fiemaʻu ia ʻe Sihova ke ne teuteu ki he faingataʻaʻia mo e mate kuó ne mei hokosiá. Naʻe hā mahino mei he tali ʻa Sīsuú naʻá ne tali ʻa e fakakaukau ʻa Sihová pea siʻaki fakaʻaufuli ʻa e fakakaukau ʻa e māmaní.

 3. Ko e hā ʻoku faingataʻa ai ke tali ʻa e fakakaukau ʻa Sihová pea talitekeʻi ʻa e fakakaukau ʻa e māmaní?

³ Fēfē kitautolu? ʻOku tau fakakaukau ʻo hangē ko Sihová pe hangē ko e kakai ʻi he māmaní? ʻI hotau tuʻunga ko e kau Kalisitiané, ʻoku tau ngāue mālohi ke fakapapauʻi ʻoku fakahōifua ki he ʻOtuá ʻa e meʻa ʻoku tau faí. Kae fēfē ʻa e anga ʻo ʻetau fakakaukaú? ʻOku tau ngāue mālohi ke fakakaukau ʻo hangē ko Sihová, ʻa ia, ke vakai ki he ngaahi meʻá ʻo hangē ko ʻene vakai ki aí? Ko e fai peheé ʻoku fiemaʻu ki ai ha feinga lahi. Kae kehe, ʻoku faingofua ʻaupito ke fakakaukau ʻo hangē ko e kakai ʻi he māmaní. ʻOku peheé koeʻuhí ʻoku takatakai ʻiate kitautolu ʻa e laumālie ʻo e māmaní. (ʻEf. 2:2) Pehē foki, ʻoku faʻa tokangataha pē ʻa e kakai ʻi he māmaní kiate kinautolu pē, pea ʻe fakataueleʻi nai kitautolu ke fakakaukau ʻo hangē ko kinautolú. ʻIo, ʻoku faingataʻa ke fakakaukau ʻo hangē ko Sihová ka ʻoku faingofua ʻaupito ke fakakaukau ʻo hangē ko e kakai ʻi he māmaní.

 4. (a)  Ko e hā ʻe hoko kapau te tau fakaʻatā ʻa e māmaní ke ne tākiekina ʻetau fakakaukaú? (e) Ko e hā te tau ako ʻi he kupu ko ení?

⁴ Kapau te tau fakaʻatā ʻa e māmaní ke ne tākiekina ʻetau fakakaukaú, ʻoku ngalingali te tau hoko ai ʻo siokita pea loto ke fili pē ʻiate kitautolu ʻa e meʻa ʻoku tonú mo e meʻa ʻoku halá. (Mk. 7:21, 22) Ko ia ʻoku mātuʻaki mahuʻinga ke tau ako ke fakakaukau ʻaki ʻa e “ngaahi fakakaukau ʻa e ʻOtuá,” ʻo ʻikai “ko e ngaahi fakakaukau ʻa e tangatá.” ʻE tokoniʻi kitautolu ʻe he kupú ni ke tau fai pehē. Te tau lāulea ki he ngaahi ʻuhinga ʻoku hoko ai ʻa e vakai ki he ngaahi meʻá ʻo hangē ko Sihová ʻo ʻikai ke fuʻu fakataputapui, kae ʻaonga. Te tau toe lāulea ki he founga ʻe lava ke tau fakaʻehiʻehi ai mei hano fakafuo, pe tākiekina ʻe he fakakaukau ʻa e māmani ko ení. ʻI he kupu hono hokó, te tau ako ai ʻa e founga ʻe lava ke tau maʻu ai ʻa e fakakaukau ʻa Sihova fekauʻaki mo e ngaahi meʻa pau pea ʻai ʻene fakakaukaú ko ʻetau meʻa.

 5. Ko e hā ʻoku ʻikai loto ai ʻa e kakai ʻe niʻihi ke tākiekina kinautolu ʻe ha faʻahinga taha pē?

⁵ ʻOku ʻikai fiemaʻu ʻe he kakai ʻe niʻihi ke tākiekina ʻe ha faʻahinga taha pē ʻa e anga ʻo ʻenau fakakaukaú. ʻOku nau pehē, “Tuku pē ke u fakakaukauʻi.” ʻOku ngalingali ko ʻenau ʻuhingá ʻoku nau loto ke fai pē ʻenau fili pea ʻoku nau maʻu ʻa e totonu ke fai pehē. ʻOku ʻikai te nau loto ke puleʻi kinautolu ʻe he niʻihi kehé pe fakamālohiʻi kinautolu ke nau hangē tofu pē ko e tokotaha kotoa.a (Sio ki he fakamatala ʻi lalo.)

 6. (a) Ko e hā ʻa e tauʻatāina ʻoku ʻomai ʻe Sihova kiate kitautolú? (e) ʻOku taʻefakangatangata ʻa e tauʻatāina ko ení?

⁶ ʻOku lelei ke ʻiloʻi kapau te tau tali ʻa e fakakaukau ʻa Sihová, ʻe lava ke tau kei maʻu pē ʻetau ngaahi fakakaukaú. ʻOku pehē ʻi he 2 Kolinitō 3:17: “Ko e feituʻu pē ʻoku ʻi ai ʻa e laumālie ʻo Sihová, ʻoku ʻi ai ʻa e tauʻatāina.” ʻOku ʻomai ʻe Sihova kiate kitautolu ʻa e tauʻatāina ke hoko ko e faʻahinga tokotaha ʻoku tau loto ki aí. ʻE lava ke tau maʻu ha ngaahi saiʻia fakafoʻituitui pea fili ʻa e ngaahi meʻa ke tau mahuʻingaʻia aí. Naʻe ngaohi kitautolu ʻe Sihova ʻi he foungá ni. Ka ʻoku ʻikai ʻuhinga eni iá ʻoku tau maʻu ha tauʻatāina taʻefakangatangata. (Lau ʻa e 1 Pita 2:16.) ʻI he fiemaʻu ke tau ʻilo ʻa e meʻa ʻoku tonú pe halá, ʻoku fiemaʻu mai ʻe Sihova ke tau ngāueʻaki ʻa ʻene Folofolá ke tataki kitautolu. ʻOku fuʻu fakataputapui eni, pe ʻoku ʻaonga?

7, 8. ʻOku fuʻu fakataputapui ke vakai ki he ngaahi meʻá ʻi he founga ʻoku fiemaʻu mai ʻe Sihová? ʻOmai ha fakatātā.

⁷ ʻE lava ke tau fakatātaaʻi ia ʻi he foungá ni. ʻOku feinga ʻa e ngaahi mātuʻá ke akoʻi ki heʻenau fānaú ʻa e ngaahi ʻulungaanga lelei. ʻOku nau akoʻi nai kinautolu ke nau faitotonu, ngāue mālohi, pea tokanga ki he niʻihi kehé. ʻOku ʻikai ke fuʻu fakataputapui eni. Ka, ʻoku teuʻi ʻe he ngaahi mātuʻá ʻenau fānaú ke nau lavameʻa ʻi he moʻuí. ʻI he tupu hake ʻa e fānaú ʻo mavahe mei ʻapí, te nau tauʻatāina ke fai ʻenau fili pē ʻanautolu. Kapau te nau fili ke moʻui ʻo fakatatau ki he ngaahi ʻulungaanga lelei naʻe akoʻi ange ʻe heʻenau mātuʻá, ʻoku ngalingali ange ai te nau fai ha ngaahi fili lelei pea fakaʻehiʻehi mei he ngaahi palopalema, loto-moʻua, mo e fakaʻiseʻisa lahi.

⁸ ʻI he hangē ko ha mātuʻa leleí, ʻoku fiemaʻu ʻe Sihova ke maʻu ʻe heʻene fānaú ʻa e moʻui fakafiemālie taha ʻoku ala lavá. (ʻAi. 48:17, 18) Ko ia ʻokú ne akoʻi mai ʻa e ngaahi tefitoʻi moʻoni tefito fekauʻaki mo e ʻulungaanga tāú mo e founga ʻoku totonu ke tau fakafeangaiʻaki ki he niʻihi kehé. ʻOkú ne fakaafeʻi mai ke tau ako ke vakai ki he ngaahi meʻá ʻi heʻene foungá pea moʻui ʻo fakatatau ki heʻene ngaahi tuʻungá. ʻOku ʻikai ke fuʻu fakataputapui eni. ʻI hono kehé, ʻokú ne ʻai kitautolu ke tau poto ange pea tokoniʻi kitautolu ke tau fai ha ngaahi fili lelei ange. (Saame 92:5; Pal. 2:1-5; ʻAi. 55:9) ʻE kei lava pē ke tau maʻu ha ngaahi saiʻia fakafoʻituitui, ka te tau fai ha ngaahi fili ʻa ia te ne ʻai kitautolu ke tau fiefia. (Saame 1:2, 3) ʻI heʻetau maʻu ʻa e fakakaukau ʻa Sihová, te tau maʻu ʻaonga ai ʻi he ngaahi founga lahi!

9, 10. Ko e hā ʻokú ne fakamoʻoniʻi ʻoku māʻolunga ange ʻa e fakakaukau ʻa Sihová ʻi he fakakaukau ʻa e māmaní?

⁹ Ko e toe ʻuhinga ʻe taha ʻoku tau fiemaʻu ai ke hoko lahi ange ʻetau fakakaukaú ʻo hangē ko e fakakaukau ʻa Sihová he ko ʻene fakakaukaú ʻoku māʻolunga mamaʻo ange ia ʻi he fakakaukau ʻa e māmaní. ʻOku ʻomai ʻe he māmaní ʻa e faleʻi fekauʻaki mo e ʻulungaanga tāú, founga ke maʻu ai ha fāmili fiefiá mo e founga ke lavameʻa ai ʻi heʻetau ngāué mo e ngaahi tafaʻaki kehe ʻi he moʻuí. Ka ko e lahi taha ʻo e faleʻi ko ení ʻoku ʻikai fehoanaki ia mo e fakakaukau ʻa Sihová. Ko e fakatātaá, ʻoku faʻa fakaʻaiʻai ʻe he māmaní ʻa e kakaí ke nau tuli ki he ngaahi meʻa pē ʻoku nau mahuʻingaʻia aí pea ke nau vakai ki he fehokotaki fakasino taʻetāú ko ha meʻa pē ia ʻoku ala tali. Pea fakahuʻunga mai ai ʻi he taimi ʻe niʻihi ko e ongo meʻa malí te na fiefia ange kapau te na māvae pe vete ʻi ha fanga kiʻi ʻuhinga launoa. Ko e faleʻi ko ení ʻoku fepaki mo e meʻa ʻoku akoʻi ʻe he Tohi Tapú. Ka ʻoku ʻaonga ange ʻa e faleʻi ʻa e māmaní ʻi he ʻahó ni ʻi he faleʻi ʻa e Tohi Tapú?

¹⁰ Naʻe pehē ʻe Sīsū: “ʻOku fakamoʻoniʻi ʻa e māʻoniʻoni ʻa potó ʻe heʻene ngaahi ngāué.” (Māt. 11:19) Neongo kuo fakalakalaka lahi ʻa e māmaní ʻi he tekinolosiá, kuo ʻikai malava ke ne solova ʻa e ngaahi palopalema lalahi ʻokú ne taʻofi ʻa ʻetau maʻu ha fiefiá, hangē ko e taú, lau-lanú, mo e faihiá. ʻIkai ko ia pē, ʻoku vakai ʻa e māmaní ki he fehokotaki fakasino taʻetāú ko ha meʻa pē ia ʻoku ala tali. Ka ʻoku fakahaaʻi ʻe he kakai tokolahi ʻoku veteki ʻe he meʻá ni ʻa e ngaahi fāmilí, fakatupunga ʻa e mahamahaki, pea ʻoku ʻi ai hono ngaahi nunuʻa kovi kehe. Fēfē ʻa e faleʻi ʻa Sihová? Ko e kau Kalisitiane kuo nau tali ʻa e fakakaukau ʻa Sihová ʻoku nau maʻu ha ngaahi fāmili fiefia ange, ʻoku nau moʻui lelei ange, pea maʻu ha vahaʻangatae melino mo honau fanga tokoua mo e fanga tuofāfine takatakai ʻi he māmaní. (ʻAi. 2:4; Ngā. 10:34, 35; 1 Kol. 6:9-11) ʻOku fakamoʻoniʻi māʻalaʻala ʻi he meʻá ni ko e fakakaukau ʻa Sihová ʻoku māʻolunga ange ia ʻi he fakakaukau ʻa e māmaní.

11. Ko hai naʻá ne fakafuo ʻa e fakakaukau ʻa Mōsesé, pea ko e hā ʻa e olá?

¹¹ Ko e kau sevāniti faitōnunga ʻa Sihova ʻi he kuohilí naʻa nau ʻiloʻi ʻoku māʻolunga ange ʻa e fakakaukau ʻa Sihová. Ko e fakatātaá, neongo naʻe akoʻi ʻa Mōsese “ʻi he poto kotoa pē ʻo e kau ʻIsipité,” naʻá ne ʻiloʻi ko e poto moʻoní ʻoku haʻu ia meia Sihova. (Ngā. 7:22; Saame 90:12) Ko ia naʻá ne kole kia Sihova: “ʻAi au ke u ʻiloʻi ho ngaahi halá.” (ʻEki. 33:13) Koeʻuhi naʻe fakaʻatā ʻe Mōsese ke fakafuo ʻe Sihova ʻene fakakaukaú, naʻe ngāueʻaki ia ʻe Sihova ʻi ha founga fakaofo ke ne fakahoko ʻa ʻEne taumuʻá pea ʻoange kia Mōsese ʻa e lāngilangi ʻaki ʻene ui ia ko ha tangata naʻá ne maʻu ha tui lahi.​—Hep. 11:24-27.

12. Ko e hā naʻe fakatefito mei ai ʻe Paula ʻa ʻene ngaahi filí?

¹² Ko e ʻapositolo ko Paulá ko ha tangata naʻe poto, ako lelei, peá ne lea ʻo ʻikai siʻi hifo ʻi he lea ʻe ua. (Ngā. 5:34; 21:37, 39; 22:2, 3) Ka naʻá ne siʻaki ʻa e poto fakamāmaní pea fai ʻene ngaahi filí fakatefito ʻi he Folofola ʻa e ʻOtuá. (Lau ʻa e Ngāue 17:2; 1 Kolinitō 2:6, 7, 13.) Ko hono olá, naʻá ne maʻu ha ngāue fakafaifekau lavameʻa peá ne fakatuʻamelie atu ki ha pale ʻa ia ʻe tolonga ʻo taʻengata.​—2 Tīm. 4:8.

13. Ko hai ʻoku fakafatongiaʻi ke ne fakatonutonu ʻetau fakakaukaú koeʻuhi ke tau vakai ki he ngaahi meʻá ʻo hangē ko Sihová?

¹³ ʻOku hā mahino, ko e fakakaukau ʻa e ʻOtuá ʻoku māʻolunga mamaʻo ange ia ʻi he fakakaukau ʻa e māmaní. Kapau te tau muimui ʻi he ngaahi tuʻunga ʻa e ʻOtuá, ko e moʻoni te tau fiefia mo lavameʻa. Ka heʻikai ke fakamālohiʻi kitautolu ʻe Sihova ke tau fakakaukau ʻo hangē ko iá. Ko e “tamaioʻeiki anga-tonu mo potó” ʻoku ʻikai te ne puleʻi ʻetau fakakaukaú, pea ʻoku ʻikai totonu ke pehē mo e kau mātuʻá. (Māt. 24:45; 2 Kol. 1:24) ʻOku fakafatongiaʻi kitautolu taki taha ke tau fakatonutonu ʻetau fakakaukaú koeʻuhi ke tau vakai ki he ngaahi meʻá ʻi he anga ʻo e vakai ʻa Sihová. ʻE lava fēfē ke tau fai ia?

14, 15. (a) Ko e hā kuo pau ke tau fakalaulauloto ki ai koeʻuhi ke tau fakakaukau ʻo hangē ko Sihová? (e) Ko e hā kuo pau ai ke ʻoua naʻa tau fakaʻatā ke hū ki hotau ʻatamaí ʻa e ngaahi fakakaukau fakamāmaní? ʻOmai ha fakatātā.

¹⁴ ʻOku pehē ʻi he Loma 12:2: “Tuku hono fakafuo kimoutolu ki he fokotuʻutuʻu ko ení, ka ke fai homou liliú ʻaki hono fakafoʻou homou ʻatamaí, koeʻuhi ke mou lava ʻo fakamoʻoniʻi kiate kimoutolu ʻa e finangalo lelei mo fakahōifua mo haohaoa ʻo e ʻOtuá.” ʻOku akoʻi mai ʻi he konga Tohi Tapu ko ení tatau ai pē pe ko e hā naʻá ne fakafuo ʻetau fakakaukaú ki muʻa ke tau ako ʻa e moʻoní, ʻe lava ke tau liliu ʻetau fakakaukaú pea ʻai ke hangē ko e fakakaukau ʻa e ʻOtuá. Neongo ko e ngaahi meʻa tefito fakakēnisí mo ʻetau ngaahi hokosia ʻi he moʻuí kuó ne tākiekina ʻi ha tuʻunga ʻa e anga ʻo ʻetau fakakaukaú, ʻe lava ke hanganaki liliu ʻetau fakakaukaú. Pea ʻe liliu ia ʻo fakatefito lahi taha ʻi he meʻa ʻoku tau fili ke fakakaukau ki aí. Kapau ʻoku tau fakalaulauloto ki he fakakaukau ʻa Sihová, te tau fakamoʻoniʻi ai kiate kitautolu ʻoku tonu maʻu pē ʻa ʻene fakakaukaú. Te tau holi leva ai ke vakai ki he ngaahi meʻá ʻi he anga ʻo ʻene vakai ki aí.

¹⁵ Ka ke fakafoʻou hotau ʻatamaí koeʻuhi ke tau fakakaukau ʻo hangē ko Sihová, kuo pau ke “tuku hono fakafuo [kitautolu] ki he fokotuʻutuʻu ko ení.” ʻOku ʻuhinga ení kuo pau ke tuku ʻetau sio, lau, mo fanongo ki ha meʻa pē ʻoku fepaki mo e fakakaukau ʻa e ʻOtuá. Ke tokoniʻi kitautolu ke tau mahinoʻi ʻa e mahuʻinga ʻo e meʻá ni, fakakaukau angé ki he fakatātā fekauʻaki mo e meʻakaí. Ko ha taha ʻoku loto ke moʻui lelei ange te ne fili nai ke kai ha ngaahi meʻakai fakatupu moʻui lelei. Ka ʻe taʻeʻaonga ʻene feingá kotoa kapau te ne toe kai maʻu pē foki ha meʻakai ʻoku kovi! ʻI he founga meimei tatau, ʻe taʻeʻaonga ʻetau feinga kotoa ke ako fekauʻaki mo e fakakaukau ʻa Sihová kapau ʻoku tau fakaʻatā ke hū ki hotau ʻatamaí ʻa e ngaahi fakakaukau fakamāmaní.

16. Ko e hā kuo pau ke tau maluʻi kitautolu mei aí?

¹⁶ ʻE lava ke tau fakaʻehiʻehi fakaʻaufuli mei he ngaahi fakakaukau fakamāmaní? ʻIkai, ʻe uesia kitautolu ʻe ha ngaahi fakakaukau fakamāmani koeʻuhí heʻikai moʻoni lava ke tau mavahe mei he māmaní. (1 Kol. 5:9, 10) Naʻa mo e taimi ʻoku tau malanga aí, te tau fanongo ki hono fakahāhā ʻe he kakaí ʻenau ngaahi fakakaukau halá mo e tui ʻoku halá. Kae lolotonga heʻikai lava ke tau fakaʻehiʻehi fakaʻaufuli mei he ngaahi fakakaukau halá, ʻoku ʻikai fiemaʻu ke tau hanganaki fakakaukau fekauʻaki mo ia pe tali ia. ʻI he hangē ko Sīsuú, ʻoku totonu ke tau fakavave ke siʻaki ha ngaahi fakakaukau pē ʻe saiʻia ʻa Sētane ke tau maʻu. Pea ʻe lava ke tau maluʻi kitautolu ʻi he fakaʻehiʻehi mei hano uesia ʻikai fiemaʻu ʻe he fakakaukau ʻa e māmaní.​—Lau ʻa e Palōveepi 4:23.

17. ʻE lava fēfē ke tau fakaʻehiʻehi mei hano uesia ʻikai fiemaʻu ʻe he fakakaukau fakamāmaní?

¹⁷ Ko e fakatātaá, ʻoku totonu ke tau fili fakalelei ʻa hotau kaungāmeʻá. ʻOku fakatokanga mai ʻa e Tohi Tapú kapau te tau hoko ʻo kaumeʻa ofi mo e kakai ʻoku ʻikai te nau lotu kia Sihová, te tau kamata ke fakakaukau ʻi he anga ʻo ʻenau fakakaukaú. (Pal. 13:20; 1 Kol. 15:12, 32, 33) ʻOku totonu foki ke tau fili fakalelei ʻetau fakafiefiá. ʻI heʻetau siʻaki ʻa e fakafiefia ʻoku pouaki ai ʻa e fakakaukau ki he ʻevalūsioó, fakamālohí, pe ʻulungaanga taʻetāú, ʻoku tau fakaʻehiʻehi ai mei hono fakakonahi hotau ʻatamaí ʻaki ʻa e ngaahi fakakaukau ʻoku “fakafepaki ki he ʻilo fekauʻaki mo e ʻOtuá.”​—2 Kol. 10:5.

18, 19. (a) Ko e hā kuo pau ke tau tokanga ai ki he ngaahi fakakaukau fakamāmani ʻoku pouaki ʻi he ngaahi founga ʻoku ʻikai loko maeʻeeʻá? (e) Ko e hā ʻa e ngaahi fehuʻi ʻoku totonu ke tau ʻeke hifó, pea ko e hā hono ʻuhingá?

¹⁸ Kuo pau foki ke tau ʻiloʻi pea talitekeʻi ʻa e ngaahi fakakaukau fakamāmani ʻoku pouaki ʻi ha ngaahi founga ʻoku ʻikai loko hā mahino. Ko e fakatātaá, ko e ngaahi fakamatala ongoongo ʻe niʻihi ʻoku fakahoko ia ʻi ha founga ʻoku hā ʻoku nau leleiʻia ʻi ha ngaahi fakakaukau fakapolitikale ʻe niʻihi. Pea ko e ngaahi talanoa ʻe niʻihi ʻi he ongoongó ʻoku pouaki ai ʻa e ngaahi taumuʻa mo e lavameʻa ʻoku leleiʻia ai ʻa e māmaní. Ko e ngaahi faiva mo e tohi ʻe niʻihi ʻoku pouaki ai ʻa e ngaahi founga fakakaukau “muʻomuʻa pē kita” mo e “muʻomuʻa ʻa e fāmilí” pea ʻai ke hā ngali ʻuhinga lelei, fakamānako, naʻa mo tonu. Kae kehe, ko e ngaahi fakakaukau ko ení ʻoku tukunoaʻi ai ʻa e Tohi Tapú. ʻOku pehē ai ko kitautolu mo hotau fāmilí te tau fiefia moʻoni ʻi heʻetau ʻofa kia Sihova ʻo mahulu hake ʻi he meʻa kotoa. (Māt. 22:36-39) Pehē foki, ko e ngaahi talanoa ʻe niʻihi ʻa e fānaú, neongo ʻoku talilahia nai, ʻe lava ke fakatupunga olopoto nai ai ke tali ʻe he fānaú ʻa e tōʻonga taʻetāú.

¹⁹ ʻOku ʻikai ʻuhinga ení ʻoku hala ke maʻu ha fakafiefia lelei. Ka ʻoku totonu ke tau ʻeke hifo: ‘ʻOku ou lāuʻilo ki he ngaahi fakakaukau fakamāmaní naʻa mo hono tuʻuaki ʻikai fakahangatonú? ʻOku ou maluʻi au mo ʻeku fānaú mei ha polokalama TV ʻe niʻihi mo e ngaahi tohi ʻoku laú? ʻOku ou tokoniʻi ʻeku fānaú ke nau maʻu ʻa e fakakaukau ʻa Sihova ki he ngaahi meʻá koeʻuhi ke ʻoua ʻe tākiekina kinautolu ʻe he ngaahi fakakaukau fakamāmani ʻoku nau fanongo mo sio aí?’ Kapau ʻoku tau lāuʻilo ki he faikehekehe ʻi he fakakaukau ʻa e ʻOtuá mo e māmaní, ʻe lava ke tau fakaʻehiʻehi mei hono “fakafuo [kitautolu] ki he fokotuʻutuʻu ko ení.”

20. Ko e hā te ne fakapapauʻi pe ko hai ʻokú ne fakafuo kitautolú?

²⁰ Kuo pau ke tau manatuʻi ʻoku ua pē ʻa e maʻuʻanga fakamatalá. Ko e taha ko Sihova, pea ko e taha ko Sētane mo hono māmaní. Ko hai ʻokú ne fakafuo koé? Ko e talí, ko e taha ko ia ʻokú ke maʻu fakamatala mei aí. Kapau ʻoku tau tali ʻa e fakakaukau ʻa e māmaní, ʻe fakafuo ʻe he māmaní ʻetau fakakaukaú pea te tau fakakaukau mo tōʻonga siokita. Ko ia ʻoku mahuʻinga ʻaupito ke tau fili fakalelei ʻa e meʻa ʻoku tau sio, lau, fanongo, mo fakakaukau ki aí.

21. Ko e hā te tau lāulea ki ai ʻi he kupu hono hokó?

²¹ ʻI he kupu ko ení kuo tau ako ai ke maʻu ʻa e fakakaukau ʻa Sihová, kuo pau ke tau fakaʻehiʻehi mei he ngaahi fakakaukau fakamāmaní. Kuo pau foki ke tau toe fakalaulauloto ki he fakakaukau ʻa e ʻOtuá koeʻuhi ke tau fakakaukau lahi ange ai ʻo hangē ko iá. ʻI he kupu hono hokó, te tau ako ai ʻa e founga ke fai ai iá.