Taimi ʻE ʻIkai Toe ʻI Ai ha Angahala

“ʻOKU fanauʻi mai kitautolu ʻi he angahala?” Ko e fehuʻi ia naʻe fifili ki ai ha tokotaha naʻe ʻosi ʻene akó ʻi he ʻIunaite Seteté ʻi he hili pē ʻa e kamata ke ne ako ʻa e Tohitapú. Koeʻuhi ko hono ʻātakai Hinituú, naʻe sola kiate ia ʻa e fakakaukau ia fekauʻaki mo e angahala tukufakaholó. Ka ʻo kapau ʻoku tukufakaholo moʻoni mai ʻa e angahalá, naʻá ne fakaʻuhinga, ʻe hoko ko e taʻeʻaonga ʻa hono fakaʻikaiʻi pe tukunoaʻi ʻa hono moʻoní. ʻE lava fēfē ke maʻu ʻe ha taha ʻa e tali ki he fehuʻí ni?

Kapau ʻoku tukufakaholo, kuo pau pē naʻe ʻi ai ha kamataʻanga ʻo e angahalá. Naʻe fulikivanu ʻa hono fakatupu ʻo e ʻuluaki tangatá, ʻo ne paasi mai ai ʻa e ngaahi anga koví ki heʻene fānaú? Pe naʻe toki tupu pē ki mui ʻa e melé ia? Naʻe kamata tonu ʻa e angahalá ʻanefē? ʻI he tafaʻaki ʻe tahá, kapau ko e angahalá ko ha meʻa mavahe, pe tefitoʻi moʻoni pē ʻoku fakatuʻasino mo kovi, ʻe lava koā ke tau ʻamanaki atu ke maʻu ha tauʻatāina mei ai?

Fakatatau ki he tui faka-Hinituú, ʻoku taimi taha pē ʻa e faingataʻaʻiá ia mo e koví pea mo e fakatupú. “Ko e faingataʻaʻiá [pe koví],” ʻi he fakamatala ʻa ha mataotao Hinitū, “ʻoku hangē ko e mahaki langa-huí, ʻo hiki pē mei he feituʻu ko ē ki he feituʻu ko ē ka ʻoku ʻikai malava ke taʻaki-fuʻu fakaʻaufuli atu ia.” Ko hono moʻoní, kuo hoko ʻa e koví ia ko ha konga ʻo e māmani ʻo e faʻahinga ʻo e tangatá ʻi he kotoa ʻo e hisitōlia kuo lēkootí. Kapau ʻoku ʻi muʻa ia ʻi he ngaahi lēkooti fakahisitōlia ʻa e tangatá, ko ha ngaahi tali alafalalaʻanga fekauʻaki mo hono tupuʻangá kuo pau ʻaupito ke haʻu ia mei ha matavai māʻolunga ange ia ʻi he tangatá. Kuo pau ke haʻu ʻa e ngaahi talí ia mei he ʻOtuá.​—Sāme 36:9.

Tangatá​—Naʻe Fakatupu ʻo ʻIkai ha Angahala

Ko e ngaahi fakamatala fekauʻaki mo e fakatupu ʻo e tangatá ʻoku ʻomai ʻi he Vedas ʻoku fakaefakatātā, ko e fakahā moʻoni ia ʻe he filōsefa Hinitū ko Nikhilananda. ʻI he founga meimei tatau, ko e lahi taha ʻo e ngaahi lotu ʻi he Hahaké ʻoku nau ʻomai pē ʻa e ngaahi fakamatala fakatalatupuʻa fekauʻaki mo e fakatupú. Neongo ia, ʻoku ʻi ai fakatouʻosi ʻa e ngaahi ʻuhinga totonu mo fakasaienisi ke tui ki he fakamatala ʻa e Tohitapú fekauʻaki mo e fakatupu ʻo e ʻuluaki tangatá.a ʻI hono ʻuluaki vahé pē ʻoku fakahā ai: “Naʻe fakatupu ʻe he ʻOtua ʻa e tangata ʻi he imisi oʻona, ʻio ʻi he imisi ʻo e ʻOtua naʻa ne fakatupu ia; naʻa ne fakatupu ʻakinaua ko e tangata mo e fefine.”​—Senesi 1:27.

ʻOku ʻuhinga ki he hā ʻa e pehē naʻe fakatupu “ʻi he imisi ʻo e ʻOtua”? Ko ʻeni pē: Naʻe ngaohi ʻa e tangatá ʻi he tatau ʻo e ʻOtuá, ʻo ne maʻu ai ʻa e ngaahi anga fakaʻotuá​—ʻo hangē ko e fakamaau totonu, poto, mo e ʻofa​—ʻo fakamavaheʻi ai ia mei he fanga manú. (Fakafehoanaki mo Kolose 3:​9, 10.) Naʻe ʻoange ai ʻe he ngaahi ʻulungaangá ni kiate ia ʻa e mafai ke ne fili ke fai lelei pe fai kovi, ʻo ʻai ai ia ke ne tauʻatāina ke ne fai ha fili. Naʻe ʻikai ha angahala ʻi he ʻuluaki tangatá, ʻikai ha kovi pe faingataʻaʻia ʻi he moʻuí, ʻi he taimi naʻe fakatupu ai iá.

Ki he tangata ko ʻĀtamá, naʻe tuku ki ai ʻe Sihova ko e ʻOtuá ʻa e fekau ko ʻení: “ʻE lelei ʻaupito hoʻo kai mei he ngahi ʻakau kehekehe ʻo e ngoue; ka ko e ʻAkau ʻo e ʻIlo-ʻo-e-lelei-mo-e-kovi ʻe ʻikai te ke kai mei ai: he ko e ʻaho te ke kai mei ai kuo pau te ke mate.” (Senesi 2:​16, 17) ʻI he fili ke talangofuá, ʻe malava ai kia ʻĀtama mo hono uaifí, ʻa ʻIvi, ke na fakahīkihikiʻi mo fakalāngilangiʻi hona Tokotaha-Fakatupú pea kei tauʻatāina ai pē mei he angahalá. ʻI he tafaʻaki ʻe tahá, ko ha tōʻonga talangataʻa ʻe fakahaaʻi ai ʻa ʻena tō mei hono aʻusia ʻa e ngaahi tuʻunga haohaoa ʻa e ʻOtuá pea ʻe ʻai ai kinaua ke na taʻehaohaoa​—ʻo angahalaʻia.

Naʻe ʻikai fakatupu ʻa ʻĀtama ia mo ʻIvi ʻokú na natula fakaʻotua. Kae kehe, naʻá na maʻu pē ha tuʻunga ʻo e ngaahi ʻulungaanga fakaʻotuá pea mo e malava ke fai ʻa e ngaahi fili ʻoku totonú. ʻI he hoko ko e fakatupu ʻa e ʻOtuá, naʻá na taʻeangahala, pe haohaoa. (Senesi 1:31; Teutalonome 32:4) Ko hono ʻomai kinaua ʻo moʻuí, naʻe ʻikai ke uesia ai ʻa e fetāiaki naʻe ʻosi ʻi ai ʻi he vahaʻa ʻo e ʻOtuá pea mo e ʻuniveesí he laui kuonga ʻo aʻu mai ki he taimi ko ʻení. Ko ia, naʻe anga-fēfē leva ʻa e kamata ʻa e angahalá?

Ko e Tupuʻanga ʻo e Angahalá

Naʻe fuofua hā ʻa e angahalá ʻi he nofoʻanga laumālié. Ki muʻa ʻi hono fakatupu ʻo e foʻi māmaní mo e tangatá, naʻe fakatupu ʻe he ʻOtuá ʻa e ngaahi meʻamoʻui laumālie poto​—ʻa e kau ʻāngeló. (Siope 1:6; 2:​1; 38:​4-7; Kolose 1:​15-17) Ko e taha ʻo e kau ʻāngeló ni naʻe fakakaukau ʻo fuʻu lahi ki hono fakaʻofoʻofa ʻoʻoná mo hono potó. (Fakafehoanaki mo Isikeli 28:​13-15.) ʻI he fekau ʻa e ʻOtuá kia ʻĀtama mo ʻIvi ke na fanafanaú, naʻe malava ke sio ʻa e ʻāngeló ni ʻe vave ʻa e fonu ʻa e foʻi māmaní fakakātoa ʻi he kakai māʻoniʻoni, ko e kotoa ʻo kinautolú te nau lotu ki he ʻOtuá. (Senesi 1:​27, 28) Naʻe holi ʻa e meʻamoʻui laumālie ia ko ʻení ke fai ange ʻenau lotú kiate ia. (Mātiu 4:​9, 10) ʻI he nōfoʻi ʻi he holi ko ʻení naʻe taki atu ai ia ki ha ʻalunga hala.​—Semisi 1:​14, 15.

ʻI he lea kia ʻIvi ʻo fakafou ʻi ha ngata, naʻe pehē ai ʻe he ʻāngelo angatuʻú ni ko hono tapui ko ia ʻa e kai ʻo e fua mei he fuʻu ʻakau ʻo e ʻilo ʻo e leleí mo e koví, naʻe taʻofi ai ʻe he ʻOtuá ʻa e ʻilo naʻe totonu ke maʻu ʻe ʻIví. (Senesi 3:​1-5) Ko hono lea ʻaki iá ko ha loi fakafehiʻanekina​—ko ha tōʻonga ia ʻo e angahala. ʻI hono fakahā ʻa e loi ko ʻení, naʻe ʻai ai ʻe he ʻāngeló ʻa ia tonu ko ha tokotaha angahala. Ko hono ikuʻangá, naʻe hoko ʻo ui ai ia ko e Tēvolo, ko ha tokotaha lauʻikovi loi, mo Sētane, ko ha tokotaha fakafepaki ki he ʻOtuá.​—Fakahā 12:9.

Naʻe hoko ha nunuʻa kovi kia ʻIvi mei he fakaʻuhinga fakaoloolo ʻa Sētané. ʻI hono tuku atu ʻene falalá ki he ngaahi lea ʻa e Tokotaha-fakatauelé, naʻá ne fakaʻatā ai ia ke kākaaʻi pea ke ne kai ʻa e fua mei he fuʻu ʻakau naʻe tapuí. Ko hono husepānití, ʻa ʻĀtama, naʻe kau atu kiate ia ʻi hono kai ʻa e fuaʻi ʻakaú, pea naʻá na hoko fakatouʻosi ai ko e ongo angahala. (Senesi 3:6; 1 Timote 2:14) ʻOku hā mahino, ʻi he fili ke talangataʻa ki he ʻOtuá, naʻe tō ai ʻa ʻetau ʻuluaki ongo mātuʻá mei he fakaʻilonga ko e haohaoá peá na ʻai ai kinaua ko e ongo angahala.

Fēfē ʻa e fānau ʻa ʻĀtama mo ʻIví? ʻOku fakamatalaʻi ʻe he Tohitapú: “Nae hoko mai ae agahala ki mamani, moe mate mei he agahala, i he tagata be taha; bea nae behe ae hoko oe mate ki he kakai kotoabe, he kuo agahala kotoabe.” (Loma 5:​12, PM) Ko e lao ʻo e tukufakaholó naʻe ʻosi hoko ia. Naʻe ʻikai malava ʻe ʻĀtama ʻo paasi mai ki heʻene fānaú ʻa e meʻa naʻe ʻikai te ne maʻú. (Siope 14:4) ʻI he mole ʻa e haohaoá, naʻe hoko ai ʻa e ʻuluaki ongo mātuʻá ko e ongo angahala ʻi he taimi naʻe tuʻituʻiaʻi ai ʻa ʻena fānaú. Ko hono ikuʻangá, ko kitautolu kotoa​—ʻo ʻikai hao ha taha​—kuo tukufakaholo ai ʻa e angahalá. (Sāme 51:5; Loma 3:23) Ko ia, kuo ʻikai mo ha toe meʻa kuo tokonaki mai ʻe he angahalá ka ko e kovi pē mo e faingataʻaʻia. ʻIkai ngata aí, koeʻuhi ko e meʻa ko iá, ʻoku tau tupu kotoa hake ai ʻo motuʻa pea mate “he ko e tokonaki ʻa Angahala ko e mate.”​—Loma 6:23.

‘Fakahalaiaʻi’ pe ‘Fakatonuhiaʻi’ ʻe he Konisēnisi

Toe fakakaukau ange ki he nunuʻa ʻo e angahalá ʻi he angafai ʻo e ʻuluaki ongo mātuʻa fakaetangatá. Naʻá na ʻufiʻufi ʻa e konga lahi ʻo hona sinó peá na feinga ke na toitoi mei he ʻOtuá. (Senesi 3:​7, 8) Ko ia, naʻe fakatupunga ʻe he angahalá kinaua ke na ongoʻi halaia, loto-moʻua, mo mā. ʻOku fuʻu maheni ʻaupito ʻa e faʻahinga ʻo e tangata ʻi he ʻaho ní mo e ngaahi ongo ko ʻení.

Ko hai ia kuo ʻikai te ne tofanga ʻi ha ngaahi ongoʻi taʻefakafiemālie koeʻuhi ko e ʻikai te ne fai ha anga-ʻofa ʻoku fiemaʻu ki ha taha, pe kuo ʻikai te ne ongoʻi loto-lavea he leaʻaki ha ngaahi lea naʻe ʻikai ʻaupito totonu ke ne leaʻaki? (Semisi 4:17) Ko e hā ʻoku tau maʻu ai ʻa e ngaahi ongoʻi hohaʻa peheé? ʻOku fakamatalaʻi ʻe he ʻaposetolo ko Paulá ʻo pehē ‘kuo tohi ʻi hotau lotó ʻa e lao.’ Ka kuo ʻikai ke hoko ʻo patu hotau konisēnisí, ko hano maumauʻi pē ʻo e lao ko iá ʻoku hoko ai ha fuʻu liliu lahi ʻi loto. Ko ia ko e ongo mai ʻa e konisēnisí ʻokú ne ‘fakahalaiaʻi’ pe ‘fakatonuhiaʻi’ kitautolú. (Loma 2:15; 1 Timote 4:2; Taitusi 1:15) Pe ʻoku tau lāuʻilo ki ai pe ʻikai, ʻoku tau maʻu ha ongoʻi ʻi loto ʻo e fehālaaki, ʻo e angahala!

Naʻe ʻiloʻi lelei ʻe Paula ʻa ʻene ngaahi hehema angahalaʻiá. “Ke te fai lelei, ta ʻoku tolotui mai kia kita ʻa e fai kovi,” ko ʻene lea moʻoni ia. “Seuke, ʻoku te kaungā-malieʻia mo e lao ʻa e ʻOtua, ʻa hoto tangata-ʻi-loto; ka ʻoku ha kiate au ha lao kehe ʻoku nofo i hoku ngaahi kupu, ʻo fai tau mo e lao ʻo hoku loto, mo takipopula au ki he lao angahalaʻia ʻoku nofo ʻi hoku ngaahi kupu.” Ko ia naʻe ʻeke ʻe Paula: “Ko hai tū te ne hamusi au mei he sino ʻoku mei ai ʻa e mate ni?”​—Loma 7:​21-24.

Tauʻatāina mei he Angahalá​—Anga-Fēfē?

“Ko e fakatauʻatāiná, ʻi he talatukufakaholo faka-Hinituú,” ko e lau ia ʻa ha mataotao ʻe taha, “ko e fakatauʻatāinaʻi mei he toutou fanauʻi mo e mate.” ʻI he tuʻunga ko ha fakaleleiʻanga, ʻoku tuhu ʻa e lotu Putá ki he Nirvana​—ko ha tuʻunga ʻo e mole mei he manatú ʻa e moʻoniʻi meʻa fakatuʻasinó. Ko e ʻikai ke hoko ʻo makupusi ʻa e foʻi fakakaukau ko ia ko e angahala tukufakaholo, ʻoku talaʻofa pē ʻe he lotu Hinituú ia ha pulia atu mei he ʻi aí.

ʻI he tafaʻaki ʻe tahá, ko e founga ʻa e Tohitapú ki he fakatauʻatāiná ʻoku iku ai ia ki hono toʻo moʻoni atu ʻa e tuʻunga angahalaʻiá. ʻI he hili hono ʻeke pe ʻe anga-fēfē ke fakahaofi ia mei he angahalá, naʻe hoko atu ʻe he ʻaposetolo ko Paulá ke tali: “Fakafetaʻi ki he ʻOtua, ʻa ia kuo ne fai ʻia Sisu Kalaisi ko hotau ʻEiki!” (Loma 7:25) ʻIo, ko e fakahaofí ʻoku haʻu ia mei he ʻOtuá fakafou ʻia Sīsū Kalaisi.

Fakatatau ki he Kōsipeli ʻa Mātiú, “ko e Fanautama ʻa Tangata,” ʻa Sīsū Kalaisi, naʻe haʻu “ke tuku ʻene moʻui ke huhuʻiʻaki ha tokolahi, heʻene fetongi kinautolu.” (Mātiu 20:28) Hangē ko ia naʻe hiki ʻi he 1 Timote 2:​6, naʻe tohi ʻe Paula ʻo pehē ko Sīsuú “naʻa ne foaki ia ʻe ia ko e fetongi huhuʻi ʻo e kakai kotoa pe.” Ko e foʻi lea “huhuʻi” ʻokú ne fakahaaʻi ʻa hono totongi ʻa e mahuʻinga ki hono totongi-huhuʻi mai ʻo e kau pōpula. Ko e moʻoniʻi meʻa ko ia ko ha fetongi huhuʻí ʻokú ne fakamamafaʻi ʻa e ʻaonga ʻo e mahuʻinga ʻoku totongí ki hono fakapalanisi ʻa e ngaahi tuʻunga ʻo e fakamaau totonú. Ka ʻoku malava fēfē ke lau ʻa e pekia ʻa e tangata pē ʻe taha “ko e fetongi huhuʻi ʻo e kakai kotoa pe”?

Naʻe fakatau atu ʻe ʻĀtama ʻa e kotoa ʻo e faʻahinga ʻo e tangatá, ʻo kau ai kitautolu, ki he angahalá mo e maté. Ko e mahuʻinga ke totongí, pe tautea, naʻá ne totongiʻakí ko ʻene moʻui fakaetangata haohaoá. Ke ʻufiʻufi ʻení, ko ha toe moʻui fakaetangata haohaoa ʻe taha​—ko ha fetongi huhuʻi—naʻe pau ke totongiʻaki. (Ekisoto 21:23; Teutalonome 19:21; Loma 5:​18, 19) Koeʻuhi ko e ʻikai ha tangata haohaoa ke ne malava ʻo tokonaki mai ʻa e huhuʻi ko ʻení, naʻe hanga ai ʻe he ʻOtuá, ʻi heʻene poto taʻefakangatangatá, ʻo fakaʻatā ha hala ke toʻo atu ai ʻa e ngaahi faingataʻá ni. (Sāme 49:​6, 7) Naʻá ne hiki hifo ʻa e moʻui haohaoa ʻa hono ʻAlo tofu-pē-taha-ne-fakatupú mei hēvani ki he manava ʻo ha tāupoʻou ʻi he māmaní, ʻo ʻai ia ke ʻaloʻi mai ko ha tangata haohaoa.​—Luke 1:​30-38; Sione 3:​16-18.

Ke lava ke fakahoko ʻa e ngāue ko hono huhuʻi ʻa e faʻahinga ʻo e tangatá, naʻe pau ke tauhi maʻu ʻe Sīsū hano lēkooti maʻa ʻi he taimi fakakātoa naʻá ne ʻi he māmaní aí. Ko e meʻa ia naʻá ne faí. Naʻá ne toki pekia leva ʻi ha pekia fakaefeilaulau. Naʻe fakapapauʻi ai ʻe Sīsū ʻi he foungá ni ko e mahuʻinga ʻo ha moʻui fakaetangata haohaoá​—haʻaná tonu—ʻe ala maʻu ia ke totongiʻaki atu ko ha huhuʻi ʻi hono fakahaofi ʻa e faʻahinga ʻo e tangatá.​—2 Kolinito 5:14; 1 Pita 1:​18, 19.

Meʻa ʻOku Malava ke Fai Maʻatautolu ʻe he Huhuʻi ʻa Kalaisí

ʻOku malava ke ʻaonga kiate kitautolu he taimí ni ʻa e feilaulau huhuʻi ʻa Sīsuú. ʻI hono ngāueʻi ʻa e tui ki aí, ʻoku malava ai ke tau fiefia ʻi ha tuʻunga maʻa ʻi he ʻao ʻo e ʻOtuá pea malava ai ke ʻi he malumalu ʻo e ʻofa mo e tokanga fakaalaala ʻa Sihová. (Ngāue 10:43; Loma 3:​21-24) ʻI he ʻikai ke hoko ʻo lōmekina ʻe he halaia ki he ngaahi angahala kuo tau fai nai, ʻoku malava ke tau kumi tauʻatāina ki he fakamolemole mei he ʻOtuá ʻo makatuʻunga ʻi he huhuʻí.​—Aisea 1:18; Efeso 1:7; 1 Sione 2:​1, 2.

ʻI he ngaahi ʻaho ʻoku hanganaki mai mei muʻá, ʻe lava ai ʻe he huhuʻí ʻo ʻai ke malava ʻa hono fakamoʻui fakaʻaufuli ʻa e tuʻunga mahamahaki ʻo e faʻahinga ʻo e tangatá ʻa ia naʻe fakatupunga ʻe he angahalá. ʻOku fakamatala ʻa e tohi fakamuimui ʻo e Tohitapú ki “ha vaitafe ʻo e vaiola” ʻoku tafe mai mei he taloni ʻo e ʻOtuá. ʻI he ongo kauvaí ʻoku ʻi ai ʻa e ʻuluʻakau fua ngafuhifuhi ko hono ngaahi laú “ʻoku ʻaonga ki he faitoʻo ʻo e ngaahi kakai.” (Fakahā 22:​1, 2) ʻI he tuʻu fakaefakaʻilongá, ʻoku lāulea heni ʻa e Tohitapú ʻo kau ki he tokonaki fakaofo ʻa e Tokotaha-Fakatupú ke fakatauʻatāinaʻiʻaki ʻa e faʻahinga ʻo e tangatá mei he angahalá mo e maté ʻo taʻengata ʻo fakatuʻunga ʻi he feilaulau huhuʻi ʻa Sīsuú.

ʻE vavé ni ke fakahoko ʻa e ngaahi vīsone fakaekikite ʻo e tohi ʻa Fakahaá. (Fakahā 22:​6, 7) ʻE toki hoko leva ʻa e faʻahinga loto-totonu kotoa pē ʻo haohaoa, ʻo “fakaʻataʻatā mei heʻene popula ki he ʻauha.” (Loma 8:​20, 21) ʻIkai ʻoku totonu ke ueʻi ʻe he meʻá ni kitautolu ke tau ako ke lahi ange ʻo fekauʻaki mo Sihova ko e ʻOtuá pea ki hono ʻAlo mateakí, ʻa Sīsū Kalaisi, ʻa ia naʻá ne hoko ko e huhuʻí?​—Sione 17:3.

[Fakamatala ʻi lalo]

[Fakatātā ʻi he peesi 6]

Naʻe ʻomai ʻe ʻĀtama ʻa e angahalá mo e maté ki he faʻahinga ʻo e tangatá

[Fakatātā ʻi he peesi 7]

ʻOku ʻomai ʻe he feilaulau huhuʻi ʻa Sīsuú ʻa e fakatauʻatāina mei he angahalá mo e maté