‘Ko Hoku Fiefiaʻangá Foki ʻa Hoʻo Ngaahi Fakamanatú’

“ʻIlonga ha meʻa naʻe tohi muʻa naʻe tohi moʻotau akonekina.”​—LOMA 15:4.

 1. ʻOku anga-fēfē hono ʻomai ʻe Sihova kiate kitautolu ʻa e ngaahi fakamanatú, pea ko e hā ʻoku fiemaʻu ai ia kiate kitautolú?

ʻOKU ʻomai ʻe Sihova ki heʻene kakaí ʻa e ngaahi fakamanatu ke tokoniʻi ai kinautolu ke nau fekuki mo e ngaahi tenge ʻo e ngaahi taimi faingataʻá ni. ʻOku ʻomai ʻa e niʻihi ʻo e ngaahi fakamanatú ni ʻi he lolotonga ʻo ha lau Tohi Tapu fakafoʻituitui, lolotonga iá ʻoku ʻomai ʻa e niʻihi ia ʻi he fakamatala pe ko e ngaahi tali ʻoku fai ʻi he ngaahi fakataha faka-Kalisitiané. Ko e konga lahi ʻo e meʻa ʻoku tau lau pe fanongo ai ʻi he ngaahi taimi pehení ʻoku ʻikai foʻou ia kiate kitautolu. ʻOku ngalingali kuo tau ʻosi lāulea kitautolu ia ki he fakamatala meimei tatau ʻi ha taimi ki muʻa. Kae kehe, koeʻuhi ko ʻetau hehema ke loto-ngalongaló, ʻoku fiemaʻu hokohoko ai ke fakafoʻou ʻetau ngaahi manatú ʻi he fekauʻaki mo e ngaahi taumuʻa, ngaahi lao mo e ngaahi fakahinohino ʻa Sihová. ʻOku totonu ke tau houngaʻia ʻi he ngaahi fakamanatu ʻa Sihová. ʻOku nau fakafoʻou hotau lotó ʻaki hono tokoniʻi kitautolu ke tau tokangataha ki he ngaahi ʻuhinga ʻokú ne ueʻi ai kitautolu ke tau muia ha ʻalunga moʻui fakaʻotuá. Ko ia ai, naʻe hiva ʻa e tokotaha-tohi-sāmé kia Sihova: “Ko hoku fiefiaʻanga foki ʻa hoʻo ʻu fakamoʻoni na [pe ngaahi fakamanatú].”—Sāme 119:24.

2, 3. (a) Ko e hā naʻe fakatolonga mai ai ʻe Sihova ʻo aʻu mai ki hotau ʻahó ni ʻa e ngaahi talanoa ki he moʻui ʻa e faʻahinga ʻi he Tohi Tapú? (e) Ko e hā ʻa e ngaahi talanoa mei he Tohi Tapú te tau lāulea ki ai ʻi he kupú ni?

² ʻOku mālohi ʻa e Folofola ʻa e ʻOtuá, neongo naʻe hiki ia ʻi he ngaahi senituli lahi he kuohilí. (Hepelu 4:12) ʻOkú ne ʻomai kiate kitautolu ʻa e ngaahi talanoa moʻoni fekauʻaki mo e moʻui ʻa e faʻahinga ʻi he Tohi Tapú. Neongo kuo liliu lahi ʻa e ngaahi anga fakafonua mo e anga ʻo e vakai talu mei he ngaahi taimi ʻo e Tohi Tapú, ko e ngaahi faingataʻa ko ia kuo pau ke tau fehangahangai mo iá ʻoku faʻa meimei tatau pē ia mo e ngaahi faingataʻa naʻe fehangahangai mo e faʻahinga ʻi he taimi ko iá. Ko e ngaahi talanoa lahi kuo fakatolonga mai ʻi he Tohi Tapú ki ha lelei maʻatautolú ʻoku nau ʻomai ʻa e ngaahi faʻifaʻitakiʻanga fakalotomāfana ʻo e kakai naʻa nau ʻofa ʻia Sihova mo tauhi faitōnunga kiate ia neongo ʻa e ngaahi tuʻunga fakamamahí. ʻOku ʻi ai ʻa e ngaahi talanoa kehe ʻoku nau fakahanga ʻa e tokangá ki he ngaahi ʻulungāanga ʻoku fehiʻa ai ʻa e ʻOtuá. Naʻe fakakau ʻe Sihova ʻa e ngaahi talanoa fakafoʻituitui lelei mo kovi kotoa ko ʻení ʻi he Tohi Tapú ke hoko ko e ngaahi fakamanatu. ʻOku hangē pē ko ia naʻe tohi ʻe he ʻapositolo ko Paulá: “ʻIlonga ha meʻa naʻe tohi muʻa naʻe tohi moʻotau akonekina; koeʻuhi ko e meʻa ʻi he fakakataki mo e poupou ʻoku fai ʻe he folofola ke tau maʻu ai ʻa e ʻamanaki lelei.”—Loma 15:4.

³ Tau tokangataha angé ki ha ngaahi talanoa ʻe tolu mei he Tohi Tapú: ko e fakamatala ki he ngaahi feangainga ʻa Tēvita mo Saulá, ko e talanoa kia ʻAnanaia mo Sāfailá, pea mo e fakamatala ki he fakafeangai ʻa Siosifa ki he uaifi ʻo Pōtifá. ʻOku akoʻi mai ʻe he ngaahi talanoá ni taki taha kiate kitautolu ha ngaahi lēsoni mahuʻinga.

Mateaki ki he Ngaahi Fokotuʻutuʻu ʻa e ʻOtuá

4, 5. (a) Ko e hā ʻa e tuʻunga naʻe ʻi ai ʻa Tuʻi Saula mo Tēvitá? (e) Naʻe anga-fēfē ʻa e fakafeangai ʻa Tēvita ki he loto-tāufehiʻa ʻa Saulá?

⁴ Ko e moʻoni naʻe taʻefaitōnunga ʻa Saula kia Sihova pea naʻe ʻikai ke ne feʻunga ke pule ki Heʻene kakaí. Ko ia naʻe siʻaki ai ʻe he ʻOtuá ʻa Saula pea tataki ʻa e palōfita ko Sāmiuelá ke ne pani ʻa Tēvita ke hoko ko e tuʻi ʻo ʻIsileli ʻi he kahaʻú. ʻI he loto-toʻa mo e pōtoʻi lahi fau ʻa Tēvita ʻi he taú pea fakahīkihikiʻi ai ia ʻe he kakaí, naʻe kamata ke vakai ʻa Saula ia kia Tēvita ko hono fili ia. Naʻe toutou feinga ai ʻa Saula ke tāmateʻi ʻa Tēvita. Naʻe hao ʻa Tēvita ʻi he ngaahi feinga kotoa ko iá koeʻuhi naʻá ne kau mo Sihova.—1 Samiuela 18:​6-12, 25; 19:​10, 11.

⁵ ʻI he ngaahi taʻu lahi, naʻe pau ke moʻui pē ai ʻa Tēvita ko ha tokotaha hola holo. ʻI he taimi naʻe hoko mai ai ha ngaahi faingamālie ke ne tāmateʻi ʻa Saulá, naʻe vili ange ʻa hono ngaahi takangá ke ne fai ia, ʻi he pehē kuo tuku ʻe Sihova ʻa e fili ʻo Tēvitá ki hono nimá. Neongo ia, naʻe fakafisi ʻa Tēvita ia ke fai pehē. Naʻe hanga ʻe heʻene mateaki kia Sihová mo ʻene tokaʻi ʻa e tuʻunga ʻo Saula ko e tuʻi pani ʻo e kakai ʻa e ʻOtuá ʻo ueʻi ia ke ʻoua te ne tāmateʻi ʻa Saula. ʻIkai naʻe fakanofo ʻe Sihova ʻa Saula ko e tuʻi ʻo ʻIsileli? ʻE toe toʻo pē ia ʻe Sihova mei ai ʻi he taimi naʻá ne ʻafioʻi ai ʻoku feʻunga ke fai peheé. Naʻe fakaʻuhinga ʻa Tēvita ʻo pehē naʻe ʻikai haʻane totonu ke ne kaunoa ʻi he meʻa ko iá. ʻI he hili ʻene fai ʻa e meʻa kotoa naʻá ne malava ʻi hono tuʻungá ke lolou hifo ai ʻa e loto-tāufehiʻa ʻa Saula kiate iá, naʻe fakaʻosiʻaki ʻe Tēvita: “Ko e ʻEiki pe te ne taaʻi ia, pe hoko hono ʻaho ke pekia, pe te ne ʻalu hifo ki he tau ʻo mole ai. Ko Sihova e haʻaku ofi ke ala ki he pani ʻa e ʻEiki.”—1 Samiuela 24:​3-15; 26:​7-20.

 6. Ko e hā ʻoku mahuʻinga ai kiate kitautolu ʻa e talanoa kia Tēvita mo Saulá?

⁶ ʻOku ʻi ai ha lēsoni mātuʻaki mahuʻinga ʻi he talanoá ni. Kuo faifai ange peá ke fifili pe ko e hā ʻoku malanga hake ai ʻa e ngaahi palopalema ʻe niʻihi ʻi he fakatahaʻanga Kalisitiané? Mahalo pē ko ha taha ʻokú ne fai ha tōʻonga taʻefeʻunga. ʻOku ʻikai nai ko ha faihala mamafa ʻa ʻene tōʻongá, ka ʻokú ne fakahohaʻasi koe. Ko e hā ʻoku totonu ke ke faí? Koeʻuhi ko hoʻo mahuʻingaʻia ʻi ho tokotaha ko iá pea ʻi hoʻo loto ke ke kei mateaki kia Sihová, te ke fili nai ke ke lea kiate ia ʻi ha founga ʻofa, ʻi hoʻo taumuʻa ke maʻu mai ho tokouá. Fēfē leva kapau ʻoku kei hokohoko atu ʻa e palopalemá ia? ʻI he hili hoʻo fai ʻa e meʻa kotoa pē te ke malavá, te ke loto nai ke tuku ā ʻa e meʻa ko iá ki he toʻukupu ʻo Sihová. Ko e meʻa ia naʻe fai ʻe Tēvitá.

 7. ʻI he faʻifaʻitaki kia Tēvitá, ʻoku totonu ke fēfē ʻetau talí kapau ʻoku tau fuesia ha fakamaau taʻetotonu pe tomuʻa fehiʻa mai?

⁷ Mahalo pē ʻokú ke fehangahangai nai mo ha ngaahi palopalema ʻo e fakamaau taʻetotonu pe tomuʻa fehiʻa fakalotu ʻi he anga ʻo e nofó. Mahalo ko ha kiʻi meʻa siʻi pē pe halaʻatā ha meʻa ia ʻe lava ke ke fai fekauʻaki mo ia ʻi he taimí ni. ʻE lava ke faingataʻa ʻaupito ke te kātaki ʻi ha tuʻunga pehē, ka ʻoku akoʻi mai ʻe he tali ʻa Tēvita ki he fakamaau taʻetotonú ha lēsoni kiate kitautolu. Ko e ngaahi saame naʻe tohi ʻe Tēvitá ko ha lēkooti fakatoʻoaloto ia ʻo ʻikai ngata pē ʻi heʻene ngaahi lotu fakamātoato ki he ʻOtuá ke fakahaofi ia mei hano maʻu ʻe Saulá ka ʻoku toe fekauʻaki foki ia mo ʻene mateaki kia Sihová mo ʻene tokanga ki he lāngilangi ʻo e huafa ʻo e ʻOtuá. (Sāme 18:​1-6, 25-​27, 30-​32, 48-​50; 57:​1-​11) Naʻe kei mateaki pē ʻa Tēvita kia Sihova neongo naʻe hokohoko atu ʻa Saula ʻi ha tōʻonga taʻetotonu ʻi ha ngaahi taʻu lahi. Ko kitautolu foki ʻoku totonu ke tau faitōnunga ai pē kia Sihova mo ʻene kautahá neongo ʻa e ngaahi fakamaau taʻetotonu ʻoku tau fuesiá pea neongo pe ko e hā ʻoku fai mai ʻe he niʻihi kehé. ʻOku malava ke tau fakapapauʻi ʻoku ʻafioʻi lelei ʻe Sihova ʻa e tuʻunga ʻoku hokó.—Sāme 86:2.

 8. Naʻe anga-fēfē ʻa e tali ʻa e Kau Fakamoʻoni ʻa Sihova ʻi Mosemipīkí ʻi hono ʻahiʻahiʻi ʻenau mateaki kia Sihová?

⁸ ʻOku ʻomai ʻe he kau Kalisitiane ʻi Mosemipīkí ha faʻifaʻitakiʻanga ʻi onopooni ʻo e faʻahinga naʻa nau pīkitai mateaki kia Sihova ʻi ha taimi ʻo e ʻahiʻahí. ʻI he 1984 naʻe toutou ʻohofi ai honau ngaahi koló ʻe he kau tau ʻo ha faʻahi fakafepaki, ʻa ia naʻa nau kaihaʻa, tutu ʻa e ngaahi falé pea mo tāmate. Ne hangē ne ʻikai malava ʻe he kau Kalisitiane moʻoní ia ke fai ha meʻa ke maluʻi ai kinautolu. Naʻe fai ʻa e ngaahi feinga ki he kakai ʻo e feituʻú ke fakakau kinautolu ki he faʻahi fakafepakí pe ke fakamālohiʻi kinautolu ke nau poupou ki ai ʻi ha ngaahi founga kehe. Naʻe fakakaukau ʻa e Kau Fakamoʻoni ʻa Sihová ia ko hono fai ʻa e meʻa ko iá ʻoku ʻikai fehoanaki ia mo honau tuʻunga tuʻu-ʻatā faka-Kalisitiané. Ne hanga ʻe heʻenau fakafisí ʻo fakaʻitaʻi ʻa e faʻahi fakakautaú. Neongo naʻe mate ʻa e Kau Fakamoʻoni ʻe toko 30 ʻi he vahaʻa taimi taʻemanonga ko iá, ka naʻa mo e fakamanamanaʻaki ʻa e maté naʻe ʻikai te ne malava ke maumauʻi ʻa e mateaki ʻa e kakai ʻa e ʻOtuá.a Naʻa nau hangē ko Tēvitá ʻo kātakiʻi ʻa e ngaahi fakamaau taʻetotonú ka naʻe faai mai pē ʻo nau ikuna.

Ko ha Fakamanatu Fakatokanga

9, 10. (a) ʻOku malava fēfē ke tau maʻu ha ʻaonga mei he ngaahi fakatātā ʻe niʻihi mei he Tohi Tapú? (e) Ko e hā naʻe hala ʻi he meʻa naʻe fai ʻe ʻAnanaia mo Sāfailá?

⁹ Ko e faʻahinga tāutaha ʻe niʻihi ʻoku lave ki ai ʻi he Tohi Tapú ʻoku nau ʻomai ha ngaahi fakamanatu fakatokanga fekauʻaki mo e ʻulungāanga ke fakaʻehiʻehi mei aí. Ko e moʻoni, ʻoku ʻi he Tohi Tapú ʻa e ngaahi fakamatala lahi fekauʻaki mo e kakai, naʻa mo e lotolotonga ʻo e kau sevāniti ʻa e ʻOtuá, ʻa ia naʻa nau faihala pea fuesia ai ʻa hono ngaahi nunuʻá. (1 Kolinito 10:11) Ko ha fakamatala pehē ʻe taha ʻoku fekauʻaki ia mo ʻAnanaia mo Sāfaila, ko ha ongo meʻa mali ko e ongo mēmipa ʻo e fakatahaʻanga Kalisitiane ʻi Selusalema ʻi he taimi ʻo e kau ʻapositoló.

¹⁰ ʻI he hili ʻa e Penitekosi ʻo e 33 T.S., naʻe malanga hake ai ʻa e fiemaʻu ʻo ha tokoni fakamatelie ki he kau tui foʻou naʻa nau nofo ʻi Selusalema ke maʻu ʻaonga mei he feohi mo e kau ʻapositoló. Ko e kau mēmipa ʻe niʻihi ʻo e fakatahaʻangá naʻa nau fakatau atu ʻenau koloá ke maʻu ha paʻanga ke vahevahe ki he masivá. (Ngāue 2:​41-45) Naʻe fakatau atu ʻe ʻAnanaia mo Sāfaila ha konga kelekele pea ʻomai ʻa e konga pē ʻo e paʻanga naʻe maʻu aí ki he kau ʻapositoló, ʻo taku ko ʻena meʻaʻofá ko e kotoa ia ʻo e paʻanga naʻá na maʻu mei kelekele naʻe fakatau atú. Ko e moʻoni ko e meʻa ʻataʻatā pē ia ʻa ʻAnanaia mo Sāfaila pe ko e hā ʻa e lahi pe siʻi te na loto ke foakí, ka ko e meʻa naʻá ne ueʻi kinauá naʻe hala, pea ko ʻena ngaahi ngāué naʻe taʻefaitotonu. Naʻá na loto ke na hā lelei mo ʻai ke hā naʻá na fai ʻa e meʻa lahi ange ia mei he tuʻunga totonu naʻá na ʻi aí. ʻI hono tākiekina ʻa e ʻapositolo ko Pitá ʻe he laumālie māʻoniʻoní, naʻá ne fakaeʻa ʻena taʻefaitotonú mo ʻena mālualoí, pea taaʻi ai kinaua ʻe Sihova ʻo na mate.—Ngāue 5:​1-10.

11, 12. (a) Ko e hā ha ngaahi fakamanatu fekauʻaki mo e faitotonú? (e) Ko e hā ʻa e ngaahi ʻaonga ʻoku maʻu ʻi he hoko ʻo faitotonú?

¹¹ Ka faifai ange ʻo fakataueleʻi kitautolu ke tau taʻefaitotonu ʻi ha feinga ke ʻai ʻa e kakaí ke nau fakakaukau mai ʻoku tau lelei, ʻofa ke hoko ʻa e talanoa kia ʻAnanaia mo Sāfailá ko ha fakamanatu mālohi ia kiate kitautolu. ʻE lava nai ke tau kākaaʻi hotau kaungā faʻahinga ʻo e tangatá, ka heʻikai malava ke tau kākaaʻi ʻa Sihova. (Hepelu 4:13) ʻOku toutou enginaki mai ʻa e Tohi Tapú kiate kitautolu ke tau fefaitotonuʻaki, he ko e kau loí ʻe ʻikai hanau tofiʻa ʻi ha māmani ʻa ia ʻe fakamaʻa mei ai ʻa e taʻemāʻoniʻoní. (Palovepi 14:2; Fakahā 21:8; 22:15) ʻOku totonu ke hā mahino ʻa e ʻuhinga ki he meʻa ko iá. Ko e tokotaha pouaki ʻo e loi kotoa pē, ʻoku ʻikai ha toe taha ka ko Sētane ko e Tēvoló.—Sione 8:44.

¹² Ko e moʻui ʻi ha founga moʻui faitotonú ʻoku maʻu ai ʻa e ngaahi ʻaonga lahi. ʻOku kau ki ai ha konisēnisi maʻa pea mo e fiemālie ʻi he hoko ʻo falalaʻanga ʻi he vakai mai ʻa e niʻihi kehé. ʻI he ngaahi tuʻunga lahi, koeʻuhi naʻa nau faitotonu, kuo maʻu ai ʻe he kau Kalisitiané ha ngāue, pe ʻoku nau kei maʻu pē ʻenau ngaahi ngāué. Ka ko e ʻaonga mahuʻinga tahá ko ʻetau hoko ʻi heʻetau faitotonú ʻo kaumeʻa mo e ʻOtua Māfimafi-Aoniú.—Sāme 15:​1, 2.

Tauhi Maʻu ʻa e Anga-Maʻá

13. Ko e hā ʻa e tuʻunga naʻe ʻi ai ʻa Siosifá, pea naʻe anga-fēfē ʻene fakafeangai ki aí?

¹³ Ko Siosifa, ko ha foha ʻo e pēteliake ko Sēkopé, naʻe fakatau atu ia ko ha pōpula ʻi hono taʻu 17. Naʻe faai atu ʻo ne ʻi he fale ʻo Pōtifá, ʻa ia ko ha ʻōfisa ʻi he lotoʻā faka-Tuʻi ʻo ʻIsipité pea naʻe māʻunga tokanga ai kia Siosifa ʻa e uaifi ʻo Pōtifá. Naʻe loto ʻa e uaifí ni ke ne fehokotaki fakasino mo Siosifa, ko ha talavou matātangata, pea naʻe ʻosi atu ʻa e ʻaho ki he ʻaho mo ʻene vilitaki kia Siosifa: “Ta mohe muʻa.” Naʻe mamaʻo ʻa Siosifa mei hono fāmilí ʻi ha fonua ʻa ia naʻe ʻikai ʻilo ai ia ʻe ha taha. Naʻe mei malavangofua kiate ia ke ne fehokotaki fakasino mo e fefiné ni ʻo ʻikai ʻilo ki ai ha taha. Kae kehe, ʻi he faifai pea puketuʻu ia ʻe he uaifi ʻo Pōtifá, naʻe hola ʻa Siosifa ia.—Senesi 37:​2, 18-28; 39:​1-12.

14, 15. (a) Ko e hā ʻoku mahuʻinga ai kiate kitautolu ʻa e talanoa kia Siosifá? (e) Ko e hā naʻe fakamālōʻia ai ʻe ha fefine Kalisitiane ʻe taha ʻa ʻene tokanga ki he ngaahi fakamanatu ʻa e ʻOtuá?

¹⁴ Naʻe ʻohake ʻa Siosifa ʻi ha fāmili manavahē-ʻOtua, pea naʻá ne mahinoʻi ko e fehokotaki fakasino ʻi he vahaʻa ʻo e kakai ʻa ia ʻoku ʻikai ko ha husepāniti mo ha uaifí ʻoku hala. Naʻá ne ʻeke: “Pea fefe ai haʻaku fai ʻa e fuʻu angahala lahi ni, ʻo te hia ai ki he ʻOtua?” ʻOku ngalingali naʻe tataki ʻene fakamulitukú ʻe he ʻilo ki he tuʻunga ʻa e ʻOtuá ki he faʻahinga ʻo e tangatá ʻo hangē ko ia naʻe fakahaaʻi ʻi ʻĪtení, ʻa ia ko e mali pē mo e toko taha. (Senesi 2:24) ʻOku malava ʻe he kakai ʻa e ʻOtuá he ʻaho ní ke nau maʻu ʻaonga mei he fakakaukauloto atu ki he founga naʻe fai ʻe Siosifa ʻi he tuʻunga ko iá. ʻI he ngaahi feituʻu ʻe niʻihi, ko e fakakaukau atu ko ia ki he fehokotaki fakasinó ʻoku mātuʻaki fakamaʻamaʻaʻi pē ia, he ka fakafisi ha toʻutupu ke ʻoua ʻe kau ʻi he ʻulungāanga taʻetāú ʻoku manukiʻi ia ʻe honau toʻumeʻá. ʻOku failahia ʻi he lotolotonga ʻo e kakai lalahí ʻa e fehokotaki fakasino ʻi tuʻa mei he nofo malí. Ko ia ai, ko e talanoa kia Siosifá ko ha fakamanatu taimi tonu ia kiate kitautolu. ʻOku kei tuʻu tatau ai pē ʻa e tuʻunga ʻa e ʻOtuá, ko e feʻauakí mo e tonó ko e ongo angahala ia. (Hepelu 13:4) Ko e tokolahi ko ia kuo nau tō ki he tenge ke kau ʻi he fehokotaki fakasino taʻetotonú ʻoku nau loto-tatau ʻoku ʻi ai ʻa e ʻuhinga mālohi ke ʻoua ʻe fai peheé. ʻOku kau nai ki he ngaahi nunuʻa ʻoku hoko aí ha ongoʻi mā, ko ha konisēnisi halaia, fuaʻa, feitama mo e mahaki ʻoku fetuku holo ʻe he fehokotaki fakasinó. Hangē tofu pē ko ia ʻoku fakamanatu mai kiate kitautolu ʻe he Tohi Tapú, ko ha taha ʻoku fai feʻauaki ʻokú ne “angahala ʻi hono sino oʻona.”—1 Kolinito 5:​9-12; 6:18; Palovepi 6:​23-29, 32.

¹⁵ Ko Seni,b ko ha Fakamoʻoni ʻa Sihova teʻeki mali, ʻokú ne maʻu ha ʻuhinga ke ne fakamālōʻiaʻi ai ʻa e ngaahi fakamanatu ʻa e ʻOtuá. ʻI he ngāueʻangá, naʻe ʻi ai ha kaungāngāue matātangata ai naʻe kamata ke ne tokanga ange kiate ia. ʻI he ʻikai ke tokanga ki ai ʻa Sení, naʻe toe fakalalahi ange ai ʻa e feinga ʻa e tangatá ni. “Naʻá ku fāinga lahi ke tauhi ʻeku anga-maʻá koeʻuhi ko e meʻa fakatauele ʻa e taimi ʻoku tokanga atu ai ha taha kiate koé,” ko e lea ia ʻa Sení. Kae kehe, naʻe fakatokangaʻi ʻe Seni naʻe feinga pē ʻa e tangatá ia ke tānaki atu ia ki he tokolahi ʻo e kau fefine naʻá ne ʻosi fehokotaki fakasino mo iá. ʻI he taimi naʻe ongoʻi ai ʻe Seni ʻoku ʻikai kei lava ke ne kātakiʻí, naʻá ne kole kia Sihova ke tokoniʻi ia ke ne kei faitōnunga ai pē kiate Ia. Naʻe ʻilo ʻe Seni ko e ngaahi meʻa naʻá ne ako ʻi heʻene fekumi ʻi he Tohi Tapú mo e ngaahi tohi faka-Kalisitiané naʻe hangē ia ha ngaahi fakamanatu tau tonu naʻá ne ueʻi ia ke ne tokanga maʻu pē. Ko e taha ʻo e ngaahi fakamanatu ko iá ko e talanoa kia Siosifa mo e uaifi ʻo Pōtifá. ʻOku fakaʻosiʻaki ʻe Seni: “Ko e taimi kotoa pē ʻoku ou manatu ai ki hono lahi ʻo ʻeku ʻofa kia Sihová, ʻoku ʻikai ai te u manavasiʻi naʻa faifai peá u fai ʻa e fuʻu angahala lahí ni ʻo te hia ai kiate ia.”

Tokanga ki he Ngaahi Fakamanatu ʻa e ʻOtuá!

16. ʻE malava fēfē ke tau maʻu ʻaonga mei he vakai mo fakalaulauloto ki he moʻui ʻa e faʻahinga tāutaha ʻoku lave ki ai ʻi he Tohi Tapú?

¹⁶ ʻOku tau malava kotoa ke fakatupulekina ʻetau houngaʻia ki he ngaahi tuʻunga ʻa Sihová ʻaki ʻetau feinga ke mahinoʻi ʻa e ʻuhinga naʻá ne fakatolonga mai ai maʻatautolu ʻa e ngaahi talanoa ʻe niʻihi ʻi he Tohi Tapú. Ko e hā ʻoku nau akoʻi maí? Ko e hā ʻa e tōʻonga pe ngaahi hehema fakaeʻulungāanga ʻoku fokotuʻu mai ʻe he faʻahinga ʻi he Tohi Tapú ʻa ia ʻoku fiemaʻu ke tau faʻifaʻitaki ki ai pe fakaʻehiʻehi mei aí? ʻOku lauingeau ʻa e faʻahinga tāutaha ʻoku lēkooti mai ʻi he Folofola ʻa e ʻOtuá. Ko e faʻahinga kotoa ʻoku nau saiʻia ʻi he fakahinohino mei he ʻOtuá ʻe lelei ke nau fakatupulekina ha holi ki he poto foaki-moʻuí, ʻo kau ai ʻa e ngaahi lēsoni ʻoku lava ke tau ako mei he ngaahi faʻifaʻitakiʻanga kuo fakatolonga fakalelei mai ʻe Sihová. Kuo faʻa fakahaaʻi mai ʻi he makasini ko ʻení ʻa e ngaahi kupu fekauʻaki mo e faʻahinga tāutaha ʻa ia ko e ngaahi talanoa ki aí ʻoku akoʻi mai ai ha meʻa kiate kitautolu. Fēfē ke vaheʻi ha taimi ke vakai ai ki he ngaahi kupu ko iá!

17. ʻOku fēfē hoʻo ongoʻi fekauʻaki mo e ngaahi fakamanatu ʻa Sihová, pea ko e hā ʻokú ke ongoʻi pehē aí?

¹⁷ He houngaʻia lahi ē ka ko kitautolu ʻi he tokanga ʻofa ʻoku fakahāhaaʻi ʻe Sihova ki he faʻahinga ko ia ʻoku nau feinga ke fai hono finangaló! Ko e moʻoni ʻoku ʻikai ke tau haohaoa, hangē tofu pē ko e kau tangata mo e kau fefine ʻoku lave ki ai ʻi he Tohi Tapú naʻe ʻikai te nau haohaoa. Kae kehe, ko e lēkooti ʻo ʻenau ngaahi ngāué ko ha koloa taʻefakatataua ia kiate kitautolu. ʻI heʻetau tokanga ki he ngaahi fakamanatu ʻa Sihová, ʻe malava ke tau fakaʻehiʻehi ai mei hono fai ha ngaahi fehālaaki mafatukituki, pea ʻe lava ke tau faʻifaʻitaki ai ki he ngaahi faʻifaʻitakiʻanga lelei ʻo e faʻahinga ko ia naʻa nau ʻaʻeva ʻi he hala ʻo e māʻoniʻoní. Kapau te tau fai pehē, te tau lava ai ke hiva fakataha mo e tokotaha-tohi-sāmé: “Monuʻiaā ka ko ia ʻoku tauhi ʻEne ʻu fakamoʻoni na [pe ngaahi fakamanatu ʻa Sihová], ʻoku hahaʻo kiate ia ʻaki ʻa e loto kotoa. Kuo tauhi ʻe hoku laumalie hoʻo ʻu fakamoʻoni [pe ngaahi fakamanatú]; pea ʻoku ou ʻofa ʻaupito ki ai.”—Sāme 119:​2, 167.

[Fakamatala ʻi lalo]

ʻE Anga-Fēfē Haʻo Tali?

• Ko e hā ʻoku malava ke tau ako mei he anga ʻo e fakakaukau ʻa Tēvita kia Saulá?

• ʻOku akoʻi mai kiate kitautolu ʻe he fakamatala kia ʻAnanaia mo Sāfailá ʻa e hā?

• Ko e hā ʻoku tautefito ai ʻa e mahuʻinga ki he ʻahó ni ʻa e talanoa ki he moʻui ʻa Siosifá?

[Fakatātā ʻi he peesi 26]

Ko e hā naʻe fakafisi ai ʻa Tēvita ke fakaʻatā ke tāmateʻi ʻa Saulá?

[Fakatātā ʻi he peesi 27]

Ko e hā ʻoku tau ako mei he fakamatala kia ʻAnanaia mo Sāfailá?

[Fakatātā ʻi he peesi 28]

Ko e hā naʻá ne fakatupunga ʻa Siosifa ke ne talitekeʻi ʻa e vilitaki ki he ʻulungāanga taʻetāú?