Faʻifaʻitaki kia Sihova, ko Hotau ʻOtua Taʻefilifilimānakó

“ʻOku ʻikai ha filifilimānako ʻi he ʻOtua.”—LOMA 2:11.

1, 2. (a) Ko e hā ʻa e taumuʻa ʻa Sihova fekauʻaki mo e kau Kēnaní fakalūkufua? (e) Ko e hā naʻe fai ʻe Sihová, pea ko e hā ʻa e ngaahi fehuʻi ʻoku langaʻi hake ʻe he meʻá ni?

ʻI HE ʻapitanga he Tokalelei ʻo Mōapé ʻi he 1473 K.M., naʻe fanongo tokanga ai ʻa ʻIsileli kia Mōsese. Naʻe toka mei muʻa ha faingataʻa, ʻo fakalaka atu ʻi he Vaitafe Sioataní. Naʻe talaki ʻe Mōsese ʻa e taumuʻa ʻa Sihova ke ʻai ʻa ʻIsileli ke ne ikunaʻi ʻa e puleʻanga mālohi ʻe fitu ʻo Kēnaní ʻi he Fonua ʻo e Talaʻofá. He fakafiemālie moʻoni ko e ngaahi lea ʻa Mōsesé: “Ka tuku mai akinautolu e Jihova ko ho Otua i ho ao; te ke taʻi akinautolu”! Naʻe fiemaʻu ke ʻoua ʻe fakahoko ʻe ʻIsileli ha fuakava mo kinautolu, pea naʻe ʻikai te nau tuha ke ʻofaʻi.—Teutalonome 1:1; 7:​1, 2, PM.

² Neongo ia, naʻe fakahaofi ʻe Sihova ha fāmili ʻe taha mei he ʻuluaki kolo lahi naʻe ʻohofi ʻe ʻIsilelí. Naʻe toe maʻu ʻe he kakai mei ha kolo kehe ʻe fā ʻa e maluʻi ʻa e ʻOtuá. Ko e hā hono ʻuhinga ʻo e meʻá ni? Ko e hā ʻoku hanga ʻe he ngaahi meʻa mahuʻinga naʻe hoko ʻi he fekauʻaki mo e hao ʻa e kau Kēnani ko ení ʻo akoʻi kia kitautolu fekauʻaki mo Sihová? Pea ʻe lava fēfē ke tau faʻifaʻitaki kiate ia?

Ngaahi Tali ki he Ongoongo ʻo Sihová

3, 4. Ko e hā ʻa e kaunga ʻo e ongoongo fekauʻaki mo e ngaahi ikuna ʻa e kau ʻIsilelí ki he faʻahinga tāutaha ʻi Kēnaní?

³ Lolotonga ʻa e taʻu ʻe 40 ʻa ʻIsileli ʻi he toafá ki muʻa ke hū ki he Fonua ʻo e Talaʻofá, naʻe maluʻi pea tau ʻa Sihova maʻa hono kakaí. Ki he fakatonga ʻo e Fonua ʻo e Talaʻofá, naʻe fehangahangai ai ʻa ʻIsileli mo e tuʻi Kēnani ʻo ʻĀlatí. ʻI he tokoni ʻa Sihová naʻe ikunaʻi ai ia mo hono kakaí ʻe he kau ʻIsilelí ʻi Hoama. (Nomipa 21:​1-3) Ki mui ai, naʻe ʻalu takai ai ʻa e kau ʻIsilelí ʻi he fonua ko ʻĪtomí, pea nau fononga fakatokelau ki he tokelau-hahake ʻo e Tahi Maté. ʻI he feituʻu ko ení, ʻa ia naʻe nofoʻi ki muʻa ʻe Mōape, naʻe ʻi ai he taimi ko ení ʻa e kau ʻĀmolí. Naʻe fakafisi ʻa Tuʻi Sīhoni ʻo e kau ʻĀmolí ke fakaʻatā ʻa ʻIsileli ke nau fou atu ʻi he feituʻu ko ení. Naʻe fai ai ha tau ʻi Siahasa, ʻoku hā mahino ʻi he tokelau ʻo e Teleʻa Vaitafe ʻo ʻAlanoní, ʻa ia naʻe tāmateʻi ai ʻa Sīhoni. (Nomipa 21:​23, 24; Teutalonome 2:​30-​33) Mamaʻo atu ki he tokelaú, naʻe puleʻi ai ʻe ʻOki ʻa e kau ʻĀmoli kehé ʻi Pēsani. Neongo ko ha fuʻu saiāniti ʻa ʻOki, naʻe fakamoʻoniʻi ʻa e ʻikai hano vātatau mo Sihová. Naʻe tāmateʻi ʻa ʻOki ʻi ʻEtilei. (Nomipa 21:​33-​35; Teutalonome 3:​1-3, 11) Ko e ongoongo ʻo e ngaahi ikuná ni fakataha mo e ngaahi talanoa fekauʻaki mo e ʻEkisoto ʻa ʻIsileli mei ʻIsipité naʻe ʻi ai ʻene tākiekina mālohi ʻa e faʻahinga tāutaha naʻe nofo ʻi Kēnaní.a

⁴ ʻI he taimi naʻe ʻuluaki fou ai ʻa ʻIsileli ʻi Kēnani hili e kolosi ʻi Sioataní, naʻa nau fokotuʻu ʻapitanga ʻi Kilikali. (Siosiua 4:​9-​19) Naʻe tuʻu ʻikai mamaʻo mai ʻa e kolo ʻaaʻi ko Sielikoó. Ko e meʻa naʻe fanongo ai ʻa e Kēnani ko Lēhapí fekauʻaki mo e ngaahi ngāue ʻa Sihová naʻá ne ueʻi ia ke ne ngāue ʻi he tuí. Ko hono olá, ʻi he taimi naʻe ʻomai ai ʻe Sihova ʻa e fakaʻauha ki Sielikoó, naʻá ne fakahaofi ia mo e faʻahinga ʻi hono falé.​—Siosiua 2:​1-​13; 6:​17, 18; Semisi 2:25.

 5. Ko e hā naʻá ne fakaʻaiʻai ʻa e kau Kipioné ke nau fai fakapotopotó?

⁵ Ko hono hokó, naʻe ʻalu hake ʻa ʻIsileli mei he ngaahi fonua māʻulalo ofi ki he vaitafé ki he ngaahi moʻunga tefito ʻo e feituʻú. ʻI he muimui he tataki ʻa Sihová, naʻe ngāueʻaki ʻe Siosiua ʻa e ngaahi founga toka malumu ki he kolo lahi ko ʻAí. (Siosiua, vahe 8) Ko e ongoongo ki he ikuna ne toki hokó naʻá ne fakaʻaiʻai ʻa e ngaahi tuʻi Kēnani tokolahi ke nau fakatahataha ai ki he tau. (Siosiua 9:​1, 2) Ko e kau nofo ʻi he kolo Hevi ofi mai ko Kipioné naʻa nau fai ʻe kinautolu ʻa e meʻa kehe. “Naʻe hanga ai ʻekinautolu foki,” ko e fakamatala ia ʻa e Siosiua 9:​4, “ʻo nau fai fakaoloolo [“fakapotopoto,” NW].” Hangē ko Lēhapí, naʻa nau fanongo ki he fakahaofi ʻe Sihova ʻa hono kakaí ʻi he ʻEkisotó pea ʻi he ikunaʻi ʻa Sīhoni mo ʻOkí. (Siosiua 9:​6-​10) Naʻe ʻiloʻi ʻe he kau Kipioné ʻa e taʻeʻaonga ʻo e fakafepakí. Ko ia, ʻi he fai maʻa Kipione mo e kolo ofi mai ʻe tolu—ko Kefila, Piheloti, mo Kiliati-sialimí—naʻa nau fekau atu kia Siosiua ʻi Kilikali ha kau fakafofonga naʻe fakapuli ke hangē ko ʻenau haʻu mei ha fonua mamaʻó. Naʻe lavameʻa ʻa e palaní. Naʻe fakahoko ʻe Siosiua ha kovinānite mo kinautolu ʻa ia naʻe fakapapauʻi ai ʻenau haó. ʻI he ʻaho ʻe tolu ki mui ai naʻe ʻiloʻi ʻe Siosiua mo e kau ʻIsilelí ne kākaaʻi kinautolu. Neongo ia, naʻa nau fakapapau ʻia Sihova ke tauhi ʻenau fuakavá pea ko ia ai naʻa nau pipiki ki ai. (Siosiua 9:​16-​19) Naʻe hōifua ki ai ʻa Sihova?

 6. Naʻe anga-fēfē ʻa e tali ʻa Sihova ki he fuakava ko ia naʻe fakahoko ʻe Siosiua mo e kau Kipioné?

⁶ Naʻe fakaʻatā ki he kau Kipioné ke nau hoko ko e kau tā fefie mo e kau ʻutu vai ki he kau ʻIsilelí, naʻa mo hono fai ki he “olita ʻo Sihova” ʻi he tāpanekalé. (Siosiua 9:​21-​26 [21-27, PM]) Tuku kehe ia, ʻi he taimi naʻe fakamanamanaʻi ai ʻe he tuʻi ʻĀmoli ʻe toko nima mo ʻenau kau taú ʻa e kau Kipioné, naʻe kau fakaemana ki ai ʻa Sihova. Naʻe tāmateʻi ʻe ha ʻuha maka ʻa e fili tokolahi ange ʻi he tokolahi naʻe tāmateʻi ʻe he kau tau ʻa Siosiuá. Naʻe aʻu ʻo tali ʻe Sihova ʻa e kole ʻa Siosiua ke tuʻu maʻu ʻa e laʻaá mo e māhiná ke fakaʻatā hano ikunaʻi kakato ʻo e filí. “Naʻe ʻikai ha toe ʻaho hange ko ia ʻi muʻa pe ki mui,” ko e fakamatala ia ʻa Siosiuá, “ke fakaongo ai ʻa e ʻEiki ki he leʻo ʻo ha tangata: he naʻe tau ʻa Sihova maʻa Isileli.”—Siosiua 10:​1-14.

 7. Ko e hā ʻa e moʻoni naʻe fakahaaʻi ʻe Pita ʻi he tuʻunga ʻo e kau Kēnani ʻe niʻihi?

⁷ Ko e Kēnani ko Lēhapí mo hono fāmilí, pea pehē ki he kau Kipioné, naʻa nau manavahē kia Sihova pea ngāue ʻo fakatatau ki ai. Ko e meʻa naʻe hoko kia kinautolú ʻokú ne fakahāhā mahino ha foʻi moʻoni naʻe fakahaaʻi ki mui ʻe he ʻapositolo Kalisitiane ko Pitá: “ʻOku ʻikai ke filifilimanako ʻa e ʻOtua: ka neongo pe ko e feʻia ʻa e kakai, ka ʻilonga ʻa ia ʻoku ʻapasia kiate ia, pea ngaue fai ki he totonu, ʻoku ngofua ke ne aʻu mai kiate ia.”—Ngāue 10:​34, 35.

Ngaahi Feangainga mo ʻĒpalahame pea mo ʻIsilelí

8, 9. ʻOku anga-fēfē hono fakahaaʻi ʻa e taʻefilifilimānako ʻa Sihová ʻi heʻene ngaahi feangainga mo ʻĒpalahame pea mo e puleʻanga ʻo ʻIsilelí?

⁸ Naʻe tohoakiʻi ʻe he ākonga ko Sēmisí ʻa e tokangá ki he ʻofa maʻataʻatā ʻa e ʻOtuá ʻi Heʻene ngaahi feangainga mo ʻĒpalahame pea mo ʻene fānaú. Ko e tui ʻa ʻĒpalahamé, ʻo ʻikai ko hono tupuʻanga fakafaʻahingá, naʻá ne ʻai ia ko e ‘kaumeʻa ʻo Sihová.’ (Semisi 2:​23, NW) Ko e tui mo e ʻofa ʻa ʻĒpalahame kia Sihová naʻe ʻomai ai ʻa e ngaahi tāpuaki ki hono hakó. (2 Kalonikali 20:​7) Naʻe talaʻofa ʻa Sihova kia ʻĒpalahame: “Te u matuʻaki tapuakiʻi koe, pea te u matuʻaki fakatokolahi ho hako ke tatau mo e ngaahi fetuʻu ʻo e langi, pe ko e ʻoneʻone ʻi he matātahi.” Kae fakatokangaʻi ʻa e talaʻofa ʻi he veesi hokó: “Ko ho hako ʻe monuʻia ai ʻa e ngaahi puleʻanga ʻo mamani.”—Senesi 22:​17, 18; Loma 4:​1-8.

⁹ ʻI he kehe mei hono fakahaaʻi ʻa e filifilimānakó, naʻe fakahāhā ʻe Sihova ʻi heʻene ngaahi feangainga mo ʻIsilelí ʻa e meʻa te ne lava ʻo fai maʻá e faʻahinga ʻoku nau talangofua kiate iá. Ko e ngaahi feangainga peheé ko ha fakatātā ia ʻo e founga ʻoku fakahāhā ai ʻe Sihova ʻa e ʻofa mateakí ki heʻene kau sevāniti faitōnungá. Neongo ko ʻIsilelí ko e “koloa kanokato” ia ʻa Sihova, naʻe ʻikai ʻuhinga eni ia naʻe ʻikai fakakau ʻa e kakai kehé ki hono aʻusia ʻa e anga-lelei ʻa e ʻOtuá. (Ekisoto 19:5; Teutalonome 7:​6-8) Ko e moʻoni, naʻe toe fakatau mai ʻe Sihova ʻa ʻIsileli mei he nofo pōpula ʻi ʻIsipité pea fakahaaʻi ai: “Ko kimoutolu pe kuo u ʻilo ki ai ʻi he ngaahi famili kotoa ʻo mamani.” Kae fakafou ʻi he palōfita ko ʻĒmosí mo e niʻihi kehe, naʻe toe talaʻofa ai ʻe Sihova ha ʻamanaki fakaofo ki he kakai ʻo e “ngaahi puleʻanga kotoa pe.”—Emosi 3:2; 9:​11, 12; Aisea 2:​2-4.

Sīsū, ko e Faiako Taʻefilifilimānako

10. Naʻe anga-fēfē ʻa e faʻifaʻitaki ʻa Sīsū ki heʻene Tamaí ʻi hono fakahāhā ʻa e taʻefilifilimānakó?

¹⁰ Lolotonga ʻene ngāue fakafaifekau ʻi he māmaní, ko Sīsū, ʻa ia ko e fakatātā tonu ʻo ʻene Tamaí, naʻá ne faʻifaʻitaki ki he taʻefilifilimānako ʻa Sihová. (Hepelu 1:3) Ko ʻene tokanga tefito ʻi he taimi ko iá ke maʻu mai ʻa e “fanga sipi kuo mole ʻi he hako ʻo Isileli.” Neongo ia, naʻe ʻikai te ne taʻofi ai ʻene faifakamoʻoni ki ha fefine Samēlia ʻi ha vaikeli. (Mātiu 15:24; Sione 4:​7-30) Naʻá ne toe fakahoko ha mana ʻi he kole ʻa ha ʻōfisa fakakautau, ʻoku hā mahino naʻe ʻikai ko ha Siu. (Luke 7:​1-​10) Naʻe tānaki atu ia ki hono fakahāhā ʻi heʻene ngaahi ngāué ʻa ʻene ʻofa ki he kakai ʻa e ʻOtuá. Naʻe malanga foki ʻi he tuʻunga lahi ʻa e kau ākonga ʻa Sīsuú. Naʻe hoko ʻo mahino ko e tuʻunga ki hono maʻu ʻa e tāpuaki ʻa Sihová naʻe fekauʻaki ia, ʻikai ki he fonua ʻokú te haʻu mei aí, ka ki he anga ʻo e fakakaukaú. Ko e kakai anga-fakatōkilalo mo loto-totonu ʻa ia naʻa nau fiekaia ki he moʻoní naʻa nau tali ʻa e ongoongo lelei ʻo e Puleʻangá. ʻI hono kehé, ko e kau loto-pōlepolé mo e hīkisiá naʻa nau fehiʻa kia Sīsū mo ʻene pōpoakí. “E Tamai, koe Eiki oe lagi mo mamani, oku ou fakafetai kiate koe,” ko e fakahaaʻi ia ʻe Sīsuú, “i hoo fufu ae gaahi mea ni mei he kau boto moe fieiloilo, ka kuo ke fakaha ia ki he kau valevale: ke behe, E Tamai; he oku lelei ia i ho ao ke behe.” (Luke 10:​21, PM) ʻI heʻetau feangainga mo e niʻihi kehé makatuʻunga ʻi he ʻofá mo e tuí, ʻoku tau fai taʻefilifilimānako ai, ʻi he ʻiloʻi ko e founga eni ʻoku hōifua ki ai ʻa Sihová.

11. Naʻe anga-fēfē hono fakahāhā ʻa e taʻefilifilimānakó ʻi he muʻaki fakatahaʻanga Kalisitiané?

¹¹ ʻI he muʻaki fakatahaʻanga Kalisitiané, naʻe tatau pē ʻa e kau Siú mo e faʻahinga ʻikai ko e Siú. “ʻE to ʻa e langilangiʻia mo e fakamalo mo e tuʻumalie moʻonautolu taki taha ʻoku ngaue lelei,” ko e fakamatala ia ʻa Paulá, “ʻo muʻa ki he Siu, ka ki he Kalisi foki. He ʻoku ʻikai ha filifilimanako ʻi he ʻOtua.”b (Loma 2:​10, 11) Ko e meʻa naʻá ne fakapapauʻi pe naʻa nau maʻu ʻaonga mei he ʻofa maʻataʻatā ʻa Sihová, naʻe ʻikai ko honau tupuʻanga fakafaʻahingá, ka ko ʻenau tali ʻi heʻenau ʻilo fekauʻaki mo Sihová mo e ngaahi ʻamanaki naʻe ʻomai ʻe he huhuʻi ʻa hono ʻAló, ʻa Sīsū. (Sione 3:​16, 36) Naʻe tohi ʻe Paula: “Talaʻehai ko e Siu moʻoni ia ʻoku Siu ʻi tuʻa pe; pea talaʻehai ko e kamu moʻoni ia ʻoku ha pe ʻi tuʻa, ʻi he kakano: kaekehe, ko e Siu moʻoni ia ʻoku Siu ʻi loto, pea ko e kamu moʻoni ʻa e kamu ʻo e loto, ʻa ia ʻoku tuʻunga ʻi ha laumalie ʻo ʻikai ʻi ha tohi.” Pea ʻi heʻene ngāueʻaki pōtoʻi ʻa e ngaahi foʻi lea ʻoku kau ai ʻa e foʻi lea “Siu” (ko hono ʻuhingá ko e “ʻo Siuta,” ʻa ia, ko e fakavīkivikiʻi pe fakahīkihikiʻi), naʻe tānaki mai ʻe Paula: “Ko hono fakamalo ʻoku ʻikai mei he tangata ka mei he ʻOtua.” (Loma 2:​28, 29) ʻOku fakalahi taʻefilifilimānako atu ʻe Sihova ʻa e fakamāloó. ʻOku tau fai pehē?

12. ʻOku ʻomai ʻe he Fakahā 7:9 ʻa e ʻamanaki ko e hā, pea kia hai?

¹² Ki mui ai, ʻi ha vīsone, naʻe mamata ai ʻa e ʻapositolo ko Sioné ki he kau Kalisitiane pani loto-tōnungá naʻe fakatātaaʻi ko ha puleʻanga fakalaumālie ʻo e toko 144,000, “naʻe silaʻi mei he matakali fulipē ʻo haʻa Isileli.” Hili ʻa e ngaahi meʻá ni, naʻe mamata ʻa Sione ki ha “fuʻu kakai lahi, . . . mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea, naʻa nau tutuʻu ʻi he ʻao ʻo e taloni pea ʻi he ʻao ʻo e Lami, kuo nau kofu ʻaki ʻa e ngaahi kofu hinehina tōtōlofa, pea ʻoku nau toʻo ʻa e ngaahi vaʻa paame.” (Fakahā 7:​4, 9) Ko ia ai, ʻoku ʻikai ha kulupu fakafaʻahinga pe lea ʻoku taʻofi mei he fakatahaʻanga Kalisitiane ʻi onopōní. Ko e faʻahinga tāutaha mei he ʻātakai kotoa pē ʻoku nau maʻu ʻa e ʻamanaki ʻo e hao moʻui ʻi he “mamahi lahi” ka hoko maí pea nau inu mei he “gaahi matavai moui” ʻi he māmani foʻoú.​—Fakahā 7:​14-​17, PM.

Ngaahi Ola Lelei

13-15. (a) ʻE lava fēfē ke tau ikuʻi ʻa e ngaahi faikehekehe fakamatakalí mo e tōʻonga fakafonuá? (e) Lave ki he ngaahi fakatātā ʻo e ngaahi ʻaonga ʻoku lava ke ʻomai ʻi hono fakahāhā ʻa e anga-fakakaumeʻá.

¹³ ʻOku ʻafioʻi lelei ʻe Sihova kitautolu, ʻo hangē ko ia ko hono ʻiloʻi ʻe ha tamai lelei ʻa ʻene fānaú. ʻI he tuʻunga tatau, ʻi heʻetau hoko ʻo mahinoʻi ʻa e niʻihi kehé ʻaki ʻa e mahuʻingaʻia ʻi heʻenau tōʻonga fakafonuá mo e ʻātakaí, ʻoku hoko ai ʻa e ngaahi faikehekehé ʻo ʻikai loko mahuʻinga. ʻOku mole atu ai ʻa e ngaahi ʻā vahevahe fakafaʻahingá, pea ʻoku fakaivimālohiʻi ai ʻa e ngaahi haʻi ʻo e tuʻunga kaumeʻá mo e ʻofá. ʻOku fakalahi ai ʻa e fāʻūtahá. (1 Kolinito 9:​19-​23) ʻOku fakahāhā lelei eni ʻe he ngāue ʻa e kau misinale ʻoku nau ngāue ʻi he ngaahi vāhenga-ngāue mulí. ʻOku nau mahuʻingaʻia ʻi he kakai ʻoku nofo aí, pea ko hono olá, ʻoku vave ʻa e ʻiloʻi ʻe he kau misinalé ʻoku nau feohi fekoekoeʻi mo e ngaahi fakatahaʻanga fakalotofonuá.​—Filipai 2:4.

¹⁴ Ko e ngaahi ola lelei ʻo e hoko ʻo taʻefilifilimānakó ʻoku hulungia atu ia ʻi he ngaahi fonua lahi. Ko Aklilu, ʻa ia ko ʻene haʻu mei ʻItiopea, naʻá ne taʻelata ʻi he nofo ʻi he kolomuʻa ʻo Pilitāniá, ʻa Lonitoni. Ko ʻene ngaahi ongoʻi taʻelatá naʻe fakalahi ia ʻe he meʻa naʻe hā kiate ia ko e ʻikai ha anga-fakakaumeʻa fakalūkufua ki he kakai mei he ngaahi fonua kehé, ko e faʻahinga meʻa ʻoku ongoʻi ʻi he ngaahi kolo lalahi lahi ʻaupito ʻo ʻIulope ʻi onopōní. He kehe ē ko e meʻa naʻe hokosia ʻe Aklilu ʻi heʻene maʻu ha fakataha faka-Kalisitiane ʻi he Fale Fakatahaʻanga ʻo e Kau Fakamoʻoni ʻa Sihová! Ko e faʻahinga ne nau ʻi aí naʻa nau talitali lelei ia, pea naʻe ʻikai fuoloa kuó ne ongoʻi fiemālie. Naʻá ne fai ʻa e fakalakalaka vave ʻi hono fakaloloto ʻa ʻene houngaʻia ki he Tokotaha-Fakatupú. Naʻe vave ʻa ʻene kumi ʻa e ngaahi faingamālie ke kau ai ʻi hono fakamafola atu ʻa e ongoongo lelei ʻo e Puleʻangá ki he niʻihi kehe ʻi he vahefonua ko iá. Ko e moʻoni, ʻi he ʻaho ʻe taha ʻi hono ʻeke ange ʻe he kaungā malanga ʻo Aklilu kiate ia pe ko e hā ʻa e ngaahi taumuʻa kuó ne maʻu ʻi he taimi ko iá ʻi heʻene moʻuí, naʻe tali lelei ʻe Aklilu ʻokú ne ʻamanaki ke hoko ʻi ha ʻaho ko e konga ʻo ha fakatahaʻanga ʻoku lea ʻi heʻene leá, ʻa e lea faka-ʻAmihalikí. ʻI he taimi naʻe ʻiloʻi ai eni ʻe he kau mātuʻa ʻo e fakatahaʻanga lea faka-Pilitānia fakalotofonuá, naʻa nau fokotuʻutuʻu fiefia ki ha malanga faka-Tohitapu maʻá e kakaí ʻi he lea fakafonua ʻa Aklilu. Ko e fakaafe ke maʻu iá naʻá ne fakatahatahaʻi mai ʻa e kau muli tokolahi mo e kakai fakalotofonua ke nau poupouʻi ʻa e ʻuluaki fakataha faka-ʻAmihaliki maʻá e kakaí ʻi Pilitānia. ʻI he ʻahó ni, ko e kau ʻItiopeá mo e niʻihi kehe ʻi he feituʻu ko iá ʻoku nau fāʻūtaha ʻi ha fakatahaʻanga longomoʻui. Kuo ʻiloʻi ʻe he tokolahi ai ʻoku ʻikai ha meʻa te ne taʻofi kinautolu mei hono fai ha tuʻu maʻa Sihova pea fakahāhā eni ʻaki ʻa e papitaiso faka-Kalisitiané.​—Ngāue 8:26-​36.

¹⁵ ʻOku kehekehe ʻa e ngaahi tōʻongá mo e ʻātakaí. ʻOku ʻikai ko ha tuʻunga ia ʻo e māʻolungá pe ko e māʻulaló; ko e ngaahi faikehekehe pē ia. ʻI hono siofi ʻa e papitaiso ʻo e kau sevāniti fakatapui foʻou ʻa Sihová ʻi he motu ko Molotaá, naʻe fakalahi atu ʻe he fiefia lahi ʻa e Kau Fakamoʻoni fakalotofonuá ʻa e ngaahi loʻimata ʻo e fiefia naʻe tafe ʻi he mata ʻo e kau ʻaʻahi mei Pilitāniá. Naʻe fakatou fakahāhā ʻe he kulupu Molotaá mo e Pilitāniá ʻenau ngaahi ongoʻí, ka ʻi he ngaahi founga kehekehe, pea ko ʻenau ʻofa lahi kia Sihová naʻá ne fakafefekaʻi ʻa e ngaahi haʻi ʻo e feohi faka-Kalisitiané.​—Sāme 133:1; Kolose 3:​14.

Ikuʻi ʻa e Tomuʻa Fehiʻá

16-18. Fakamatala ki ha meʻa naʻe hokosia ʻoku fakahāhā ai ʻe lava ke ikuʻi ʻa e tomuʻa fehiʻá ʻi he fakatahaʻanga Kalisitiané.

¹⁶ ʻI he loloto ange ʻetau ʻofa kia Sihova pea ki hotau fanga tokoua Kalisitiané, ʻe lava ke tau faʻifaʻitaki ofi ange ai kia Sihova ʻi he founga ʻo ʻetau vakai ki he niʻihi kehé. Ko ha tomuʻa fehiʻa pē naʻa tau ongoʻi nai ki muʻa ki he ngaahi fonua, matakali, pe tōʻonga fakafonua ʻe niʻihi ʻe lava pē ke ikuʻi. Ko e fakatātaá, fakakaukau angé ki he tuʻunga ʻo Albert ʻa ia naʻe ngāue ʻi he Kau Tau Pilitāniá lolotonga ʻa e Tau II ʻa Māmaní pea naʻe puke ia ʻe he kau Siapaní ʻi hono kapa ʻo Singapoa ʻi he 1942. Naʻá ne fakamoleki ʻa e taʻu ʻe tolu nai ʻi he ngāue ʻi he “hala lēlue ʻo e maté,” ofi ki he meʻa naʻe hoko ʻo ʻiloa ko e halafakakavakava ʻi ʻolunga he vaitafe Kwai. ʻI hono tukuange ʻi he ʻosi ʻa e taú, naʻe kilo ʻe 32 ʻa hono mamafá, motu hono kaungaó mo e ihú, pea faingataʻaʻia ʻi he tuʻu totó, lafá, mo e malēliá. Ko e laui afe ʻo hono kaungā pōpulá naʻa nau ʻi he tuʻunga kovi ange; naʻe ʻikai hao moʻui ʻa e tokolahi. Ko e ikuʻanga ʻo e ngaahi anga-fakalilifu ʻa ia kuo mātā pea hokosia ʻe Albert, naʻá ne foki ai ki ʻapi ʻi he 1945 ko ha tangata ʻiteʻita, ʻo ʻikai ha mahuʻingaʻia ʻi he ʻOtuá pe ko e lotú.

¹⁷ Ko e uaifi ʻo Albert, ko Irene, naʻá ne hoko ko e taha ʻo e Kau Fakamoʻoni ʻa Sihová. Ke fakafiemālieʻi iá, naʻe maʻu ai ʻe Albert ha ngaahi fakataha ʻa e fakatahaʻanga fakalotofonua ʻa e Kau Fakamoʻoni ʻa Sihová. Ko ha talavou Kalisitiane ʻi he ngāue fakafaifekau taimi-kakató ko hono hingoá ko Paul naʻá ne ʻaʻahi kia Albert ke ako Tohitapu mo ia. Naʻe vave ʻa e hoko ʻa Albert ʻo ʻiloʻi ʻoku vakai mai ʻa Sihova ki he faʻahinga tāutahá ʻo fakatatau ki he tuʻunga ʻo honau lotó. Naʻá ne fakatapui ʻene moʻuí kia Sihova pea papitaiso.

¹⁸ Naʻe hiki ki mui ʻa Paul ki Lonitoni, ʻo ako ʻa e lea faka-Siapaní, pea feohi mo ha fakatahaʻanga lea faka-Siapani. ʻI heʻene fokotuʻu ke ʻalu mo ha kau ʻaʻahi Fakamoʻoni Siapani ki heʻene fakatahaʻanga ki muʻá, naʻe manatuʻi ʻe he fanga tokoua ʻi aí ʻa e tomuʻa fehiʻa mālohi ʻa Albert ki he kakai mei he ʻātakai ko iá. Talu ʻene foki ki Pilitāniá, naʻe fakaʻehiʻehi ʻa Albert mei he feʻiloaki mo ha taha pē mei Siapani, ko ia naʻe fifili ʻa e fanga tokouá pe ʻe fēfē hono tuʻungá. Naʻe ʻikai fiemaʻu ke nau hohaʻa—naʻe tali ʻe Albert ʻa e kau ʻaʻahí ʻaki ha ʻofa fakatokoua taʻefakangatangata.​—1 Pita 3:​8, 9.

“Fano Atu”

19. Ko e hā ʻa e akonaki ʻa e ʻapositolo ko Paulá ʻe lava ke ne tokoniʻi kitautolu kapau ʻoku ʻi ai haʻatau hehema ki he filifilimānakó?

¹⁹ “Ko e filifilimanako ʻoku ʻikai lelei,” ko e tohi ia ʻa Tuʻi Solomone potó. (Palovepi 28:21) ʻOku faingofua ke ongoʻi ofi ki he faʻahinga ʻoku tau ʻiloʻi leleí. Kae kehe, ʻi he taimi ʻe niʻihi ʻoku tau hehema ai ke fakahaaʻi ʻa e mahuʻingaʻia siʻisiʻi ʻi he faʻahinga ʻa ia ʻoku ʻikai te tau ʻiloʻi leleí. Ko e filifilimānako peheé ʻoku ʻikai taau ia mo ha sevāniti ʻa Sihova. Ko e moʻoni, ʻoku totonu ke tau muimui kotoa ʻi he akonaki mahino ʻa Paula ke “fano [atu]”​—ʻio, fano atu ʻi heʻetau ʻofa ki he kaungā Kalisitiane mei he ngaahi ʻātakai kehekehé.​—2 Kolinito 6:​13.

20. ʻI he ngaahi tafaʻaki fē ʻo e moʻuí ʻoku totonu ke tau faʻifaʻitaki ai kia Sihova, ko hotau ʻOtua taʻefilifilimānakó?

²⁰ Pe ʻoku tau maʻu ʻa e monū ʻo e ui fakahēvaní pe ko e ʻamanaki ʻo e moʻui taʻengata ʻi he māmaní, ko ʻetau hoko ʻo taʻefilifilimānakó ʻoku ʻai ai ke tau malava ʻo fiefia ʻi he fāʻūtaha ʻa e tākanga ʻe taha, mo e Tauhi ʻe taha. (Efeso 4:​4, 5, 16) ʻI he feinga ke faʻifaʻitaki kia Sihova, ko hotau ʻOtua taʻefilifilimānakó, ʻe lava ke tokoniʻi ai kitautolu ʻi heʻetau ngāue fakafaifekau faka-Kalisitiané, ʻi loto ʻi hotau ngaahi fāmilí, pea ʻi he ngaahi fakatahaʻangá, ko e moʻoni, ʻi he tafaʻaki kotoa ʻo ʻetau moʻuí. Anga-fēfē? Ko e kupu hoko maí ʻe lāulea ai ki he kaveinga ko ení.

[Fakamatala ʻi lalo]

ʻE Fēfē Haʻo Tali?

• Naʻe anga-fēfē ʻa e fakahāhā ʻe Sihova ʻa e taʻefilifilimānakó kia Lēhapi mo e kau Kipioné?

• Naʻe anga-fēfē hono fakahāhā ʻe Sīsū ʻa e taʻefilifilimānakó ʻi heʻene faiakó?

• Ko e hā ʻe lava ke ne tokoniʻi kitautolu ke ikuʻi ha tomuʻa fehiʻa pē ʻi he tōʻonga fakafonuá mo e fakamatakalí?

[Fakatātā ʻi he peesi 13]

Kamata ʻa e ikunaʻi ʻe ʻIsileli ʻa Kēnaní

[Fakatātā ʻi he peesi 15]

Naʻe ʻikai holomui ʻa Sīsū mei he faifakamoʻoni ki ha fefine Samēlia

[Fakatātā ʻi he peesi 16]

Ko ha fakataha faka-ʻAmihaliki maʻá e kakaí ʻi Pilitānia

[Fakatātā ʻi he peesi 16]

Ko e ʻofa ʻa Albert kia Sihová naʻá ne tokoniʻi ia ke ne ikuʻi ʻa e tomuʻa fehiʻá