ʻOku Ngāueʻaki ʻe Sihova ʻa e “Meʻa Ngali Vale” ke Fakamoʻui ʻa Kinautolu ʻOku Tui

“He ʻi he ʻiloange, ʻi he fai ʻaki ʻa e poto ʻo e ʻOtua, naʻe ʻikai laveʻi ʻa e ʻOtua ʻe mamani ʻaki ʻenau poto, naʻe toki finangalo ʻa e ʻOtua ke faiʻaki ʻa e meʻa ngali vale ko ia ʻi heʻemau malanga ke fakamoʻui ʻa e kakai ʻoku tui.”​—1 KOLINITO 1:21.

 1. Ko e hā ʻa e ʻuhinga ʻo e pehē ʻoku ngāueʻaki ʻe Sihova ʻa e “meʻa ngali vale,” pea ko e hā ʻoku tau ʻilo ai naʻe ʻikai ke ʻiloʻi ʻa e ʻOtuá ʻe he māmaní ʻaki hono potó?

ʻOKU HĀ? ʻE ngāueʻaki nai ʻe Sihova ʻa e meʻa ngali vale? Ko hono moʻoní ʻoku ʻikai! Ka ʻokú ne lava pea kuó ne ngāueʻaki ʻa e meʻa ʻoku hā ngali vale ki he māmaní. ʻOkú ne fai pehē koeʻuhi ke fakahaofi ʻa e kakai ʻoku nau ʻilo mo ʻofa kiate iá. ʻOku ʻikai lava ke ʻiloʻi ʻa e ʻOtuá ʻe he māmaní ʻaki hono potó. Naʻe ʻai ʻe Sīsū Kalaisi ke mahino ʻeni ʻi heʻene fai ha lotu ʻo ne pehē: “ʻE Tamai Maʻoniʻoni, ko mamani foki naʻe ʻikai lavaʻi ʻa e ʻiloʻi ʻo hoʻo ʻAfio.”​—Sione 17:25.

 2. ʻI he founga fē ʻoku ngalingali huʻufataha ai ʻa e ngaahi founga ʻa Sihova mo e ngaahi founga ʻa e māmaní, ka ko e hā ʻa e ngaahi moʻoniʻi meʻá?

² ʻOku fakahaaʻi ʻe he ngaahi lea ʻa Sīsuú ʻoku kehekehe ʻa e ngaahi founga ʻa Sihová ia mei he ngaahi founga ʻa e māmaní. ʻOku ngalingali nai ʻoku huʻufataha ʻa e taumuʻa ʻa e ʻOtuá mo e taumuʻa ʻa e māmaní. ʻOku ngalingali ʻoku tāpuakiʻi nai ʻe he ʻOtuá ʻa e ngaahi taumuʻa ʻa e māmani ko ʻení. Hangē ko ʻení, ʻoku pehē ʻi he Tohitapú ʻe fokotuʻu ʻe he ʻOtuá ha founga-pule māʻoniʻoni ʻa ia te ne ʻomai ʻa e moʻui melino, fiefia, mo e lakalakaimonū ki he faʻahinga ʻo e tangatá ʻi he māmaní. (ʻAisea 9:​6, 7 [5, 6, PM]; Mātiu 6:10) Pehē foki, kuo talaki ʻe he māmaní ʻene taumuʻa ke ʻoange ki he kakaí ʻa e melino, lakalakaimonū mo e founga-pule lelei ʻo fakafou ʻi he meʻa ʻoku taku ko e fokotuʻutuʻu foʻou ki he māmaní. Ka ʻoku ʻikai ke tatau ʻa e ngaahi taumuʻa ʻa e ʻOtuá mo e ngaahi taumuʻa ʻa e māmaní. Ko e taumuʻa ia ʻa Sihová ke ne fakamāʻoniʻoniʻi ʻe ia ʻa ia tonu ko e Hau Fakaleveleva ʻo e ʻuniveesí. Te ne fai ʻa e meʻa ko ʻení ʻo fakafou ʻi he founga-pule fakahēvani ʻa ia te ne fakaʻauha ʻosiʻosingamālie ʻa e ngaahi founga-pule kotoa pē ʻo e māmaní. (Tāniela 2:44; Fakahā 4:11; 12:10) Ko ia ʻoku ʻikai ke ʻi ai ha meʻa ke kau fakataha ai ʻa e ʻOtuá mo e māmani ko ʻení. (Sione 18:36; 1 Sione 2:​15-17) Ko e ʻuhinga ia ʻoku lave ai ʻa e Tohitapú ki he faʻahinga poto ʻe ua​—ko e “poto ʻo e ʻOtua” mo e “poto ʻo mamani.”​—1 Kolinitō 1:​20, 21.

Ko e Mele Tefito ʻo e Poto Fakaemāmaní

 3. Neongo ʻoku hā ngali molumalu nai ʻa e poto ʻo e māmaní, ko e hā ʻe ʻikai ʻaupito ke teitei fakafiemālie ai ʻa e fokotuʻutuʻu foʻou ki he māmaní ʻa ia kuo talaʻofa ʻe he tangatá?

³ ʻOku hā ngali molumalu ʻa e poto ʻo e māmaní ki he kakai ʻoku ʻikai ke tataki kinautolu ʻe he poto ʻo e ʻOtuá. ʻOku ʻi ai ʻa e ngaahi poto fakafilōsefa fakaemāmani ngali mālie ʻa ia ʻoku tokangaekina ʻe he fakakaukaú. ʻOku ʻoatu ha ngaahi fakamatala ʻe he ngaahi kautaha ʻe laui afe kuo fokotuʻu ki he ako mataotao mei he fakakaukau ʻa kinautolu ʻoku pehē ko e kau poto lahi taha kinautolu ʻi he faʻahinga ʻo e tangatá. ʻOku fonu ʻaupito ʻa e ngaahi laipeli lalahi ʻi he ngaahi ʻilo kuo tānaki mai ʻo kau ki he ngaahi meʻa kuo hokosia ʻe he faʻahinga ʻo e tangatá ʻi he ngaahi senituli. Kaekehe, neongo ʻa e meʻa ko ʻení, ko e fokotuʻutuʻu foʻou ki he māmaní ʻa ia ʻoku fokotuʻutuʻu ʻe he kau taki fakaemāmaní ko ha pule pē ʻa e kau tangata taʻehaohaoa, angahalaʻia mo faʻa mate. Ko ia, ko e fokotuʻutuʻu ko iá ʻe taʻehaohaoa pē, ʻo toe fai pē ʻa e ngaahi hala kuo fai ki muʻá pea ʻe ʻikai ʻaupito pē ke teitei fakalato ʻa e ngaahi fiemaʻu kotoa pē ia ʻa e faʻahinga ʻo e tangatá.​—Loma 3:​10-12; 5:12.

 4. ʻOku moʻuangofua ki he hā ʻa e fokotuʻu ki he fokotuʻutuʻu foʻou ki he māmaní, pea ko e hā ʻa hono olá?

⁴ Ko e fokotuʻu ʻa e tangatá ki ha fokotuʻutuʻu foʻou ki he māmaní ʻoku ʻikai ke ngata pē ʻi heʻene moʻuangofua ki he ngāvaivai fakaetangatá ka ki he tākiekina foki ʻa e ngaahi meʻa moʻui laumālie anga-fulikivanu​—ʻio, ko Sētane ko e Tēvoló mo ʻene kau tēmenioó. Kuo fakakuihi ʻe Sētane ko e Tēvoló ʻa e ngaahi ʻatamai ʻo e kakaí koeʻuhi ke ʻoua naʻa nau tui ki he “Kosipeli ʻo e langilangi ʻo Kalaisi.” (2 Kolinitō 4:​3, 4; ʻEfesō 6:12) Ko hono olá, ʻoku hohoko ʻa e faingataʻaʻia ʻa e māmaní. ʻOku iku ai ki he faingataʻaʻia mo mamahi ʻa e māmaní ʻi heʻene feinga fakatuʻutāmaki ke ne puleʻi pē ʻe ia ia ʻo ʻikai ke kau ki ai ha tokoni mei he ʻOtuá pea mo ʻene taʻetokaʻi ʻa e finangalo fakaeʻotuá. (Selemaia 10:23; Sēmisi 3:​15, 16) Ko ia, ʻoku hangē ko ia naʻe leaʻaki ʻe he ʻapositolo ko Paulá, “naʻe ʻikai laveʻi ʻa e ʻOtua ʻe mamani ʻaki ʻenau poto.”​—1 Kolinitō 1:21.

 5. Ko e hā ʻa e mele tefito ʻo e poto ʻo e māmani ko ʻení?

⁵ Ko ia, ko e hā ʻa e mele tefito ʻo e poto ʻo e māmani ko ʻení, kau ai mo ʻene ngaahi palani ki he fokotuʻutuʻu foʻou ki he māmaní? Ko hono taʻetokaʻi ʻe he māmaní ʻa e meʻa ko ia ʻoku ʻikai ʻaupito lava ke lavameʻa ʻo ka taʻetokaʻi​—ko e tuʻunga-hau fakaleveleva ʻo Sihova ko e ʻOtuá. ʻOku fakafisi loto-fieʻeiki ʻa e māmaní ke tokaʻi ʻa e tuʻunga fakaleveleva fakaʻotuá. ʻOku fai fakakaukauʻi pē ʻe he māmaní ke ʻoua ʻe fakakau ʻa Sihova ʻi heʻene ngaahi palani kotoa pē pea fakafalala pē ki heʻene malava pē ʻaʻana mo ʻene ngaahi fakaangaangá. (Fehoanaki mo Tāniela 4:​31-34; Sione 18:37.) ʻOku fakahā mahino ʻe he Tohitapú “ko e kamataʻanga ʻo e poto ko e ʻapasia kia Sihova.” (Palōvepi 9:10; Sāme 111:10) Ka, kuo teʻeki ai pē ke ako ʻa e māmaní ia ki he fiemaʻu tefito ko ʻeni ki he potó. Ko ia ai, ʻi he ʻikai ke ʻi ai ʻa e poupou fakaʻotuá, ʻe lava fēfē ke lavameʻa ia?​—Sāme 127:1.

Malangaʻi ʻo e Puleʻangá​—Meʻa Ngali Vale pe ʻAonga?

 6, 7. (a) Ko e hā ʻoku malangaʻi ʻe kinautolu kuo tataki ʻe he poto ʻo e ʻOtuá, ka ko e hā ʻa e vakai ʻa e māmaní kiate kinautolu? (e) ʻOku malangaʻi ʻe he haʻa-faifekau ʻo e Puleʻanga-Haʻa-Kalisitiané ʻo fakatatau ki he poto ʻo hai, pea ko e hā ʻa hono olá?

⁶ ʻI he tafaʻaki ʻe tahá, ko kinautolu ʻoku nau ʻilo ʻa e ʻOtuá ʻoku nau fakahā ʻa e poto ʻo e ʻOtuá pea mo fili ke tataki kinautolu ʻe he poto ko iá. Hangē ko ia naʻe kikiteʻi ʻe Sīsuú, ʻoku nau malangaʻi ʻa e “ogoogolelei ni oe buleaga . . . i mamani kotoabe.” (Mātiu 24:​14, PM; 28:​19, 20) ʻOku ʻaonga ʻa e malanga ko iá ʻi he taimí ni, ʻi he fonu ʻa hotau māmaní ʻi he fekeʻikeʻi, ʻuliʻi ʻo e ʻātakaí, tuʻunga masiva, mo e faingataʻaʻia ʻa e faʻahinga ʻo e tangatá? ʻOku hā ngali vale mo taʻeʻaonga ki he kau poto fakaemāmaní ʻa e malanga pehē ʻo fekauʻaki mo e Puleʻanga ʻo e ʻOtuá. ʻOku nau vakai ki he kau malangaʻi ʻo e Puleʻanga ʻo e ʻOtuá ko e kau fakafiu mo fakahohaʻa pea ʻoku nau fakatuaiʻi ʻa e fakalakalaka atu ki ha founga-pule fakapolitikale lelei taha. ʻOku poupouʻi kinautolu ʻi he meʻa ko ʻení ʻe he haʻa-faifekau ʻo e Puleʻanga-Haʻa-Kalisitiané, ʻa ia ʻoku nau malangaʻi ʻo fakatatau ki he poto ʻo e māmani ko ʻení pea ʻoku ʻikai te nau tala ange ki he kakaí ʻa e meʻa ʻoku fiemaʻu kiate kinautolu ke ʻilo ʻo kau ki he māmani foʻou ʻa e ʻOtuá mo hono founga-pule Puleʻanga Fakatuʻí, neongo ko e akonaki tefito ia naʻe akoʻi ʻe Kalaisí.​—Mātiu 4:17; Maʻake 1:​14, 15.

⁷ Naʻe fakahanga ʻa e tokangá ʻe he faihisitōlia ko H. G. Wells ki he ʻikai ke siaʻa ko eni ʻa e haʻa-faifekau ʻo e Puleʻanga-Haʻa-Kalisitiané. Naʻá ne tohi: “ʻOku taau ke tokangaʻi ʻa hono ʻai ke fakamaeʻeeʻa kāfakafa ʻe Sīsū ʻa e akonaki fekauʻaki mo e meʻa ko ia naʻá ne ui ko e Puleʻanga ʻo Hēvaní, ʻo kehe ʻaupito mei he ʻikai loko mahuʻinga ʻa e meʻá ni ʻi he angafai mo e akonaki ʻa e lahi taha ʻo e ngaahi lotu faka-Kalisitiané.” Ka, ke maʻu ʻe he kakai ʻo e toʻutangata ko ʻení ʻa e moʻuí, kuo pau ke nau ʻuluaki fanongo ʻo fekauʻaki mo e Puleʻanga ʻo e ʻOtuá kuo ʻosi fokotuʻú, pea ke aʻusia ʻa e meʻa ko iá kuo pau ke ʻi ai ha tokotaha ke ne malangaʻi ʻa e ongoongo lelei ko iá.​—Loma 10:​14, 15.

 8. Ko e hā ʻoku ʻaonga taha ai ʻa e malangaʻi ʻo e ongoongo lelei ʻa e ʻOtuá ʻi he ʻaho ní, ka ko e hā ʻa e ʻalunga ʻe ʻikai ke ʻi ai hano ʻaonga tuʻuloa?

⁸ Ko ia, ko e meʻa ʻaonga lahi taha ke fai ʻi he ʻaho ní ko hono malangaʻi ʻa e ongoongo lelei ʻa e ʻOtuá. ʻOku peheé koeʻuhi he ʻoku tokonaki mai ʻe he pōpoaki fekauʻaki mo e Puleʻangá ʻa e ʻamanaki moʻoni ʻokú ne fakafonu ʻa e ngaahi loto ʻo e kakaí ʻaki ʻa e fiefia lolotonga ʻa e ngaahi ʻaho fakaʻosi ko ʻeni ‘ʻoku faingataʻa ke fekuki mo iá.’ (2 Tīmote 3:​1-5; Loma 12:12; Taitusi 2:13) Ko e moʻui ʻi he māmani ko ʻení ʻoku taʻepau mo fuonounou, ka ko e moʻui ʻi he māmani foʻou ʻa e ʻOtuá ʻe ʻikai hano ngataʻanga, ʻi he fiefia, mahu, mo e melino ʻi heni tonu pē ʻi māmani. (Sāme 37:​3, 4, 11) Hangē ko ia naʻe leaʻaki ʻe Sīsū, “he ka ne faifai pea maʻu ʻe ha tangata ʻa mamani katoa ʻi heʻene ngaue, kae mole ai ʻene moʻui, ko e ha tū ha meʻa kuo ne lava? pea ko e ha ha meʻa ʻe ʻatu ʻe he tangata ke fakatau ʻaki mai ʻene moʻui?” Ko e hā ʻa hono ʻaonga ʻo e māmani ko ʻeni ʻe mole atú ʻo kapau ʻe mole atu mei ha tokotaha ʻa e totonu ke ne moʻui ʻi he māmani foʻou ʻa e ʻOtuá? Ko e fiefia ʻa ha tokotaha ʻi he taimí ni ʻi he ngaahi meʻa fakamatelié kuo hoko ʻo taʻeʻaonga, koto kulanoa mo mole vave.​—Mātiu 16:26; Koheleti 1:14; Maʻake 10:​29, 30.

 9. (a) ʻI he kole ʻe ha tangata naʻe fakaafeʻi ke ne hoko ko ha muimui ʻo Sīsū ke toloi atu iá, ko e hā naʻe faleʻi ki ai ʻe Sīsū ke ne faí? (e) ʻI he fekauʻaki mo e tali ʻa Sīsuú, ko e hā ʻa e meʻa ʻoku totonu ke tau faí?

⁹ Naʻe pehē ʻe ha tangata naʻe fakaafeʻi ʻe Sīsū ke ne muimui kiate ia: “Ke ke tuku mai au ke u lele muʻa, ʻo tanu siʻeku motuʻa.” Ko e hā naʻe faleʻi ʻe Sīsū ke ne faí? ʻI heʻene ʻilo ʻe toloi ʻe he tangatá ʻa e ngāue mahuʻinga lahi tahá kaeʻoua pē ke mate ʻa ʻene ongo mātuʻá, naʻe tali ange ʻe Sīsū: “Tuku ki he kau mate ke nau tanu ʻa e mate ʻanautolu: ka ke ʻalu koe ʻo malangaʻaki ʻa e Puleʻanga ʻo e ʻOtua.” (Luke 9:​59, 60) Ko kinautolu ʻoku nau fakahā ʻa e potó ʻaki ʻa ʻenau talangofua kia Kalaisí ʻe ʻikai toe lava ke kalo mei hono fakahoko ʻa ʻenau ngāue kuo vaheʻi mai ko hono malangaʻi ʻa e pōpoaki fekauʻaki mo e Puleʻangá. ʻOku ʻai kinautolu ʻe he poto fakaeʻotuá ke nau ʻiloʻi kuo pau ke fakaʻauha ʻa e māmani ko ʻení mo hono kau pulé. (1 Kolinitō 2:6; 1 Sione 2:17) ʻOku ʻiloʻi ʻe he kau poupouʻi ʻo e tuʻunga-hau fakaleveleva ʻo e ʻOtuá ʻoku fakatuʻunga pē ʻa e ʻamanaki moʻoni pē ʻe taha ki he faʻahinga ʻo e tangatá ki he fakaleleiʻi ʻe fai ʻe he ʻOtuá mo hono tuʻunga-pulé. (Sākalaia 9:10) Ko ia neongo ko kinautolu ʻoku nau maʻu ʻa e poto ʻo e māmani ko ʻení ʻoku ʻikai te nau tui ki he Puleʻanga ʻo e ʻOtuá pea ʻoku ʻikai te nau fiemaʻu ʻa e founga-pule fakahēvani ko iá, ka ʻoku fai ʻe he kakai ia ʻoku tataki kinautolu ʻe he poto fakaʻotuá ʻa e meʻa ʻoku ʻaonga moʻoni ki honau kaungātangatá, ʻo teuteuʻi kinautolu ki he moʻui taʻengata ʻi he māmani foʻou naʻe talaʻofa ʻe Sihová.​—Sione 3:16; 2 Pita 3:13.

“Koe Vale ia Kiate Kinautolu Oku Malaia”

10. (a) ʻI hono fakatafokiʻi ʻa Saula ʻo Tāsusí, ko e hā ʻa e ngāue naʻá ne kamata ke faí, pea ko e hā ʻa e anga ʻo ʻene vakai ki aí? (e) Naʻe ongoongoa ʻa e kau Kalisi ʻo e kuonga muʻá ʻi he hā, ka ko e hā ʻa e anga ʻo e vakai ʻa e ʻOtuá ki honau potó?

¹⁰ Naʻe kamata ke fai ʻa e ngāue fakahaofi moʻui ko ʻení ʻe Saula ʻo Tāsusí, ʻa ia naʻe hoko ko Paula ko e ʻapositolo ʻa Sīsū Kalaisi. ʻOku ʻuhinga lelei ke fakakaukau ʻo pehē ʻi he fakatafokiʻi ʻe Sīsū Kalaisi ʻa Saulá, naʻá Ne vaheʻi ia ke kau ki ha ngāue ngali vale? Naʻe ʻikai ke fakakaukau pehē ʻa Paula ia. (Filipai 2:16) ʻI he taimi ko iá ko e anga ʻo e vakai ki he kau Kalisí ko e kakai ʻatamai lelei taha kinautolu ʻi he māmaní. Naʻa nau pōlepole ʻi heʻenau kau filōsefa mo ʻenau kau tangata poto ongoongoa. Neongo naʻe poto ʻa Paula ʻi he lea faka-Kalisí, naʻe ʻikai te ne muimui ki he fakakaukau filōsefa mo e poto ʻo e kakai Kalisí. Ko e hā ʻa hono ʻuhingá? Koeʻuhi he ko e poto pehē ʻo e māmani ko ʻení ko e meʻa ngali vale ia ki he ʻOtuá.a Naʻe kumi ʻa Paula ki he poto fakaeʻotuá, ʻa ia naʻá ne ueʻi ia ke malangaʻi ʻa e ongoongo leleí mei he fale ki he fale. Naʻe fokotuʻu ʻa e faʻifaʻitakiʻangá ʻe Sīsū Kalaisi, ko e Tokotaha-Malanga ongoongoa lahi taha ia ʻi ha taimi, pea naʻá ne fakahinohinoʻi ia ke ne fai ʻa e ngāue tatau pē.​—Luke 4:43; Ngāue 20:​20, 21; 26:​15-20; 1 Kolinitō 9:16.

11. ʻI hono ʻelitó, ko e hā ʻa e lau ʻa Paula ʻo kau ki he ngāue naʻe vaheʻi ange ki ai ke ne malangaʻakí pea mo e poto ʻo e māmaní?

¹¹ Ko e lau ʻeni ʻa Paula ʻo fekauʻaki mo e ngāue naʻe vaheʻi ange kiate ia ke ne malangaʻakí: “Nae . . . fekau au e Kalaisi . . . ke malaga aki ae ogoogolelei: kae ikai i he boto oe lea, telia naa fakataeaogaʻi ae akau nae tutuki ki ai a Kalaisi. He koe malaga aki ae akau nae tutuki ia ki ai [ko e feilaulau huhuʻi ʻa Sīsū] koe vale ia kiate kinautolu oku malaia: ka koe malohi ia oe Otua kiate kitautolu kuo fakamoui. He kuo tohi, Teu fakaauha ae boto oe kau boto, bea teu fakataeaoga ae ilo oe iloilo. Koefe ae boto [ʻo hangē ko e filōsefa]? koefe ae tagata tohi? koefe ae fakakikihi o mamani? Ikai kuo fakamatavalea e he Otua ae boto o mamani? He koeuhi i he boto oe Otua nae ikai ilo ae Otua e mamani i hono boto, bea nae lelei ki he Otua i he vale oe malaga ke fakamoui akinautolu oku tui.”​—1 Kolinitō 1:​17-21, PM.

12. Ko e hā ʻoku lavaʻi ʻe Sihova ʻo fakafou mai ʻi he “vale oe malaga,” pea ko e hā ʻa e meʻa ʻe fai ʻe kinautolu ʻoku nau loto ke maʻu ʻa e “poto ʻoku mei ʻolunga”?

¹² Neongo ʻoku hā ngali ʻikai ala tui nai ki ai, ka ko e faʻahinga ko ia ʻoku lau ʻe he māmaní ko e valé ko kinautolu ʻoku ngāueʻaki ʻe Sihova ko ʻene kau malanga. ʻIo, fakafou ʻi he hā ngali vale ʻa e ngāue fakamalanga ʻa e kau malanga ko ʻení, ʻoku fakahaofi ai ʻe he ʻOtuá ʻa kinautolu ʻoku tuí. ʻOku fokotuʻutuʻu ʻe Sihova ia ʻa e ngaahi meʻa koeʻuhi ke ʻoua ʻe fakalāngilangiʻi ʻe he kau malangaʻi ʻo e “meʻa ngali vale” ko ʻení ʻa kinautolu, pea ʻe ʻikai ke fakalāngilangiʻi ʻa kinautolu ʻe he kakai kehe ʻa ia naʻa nau fanongo meiate kinautolu ʻo kau ki he ongoongo leleí. ʻOku pehē ʻení koeʻuhi “ke tuku ʻene polepole ʻe he kakano kotoa pe ʻi he ʻao ʻo e ʻOtua.” (1 Kolinitō 1:​28-31; 3:​6, 7) Ko e moʻoni, ʻoku ʻi ai ʻa e kaunga mahuʻinga ʻo e tokotaha-malangá, ka ko e pōpoaki kuo vaheʻi mai ke ne malangaʻí ko e meʻa ia ʻoku ngāue ki he fakamoʻui ʻo ha tokotaha ʻo kapau ʻokú ne tui ki he pōpoakí. ʻE ʻikai paetakuʻi ʻa e pōpoaki ʻa e tokotaha-malangá ʻe kinautolu ʻoku nau fiemaʻu ʻa e “poto ʻoku mei ʻolunga” koeʻuhi pē ko e tokotaha-malangá ʻokú ne hā ngali vale mo māʻulalo, ʻoku fakatangaʻi ia, pea ʻokú ne ʻalu mei he fale ki he fale. Ka, ʻe ʻapasiaʻi ʻe he kau anga-maluú ʻa e tokotaha fanongonongo fekauʻaki mo e Puleʻangá ko e tokotaha-malanga kuo vaheʻi ʻe Sihova pea ʻokú ne ʻalu atu ʻi he huafa ʻo e ʻOtuá. Te nau mahuʻingaʻia lahi ki he pōpoaki ʻoku fakahoko mai ʻe he tokotaha-malangá ʻi he lea mo e ngaahi tohi kuo pulusí.​—Sēmisi 3:17; 1 Tesalonaika 2:13.

13. (a) Naʻe anga-fēfē ʻa e vakai ʻa e kau Siú mo e kau Kalisí ki hono malangaʻi ʻo Kalaisi naʻe tutukí? (e) Ko e hā ʻa e faʻahinga kakai naʻe ʻikai ke ui ha tokolahi mei ai ke hoko ko e kau muimui ʻo Sīsū, pea ko e hā ʻa hono ʻuhingá?

¹³ ʻI he hoko atu ʻa e lāulea ʻa Paula ʻo kau ki he ngaahi founga ʻa e ʻOtuá, ʻokú ne pehē: “Tala ʻe he Siu ke ʻomi ha ngaahi mana, tangi ʻe he Kalisi ki ha meʻa ʻoku ngali poto; ka ka malangaʻaki ʻe kimautolu ha Kalaisi kuo kalusefai, ʻa ia ko e tūkiaʻanga leva ki he Siu, pea ko e koto vale ki he Senitaile; ka ki he kakai ko ia, ʻa e kakai kuo ne fili, pe ʻoku nau Siu pe Kalisi, ko e Kalaisi ko ia ko e Ivi ʻo e ʻOtua, mo e Poto ʻo e ʻOtua. He ko e meʻa ʻa e ʻOtua ʻoku ngali vale ʻoku poto ia ʻi he kakai, pea ko e meʻa ʻa e ʻOtua ʻoku ngali vaivai ʻoku malohi ia ʻi he kakai. He vakai ʻa e ui ʻomoutolu, kainga. Talaʻehai ko hamou tokolahi koni poto fakakakano; talaʻehai ko e tokolahi koni malohi; talaʻehai ko e tokolahi koni houʻeiki. Kehe, kuo fili ʻe he ʻOtua ʻa e ngaahi meʻa ʻo mamani ʻoku vale ke fakamāʻi ʻa e kau poto; pea kuo fili ʻe he ʻOtua ʻa e ngaahi meʻa ʻo mamani ʻoku vaivai ke fakamāʻi ʻa e ngaahi meʻa ʻoku malohi.”​—1 Kolinitō 1:​22-27; fehoanaki mo ʻAisea 55:​8, 9.

14. (a) Kapau ʻe ʻeke ʻo kau ki hanau ngaahi tohi fakamoʻoni, ko e hā ʻoku tuhu ki ai ʻa e Kau Fakamoʻoni ʻa Sihová? (e) Ko e hā naʻe fakafisi ai ʻa Paula ke fakafiemālieʻi ʻa e kau Kalisí ʻaki haʻane fakahāhā ʻa e poto fakaemāmani?

¹⁴ ʻI he ʻi māmani ʻa Sīsuú, naʻe kole ʻe he kau Siú ke hoko ha fakaʻilonga mei he langí. (Mātiu 12:​38, 39; 16:1) Ka naʻe fakafisi ʻa Sīsū ia ke ʻoange ha fakaʻilonga. ʻOku pehē pē ʻi he ʻahó ni, ʻoku ʻikai ke fakahā ʻe he Kau Fakamoʻoni ʻa Sihová ha ngaahi tohi fakamoʻoni hangē ha fakaʻilongá. Ka, ʻoku nau tuhu ki heʻenau ngāue kuo vaheʻi maí ke malangaʻi ʻa e ongoongo leleí, ʻa ia naʻe hiki ʻi he ngaahi veesi ʻi he Tohitapú ʻo hangē ko e ʻAisea 61:​1, 2; Maʻake 13:10; mo e Fakahā 22:17. Naʻe kumi ʻa e kau Kalisi ʻo e kuonga muʻá ki he poto, ako lelei ange ʻi he ngaahi meʻa ʻo e māmani ko ʻení. Neongo naʻe ako ʻa Paula ʻo maʻu ʻa e poto ʻo e māmani ko ʻení, ka naʻá ne fakafisi ke fakafiemālieʻi ʻa e kau Kalisí ʻaki ha fakahāhā ʻe taha ʻo e poto ko iá. (Ngāue 22:3) Naʻá ne lea mo tohi ʻi he lea faka-Kalisi anga-maheni pē ʻa e kakai lāuvalé, kae ʻikai ko e lea faka-Kalisi faka-houʻeikí. Naʻe tala ange ʻe Paula ki he kau Kolinitoó: “Pehe, kainga, ʻi heʻeku ʻalu atu aʻaku ke malangaʻaki ʻa e ngaue ʻa e ʻOtua, naʻe ʻikai tuʻunga ʻeku ʻalu ko e pehe ʻoku ʻi ai haʻaku tokateline, pe poto, ʻoku fisifisimuʻa. . . . Pea ko ʻeku akonaki, kaeʻumaʻā ʻeku malanga, naʻe ʻikai faiʻaki ʻa e ngaahi lea fakaoleole ʻo e poto; ka naʻe faiʻaki ʻa e fakamoʻoni ʻe he Laumalie mo e Māfimafi: koeʻuhi ke ʻoua naʻa tuʻu hoʻomou lotu ʻi he poto ʻo e tangata, ka ʻi he māfimafi ʻo e ʻOtua.”​—1 Kolinitō 2:​1-5.

15. Ko e hā ʻoku fakamanatu mai ʻe Pita ki he kau luma ki he ongoongo leleí, pea ʻi he founga fē ʻoku meimei tatau ai ʻa e tuʻunga lolotonga ní mo ia ʻi he ʻaho ʻo Noá?

¹⁵ ʻI he ngaahi ʻaho fakaʻosí ni, ʻoku fakamanatu ki he kau manuki ki he ongoongo lelei ʻo e hoko mai ʻo e māmani foʻou ʻa e ʻOtuá mo e ngataʻanga ʻo e māmani ko ʻení ʻoku panaki maí, ʻa e lea ʻa e ʻapositolo ko Pitá ʻo kau ki he māmani ʻo e ʻaho ʻo Noá “ʻa ia naʻe lomaki vai ai ʻa e maama ʻo onoʻaho, ʻo ʻauha.” (2 Pita 3:​3-7) Ko e hā naʻe fai ʻe Noa ʻi heʻene hanga atu ki he ngataʻangá ʻe hoko ʻa e fuʻu fakaʻauha fakaʻulia? ʻOku fakakaukau ʻa e kakai tokolahi kiate ia ko e tokotaha faʻu-ʻaʻake pē. Ka naʻe pehē ʻe Pita ʻi he ʻomai ʻe he ʻOtuá ʻa e Lōmakí ki he māmani ʻo e kuonga muʻá, naʻá Ne “tauhi pe ha toko fitu, pea valu ʻaki ʻa Noa, ʻa ia naʻa ne malangaʻaki ʻa e maʻoniʻoni.” (2 Pita 2:5) ʻI honau poto fakaemāmaní, ʻoku pau naʻe luma ʻa e kakai fakaʻotuamate naʻa nau moʻui ki muʻa ʻi he Lōmakí ki he meʻa naʻe malangaʻaki ʻe Noá pea nau ui ia ko e vale, pea taʻeʻuhinga lelei mo taʻeʻaonga ʻa e meʻa naʻá ne faí. ʻI he ʻahó ni, ʻoku fehangahangai ʻa e kau Kalisitiane moʻoní mo ha tuʻunga meimei tatau, he naʻe fakafehoanaki ʻe Sīsū ʻa hotau toʻutangatá ki he toʻutangata ko ia ʻi he ʻaho ʻo Noá. Kaekehe, neongo ʻa e kau lumá, ko e malangaʻi ʻo e ongoongo leleí ʻoku mahulu atu ia ʻi he lea pē. ʻOku hangē pē ko e malanga naʻe fai ʻe Noá, ko e fakamoʻuiʻanga ia ki he tokotaha-malangá mo kinautolu ʻe fanongo kiate iá!​—Mātiu 24:​37-39; 1 Tīmote 4:16.

‘Hoko Ko e Vale Kae Toki Hoko Leva Ko e Poto’

16. Ko e hā ʻe hoko ʻi ʻĀmaketone ki he poto ʻo e māmani ko ʻení, pea ko hai ʻe hao moʻui atu ki he māmani foʻou ʻa e ʻOtuá?

¹⁶ ʻOku vavé ni ʻi ʻĀmaketone, ʻe ʻai ai ʻe Sihova ko e ʻOtuá ke fakaʻauha ai ʻa e “poto ʻo e kau poto.” Te ne fakaikunoa ʻa e kotoa ʻa e “ʻilo ʻo e kau ʻiloʻilo” ʻa ia naʻa nau fai ʻa ʻenau ngaahi vavalo ki he founga ʻe fakahoko mai ai ʻe heʻenau fokotuʻutuʻu foʻou ki he māmaní ʻa e ngaahi tuʻunga lelei ange ki he faʻahinga ʻo e tangatá. ʻE fakaʻauha ʻe he “tau ʻo e ʻaho lahi ʻo e ʻOtua Aoniu” ʻa e kotoa ʻo e ngaahi fakakaukau ngali moʻoni kae kākā, poto fakafilōsefa, mo e poto ʻo e māmani ko ʻení. (1 Kolinitō 1:19; Fakahā 16:​14-16) Ko e faʻahinga pē ʻe hao moʻui atu ʻi he tau ko iá pea maʻu ʻa e moʻui ʻi he māmani foʻou ʻa e ʻOtuá ko kinautolu ʻoku nau talangofua ki he meʻa ʻoku ui ʻe he māmani ko ʻeni ko e meʻa ngali valé​—ʻio, ʻa e ongoongo lelei fakaofo fekauʻaki mo e Puleʻanga ʻo Sihová.

17. ʻI he founga fē kuo hoko ai ʻa e Kau Fakamoʻoni ʻa Sihová ko e kau ‘vale,’ pea ko e hā ʻoku loto-ʻalovili ke fai ʻe he kau malanga ʻa e ʻOtuá fekauʻaki mo e ongoongo leleí?

¹⁷ ʻOku tataki ʻa e Kau Fakamoʻoni ʻa Sihová ʻe hono laumālié pea ʻoku ʻikai te nau mā ke malangaʻi ʻa ia ʻoku pehē ʻe he māmaní ko e ngali valé. ʻI he ʻikai te nau feinga ke nau poto fakaemāmaní, ʻoku nau hoko ko e ‘vale.’ Anga-fēfē? ʻAki ʻa ʻenau fai ʻa e ngāue fakamalanga fekauʻaki mo e Puleʻangá ka nau hoko ko e poto, ʻo hangē ko e meʻa naʻe tohi ʻe Paulá: “Ka ai ha taha ʻoku ne ʻafungi ko e poto ia ʻiate kimoutolu fakaemaama ko eni, ke ne hoko muʻa ko e vale, ka ne toki poto.” (1 Kolinitō 3:​18-20) ʻOku ʻilo ʻe he kau malanga ʻa Sihová fekauʻaki mo e ongoongo leleí ʻa e mahuʻinga fakaefakahaofi moʻui ʻo ʻenau pōpoakí pea te nau hanganaki malangaʻi taʻe tuku ia kaeʻoua ke ngata ʻa e māmani ko ʻení mo hono potó ʻi he tau ʻo ʻĀmaketoné. ʻOku vavé ni ke fakamāʻoniʻoniʻi ʻe Sihova ko e ʻOtuá ʻa hono tuʻunga-hau fakalevelevá pea ʻomai ʻa e moʻui taʻengata kiate kinautolu hono kotoa ʻoku nau tui ʻi he taimí ni mo fai ʻo fakatatau ki he “meʻa ngali vale ko ia [ʻoku malangaʻi, NW].”

[Fakamatala ʻi lalo]

Ko e Hā Haʻo Tali?

◻ Ko e hā ʻa e faʻahinga poto ʻe ua ʻoku ʻi aí ni?

◻ Ko e hā ʻa e mele tefito ʻo e poto ʻo e māmaní?

◻ Ko e hā ko e meʻa ʻaonga lahi taha ai ke malangaʻi ʻa e ongoongo leleí?

◻ Ko e hā ʻoku vavé ni ke hoko mai ki he poto kotoa pē ʻo e māmaní?

◻ Ko e hā ʻoku ʻikai ke mā ai ʻa e Kau Fakamoʻoni ʻa Sihová ke nau malangaʻi ʻa ia ʻoku lau ʻe he māmaní ko e meʻa ngali valé?