7. ʻOku lelei ange ʻa e ngaahi lao ʻa e Puleʻanga ʻo e ʻOtuá

ʻOku faʻu ʻe he ngaahi puleʻangá ha lao ʻoku totonu ke maʻu ʻaonga mo maluʻi ai ʻa e kakai ʻo e fonuá. ʻOku ʻi ai foki mo e ngaahi lao ʻa e Puleʻanga ʻo e ʻOtuá ʻa ia kuo pau ke muimui ki ai hono kakai. Lau ʻa e 1 Kolinitō 6:9-11, pea lāulea leva ki he ngaahi fehuʻi ko ení:

• ʻOkú ke fakakaukau ʻe fēfē ʻa e māmaní ʻi he taimi ʻe muimui ai ʻa e taha kotoa ki he ngaahi lao ʻa e ʻOtuá?a

• ʻOkú ke fakakaukau ʻoku totonu hono ʻamanekina ʻe Sihova ʻa e kakai ʻo e Puleʻangá ke talangofua ki he ngaahi lao ko ení? Ko e hā hono ʻuhingá?

• Ko e hā ʻokú ne fakahaaʻi mai ko e kakai ʻoku talangataʻa ki he ngaahi lao ko ení ʻe lava ke nau liliu?​—Sio ki he veesi 11.

Ko e kakai tokolahi ʻoku nau ongoʻi feifeitamaki ke talanoa fekauʻaki mo e fehokotaki fakasinó. Neongo ia, ʻi he taimi ʻoku lave ai ʻa e Tohi Tapú ki he fehokotaki fakasinó, ʻokú ne fai ia ʻi he founga hangatonu kae fakaʻapaʻapa. Ko e meʻa ʻokú ne leaʻaki fekauʻaki mo iá ʻoku tau maʻu ʻaonga mei ai. ʻOku ʻuhinga mālie ia he ko Sihova ʻa hotau Tokotaha-Fakatupú. ʻOkú ne ʻiloʻi ʻa e lelei taha maʻa kitautolú. ʻOkú ne tala mai ʻa e meʻa ke tau fai ke lava ai ke tau fakahōifuaʻi iá mo e meʻa te ne tokoniʻi kitautolu ke fiefia ʻi he moʻuí ʻo taʻengatá.

1. Ko e hā ʻa e vakai ʻa Sihova ki he fehokotaki fakasinó?

Ko e fehokotaki fakasinó ko ha meʻaʻofa fakaʻofoʻofa ia meia Sihova. ʻOkú ne finangalo ke fiefia ai ha tangata mo ha fefine ʻokú na ʻosi mali. Ko e meʻaʻofa ko ení ʻoku ʻikai ngata pē heʻene fakaʻatā ʻa e ongo meʻa malí ke na maʻu ha fānaú kae toe fefakahāhāʻaki ʻa e ʻofá mo e fetokangaʻakí. Ko e ʻuhinga ia ʻoku pehē ai ʻe he Folofola ʻa e ʻOtuá: “ʻOfa ke ke fiefia ʻi ho uaifi naʻá ke maʻu ʻi hoʻo kei talavoú.” (Palōveepi 5:18, 19) ʻOku ʻamanekina ʻe Sihova ʻa e ngaahi hoa mali Kalisitiané ke nau mateaki ki honau ngaahi hoá, ko ia heʻikai ai ke nau tono.​—Lau ʻa e Hepelū 13:4.

2. Ko e hā ʻa e fehokotaki fakasino taʻetaau?

ʻOku tala mai ʻe he Tohi Tapú “ko e faʻahinga ʻoku fehokotaki fakasino taʻetāú . . . ʻe ʻikai hanau tofiʻa ʻi he Puleʻanga ʻo e ʻOtuá.” (1 Kolinitō 6:9, 10) Ko e kau hiki Tohi Tapu lea faka-Kalisí naʻa nau ngāueʻaki ʻa e foʻi lea ko e por·neiʹa ke fakamatalaʻi ʻa e fehokotaki fakasino taʻetāú. Ko e foʻi lea ko iá ʻoku kau ki ai ʻa e (1) fehokotaki fakasino ʻi he vahaʻa ʻo e faʻahinga taʻemali tāutaha,a (2) fakasōtoma, pea mo e (3) mohe mo e manu. ʻOku tau fakahōifuaʻi ʻa Sihova pea tau maʻu ʻaonga tonu ai ʻi he taimi ʻoku tau “fakaʻehiʻehi mei he fehokotaki fakasino taʻetāú.”​—1 Tesalonaika 4:3.

KELI LOLOTO ANGE

3. Hola mei he fehokotaki fakasino taʻetāú

Ko Siosifa naʻá ne fakafisingaʻi ha fefine naʻá ne feinga ke fehokotaki fakasino mo ia. Lau ʻa e Sēnesi 39:1-12, pea lāulea leva ki he ngaahi fehuʻi ko ení:

• Ko e hā naʻá ne ueʻi ʻa Siosifa ke holá?​—Sio ki he veesi 9.

• ʻOkú ke fakakaukau naʻe fai ʻe Siosifa ʻa e fili totonú? Ko e hā hono ʻuhingá?

VITIŌ: Hola mei he ʻUlungaanga Taʻetaau (5:06)

ʻOku finangalo mai ʻa Sihova kiate kitautolu kotoa ke talitekeʻi ʻa e ʻulungaanga taʻetāú. Lau ʻa e 1 Kolinitō 6:18, pea lāulea leva ki he ongo fehuʻi ko ení:

• Ko e hā ʻa e ngaahi tuʻunga te ne taki atu nai ha taha ki he fehokotaki fakasino taʻetāú?

• ʻE lava fēfē ke ke hola mei he ʻulungaanga taʻetāú?

4. ʻE lava ke ke fakafepakiʻi ʻa e fakatauelé

VITIŌ: Tauʻi ʻa e Fakatauelé ʻAki ʻa e Lau Tohi Tapú (3:02)

• Ko e hā naʻe fai ʻe he tokoua ʻi he vitioó ʻi heʻene ʻiloʻi ko e ngaahi meʻa naʻá ne faí mo fakakaukau ki aí ʻe lava ke taki atu ia ke taʻefaitōnunga ki hono uaifí?

Naʻa mo e kau Kalisitiane faitōnungá ʻoku nau fāinga he taimi ʻe niʻihi ke tauhi ʻenau fakakaukaú ke maʻa. ʻE lava fēfē ke ke fakaʻehiʻehi mei he nōfoʻi ʻi he ngaahi meʻa taʻetāú? Lau ʻa e Filipai 4:8, pea lāulea leva ki he ongo fehuʻi ko ení:

• Ko e hā ʻa e ngaahi meʻa ʻoku totonu ke tau fakakaukau ki aí?

• ʻE lava fēfē ʻe he lau Tohi Tapú mo e femoʻuekina ʻi he ngāue ʻa Sihová ʻo tokoniʻi kitautolu ke talitekeʻi ʻa e fakatauele ke faiangahalá?

5. ʻOku tau maʻu ʻaonga mei he ngaahi tuʻunga ʻa Sihová

VITIŌ: ʻOku ʻIkai ke Fakakaukau Lelei (9:31)

• Naʻe anga-fēfē ʻa e laka atu ʻa e kiʻi talavoú ki ha tuʻunga fakatauelé?​—Sio ki he Palōveepi 7:8, 9.

• Fakatatau ki he Palōveepi 7:23, 26, ʻoku ʻi ai hono nunuʻa fakatuʻutāmaki ʻo e fehokotaki fakasino taʻetāú. Kapau te tau nofoʻaki maʻa fakaeʻulungaanga, ko e hā ʻa e ngaahi palopalema ʻe lava ke tau hao mei aí?

• ʻOku lava fēfē ke tokoniʻi kitautolu ʻe he maʻa fakaeʻulungāngá ke tau fiefia ʻi he moʻuí ʻo taʻengatá?

Ko e kakai ʻe niʻihi ʻoku nau fakakaukau ko e meʻa ʻoku leaʻaki ʻe he Tohi Tapú fekauʻaki mo e fakasōtomá ʻoku taʻeʻofa. Ka ko Sihova, ko e ʻOtua ʻo e ʻofá, ʻokú ne finangalo ki he tokotaha kotoa ke fiefia ʻi he moʻuí ʻo taʻengata. Ke maʻu iá kuo pau ke tau moʻuiʻaki ʻene ngaahi tuʻungá. Lau ʻa e 1 Kolinitō 6:9-11, pea lāulea leva ki he fehuʻi ko ení:

• ʻI he vakai ʻa e ʻOtuá, ko e holi fakasōtomá pē ʻoku fiemaʻu ke tau talitekeʻí?

Ke fakahōifuaʻi ʻa e ʻOtuá, ko kitautolu kotoa ʻoku fiemaʻu ke tau fai ʻa e ngaahi liliu. ʻOku tuha ʻa e feingá? Lau ʻa e Saame 19:8, 11, pea lāulea leva ki he ongo fehuʻi ko ení:

• ʻOkú ke fakakaukau ko e ngaahi tuʻunga fakaeʻulungaanga ʻa Sihová ʻoku faingataʻa ke talangofua ki ai? Ko e hā hono ʻuhingá?

FAKANOUNOU

Ko e fehokotaki fakasinó ko ha meʻaʻofa fakaʻofoʻofa ia meia Sihova ki he husepānití mo e uaifí ke na fiefia ai.

Fakamanatu

• Ko e hā ʻoku kau ki he fehokotaki fakasino taʻetāú?

• Ko e hā te ne tokoniʻi kitautolu ke fakaʻehiʻehi mei he fehokotaki fakasino taʻetāú?

• ʻOku tau maʻu ʻaonga fēfē mei he muimui ki he ngaahi tuʻunga taau ʻa Sihová?

AKO LAHI ANGE

Ako pe ko e hā ʻoku mahuʻinga ai ki he ʻOtuá ki ha ongo meʻa ke na mali.

“Ko e Hā ʻOku Leaʻaki ʻe he Tohi Tapú Fekauʻaki mo e Nonofo Taʻemalí?” (Kupu ʻi he uepisaití)

Ako ki he ʻuhinga ʻoku akoʻi ai ʻe he Tohi Tapú ko e tōʻonga fakasōtomá ʻoku hala, ka ʻi he taimi tatau ʻoku ʻikai ʻuhingá ke fehiʻa ki he kau fakasōtomá.

“ʻOku Hala ʻa e Fakasōtomá?” (Kupu ʻi he uepisaití)

Ako ki he anga hono maluʻi kitautolu ʻe he lao ʻa e ʻOtuá ʻi he fekauʻaki mo e fehokotaki fakasinó.

“Ko e Fehokotaki Fakasino Ngutú ko e Fehokotaki Fakasino Moʻoni?” (Kupu ʻi he uepisaití)

ʻI he talanoa “Naʻa Nau Fakafeangai Mai Kiate Au ʻi he Ngeia,” sio ki he meʻa naʻá ne ueʻi ha tokotaha fakasōtoma ke liliu ʻa ʻene founga moʻuí ke fakahōifuaʻi ʻa e ʻOtuá.

“Liliu ʻe he Tohi Tapú ʻa e Moʻuí” (Toʻo mei he Ko e Taua Leʻo)

ʻI māmani lahi, ʻoku kehekehe ʻa e fakakaukau ʻa e kakaí ki he ʻolokaholó. Ko e niʻihi ʻoku nau fili ke inu mo e ngaahi kaumeʻá ʻi he taimi ʻoku nau fakatahataha aí. Ko e niʻihi ʻoku nau fili ke ʻoua ʻaupito ʻe inu ʻolokaholo. Ka ko e niʻihi ʻoku nau inu ʻo aʻu ki he konaá. Ko e hā ʻa e vakai ʻa e Tohi Tapú ki he ʻolokaholó?

1. ʻOku hala ke inu ʻolokaholo?

ʻOku ʻikai ke pehē ʻe he Tohi Tapú ʻoku hala ke inu ʻolokaholo. ʻI hono kehé, ʻi he fakamatala ki he ngaahi meʻa lelei lahi kuo ʻomai ʻe he ʻOtuá maʻa kitautolú, ʻoku fakakau ʻe he Tohi Tapú ʻa e “uainé ʻa ia ʻokú ne ʻai ke fiefia ʻa e loto ʻo e tangatá.” (Saame 104:14, 15) ʻOku lave ʻa e Tohi Tapú ki he niʻihi ʻo e kau tangata mo e kau fefine faitōnunga naʻa nau inu ʻolokaholo.​—1 Tīmote 5:23.

2. Ko e hā ʻa e faleʻi ʻa e Tohi Tapú ki he faʻahinga ʻoku fili ke inú?

ʻOku fakahalaki ʻe Sihova ʻa e inu tōtuʻá mo e konaá. (Kalētia 5:21) ʻOku pehē ʻe heʻene Folofolá: “ʻOua naʻá ke kau fakataha mo kinautolu ʻoku nau inu ʻo fuʻu lahi ʻa e uainé.” (Palōveepi 23:20) Ko ia kapau ʻoku tau fili ke inu, naʻa mo e ʻi he tokotahá, ʻoku ʻikai totonu ke tau inu ʻo fuʻu lahi ʻo ʻikai lava ai ke tau fakakaukau fakalelei, mapuleʻi ʻetau leá mo e tōʻongá pe ʻe uesia ai ʻetau moʻui leleí. Kapau heʻikai lava ke tau mapuleʻi ʻetau inú, ʻoku totonu ke tau loto-lelei ke tuku ʻaupito ʻetau inú.

3. ʻE anga-fēfē haʻatau fakaʻapaʻapaʻi ʻa e fili ʻa e niʻihi kehé fekauʻaki mo e ʻolokaholó?

Ko e tokotaha taki taha kuo pau ke ne fili pe te ne inu ʻolokaholo. ʻOku ʻikai totonu ke tau fakamāuʻi ha taha ʻokú ne fili ke inu ʻolokaholo fakafeʻunga, pea ʻoku ʻikai totonu ke tau tenge ha taha ke inu ʻoku ʻikai loto ke inu. (Loma 14:10) ʻOku tau fili ke ʻoua ʻe inu kapau ʻe hoko ʻetau inú ʻo tūkia ai ha taha. (Lau ʻa e Loma 14:21.) ʻOku tau hanganaki kumi ʻo ʻikai ki he lelei pē ʻatautolú, “ka ki he lelei ʻa e tokotaha kehé.”​—Lau ʻa e 1 Kolinitō 10:23, 24.

KELI LOLOTO ANGE

4. Fai hoʻo fili pe te ke inu

Ko e hā e vakai ʻa Sīsū ki he inu ʻolokaholó? Ke maʻu ʻa e talí, sio ki he fuofua mana naʻá ne fakahokó. Lau ʻa e Sione 2:1-11, pea lāulea leva ki he ongo fehuʻi ko ení:

• Ko e hā ʻe lava ke tau ako mei he mana ko ení fekauʻaki mo e vakai ʻa Sīsū ki he ʻolokaholó mo e faʻahinga ʻoku nau inú?

• Naʻe ʻikai ke fakahalaki ʻe Sīsū ʻa e inu ʻolokaholó. Ko ia, ʻoku totonu ke fēfē ʻa e vakai ha Kalisitiane ki ha tokotaha ʻokú ne fili ke inu?

Neongo ʻoku ngofua ki ha Kalisitiane ke inu ʻolokaholo, ʻoku ʻikai ʻuhinga ia hení ʻoku fakapotopoto maʻu pē kiate ia ke fai pehē. Lau ʻa e Palōveepi 22:3, pea fakakaukau leva ki he anga hono tākiekina koe ʻe he ngaahi meʻa ko ení pe te ke fili ke inu:

• Te ke fakaʻuli pe tokangaʻi ha mīsini.

• ʻOkú ke feitama.

• Kuo tala atu ʻe ha toketā ke ʻoua te ke inu ʻolokaholo.

• ʻOku faingataʻa kiate koe ke mapuleʻi ʻa e lahi ʻokú ke inú.

• Ko e lao ʻo e fonuá ʻoku ʻikai fakaʻatā koe ke ke inu ʻolokaholo.

• ʻOkú ke ʻalu mo ha taha ʻokú ne fili ke ʻoua ʻe inu koeʻuhi naʻe faingataʻa ke ne mapuleʻi ʻene inú he kuohilí.

ʻOku totonu ke ke fakaʻatā ʻa e ʻolokaholó ʻi ha mali pe ha toe fakatahataha fakasōsiale kehe? Huluʻi ʻa e VITIOÓ ke sio ki he meʻa ʻoku lava ke ne tokoniʻi hoʻo filí.

VITIŌ: ʻOku Totonu Ke U Fakaʻatā ʻa e ʻOlokaholó? (2:41)

Lau ʻa e Loma 13:13 mo e 1 Kolinitō 10:31, 32. Hili hono lau ʻa e konga Tohi Tapu taki taha, lāulea ki he fehuʻi ko ení:

• ʻE lava fēfē ke ke ngāueʻaki ʻa e tefitoʻi moʻoni ko ení ke ke fai ai ha fili ʻe fakahōifuaʻi ʻa Sihova?

5. Fai ha fili ki he lahi te ke inú

Kapau ʻokú ke fili ke inu ʻolokaholo, manatuʻi eni: Neongo ʻoku ʻikai fakahalaki ʻe Sihova ʻa e inu ʻolokaholó, ʻokú ne fakahalaki ʻa e inu ʻo fuʻu lahí. Ko e hā hono ʻuhingá? Lau ʻa e Hōsea 4:11, 18, pea lāulea leva ki he fehuʻi ko ení:

• Ko e hā ʻoku lava ke hokó kapau ʻe inu ʻo fuʻu lahi ha tokotaha?

Ko e hā te ne tokoniʻi kitautolu ke ʻoua ʻe inu ʻo fuʻu lahí? ʻOku fiemaʻu ke tau anga-fakanānā, pe lāuʻilo ki hotau ngataʻangá. Lau ʻa e Palōveepi 11:2, pea lāulea leva ki he fehuʻi ko ení:

• Ko e hā ko ha fakakaukau lelei ai ke fokotuʻu ha fakangatangata pau ki he lahi ʻo e meʻa te ke inú?

6. Ikuʻi hono ngāuehalaʻaki ʻo e ʻolokaholó

VITIŌ: ‘Naʻá Ku Foʻi ʻi Heʻeku Founga Moʻuí’ (6:32)

• ʻI he vitioó, naʻe fēfē ʻa e tōʻonga ʻa Dmitry ʻi heʻene inu ʻa e ʻolokaholó?

• Naʻe malava ke tuku ʻene inú he taimi pē ko iá?

• Naʻe anga-fēfē ʻene faai atu ʻo taʻofi ʻene inu ʻo fuʻu lahi ʻa e ʻolokaholó?

Lau ʻa e 1 Kolinitō 6:10, 11, pea lāulea leva ki he ongo fehuʻi ko ení:

• ʻOku mafatukituki fēfē ʻa e konaá?

• ʻOku anga-fēfē ʻetau ʻilo ʻe lava ʻo liliu ha taha ʻokú ne ngāuehalaʻaki ʻa e ʻolokaholó?

Lau ʻa e Mātiu 5:30, pea lāulea leva ki he fehuʻi ko ení:

• ʻI hono ngāueʻaki ʻe Sīsū ʻa e talanoa fakatātā ki hono tuʻusi ʻo ha nima, naʻá ne ʻuhingá ʻe fiemaʻu nai ke tau feilaulauʻi ha meʻa ke fakahōifuaʻi ʻa Sihova. Ko e hā ʻe lava ke ke faí kapau ʻokú ke fāinga ke ikuʻi hono ngāuehalaʻaki ʻo e ʻolokaholó?a

Lau ʻa e 1 Kolinitō 15:33, pea lāulea leva ki he fehuʻi ko ení:

• ʻE anga-fēfē hono uesia koe ʻe he feohi mo e faʻahinga ʻoku nau saiʻia he inu ʻo fuʻu lahí?

FAKANOUNOU

Kuo tokonaki mai ʻe Sihova ʻa e ʻolokaholó ke tau fiefia ai, ka ʻokú ne fakahalaki ʻa e inu ʻo fuʻu lahí mo e konaá.

Fakamanatu

• Ko e hā ʻa e vakai ʻa e Tohi Tapú ki he ʻolokaholó?

• Ko e hā ʻa e fakatuʻutāmaki ʻo e inu ʻo fuʻu lahí?

• ʻE lava fēfē ke tau fakaʻapaʻapaʻi ʻa e fili ʻa e niʻihi kehé fekauʻaki mo e inú?

AKO LAHI ANGE

ʻOku lava fēfē ʻa e toʻutupú ke nau fai ha ngaahi fili lelei fekauʻaki mo e ʻolokaholó?

ʻUluaki Fakakaukau pe Te Ke Inu (2:31)

Ako ki he ngaahi sitepu ʻoku lava ke ke fai ke ikuʻi ʻa e palopalema ʻo e inú.

“Tauhi ʻa e ʻOlokaholó ke ʻi Hono Tuʻunga Totonú” (Toʻo mei he Ko e Taua Leʻo)

ʻOku totonu ke kau ha Kalisitiane ʻi he inu talamonuú?

“Ngaahi Fehuʻi mei he Kau Lautohí” (Ko e Taua Leʻo, Fepueli 15, 2007)

ʻI he talanoa “Naʻá Ku Fakahiehia ʻi he Inú,” sio ki he hoko ha tangata ʻo taʻofi ʻene inu fuʻu lahí.

“Liliu ʻe he Tohi Tapú ʻa e Moʻuí” (Toʻo mei he Ko e Taua Leʻo)

Neongo ʻokú ke ʻofa lahi kia Sihova peá ke feinga mālohi ke fakaʻehiʻehi mei hono fai ha faʻahinga meʻa te ne mamahi ai, ka ʻe ʻi ai e taimi te ke fai ai ʻa e ngaahi fehālaaki. Kae kehe, ko e ngaahi angahala ʻe niʻihi ʻoku mafatukituki ange ia ʻi he niʻihi. (1 Kolinitō 6:9, 10) Kapau te ke fakahoko ha angahala mamafa, manatuʻi ʻoku kei ʻofa pē ʻa Sihova ʻiate koe. ʻOkú ne loto-lelei ke fakamolemoleʻi mo tokoniʻi koe.

1. Ko e hā kuo pau ke tau faí ke maʻu ai ʻa e fakamolemole ʻa Sihová?

Ko e faʻahinga ʻoku ʻofa kia Sihová ʻoku nau fonu ʻi he mamahi ʻi heʻenau ʻiloʻi kuo nau fakahoko ha angahala mamafa. Ka ʻoku fakafiemālieʻi kinautolu ʻe Sihova ʻaki ʻene talaʻofá: “Neongo ʻoku hangē hoʻomou angahalá ko ha tupenu kula ʻahoʻahó, ʻe ʻai ia ke hinehina ʻo hangē ko e sinoú.” (ʻAisea 1:18) Kapau ʻoku tau fakatomala moʻoni, ʻe fakamolemoleʻi fakaʻaufuli kitautolu ʻe Sihova. ʻE anga-fēfē ʻetau fakatomalá? ʻI hono ueʻi ʻe he fakaʻiseʻisa moʻoní, ʻoku tau taʻofi hono fai ʻa e meʻa ʻoku koví pea kōlenga kia Sihova ke ne fakamolemoleʻi kitautolu. ʻOku tau ngāue mālohi leva ke liliu ʻa e fakakaukau pe ngaahi tōʻonga hala naʻá ne taki atu kitautolu ke faiangahalá, pea tau feinga ke moʻuiʻaki ʻa e ngaahi tuʻunga maʻa ʻa Sihová.​—Lau ʻa e ʻAisea 55:6, 7.

2. ʻOku anga-fēfē hono ngāueʻaki ʻe Sihova ʻa e kau mātuʻá ke tokoniʻi kitautolu ʻi heʻetau faiangahalá?

Kapau ʻoku tau fakahoko ha angahala mamafa, ʻoku tala mai ʻe Sihova ke tau “ui mai ʻa e kau mātuʻa ʻo e fakatahaʻangá.” (Lau ʻa e Sēmisi 5:14, 15.) Ko e kau tangata fakanofo ko ení ʻoku nau ʻofa kia Sihova mo ʻene fanga sipí. Kuo akoʻi kinautolu ki he founga ki hono tokoniʻi kitautolu ke toe maʻu ha vahaʻangatae lelei mo Sihova.​—Kalētia 6:1.

ʻOku anga-fēfē hono tokoniʻi kitautolu ʻe he kau mātuʻá kapau ʻoku tau fakahoko ha angahala mamafa? ʻE fakatonutonu kitautolu ʻe ha mātuʻa ʻe ua pe tolu ʻo ngāueʻaki ʻa e akonaki ʻa e Tohi Tapú. Te nau toe ʻomai ʻa e ngaahi faleʻi ʻaonga mo e fakalototoʻa ke tokoniʻi kitautolu ke fakaʻehiʻehi mei he toe tō ki ha angahala. Kapau kuo fakahoko ʻe ha taha ha angahala mamafa pea ʻikai fakatomala, ʻe fakamavahei ia ʻe he kau mātuʻá mei he fakatahaʻangá koeʻuhí ke ʻoua te ne tākiekina kovi ʻa e faʻahinga kehe ʻi he fakatahaʻangá.

KELI LOLOTO ANGE

3. Ko hono vete ʻetau angahalá ʻe tokoni ia ki hono fakaleleiʻi hotau vahaʻangatae mo Sihová

Ko ha faʻahinga angahala pē te tau fakahoko ʻoku fakamamahi ia kia Sihova, ko ia ʻoku totonu ai ke tau vete ʻetau angahalá kiate ia. Lau ʻa e Saame 32:1-5, pea lāulea leva ki he fehuʻi ko ení:

• Ko e hā ʻoku lelei ai ke vete ʻetau ngaahi angahalá kia Sihová kae ʻikai feinga ke fūfuuʻi kinautolu?

VITIŌ: “Ko Kinautolu ʻOku ʻOfa Ai ʻa Sihová ʻOkú Ne Akonakiʻi” (3:01)

• ʻI he vitioó, naʻe anga-fēfē hono tokoniʻi ʻe he kau mātuʻá ʻa Canon ke foki kia Sihová?

ʻOku fiemaʻu ke tau lea hangatonu mo faitotonu ki he kau mātuʻá he ʻoku nau ʻi ai ke tokoniʻi kitautolu. Lau ʻa e Sēmisi 5:16, pea lāulea leva ki he fehuʻi ko ení:

• Ko e hā ʻe faingofua ange ai ki he kau mātuʻá ke tokoniʻi kitautolu ʻi he taimi ʻoku tau lea faitotonu aí?

4. ʻOku fakahāhā ʻe Sihova ʻa e mēsí ki he kau faiangahalá

Kapau kuo fakahoko ʻe ha tokotaha ha angahala mamafa pea fakafisi ke muimui ʻi he ngaahi tuʻunga ʻa Sihová, ʻoku fakamavaheʻi ia mei he fakatahaʻangá, pea ʻoku ʻikai ke tau toe feohi mo ia. Lau ʻa e 1 Kolinitō 5:6, 11, pea lāulea leva ki he fehuʻi ko ení:

• Hangē pē ko e hūhū ʻa e lēvani ʻi he toú, ʻe anga-fēfē hano uesia ʻa e fakatahaʻangá ʻi he feohi mo ha taha angahala taʻefakatomalá?

ʻOku anga-fēfē hono fakahaaʻi ʻe Sihova ʻokú ne fakaʻatuʻi, faimeesi mo anga-ʻofa ʻi he founga ʻokú ne fakafeangai ai ki he kau faiangahalá?

5. ʻOku fakamolemoleʻi kitautolu ʻe Sihova ʻi heʻetau fakatomalá

Naʻe ngāueʻaki ʻe Sīsū ha talanoa fakatātā ke ne tokoniʻi kitautolu ke mahinoʻi ʻa e anga ʻo e ongoʻi ʻa Sihová ʻi he taimi ʻoku fakatomala ai ha tokotaha. Lau ʻa e Luke 15:1-7, pea lāulea leva ki he fehuʻi ko ení:

• Ko e hā ʻokú ke ako heni fekauʻaki mo Sihová?

Lau ʻa e ʻIsikeli 33:11, pea lāulea leva ki he fehuʻi ko ení:

• Ko e hā ʻa e sitepu mahuʻinga ʻoku kau ki he fakatomalá?

FAKANOUNOU

Kapau ʻoku tau fakahoko ha angahala mamafa kae fakatomala loto-moʻoni mo fakapapauʻi ke tuku hono fai ʻa e meʻa ʻoku koví, ʻe fakamolemoleʻi kitautolu ʻe Sihova.

Fakamanatu

• Ko e hā ʻoku lelei ai kiate kitautolu ke vete ʻetau ngaahi angahalá kia Sihová?

• Ko e hā kuo pau ke tau faí kae fakamolemoleʻi ʻe Sihova ʻetau ngaahi angahalá?

• Kapau ʻoku tau fakahoko ha angahala mamafa, ko e hā ʻoku tau kumi ai ʻa e tokoni ʻa e kau mātuʻá?

AKO LAHI ANGE

Sio ki hono maʻu ʻe ha tangata ʻa e meesi ʻa Sihová ʻa ia ʻoku fakamatalaʻi ʻi he ʻAisea 1:18.

ʻOku Papau ʻa e Meesi ʻa Sihová (5:02)

ʻOku anga-fēfē ʻa e feinga ʻa e kau mātuʻá ke tokoniʻi ʻa e faʻahinga ʻoku nau fai ha angahala mamafá?

“ʻFakafeangai ki he Faiangahalá ʻi he ʻOfa mo e Meesi” (Ko e Taua Leʻo, ʻAokosi 2024)

Fakakaukau ki he founga hono fakahāhā ʻa e ʻofá mo e mēsí ki he kau faiangahala taʻefakatomalá.

“Tokoni ki he Faʻahinga ʻOku Fakamavaheʻi mei he Fakatahaʻangá” (Ko e Taua Leʻo, ʻAokosi 2024)

ʻI he talanoa “Naʻe Fiemaʻu Ke U Foki kia Sihova,” ako ki he ʻuhinga naʻe ongoʻi ai ʻe ha tangata naʻe hē mei he moʻoní hono tohoakiʻi mai ia ʻe Sihová.

“Liliu ʻe he Tohi Tapú ʻa e Moʻuí” (Ko e Taua Leʻo, ʻEpeleli 1, 2012)