Ko e Lao ʻa Kalaisí

“Naʻa ku ʻi he loto lao ʻa Kalaisi.”​—1 KOLINITŌ 9:​21.

1, 2. (a) Naʻe mei malava fēfē ke taʻofi ke ʻoua naʻa hoko ʻa e ngaahi fehālaaki lahi ʻa e faʻahinga ʻo e tangatá? (e) Ko e hā naʻe ʻikai malava ke ako ʻe he Puleʻanga-Haʻa-Kalisitiané mei he hisitōlia ʻo e lotu faka-Siú?

“KUO ʻikai ʻaupito ke ako ʻe he kakaí mo e ngaahi founga-pulé ha meʻa mei he hisitōliá, pe ngāue ʻi he ngaahi tefitoʻi moʻoni naʻe toʻo mei aí.” Ko e lau ia ʻa ha filōsefa Siamane ʻi he senituli hono 19. Ko e moʻoni, ko e ʻalunga ʻo e hisitōlia ʻo e faʻahinga ʻo e tangatá kuo fakamatalaʻi ia ʻo pehē ko ha “laka ʻa e valé,” ko ha hokohoko ʻo e fehālaaki mo e tuʻunga fakatuʻutāmaki fakalilifu, ʻa ia ko hono konga lahi naʻe mei malava pē ke taʻofi haʻane hoko ʻo kapau pē naʻe loto-lelei ʻa e faʻahinga ʻo e tangatá ke ako mei he ngaahi fehālaaki ʻi he kuohilí.

² Ko e fakafisi tatau pē ke ako mei he ngaahi fehālaaki ʻo e kuohilí ʻoku fakaeʻa ʻi he fakamatala ko ʻeni fekauʻaki mo e lao fakaʻotuá. Naʻe fetongi ʻe Sihova ko e ʻOtuá ʻa e Lao ʻa Mōsesé ʻaki ha lao naʻe toe lelei ange​—ko e lao ʻa Kalaisí. Ka neongo ia, ko e kau taki ʻo Puleʻanga-Haʻa-Kalisitiané, ʻa ia ʻoku nau taukaveʻi ʻoku nau akoʻi mo moʻui ʻo fakatatau ki he lao ko ʻení, kuo ʻikai te nau ako mei he vale lahi ʻa e kau Fālesí. Ko ia kuo hanga ʻe Puleʻanga-Haʻa-Kalisitiane ʻo mioʻi mo ngāuekoviʻaki ʻa e lao ʻa Kalaisí ʻo hangē pē ko ia naʻe fai ʻe he lotu faka-Siú ki he Lao ʻa Mōsesé. Naʻe malava fēfē ke hoko pehē ia? ʻUluakí, tau lāulea ange ki he lao ko ʻení​—pe ko e hā ia, ko hai ʻokú ne pule ki aí pea ʻi he founga fē, pea pehē ki he meʻa ʻokú ne fakafaikehekeheʻi ia mei he Lao ʻa Mōsesé. Hili iá te tau sivisiviʻi ʻa e founga naʻe ngāuekoviʻaki ai ia ʻe Puleʻanga-Haʻa-Kalisitiané. ʻOfa ke tau ako ai mei he hisitōliá mo maʻu ha ʻaonga mei ai!

Ko e Fuakava Foʻoú

 3. Ko e hā ʻa e talaʻofa naʻe fai ʻe Sihova ʻo fekauʻaki mo ha fuakava foʻoú?

³ Ko hai tuku kehe ʻa Sihova ko e ʻOtuá naʻe malava ke ne fakaleleiange ha Lao haohaoa? Naʻe haohaoa ʻa e Lao fuakava ʻa Mōsesé. (Sāme 19:7) Ka neongo ia, naʻe talaʻofa ʻa Sihova: “Vakai ʻoku hoko mai ha taimi . . . ʻa ia te u fai ai mo e fale ʻo Isileli mo e fale ʻo Siuta ha fuakava foʻou​—taha kehe ʻa e fuakava ne u fai mo ʻenau ngaahi kui.” Ko e Fekau ʻe Hongofulú​—ko e uho ia ʻo e Lao ʻa Mōsesé​—naʻe tohi ia ʻi he ongo maka lafalafa. Ka ʻi he fekauʻaki mo e fuakava foʻoú, naʻe folofola ʻe Sihova: “Te u ʻai ki loto ʻeku lao, ʻio, te u tongi ia ki honau loto.”​—Selemaia 31:​31-34.

 4. (a) Ko e ʻIsileli fē ʻoku kau ʻi he fuakava foʻoú? (e) Ko toe hai tuku kehe ʻa e kau ʻIsileli fakalaumālié ʻoku ʻi he malumalu ʻo e lao ʻa Kalaisí?

⁴ Ko hai ʻe fakakau ki he fuakava foʻou ko ʻení? Ko hono moʻoní, ʻoku ʻikai ko e “fale ʻo Isileli” moʻoní, ʻa ia naʻa nau talitekeʻi ʻa e Tokotaha-Fakalaloa ʻo e fuakava ko ʻení. (Hepelū 9:​15) ʻIkai, ko e “Isileli” foʻou ia ko ʻení ko e “Isileli faka-ʻOtua,” ko ha puleʻanga ʻo e kau ʻIsileli fakalaumālie. (Kalētia 6:​16; Loma 2:​28, 29) Ko e kiʻi kulupu ʻeni ia ʻo e kau Kalisitiane pani ʻe he laumālié ʻe kau fakataha atu kiate kinautolu ha “fuʻu kakai lahi” mei he ngaahi puleʻanga kotoa ʻa ia te nau feinga mo kinautolu ke lotu kia Sihova. (Fakahā 7:​9, 10; Sākalaia 8:​23) Neongo ʻoku ʻikai te nau kau ʻi he fuakava foʻou ko ʻení, ko e faʻahingá ni foki te nau kau ʻi he moʻulaloa ki he laó. (Fakafehoanaki mo Livitikō 24:22; Nōmipa 15:15.) ʻI he hoko ko e “takanga pe taha” ʻi he malumalu ʻo e “taha pe ʻa e tauhi,” ko kinautolu kotoa te nau “ʻi he loto lao ʻa Kalaisi,” ʻo hangē ko ia naʻe tohi ʻe he ʻaposetolo ko Paulá. (Sione 10:16; 1 Kolinitō 9:​21) Naʻe ui ʻe Paula ʻa e fuakava foʻou ko ʻení ko ha ‘fuakava lelei hake.’ Ko e hā hono ʻuhingá? Ko e meʻa ʻe tahá, ʻoku fakatuʻunga ia ʻi he ngaahi talaʻofa ʻoku fakahoko kae ʻikai ʻi he ʻata pē ʻo e ngaahi meʻa ka hoko mai.​—Hepelū 8:6; 9:​11-​14.

 5. Ko e hā ʻa e taumuʻa ʻo e fuakava foʻoú, pea ko e hā ʻe lavameʻa aí?

⁵ Ko e hā ʻa e taumuʻa ʻo e fuakava ko ʻení? Ke fakatupu ai ha puleʻanga ʻo e ngaahi tuʻi mo e kau taulaʻeiki ke tāpuakiʻi ai ʻa e faʻahinga ʻo e tangatá kotoa. (ʻEkisoto 19:6; 1 Pita 2:9; Fakahā 5:​10) Naʻe ʻikai ʻaupito ke fakatupu ʻi he Lao fuakava ʻa Mōsesé ia ʻa e puleʻanga ko ʻení ʻi he ʻuhinga kakato tahá, he ʻi he tuʻunga fakalūkufuá naʻe angatuʻu ʻa ʻIsileli ia pea mole ai honau faingamālié. (Fakafehoanaki mo Loma 11:​17-​21.) Kae kehe, ko e fuakava foʻoú, ʻoku pau ʻene lavameʻá, he ʻoku fekauʻaki ia mo ha faʻahinga kehe ʻaupito ʻo e laó. Kehekehe ʻi he ngaahi founga fē?

Ko e Lao Kau ki he Tauʻatāiná

6, 7. ʻOku anga-fēfē hono ʻomai ʻe he lao ʻa Kalaisí ha tauʻatāina lahi ange ia ʻi he meʻa naʻe fai ʻe he Lao ʻa Mōsesé?

⁶ Ko e lao ʻa Kalaisí ʻoku toutou fekauʻaki ia mo e tauʻatāiná. (Sione 8:​31, 32) ʻOku lave ki ai ko e “lao tauʻataina” pea ko e “lao haohaoa, ʻa e lao tauʻataina.” (Sēmisi 1:​25; 2:​12) Ko e moʻoni, ko e tauʻatāina kotoa ʻi he lotolotonga ʻo e faʻahinga ʻo e tangatá ʻoku fakangatangata. Ka neongo ia, ʻoku ʻomai ʻe he lao ia ko ʻení ha tauʻatāina lahi mamaʻo ange ia ʻi he meʻa naʻá ne fetongí, ko e Lao ʻa Mōsesé. ʻO anga-fēfē?

⁷ Ko e meʻa ʻe tahá, ʻoku ʻikai ha taha ia ʻoku fanauʻi mai ʻi he malumalu ʻo e lao ʻa Kalaisí. Ko e ngaahi meʻa hangē ko e matakali mo e feituʻu ʻo e fanauʻí ʻoku ʻikai ʻaupito ke kau ia ki ai. ʻOku fili tauʻatāina pē ʻa e kau Kalisitiane moʻoní ʻi honau lotó ke tali ʻa e ʻioke ʻo e talangofua ki he lao ko ʻení. ʻI hono fai iá, ʻoku nau ʻilo ai ko ha ʻioke anga-ʻofa ʻeni ia, ko ha kavenga maʻamaʻa. (Mātiu 11:​28-​30) Ko hono moʻoní, naʻe fakataumuʻa foki ʻa e Lao ʻa Mōsesé ke ne akoʻi ki he tangatá ke ne ʻilo ʻokú ne angahalaʻia pea ʻoku fiemaʻu fakaʻaufuli ai kiate ia ha feilaulau huhuʻi ke huhuʻiʻaki ia. (Kalētia 3:​19) ʻOku akoʻi mai ʻe he lao ʻa Kalaisí ʻo pehē kuo hoko mai ʻa e Mīsaiá, naʻe totongi ai ʻa e mahuʻinga ʻo e huhuʻí ʻaki ʻene moʻuí, pea fakaʻatā ai ʻa e hala kiate kitautolu ke fakatauʻatāinaʻi mei he fakafeʻātungia fakalilifu ʻa e angahalá mo e maté! (Loma 5:​20, 21) Ke maʻu ha ʻaonga mei ai, ʻoku fiemaʻu ke tau ‘ngāueʻi ʻa e tui’ ki he feilaulau ko iá.​—Sione 3:​16.

 8. Ko e hā ʻoku kau ʻi he lao ʻa Kalaisí, ka ko e hā ʻoku ʻikai ai ke fiemaʻu ke maʻu loto ha ngaahi tuʻutuʻuni fakalao ʻe laui teau ʻi heʻete moʻuiʻaki iá?

⁸ “Ko hono ngāueʻi ʻa e tuí” ʻoku kau ki ai ʻa e moʻui ʻo fakatatau ki he lao ʻa Kalaisí. ʻOku kau ki ai ʻa e talangofua ki he kotoa ʻo e ngaahi fekau ʻa Kalaisí. ʻOku ʻuhinga ʻení ke manatuʻi ʻa e laui teau ʻo e ngaahi lao mo e ngaahi tuʻutuʻuní? ʻIkai. Neongo naʻe hanga ʻe Mōsese, ko e tokotaha-fakalaloa ʻo e fuakava motuʻá, ʻo tohi ʻa e Lao ʻa Mōsesé, ko Sīsū, ko e Tokotaha-Fakalaloa ʻo e fuakava foʻoú, naʻe ʻikai ʻaupito te ne tohi ha foʻi lao ʻe taha. Ka, naʻá ne moʻuiʻaki ʻa e lao ko ʻení. Fakafou ʻi heʻene founga moʻui haohaoá, naʻá ne fokotuʻu ai ha sīpinga maʻá e faʻahinga kotoa ke muimui ai. (1 Pita 2:​21) Mahalo ko e ʻuhinga ia naʻe lave ai ki he lotu ʻa e muʻaki kau Kalisitiané ko e “ʻAlunga ko é.” (Ngāue 9:2; 19:​9, 23; 22:4; 24:22) Kiate kinautolu, ko e lao ʻa Kalaisí naʻe fakatātaaʻi tonu ia ʻi he moʻui ʻa Kalaisí. Ke faʻifaʻitaki kia Sīsuú naʻe ʻuhinga iá ke talangofua ki he lao ko ʻení. Ko ʻenau ʻofa lahi ʻaupito kiate iá naʻe ʻuhinga iá naʻe tohi moʻoni ʻa e lao ko ʻení ʻi honau lotó, ʻo hangē ko ia naʻe kikiteʻí. (Selemaia 31:33; 1 Pita 4:8) Pea ko e tokotaha ʻoku talangofua koeʻuhi ko e ʻofá ʻoku ʻikai ʻaupito te ne ongoʻi feʻātungia​—ko e toe ʻuhinga ia ʻoku ui nai ai ʻa e lao ʻa Kalaisí ko e “lao tauʻataina.”

 9. Ko e hā ʻa e ʻelito ʻo e lao ʻa Kalaisí, pea ʻi he founga fē ʻoku kau ai ʻi he laó ni ha fekau foʻoú?

⁹ Kapau naʻe mahuʻinga ʻa e ʻofá ʻi he Lao ʻa Mōsesé, ko e ʻelito ia ʻo e lao Kalisitiané. ʻOku maʻu ʻe he lao ʻa Kalaisí ha fekau foʻou​—ko e kau Kalisitiané ke nau maʻu ʻa e ʻofa feilaulauʻi-kita ʻiate kinautolu. Te nau ʻofa ʻo hangē ko ia naʻe fai ʻe Sīsuú; naʻá ne loto-lelei ʻo tukuange ʻene moʻuí koeʻuhi ko hono ngaahi kaumeʻá. (Sione 13:​34, 35; 15:13) Ko ia ʻoku lava ke pehē ko e lao ʻa Kalaisí ko ha toe fakahāhā ia ʻo e pule fakateokalatí ʻo māʻolunga ange ia ʻi he Lao ʻa Mōsesé. Hangē ko ia naʻe fakahaaʻi ʻe he kalasi makasini ko ʻení ki muʻa: “Ko e pule fakateokalatí ʻoku puleʻi ʻe he ʻOtuá; ko e ʻOtuá ʻoku ʻofa; ko ia ai ko e pule fakateokalatí ʻoku puleʻi ʻe he ʻofá.”

Sīsū mo e Kau Fālesí

10. Naʻe anga-fēfē ʻa e kehe ʻaupito ʻa e meʻa ia naʻe akoʻi ʻe Sīsuú mei he meʻa naʻe akoʻi ʻe he kau Fālesí?

¹⁰ Ko ia, ʻoku ʻikai fakaʻohovale, ʻa e hoko ʻo fepaki ʻa Sīsū mo e kau taki lotu Siu ʻi hono taimí. Ko e “lao haohaoa, ʻa e lao tauʻataina” naʻe mātuʻaki mamaʻo ia mei he ʻatamai ʻo e kau sikalaipé mo e kau Fālesí. Naʻa nau feinga ke puleʻi ʻa e kakaí ʻo fakafou ʻi he ngaahi tuʻutuʻuni ko e faʻu pē ʻe he tangatá. Naʻe hoko ʻa e ngaahi meʻa naʻa nau akoʻí ʻo fakafeʻātungia, fakatupu fakahalaia, taʻepau. ʻI hono kehe ʻaupitó, naʻe mātuʻaki fakatupu langa hake mo pau ʻa e meʻa naʻe faiakoʻaki ʻe Sīsuú! Naʻá ne ala fai ia mo fakahaaʻi ʻa e ngaahi fiemaʻu moʻoní mo tokanga ki he kakaí. Naʻe faingofua ʻa e meʻa naʻá ne akoʻí pea faiʻaki ʻa e ongoʻi moʻoni, ʻo ngāueʻaki ʻa e ngaahi fakatātā mei he moʻui fakaʻahó pea toʻo mei he mafai ʻo e Folofola ʻa e ʻOtuá. Ko ia ai, naʻe “ofo ae kakai i he ene akonaki.” (Mātiu 7:​28) ʻIo, naʻe aʻu ʻa e meʻa naʻe akoʻi ʻe Sīsuú ki honau lotó!

11. Naʻe anga-fēfē hono fakahāhā ʻe Sīsū naʻe totonu ke ngāueʻaki ʻa e Lao ʻa Mōsesé ʻi he anga-fakaʻatuʻi mo e meesi?

¹¹ ʻI he ʻikai ke toe tānaki atu ha ngaahi tuʻutuʻuni lahi ange ki he Lao ʻa Mōsesé, naʻe fakahāhaaʻi ʻe Sīsū ʻa e founga naʻe totonu ke ngāueʻaki ai ʻe he kau Siú ʻa e Lao ko iá​—ʻi he fakaʻatuʻi mo e meesi. Ko e fakatātaá, manatuʻi ʻa e taimi naʻe fakafetaulaki ai kiate ia ha fefine naʻe puke ʻi he ʻaú. Fakatatau ki he Lao ʻa Mōsesé, ko ha taha pē ʻe ala ki ai ʻa e fefiné ni ʻe taʻemaʻa ia, ko ia ai naʻe pau ke ʻoua te ne feohi mo ha fuʻu kakai tokolahi! (Livitikō 15:​25-​27) Ka naʻá ne faingatāmaki ʻaupito ke faitoʻo ia ko ia ai naʻá ne fakahaohao atu he fuʻu kakaí ʻo ne ala ki he kofu ʻo Sīsuú. Naʻe tuʻu leva ʻa e ʻaú. Naʻá ne valokiʻi ia ʻi hono maumauʻi ʻa e Laó? ʻIkai; ka, naʻe mahino kiate ia ʻa e tuʻunga faingatāmaki ʻo e fefiné pea fakahāhā ʻa e foʻi akonaki māʻolunga taha ʻa e Laó​—ko e ʻofa. Naʻá ne tala fakamatematē ange kiate ia: “Ngaʻata, kuo fakamoʻui koe ʻe hoʻo tui; ʻalu ʻo fiemālie pē ā, pea ke moʻui mei ho mamahiʻanga.”​—Maʻake 5:​25-​34.

ʻOku Fai ʻe he Lao ʻa Kalaisí ha Fakangofua Tavale?

12. (a) Ko e hā ʻoku ʻikai totonu ai ke tau fakamahalo ʻo pehē ko Kalaisí ʻoku fai ʻe ia ʻa e fakangofua tavale? (e) Ko e hā ʻokú ne fakahaaʻi ko hono fakatupu ke lahi ʻa e ngaahi laó ʻoku iku ia ki hono fakatupu ke lahi ʻa e ngaahi kalofangá?

¹² Ko ia ai, ʻoku totonu ke tau fakaʻosiʻaki ʻo pehē koeʻuhi ko e lao ʻa Kalaisí ʻoku “tauʻataina,” ʻoku fai ʻe ia ʻa e fakangofua tavale, ka ko e kau Fālesí ia, mo e kotoa ʻo ʻenau ngaahi talatukufakaholo naʻe leaʻakí, naʻá ne ʻai ʻe ia ʻa e ʻulungaanga ʻo e kakaí ke ʻi he ngaahi fakangatangata fefeka? ʻIkai. ʻOku fakahaaʻi ʻe he ngaahi founga ngāue fakalao ʻi he ʻaho ní ʻoku faʻa hoko ʻi he lahi ange ʻa e ngaahi laó, ʻo toe lahi ange ai ʻa e ngaahi kalofanga ʻoku ʻilo ʻe he kakaí.a ʻI he taimi ʻo Sīsuú naʻe hoko ʻa e lahi ʻa e ngaahi tuʻutuʻuni faka-Fālesí ʻo fakaʻaiʻai ai ʻa e kumi ki ha ngaahi kalofangá, ko hono fakahoko fakafatongiakovi pē ʻo e ngaahi ngāué ʻo ʻikai ke ʻi ai ʻa e ʻofá, mo hono fakatupu ʻo ha hā māʻoniʻoni ki tuʻa ke fakapuli ʻaki ʻa e mele ʻi lotó.​—Mātiu 23:​23, 24.

13. Ko e hā ʻoku iku ai ʻi he lao ʻa Kalaisí ki ha tuʻunga ʻo e ʻulungaangá ʻoku māʻolunga ange ia ʻi ha ngaahi lao pē kuo tohi?

¹³ ʻI hono kehe ʻaupitó, ʻoku ʻikai ke tauhi ʻe he lao ʻa Kalaisí ia ʻa e ngaahi fakakaukau peheé. Ko hono moʻoní, ko e talangofua ki ha lao ʻo fakatuʻunga ʻi he ʻofa kia Sihová pea talangofua ʻaki ʻa e faʻifaʻitaki ki he ʻofa feilaulauʻi-kita ʻa Kalaisi ki he niʻihi kehé ʻoku iku ia ki ha tuʻunga ʻo e ʻulungaangá ʻa ia ʻoku māʻolunga mamaʻo ange ia ʻi he muimui ki ha ngaahi tuʻutuʻuni fakaelao kuo fokotuʻu. ʻOku ʻikai ke kumi ʻa e ʻofá ia ki ha ngaahi kalofanga; ʻokú ne taʻofi kitautolu mei hano fai ha ngaahi meʻa ʻoku kovi ʻa ia ʻoku ʻikai ke tapui fakapatonu mai nai ia ʻe he lao kuo tohí. (Sio ki he Mātiu 5:​27, 28.) Ko ia ai, ʻe ueʻi kitautolu ʻe he lao ʻa Kalaisí ke tau fai ha ngaahi meʻa maʻá e niʻihi kehé​—ke fakahāhā ʻa e nima-homo, anga-ʻofa ʻi he talitali kakaí, pea ʻofa​—ʻi he ngaahi founga ʻoku ʻikai malava ʻe ha lao ia kuo tohi ke ne ʻai kitautolu ke tau fai ia.​—Ngāue 20:35; 2 Kolinitō 9:7; Hepelū 13:16.

14. Ko e hā naʻe hoko ʻi he moʻuiʻaki ʻe he fakatahaʻanga Kalisitiane ʻi he ʻuluaki senitulí ʻa e lao ʻa Kalaisí?

¹⁴ Ki he lahi ʻa hono moʻuiʻaki ʻe hono kau mēmipá ʻa e lao ʻa Kalaisí, naʻe maʻu fiefia ai ʻe he muʻaki fakatahaʻanga Kalisitiané ha ʻatimosifia māfana, ʻofa, ʻataʻatā lahi ange mei he anga-kakahá, faifakamāú, mo e ngaahi tōʻonga mālualoi naʻe lahi fau ʻi he ngaahi sinakoke ʻo e taimi ko iá. Kuo pau pē naʻe ongoʻi moʻoni ʻe he kau mēmipa ʻo e ngaahi fakatahaʻanga foʻoú ni naʻa nau moʻui ʻo fakatatau ki he “lao tauʻataina”!

15. Ko e hā ʻa e niʻihi ʻo e muʻaki ngaahi feinga ʻa Sētane ke fakameleʻi ʻa e fakatahaʻanga Kalisitiané?

¹⁵ Kae kehe, naʻe vēkeveke ʻa Sētane ke ne fakameleʻi ʻa e fakatahaʻanga Kalisitiané mei loto, ʻo hangē pē ko ʻene fakameleʻi ʻa e puleʻanga ʻo ʻIsilelí. Naʻe fakatokanga ʻa e ʻaposetolo ko Paulá fekauʻaki mo e kau tangata hangē ha ulofí te nau “leaʻaki ʻa e ngaahi meʻa ʻoku ʻalu kehe” mo fakafeʻātungiaʻi ʻa e tākanga ʻa e ʻOtuá. (Ngāue 20:​29, 30) Naʻe pau ke ne fekuki mo e kau lotu faka-Siú, ʻa ia naʻa nau feinga ke fakafetongi ʻa e tauʻatāina lahi ange ʻo e lao ʻa Kalaisí ʻaki ʻa e fakapōpula ʻa e Lao ʻa Mōsesé, ʻa ē kuo fakahoko ʻia Kalaisí. (Mātiu 5:​17; Ngāue 15:1; Loma 10:4) ʻI he hili ʻa e mate ʻa e tokotaha fakamuimui taha ʻo e kau ʻaposetoló, naʻe ʻikai ke toe ʻi ai ha taʻotaʻofi fakafepaki ki he tafoki pehē mei he moʻoní. Ko ia ai, naʻe mafola noa pē ʻa e fakameleʻí.​—2 Tesalonaika 2:​6, 7.

Fakaʻuliʻi ʻe Puleʻanga-Haʻa-Kalisitiane ʻa e Lao ʻa Kalaisí

16, 17. (a) Ko e hā ʻa e ngaahi founga naʻe hoko ai ʻa e fakameleʻí ʻi Puleʻanga-Haʻa-Kalisitiané? (e) Naʻe anga-fēfē ʻa hono hanga ʻe he ngaahi lao ʻa e Siasi Katoliká ʻo poupouʻi ʻa hono mioʻi ʻa e fakakaukau fekauʻaki mo e fehokotaki fakasinó?

¹⁶ Hangē ko e lotu faka-Siú, naʻe lahi ange ʻi he founga ʻe tahá ʻa e hoko ʻa e fakameleʻí ʻi Puleʻanga-Haʻa-Kalisitiané. Naʻe tō mo ia ki he ngaahi tokāteline loí mo e ngaahi ʻulungaanga tākatuʻú. Pea ko ʻene ngaahi feinga ke maluʻi ʻa ʻene tākangá mei he ngaahi tākiekina mei tuʻá naʻe faʻa hoko ʻo mōlia atu ai ha meʻa pē naʻe toe mei he lotu maʻá. Naʻe tupu ʻo lahi ʻa e ngaahi lao anga-kakaha mo taʻefakatohitapú.

¹⁷ Kuo tuʻu-ki-muʻa ʻa e Siasi Katoliká ʻi hono fakatupu ʻa e ngaahi lao lahi fakaesiasí. Naʻe tautefito ki he ngaahi meʻa fekauʻaki mo e fehokotaki fakasinó naʻe mioʻi ai ʻa e ngaahi laó ni. Fakatatau ki he tohi ko e Sexuality and Catholicism, naʻe maʻu ʻe he siasí ʻa e fakakaukau fakafilōsefa faka-Kalisi ʻa e tui faka-Sitoikó, ʻa ia naʻe mahalo kovi ki he ngaahi founga kotoa ʻo e fakafiefiá. Naʻe hoko ai ʻa e siasí ʻo akoʻi ko e fiefia fakaefehokotaki fakasino kotoa pē, kau ai ʻa e fehokotaki fakasino totonu fakaemalí, ko e angahala ia. (Fepaki ia mo Palōvepi 5:​18, 19.) Naʻe taukaveʻi ko e fehokotaki fakasinó naʻe ʻai pē ia ki he fakafanaú, ʻikai ki ha toe meʻa kehe. Ko ia naʻe fakahalaiaʻi ʻe he laó ha faʻahinga founga pē ʻo e taʻofi-tuʻituʻiá ʻo pehē ko ha angahala mamafa ʻaupito ia, naʻe fiemaʻu ʻi he taimi ʻe niʻihi ʻa hono tautea fakamamahiʻi kita ʻi ha ngaahi taʻu lahi. ʻIkai ko ia pē, naʻe tapui ʻa e mali ʻa e kau pātelé, ko ha tuʻutuʻuni ia kuó ne fakatupunga lahi ʻa e fehokotaki fakasino taʻefakalaó, ʻo kau ai ʻa hono pāʻusiʻi ʻo e fānaú.​—1 Tīmote 4:​1-3.

18. Ko e hā naʻe iku ki ai ʻi he tupu ʻo lahi ʻa e ngaahi lao ʻa e siasí?

¹⁸ ʻI he tupu ʻo lahi ʻa e ngaahi lao ʻa e siasí, naʻe faʻu leva ia ʻi he ngaahi tohi. Naʻe kamata leva ke hanga ʻe he ngaahi meʻá ni ʻo fakaʻuliʻulilātaiʻi mo fetongi ʻa e Tohitapú. (Fakafehoanaki mo Mātiu 15:​3, 9.) Hangē pē ko e lotu faka-Siú, naʻe taʻefalala ʻa e lotu Katoliká ki he ngaahi tohi fakamāmaní mo fakamahalo ko e konga lahi ʻo iá ko ha fakamanamana ia kiate kinautolu. Naʻe vave ʻa e fakalaka atu ʻa e fakakaukaú ni ia mei he fakatokanga fakapotopoto ʻa e Tohitapú ʻi he meʻa ko iá. (Koheleti 12:12; Kolose 2:8) Naʻe kalanga ʻa Jerome, ko ha faʻutohi ʻa e siasí ʻi he senituli hono fā T.S., ʻo pehē: “ʻE ʻEiki, kapau te u toe maʻu ha ngaahi tohi fakamāmani, pe lau kinautolu, kuó u fakaʻikaiʻi koe.” ʻI he faai atu ʻa e taimí, naʻe fatongiaʻaki ʻe he siasí ʻa hono sivisiviʻi ʻo e ngaahi tohí​—ʻo aʻu ki he ngaahi tohi naʻe ʻi he ngaahi tuʻunga-lea faka-māmaní. Ko ia ai, naʻe valokiʻi ai ʻa Galileo ko ha ʻasitalōnoma ʻo e senituli hono taha fitú ʻi heʻene tohi ʻo pehē ʻoku takai ʻa e māmaní ki he laʻaá. Ko e tuʻukāivi ʻa e siasí ʻi he hoko ko e mafai aofangatuku ʻi he meʻa kotoa pē​—naʻa mo e ngaahi fehuʻi ʻi he ako fakaʻasitalōnomá​—naʻe faai mai pē ʻo ne keina ʻa e tui ki he Tohitapú.

19. Naʻe anga-fēfē ʻa e tokoni ʻa e ngaahi monasitelioó ki he anga-kakaha ʻa e tuʻunga fakaaoaó?

¹⁹ Naʻe lakalakaimonū ʻa e faʻu-tuʻutuʻuni ʻa e siasí ʻi he ngaahi monasiteliō, ʻa ia ʻoku fakamavaheʻi ai ʻe he kau mōniké ʻa kinautolu mei he māmani ko ʻení kae nofo ʻi he liʻaki-kitá. Ko e lahi taha ʻo e ngaahi monasiteliō ʻa e Katoliká ʻoku nau pīkitai ki he “Tuʻutuʻuni ʻa St. Penitiketo.” Ko e taki fakamonasiteliō (abbot, ko ha hingoa ia naʻe toʻo mei he foʻi lea faka-Alamea ki he “tamai”) naʻá ne pule ʻaki ʻa e mafai fakaʻaufuli. (Fakafehoanaki mo Mātiu 23:9.) Kapau naʻe maʻu ʻe ha mōnike ha meʻaʻofa mei heʻene mātuʻá, ko e taki fakamonasitelioó te ne fili pe ʻe maʻu ia ʻe he mōnike ko iá pe ko ha niʻihi kehe. Tukukehe hono fakahalaiaʻi ʻa e ngaahi anga-pangó ko e tuʻutuʻuni ʻe taha naʻe tapui ai ʻa e talanoa kotoa ʻoku ʻikai mahuʻingá pea mo e ngaahi fakakatá, ʻo pehē: “Heʻikai ke leaʻaki ʻe ha ākonga ha ngaahi meʻa pehē.”

20. Ko e hā ʻokú ne fakahaaʻi naʻe toe poto ʻaupito ʻa e tui faka-Palotisaní ʻi hono ohi ʻa e tuʻunga fakaaoao taʻefakatohitapú?

²⁰ Ko e tui faka-Palotisaní, ʻa ia naʻe feinga ke toe fakaleleiʻi ʻa e ngaahi fakalahi meʻa taʻefakatohitapu ʻa e lotu Katoliká, naʻe vave ʻa ʻene hoko ʻo poto tatau ʻaupito ʻi hono faʻu ʻa e ngaahi tuʻutuʻuni fakaaoaó ʻo ʻikai makatuʻunga ʻi he lao ʻa Kalaisí. Hangē ko ʻení, ko e taki fakalelei lotu ko ia ko John Calvin naʻe hoko ʻo ui “ko e tokotaha-faʻu-lao ʻo e Siasi fakaleleiʻí.” Naʻá ne puleʻi ʻa Siniva ʻaki ha ngaahi tuʻutuʻuni anga-fefeka mo lahi naʻe fakahoko ʻe he “Kau Mātuʻa” ʻa ia ko honau “lakangá,” naʻe pehē ʻe Calvin, “ko hono tokangaʻi ʻa e moʻui ʻa e tokotaha kotoa pē.” (Fepaki ia mo 2 Kolinitō 2:​2, [1:​24, PM].) Naʻe puleʻi ʻe he siasí ʻa e ngaahi fale kavá mo puleʻi pe ko e fē ʻa e ngaahi tuʻunga-lea naʻe ʻatā ke fetalanoaʻaki aí. Naʻe ʻi ai ʻa e ngaahi tautea mamafa ki he ngaahi hia hangē ko e hiva ʻi he ngaahi hiva launoá pe tauʻolungá.b

Ako mei he Fehālaaki ʻa Puleʻanga-Haʻa-Kalisitiané

21. Ko e hā kuo hoko ko e ngaahi nunuʻa fakalūkufua ia ʻo e hehema ʻa Puleʻanga-Haʻa-Kalisitiane ke “hulu atu ʻi he meʻa kuo tohi”?

²¹ Kuo ngāue ke maluʻi ʻe he ngaahi tuʻutuʻuni mo e ngaahi lao kotoa ko ʻení ʻa Puleʻanga-Haʻa-Kalisitiane mei hono fakameleʻí? ʻOku kehe ʻaupito ia mei ai! Kuo mavahevahe ʻa Puleʻanga-Haʻa-Kalisitiane he ʻahó ni ki he ngaahi siasi ʻe laui teau, ʻo lele pē mei he fakafefekaʻi ʻo fuʻu tōtuʻá ki he fakaʻatā tavalé. Ko kinautolu kotoa, ʻi he founga ko ē pe ko ē, kuo nau “hulu atu ʻi he meʻa kuo tohi,” ʻo fakaʻatā ʻa e fakakaukau fakaetangatá ke ne puleʻi ʻa e tākangá mo kaunoa ʻi he lao fakaʻotuá.​—1 Kolinitō 4:6.

22. Ko e hā heʻikai hoko ai ʻa e mavahe ia ʻa Puleʻanga-Haʻa-Kalisitiané ke pehē ko e ngataʻanga ia ʻo e lao ʻa Kalaisí?

²² Kae kehe, ko e hisitōlia ʻo e lao ʻa Kalaisí ʻoku ʻikai ha meʻa fakamamahi ai. ʻE ʻikai ʻaupito ke fakaʻatā ʻe he ʻOtua ko Sihová ha tangata pē ke ne toʻo atu ʻa e lao fakaʻotuá. ʻOku mātuʻaki mālohi ʻaupito ʻa e lao faka-Kalisitiané he ʻahó ni ʻi he lotolotonga ʻo e kau Kalisitiane moʻoní, pea kuo maʻu ʻe he faʻahingá ni ʻa e monū lahi ʻo e moʻuiʻaki iá. Ka ʻi he hili ʻa hono sivisiviʻi ʻa e meʻa kuo fai ʻe he lotu faka-Siú mo e Puleʻanga-Haʻa-Kalisitiané ki he lao fakaʻotuá, ʻoku lelei nai ke tau fifili, ‘ʻOku anga-fēfē ʻetau moʻuiʻaki ʻa e lao ʻa Kalaisí ʻi he lolotonga ʻo e fakaʻehiʻehi mei he tauhele ko hono ʻuliʻi ʻa e Folofola ʻa e ʻOtuá ʻaki ʻa e fakakaukau mo e ngaahi tuʻutuʻuni fakaetangatá ʻa ia ʻoku keina ai ʻa e laumālie ʻo e lao fakaʻotuá? Ko e hā ʻa e fakakaukau mafamafatatau ʻoku totonu ke fokotuʻu ʻe he lao ʻa Kalaisí ʻiate kitautolu ʻi he ʻaho ní?’ ʻE lāulea ʻi he kupu hono hoko maí ki he ongo fehuʻí ni.

[Fakamatala ʻi lalo]

Ko e Hā Haʻo Tali?

◻ Ko e hā ʻa e ʻelito ʻo e lao ʻa Kalaisí?

◻ Naʻe anga-fēfē ʻa e kehe ʻa e founga faiako ia ʻa Sīsuú mei he kau Fālesí?

◻ Naʻe anga-fēfē ʻa hono ngāueʻaki ʻe Sētane ha laumālie faʻu-lao anga-kakaha ke fakameleʻi ʻaki ʻa Puleʻanga-Haʻa-Kalisitiané?

◻ Ko e hā ʻa e ngaahi ola lelei ʻo e moʻuiʻaki ʻa e lao ʻa Kalaisí?

[Fakatātā ʻi he peesi 23]

Naʻe ngāueʻaki ʻe Sīsū ʻa e Lao ʻa Mōsesé ʻi he anga-fakaʻatuʻi mo e meesi