Ko Sihova ʻa Hotau ʻEiki Haú!

“Kuo tuʻu ʻeku hufanga ʻia Atonai [“ʻEiki Hau,” NW] Sihova.”—SĀME 73:28.

 1. ʻI heʻene lea naʻe hiki ʻi he 1 Kolinito 7:31, ʻoku hā mahino naʻe fakahuʻunga ai ʻa Paula ki he hā?

“KUO kamata liliu ʻa e anga [“tuʻunga,”NW] ʻo e maama ko eni.” Ko e lau ia ʻa e ʻapositolo ko Paulá. (1 Kol. 7:31) ʻOku hā mahino, naʻá ne fakatatau ʻa e māmaní ki ha siteisi, fakataha mo e kau faiva ʻi ha tulama ʻoku nau fakatātaaʻi ʻenau kongá ko e faʻahinga lelei pe kovi kae ʻoua kuo liliu ʻa e ngaahi tuʻungá.

2, 3. (a) Ko e hā ʻe lava ke fakahoa ki ai ʻa e pole ki he tuʻunga-hau ʻo Sihová? (e) Ko e hā e ngaahi fehuʻi te tau lāulea ki aí?

² ʻI he ʻahó ni, ʻoku fakahoko ai ha tulama mātuʻaki mahuʻinga ʻaupito—pea ʻoku kaunga kia koe! ʻOku felāveʻi tautefito ia mo hono fakatonuhiaʻi ʻa e tuʻunga-hau ʻo e ʻOtua ko Sihová. Ko e tulamá ni ʻe lava ke fakatātaaʻi ia ʻi ha tuʻunga ʻoku hoko nai ʻi ha fonua pau. ʻI he tafaʻaki ʻe tahá, ʻoku ʻi ai ʻa e puleʻanga kuo fokotuʻu lelei ʻo tauhi maʻu ai ʻa e māú. ʻI he tafaʻaki ʻe tahá, ʻoku ʻi ai ha kautaha faihia ʻoku puleʻi ʻaki ʻa e kākaá, fakamālohí mo e fakapoó. Ko e kautaha taʻefakalaó ko ha pole ia ki he tuʻunga-pule haú pea ʻoku ʻahiʻahiʻi ai ʻa e mateaki ʻa e tangataʻifonua kotoa ki honau puleʻangá.

³ ʻOku hoko ha tuʻunga meimei tatau ʻi ha tuʻunga fakaeʻuniveesi. ʻOku ʻi ai ʻa e puleʻanga kuo fokotuʻu fakalao ʻo “Atonai [“ʻEiki Hau,” NW] Sihova.” (Sāme 71:5) Ka ko e faʻahinga ʻo e tangatá ʻoku fakamanamanaʻi ia he taimí ni ʻe ha kautaha faihia ʻoku taki ai ʻa e “Fili.” (1 Sione 5:19) ʻOku ʻomai ai ha pole ki he puleʻanga kuo fokotuʻu lelei ʻo e ʻOtuá pea ʻahiʻahiʻi ai ʻa e mateaki ʻa e kakai kotoa ki hono tuʻunga-pule haú. Naʻe anga-fēfē ʻa e hoko ʻa e tuʻunga ko ení? Ko e hā ʻoku fakaʻatā ai ia ʻe he ʻOtuá? Ko e hā ʻe lava ke tau fai fekauʻaki mo ia ʻi hotau tuʻunga tāutahá?

Ngaahi Tafaʻaki ʻo e Tulamá

 4. Ko hono fakaeʻa ʻo e tulama fakaeʻunivēsí ʻoku kau ai ʻa e ongo ʻīsiu ʻe ua ʻokú na felāveʻiʻaki ko e hā?

⁴ Ko e tulama fakaeʻuniveesi ko eni ʻoku fakaeʻá ʻoku kau ki ai ʻa e ongo ʻīsiu ʻokú na felāveʻiʻaki: Ko e tuʻunga-hau ʻo Sihová mo e anga-tonu ʻa e tangatá. ʻI he Tohi Tapú, ʻoku faʻa ui ai ʻa Sihova ko e ‘ʻEiki Hau.’ Hangē ko ení, ʻi he falala kakato kiate iá, naʻe hiva ʻa e tokotaha-tohi-sāmé: ‘Kuo tuʻu ʻeku hufangá ʻi he ʻEiki Hau ko Sihová.’ (Sāme 73:28) Ko e “tuʻunga-haú” ko e aoniu ia ʻi he mafaí pe tuʻunga-pulé. ʻOku fakahoko ʻe ha hau ʻa e tuʻunga mafai aoniu. ʻOku ʻi ai e ngaahi ʻuhinga lelei ki he vakai ki he ʻOtua ko Sihová ko e Tokotaha Aoniú—Tan. 7:22.

 5. Ko e hā ʻoku totonu ai ke ueʻi kitautolu ke tau pouaki ʻa e tuʻunga-hau ʻo Sihová?

⁵ ʻI hono tuʻunga ko e Tokotaha-Fakatupú, ko Sihova ko e ʻOtuá ʻa e Hau ʻo e māmaní mo e ʻunivēsí fakakātoa. (Lau ʻa e Fakahā 4:11.) Ko Sihova foki ʻa hotau Fakamāú, Tokotaha-Faʻu-Laó, mo e Tuʻí, he ʻiate ia tonu ʻokú ne fakatahatahaʻi ʻa e ngaahi vaʻa fakaefakamaau, faʻu-lao mo fakahoko-lao ʻo e puleʻanga fakaeʻunivēsí. (Ai. 33:22) Koeʻuhi ʻoku tau moʻuaʻaki ʻetau ʻi aí tonu ki he ʻOtuá pea fakafalala kiate ia, ʻoku totonu ke tau vakai ki ai ko hotau ʻEiki Hau. ʻE ueʻi kitautolu ke pouaki ʻa hono tuʻunga māʻolungá kapau ʻoku tau manatuʻi maʻu pē “kuo fokotuʻu ʻe Sihova hono taloni ʻi he ngaahi langi na; pea ʻoku pule ʻe hono puleʻanga ki he meʻa kotoa.”—Sāme 103:19; Ngāue 4:24.

 6. Ko e hā ʻa e anga-tonu?

⁶ Ke poupouʻi ʻa e tuʻunga-hau ʻo Sihová, kuo pau ke tau tauhi maʻu ʻetau anga-tonu kiate iá. Ko e “anga-tonú” ko ha tuʻunga lelei pe kakato fakaeʻulungaanga. Ko ha tokotaha tauhi anga-tonu ko e tokotaha ia ʻoku taʻemele mo faitotonu. Ko e pēteliake ko Siopé ko ha tangata pehē ia.—Siope 1:1.

Founga ʻo e Kamata ʻa e Tulamá

7, 8. Naʻe anga-fēfē hono poleʻi ʻe Sētane ʻa e totonu ʻo e tuʻunga-hau ʻo Sihová?

⁷ ʻI he taʻu nai ʻe 6,000 kuohilí, naʻe poleʻi ai ʻe ha meʻamoʻui laumālie ʻa e totonu ʻo e tuʻunga-hau ʻo Sihová. Ko ha holi siokita ke fai kiate ia ʻa e lotú naʻe tupu mei ai ʻa e ngaahi lea mo e tōʻonga ʻa e tokotaha angatuʻu ko iá. Naʻá ne fakaʻaiʻai ʻa e ʻuluaki ongo meʻa fakaetangatá, ʻa ʻĀtama mo ʻIvi, ke na hoko ʻo taʻemateaki ki he tuʻunga-hau fakaʻotuá pea feinga ke fakameleʻi ʻa e huafa ʻo Sihová ʻaki hono taukaveʻi kuó Ne loi. (Lau ʻa e Senesi 3:1-5.) Naʻe hoko ʻa e tokotaha angatuʻú ko e Fili lahi, ko Sētane (Tokotaha-Talitekeʻi), Tēvolo (Tokotaha Lauʻikovi Loi), ngata (tokotaha kākā), mo e talākoni (tokotaha-toʻinevea).—Fkh. 12:9.

⁸ Naʻe fokotuʻu ʻe Sētane ʻa ia tonu ko ha pule fakafeʻauhi. ʻI he fehangahangai mo e pole ko ení, ko e hā ʻe fai ʻe he ʻEiki Hau ko Sihová? Te ne fakaʻauha he taimi pē ko iá ʻa e kau angatuʻu ʻe toko tolú—ʻa Sētane, ʻĀtama, mo ʻIvi? Naʻá ne maʻu moʻoni ʻa e mālohi ke fai ia, pea ko e foʻi ngāue ko iá naʻe mei fakaleleiʻi ai ʻa e fehuʻi pe ko hai naʻá ne maʻu ʻa e mafai aoniú. Naʻe mei toe fakamoʻoniʻi ai kuo tala ʻe Sihova ʻa e moʻoni fekauʻaki mo e tautea ki hono maumauʻi ʻo ʻene laó. Ko e hā naʻe ʻikai fai ai ʻe he ʻOtuá ʻa e foʻi ngāue ko iá?

 9. Ko e hā naʻe fehuʻia ʻe Sētané?

⁹ ʻI he loi pea fakatafokiʻi ʻa ʻĀtama mo ʻIvi mei he ʻOtuá, naʻe fehuʻia ai ʻe Sētane ʻa e totonu ʻa Sihova ke ne fiemaʻu ʻa e talangofua ʻa e faʻahinga ʻo e tangatá. ʻIkai ngata aí, ʻi hono fakaʻaiʻai ʻa e ʻuluaki ongo meʻa fakaetangatá ke na talangataʻa ki he ʻOtuá, naʻe toe fehuʻia ai ʻe Sētane ʻa e mateaki ʻa e meʻamoʻui ʻatamai poto kotoa. Hangē ko ia naʻe fakaeʻa ʻi he tuʻunga ʻo Siopé, ʻa ia naʻá ne mateaki ki he tuʻunga-hau ʻo Sihová, naʻe taukaveʻi ʻe Sētane ʻe lava ke ne fakatafokiʻi ʻa e faʻahinga kotoa ʻo e tangatá mei he ʻOtuá.—Siope 2:1-5.

10. ʻI hono toloiʻi hono fakapapauʻi ʻa hono tuʻunga-haú, ko e hā kuo fakaʻatā ʻe he ʻOtuá?

¹⁰ ʻI hono toloiʻi hono fakapapauʻi ʻa hono tuʻunga-haú, kuo fakaʻatā ai ʻe Sihova kia Sētane ʻa e taimi ke fakamoʻoniʻi ai ʻa ʻene taukavé. Kuo toe ʻoange ʻe he ʻOtuá ki he faʻahinga ʻo e tangatá ʻa e faingamālie ke fakahāhā ai ʻenau mateaki ki hono tuʻunga-haú. Ko e hā kuo hoko ʻi he faai mai ʻa e ngaahi senitulí? Kuo langa ʻe Sētane ha kautaha faihia mālohi. ʻE iku pē ʻo fakaʻauha ia ʻe Sihova fakataha mo e Tēvoló, ʻo ʻoatu ai ʻa e fakamoʻoni lahi faufaua ki he totonu ʻo e tuʻunga-hau ʻo e ʻOtuá. Naʻe mātuʻaki fakapapauʻi ʻe he ʻOtua ko Sihová ha ola lelei ʻo ne tomuʻa tala ia ʻi he hoko ʻa e angatuʻu ʻi ʻĪtení.—Sen. 3:15.

11. Ko e hā kuo fai ʻe he faʻahinga tokolahi ʻo e tangatá fekauʻaki mo e tuʻunga-hau ʻo Sihová?

¹¹ Ko e faʻahinga tokolahi ʻo e tangatá kuo nau ngāueʻi ʻa e tuí pea tauhi maʻu ʻenau anga-tonú ʻi he fekauʻaki mo e tuʻunga-hau ʻo Sihová mo hono fakatonuhiaʻi hono huafá. ʻOku kau ʻi honau tokolahí ʻa ʻĒpeli, ʻĪnoke, Noa, ʻĒpalahame, Sela, Mōsese, Lute, Tēvita, Sīsū, ko e muʻaki kau ākonga ʻa Kalaisí, mo e laui miliona ʻo e kau tauhi anga-tonu he ʻaho ní. Ko e kau pouaki pehē ʻo e tuʻunga-hau fakaʻotuá ʻoku nau kau ʻi hono fakamoʻoniʻi ko Sētané ko ha tokotaha loi pea ʻi hono fakaʻataʻatā ʻa e huafa ʻo Sihová mei he luma kuo fokotuʻuna ki ai ʻe he Tēvoló ʻaki ʻene pōlepole ʻo pehē ʻe lava ke ne fakatafokiʻi ʻa e faʻahinga kotoa ʻo e tangatá mei he ʻOtuá.—Pal. 27:11.

Ko e Olá ʻOku Papau

12. ʻOku lava fēfē ke tau fakapapauʻi ko e ʻOtuá heʻikai te ne kātakiʻi ai pē ʻo taʻengata ʻa e fulikivanú?

¹² ʻOku lava ke tau fakapapauʻi kuo vavé ni ke fakapapauʻi ʻe Sihova ʻa hono tuʻunga-haú. Heʻikai te ne makātakiʻi ai pē ʻo taʻengata ʻa e fulikivanú, pea ʻoku tau ʻiloʻi ʻoku tau moʻui ʻi he ngaahi ʻaho fakaʻosí. Naʻe fai ʻe Sihova ʻa e meʻa ki he fulikivanú lolotonga ʻa e Lōmakí. Naʻá ne fakaʻauha ʻa Sōtoma mo Komola pea mo Felo mo ʻene ngaahi kongakaú. Ko Sīsela mo ʻene kau taú mo Senakalipe mo ʻene ngaahi kongakau ʻAsīliá naʻe ʻikai te nau vāvātatau mo e Fungani Māʻolungá. (Sen. 7:1, 23; 19:24, 25; Eki. 14:30, 31; Fkm. 4:15, 16; 2 Tuʻi 19:35, 36) Ko ia ʻoku lava ai ke tau tuipau ko e ʻOtua ko Sihová heʻikai te ne kātakiʻi ai pē ʻo taʻengata ʻa e taʻefakaʻapaʻapa ki hono huafá mo hono ngaohikovia ʻo ʻene Kau Fakamoʻoní. ʻIkai ko ia pē, ʻoku tau sio he taimí ni ki he fakamoʻoni ʻo e fakaʻilonga ʻo e ʻi ai ʻa Sīsuú mo e fakaʻosiʻosi ʻo e fokotuʻutuʻu fulikivanu ko ení.—Mt. 24:3.

13. ʻE lava fēfē ke tau hao mei hono fakaʻauha fakataha mo e ngaahi fili ʻo Sihová?

¹³ Ke hao mei hono fakaʻauha fakataha mo e ngaahi fili ʻo e ʻOtuá, kuo pau ke tau fakamoʻoniʻi ʻoku tau mateaki ki he tuʻunga-hau ʻo Sihová. ʻE lava fēfē ke tau fai pehē? ʻAki ʻa e hanganaki mavahe mei he pule faihia ʻa Sētané pea fakafisi ke ʻoua naʻa fakailifiaʻi ʻe hono kau fakafofongá. (Ai. 52:11; Sione 17:16; Ng. 5:29) Ko e malumalu pē ʻo e ngaahi tuʻunga ko iá ʻe lava ke tau pouaki ai ʻa e tuʻunga-hau ʻo ʻetau Tamai fakahēvaní pea maʻu ʻa e ʻamanaki ʻo e hoko ʻo hao ʻi he taimi ʻe fakaʻataʻatā ai ʻe Sihova ʻa hono huafá mei he lumá pea fakahāhā ko ia ʻa e Hau Fakalevelevá.

14. Ko e hā ʻoku fakaeʻa ʻi he ngaahi konga kehekehe ʻo e Tohi Tapú?

¹⁴ Ko e ngaahi fakaikiiki fekauʻaki mo e faʻahinga ʻo e tangatá mo e tuʻunga-hau ʻo Sihová ʻoku ʻomai ia ʻi he kotoa ʻo e Tohi Tapú. Ko e ʻuluaki ngaahi vahe ʻe tolú ʻoku tala mai ai kia kitautolu fekauʻaki mo e fakatupú mo e tō ʻa e tangatá ki he angahalá, lolotonga ia ko e tolu fakamuimuí ʻoku fekauʻaki ia mo e fakaakeake ʻa e faʻahinga ʻo e tangatá. Ko e ngaahi peesi ʻi loto aí ʻoku ʻomai ai ʻa e ngaahi fakaikiiki fekauʻaki mo e ngaahi sitepu naʻe fou ai ʻa e ʻEiki Hau ko Sihová ke fakahoko ʻa ʻene taumuʻa ki he faʻahinga ʻo e tangatá, ko e māmaní pea mo e ʻunivēsí. ʻOku fakahaaʻi ʻi he Senesí ʻa e founga naʻe hū mai ai ʻa Sētane mo e fulikivanú ki he māmaní, pea ko e konga fakaʻosi ʻo e Fakahaá ʻoku fakaeʻa ai ʻa e founga ʻe fakangata ʻosi ai ʻa e koví, ko e Tēvoló ʻe fakaʻauha, pea ko e finangalo ʻo e ʻOtuá ʻe fai ia ʻi he māmaní ʻo hangē ko ia ʻi hēvaní. Ko e moʻoni, ʻoku fakaeʻa ʻe he Tohi Tapú ʻa e tupuʻanga ʻo e angahalá mo e maté pea fakahaaʻi ʻa e founga ʻe toʻo ai ia mei he tuʻunga ʻo e māmaní pea fetongiʻaki ʻa e fiefia taʻehanongataʻanga mo e moʻui taʻengata ki he kau tauhi anga-tonú.

15. Ke maʻu ʻaonga fakafoʻituitui ʻi he taimi ʻe ngata ai ʻa e tulama fekauʻaki mo e tuʻunga-haú, ko e hā kuo pau ke tau faí?

¹⁵ Kuo vavé ni ke liliu fakaʻaufuli ʻa e tuʻunga ʻo e māmani ko ení. Ko e puipuí ʻe tuku hifo ia ʻi he tulama fekauʻaki mo e tuʻunga-haú kuo laui senituli hono motuʻá. ʻE toʻo ʻa Sētane mei he siteisí, ʻo huʻu atu ki heʻene ngalo fakaʻaufuli, pea ko e finangalo ʻo e ʻOtuá ʻe lakalakaimonū moʻoni. Ka ke maʻu ʻaonga mei he meʻá ni pea maʻu ʻa e ngaahi tāpuaki lahi naʻe tomuʻa tala ʻi he Folofola ʻa e ʻOtuá, kuo pau ke tau pouaki ʻa e tuʻunga-hau ʻo Sihová he taimí ni. Heʻikai lava ke tau heka funga ʻā. Ke malava ʻo pehē: “ʻOku ʻiate au ʻa Sihova,” kuo pau ke tau nofo maʻu ʻi hono tafaʻakí.—Sāme 118:6, 7.

ʻE Lava Ke Tau Tauhi Maʻu ʻa e Anga-Tonú!

16. Ko e hā ʻoku lava ai ke tau fakapapauʻi ʻe malava ke tauhi maʻu ʻe he faʻahinga ʻo e tangatá ʻa e anga-tonu ki he ʻOtuá?

¹⁶ ʻE lava ke tau pouaki ʻa e tuʻunga-hau ʻo Sihová pea tauhi maʻu ʻetau anga-tonú, he naʻe tohi ʻe he ʻapositolo ko Paulá: “Kuo teʻeki ke moʻua kimoutolu ʻe ha faʻahinga ʻahiʻahi ʻoku taʻehoa mo e tangata: pea ko e ʻOtua ko e toko taha ʻoku fai ki heʻene lea, pea ʻe ʻikai te ne fakangofua ke ʻahiʻahiʻi kimoutolu ʻo makehe atu ʻi hoʻomou mafai; kae kehe, te ne ngaohi fakataha mo e ʻahiʻahi hono haoʻanga foki mei ai, koeʻuhi ke lava hono katakiʻi.” (1 Kol. 10:13) Ko e hā ʻa e matavai ʻo e ʻahiʻahí naʻe lave ki ai ʻa Paulá, pea ʻoku anga-fēfē hono hanga ʻe he ʻOtuá ʻo ʻomai hotau haoʻangá?

17-19. (a) Ko e hā ʻa e ʻahiʻahi naʻe tō ki ai ʻa e kau ʻIsileli ʻi he toafá? (e) Ko e hā ʻoku malava ai ke tau tauhi maʻu ʻetau anga-tonu kia Sihová?

¹⁷ Hangē ko ia naʻe fakatātaaʻi ʻe he ngaahi hokosia ʻa ʻIsileli ʻi he toafá, ko e “ʻahiʻahi” ʻoku hoko mai ia fakafou he ngaahi tuʻunga ʻa ia ʻe lava ke ne fakaʻaiʻai kitautolu ke maumauʻi ʻa e lao ʻa e ʻOtuá. (Lau ʻa e 1 Kolinito 10:6-10.) Ko e kau ʻIsilelí naʻe mei lava ke nau talitekeʻi ʻa e ʻahiʻahí, ka naʻa nau holi ki he “kovi” ʻi he taimi naʻe ʻomai fakaemana ai ʻe Sihova ha tokonaki ʻi ha māhina ʻo e fanga kueili maʻanautolu. Neongo naʻe ʻikai ha kakanoʻi manu ʻa e kakaí ʻi ha taimi, ne ʻoange ʻe he ʻOtuá kia kinautolu ha mana feʻunga ke nau kai. Neongo ia, naʻa nau tō ki he ʻahiʻahi ʻo e ʻulutukua ki he havala taʻemataʻofi ʻi he taimi naʻa nau tānaki ai ʻa e kueilí.—Nom. 11:19, 20, 31-35.

¹⁸ Ki muʻa ai, lolotonga hono tali ʻe Mōsese ʻa e Laó ʻi Moʻunga Sainaí, naʻe hoko ai ʻa e kau ʻIsilelí ko e kau tauhi ʻaitoli, ʻi heʻenau kau ʻi he lotu ki he kiʻi pulú mo e ngaahi holi fakakakanó. Ko e ʻikai ʻi ai honau taki hāmaí naʻe ʻuhinga iá naʻe ʻikai mapuleʻi ʻa e ʻahiʻahí. (Eki. 32:1, 6) Ki muʻa pē ʻi he hū ki he Fonua ʻo e Talaʻofá, ko e laui afe ʻo e kau ʻIsilelí naʻe fakataueleʻi kinautolu ʻe he kakai fefine Mōapé, ʻa ia naʻa nau fai ʻa e ʻulungaanga taʻetaau fakaefehokotaki fakasino mo kinautolu. ʻI he taimi ko iá, naʻe mate ai ʻa e laui afe ʻo e kau ʻIsilelí ʻi heʻenau angahalá. (Nom. 25:1) ʻI he taimi ʻe niʻihi, ko e kakai ʻo ʻIsilelí naʻa nau tō ki he ʻahiʻahi ke lāunga ʻi he angatuʻu, ʻo lea fakafepaki he taimi ʻe taha kia Mōsese pea pehē ki he ʻOtuá tonu! (Nom. 21:5) Ko e kakai ʻo ʻIsilelí naʻe aʻu ʻo nau lāunga, hili ʻa e fakaʻauha ʻo e kau fulikivanu ko Kola, Tētani, ʻApilami mo honau ngaahi kaungāfeohí, ʻi he fakaʻuhinga hala naʻe taʻetotonu ʻa hono tautea ʻo e kau angatuʻú. Ko hono olá, naʻe ʻauha ai ʻa e kau ʻIsileli ʻe toko 14,700 mei ha mala mei he ʻOtuá.—Nom. 16:41, 49.

¹⁹ ʻOku halaʻatā ha taha ʻo e ngaahi ʻahiʻahi naʻe toki ʻosi fai e lave ki aí ne ʻi ha faʻahinga natula naʻe ʻikai mei malava ke talitekeʻi ʻe he kau ʻIsileli. Naʻe ʻulutukua ʻa e kakaí ki he ʻahiʻahí koeʻuhi ne mole ʻenau tuí pea ngalo ʻa Sihova, ko ʻene tokanga ʻofa kia kinautolú, pea mo e totonu ʻo ʻene ngaahi foungá. Hangē ko ia ʻi he tuʻunga ʻo e kau ʻIsilelí, ko e ngaahi ʻahiʻahi ʻoku tau fehangahangai mo iá ʻoku hokosia anga-maheni ia ʻe he faʻahinga ʻo e tangatá. Kapau ʻoku tau fai ʻa e feinga ʻoku fiemaʻú ke talitekeʻi ia pea falala ki he ʻOtuá ke ne tokoniʻi kitautolu, ʻe lava ke tau tauhi maʻu ʻetau anga-tonú. ʻOku lava ke tau tuipau ki he meʻá ni koeʻuhí “ko e ʻOtua ko e toko taha ʻoku fai ki heʻene lea” pea ʻoku ʻikai te ne fakaʻatā kitautolu ke ‘ʻahiʻahiʻi ʻo makehe atu ʻi heʻetau mafai.’ Heʻikai ʻaupito liʻaki kitautolu ʻe Sihova ʻo aʻu ki ha tuʻunga ʻo hono fakaʻatā kitautolu ke tau hoko ki ha ngaahi tuʻunga ʻe ʻai ai ke taʻemalava ʻe he tangatá ke fai hono finangaló.—Sāme 94:14.

20, 21. ʻI he taimi ʻoku ʻahiʻahiʻi ai kitautolú, ʻoku anga-fēfē hono ʻai ʻe he ʻOtuá ʻa e “haoʻanga”?

²⁰ ʻI hono fakaivimālohiʻi kitautolu ke talitekeʻi ʻa e ʻahiʻahí, ʻoku ʻai ʻe Sihova ʻa e “haoʻanga.” Ko e fakatātaá, ʻe fakavaivaiʻi nai ʻe he kau fakatangá kitautolu ʻi hano ngaohikoviʻi fakaesino ʻi ha feinga ke ʻai ke tau liʻaki ʻetau tuí. Ko e tōʻongafai peheé ʻe ʻahiʻahiʻi nai ai kitautolu ke tau fakangaloku koeʻuhi ke hao ai mei ha toe haha, fakamamahiʻi, pe naʻa mo e mate. Kae kehe, makatuʻunga ʻi he lēkooti fakamānavaʻi ʻo e fakafiemālie ʻa Paula ʻi he 1 Kolinito 10:13, ʻoku tau ʻiloʻi ko e tuʻunga ʻokú ne fakatupunga ʻa e ʻahiʻahí ʻoku fakataimi pē. Heʻikai fakaʻatā ia ʻe Sihova ke tupulekina ʻo aʻu ki he tuʻunga ʻa ia heʻikai lava ke tau faitōnunga ai pē kiate ia. Ko e ʻOtuá ʻe lava ke ne fakaivimālohiʻi ʻetau tuí pea ʻomai kia kitautolu ʻa e mālohi fakalaumālie ʻoku tau fiemaʻú koeʻuhi ke tauhi maʻu ʻa e anga-tonú.

²¹ ʻOku fakaivimālohiʻi kitautolu ʻe Sihova fakafou ʻi hono laumālie māʻoniʻoní. Ko e laumālie ko iá ʻokú ne toe fakamanatu mai ʻa e ngaahi fakakaukau Fakatohitapu ʻoku tau fiemaʻú koeʻuhi ke talitekeʻi ʻa e ʻahiʻahí. (Sione 14:26) Ko ia ai, ʻoku ʻikai kākaaʻi kitautolu ke muimui ki ha ʻalunga hala. Hangē ko ení, ʻoku tau mahinoʻi ʻa e ngaahi ʻīsiu felāveʻi mo e tuʻunga-hau ʻo Sihová pea mo e anga-tonu ʻa e tangatá. ʻAki ʻa e ʻilo ko iá, kuo fakaivimālohiʻi ai ʻa e tokolahi ʻe he ʻOtuá ke nau faitōnunga ai pē ʻo aʻu ki he mate. Ka naʻe ʻikai ko e maté naʻá ne ʻai ke ʻi ai honau haoʻangá; ko e tokoni ʻa Sihová naʻá ne ʻai ke nau malava ʻo kātaki ʻo aʻu ki he ngataʻangá ʻo ʻikai ʻulutukua ki he ʻahiʻahí. ʻOku lava ke ne fai ʻa e meʻa tatau kia kitautolu. Ko hono moʻoní, ʻokú ne toe ngāueʻaki ʻa ʻene kau ʻāngelo faitōnungá koeʻuhi ko kitautolu ʻi he tuʻunga ko ʻene kau sevāniti toputapu “ʻoku kouna atu ke fai ha lakanga, koeʻuhi ko kinautolu te nau hokosi ʻa e fakamoʻui.” (Hep. 1:14) Hangē ko ia ʻoku fakahaaʻi ʻi he kupu hokó, ko e kau tauhi anga-tonú pē ʻe lava ke nau ʻamanaki ke maʻu ʻa e monū fakafiefia ʻo hono pouaki ʻo e tuʻunga-hau ʻo e ʻOtuá ʻo taʻengata. ʻE lava ke tau ʻi honau lotolotongá kapau ʻoku tau pipiki kia Sihova ʻi he tuʻunga ko hotau ʻEiki Hau.

ʻE Fēfē Haʻo Tali?

• Ko e hā ʻoku totonu ai ke tau ʻiloʻi ko Sihova ʻa hotau ʻEiki Haú?

• ʻOku ʻuhinga ki he hā ʻa e tauhi maʻu ʻetau anga-tonu ki he ʻOtuá?

• ʻOku anga-fēfē ʻetau ʻiloʻi kuo vavé ni ke fakapapauʻi ʻe Sihova ʻa hono tuʻunga-haú?

• ʻI he vakai ki he 1 Kolinito 10:13, ko e hā ʻoku malava ai ke tauhi maʻu ʻa e anga-tonú?

[Fakatātā ʻi he peesi 24]

Naʻe fakaʻaiʻai ʻe Sētane ʻa ʻĀtama mo ʻIvi ke na hoko ʻo taʻemateaki kia Sihova

[Fakatātā ʻi he peesi 26]

Fakapapauʻi ke pouaki ʻa e tuʻunga-hau ʻo Sihová