Ko e Hā ʻa e Faʻahinga Laumālie ʻOkú Ke Fakahāhaá?

“Fakatauange ke hoko ʻa e ʻofa maʻataʻatā ʻa e ʻEiki ko Sīsū Kalaisí ʻo ʻi he laumālie ʻoku mou fakahāhaá.”—FLM. 25.

ʻE LAVA KE KE TALI?

Ko e hā ʻoku tau loto ai ke tokanga ki he laumālie ʻoku tau fakahāhaá?

Ko e hā ʻa e faʻahinga fakakaukau ʻoku tau loto ke fakaʻehiʻehi mei aí, pea ʻe lava fēfē ke tau fai pehē?

Ko e hā ʻe lava ke tau fai ke fakahāhā ai ha laumālie fakatupu langa hake ʻi he fakatahaʻangá?

 1. Ko e hā e ʻamanaki naʻe fakahāhā ʻe Paula ʻi heʻene tohi ki he ngaahi kaungātuí?

ʻI HEʻENE tohi ki he ngaahi kaungātuí, naʻe toutou fakahaaʻi ai ʻe he ʻapositolo ko Paulá ʻene ʻamanaki ke tali ʻe he ʻOtuá mo Kalaisi ʻa e laumālie naʻe fakahāhā ʻe he fakatahaʻangá. Ko e fakatātaá, ki he kau Kalētiá naʻá ne tohi: “Ko e ʻofa maʻataʻatā ʻa hotau ʻEiki ko Sīsū Kalaisí ke ʻi he laumālie ia ʻoku mou fakahāhaá, fanga tokoua. ʻĒmeni.” (Kal. 6:18) Ko e hā naʻá ne ʻuhinga ki ai ‘ʻi he laumālie ʻoku mou fakahāhaá’?

2, 3. (a) ʻI hono ngāueʻaki ʻa e foʻi lea “laumālie,” ko e hā naʻe ʻuhinga ki ai ʻa Paula ʻi he taimi ʻe niʻihi? (e) Ko e hā ʻa e ngaahi fehuʻi te tau ʻeke hifo nai fekauʻaki mo e laumālie ʻoku tau fakahāhaá?

² Ko e ngāueʻaki ʻe Paula ʻa e foʻi lea “laumālie” ʻi he potutohi ko ení ko e ʻuhinga ia ki he mālohi fakaueʻiloto ʻokú ne ʻai kitautolu ke tau lea pe fai ʻa e ngaahi meʻá ʻi ha founga pau. ʻE hoko nai ha taha ʻo anga-malū, anga-fakaʻatuʻi, anga-mokomoko, nima-homo, pe faʻa fakamolemole. ʻOku fakamatala lelei ʻa e Tohi Tapú fekauʻaki mo e “laumālie anga-fakalongolongo mo anga-maluú.” (1 Pita 3:4) ʻI he tafaʻaki ʻe tahá, ʻe hoko nai ha taha ʻo manuki, ʻofa ki he meʻa fakamatelié, ʻitangofua, pe maʻu nai ha fakakaukau faʻifaʻiteliha. Pea toe kovi angé, ʻoku ʻi ai ʻa e faʻahinga ʻoku nau fakahāhā ha laumālie taʻemaʻa, talangataʻa, pe aʻu ʻo angatuʻu.

³ Ko ia ai, ʻi he taimi naʻe ngāueʻaki ai ʻe Paula ʻa e fakalea hangē ko e “ke ʻi he laumālie ʻoku mou fakahāhaá ʻa e ʻEikí,” ko ʻene fakalototoʻaʻi ʻe ia hono fanga tokouá ke nau fakahāhā ha laumālie ʻoku fehoanaki mo e finangalo ʻo e ʻOtuá mo e ʻulungaanga faka-Kalaisí. (2 Tīm. 4:22; Lau ʻa e Kolose 3:9-12.) ʻI he ʻahó ni, ʻoku lelei ke tau ʻeke hifo: ‘Ko e hā ʻa e faʻahinga laumālie ʻoku ou fakahāhaá? ʻE lava fēfē ke u fakahāhā kakato ange ha laumālie ʻoku fakahōifua ki he ʻOtuá? ʻE lava ke u fakalakalaka ʻi he tokoni ki he laumālie lelei fakalūkufua ʻo e fakatahaʻangá?’ Ke fakatātaaʻi, ʻi ha ngoue matalaʻiʻakau siolaʻā, ʻoku tokoni ʻa e uloulo ʻo e mata ʻo e matalaʻiʻakau taki taha ki he fakaʻofoʻofa fakalūkufua ʻo e ngoue matalaʻiʻakaú. Ko e taha kitautolu ʻo e “ngaahi matalaʻiʻakau” ʻoku tānaki atu ki he fakaʻofoʻofa fakalūkufua ʻo e fakatahaʻangá? Ko hono moʻoní, ʻoku totonu ke tau feinga ke hoko ko ha taha pehē. Tau sio angé he taimí ni ki he meʻa ʻe lava ke tau fai ke fakahāhā ai ha laumālie ʻoku fakahōifua ki he ʻOtuá.

FAKAʻEHIʻEHI MEI HE LAUMĀLIE ʻO E MĀMANÍ

 4. Ko e hā ʻa e “laumālie ʻo e māmaní”?

⁴ ʻOku tala mai ʻe he Folofolá: ‘Kuo tau tali, ʻo ʻikai ko e laumālie ʻo e māmaní, ka ko e laumālie ʻa ia ʻoku mei he ʻOtuá.’ (1 Kol. 2:12) Ko e hā ʻa e “laumālie ʻo e māmaní”? Ko e laumālie tatau ia ʻoku lave ki ai ʻi he ʻEfesō 2:2, ʻa ia ʻoku pehē: “Naʻa mou ʻaʻeva ai ʻi he taimi ʻe taha ʻo fakatatau ki he fokotuʻutuʻu ʻo e māmani ko ení, ʻo fakatatau ki he tokotaha pule ʻo e mafai ʻoku ʻi he ʻeá, ʻa e laumālie ko ia ʻoku ngāue he taimí ni ʻi he ngaahi foha ʻo e talangataʻá.” Ko e “ʻea” ko ení ko e laumālie pe fakakaukau fakaeʻatamai ia ʻo e māmaní, pea ʻokú ne takatakaiʻi kitautolu hangē ha ʻea moʻoní. ʻOku ʻi he potu kotoa pē. ʻOku faʻa fakahāhā ia ʻi he fakakaukau ʻoku ʻikai ha taha ia ʻoku totonu ke ne tala mai ʻa e meʻa ke u faí pe faitau-maʻa-hoʻo-totonú ʻa ia ʻoku maʻu ʻe he kakai tokolahi fau ʻi he ʻaho ní. ʻOku faʻuʻaki kinautolu ʻa e “ngaahi foha ʻo e talangataʻa” ʻo e māmani ʻo Sētané.

 5. Ko e hā ʻa e laumālie kovi naʻe fakahāhā ʻe he niʻihi ʻi ʻIsileli?

⁵ Ko e ngaahi fakakaukau peheé ʻoku ʻikai foʻou ia. ʻI he taimi ʻo Mōsesé, naʻe tuʻu hake ʻa Kola ʻo fakafepaki ki he faʻahinga ʻoku maʻu mafai ʻi he fakatahaʻanga ʻo ʻIsilelí. Naʻá ne tāketi tefitó kia ʻĒlone mo hono ngaahi fohá, ʻa ia naʻa nau maʻu ʻa e monū ʻo e ngāue ko e kau taulaʻeiki. Mahalo naʻá ne sio ki heʻenau ngaahi taʻehaohaoa. Pe kuó ne fakakikihi nai naʻe tōʻonga filifilimānako ʻa Mōsese—ʻo ʻoange ʻa e ngaahi monuú ki hono ngaahi kāingá. Pe ko e hā pē tuʻungá, ʻoku hā mahino naʻe kamata ʻa Kola ke sio ki he ngaahi meʻá mei he vakai fakaetangatá pea lea fakafepaki ai ki he faʻahinga naʻe fakanofo ʻe Sihová, ʻo tala taʻefakaʻapaʻapa kia kinautolu: “Kuo mo ʻafungi fau . . . pea ko hoʻomo fakamahiki kimoua ʻi he fakataha ʻa e ʻEiki koeʻumaʻa?” (Nōm. 16:3) Pehē foki, naʻe lāunga ʻa Tētani mo ʻApilami fekauʻaki mo Mōsese, ʻo tala ki ai naʻá ne feinga ke ‘fai ai pe foki ʻene fie pule angé.’ ʻI he fekau ke na hā kia Mōsesé, naʻá na tali hīkisia: “ʻE ʻikai te ma ʻalu hake.” (Nōm. 16:12-15 [16:12-14, PM]) Naʻe mahino ʻa e ʻikai hōifua ʻa Sihova ki hona laumālié. Naʻá ne fakaʻauha kotoa ʻa e kau angatuʻú.—Nōm. 16:28-35.

 6. Naʻe anga-fēfē fakaeʻa ʻe he niʻihi ʻi he ʻuluaki senitulí naʻa nau maʻu ha fakakaukau kovi, pea ko e hā nai ʻa e ʻuhinga ki aí?

⁶ Naʻe toe hoko mo e niʻihi ʻi he ʻuluaki senitulí ʻo fakaanga ki he faʻahinga naʻe tuku ki ai ʻa e mafai ʻi he fakatahaʻangá, ʻo “taʻetokaʻi ʻa e tuʻunga maʻu mafaí.” (Sute 8) Ko e kau tangata ko ení ngalingali naʻe ʻikai ke nau fiemālie ʻi honau ngaahi monuú pea nau feinga ke tākiekina ʻa e niʻihi kehé ke nau fakafepaki ki he kau tangata kuo fakanofó ʻa ia naʻa nau fataki tokanga honau ngaahi fatongia foaki mei he ʻOtuá.—Lau ʻa e 3 Sione 9, 10.

 7. ʻI he ʻuhinga fē ʻe ʻi ai nai ai ha fiemaʻu ke tokanga ʻi he fakatahaʻangá he ʻahó ni?

⁷ ʻOku hā mahino, ko ha laumālie pehē ʻoku ʻikai hano feituʻu ʻi he fakatahaʻanga Kalisitiané. Ko e ʻuhinga ia ʻoku ʻi ai ai ha fiemaʻu ke tokanga fekauʻaki mo e meʻá ni. Ko e kau tangata matuʻotuʻa ʻi he fakatahaʻangá ʻoku ʻikai ke nau haohaoa, hangē pē ko e ʻikai ke nau haohaoa ʻi he taimi ʻo Mōsesé pea ʻi he taimi ʻo e ʻapositolo ko Sioné. ʻE fai nai ʻe he kau mātuʻá ʻa e ngaahi fehālaaki ʻo uesia fakafoʻituitui ai kitautolu. Kapau ʻe hoko ia, he taʻefeʻunga ē ki ha mēmipa ʻo e fakatahaʻangá ke feangainga ʻo fakatatau ki he laumālie ʻo e māmaní, ʻo fiemaʻu vavale ha “fakamaau totonu” pe ko e “fai leva ha meʻa fekauʻaki mo e tokoua ko ení”! ʻE fili nai ʻa Sihova ke kātakiʻi ha ngaahi tōnounou iiki ʻe niʻihi. ʻE lava ke tau fai ʻa e meʻa tatau? Koeʻuhi ko e meʻa ʻoku nau ʻilo ko e ngaahi mele ʻi he kau mātuʻá, ko e niʻihi tāutaha ʻoku nau kau ʻi he angahala mamafa ʻi he fakatahaʻangá kuo nau fakafisi ke hā ʻi he ʻao ʻo ha kōmiti ʻo e kau mātuʻa kuo vaheʻi ke tokoniʻi kinautolú. ʻE lava ke fakatatau eni ki ha mahaki ʻoku ʻikai ke ne maʻu ʻa e ngaahi ʻaonga ʻo ha faitoʻo koeʻuhi ʻoku ʻikai ke ne saiʻia ʻi ha meʻa fekauʻaki mo e toketaá.

 8. Ko e hā ʻa e ngaahi potu folofola ʻe lava ke ne tokoniʻi kitautolu ke tauhi maʻu ha vakai totonu ki he faʻahinga ʻoku nau takimuʻa ʻi he fakatahaʻangá?

⁸ Ke fakaʻehiʻehi mei he faʻahinga laumālie ko iá, ʻe lava ke tau manatuʻi ko Sīsuú ʻoku fakatātaaʻi ia ʻi he Tohi Tapú ʻokú ne maʻu “ʻi hono nima toʻomataʻú ha ngaahi foʻi fetuʻu ʻe fitu.” ʻOku fakafofongaʻi ʻe he “ngaahi foʻi fetuʻú” ʻa e kau ʻovasia paní pea, ʻi hono fakalahi atú, ko e kau ʻovasia kotoa ʻi he ngaahi fakatahaʻangá. ʻOku lava ʻe Sīsū ke tataki ʻa e “ngaahi foʻi fetuʻu” ʻi hono nimá ʻi ha faʻahinga feituʻu pē ʻokú ne ongoʻi ʻoku feʻungamālie. (Fkh. 1:16, 20) Ko ia ai, ʻi he tuʻunga ko e ʻUlu ʻo e fakatahaʻanga Kalisitiané, ʻoku maʻu ʻe Sīsū ʻa e pule kakato ki he ngaahi kulupu ʻo e kau mātuʻá. Kapau ʻoku ʻi ai ha taha ʻi ha kulupu ʻokú ne fiemaʻu moʻoni ha fakatonutonu, ko e Tokotaha “ko hono fofongá naʻe hangē ko e laʻaá” te ne sio ki ai ʻoku fai eni ʻi Heʻene taimi mo e founga pē ʻaʻana. (Fkh. 1:14) ʻI he lolotongá ni, te tau tauhi maʻu ʻa e fakaʻapaʻapa totonu ki he faʻahinga kuo fakanofo ʻe he laumālie māʻoniʻoní, he naʻe tohi ʻe Paula: “Mou talangofua ki he faʻahinga ʻoku nau takimuʻa ʻiate kimoutolú mo fakamoʻulaloa kiate kinautolu, he ʻoku nau hanganaki leʻohi kimoutolu ʻi he tuʻunga ko e faʻahinga ia te nau fai ha fakamatala; ke nau fai eni ʻi he fiefia ʻo ʻikai ʻi he māpuhoi, he ʻe kaungakovi eni kiate kimoutolu.”—Hep. 13:17.

 9. (a) Ko e hā ha ʻahiʻahi ʻe hokosia nai ʻe ha Kalisitiane kapau ʻe fakatonutonu ia pe akonakiʻi? (e) Ko e hā ʻa e founga lelei taha ke feangainga ai ki he valokí?

⁹ Ko e laumālie ʻo ha Kalisitiane ʻe toe ʻahiʻahiʻi nai ia kapau ʻe fakatonutonu pe toʻo ʻa e ngaahi monū ʻi he fakatahaʻangá. Ko ha kiʻi talavou ʻe taha naʻe akonakiʻi fakapotopoto ʻe he kau mātuʻá fekauʻaki mo e vaʻinga ʻi he ngaahi keimi vitiō fakamālohí. Ko e meʻa fakamamahí, naʻe ʻikai ke ne tali lelei ʻa e akonakí pea pau ke toʻo ia mei he sevāniti fakafaifekaú koeʻuhi naʻe ʻikai ke ne kei maʻu ʻa e tuʻunga taau Fakatohitapú. (Saame 11:5; 1 Tīm. 3:8-10) Hili iá, naʻe ʻai ʻe he tokouá ke ʻilolahia naʻe ʻikai ke ne loto ki ai, ʻo toutou fai ʻa e ngaahi tohi ʻo fakaangaʻi ʻa e kau mātuʻá ki he ʻōfisi vaʻá pea aʻu ʻo tākiekina ʻa e niʻihi kehe ʻi he fakatahaʻangá ke fai ʻa e meʻa tatau. Ko ia, ʻoku taʻefakatupu-fua moʻoni ke tau fakafaingataʻaʻiaʻi ʻa e melino ʻa e fakatahaʻangá fakalūkufua ʻi ha feinga ke fakatonuhiaʻi ʻetau ngaahi tōʻongá. He meʻa lelei lahi ange ia ke vakai ki he valokí ko ha founga ia ke fakaava ai hotau matá ke sio ki he ngaahi vaivaiʻanga naʻe ʻikai ke tau fakatokangaʻi pea toki tali fakalongolongo ʻa e fakatonutonú.—Lau ʻa e Tangilāulau 3:28, 29.

10. (a) Fakamatala ki he meʻa ʻe lava ke tau ako mei he Sēmisi 3:16-18 fekauʻaki mo ha laumālie lelei mo ha laumālie kovi. (e) Ko e hā ʻoku iku ki ai ʻi hono fakahāhā ʻa e “poto ʻoku mei ʻolungá”?

¹⁰ Ko e Sēmisi 3:16-18 ko ha tataki lelei ia fekauʻaki mo e meʻa ʻoku fakatou faʻuʻaki ʻa e laumālie totonu mo taʻetotonu ke fakahāhā ʻi he fakatahaʻangá. ʻOku pehē ai: “Ko e feituʻu pē ʻoku ʻi ai ʻa e meheká mo e loto-fekeʻikeʻí, ʻe ʻi ai foki ʻa e māveuveú mo e meʻa kovi pango kotoa pē. Ka ko e poto ʻoku mei ʻolungá, ʻuluakí ʻoku maʻa, hoko ai ʻa e fakamelino, fakaʻatuʻi, mateuteu ke talangofua, fonu ʻi he meesi mo e ngaahi fua lelei, taʻefilifilimānako, ʻikai ke mālualoi. ʻIkai ko ia pē, ko e fua ʻo e māʻoniʻoní kuo tūtuuʻi hono tengá ʻi he ngaahi tuʻunga melino ʻi he lotolotonga ʻo e faʻahinga ʻoku fakamelinó.” ʻI heʻetau ngāue ʻo fehoanaki mo e “poto ʻoku mei ʻolungá,” ko hotau ngaahi ʻulungaanga fakaʻotuá te ne fakamafeia kitautolu ke tau tokoni ki ha laumālie lelei ʻi he fanga tokouá.

FAKAHĀHĀ HA LAUMĀLIE ANGA-FAKAʻAPAʻAPA ʻI HE FAKATAHAʻANGÁ

11. (a) ʻE hanga ʻe hono tauhi maʻu ha laumālie totonú ʻo tokoniʻi kitautolu ke fakaʻehiʻehi mei he hā? (e) Ko e hā ʻoku tau ako mei he faʻifaʻitakiʻanga ʻa Tēvitá?

¹¹ ʻOku totonu ke tau manatuʻi maʻu pē kuo vaheʻi ʻe Sihova ʻa e kau mātuʻá “ke tauhi ʻa e fakatahaʻanga ʻa e ʻOtuá.” (Ngā. 20:28; 1 Pita 5:2) Ko ia ai, ʻoku tau ʻiloʻi ko e ʻalunga fakapotopotó ko hono fakaʻapaʻapaʻi ʻa e fokotuʻutuʻu ʻa e ʻOtuá, tatau ai pē pe ʻoku tau maʻu ʻa e monū ko e ngāue ko e kau mātuʻa pe ʻikai. Ko hono tauhi maʻu ha laumālie totonu ʻe lava ke tokoniʻi ai kitautolu ke fakaʻehiʻehi mei he hoko ʻo fuʻu tokanga tōtuʻa fekauʻaki mo e tuʻungá. ʻI he taimi naʻe ongoʻi ai ʻe Tuʻi Saula ʻo ʻIsilelí kuo hoko ʻa Tēvita ko ha fakamanamana ki hono tuʻunga-tuʻí, naʻe ‘talu ai mo e siosiofi ʻa Tevita’ ʻe Saula. (1 Sām. 18:9) Naʻe fakatupulekina ʻe he tuʻí ha laumālie kovi pea aʻu ʻo ne loto ke tāmateʻi ʻa Tēvita. ʻI he ʻikai fuʻu hohaʻa tōtuʻa fekauʻaki mo e tuʻungá hangē ko Saulá, he lelei lahi ange ē ke hangē ko Tēvitá. Neongo ʻa e fokotuʻuna ʻiate ia ʻa e fakamaau taʻetotonú kotoa, naʻe tauhi maʻu ʻe he kiʻi talavoú ʻene fakaʻapaʻapa ki he mafai kuo fakanofo ʻe he ʻOtuá.—Lau ʻa e 1 Sāmiuela 26:23.

12. Ko e hā ʻe tokoni ki he fāʻūtaha ʻi he fakatahaʻangá?

¹² Ko e kehekehe ʻa e anga ʻo e fakakaukaú ʻe lava ke hoko ia ko ha matavai ʻo e fakatupu ʻita ʻi he fakatahaʻangá—naʻa mo e ʻi he kau ʻovasiá. Ko e akonaki ʻa e Tohi Tapú ʻe lava ke ne tokoniʻi kitautolu fekauʻaki mo e meʻá ni: “ʻI he fakahāhā ʻo e fefakaʻapaʻapaʻakí, mou takimuʻa ai” mo e, “ʻOua ʻe hoko ʻo poto ʻi he vakai pē ʻa kimoutolú.” (Loma 12:10, 16) ʻI he ʻikai vilitaki ʻoku tau tonú, ʻoku totonu ke tau lāuʻilo ʻoku faʻa lahi ange ʻi he tahá ʻa e founga fakahōifua ke vakai ai ki ha tuʻunga. Kapau te tau feinga ke sio ki he vakai ʻa e niʻihi kehé, ʻe lava ke tau tokoni ki he fāʻūtaha ʻa e fakatahaʻangá.—Fil. 4:5.

13. ʻOku totonu ke fēfē ʻetau vakai ki heʻetau ngaahi fakakaukaú tonu, pea ko e hā ʻa e faʻifaʻitakiʻanga Fakatohitapu ʻokú ne fakatātaaʻi ení?

¹³ ʻOku ʻuhinga ení ʻoku hala ke ʻoatu ʻetau vakaí kapau ʻoku tau sio ki ha meʻa ʻi he fakatahaʻangá ʻoku tau ongoʻi ʻoku fiemaʻu ʻa e fengaʻunuʻaki? ʻIkai. ʻI he ʻuluaki senitulí, naʻe malanga hake ai ha ʻīsiu fekauʻaki mo ha meʻa naʻe lahi ai ʻa e fekīhiakí. Ko e fanga tokouá “naʻa nau fokotuʻutuʻu ai kia Paula, Panepasa, pea mo ha niʻihi ʻo kinautolu ke nau ʻalu hake ki he kau ʻapositoló pea mo e kau mātuʻa ʻi Selusalemá ke ʻeke fekauʻaki mo e fakakikihí ni.” (Ngā. 15:2) ʻOku ʻikai ha veiveiua ko e tokotaha taki taha ʻo e fanga tokoua ko iá naʻe ʻi ai ʻene fakakaukau fekauʻaki mo e kaveingá pea mo ha fakaʻutoʻuta ki he founga ʻe ala fakaleleiʻi ai ʻa e meʻá. Kae kehe, ko ʻenau taki taha ʻohake pē ʻene fakakaukau pea fai ʻa e fili tataki ʻe he laumālié, naʻe ʻikai hoko atu ʻa e fanga tokouá ke ʻohake ʻenau ngaahi taki taha fakakaukaú. Hili ʻa e aʻu ʻa e tohí mo e fili kuo faí ki he ngaahi fakatahaʻangá, “naʻa nau fiefia ʻi he fakalototoʻa kuo faí” pea ‘ʻai ke tuʻu mālohi ʻi he tuí.’ (Ngā. 15:31; 16:4, 5) ʻOku pehē pē he ʻahó ni, ko ʻetau ʻomai pē ha meʻa ke tokanga ki ai ʻa e fanga tokoua fua fatongiá, ʻoku totonu ke tau fiemālie ke tuku ia ki heʻenau tokanga ki ai ʻi he faʻa lotu.

FAKAHĀHĀ HA LAUMĀLIE LELEI ʻI HE NGAAHI VAHAʻANGATAE FAKAFOʻITUITUÍ

14. ʻE lava fēfē ke tau fakahāhā ha laumālie lelei ʻi ha tuʻunga fakafoʻituitui?

¹⁴ ʻI he tuʻunga fakafoʻituituí, ʻoku ʻi ai ʻa e ngaahi faingamālie lahi kia kitautolu ke fakahāhā ai ha laumālie lelei. Ko e tokotaha taki taha ʻo kitautolu ʻe lava ke ne fai ʻa e lelei lahi kapau te tau fakahāhā ha laumālie faʻa fakamolemole ʻi he taimi ʻoku fakaʻitaʻi ai kitautolu ʻe he niʻihi kehé. ʻOku tala mai ʻe he Folofola ʻa e ʻOtuá: “Hokohoko atu ʻa e fekātakiʻaki mo e fefakamolemoleʻaki loto-lelei neongo ai pē ʻo kapau ʻoku ʻi ai ha taha ʻokú ne maʻu ha ʻuhinga ke lāunga ai fekauʻaki mo ha taha. Hangē tofu pē ko ia ne fakamolemoleʻi loto-lelei kimoutolu ʻe Sihová, kuo pau foki ke mou fai ʻa e meʻa tatau pē.” (Kol. 3:13) Ko e fakalea “kapau ʻoku ʻi ai ha taha ʻokú ne maʻu ha ʻuhinga ke lāunga ai fekauʻaki mo ha taha,” ʻoku fakahuʻunga ai ʻe ʻi ai pē nai ha ngaahi ʻuhinga totonu ke hoko ai ʻo fakaʻitaʻi ʻe he niʻihi kehé. Kae kehe, ʻi he ʻikai hoko ʻo hohaʻa tōtuʻa fekauʻaki mo ʻenau ngaahi vaivaiʻanga mo ʻenau fakahohaʻasi ʻa e melino ʻa e fakatahaʻangá, ʻoku tau feinga ke faʻifaʻitaki kia Sihova pea fakamolemoleʻi maʻataʻatā, ʻo ngaʻunu atu ʻi heʻetau ngāue fakatahá.

15. (a) Ko e hā ʻe lava ke tau ako fekauʻaki mo e fakamolemolé meia Siopé? (e) ʻE lava fēfē ʻe he lotú ʻo tokoniʻi kitautolu ke fakahāhā ha laumālie fiefia?

¹⁵ Fekauʻaki mo e fakamolemolé, ʻe lava ke tau ako mei he tangata ko Siopé. Ko hono kau fie fakafiemālie ʻe toko tolú naʻa nau fakaʻitaʻi ia ʻaki ʻa e ngaahi lea taʻeʻofa lahi. Neongo ia, naʻe faʻa fakamolemole ʻa Siope. ʻO anga-fēfē? “ʻI heʻene hufia hono ngaahi kaumeʻa.” (Siope 16:2; 42:10) Ko e hūfia ʻa e niʻihi kehé te ne liliu nai ai ʻa e anga ʻo e fakakaukau fekauʻaki mo kinautolú. Ko e hūfia hotau ngaahi feohi faka-Kalisitiané kotoa ʻoku tokoniʻi ai kitautolu ke fakatupulekina ha laumālie hangē ko Kalaisí. (Sione 13:34, 35) Tānaki atu ki hono hūfia hotau fanga tokouá, ʻoku totonu ke tau lotu ʻo kole ʻa e laumālie māʻoniʻoní. (Luke 11:13) Ko e laumālie ʻo e ʻOtuá te ne tokoniʻi kitautolu ke fakahāhā ʻa e ngaahi ʻulungaanga faka-Kalisitiane moʻoní ʻi heʻetau feangainga mo e niʻihi kehé.—Lau ʻa e Kalētia 5:22, 23.

TOKONI KI HA LAUMĀLIE LELEI ʻI HE KAUTAHA ʻA E ʻOTUÁ

16, 17. ʻI he fekauʻaki mo e ‘laumālie ʻoku tau fakahāhaá,’ ko e hā ʻokú ke fakapapau fakafoʻituitui ke faí?

¹⁶ He ola fakafiefia moʻoni ʻe lava ke maʻu kapau ʻe ʻai ʻe he mēmipa taki taha ʻo e fakatahaʻangá ko ʻene taumuʻá ia ke tokoni ki he laumālie lelei ʻa e fakatahaʻangá! Hili ʻa e lāulea ki he ngaahi meʻá ni, te tau fili nai te tau lava fakafoʻituitui ke fakalakalaka ʻi hono fakahāhā ha laumālie fakatupu langa hake. Kapau ko ia, ʻoku totonu ke ʻoua te tau toumoua ke tuku kitautolu ke sivisiviʻi ʻi he maama ʻo e Folofola ʻa e ʻOtuá. (Hep. 4:12) Ko Paula, ʻa ia naʻe hohaʻa lahi fekauʻaki mo ʻene ngaahi tōʻonga ʻi he ngaahi fakatahaʻangá, naʻá ne pehē: “ʻOku ʻikai te u lāuʻilo ki ha meʻa ʻoku hala ʻiate au. Ka neongo ia, ʻi he meʻá ni ʻoku ʻikai ke fakamoʻoniʻi ai kuó u māʻoniʻoni, ka ko ia ʻokú ne sivisiviʻi aú ko Sihova ia.”—1 Kol. 4:4.

¹⁷ ʻI heʻetau feinga ke ngāue ʻo fehoanaki mo e poto ʻoku mei ʻolungá, ʻo ʻikai fuʻu fakamamafa kia kitautolu pe ko hotau tuʻungá, te tau tokoni ai ki ha laumālie lelei ʻi he fakatahaʻangá. ʻI hono maʻu ha laumālie faʻa fakamolemole pea fakakaukau fakatuʻamelie ki he niʻihi kehé, te tau fiefia ai ʻi ha ngaahi vahaʻangatae melino mo hotau ngaahi kaungālotú. (Fil. 4:8) ʻI heʻetau fai ʻa e ngaahi meʻá ni, ʻe lava ke tau falala-pau ʻe fiefia ʻa Sihova mo Sīsū ‘ʻi he laumālie ʻoku tau fakahāhaá.’—Flm. 25.

[Fakatātā ʻi he peesi 12]

[Fakatātā ʻi he peesi 14]

ʻOku anga-fēfē hanga ʻe he fakalaulauloto ki he ngafa ʻo Sīsuú ʻo tākiekina ʻa e founga ʻo ʻetau tali ki he akonakí?