Kātoangaʻi ʻa e Fakamanatú ke Taau

ʻI HE efiafi poʻuli ʻo Nīsani 14, 33 T.S., naʻe fokotuʻu ai ʻe Sīsū ʻa e Fakamanatú.a Ko e toki ʻosi pē ia ʻene fai ʻa e kātoanga Laka-atú mo ʻene kau ʻaposetolo ʻe toko 12, ko ia ʻoku lava ke tau fakapapauʻi ʻa e ʻahó. ʻI he hili ʻa e mavahe atu ʻa e tokotaha lavakí, ʻa Siutasi, naʻe hanga ʻe Sīsū ʻo “toʻo ha foʻi mā, ʻo ne tapuaki ia, mo ne pakipaki, ʻo ne ʻange kiate kinautolu, ʻo ne pehĕ, Toʻo: ko hoku sino ʻeni. Naʻa ne toʻo foki ʻa e ipu, mo ne fakafetaʻi, ʻo ne ʻange kiate kinautolu; pea nau inu kotoa pē mei ai. Pea ne pehē kiate kinautolu, Ko hoku toto ʻeni, ko e toto fuakava, ʻa ia ʻoku lilingi koeʻuhi ko e tokolahi.”​—Maʻake 14:​22-24.

Naʻe fekau ʻe Sīsū ki heʻene kau ākongá ke nau fakamanatu ʻa ʻene pekiá koeʻuhi ko hono mahuʻingá. (Luke 22:19; 1 Kolinitō 11:​23-​26) Ko ʻene pekiá ko e feilaulau pē ia ʻe taha naʻe lava ke huhuʻi ʻaki ʻa e faʻahinga ʻo e tangatá mei he mala ʻo e angahala mo e mate tukufakaholó. (Loma 5:​12; 6:​23) Ko e mā mo e uaine naʻá ne ngāueʻakí ko e ongo fakaʻilonga ia ʻo hono sino mo hono taʻataʻa haohaoá. ʻI hono ʻiloʻi ʻa e tupuʻi ʻahó, ʻoku malava ai ke tau kātoangaʻi ʻa e meʻa ko iá ʻi he ʻaho ʻoku fehoanaki mo ia ʻi he taʻu taki taha, ʻo hangē tofu pē ko ia naʻe fai ʻo fekauʻaki mo e Laka-atu faka-Siú. Ka kuo pau ke tau fai ia ke taau. Ko e hā hono ʻuhingá?

Naʻe pehē ʻe he ʻaposetolo ko Paulá ko e faʻahinga te nau maʻu ʻinasi ʻi he meʻa fakaefakatātā ko e mā mo e uainé te nau “fakaha ʻa e pekia ʻa e ʻEiki kaeʻoua ke ne hoko mai.” (1 Kolinitō 11:​26, fakaʻītali ʻamautolu.) Ko e taumuʻa tefito ʻo e kātoangá ʻe fakahanga ia ki he pekia ʻa Sīsuú pea mo hono kaunga ki he faʻahinga ʻo e tangatá. Ko ha kātoanga māfatukituki ʻeni, ko ha taimi ke fakakaukau atu ai ki he anga-lelei ʻa e ʻOtuá pea mo e houngaʻia ʻoku totonu ke tau fai kia Sihova mo hono ʻAló. (Loma 5:8; Taitusi 2:​14; 1 Sione 4:​9, 10) Ko ia ai, naʻe fakatokanga mai ʻa Paula: “Ko ia, ʻilonga ʻa ia te ne fai taʻengali ʻene kai ʻa e ma, pe ko ʻene inu ʻi he ipu ʻa e ʻEiki, kuo ne angahala ki he sino mo e taʻataʻa ʻo e ʻEiki.”​—1 Kolinitō 11:27.

Taau​—ʻO Anga-Fēfē?

ʻOku hā mahino, ʻe ʻikai ke hōifua ʻa e ʻOtuá ʻo kapau ʻoku tau maumauʻi ʻa e toputapu ʻo e meʻa ko iá ʻaki haʻate kau ʻi ha ngaahi tōʻonga ʻoku ngalikehe pe ko hono ohi ha ngaahi tōʻonga fakapangani. (Sēmisi 1:​27; 4:​3, 4) ʻE taʻofi ʻe he meʻá ni ʻa e ngaahi meʻa manakoa ʻo e taimi ʻAho Toetuʻú. ʻI he muimui ki he fakahinohino ʻa Sīsū ke “fai ʻeni [ko hono] fakamanatu,” ʻe fiemaʻu ke tau fai ʻa e Fakamanatú ʻo hangē tofu pē ko ʻene fokotuʻu iá. (Luke 22:19; 1 Kolinitō 11:​24, 25) ʻE taʻofi ʻe he meʻá ni ʻa e ngaahi nāunau kuo tānaki mai ki he kātoangá ʻe he ngaahi siasi ʻo Puleʻanga-Haʻa-Kalisitiané. ʻOku tala moʻoni mai ʻe he New Catholic Encyclopedia ʻo pehē “ko e Misa ʻo e ʻaho ní ʻoku kehekehe lahi ia mei he tōʻonga faingofua ʻaupito naʻe muimui ai ʻa Kalaisi mo ʻEne kau ʻAposetoló.” Pea ʻi hono māʻunga tauhi ʻa e Misá, naʻa mo e ʻi he ʻaho kotoa pē, kuo mavahe ai ʻa Puleʻanga-Haʻa-Kalisitiane ia mei he meʻa naʻe taumuʻa ki ai ʻa Sīsuú pea kuo ʻai ʻa e meʻa ia ko iá ko ha meʻa noa pē.

Naʻe tohi ʻa Paula ki he kau Kalisitiane Kolinitoó ʻo fekauʻaki mo hono maʻu taʻetaau ha ʻinasi mei aí koeʻuhi ko ha palopalema naʻe tupu hake ʻi he fakatahaʻangá ʻi he fekauʻaki mo e Kai Efiafi ʻa e ʻEikí. Naʻe ʻikai ke tokaʻi ʻe he niʻihi ʻa e toputapu ʻo e meʻa ko iá. Naʻa nau ʻomai ʻenau meʻakai efiafí ʻo kai ia ki muʻa pe ko e lolotonga ʻa e fakatahá. Naʻa nau faʻa kai mo inu ʻo fuʻu hulu. Naʻe ʻai ʻe he meʻá ni kinautolu ʻo nau tulemohe mo fakalongomate honau ʻatamaí. ʻI he ʻikai ke ʻāʻā fakaʻatamai mo fakalaumālié, naʻe “ʻikai te [nau] fifili ʻo ʻilo ʻa e sino” pea hoko ai ʻo “angahala ki he sino mo e taʻataʻa ʻo e ʻEiki.” Lolotonga iá, ko e faʻahinga ko ia naʻe ʻikai haʻanau kai efiafí naʻa nau fiekaia pea nau hoko foki ʻo hanganoa. Naʻe meimei hangē pē ne ʻikai ha taha ʻo kinautolu naʻe ʻi ha tuʻunga ke ne maʻu ʻinasi ʻi he meʻa fakaefakatātaá ni ʻi he houngaʻia mo e lāuʻilo kakato ki he māfatukituki ʻo e meʻa ko iá​—ʻa ia ko e kātoanga fakamanatu ʻo e pekia ʻa e ʻEikí. Naʻe iku ʻeni ki hono fakamāuʻi kinautolu, he naʻa nau fakahāhā ʻa e taʻefakaʻapaʻapa, naʻa mo e fakakaukau paetaku, ki ai.​—1 Kolinitō 11:​27-​34.

Fiemaʻu ʻa e ʻIloʻilo

Ko hono moʻoní, kuo maʻu ʻinasi ʻa e niʻihi mei he meʻa fakaefakatātā ʻo e Fakamanatú neongo kuo toki ʻilo ki mui naʻe ʻikai totonu ke nau fai pehē. Ko e faʻahinga ʻoku totonu ke nau maʻu ʻinasi mei he meʻa fakaefakatātā ʻo e Fakamanatú ko e faʻahinga kuo fili ʻe he ʻOtuá pea kuo nau maʻu ʻa e fakamoʻoni ʻo e laumālie ʻo e ʻOtuá ki he meʻa ko iá. (Loma 8:​15-​17; 2 Kolinitō 1:​21, 22) ʻOku ʻikai ko e fili pe ko e fakapapauʻi pē ʻe kinautolu ʻokú ne ʻai kinautolu ke nau taau ki aí. Kuo fakangatangata pē ʻe he ʻOtuá ʻa e tokolahi ʻo e faʻahinga te nau pule fakataha mai mo Kalaisi ʻi hēvaní ki he toko 144,000, ko ha kiʻi tokosiʻi ia ʻi hono fakahoa atu ki he faʻahinga kotoa ʻoku nau maʻu ʻa e ʻaonga mei he huhuʻi ʻa Kalaisí. (Fakahā 14:​1, 3) Naʻe kamata ʻa hono filí ʻi he taimi ʻo Sīsuú, ko ia ai ko ha tokosiʻi pē ʻi he ʻahó ni ʻoku nau maʻu ʻinasi mei aí. Pea ʻi hono ʻave ʻa e niʻihi ʻo kinautolu ʻe he maté, ʻoku totonu ke holo hifo ʻa e tokolahi ko iá.

Ko e hā ka hala nai ai ha maʻu ʻinasi ʻa ha taha mei he meʻa fakaefakatātaá ni? Mahalo ʻe tupu nai ia mei he ngaahi fakakaukau fakalotu ki muʻá​—ko e kakai anga-tonu kotoa pē ʻoku ō ki hēvani. Pe ʻoku hoko nai ia koeʻuhi ko e fiemāʻolunga pe siokita​—ko ha ongoʻi ʻe he tokotaha ko iá ʻoku taau ange ia ʻi he niʻihi kehé​—pea mo ha holi ki he tuʻunga tuʻu-ki-muʻa. Mahalo pē ʻoku tupu nai ia mei he ngaahi ongoʻi mālohi ʻoku tupu mei ha ngaahi palopalema mamafa pe ko ha meʻa fakamamahi ʻoku hoko ʻo ne ʻai ʻa e tokotaha ko iá ke ʻikai kei mahuʻingaʻia ia ʻi he moʻui ʻi he māmaní. ʻOku lava ke toe hoko ia koeʻuhi ko ha kaungāmeʻa vāofi mo ha taha kuó ne maʻu ʻa e ui fakahēvaní. Ko kitautolu kotoa ʻoku fiemaʻu ke tau manatuʻi ko e fili ko iá ko e meʻa ʻataʻatā pē ia ʻa e ʻOtuá, ʻoku ʻikai ko kitautolu. (Loma 9:​16) Ko ia ka ʻi ai ha taha, hili ʻene fai ha “sivi,” ʻo ʻilo naʻe ʻikai ʻaupito totonu ke ne maʻu ʻinasi mei he meʻa fakaefakatātaá ni, ʻoku totonu ke ne fakaʻehiʻehi he taimí ni.​—1 Kolinitō 11:28.

Ko e ʻamanaki kuo ʻomai ʻe he ʻOtuá ki he tokolahi taha ʻo e faʻahinga ʻo e tangatá ko e moʻui taʻengata ʻi ha māmani palataisi. Ko ha tāpuaki lahi ia ke tau fakatuʻamelie atu ki ai, pea ko e taha ia ha meʻa ʻoku tau aafe ngofua ki ai. (Sēnesi 1:​28; Sāme 37:​9, 11) Ko e māmaní ʻe toe fakataha ai ʻa e kau anga-tonú mo e faʻahinga naʻa nau ʻofa ai ʻe toetuʻu maí pea ʻe fetaulaki ai mo e kau māʻoniʻoni ʻo e kuonga ko ē, hangē ko ʻĒpalahame, Sela, Mōsese, Lēhapi, Tēvita, mo Sione Papitaiso​—ʻa e faʻahinga kotoa naʻa nau mate ki muʻa pea toki fakaava ʻe Sīsū ʻa e matapā ki he moʻui fakahēvaní.​—Mātiu 11:11; fakafehoanaki mo 1 Kolinitō 15:​20-​23.

Ko e faʻahinga ʻoku nau maʻu ʻa e ngaahi ʻamanaki ki he māmaní ʻoku nau kātoangaʻi ʻo taau ʻa e Kai Efiafi ʻa e ʻEikí ʻaki ʻenau haʻu ki ai mo tokanga anga-fakaʻapaʻapa, neongo ʻoku ʻikai te nau maʻu ʻinasi mei he maá mo e uainé. ʻOku nau maʻu foki ʻa e ʻaonga mei he feilaulau ʻa Kalaisí, ʻa ia ʻoku malava ai ke nau maʻu ha tuʻunga fakahōifua ʻi he ʻao ʻo e ʻOtuá. (Fakahā 7:​14, 15) ʻI heʻenau fanongo ki he malanga ʻoku fai maí, ʻoku mālohi ai ʻenau houngaʻia ki he ngaahi meʻa toputapú, pea ʻoku tupulaki ai ʻa ʻenau holi ke nofo fāʻūtaha mo e kakai ʻa e ʻOtuá ʻi ha feituʻu pē.

ʻI he taʻú ni, ʻi he hili ʻa e tō hifo ʻa e laʻaá ʻi he Tūsite, ʻo ʻEpeleli 2, ʻe fai ai ʻa e Fakamanatú ʻi he kotoa ʻo e ngaahi fakatahaʻanga ʻe 78,000 tupu ʻo e Kau Fakamoʻoni ʻa Sihová ʻi māmani lahi. Te ke maʻu ia?

[Fakamatala ʻi lalo]

[Fakatātā ʻi he peesi 8]

ʻOku kātoangaʻi ʻe he Kau Fakamoʻoni ʻa Sihová ʻa e Fakamanatú ʻo tuʻo taha ʻi he taʻu taki taha