• ‘Mou Teungaʻaki ʻa e Kātaki-Fuoloá’
    Ko e Taua Leʻo—2001 | Nōvema 1

    • “Ko e ʻOfá ʻOku Kātaki-Fuoloa”

       9. Ko e hā naʻe malava ai ʻe Paula ke tala ki he kau Kolinitoó “ko e ʻofá ʻoku kātaki-fuoloa”?

      9 Naʻe fakahaaʻi ʻe Paula ʻoku ʻi ai ha vahaʻangatae makehe ʻi he vahaʻa ʻo e ʻofá mo e kātaki-fuoloá ʻi heʻene pehē: “Ko e ʻofá ʻoku kātaki-fuoloa.” (1 Kolinito 13:​4, NW) Ko ha mataotao Tohitapu ʻe taha, ko Albert Barnes, ʻokú ne fokotuʻu mai ʻo pehē naʻe fakamamafaʻi ʻe Paula ʻa e meʻá ni koeʻuhi ko e fakakikihi mo e fekeʻikeʻi naʻe hoko ʻi he fakatahaʻanga Kalisitiane ʻi Kolinitoó. (1 Kolinito 1:​11, 12) ʻOku pehē ʻe Barnes: “Ko e foʻi lea naʻe ngāueʻaki heni [ki he kātaki-fuoloá] ʻoku tuʻu fehangahangai ia mo e loto-ʻoho: ko e ngaahi lea mo e ngaahi fakakaukau lili, pea mo e loto-ʻiteʻita. ʻOku ʻuhinga ia ki he tuʻunga ʻo e fakakaukaú ʻa ia ʻoku malava ke KĀTAKI-FUOLOA ʻi hono fakafeʻātungiaʻi mo fakaʻitaʻí.” ʻOku kei tokoni lahi ʻa e ʻofá mo e kātaki-fuoloá ki he melino ʻa e fakatahaʻanga Kalisitiané.

      10. (a) ʻI he founga fē ʻoku tokoniʻi ai kitautolu ʻe he ʻofá ke tau hoko ʻo kātaki-fuoloá, pea ko e hā ʻa e akonaki ʻoku ʻomai ʻe he ʻapositolo ko Paulá ʻi he meʻá ni? (e) Ko e hā ʻa e fakamatala naʻe fai ʻe ha mataotao Tohitapu ʻe taha ki he kātaki-fuoloá mo e anga-ʻofa ʻa e ʻOtuá? (Sio ki he fakamatala ʻi laló.)

      10 “Ko e ʻofá ʻoku kātaki-fuoloa mo anga-ʻofa. Ko e ʻofá . . . ʻoku ʻikai te ne kumi ki he lelei pē ʻaʻana, ʻoku ʻikai ke hoko ʻo fakaʻita.” Ko ia ai, ʻi he ngaahi founga lahi, ʻoku tokoniʻi kitautolu ʻe he ʻofá ke tau hoko ʻo kātaki-fuoloa.a (1 Kolinito 13:​4, 5, NW) ʻOku fakaivia kitautolu ʻe he ʻofá ke tau anga-kātaki ʻo fekātakiʻaki pea manatuʻi ko kitautolu kotoa ʻoku tau taʻehaohaoa mo maʻu ʻa e ngaahi hala mo e ngaahi tōnounou. ʻOkú ne tokoniʻi kitautolu ke tau hoko ʻo fakaʻatuʻi mo faʻa fakamolemole. ʻOku fakalototoʻaʻi kitautolu ʻe he ʻapositolo ko Paulá ke tau ʻaʻeva “ʻaki ʻa e fakakaukau fakatōkilalo kakato mo e anga-malū, fakataha mo e kātaki-fuoloa, ʻo fekātakiʻaki ʻi he ʻofa, ʻo feinga tōtōivi ke tauhi ʻa e tuʻunga taha ʻo e laumālié ʻi he haʻi fāʻūtaha ʻo e melinó.”—Efeso 4:​1-3, NW.

  • ‘Mou Teungaʻaki ʻa e Kātaki-Fuoloá’
    Ko e Taua Leʻo—2001 | Nōvema 1

    • a ʻI he fakamatala ki he lau ʻa Paula ʻo pehē “ko e ʻofá ʻoku kātaki-fuoloa mo anga-ʻofa,” ʻoku tohi ʻe he mataotao Tohitapu ko Gordon D. Fee: “ʻI he lotukalafi ʻa Paulá ʻokú na [kātaki-fuoloá mo e anga-ʻofá] fakafofongaʻi ʻa e ongo tafaʻaki ʻe ua ʻo e anga ʻo e ʻOtuá ki he faʻahinga ʻo e tangatá (cf. Loma 2:4). ʻI he tafaʻaki ʻe taha, ko e kātaki anga-ʻofa ʻa e ʻOtuá ʻoku fakahāhā ia ʻaki ʻene taʻotaʻofi ʻene houhau ki he faʻahinga angatuʻu ʻo e tangatá; ʻi he tafaʻaki ʻe tahá, ko ʻene anga-ʻofá ʻoku maʻu ia ʻi he ngaahi fakahāhā lahi ʻo ʻene mēsí. Ko ia, ko e fakamatala ʻa Paula ki he ʻofá ʻoku kamataʻaki ia ʻa e fakamatala lōua ko ʻeni fekauʻaki mo e ʻOtuá, ʻa ia fakafou ʻia Kalaisi kuó ne fakahāhā ai ʻa ʻene kātaki mo ʻene anga-ʻofa ki he faʻahinga ʻoku tuha mo e fakamaau fakaʻotuá.”