Ngāue Mateaki Fakataha mo e Kautaha ʻa Sihová

“ʻI he fai mo ha tokotaha mateakí, te ke takataka mateaki.”​—2 SAMIUELA 22:26, NW.

 1, 2. Ko e hā ʻa e ngaahi fakatātā ʻe niʻihi ʻo e mateakí te tau sio kotoa nai ai ʻi he fakatahaʻangá?

ʻI HA efiafi ʻe taha fuoloa e poʻulí ʻoku teuteu ai ʻe ha mātuʻa ha malanga ki ha fakataha faka-Kalisitiane. ʻOkú ne saiʻia ke taʻofi ā kae mālōlō; ka ʻoku ʻikai, ʻokú ne hanganaki ngāue pē, ʻi he kumi ʻa e ngaahi faʻifaʻitakiʻanga Fakatohitapu mo e ngaahi fakatātā ʻa ē ʻe aʻu ki he lotó mo fakalototoʻa ki he tākangá. ʻI he pō ko ia ʻo e fakatahá, ʻi he fakatahaʻanga tatau ʻe saiʻia ha ongo mātuʻa ia kuó na fuʻu helaʻia ke nofo pē ʻi ʻapi; ka ʻoku ʻikai, ʻokú na kātaki pē ʻo ʻai ʻa e fānaú ke maau pea ō ki he fakatahá. ʻI he hili ʻa e fakatahá, ʻoku talanoa ai ha kulupu ʻo e kau Kalisitiané ki he konga ʻa e tokotaha mātuʻá. ʻOku fakataueleʻi ai ʻa e tuofefine ʻe taha ke ne lave ki he taimi ʻe taha naʻe fakalotomamahiʻi ai ia ʻe he tokoua tatau; ka ʻoku ʻikai, ʻokú ne loto-māfana ʻo talanoa fekauʻaki mo e taha ʻo e ngaahi poini naʻá ne ngāueʻakí. ʻOkú ke sio ki he foʻi afo tatau ʻoku lele hokohoko ʻi he ngaahi meʻa ko ʻeni naʻe hokó?

² Ko e foʻi afo ko iá ko e mateakí. ʻOku ngāue mateaki ʻa e tokotaha mātuʻá ke tauhi ʻa e tākanga ʻa e ʻOtuá; ʻoku mateaki ʻa e ongo mātuʻá ʻi hono maʻu ʻa e ngaahi fakataha ʻa e fakatahaʻangá; ʻoku poupouʻi mateaki ʻe he tuofefiné ʻa e kau mātuʻá. (Hepelu 10:​24, 25; 13:17; 1 Pita 5:2) ʻIo, ʻi he ngaahi tafaʻaki kotoa ʻo e moʻuí, ʻoku tau sio ai ki he fakapapau ʻa e kakai ʻa e ʻOtuá ke ngāue mateaki fakataha mo e kautaha ʻa Sihová.

 3. Ko e hā ʻoku mātuʻaki mahuʻinga ai ke tau tuʻumaʻu ʻi he mateaki ki he kautaha fakaemāmani ʻa Sihová?

³ ʻI he vakai hifo ʻa Sihova ki he māmani fakameleʻi ko ʻení, ʻoku siʻi pē haʻane ʻafioʻi ai ha mateaki. (Maika 7:2) He fiefia ē kuo pau naʻe ʻi hono lotó ʻi heʻene vakai ki he mateaki ʻa hono kakaí! ʻIo, ko hoʻo mateakí tonu ʻokú ne fakafiefiaʻi ia. Kae kehe, ʻokú ne fakaʻitaʻi ʻe ia ʻa Sētane, ʻa e muʻaki angatuʻú, pea fakamoʻoniʻi ai ia ko ha tokotaha loi. (Palovepi 27:11; Sione 8:44) ʻAmanekina ʻe feinga ʻa Sētane ke ne fakavaivaiʻi hoʻo mateaki kia Sihova, pea ki Heʻene kautaha fakaemāmaní. Tau vakai angé ki he ngaahi founga ʻe niʻihi ʻoku fai ai ʻeni ʻe Sētané. Ko ia te tau sio lelei ange nai ai ki he founga ʻe lava ke tau nofo mateaki ai ʻo aʻu ki he ngataʻangá.​—2 Kolinito 2:11.

Ko Hono Siofi ʻo e Ngaahi Taʻehaohaoá ʻE Malava ʻo Keina Ai ʻa e Mateakí

 4. (a) Ko e hā ʻoku faingofua ai ke tau fakakaukau fakaanga kiate kinautolu ʻoku maʻu mafaí? (e) Naʻe anga-fēfē hono fakamoʻoniʻi ʻe Kola ʻa ʻene taʻemateaki ki he kautaha ʻa Sihová?

⁴ ʻI he taimi ʻoku ʻi he tuʻunga ai ʻo e fua fatongiá ha tokoua, ʻoku hoko nai ai ʻo hā lelei ange ʻa ʻene ngaahi halá. He meʻa faingofua ē ke fakatokangaʻi ʻa e ‘malamalaʻi ʻakau ʻoku ʻi he mata ʻo hotau kaingá, ka ko e fuʻu lalango na ʻoku ʻi hotau matá ʻoku ʻikai te tau ʻilo ki ai’! (Mātiu 7:​1-5) Ko ia, ʻoku lava ke fanauʻi ʻa e taʻemateakí ʻi he nōfoʻi ʻi he ngaahi vaivaiʻangá. Ke fakatātaaʻi, fakakaukau angé ki he faikehekehe ʻi he vahaʻa ʻo Kola mo Tēvitá. Naʻe fua ʻe Kola ʻa e fatongia lahi, pea mahalo pē naʻá ne mateaki ʻi he ngaahi taʻu lahi, ka naʻá ne hoko ʻo sio tuʻunga. Naʻá ne hoko ʻo fehiʻa ki he tuʻunga-mafai ʻo Mōsese mo ʻĒloné, ʻa ia naʻá ne fakatou tokoua ʻakí. Neongo ko Mōsese ʻa e tangata naʻe angavaivai tahá, naʻe hā mahino ʻa e kamata ke sio fakaanga kiate ia ʻa Kolá. Ngalingali pē naʻá ne sio ki ha ngaahi hala ʻia Mōsese. Kae kehe, ko e ngaahi hala ko iá, naʻe ʻikai ke fakatonuhiaʻi ai ʻa e taʻemateaki ia ʻa Kola ki he kautaha ʻa Sihová. Naʻe fakaʻauha ia mei he lotolotonga ʻo e fakatahaʻangá.​—Nomipa 12:3; 16:11; 31-33.

 5. Ko e hā nai naʻe mei ongoʻi ai ʻe Tēvita ʻoku fakataueleʻi ia ke angatuʻu kia Saulá?

⁵ Ko Tēvita ʻi he tafaʻaki ʻe tahá, naʻe ngāue ia ʻi he malumalu ʻo e tuʻi ko Saulá. Naʻe hoko moʻoni ʻa Saula ʻo fulikivanu, ka ko ha tuʻi lelei ia ʻi he taimi ʻe taha. Naʻe fiemaʻu ʻe Tēvita ʻa e tui, kītaki, pea naʻa mo ha taukei ke hao ai mei he ngaahi ʻohofi loto-meheka ʻa Saulá. Ka ʻi he taimi naʻe ʻi ai ai ha faingamālie ʻo Tēvita ke ne sauní, naʻá ne pehē ‘ke taofi ia e Jihova,’ mei haʻane fai ha ngāue taʻemateaki ki ha taha kuo pani ʻe Sihova.​—1 Samiuela 26:11, PM.

 6. Neongo kapau ʻoku tau ʻilo ha ngaahi vaivaiʻanga mo ha ngaahi fehālaaki ʻi he kau mātuʻá, ko e hā ʻoku totonu ke ʻoua ʻaupito te tau faí?

⁶ ʻI he taimi ʻoku hā ngali hala ai ha fakamaau ʻa ha niʻihi ʻoku takimuʻa ʻi hotau lotolotongá, ʻo leaʻaki ʻa e ngaahi lea fefeka, pe ngali fakahā ʻa e filifilimānakó, te tau lāunga ʻo fekauʻaki mo kinautolu, ʻo tokoni nai ai ki ha laumālie fakaanga ʻi he fakatahaʻangá? Te tau mamaʻo nai mei he ngaahi fakataha faka-Kalisitiané ʻi ha tuʻunga fakafepaki? ʻIkai ʻaupito! Hangē pē ko Tēvitá, ʻe ʻikai te tau teitei fakaʻatā ʻa e ngaahi hala ʻa ha taha ke ne ueʻi kitautolu ke hoko ʻo taʻemateaki ai kia Sihova mo ʻene kautahá!​—Sāme 119:165.

 7. Ko e hā ʻa e ngaahi tōʻonga kovi ʻe niʻihi naʻe tupulaki ʻi he fekauʻaki mo e temipale ʻi Selusalemá, pea naʻe fēfē ʻa e ongoʻi ʻa Sīsū ʻo fekauʻaki mo e meʻá ni?

⁷ Ko e faʻifaʻitakiʻanga fakaetangata lahi taha ʻo e mateakí ko Sīsū Kalaisi, naʻe fakamatalaʻi fakaekikite ia ko e “tokotaha mateaki” ʻa Sihova. (Sāme 16:​10, NW) Kuo pau pē naʻe ʻai ʻa e mateakí ko ha pole ʻi hono ngāuehala kovi ʻaki ʻo e temipale ʻi Selusalemá. Naʻe ʻiloʻi ʻe Sīsū naʻe tomuʻa fakatātaaʻi ʻe he ngāue ʻa e taulaʻeiki lahí mo e ngaahi feilaulaú ʻa ʻene ngāue fakafaifekaú tonu mo ʻene pekia fakaefeilaulaú, pea naʻá ne ʻilo ʻa e mahuʻinga ki he kakaí ke ako mei he ngaahi meʻa ko ʻení. Ko ia naʻá ne fuʻu ʻita koeʻuhi ko e māʻoniʻoní ʻi heʻene sio naʻe hoko ʻa e temipalé “ko e ʻananga ʻo ha kaihaʻakau.” Naʻe tuʻo ua ʻene fai ʻa e meʻa ʻaki ʻa e mafai kuo foaki ange ʻe he ʻOtuá ke fakamaʻa ia.a​—Mātiu 21:​12, 13; Sione 2:​15-17.

 8. (a) Naʻe anga-fēfē ʻa e fakahāhā ʻe Sīsū ʻa e mateaki ki he fokotuʻutuʻu ʻi he temipalé? (e) ʻOku lava fēfē ke tau fakahāhā ʻoku tau houngaʻia ʻi he lotu kia Sihova fakataha mo ʻene kautaha maʻá?

⁸ Neongo ia, naʻe poupouʻi mateaki pē ʻe Sīsū ia ʻa e fokotuʻutuʻu fakaetemipalé. Mei heʻene kei siʻí, naʻá ne maʻu ʻa e ngaahi kātoanga ʻi he temipalé pea naʻá ne faʻa faiako ai. Naʻá ne totongi foki mo e tukuhau temipalé​—neongo naʻe ʻikai fakamoʻuaʻi moʻoni ia ke fai pehē. (Mātiu 17:​24-27) Naʻe fakaongoongoleleiʻi ʻe Sīsū ʻa e uitou masivá ʻi heʻene lī ʻa e “meʻa kotoa naʻa ne maʻu” ki he tukuʻanga koloa ʻi he temipalé. Taimi nounou pē hili iá, naʻe siʻaki ʻosi ai ʻe Sihova ʻa e temipale ko iá. Ka ʻi haʻane toki aʻu ki ai, naʻe mateaki pē ʻa Sīsū ia ki ai. (Maake 12:​41-44; Mātiu 23:38) Ko e kautaha fakaemāmani ʻa e ʻOtuá he ʻaho ní ʻoku māʻolunga mamaʻo ange ia ʻi he fokotuʻutuʻu faka-Siú mo hono temipalé. ʻOku moʻoni, ʻoku ʻikai ke haohaoa ia; ko e ʻuhinga ia ʻoku fai ai ʻi he taimi ʻe niʻihi ha ngaahi fengaʻunuʻakí. Ka ʻoku ʻikai ke fakafonu ia ʻaki ʻa e taʻefaitotonú, pe pau ke fetongi ia ʻe Sihova. ʻOku ʻikai totonu ke tau teitei fakaʻatā ha faʻahinga taʻehaohaoa pē ʻoku tau ʻilo ki ai ke ne ʻai kitautolu ke tau loto-kona pe ueʻi kitautolu ke ohi ha laumālie fakaanga, ʻikai sai. Ka, tau faʻifaʻitaki ā muʻa ki he mateaki ʻa Sīsū Kalaisí.​—1 Pita 2:21.

Ko ʻEtau Ngaahi Taʻehaohaoá Tonu

 9, 10. (a) ʻOku ngāueʻaki fēfē ʻe he ngaahi meʻa ʻoku tuʻú ni ʻa Sētané ʻa ʻetau ngaahi taʻehaohaoá koeʻuhi ke fakataueleʻiʻaki kitautolu ki he ʻulungaanga taʻemateakí? (e) Ko e hā ʻoku totonu ke fai ʻe ha taha kuó ne fai ha angahala mamafa?

⁹ ʻOku toe feinga foki ʻa Sētane ke ne poupouʻi ʻa e taʻemateakí ʻaki ʻene ngāueʻaki ʻetau ngaahi taʻehaohaoá. ʻOku ngāueleleiʻaki ʻe heʻene ngaahi meʻa ʻoku tuʻu ní ʻa hotau ngaahi vaivaiʻangá, ʻo fakataueleʻi kitautolu ke fai ʻa e meʻa ʻoku hala ʻi he vakai mai ʻa Sihová. ʻOku fakamamahí, he ʻi he taʻu kotoa pē ʻoku tō ai ʻa e laui afe ki he ʻulungaanga taʻetāú. ʻOku toe fakalahi atu ʻe he niʻihi ʻa e taʻemateaki ko ʻení ʻaki hono tataki ha moʻui lōua, ʻi he hokohoko atu ʻi ha ʻalunga faihala lolotonga iá ʻoku nau fakangalingali ʻoku nau tuʻumaʻu ko e kau Kalisitiane anga-tonu. ʻI he tali ki he ngaahi kupu ʻi he tuʻunga-lea ko ʻení ʻi he fakahokohoko ʻo e “Fehuʻi ʻa e Toʻutupú . . . ” ʻi he makasini Awake!, naʻe tohi ai ʻe ha finemui ʻe taha: “Naʻe fakamatalaʻi ʻe he ngaahi kupú ʻa e meʻa kuó u fai ʻi heʻeku moʻuí.” Naʻá ne fakatupu fakapulipuli ha kaungāmeʻa mo e ngaahi toʻutupu, ʻa ia naʻe ʻikai haʻanau ʻofa kia Sihova. Ko e ikuʻangá? ʻOkú ne tohi: “Naʻe tōlalo ʻeku moʻuí, peá u kau ai ʻi he ʻulungaanga taʻetāú ʻo pau ai ke valokiʻi. Naʻe maumau ʻa hoku vahaʻangatae mo Sihová, pea naʻe mole ai ʻa e falala mai ʻa ʻeku ongo mātuʻá pea mo e kau mātuʻá.”b

¹⁰ Naʻe maʻu ʻe he finemui ko ʻení ʻa e tokoni mei he kau mātuʻá peá ne foki ai ki he ngāue mateaki kia Sihová. Ka ko e meʻa ʻoku fakamamahí he ʻoku faingataʻaʻia ʻa e tokolahi ʻi he ngaahi nunuʻa kovi ange, pea kuo ʻikai ʻaupito ke toe foki mai ʻa e niʻihi ia ki he tākangá. He lelei lahi ange ē ke hoko ʻo mateaki pea talitekeʻi ʻa e ʻahiʻahi ʻi he māmani fulikivanu ko ʻení! Tokanga ki he ngaahi fakatokanga mei he ngaahi makasini Taua Leʻo mo e Awake! ʻi he ngaahi meʻa hangē ko e feohi fakamāmaní mo e fakafiefia ololaló. ʻOfa ke ʻoua ʻe ʻi ai ha taimi te ke tō ai ki ha ʻulungaanga taʻemateaki. Ka ʻo kapau ʻe hoko, ʻoua ʻaupito naʻá ke fakangalingali ki ha meʻa ka ʻoku ʻikai te ke pehē. (Sāme 26:4) ʻI hono kehé, kumi tokoni. Ko e ʻuhinga ia ʻoku ʻi ai ai ʻa e ngaahi mātuʻa tauhi fānau pea mo e kau mātuʻa Kalisitiané.​—Semisi 5:14.

11. Ko e hā ʻe hala ai ke tau vakai hifo kiate kitautolu kuo tau kovi ʻo hala mo ha ʻamanakí, pea ko e hā naʻe hoko ki muʻa ʻi he Tohitapú ʻe lava ke ne tokoniʻi kitautolu ke fakatonutonu ʻetau fakakaukaú?

¹¹ ʻE ʻai nai ʻe heʻetau ngaahi taʻehaohaoá ʻi ha founga ʻe taha ke fakatuʻutāmaki kiate kitautolu. Ko e niʻihi ko ia kuo nau fai ha tōʻonga taʻemateakí kuo nau tuku ʻenau feinga ke fakahōifuaʻi ʻa Sihová. Manatuʻi, naʻe fai ʻe Tēvita ʻa e ngaahi angahala mātuʻaki mamafa. Ka, ʻi he taimi fuoloa hili ʻa e mate ʻa Tēvitá, naʻe manatuʻi ia ʻe Sihova ko ha sevāniti anga-tonu. (Hepelu 11:32; 12:1) Ko e hā hono ʻuhingá? Koeʻuhi pē he naʻe ʻikai teitei foʻi ia ʻi he feinga ke fakahōifuaʻi ʻa Sihová. ʻOku pehē ʻe he Palovepi 24:16: “He tuʻo fitu ʻa e to ki lalo ʻa e faitotonu, ka ne tuʻu pe.” Ko e moʻoni kapau ʻoku tau matavalea ʻi ha fanga kiʻi angahala​—ʻio ʻo hokohoko​—koeʻuhi ko ha vaivaiʻanga ʻoku tau faitau mo ia, te tau kei māʻoniʻoni pē nai ʻi he vakai mai ʻa Sihová kapau te tau hoko atu ke “tuʻu”​—ʻa ia, ko e fakatomala loto-moʻoni pea toe hoko atu ki he ʻalunga ʻo e ngāue mateakí.​—Fakafehoanaki mo 2 Kolinito 2:7.

Tokanga ki he Ngaahi Founga Olopoto ʻa e Taʻemateakí!

12. ʻI he meʻa fekauʻaki mo e kau Fālesí, naʻe anga-fēfē hono tākiekina ʻe ha fakakaukau anga-fefeka, ʻa ha taha mamahiʻi lao ki he taʻemateakí?

¹² ʻOku toe haʻu ʻa e taʻemateakí ʻi he ngaahi founga olopoto lahi ange. ʻE aʻu pē nai ʻo fakapuli ia ko e mateaki! Ko e fakatātaá, naʻe fakakaukau nai ʻa e kau Fālesi ʻi he taimi ʻo Sīsuú kiate kinautolu tonu ʻoku tuʻu-ki-muʻa ʻenau mateakí.c Ka naʻe ʻikai lava ke nau sio ki he faikehekehe ʻi he vahaʻa ʻo e hoko ʻo mateakí mo e hoko ko ha taha pipiki taʻeʻulutukua ki he ngaahi tuʻutuʻuni faʻu ʻe he tangatá, he naʻa nau anga-fefeka mo anga-kakaha ʻi he meʻa fakaefakamāú. (Fakafehoanaki mo Koheleti 7:16.) ʻI he meʻá ni naʻa nau taʻemateaki moʻoni ai​—ki he kakai naʻe totonu ke nau tauhí, ki he laumālie ʻo e Lao naʻa nau taukaveʻi ke akoʻí, pea kia Sihova tonu. ʻI hono faikehekehé, naʻe mateaki ʻa Sīsū ia ki he laumālie ʻo e Laó, ʻa ia naʻe makatuʻunga ʻi he ʻofá. Ko ia ai, naʻá ne langa hake mo fakalototoʻaʻi ʻa e kakaí, hangē pē ko ia naʻe tomuʻa tala ʻe he ngaahi kikite faka-Mīsaiá.​—Aisea 42:3; 50:4; 61:​1, 2.

13. (a) ʻE anga-fēfē nai ha taʻemateaki ʻa e ngaahi mātuʻa Kalisitiané? (e) Ko e hā ʻoku totonu ai ke fakaʻehiʻehi ʻa e ngaahi mātuʻá mei he hoko ʻo fuʻu fefeka, fakaanga, pe siohala ʻi hono akonakiʻi ʻenau fānaú?

¹³ ʻOku maʻu ʻa e ʻaonga lahi ʻe he kau Kalisitiane ʻoku ʻi ai honau mafaí mei he faʻifaʻitakiʻanga ʻa Sīsū fekauʻaki mo e meʻá ni. Ko e fakatātaá, ʻoku ʻilo ʻe he ngaahi mātuʻa mateakí kuo pau ke nau akonakiʻi ʻenau fānaú. (Palovepi 13:24) Ka ʻoku nau fakapapauʻi ʻoku ʻikai te nau fakaʻitaʻi ʻenau fānaú ʻaki ʻa e akonaki anga-fefeka fai ʻi he ʻita pe haʻaki fuʻu hokohoko atu ʻa e fakaangá. Ko e fānau ko ē ʻoku nau ongoʻi heʻikai pē lava ke nau teitei fakafiefiaʻi ʻe kinautolu ʻenau mātuʻá pe ʻoku nau ongoʻi ko e lotu ʻenau ngaahi mātuʻá ʻoku hā ngali ʻokú ne ʻai kinautolu ke nau siofi pē ʻa e halá mo fakaangá te nau hoko nai ʻo loto-mamahi, pea ko hono nunuʻá, ʻoku nau iku atu ki he mavahe mei he tui moʻoní.​—Kolose 3:21.

14. ʻE anga-fēfē nai ʻa e fakamoʻoniʻi ʻe he kau tauhi-sipi Kalisitainé ʻenau mateaki ki he tākanga ʻoku nau tauhí?

¹⁴ ʻI he tuʻunga meimei tatau, ʻoku fai ʻe he kau mātuʻa Kalisitiané mo e kau ʻovasia fefonongaʻakí ʻa e tokanga ki he ngaahi palopalema mo e ngaahi fakatuʻutāmaki ʻoku fehangahangai mo e tākangá. ʻI he hoko ko e kau tauhi-sipi mateakí, ʻoku nau fai ʻa e faleʻi ʻi he taimi ʻoku fiemaʻu aí, ʻo fakapapauʻi ʻoku nau tomuʻa maʻu kotoa ʻa e moʻoní pea tokanga ʻo fakatuʻunga ʻa e meʻa ʻoku nau leaʻakí ʻi he Tohitapú pea mo e ngaahi tohi ʻa e Sōsaietí. (Sāme 119:105; Palovepi 18:13) ʻOku nau ʻiloʻi foki, ʻoku fakafalala ʻa e fanga sipí kiate kinautolu ki ha langa hake mo ha fafanga fakalaumālie. Ko ia ʻoku nau kumi ke faʻifaʻitaki kia Sīsū Kalaisi, ko e Tauhi-Sipi Leleí. ʻOku nau ngāue mateaki ki he fanga sipí ʻi he uike ki he uike ʻi he ngaahi fakataha faka-Kalisitiané​—ʻo ʻikai holoki hifo kinautolu, ka ko hono langa hake kinautolu mo fakamālohiʻi ʻenau tuí.​—Mātiu 20:28; Efeso 4:​11, 12; Hepelu 13:​20, 21.

15. Naʻe anga-fēfē hono fakahāhā ʻe he niʻihi ʻi he ʻuluaki senitulí naʻe fokotuʻu ʻi he meʻa hala ʻenau ngaahi mateakí?

¹⁵ Ko e founga olopoto ʻe taha ʻo e taʻemateakí ko e mateaki fokotuʻu ʻi he meʻa hala. ʻI he ʻuhinga faka-Tohitapú ko e mateaki moʻoní ʻoku ʻikai te ne fakaʻatā ke tau fakamuʻomuʻa ha faʻahinga tukupā pē, ʻi heʻetau mateaki kia Sihova ko e ʻOtuá. Naʻe pipiki fefeka ʻa e kau Siu tokolahi ʻi he ʻuluaki senitulí ki he Lao ʻa Mōsesé pea mo e fokotuʻutuʻu ʻo e ngaahi meʻa faka-Siú. Ka naʻe hoko mai ʻa e taimi ia ʻa Sihova ke hiki ai ʻene tāpuakí mei he puleʻanga angatuʻu ko iá ki he puleʻanga ʻo ʻIsileli fakalaumālié. Ko ha kiʻi tokosiʻi pē naʻa nau mateaki kia Sihova pea fai ʻa e fengaʻunuʻaki ki he liliu mahuʻinga ko ʻení. Naʻa mo e ʻi he lotolotonga ʻo e kau Kalisitiane moʻoní, naʻe kīvoi pē ʻa e kau fiefaka-Siu ia ʻe niʻihi ʻi he toe foki ki he “ngaahi elemeniti vaivai mo masiva” ʻo e Lao ʻa Mōsesé, ʻa ia naʻe ʻosi fakahoko ʻia Kalaisí.​—Kaletia 4:9; 5:​6-12; Filipai 3:​2, 3.

16. ʻOku anga-fēfē ʻa e tali ʻa e kau sevāniti mateaki ʻa Sihová ki he ngaahi fengaʻunuʻaki?

¹⁶ ʻI hono kehé, kuo fakamoʻoniʻi ʻe he kakai ʻa Sihova ʻi onopōní kinautolu ʻoku nau mateaki ʻi he ngaahi ʻaho ʻo e feliliuakí. ʻI he hokohoko atu ke maama ange ʻa e maama ʻo e moʻoni kuo fakaeʻá, ʻoku fai leva ʻa e ngaahi fengaʻunuʻaki. (Palovepi 4:18) Ki muí ni mai, kuo tokoniʻi ai kitautolu ʻe he “tamaioeiki agatonu mo boto” ke fakaleleiʻi ʻa ʻetau mahino ki he kupuʻi lea ko e “toʻutangata” naʻe ngāueʻaki ʻi he Mātiu 24:34 pea mo e taimi ʻo e fakamaau ʻo e “fanga sipi” mo e “fanga kosi” naʻe lave ki ai ʻa e Mātiu 25:​31-46, pehē foki ki he anga ʻo ʻetau vakai ki ha faʻahinga ngāue pau fakasiviliane. (Mātiu 24:​45, PM) ʻOku ʻikai ha veiveiua naʻe mei fiefia ʻa e kau tafoki ʻe niʻihi mei he moʻoní kapau naʻe kei pipiki mālohi ʻa e tokolahi ʻo e Kau Fakamoʻoni ʻa Sihová ki he mahino ki muʻa ʻo fekauʻaki mo e ngaahi tuʻunga-lea peheé pea fakafisi ke laka ki muʻa. Kuo ʻikai ke hoko ha meʻa pehē. Ko e hā hono ʻuhingá? ʻOku mateaki ʻa e kakai ia ʻa Sihová.

17. ʻOku ʻahiʻahiʻi fēfē nai ʻi he taimi ʻe niʻihi ʻetau mateakí ʻe he faʻahinga ʻoku tau ʻofa aí?

¹⁷ Neongo ia, ʻe uesia fakafoʻituitui nai kitautolu, ʻi he meʻa fekauʻaki mo e ngaahi mateaki fokotuʻu ʻi he meʻa halá. ʻI he taimi ʻoku fili ai ha kaumeʻa ʻofeina, pe naʻa mo ha mēmipa ʻi he fāmilí ki ha ʻalunga ʻokú ne maumauʻi ʻa e ngaahi tefitoʻi moʻoni ʻi he Tohitapú, te tau ongoʻi nai kuo fevahevaheʻaki kitautolu ʻe heʻetau ngaahi mateakí. ʻOku fakanatula pē ʻetau ongoʻi mateaki ki he ngaahi mēmipa ʻi he fāmilí. Ka ʻoku totonu ke ʻoua ʻaupito te tau tuku ʻetau tukupā kiate kinautolú ke muʻomuʻa ia ʻi heʻetau mateaki kia Sihová! (Fakafehoanaki mo 1 Samiuela 23:​16-18.) ʻE ʻikai te tau tokoniʻi ʻa e kau faihalá ke fufuuʻi ha angahala mamafa pe kau mo kinautolu ʻi he fakafepaki ki he kau mātuʻá ʻa ē ʻoku nau feinga ke ‘faitoʻo ʻakinautolu peheé ʻo angafakaalaala.’ (Kaletia 6:1) Ko e fai peheé ʻe hoko ia ko e taʻemateaki kia Sihova, ko ʻene kautahá, pea mo ia ʻokú te ʻofa aí. Kae kehe, ke taʻofi ha taha angahala mei heʻene maʻu ʻa e akonaki ʻokú ne fiemaʻú, ko hono tapuni ia ʻa e fakahāhā ʻo e ʻofa ʻa Sihová mei heʻene aʻu kiate iá. (Hepelu 12:​5-7) Manatuʻi foki, ko e “ngaahi kafo mei hoto kaumeʻa ko e ʻofa moʻoni ia.” (Palovepi 27:6) Ko e faleʻi hangatonu, anga-ʻofa ʻa ia ʻoku makatuʻunga ʻi he Folofola ʻa e ʻOtuá te ne fakamamahiʻi nai ʻa e ngeia ʻo ha taha faihala ʻokú te ʻofa ai, ka ʻe fakamoʻoniʻi nai ia ko ha fakahaofi moʻui ʻi he faai atu ʻa e fonongá!

ʻOku Tuʻumaʻu ʻa e Mateakí ʻi he Fakatangá

18, 19. (a) Ko e hā naʻe fiemaʻu ʻe ʻĒhapi meia Nēpoté, pea ko e hā naʻe fakafisingaʻi ai ʻe Nēpoté? (e) Naʻe taau ʻa e mateaki ʻa Nēpoté mo e ngaahi nunuʻa naʻe hokó? Fakamatalaʻi.

¹⁸ ʻI he taimi ʻe niʻihi ʻoku fakahangatonu ʻa e ngaahi ʻohofi ʻe Sētane ʻetau mateakí. Fakakaukau angé ki he meʻa fekauʻaki mo Nēpoté. ʻI he taimi naʻe fakalotoʻi ai ia ʻe Tuʻi ʻĒhapi ke fakatau ʻene ngoue vainé, naʻá ne tali: “Mole ke mamaʻo haʻaku foaki ʻa e tofiʻa oʻeku ngaahi kui ki he ʻafiona.” (1 Tuʻi 21:3) Naʻe ʻikai ke loto-fefeka ʻa Nēpote; naʻá ne mateaki. Naʻe tuʻutuʻuni ʻi he Lao ʻa Mōsesé ʻe ʻikai ke fakatau atu ʻe ha taha ʻIsileli ha konga kelekele tukufakaholo ʻo taʻengata. (Levitiko 25:​23-28) Kuo pau pē naʻe ʻilo ʻe Nēpote ʻe lava ke tāmateʻi ia ʻe he tuʻi ʻulungaanga taʻetaau ko ʻení, he kuo ʻosi tuku ʻe ʻĒhapi ʻa hono uaifí, ʻa Sisipeli, ke ne tāmateʻi ʻa e tokolahi ʻi he kau palōfita ʻa Sihová! Ka naʻe tuʻumaʻu pē ʻa Nēpote.​—1 Tuʻi 18:4.

¹⁹ ʻI he taimi ʻe niʻihi ʻoku kouna ʻe he mateakí ha totongi. Naʻe fakahalaiaʻi loi ʻa Nēpote ʻe Sisipeli, ʻaki ha tokoni ʻa ha ongo “siana faka-Pileali,” ki ha hia naʻe ʻikai te ne fai. Ko hono olá, naʻe tāmateʻi ai ia mo hono ongo fohá. (1 Tuʻi 21:​7-16; 2 Tuʻi 9:26) ʻOku ʻuhinga iá naʻe hala ʻa e mateaki ʻa Nēpoté? ʻIkai! ʻOku kau ʻa Nēpote ʻi he haʻohaʻonga ʻo e kau tangata mo e kau fefine mateaki tokolahi ʻoku nau ‘moʻui’ ʻi he manatu ʻa Sihová he taimí ni, ʻoku nau mohe malu ʻi he faʻitoká kaeʻoua ke hoko mai ʻa e taimi ʻo e toetuʻú.​—Luke 20:38; Ngāue 24:15.

20. ʻOku lava fēfē ke tokoniʻi kitautolu ʻe he ʻamanakí ke tauhi maʻu ʻetau mateakí?

²⁰ Ko e talaʻofa tatau ʻokú ne ʻoange ʻa e fakafiemālie ki he faʻahinga mateaki ʻa Sihova ʻi he ʻaho ní. ʻOku tau ʻilo ʻe hoko nai ʻo tau mole lahi ʻi heʻetau mateakí ʻi he māmani ko ʻení. Naʻe totongi ʻe Sīsū Kalaisi ki heʻene mateakí ʻaki ʻene moʻuí, pea naʻá ne tala ki hono kau muimuí ʻe fai ʻo ʻikai toe kehe kiate kinautolu. (Sione 15:20) Hangē pē ko hono tokoniʻi ia ʻe heʻene ʻamanaki ki he kahaʻú, ʻoku pehē pē mo hono tokoniʻi kitautolú. (Hepelu 12:2) Ko ia ai, ʻoku lava ke tau nofoʻaki mateaki ʻi he fehangahangai mo e faʻahinga fakatanga kotoa pē.

21. Ko e hā ʻa e ngaahi fakapapau ʻoku ʻoange ʻe Sihova ki heʻene faʻahinga mateakí?

²¹ Ko e moʻoni, ko e kiʻi tokosiʻi pē ʻo kitautolu ʻi he ʻahó ni ʻoku faingataʻaʻia ʻi he ngaahi fakafepakiʻi fakahangatonu pehē ʻo ʻetau mateakí. Ka ko e kakai ʻa e ʻOtuá te nau fehangahangai nai mo e fakatanga lahi ange ki muʻa ia ke hoko mai ʻa e ngataʻangá. ʻE lava fēfē haʻatau fakapapauʻi ke tauhi maʻu ʻetau mateakí? ʻAki hono tauhi ʻetau mateakí he taimí ni. Kuo tuku mai ʻe Sihova kiate kitautolu ha ngāue lahi​—ko e malanga mo e faiako fekauʻaki mo hono Puleʻangá. Tau tauhi mateaki muʻa ki he ngāue mahuʻinga ko ʻení. (1 Kolinito 15:58) Kapau ʻoku ʻikai te tau loto ke tuku ke keina ʻe he ngaahi taʻehaohaoa fakaetangatá ʻetau mateaki ki he kautaha ʻa Sihová pea kapau ʻoku tau leʻohi kitautolu mei he ngaahi founga olopoto ko ia ʻo e taʻemateakí ʻo hangē ko e ngaahi mateaki fokotuʻu ʻi he meʻa halá, tā te tau mateuteu lelei ange kapau ʻe ʻahiʻahiʻi kakaha lahi ange ʻetau mateakí. ʻI ha meʻa pē, ʻe lava ke tau fakapapauʻi maʻu pē ʻoku ʻikai toe filingaua ʻa e mateaki ʻa Sihova ki heʻene kau sevāniti mateakí. (2 Samiuela 22:26) ʻIo, te ne leʻohi ʻa ʻene faʻahinga mateakí!​—Sāme 97:10.

[Fakamatala ʻi lalo]

Ko e Hā Haʻo Tali?

◻ ʻE lava fēfē ke tau fakaʻehiʻehi mei hono tuku ʻa e ngaahi taʻehaohaoa ʻa e niʻihi kehé ke ne tataki kitautolu ke taʻemateaki?

◻ Ko e hā ʻa e ngaahi founga ʻe tataki nai ai kitautolu ʻe heʻetau ngaahi taʻehaohaoá tonu ki he ʻulungaanga taʻemateakí?

◻ ʻE lava fēfē ke tau talitekeʻi ʻa e hehema ke fokotuʻu ʻi he meʻa halá ʻetau ngaahi mateakí?

◻ Ko e hā te ne tokoniʻi kitautolu ke tauhi ʻetau mateakí naʻa mo e ʻi he ngaahi taimi ʻo e fakatangá?

[Puha ʻi he peesi 21]

Ngāue Mateaki ʻi he Pētelí

“Ko e meʻa kotoa pe ke fai ke tāu mo māu.” Naʻe tohi ia ʻe he ʻaposetolo ko Paulá. (1 Kolinito 14:40) Naʻe ʻilo ʻe Paula ko ha fakatahaʻanga ke ngāue, ʻe ʻi ai ʻa e fiemaʻu ki ha “māu,” ki ha fokotuʻutuʻu lelei. Hangē pē ko ia ʻi he ʻaho ní, kuo pau ke fai ʻe he kau mātuʻá ʻa e ngaahi fili fekauʻaki mo e ngaahi meʻa ʻoku ʻaongá, hangē ko hono vahe ʻa e ngaahi mēmipa ʻi he fakatahaʻangá ki he ngaahi feituʻu faiʻanga ako tohi kehekehe, fokotuʻutuʻu ʻa e ngaahi faiʻanga fakataha ki he ngāue malangá, mo hono vakaiʻi ʻa e feituʻu kuo ʻosi ngāueʻí. Ko e ngaahi fokotuʻutuʻu peheé ʻe fakatupunga nai ai ʻi he taimi ʻe niʻihi hano ʻahiʻahiʻi ʻo e mateakí. ʻOku ʻikai ko ha ngaahi fekau ia kuo fakamānavaʻi fakaʻotua, pea ʻoku ʻikai lava ke ne fakaai ai ʻa e loto ʻo e tokotaha tāutaha kotoa pē.

ʻOkú ke ʻiloʻi ko ha pole ia, ʻi he taimi ʻe niʻihi, ke mateaki ki he niʻihi ʻo e ngaahi fokotuʻutuʻu ʻaonga kuo fai ʻi he fakatahaʻanga Kalisitiané? Kapau ko ia, te ke ʻilo nai ʻoku tokoni ʻa e faʻifaʻitakiʻanga ʻo e Pētelí. Ko e hingoa Pētelí, ko ha kupuʻi lea faka-Hepelū ia ʻoku ʻuhingá ko e “Fale ʻo e ʻOtuá,” ʻoku fakahingoaʻaki ia ʻa e ngaahi vaʻa kotoa ʻe 104 ʻo e Sōsaieti Taua Leʻó, ʻo kau ai ʻa e ngaahi ʻuluʻiʻapitanga ʻi he U.S.* Ko e kau ngāue pole ʻoku nofo ʻo ngāue ʻi he ngaahi fale Pētelí ʻoku nau loto ke tapua mei he ngaahi feituʻu ko ʻení ʻa e fakaʻapaʻapa mo e manavahē kia Sihova. ʻOku fiemaʻu heni ʻa e mateaki ʻi he tafaʻaki ʻa e tokotaha taki taha.

ʻOku faʻa fakamatala ʻa e kau ʻaʻahi ki he Pētelí ʻo kau ki he tuʻunga maau mo e maʻa ʻoku nau sio ʻi aí. ʻOku fokotuʻutuʻu maau mo fiefia ʻa e kau ngāué; ʻoku tapua mai ʻi heʻenau leá mo e ʻulungaangá, pea naʻa mo honau fōtungá ʻa e kau Kalisitiane kuo ʻosi akoʻi honau konisēnisí ʻe he Tohitapú. ʻOku pipiki mateaki ʻa e mēmipa kotoa ʻo ha fāmili Pēteli ki he ngaahi tuʻunga ʻi he Folofola ʻa e ʻOtuá.

Tānaki atu ki ai, ʻoku tokonaki ʻe he kulupu pulé kiate kinautolu ha kiʻi tohi kuo fakakaveinga ko e Dwelling Together in Unity, ʻa ia ʻoku fokotuʻutuʻu anga-ʻofa atu ai ʻa e ngaahi fokotuʻutuʻu ʻaonga ʻe niʻihi ʻa ē ʻoku fiemaʻu ke ngāue lelei fakataha ai ha fuʻu fāmili lahi pehē. (Sāme 133:1) Hangē ko ʻení, ʻoku lave ai fekauʻaki mo e ngaahi lokí, ngaahi taimi kaí, haisiní, valá mo e teuteú, mo e ngaahi meʻa meimei tatau. ʻOku poupou mateaki mo pipiki ki he ngaahi fokotuʻutuʻu peheé ʻa e ngaahi mēmipa ʻi he fāmili Pētelí, naʻa mo e taimi ʻoku tataki nai ai ʻenau saiʻia fakafoʻituituí ki ha tafaʻaki kehe. ʻOku nau vakai ki he kiʻi tohi ko ʻení, ʻo ʻikai ko ha ngaahi lao pe tuʻutuʻuni fefeka, ka ko ha fokotuʻutuʻu ia ʻo e ngaahi tākiekina ʻaonga kuo faʻufaʻu ke ne pouaki ʻa e fāʻūtahá mo e feongoongoí. ʻOku mateaki ʻa e kau ʻovasiá ʻi hono pouaki ʻa e ngaahi founga ko ʻeni makatuʻunga ʻi he Tohitapú, pea ʻoku nau ngāueʻaki kinautolu ʻi ha founga papau ke langa hake mo fakalototoʻaʻi ʻa e fāmili Pētelí ke tuli ki heʻenau ngāue toputapu faka-Pētelí.

* Ko e ngaahi fale ngāue, ʻōfisi, mo e ngaahi fale nofoʻanga ko ʻení ʻoku ʻikai ko e temipale lahi fakalaumālie ia ʻo e ʻOtuá, pe falé. Ko e temipale fakalaumālie ʻo e ʻOtuá ʻa ʻene fokotuʻutuʻu ki he founga-lotu maʻá. (Maika 4:1) ʻI heʻene peheé, ʻoku ʻikai fakangatangata ia ki ha faʻunga fakamatelie pē ʻi he māmaní.

[Puha ʻi he peesi 22]

Ko e Tokotaha Mateaki mo e Tokotaha Mamahiʻi Laó

ʻI he taʻu 1916, naʻe fakamatala ʻi he Encyclopædia of Religion and Ethics ko e “faikehekehe ko ʻeni ʻi he vahaʻa ʻo e tokotaha mateakí mo e tokotaha mamahiʻi laó ʻe lava nai ke maʻu ia ʻi he taimi kotoa pē pea ʻi he feituʻu kotoa pē.” Naʻe fakamatala ai: “ʻOku ʻi ai ʻa e tokotaha mamahiʻi lao ʻa ē ʻokú ne fai ʻa e meʻa ʻoku tala ki aí, ʻo ʻikai maumauʻi ʻa e ngaahi tuʻutuʻuní; ʻokú ne hanganaki tui ki he lea kuo hiki pea lava ke laú. Ko e tokotaha mateakí ē ʻokú ne fai ʻeni pea kei lava . . . ʻo lau atu ki ai mo ha toe meʻa, ʻokú ne tuku ʻene fakakaukaú kotoa ki hono fatongiá, ʻokú ne fokotuʻu ʻene fakakaukaú ʻo fakatatau ki he ʻuhinga moʻoni ʻo e taumuʻa ʻoku ngāue ki aí.” Ki mui mai, naʻe pehē ʻe he ngāue tatau pē: “Ke hoko ʻo mateakí ʻoku toe mahulu mamaʻo ange ia ʻi he tauhi-laó. . . . ʻOku fakafaikehekeheʻi ʻa e tangata mateakí mei he tangata tauhi-laó ko e taha ia ʻoku ngāueʻaki ʻa e kotoa ʻo hono lotó mo e fakakaukaú . . . ʻOku ʻikai te ne fakaʻatā ia tonu ke tō ʻi hono fai ʻa e angahala ʻosi fakakaukauʻi, tukunoaʻi, pe taʻeʻilo ki ai.”