‘Toʻo Hake ke Fakafetaulaki ki he ʻEiki’—Anga-Fēfē?

ʻOKU hokohoko atu ʻo ʻikai ala taʻofi ʻa e hoko ʻo ofi mai ʻa e ngataʻanga ʻo e tuʻu fulikivanu lolotongá ni. ʻI he ʻosi ʻa e houa mo e miniti mo e sēkoni taki taha ʻoku tau ʻunuʻunu atu ki he ngaahi meʻa fakaofo ʻa ia naʻe fuoloa hono kikiteʻi. Ko e rapture ko e taha ia ʻo e ngaahi meʻá ni? Kapau ʻoku pehē, ʻe hoko ia ʻafē pea anga-fēfē?

ʻOku ʻikai ke ʻasi ʻi he Tohitapú ʻa e foʻi lea ko e rapture. Ka ko e faʻahinga ʻoku nau tui ki aí ʻoku nau lave ki he ngaahi lea ʻa e ʻapositolo ko Paulá ʻia 1 Tesalonaika 4:17 ko e makatuʻunga ia ki heʻenau tuí. Tau sivisiviʻi lelei ʻa e konga Tohitapú ni ʻi hono potutohí. Naʻe tohi ʻe Paula:

“Ka oku ikai ko hoku loto ke mou taeilo, e kaiga, koeuhi ko kinautolu oku mohe, ke oua naa mou mamahiia, o hage koe niihi kehe oku ikai haa nau amanaki lelei. He kabau oku tau tui nae bekia a Jisu bea toe tuu hake, bea oku behe, ko kinautolu foki oku mohe ia Jisu, e omi akinautolu fakataha mo ia e he Otua. He oku mau tala eni kiate kimoutolu i he folofola ae Eiki, ko kitautolu oku moui bea toe i he hoko mai [“ʻi ai,” NW] ae Eiki, e ikai te tau muomua iate kinautolu oku mohe. Koeuhi e alu hifo ae Eiki mei he lagi, i he mavava, moe leʻo oe agelo lahi, moe mea lea ae Otua: bea koe bekia ia Kalaisi e tomua tuu: Bea ko kitautolu oku moui mo toe, e toʻo hake fakataha mo kinautolu i he gaahi ao, ke fakafetaulaki ki he Eiki i he atā: bea behe, te tau i he Eiki o taegata. Ko ia mou fetoutou fefakafiemalieaki akimoutolu i he gaahi lea ni.”​—1 Tesalonaika 4:​13-18, PM, fakaʻītali ʻamautolu.

Naʻe ʻikai ke fuʻu fuoloa ʻa hono fokotuʻu ʻa e fakatahaʻanga ʻi Tesalonaiká ʻi hono fai ʻe Paula ʻene ʻuluaki tohi ki he kau Kalisitiane ʻi aí ʻo fakafuofua ki he 50 T.S. Naʻe loto-mamahi ʻa e kau memipa ʻo e fakatahaʻangá ʻi he ‘mohe ʻi he mate’ ha niʻihi ʻo kinautolu. Kaekehe, naʻe fakafiemālieʻi ʻa e kau Tesalonaiká ʻi he meʻa naʻe tohi ʻe Paula ʻo kau ki he ʻamanaki ki he toetuʻú.

Ko e “ʻI Ai” ʻa Kalaisí

ʻI he fakapapauʻi ʻe Paula ʻe fokotuʻu mei he maté ʻa e kau Kalisitiane angatonu naʻe maté, naʻá ne toe pehē: “Ko kitautolu oku moui bea toe i he [“ʻi ai,” NW] ae Eiki, e ikai te tau muomua iate kinautolu oku mohe.” (1Te 4 Veesi 15) Ko hono moʻoní, ʻoku taau ke tokangaʻi ʻa e lave ʻa e ʻapositoló ki he “ʻi ai” ʻa e ʻEikí. ʻI he ʻuluaki hiki ʻo e veesí ni ʻi he lea faka-Kalisí ʻoku ngāueʻaki ai ʻa e foʻi lea ko e pa·rou·siʹan, ʻa ia ko hono ʻuhinga fakatufungaleá ko e “ʻi he tafaʻaki.”

ʻI he ʻaʻahi ʻa ha taki mei ha fonua muli ki ha fonua ʻe taha, ʻoku faʻa fakahā ʻa e ʻaho ʻo ʻene ʻi aí. Kuo toe moʻoni foki eni ʻo kau ki he ʻi ai ʻa e ʻEiki ko Sīsū Kalaisí. Kuo toutou fakahā ʻe he Ko e Taua Leʻo ki he kau ako loto-totonu ki he kikite faka-Tohitapú ʻo fakamoʻoniʻi naʻe kamata ʻa e ʻi ai ʻa Sīsū ʻi he mafai Fakapuleʻanga ʻi hēvaní ʻi he 1914. ʻOku fakapapauʻi ʻe he ngaahi meʻa kuo hoko talu mei he taʻu ko iá ʻa e ʻi ai taʻe hā mai ʻa Sīsū. (Mātiu 24:​3-14) Ko ia, ʻi he pehē ʻe Paula ʻe “toʻo hake . . . ke fakafetaulaki ki he Eiki i he atā” ʻa e kau Kalisitiane ʻe niʻihi lolotonga ʻa e ʻi ai ʻa e ʻEikí, naʻe ʻuhinga ʻa Paulá, ko e faʻahinga ko iá te nau fakafetaulaki kia Kalaisi, ʻo ʻikai ʻi he ʻatimosifia ʻo e māmaní, ka ʻi he nofoʻanga taʻe hā mai fakahēvani ʻa ia ʻoku nofo ai ʻa Sīsū ʻi he nima toʻomataʻu ʻo e ʻOtuá. (Hepelū 1:​1-3) Ka ko hai ʻa e faʻahinga ko ení?

“Isileli oe Otua”

ʻOku lahi ʻa e lave ʻa e Tohitapú ʻo kau ki he kau ʻIsileli fakakakano pea toe lave foki ki he “Isileli” fakalaumālie “oe Otua.” ʻOku faʻuʻaki ʻa e kau tui Siu mo Senitailé ʻa e fika kakato ʻo e faʻahinga ko eni kuo pani ʻe he laumālie māʻoniʻoní, pe ivi-ngāue ʻo e ʻOtuá. (Kalētia 6:16; Loma 11:​25, 26; 1 Sione 2:​20, 27) ʻOku fakahā ʻi he tohi Fakahā ko e fika fakakātoa ʻo ʻIsileli fakalaumālié ko e toko 144,000, pea ʻoku nau hā kotoa fakataha mo e Lami, ko Sīsū Kalaisí, ʻi he Moʻunga Saione fakahēvani. Te nau kaungātuʻi mo kaungātaulaʻeiki fakataha mo Kalaisi ʻi hēvani. (Fakahā 7:​1-8; 14:​1-4; 20:6) ʻE kau ʻi honau lotolotongá ʻa e faʻahinga naʻa nau feohi mo e fakatahaʻanga ʻi Tesalonaiká pea mo e ngaahi feituʻu kehe, tatau ai pē pe ko e hā honau tupuʻanga fakamatakali pe fakafonua.​—Ngāue 10:​34, 35.

Naʻe pau ki he kau memipa angatonu ʻo ʻIsileli fakalaumālié ke nau hokosia ha faʻahinga meʻa ki muʻa kae malava ke nau maʻu ha pale fakahēvani. Hangē tofu pē ko ia naʻe hoko ʻa e pekia ʻa Sīsū ʻi he ʻakau fakamamahí ki muʻa pea fokotuʻu hake ia ki he moʻui ʻi hēvaní, ko ia kuo pau foki ki he kau Kalisitiane ʻoku maʻu ʻa e ʻamanaki ki hēvaní ke nau mate ki muʻa pea toki maʻu honau palé. (1 Kolinitō 15:​35, 36) ʻOku moʻoni eni ʻo fekauʻaki mo e kau mēmipa ʻo e ʻIsileli fakalaumālie naʻe moʻui ʻi he ʻuluaki senituli T.S. pea pehē foki ʻo kau ki he faʻahinga pehē ʻoku kei moʻuí ni maí.

ʻI he hili ʻa e lave ʻa Paula ki he ‘ʻi ai ʻa e ʻEikí,’ naʻá ne lave ki he taimi ʻe maʻu ai ʻe he kau ʻIsileli fakalaumālie naʻe angatonú ʻa honau pale fakahēvaní. Naʻá ne tohi: “Koeuhi e alu hifo ae Eiki mei he lagi, i he mavava, moe leʻo oe agelo lahi, moe mea lea ae Otua: bea koe bekia ia Kalaisi e tomua tuu.” (Veesi 16) Ko ia ai, ʻi he kamata ke hoko ʻa e ʻi ai ʻa Sīsū ko e Tuʻí, te tau ʻamanekina ʻe kamata ai ke hoko ʻa e toetuʻu ki he moʻui ʻi hēvaní, ʻo kamataʻaki ʻa e faʻahinga mei ʻIsileli fakalaumālie naʻa nau ʻosi mate ʻi he tuʻunga ko e kau tauhi angatonu. (1 Kolinitō 15:23) ʻOku nau lolotonga ngāue fakataha mo Sīsū ʻi hēvani. Kae fēfē ʻa e tokosiʻi pē ʻo e kau Kalisitiane pani ʻoku kei moʻui ʻi māmaní? ʻOku nau tatali ki he rapture?

“Toʻo Hake”​—Anga-Fēfē?

ʻI he hili ʻa e lave ki he kau Kalisitiane pani naʻe maté, naʻe tānaki atu ki ai ʻe Paula: “Bea ko kitautolu oku moui mo toe, e toʻo hake fakataha mo kinautolu i he gaahi ao, ke fakafetaulaki ki he Eiki i he atā: bea behe, te tau i he Eiki o taegata.” (Veesi 17) “Ko kitautolu oku moui” ko e faʻahinga ia ʻoku moʻui lolotonga ʻa e ʻi ai ʻa Kalaisí. ʻE “toʻo hake” kinautolu ke fakafetaulaki mo e ʻEiki ko Sīsuú. Hangē tofu pē ko e meʻa naʻe hoko ki he muʻaki kau Kalisitiane angatonú, kuo pau ke nau mate ʻi he tuʻunga ko ha tokotaha ʻo e faʻahinga ʻo e tangatá ka nau fakataha mo Kalaisi ʻi hēvani.​—Loma 8:​17, 35-39.

Naʻe pehē ʻe Paula ʻi heʻene tohi ki he kau Kalisitiane ʻi Kolinitoó: “Pea ko eni pe meʻa ʻoku ou tala atu, kainga; ʻoku ʻikai lava ʻe he kakano mo e toto ke hokosi noa pe ʻa e Puleʻanga ʻo e ʻOtua: ʻumaʻā ha hokosi ʻe ʻAuha ʻa Taʻefaʻaʻauha. ʻE! kau tala atu ha misiteli: ʻE ʻikai te tau mohe kotoa pe, ka te tau liliu kotoa pe, ʻi ha foʻi momeniti, ʻi ha foʻi kemo pe, ʻi he ifi fakamui ʻo e talupite: ʻio, ʻe ifi ʻa e talupite, pea ʻe fokotuʻu ʻa e pekia, ʻo taʻefaʻaʻauha, pea ko kitautolu ʻe liliu.” (1 Kolinitō 15:​50-52) ʻI he mate ʻi he angatonu he lolotonga ʻa e ʻi ai ʻa Kalaisí ʻoku maʻu ai ʻe he tokotaha taki taha ʻo e toenga ʻo ʻIsileli fakalaumālié ʻa honau pale fakahēvaní. “ʻI ha foʻi kemo pe,” ʻoku fokotuʻu hake ia ko ha meʻa moʻui fakalaumālie pea “toʻo hake” ke fakafetaulaki mo Sīsū pea ke kaungāpule mo ia ʻi he Puleʻanga ʻo hēvaní. Kae fēfē ʻa e faʻahinga kehe kotoa ʻoku nau lotu kia Sihová? ʻI he fakaofiofi mai ʻa e ngataʻanga ʻo e tuʻu fulikivanu ko ení, ʻe toe toʻo hake mo kinautolu ki hēvani?

Hao Moʻui Atu​—Kae ʻIkai Fou ʻi ha Rapture

Koeʻuhi naʻe kamata ʻa e ʻi ai fakatuʻi ʻa Sīsuú ʻi he 1914, ʻoku tau fuʻu panaki ʻi he “kuoga oe gataaga” ʻo e māmani ko ení. (Tāniela 12:​4, PM) Naʻe fai fakatokanga ʻa Paula: “Pea ko e meʻa ki he ngaahi taimi mo e ngaahi kuonga, kainga, ko e ʻumaʻā haʻamau tohi atu. He ʻoku mou ʻilo kanokano, ko e hoko mai ʻa e ʻaho ʻo e ʻEiki ʻoku hange ko e haʻu ʻa e kaihaʻa ʻi he po. Tokaange ha taimi ʻoku nau pehe, ʻOku tau lelei mo tuʻumalie [“melino mo e maluʻanga,” NW], fakafokifā ʻoku tuʻu mai ʻa mala, ʻo hange ko e langā ki he fefine feitama: pea ʻe ʻikai ʻaupito te nau hao.” (1 Tesalonaika 5:​1-3) Ka ʻe hao ʻa e kau Kalisitiane ʻoku nau tokangá. ʻO anga-fēfē?

Ko e kalanga ki he “melino mo e maluʻanga” ko e meʻa ia ʻe hoko ki muʻa pē ʻi he vahaʻa taimi naʻe ui ʻe Sīsū ko e “mamahi lahi.” ʻOku pehē ʻi he tohi Fakahaá ʻi hono fakamatalaʻi ha “fuʻu kakai lahi” ʻo e faʻahinga angatonu ʻoku nau maʻu ʻa e ʻamanaki ke moʻui taʻengata ʻi ha māmani ko ha palataisi: “Ko eni ia ʻakinautolu ʻoku haʻu mei he mamahi lahi, pea naʻa nau fō honau kofu, ʻo fakahinehina ʻi he taʻataʻa ʻo e Lami.” (Fakahā 7:​9, 14; Luke 23:43) ʻOku ʻikai te nau maʻu ʻa e ʻamanaki ki ha rapture. Ka, ʻoku nau maʻu ʻa e ʻamanaki ke hao moʻui ʻi heni ʻi he māmaní. Kuo pau ke nau hokohoko atu ʻo ʻāʻā fakalaumālie ka nau mateuteu ki ai. ʻOku malava fēfē ke ke fai eni pea hao moʻui atu mei he ngataʻanga ʻo e tuʻu ko ení?

ʻOku fiemaʻu kiate koe ke ke ‘leʻo pea fakapotopoto pea ʻai ki he fatafata ʻa e sifa ko e tui mo e ʻofa, pea tatā ʻaki ʻa e ʻamanaki lelei ki he fakamoʻui.’ (1 Tesalonaika 5:​6-8, PM) Ko e taimi eni ke tokanga ki he Folofola fakaekikite ʻa e ʻOtuá, ko e Tohitapú. ʻI he fakaʻau ke ʻosi ʻa e taimi ʻoku toe ki muʻa pea toki hoko ʻa e ngataʻanga ki he tuʻu ko ení, ke ke tokanga ki he akonaki ʻa Paulá: “ʻOua ʻe taʻetokaʻi ʻa e ngaahi malanga palofisai; ka mou sivi kotoa pe: ʻilonga pe ʻa e lelei, puke maʻu ia.” (1 Tesalonaika 5:​20, 21) Ko ia ai, ʻoku fakaafeʻi koe ʻe he Kau Fakamoʻoni ʻa Sihová ki honau ngaahi Kingdom Hall, ʻa ia ʻe lava ke ke kau ai mo kinautolu ʻi he ako ki he ngaahi kikite ʻo e Tohitapú pea mo e ngaahi tafaʻaki kehe ʻo e Folofola fakamānavaʻi ʻa e ʻOtuá.

ʻI hoʻo tupu ʻi he ʻilo kānokano pea mo e tui, te ke ʻilo ai ʻo kau ki he taumuʻa ʻa Sihova ko e ʻOtuá ke toʻo mei he ʻuniveesí ʻa e faʻahinga kotoa ʻoku fakafepaki kiate iá pea ke fakafoki ʻa e māmaní ki he tuʻunga ko ha palataisi. ʻI hoʻo ngāueʻi ʻa e tuí, te ke toe kau nai ʻi he lotolotonga ʻo e faʻahinga te nau hao moʻui atu mei he mamahi lahí, ʻo monūʻia ke talitali lelei ʻa e toko laui miliona ʻe toe fokotuʻu ki he moʻui ʻi he māmaní. Pea ko ha fiefia lahi ē ke nofo ʻi he malumalu ʻo e Puleʻanga ʻo e ʻOtuá ʻi he pule ʻa Sīsū Kalaisi mo hono kaungāpulé, ʻa e faʻahinga kuo ‘toʻo hake ke fakafetaulaki ki he ʻEiki’ ʻaki hono fokotuʻu hake kinautolu ki he moʻui ʻi hēvaní!

Ko ia ai, ko e hā ʻa e ʻamanaki faka-Tohitapu moʻoni ki he faʻahinga talangofua ʻo e tangatá fakalūkufua? ʻOku ʻikai ko ha rapture. Ka, ko e moʻui taʻengata ʻi māmani ʻi he malumalu ʻo e pule ʻa e Puleʻanga ʻo e ʻOtuá.