ʻE Matuʻuaki ʻe Hoʻo Ngāué ʻa e Afí?

“Ke taki taha tokanga ki he anga ʻo ʻene langa [ʻi he makatuʻungá].” ​—1 KOLINITO 3:10.

 1. Ko e hā ʻa e ʻamanaki ʻoku fiefia ai ʻa e kau Kalisitiane anga-tonú ʻi he fekauʻaki mo ha kau ākonga ʻoku ʻamanekina?

KO HA ongo mātuʻa mali Kalisitiane ʻokú na sio fakamamaʻu ki heʻena kiʻi tama toki fanauʻi. Ko ha tokotaha malanga ʻo e Puleʻangá ʻokú ne sio ki ha fakahaaʻi ʻo e vēkeveke mo e mahuʻingaʻia mei he mata ʻo ha tokotaha ako Tohitapu. Ko ha tokotaha mātuʻa Kalisitiane ʻoku faiako mei he peletifōmú peá ne fakatokangaʻi ʻi he kau fanongó ha tokotaha mahuʻingaʻia foʻou ʻoku vēkeveke kumi ki he ngaahi konga Tohitapú ʻi heʻene Tohitapú. Ko e kau sevāniti anga-tonu ko ʻeni ʻa Sihová ʻoku nau maʻu ha loto ʻoku fonu ʻi he ʻamanaki. ʻOku ʻikai ala tuku ʻenau fifilí, ‘ʻE hoko mai nai ʻa e tokotaha ko ʻení ʻo ʻofa mo tauhi ʻa Sihova​—pea nofo anga-tonu ai pē?’ Ko hono moʻoní, ʻoku ʻikai ke ʻotomētiki pē ʻa e hoko ʻa ha ola pehē. ʻOku fiemaʻu ki ai ʻa e ngāue.

 2. Naʻe anga-fēfē hono fakamanatu ʻe he ʻapositolo ko Paulá ki he kau Kalisitiane Hepeluú ʻa e mahuʻinga ʻo e ngāue fakaefaiakó, pea ko e hā ʻa e sivisiviʻi-kita ʻoku ueʻi nai kitautolu ʻe he meʻá ni ke tau faí?

² Ko e ʻapositolo ko Paulá, ko ha faiako pōtoʻi tonu ia, naʻá ne fakamamafaʻi ʻa e mahuʻinga ʻo e ngāue faiako mo ngaohi-ākongá ʻi heʻene tohi: “Naʻe totonu ke mou faiako, koeʻuhi ko hoʻomou fuoloa.” (Hepelu 5:12) Ko e kau Kalisitiane ko ia naʻá ne lea ki aí naʻa nau fai ha fakalakalaka siʻisiʻi, ʻi he fakakaukau atu ki hono fuoloa ʻo ʻenau hoko ko e kau tuí. ʻI he ʻikai ʻaupito ke nau mateuteu ke akoʻi ʻa e niʻihi kehé, naʻe fiemaʻu ia ke fakamanatu kiate kinautolu ʻa e ngaahi tafaʻaki tefito ʻo e moʻoní. ʻI he ʻahó ni, ʻoku lelei kiate kitautolu kotoa ʻi he taimi ki he taimi ke tau fakamahuʻingaʻi hotau ngaahi tufakanga ko e kau faiakó pea sio ki he founga ʻe lava ke tau fai ai ha ngaahi fakaleleiʻi. ʻOku ʻi he tuʻunga fakatuʻutāmaki ʻa e ngaahi moʻuí. Ko e hā ʻe lava ke tau faí?

 3. (a) Ko e hā naʻe fakatatau ki ai ʻe he ʻapositolo ko Paulá ʻa e ngāue ko hono ngaohi ha ākonga Kalisitiané? (e) ʻI he tuʻunga ko e kau tufunga Kalisitiané, ko e hā ʻa e monū lahi ʻoku tau maʻú?

³ ʻI ha fakatātā lahi ange, naʻe fakatatau ai ʻe Paula ʻa e ngaohi ʻo e kau ākongá ki he ngāue ko hono langa ʻo ha fale. Naʻá ne kamata ʻaki ʻene pehē: “Ko e ongo kaungāngaue kimaua mo e ʻOtua: ko kimoutolu ko e ngoueʻanga ʻa e ʻOtua, ko e fale ʻo e ʻOtua ʻoku langa.” (1 Kolinito 3:9) Ko ia ai, ʻoku tau kau ʻi ha ngāue langa ʻoku fekauʻaki mo e kakaí; ʻoku tau tokoni ke langa hake kinautolu ke nau hoko ko e kau ākonga ʻa Kalaisi. ʻOku tau fai pehē ʻi he tuʻunga ko e kau kaungāngāue ʻo e Tokotaha ko ia “naʻa ne langa ʻa e meʻa kotoa pe.” (Hepelu 3:4) Ko ha monū lahi ē! Tau sio angé pe ʻe anga-fēfē hono tokoniʻi kitautolu ʻe he akonaki fakamānavaʻi ʻa Paula ki he kau Kolinitoó ke tau hoko ai ʻo pōtoʻi ange ʻi heʻetau ngāué. ʻE fakahangataha ʻetau tokangá ki heʻetau “pōtoʻi fakaefaiakó.”​—2 Timote 4:2, NW.

Ko Hono Fakatoka ʻa e Makatuʻunga Totonú

 4. (a) Ko e hā ʻa e ngafa ʻo Paula ʻi he ngāue langa faka-Kalisitiané? (e) Ko e hā ʻoku lava ai ke pehē naʻe ʻilo fakatouʻosi ʻe Sīsū mo ʻene kau fanongó ʻa e mahuʻinga ʻo e ngaahi makatuʻunga leleí?

⁴ Ke tuʻumaʻu mo tolonga ha fale, ʻoku fiemaʻu ki ai ha makatuʻunga lelei. Ko ia, naʻe tohi ʻe Paula: “Ko au, ʻi heʻeku faiʻaki ʻa e kelesi ʻa e ʻOtua naʻa ne ʻomi, ne u ʻai ʻa e maka-tuʻunga, ʻo tāu mo ha tufunga poto.” (1 Kolinito 3:10) ʻI hono ngāueʻaki ha fakatātā meimei tatau, naʻe fakamatala ai ʻa Sīsū Kalaisi ki ha fale naʻe hao ʻi ha ʻalotāmaki koeʻuhi ko hono tufungá naʻá ne fili ha makatuʻunga fefeka. (Luke 6:​47-49) Naʻe ʻilo ʻe Sīsū ʻa e meʻa kotoa fekauʻaki mo e mahuʻinga ʻo e ngaahi makatuʻungá. Naʻá ne ʻi ai tonu ʻi he taimi naʻe tanupou ai ʻe Sihova ʻa e foʻi māmaní.a (Palovepi 8:​29-31) Naʻe toe mahuʻinga foki ʻa e ngaahi makatuʻunga leleí ki he kau fanongo kia Sīsuú. Ko e ngaahi fale pē naʻe makatuʻunga leleí naʻe lava ke nau matuʻuaki ʻa e ngaahi tāfea mo e ngaahi mofuike fakatuʻupakē naʻe hoko ʻi he taimi ʻe niʻihi ʻi Pālesitainé. Ko ia, ko e hā ʻa e makatuʻunga naʻe ʻi he fakakaukau ʻa Paulá?

 5. Ko hai ʻa e makatuʻunga ʻo e fakatahaʻanga Kalisitiané, pea naʻe anga-fēfē hono tomuʻa tala ʻení?

⁵ Naʻe tohi ʻe Paula: “Ko e meʻa ki he maka-tuʻunga, talaʻehai ʻe lava ʻe ha taha ke ʻai mo ha tuʻunga kehe, ka ko ia pe ne toka ʻai, ʻa ia ko Sisu Kalaisi.” (1 Kolinito 3:11) Naʻe ʻikai ko e fuofua taimi ʻeni ia naʻe fakatatau ai ʻa Sīsū ki ha makatuʻungá. Ko hono moʻoní, naʻe tomuʻa tala ʻi he Aisea 28:16: “Ko eni ʻa e folofola ʻa Atonai Sihova, Vakai ko au eni kuo u ʻai ʻi Saione ha maka, ha maka sivi, ha maka tuliki mahuʻinga kuo fungani hono fakatoka.” Naʻe fuoloa pē ʻa e taumuʻa ʻa Sihova ke hoko hono ʻAló ko e makatuʻunga ʻo e fakatahaʻanga Kalisitiané.​—Sāme 118:22; Efeso 2:​19-22; 1 Pita 2:​4-6.

 6. Naʻe anga-fēfē hono fakatoka ʻe Paula ʻa e makatuʻunga totonu ʻi he kau Kalisitiane Kolinitoó?

⁶ Ko e hā ʻa e makatuʻunga ki he kau Kalisitiane tāutahá? Hangē ko ia naʻe leaʻaki ʻe Paulá, ʻoku ʻikai ha makatuʻunga ki ha Kalisitiane moʻoni ka ko e taha pē ko ia naʻe fakatoka ʻi he Folofola ʻa e ʻOtuá​—ʻa Sīsū Kalaisi. Naʻe fakatoka moʻoni ʻe Paula ha makatuʻunga pehē. ʻI Kolinitō, ko e feituʻu naʻe tokaʻi lahi ai ʻa e filōsofiá, naʻe ʻikai te ne feinga ai ke fakalotoʻi ʻa e kakaí ʻaki ʻa e poto fakamāmaní. Ka, naʻe malangaʻaki ʻe Paula ʻa “Kalaisi nae tutuki ki he akau,” ʻa ia naʻe tukunoaʻi ʻe he ngaahi puleʻangá ko e koto “vale.” (1 Kolinito 1:​23, PM) Naʻe akoʻi ʻe Paula ko Sīsuú ko e tokotaha tefito ia ʻi he ngaahi taumuʻa ʻa Sihová.​—2 Kolinito 1:20; Kolose 2:​2, 3.

 7. Ko e hā ʻoku lava ke tau ako mei he lave ʻa Paula kiate ia tonu ko “ha tufunga poto”?

⁷ Naʻe fakatokangaʻi ʻe Paula naʻá ne fai ʻa e faiako peheé “ʻo tāu mo ha tufunga poto.” Naʻe ʻikai ko ha lea loto-pōlepole ʻeni. Ko ha fakamoʻoni pē fekauʻaki mo ha meʻaʻofa fakaofo naʻe foaki ange ʻe Sihova kiate ia​—ʻa ia ko hono fokotuʻutuʻu pe tataki ʻa e ngāué. (1 Kolinito 12:28) Ko hono moʻoní, ko kitautolu he ʻaho ní ʻoku ʻikai ke tau maʻu ʻa e ngaahi meʻaʻofa fakaemana naʻe foaki ki he kau Kalisitiane ʻi he ʻuluaki senitulí. Pea mahalo pē ʻoku ʻikai te tau fakakaukau kiate kitautolu ko ha kau faiako ne meʻaʻofaʻaki mai. Ka ʻi ha ʻuhinga mahuʻinga, ʻoku tau pehē. Fakakaukau angé: ʻOku foaki mai ʻe Sihova kiate kitautolu ʻa hono laumālie māʻoniʻoní ke tokoniʻi kitautolu. (Fakafehoanaki mo Luke 12:​11, 12.) Pea kuo tau maʻu ʻa e ʻofa ʻa Sihová pea mo ha ʻilo fekauʻaki mo e ngaahi akonaki tefito ʻo ʻene Folofolá. Ko e ngaahi meʻá ni ko e ngaahi meʻaʻofa fakaofo moʻoni ia ke ngāueʻaki ʻi hono akoʻi ʻa e niʻihi kehé. ʻAi ke tau fakapapauʻi ke ngāueʻaki kinautolu ki hono fakatoka ʻa e makatuʻunga totonú.

 8. ʻE anga-fēfē ʻetau fakatoka ʻa Kalaisi ko ha makatuʻunga ʻi he kau ākonga ʻoku ʻamanekiná?

⁸ ʻI he taimi ʻoku tau fakatoka ai ʻa Kalaisi ko ha makatuʻungá, ʻoku ʻikai te tau ʻai ia ʻi ha tuʻunga ko ha kiʻi pēpē taʻealatokoni ʻi ha ʻaiʻanga kai ʻo e fanga manú, pea ʻikai ko ha tatau ʻo Sihova ʻi ha Tolu-Tahaʻi-ʻOtua. ʻIkai, ko e ngaahi foʻi fakakaukau taʻefakatohitapu peheé ʻoku nau fokotuʻu ha makatuʻunga ki he kau Kalisitiane loí. Kae kehe, ʻoku tau akoʻi ko ia ʻa e moʻungaʻi tangata lahi taha kuo moʻui maí, ʻa ia naʻá ne foaki ʻene moʻui haohaoá koeʻuhi ko kitautolu, pea ʻokú ne hoko he ʻahó ni ko e Tuʻi fakanofo ʻa Sihova ʻoku pule ʻi hēvani. (Loma 5:8; Fakahā 11:15) ʻOku tau toe feinga ke ueʻi ʻetau kau akó ke nau ʻaʻeva ʻi he topuvaʻe ʻo Sīsuú pea faʻifaʻitaki ki hono ngaahi ʻulungāngá. (1 Pita 2:21) ʻOku tau loto ke ueʻi loloto kinautolu ʻe he faivelenga ʻa Sīsū ki he ngāue fakafaifekaú, ʻa ʻene manavaʻofa ki he māʻulaló mo e faingataʻaʻiá, ʻa ʻene meesi ki he kau angahala naʻe loto-mafesifesi ʻi heʻenau halaia pē ʻa kinautolú, ʻa ʻene loto-toʻa taʻeueʻia ʻi he funga ʻo e ngaahi ʻahiʻahí. Ko e moʻoni, ko Sīsuú ko ha makatuʻunga fisifisimuʻa. Ka, ko e hā ʻa e meʻa ʻoku hoko mai aí?

Langa ʻAki ʻa e Ngaahi Naunau Totonu

 9. Neongo ko e ngāue tefito ʻa Paulá ko ha tokotaha fakatoka-makatuʻunga, ko e hā naʻá ne tokanga ki ai fekauʻaki mo e faʻahinga naʻa nau tali ʻa e moʻoni ʻo e meʻa naʻá ne akoʻí?

⁹ Naʻe tohi ʻe Paula: “Pea ka fai ʻe ha taha ʻene langa ʻi he tuʻunga ko ia, ʻo ne langa koula, siliva, maka mahuʻinga, ʻakau, musie, pe veve; ʻe faifai pea eʻa ʻa e ngaue ʻa e tangata taki taha: he ʻe sivi ia ʻe he ʻAho Lahi, koeʻuhi ko ʻene hoko mai mo e afi; pea ʻe sivi ʻe he afi ko ia ʻa e ngaue ʻa e tangata taki taha, pe kuo fefē.” (1 Kolinito 3:​12, 13) Ko e hā naʻe ʻuhinga ki ai ʻa Paulá? Fakakaukau ki he ʻātakai ki aí. Ko e ngāue tefito ʻa Paulá ko ha tokotaha fakatoka-makatuʻunga. ʻI heʻene ngaahi fononga fakamisinalé, naʻá ne fononga mei he kolo ki he kolo, ʻo malanga ki he tokolahi ʻa ia naʻe ʻikai ʻaupito ke nau fanongo ʻia Kalaisí. (Loma 15:20) ʻI hono tali ʻe he kakaí ʻa e moʻoni ko ia naʻá ne akoʻí, naʻe fokotuʻu ai ʻa e ngaahi fakatahaʻanga. Naʻe tokanga lahi ʻaupito ʻa Paula fekauʻaki mo e faʻahinga anga-tonu ko ʻení. (2 Kolinito 11:​28, 29) Kae kehe, naʻe fiemaʻu ʻe heʻene ngāué ia ke ne hoko atu. Ko ia, ʻi he hili ʻa e māhina ʻe 18 ʻo hono fakatoka ha makatuʻunga ʻi Kolinitoó, naʻá ne mavahe ke malanga ʻi he ngaahi kolo kehé. Ka, naʻá ne kei mahuʻingaʻia lahi ʻi he anga ʻo e muimui ʻa e niʻihi kehé ʻi he ngāue naʻá ne fai aí.​—Ngāue 18:​8-11; 1 Kolinito 3:6.

10, 11. (a) Naʻe anga-fēfē hono fakafaikehekeheʻi ʻe Paula ʻa e ngaahi faʻahinga kehekehe ʻo e ngaahi naunau langá? (e) Ko e hā ʻa e ngaahi faʻahinga langa moʻoni naʻe tuʻu nai ʻi Kolinitō ʻo e kuonga muʻá? (f) Ko e hā ʻa e ngaahi faʻahinga langa ʻoku ngalingali te ne matuʻuaki ha afi, pea ko e hā ʻa e lēsoni ʻaonga ʻoku tokonaki mai ʻe he meʻa ko iá ki he kau ngaohi-ākonga Kalisitiané?

¹⁰ ʻOku ngalingali ko e niʻihi ko ia naʻa nau langa ʻi he makatuʻunga naʻe fakatoka ʻe Paula ʻi Kolinitoó naʻe ʻikai sai ʻenau ngāué. Ke fakaeʻa ʻa e palopalemá, naʻe fakafaikehekeheʻi ʻe Paula ʻa e faʻahinga kehekehe ʻe ua ʻo e ngaahi naunau langá: ko e koula, siliva, mo e maka mahuʻinga ʻi he tafaʻaki ʻe tahá; ko e ʻakau, musie, mo e veve ʻi he tafaʻaki ʻe tahá. Ko ha fale ʻe lava ke tuʻu hangatonu mei he ngaahi naunau lelei, tolonga, velangataʻa; pe ko e taha ʻe lava ke fokotuʻu fakavave ʻo ngāueʻaki ʻa e ngaahi naunau ʻauhangofua, fakataimi, mo velangofua. Ko ha fuʻu kolo lahi pehē hangē ko Kolinitoó ʻoku ʻikai ha toe veiveiua naʻe fonu ʻi he ngaahi fale ʻo e ongo faʻahingá ni fakatouʻosi. Naʻe ʻi ai ʻa e ngaahi temipale molumalu naʻe ngaohi mei he ngaahi fuʻu konga maka lalahi mo totongi mamafa, naʻe kofu pe teuteuʻi nai hono konga ʻaki ʻa e koula mo e siliva.b Naʻe eʻa molumalu hake nai ʻa e ngaahi fuʻu langa tolongá ni ʻo ofi ki he fanga kiʻi fale fakahekeheke, fanga kiʻi fale palakū mo e fanga kiʻi palepale māketi naʻe alangafale ʻaki ʻa e ʻakaú pea ʻato ʻaki ʻa e lauʻi uité.

¹¹ Ko e hā ʻe hoko kapau ʻe vela ʻa e ngaahi falé ni? Naʻe hā mahino pē ʻa e talí ʻi he taimi ʻo Paulá ʻo hangē pē ko ia ʻi hoʻotautolú. Ko hono moʻoní, naʻe ikuʻi pea tutu ʻa e fuʻu kolo ko Kolinitoó ʻe he Seniale Loma ko Mummius ʻi he 146 K.M. Ko e ngaahi alangafale lahi ʻo e ʻakau, musie, pe vevé ko hono moʻoní naʻe ʻauha ʻosiʻosingamālie. Fēfē ʻa e ngaahi fuʻu fale fefeka ʻo e maká, naʻe teuteuʻi ʻaki ʻa e silivá mo e koulá? ʻOku ʻikai ha veiveiua naʻe tuʻu pē ia. Mahalo ne toutou fakalaka fakaʻaho mai ʻa e kau ako ʻa Paula ʻi Kolinitoó ʻi he ngaahi fuʻu falé ni​—ʻa e ngaahi fuʻu maka kāfakafa ne hao mai ʻi he ngaahi fakatamaki ne fuoloa ʻene fakaʻauhamālie ʻa e ngaahi fale ʻikai tolonga naʻe tuʻu takai aí. Ko ia, he māʻalaʻala lahi ē ko hono ʻai ʻe Paula ʻene poiní! ʻI he taimi faiakó, ʻoku fiemaʻu ke tau ʻai kitautolu ko e kau tufunga. ʻOku fiemaʻu ke tau ngāueʻaki ʻa e ngaahi naunau lelei taha, tolonga taha ʻe malavá. ʻE lahilahi ange ki he tuʻuloa ʻetau ngāué ʻi he founga ko iá. Ko e hā ʻa e ngaahi naunau tolonga ko iá, pea ko e hā ʻoku mātuʻaki mahuʻinga ai ke ngāueʻaki kinautolú?

ʻE Matuʻuaki ʻe Hoʻo Ngāué ʻa e Afí?

12. ʻI he ngaahi founga fē naʻe fakatamulu ai ʻa e ngāue langa ʻa e niʻihi ʻo e kau Kalisitiane ʻi Kolinitoó?

¹² ʻOku hā mahino, naʻe ongoʻi ʻe Paula naʻe ʻi ai ʻa e niʻihi ʻo e kau Kalisitiane ʻi Kolinitoó naʻe ʻikai ke loko sai ʻenau langa naʻe faí. Ko e hā ʻe meʻa naʻe halá? Hangē ko ia ʻoku fakahaaʻi ʻe he potutohí, naʻe fakameleʻi ʻa e fakatahaʻangá ʻe he fakafaʻafaʻahi, ʻa e leleiʻia ʻi he ngaahi angaʻitangatá neongo ʻene fakatuʻutāmaki ki he fāʻūtaha ʻa e fakatahaʻangá. Naʻe pehē ʻe he niʻihi, “ʻOku ʻo Paula au,” lolotonga iá ʻoku vilitaki mai ʻa e niʻihi kehe ia, “ʻOku ʻo Apolosi au.” ʻOku ngalingali naʻe fuʻu fakakaukau lahi ʻa e niʻihi ki honau poto pē ʻo kinautolú. Ko hono olá, ʻoku ʻikai ha ofo, naʻe hoko ai ha ʻatimosifia ʻo e fakakaukau fakakakano, taʻematuʻotuʻa fakalaumālie, pea mo e tupulaki tavale ʻa e “meheka mo e fetuʻusi.” (1 Kolinito 1:12; 3:​1-4, 18) Ko e ngaahi anga ko ʻení naʻe tapua moʻoni mai ia ʻi he akonaki naʻe fai ʻi he fakatahaʻangá pea ʻi he ngāue fakafaifekaú. Ko e olá leva naʻe fakatamulu ʻenau ngāue ngaohi-ākongá, ʻo hangē ha ngāue langa naʻe fai ʻaki ha ngaahi naunau ʻikai loko leleí. ʻE ʻikai ke hao ia ʻi he “afi.” Ko e hā ʻa e afi naʻe lea ʻa Paula ʻo fekauʻaki mo iá?

13. Ko e hā ʻoku fakatātaaʻi ʻe he afi ʻi he talanoa fakatātā ʻa Paulá, pea ko e hā ʻoku totonu ke lāuʻilo ki ai ʻa e kau Kalisitiané kotoa?

¹³ ʻOku ʻi ai ha afi ʻoku tau fehangahangai kotoa mo ia ʻi he moʻuí​—ko e ngaahi ʻahiʻahiʻi ʻo ʻetau tuí. (Sione 15:20; Semisi 1:​2, 3) Naʻe fiemaʻu ke ʻilo ʻe he kau Kalisitiane ʻi Kolinitoó, ʻo hangē tofu pē ko hono fiemaʻu ke tau ʻilo ki ai he ʻaho ní, ko e tokotaha kotoa pē ʻoku tau akoʻi ki ai ʻa e moʻoní ʻe ʻahiʻahiʻi. Kapau ʻoku ʻikai ke sai ʻetau akoʻí, ʻe ʻi ai nai ʻa e ngaahi ikuʻanga fakamamahi. Naʻe fakatokanga ʻa Paula: “Kapau ʻe tuʻu ʻa e ngafa ʻa ha taha ʻi he langa fale; te ne maʻu totongi. Kapau ʻe vela ʻo ʻauha ʻene ngafa meʻa, ʻe mole ʻene totongi, ka te ne hao ʻe ia; kae hange ha hao mei he loto afi.”c​—1 Kolinito 3:​14, 15.

14. (a) ʻE anga-fēfē nai ʻa e tofanga ʻa e kau ngaohi-ākonga Kalisitiané ʻi ha “mole,” ka ʻe anga-fēfē nai ʻenau aʻusia ʻa e fakamoʻuí ʻo hangē ha hao mei he loto afí? (e) ʻE lava fēfē ke tau fakasiʻisiʻi ʻa e hoko ʻo tofanga ʻi he molé?

¹⁴ He ngaahi lea fakamātoato ē! ʻE lava ke mātuʻaki fakalotomamahi ʻa e ngāue lahi ke tokoniʻi ha taha ke hoko ko ha ākonga, pea ʻosi angé ʻoku tō ʻa e tokotahá ia ʻi he fakatauelé pe fakatangá pea faai atu pē ʻo ne mavahe mei he hala ʻo e moʻoní. ʻOku lāuʻilo lahi ki ai ʻa Paula ʻi heʻene pehē ʻoku tau tofanga ʻi ha mole ʻi he ngaahi tuʻunga peheé. ʻOku mātuʻaki fakalotomamahi nai ʻa e meʻa ko ia ko hotau fakamoʻuí ʻoku fakamatalaʻi ʻoku hangē ha hao “mei he loto afi”​—hangē ha tangata ʻoku mole ʻene meʻa kotoa ʻi ha afi pea ko ia tonu naʻe mālō pē ʻene haó. Ki heʻetau tafaʻakí, ʻe lava fēfē ke tau fakasiʻisiʻi ʻa e tofanga ʻi he molé? Langa ʻaki ʻa e ngaahi naunau ʻoku tolongá! Kapau ʻoku tau akoʻi ʻetau kau akó ke aʻu ki honau lotó, ʻo ueʻi kinautolu ke nau mahuʻingaʻia ʻi he ngaahi ʻulungaanga faka-Kalisitiane mahuʻinga ko ia hangē ko e poto, ʻiloʻilo, manavahē kia Sihova, mo e tui moʻoní, tā ʻoku tau langa ʻaki ʻa e ngaahi naunau ʻoku tolonga, mo velangataʻá. (Sāme 19:​9, 10; Palovepi 3:​13-15; 1 Pita 1:​6, 7) Ko e faʻahinga ʻoku nau maʻu ʻa e ngaahi ʻulungaanga ko ʻení te nau hokohoko atu ke fai ʻa e finangalo ʻo e ʻOtuá; ko haʻanautolú ko ha ʻamanaki papau ki he moʻui ai pē ʻo taʻengata. (1 Sione 2:17) ʻE lava fēfē leva ke tau ngāueʻaongaʻaki ʻa e fakatātā ʻa Paulá? Fakakaukau ange ki ha ngaahi fakatātā ʻe niʻihi?

15. ʻI he ngaahi founga fē ʻoku malava ke tau fakapapauʻi ai ʻoku tau fakaʻehiʻehi mei hono fai fakatamulu ʻa e ngāue langá ʻi he fekauʻaki mo ʻetau kau ako Tohitapú?

¹⁵ ʻI hono akoʻi ʻo e kau ako Tohitapú, ʻoku ʻikai ʻaupito totonu ke hakeakiʻi ʻa e tangatá ʻo laka ia ʻia Sihova ko e ʻOtuá. ʻOku ʻikai ko ʻetau taumuʻá ke akoʻi kinautolu ke nau vakai mai kiate kitautolu ko ha matavai tefito ia ʻo e potó. ʻOku tau loto ke nau hanga kia Sihova, ki heʻene Folofolá, pea mo ʻene kautahá ki ha tataki. Ki he ʻuhinga ko iá, ʻoku ʻikai te tau ʻoatu pē ʻa e anga ʻo ʻetau ngaahi fakakaukaú ʻi he tali ki heʻenau ngaahi fehuʻí. Kae kehe, ʻoku tau akoʻi kinautolu ke nau kumi ʻa e ngaahi talí, ʻo ngāueʻaki ʻa e Tohitapú mo e ngaahi tohi kuo tokonaki mai ʻe he “tamaioeiki agatonu mo boto.” (Mātiu 24:​45-47, PM) Ki he ngaahi ʻuhinga meimei tatau, ʻoku tau tokanga ke ʻoua te tau maʻunimā ʻetau kau ako Tohitapú. ʻI he ʻikai ke ongoʻi mamahi ʻi he fakahāhā ʻe he niʻihi ha mahuʻingaʻia ʻiate kinautolú, ʻoku totonu ke tau fakalototoʻaʻi ʻetau kau akó ke nau “fano” atu ʻi heʻenau ʻofá, ʻai ke nau ʻilo mo houngaʻia ʻi he tokolahi ʻe ala lava ʻi he fakatahaʻangá.​—2 Kolinito 6:​12, 13.

16. ʻE anga-fēfē nai ʻa e langa ʻaki ʻe he kau mātuʻá ʻa e ngaahi naunau velangataʻá?

¹⁶ ʻOku fakahoko foki ʻe he kau mātuʻa Kalisitiané ha ngafa mātuʻaki mahuʻinga ʻi hono langa hake ʻo e kau ākongá. ʻI he taimi ʻoku nau faiako mai ai mei muʻa ki he fakatahaʻangá, ʻoku nau feinga ke langa ʻaki ʻa e ngaahi naunau velangataʻa. Ko honau tufakanga fakaefaiakó, taukeí, mo e angaʻitangatá ʻoku kehekehe lahi nai, ka ʻoku ʻikai te nau ngāueʻaki ʻa e ngaahi faikehekehe ko ʻení ke tohoaki mai ai ha kau muimui kiate kinautolu. (Fakafehoanaki mo Ngāue 20:​29, 30.) ʻOku ʻikai te tau ʻilo lelei ʻe kitautolu ki he ʻuhinga naʻe pehē ai ʻe he niʻihi ʻi Kolinitoó, “ʻOku ʻo Paula au” pe, “ʻOku ʻo Apolosi au.” Ka ʻoku lava ke tau fakapapauʻi naʻe ʻikai ha taha ʻi he ongo mātuʻa anga-tonu ko ʻení naʻá ne poupouʻi ha fakakaukau fakafaʻafaʻahi pehē. Naʻe ʻikai ala fakahekehekeʻi ʻaki ʻa Paula ha ngaahi lea langaʻiʻofa pehē; naʻá ne talitekeʻi mālohi kinautolu. (1 Kolinito 3:​5-7) Pehē pē mo e ʻahó ni, ʻoku tauhi maʻu ʻe he kau mātuʻá ʻi heʻenau fakakaukaú ʻoku nau tauhi “ʻa e fanga sipi ʻa e ʻOtua.” (1 Pita 5:2, fakaʻītali ʻamautolu.) ʻOku ʻikai ko e meʻa ia ʻa ha tangata. Ko ia ʻoku tuʻumaʻu ʻa e kau mātuʻá ʻo fakafepakiʻi ha faʻahinga hehema pē ki ha tangata ʻe taha ke puleʻi ʻa e tākangá pe ko e kulupu ʻo e kau mātuʻá. Kapau pē ʻoku ueʻi ʻa e kau mātuʻá ʻe ha holi anga-fakatōkilalo ke tauhi ʻa e fakatahaʻangá, ʻo aʻu ki he ngaahi lotó, pea tokoni ki he fanga sipí ke nau tauhi loto-ʻaufuatō ʻa Sihova, ʻoku nau langa ʻaki ʻa e ngaahi naunau velangataʻa.

17. ʻOku anga-fēfē ʻa e feinga ʻa e ngaahi mātuʻa Kalisitiané ke langa ʻaki ʻa e ngaahi naunau velangataʻá?

¹⁷ ʻOku tokanga loloto foki ʻa e ngaahi mātuʻa Kalisitiané fekauʻaki mo e meʻá ni. He fakaʻamu lahi ē ko kinautolu ke sio ʻoku moʻui taʻengata ʻenau fānaú! Ko e ʻuhinga ia ʻoku nau ngāue lahi ai ke “uhuʻi” ʻa e ngaahi tefitoʻi moʻoni ʻo e Folofola ʻa e ʻOtuá ki he loto ʻo ʻenau fānaú. (Teutalonome 6:​6, 7) ʻOku nau loto ke ʻilo ʻe heʻenau fānaú ʻa e moʻoní, ʻo ʻikai ʻi he tuʻunga ko ha foʻi seti ʻo e ngaahi tuʻutuʻuni, pe ko ha lau angimui ʻo ha ngaahi moʻoniʻi meʻa, ka ʻi he tuʻunga ko ha founga moʻui ʻoku kakato, faitāpuekina, mo fiefia. (1 Timote 1:11) Ke langa ʻenau fānaú ke hoko ko e kau ākonga anga-tonu ʻa Kalaisi, ʻoku feinga ʻa e ngaahi mātuʻa anga-ʻofá ke ngāueʻaki ʻa e ngaahi naunau velangataʻá. ʻOku nau ngāue anga-kātaki mo ʻenau fānaú, ʻo tokoniʻi kinautolu ke nau tuku atu ʻa e ngaahi ʻulungaanga ʻoku fehiʻa ai ʻa Sihová pea fakatupu ʻa e ngaahi ʻulungaanga ʻokú ne ʻofa aí.​—Kaletia 5:​22, 23.

Ko e Foʻui ʻo Hai?

18. ʻI hono siʻaki ʻe ha ākonga ʻa e akonaki leleí, ko e hā heʻikai pau ai ke pehē ko e foʻui ia ʻo e faʻahinga ʻoku nau feinga ke akoʻi mo akonekina iá?

¹⁸ ʻOku langaʻi hake ʻe he lāuleá ni ha fehuʻi mahuʻinga. Kapau ʻoku tō mei he moʻoní ʻa e tokotaha ʻoku tau feinga ke tokoniʻí, ʻoku ʻuhinga iá naʻa tau tō ʻi he tuʻunga ko e kau faiakó​—kuo pau pē naʻa tau langa ʻaki ʻa e ngaahi naunau ʻikai loko sai? ʻOku ʻikai pau ia ke pehē. ʻOku fakapapauʻi mai ʻe he ngaahi lea ʻa Paulá kiate kitautolu ko ha fatongia lahi ʻa e kau ki he langa hake ʻo e kau ākongá. ʻOku fiemaʻu ke tau fai ʻa e meʻa kotoa ʻi hotau mālohí ke lelei ʻetau langá. Ka ʻoku ʻikai tala mai ʻe he Folofola ʻa e ʻOtuá ia ke tau fua ʻa e fatongiá kotoa pea hoko ʻo mafasia ʻi he halaia ʻi he taimi ʻoku tafoki ai mei he moʻoní ʻa e faʻahinga ko ia ʻoku tau feinga ke tokoni ki aí. ʻOku toe ʻi ai mo e ngaahi meʻa kehe ʻoku kaunga ki ai tuku kehe hotau ngafa ʻo kitautolu ko e kau tufungá. Ko e fakatātaá, fakatokangaʻi ʻa e meʻa ʻoku leaʻaki ʻe Paula ʻo fekauʻaki, naʻa mo e faiako kuó ne fai ha ngāue ʻikai loko sai ʻi he ngāue langa ko ʻení: “ʻE mole ʻene totongi, ka te ne hao ʻe ia.” (1 Kolinito 3:15) Kapau ʻoku faai atu pē nai ʻo maʻu ʻe he tokotahá ni ʻa e fakamoʻuí​—ka ko e ʻulungaanga faka-Kalisitiane ia naʻá ne feinga ke langa ʻi heʻene tokotaha akó ʻoku hangē ko ia ʻoku fakatātaaʻi ʻoku “vela ʻo ʻauha” ʻi ha ʻahiʻahi kakaha​—ko e hā kuo pau ke tau fakaʻosiʻakí? Ko hono moʻoní, ʻoku tuku ʻe Sihova ʻa e foʻui tefito ko iá ki he tokotaha akó ki heʻene fili pē ʻaʻana pe te ne muimui ki ha ʻalunga anga-tonu pe ʻikai.

19. Ko e hā te tau lave ki ai ʻi he kupu hoko maí?

¹⁹ Ko e fatongia fakafoʻituituí, pe fakatāutahá, ko ha meʻa ʻoku mahuʻinga lahi. ʻOku kaunga ia kiate kitautolu taki taha. ʻI hono ʻai mahinó, ko e hā ʻoku akoʻi mai ʻe he Tohitapú ʻi he meʻa ko iá? ʻE lave ʻetau kupu hoko maí ki he meʻá ni.

[Fakamatala ʻi lalo]

Ko e Hā Haʻo Tali?

◻ Ko e hā ʻa e “makatuʻunga” ʻi ha Kalisitiane moʻoni, pea ʻoku anga-fēfē hono fakatoka iá?

◻ Ko e hā ʻoku lava ke tau ako mei he ngaahi faʻahinga kehekehe ʻo e ngaahi naunau langá?

◻ Ko e hā ʻoku fakatātaaʻi ʻe he “afi,” pea ʻoku anga-fēfē ʻene fakatupunga ʻa e niʻihi ke nau tofanga ʻi ha “mole”?

◻ ʻE anga-fēfē nai ʻa hono fai ʻe he kau faiako Tohitapú, kau mātuʻá, mo e ngaahi mātuʻá ʻa e langa ʻaki ʻa e ngaahi naunau velangataʻá?

[Fakatātā ʻi he peesi 9]

ʻI he ngaahi kolo lahi ʻo e kuonga muʻá, ko e ngaahi fale maka velangataʻá naʻe tuʻu fakataha mo e ngaahi langa masivesiva ange