Ko ha Tohi mei he Kulupu Pulé

Siʻi Fanga Tokoua mo e Fanga Tuofāfine:

KO HA meʻa fakafiefia ia ke tohi atu kia kimoutolu! ʻOku mau fakaongoongoleleiʻi atu kimoutolu ʻi he ʻofa mo e feilaulauʻi-kita ʻoku mou hokohoko atu hono fakahāhaá. Te mou sio ʻi he ngaahi peesi ʻo e Yearbook ko ení kuo fakahoko ʻa e meʻa lelei lahi ʻi he lolotonga ʻo e taʻu fakangāue kuo maliu atú. Kuo tau toe fakamoleki ai ha houa laka hake ʻi he taha pilioná ʻi he ngāue fakamalangá mo e ngāue fakafaiakó, ʻi hono fakalototoʻaʻi fakahangatonu ʻa e kakaí ke nau ʻunuʻunu ofi kia Sihová. ʻIkai ko ha lāngilangi ia ke hoko ko e kaungāngāue fakataha mo hotau ʻOtua lāngilangiʻia mo e Tamai fakahēvaní?​—1 Kol. 3:9.

ʻI heʻemau hanga atu ki he ngāue mei muʻá, ʻoku mau tuipau te mou hokohoko atu ʻi he faʻifaʻitaki ki he faivelenga mo e tui ʻa e kau sevāniti ʻa e ʻOtuá, hangē ko ia ʻoku fakamatalaʻi ʻi he lēkooti faka-Tohitapú. Ko e fakatātaá, ko e ʻapositolo ko Paulá, naʻá ne vēkeveke ke hoko ʻo ola lelei ʻi he lahi taha ʻe malavá, ʻi hono pouaki ʻa e ngaahi meʻa ʻo e Puleʻangá. ʻOku hā mahino, ʻi he lolotonga ʻo e taʻu fakaʻosi ʻo ʻene nofo ʻi ʻEfesoó naʻá ne tohi ai ʻene ʻuluaki tohi ki he fakatahaʻanga Kalisitiane ʻi Kolinitoó. ʻI he fekauʻaki mo ʻene ngaahi palani he taimi ko iá, naʻá ne tohi: “Te u nofo pe ʻi Efeso, ʻo aʻu ki he Penitekosi; he kuo fakaava kiate au ha matapa lahi [“ʻoku taki atu ki he ngāué,” NW], pea ʻoku tokolahi ʻa e taʻofi [“kau fakafepakí,” NW].”—1 Kol. 16:​8, 9.

Naʻe ʻosi palani ʻa Paula ke folau ki Masitōnia mo Kolinitō. Kae kehe, naʻá ne ʻiloʻi ha faingamālie ke fai ai ha ngāue ʻaonga ʻaki ʻene nofo fakataimi ʻi ʻEfesō. Naʻe ngaofengofua ʻa Paula; naʻá ne sio ki ha tuʻunga lelei ʻa ia ʻe lava ke ne pouaki ai ʻa e ngaahi meʻa ʻo e Puleʻangá ʻi he feituʻu tonu naʻá ne ʻi aí, ko ia ai, naʻá ne feʻunuʻaki ʻa ʻene taimi-tēpilé ʻo fakatatau ki ai. Naʻe fakaava mai kiate ia ha matapā lahi ʻoku taki atu ki he ngāué, pea naʻe vēkeveke ʻa Paula ke ngāueleleiʻaki ʻa e faingamālié ke kau ki ai.

Ke fai iá ʻe fiemaʻu ki ai ʻa e ngāue lahi—ʻi hono fakatou malangaʻi ʻa e ongoongo leleí mo hono langa hake ʻa e fakatahaʻanga ʻi ʻEfesoó. Ki he kau tangata taʻumotuʻa ʻo e fakatahaʻanga ʻi he kolo ko iá, naʻe lea ki ai ʻa Paula ki mui: “Naʻe ʻikai te u taetae ha meʻa, kau fakahā pe mo akoʻaki kiate kimoutolu ʻi he ʻao ʻo e kakai, pea ʻi he fale taki taha; ʻo u talatalatonu ki he Siu mo e Kalisi fakatouʻosi ʻa e fakatomala ʻo tafoki ki he ʻOtua, mo e tui pikitai ki hotau ʻEiki ko Sīsū.”—Ng. 20:​20, 21.

ʻI he tuʻunga tatau, ko e tokolahi ʻo kimoutolu siʻi fanga tokoua mo e fanga tuofāfiné kuo mou ngāueleleiʻaki ʻa e ngaahi faingamālie kuo fakaava atu kia kimoutolú. Lolotonga ʻa e taʻu fakangāue kuo maliu atú, ʻi hono fakaʻavalisí, naʻe malava ai ʻa e toko 798,938 ke fokotuʻutuʻu ʻenau ngaahi meʻá koeʻuhi ke kau ai ʻi ha founga ʻo e ngāue fakafaifekau tāimuʻá. Kuo folau ʻa e niʻihi ʻo kimoutolu ki he ngaahi ngataʻanga ʻo e māmaní koeʻuhí ke ngāue ai ko e kau misinale. ʻOku mou fakamafola faivelenga ʻa e ongoongo leleí pea langa hake ʻa e ngaahi fakatahaʻangá. Ko e niʻihi kehe ʻo kimoutolu kuo mou ako ha lea ʻe taha, koeʻuhi ke mou lava ai ʻo tokoniʻi ʻa e kakai lea muli ʻoku nofo ofi atú. Kuo toe fokotuʻutuʻu ʻe he niʻihi kehe ʻenau ngaahi meʻá ke ngāue ʻi he feituʻu kuo teʻeki ke vaheʻi ki ai ha tahá pe ke ngāue ʻi he feituʻu ʻoku lahi ange ai ʻa e fiemaʻú. Kuo aʻu ʻo ʻiloʻi ʻe he niʻihi kuo fakaava mai ha matapā lahi ki he ngāué ʻi he ʻapiakó, ʻi he ngāueʻangá, pe ʻi he ngaahi tuʻunga kehe ʻa ia ʻe lava ke fai ai ha fakamoʻoni ola lelei, ʻo hangē ko ia ʻi he telefoní. Ko e ngaahi meʻa ʻoku hokosia takatakai ʻi he māmaní ʻoku fakamoʻoniʻi ai ko e kakai ʻa e ʻOtuá, ʻa e talavou mo e taʻumotuʻa, ʻoku nau feinga vēkeveke pea maʻu ʻa e ngaahi faingamālie ke ʻoatu ai ʻa e ʻiloʻi ʻo e moʻoní ki he kakai ʻi he feituʻu kotoa pē.

Ke mou fakapapauʻi ʻoku ʻafio mai ʻa Sihova pea ʻokú ne houngaʻia lahi ʻi hoʻomou ngaahi feingá. ʻOku pehē ʻe he Tohitapú: “Talaʻehai ʻoku fai taʻetotonu ʻa e ʻOtua ke ne fakangaloʻi hoʻomou ngaue, mo e ʻofa ki hono huafa naʻe ha ʻiate kimoutolu.” (Hep. 6:10) Hokohoko atu ʻa e tokanga ki he ngaahi faingamālie ʻoku fakaʻatā ai kimoutolu ke pouaki ʻa e lotu maʻá. Ko e niʻihi ʻo kimoutolu te mou malava nai ke fakalahi ʻa hoʻomou ngāue fakafaifekaú. Ko kitautolu hono kotoa ʻe lava ke tau ʻai ʻetau ngāue fakafaifekaú ke ola lelei ange.

ʻOku ʻikai te tau fakahoko ʻa hotau fekauʻi ke malangá ʻo taʻeʻiai ha fakafepaki. Manatuʻi ʻi he hili ʻa e lea ʻa Paula fekauʻaki mo ha matapā lahi ki he ngāué kuo fakaava kiate iá, naʻá ne tohi: “ʻOku tokolahi ʻa e kau fakafepakí.” Kia Paula, ko e kau fakafepaki ko iá naʻe kau ai fakatouʻosi ʻa e kau Siú mo e kau Senitailé, ko e niʻihi ai naʻa nau ʻohofi fakahangatonu ia pea mo e niʻihi ʻa ia naʻa nau faʻufaʻufono kākā kiate ia.​—Ng. 19:​24-​28; 20:​18, 19.

ʻOku tau fehangahangai mo ha tuʻunga tatau he ʻahó ni. ʻI heʻetau fakaofiofi atu ki he fakaʻauha ʻo e fokotuʻutuʻu fulikivanu ko ení, ʻoku tau ʻamanekina ʻa e fakafepaki fakautuutu. ʻOku fonu ʻa Sētane ʻi he “ʻita lahi,” pea ko e ʻita ko iá ʻoku fakahanga tefito ia ki he faʻahinga ʻoku nau tauhi ki he ʻOtuá. (Fkh. 12:12) ʻOua ʻaupito ʻe ngalo ko Sētane “ʻa e ʻeiki ʻo māmani.” Naʻe tala ʻe Sīsū ki heʻene kau ākongá: “Ka ne ʻo māmani ʻakimoutolu, pehē ʻe ʻofa ʻa māmani ki he meʻa ʻaʻana: ka ko e meʻa ʻi he ʻikai ʻo māmani ʻa kimoutolu kae, kehe, ko e fili kimoutolu ʻe au mei māmani, ko hono ʻuhingā ʻe ʻoku fehiʻa ai ʻa māmani kiate kimoutolu.”—Sione 14:30; 15:19.

ʻOku tau fakapapauʻi ke ʻoua ʻe fakaʻatā ha taha ke ne fakavaivaiʻi ʻetau tui ki he ʻOtuá pe fakamāmālieʻi kitautolu ʻi heʻetau ngāue fakamalangá. ʻOku tau ʻiloʻi ʻe hokohoko atu pē ʻa e ʻi ai ʻa e faʻahinga ʻa ia te nau ʻohofi kitautolu mo faʻufaʻufono mai kia kitautolu. Neongo ia, ʻoku tau tutui atu ʻi hono malangaʻi ʻa e ongoongo lelei ʻo e Puleʻangá, ʻo tuipau ʻe laiki ʻe Sīsū ʻa Sētane mo ʻene faʻahí ʻi he taimi kotofa ʻa Sihová. Naʻe ʻikai fakasīlongoʻi ʻe he kau fakafepakí ʻa e ʻapositolo ko Paulá; pea ʻoku ʻikai te nau fakasīlongoʻi ʻa e kau sevāniti ʻa Sihova ʻi he ʻaho ní. Neongo ʻa e ʻita ʻa Sētané pea mo e tāufehiʻa ʻa e māmaní, ʻoku ngāue mālohi ʻa e laumālie ʻo Sihová ʻi he haʻohaʻonga ʻo ʻEne kakaí. Ko ha fiefia ē ke ʻiloʻi ko e tokolahi ʻo e faʻahinga ko ia ʻoku nau fanongonongo ʻa e ongoongo leleí kuo aʻu ki ha tumutumu foʻou ko e toko 6,304,645!

Ko ʻemau lotú ia ke hokohoko atu hoʻomou ngāueleleiʻaki ʻa e ngaahi faingamālie ke pouaki ʻa e ngaahi meʻa ʻo e Puleʻanga fisifisimuʻa ʻo Sihová. Ke mou fakapapauʻi ʻa ʻemau tokanga anga-ʻofa atu kia kimoutolu fakafoʻituitui ʻi heʻetau tuʻu “uouangataha” ʻi he ngāue ʻa e ʻOtua Fungani Māʻolunga, ko Sihová.—Sef. 3:9.

Ko homou fanga tokoua,

Kulupu Pule ʻa e Kau Fakamoʻoni ʻa Sihová