Ko Hono Langa Hake ʻa e Ngaahi Angaʻitangata Faka-Kalisitiané ʻi Heʻetau Fānau

KO E faʻē ʻa Wanda ʻa ia naʻe liʻaki ia ʻe hono husepānití, naʻá ne ngāue mālohi ke langa hake ʻa e ngaahi ʻulungaanga faka-Kalisitiané ʻi heʻene kiʻi taʻahiné. Naʻe ʻahiʻahiʻi ʻa e teuteuʻi ko ʻeni ʻo Wanda ʻi hono taʻu 12. ʻI he taimi ko iá, ko Wanda fakataha mo hono kiʻi tuongaʻane mo hono kiʻi tokoua, naʻe kounaʻi ke nau hiki mei heʻenau faʻeé ke nau nofo fakataha mo ʻenau tamaí ʻi ha taimi. Naʻe ʻikai ko ha tokotaha tui ʻa ʻenau tamaí, ko ia ko e hā leva ʻa e meʻa ʻe fai ʻe Wanda ʻi he ʻikai ke toe ʻi ai ʻene faʻeé ke fai ha tokanga?

Ko e meʻa ʻe hoko ki he ngaahi mātuʻa Kalisitiane kotoa pē ko e hoko mai ʻa e taimi ʻa ia kuo pau ke fai ai ha fili ʻe he fānaú tonu kiate kinautolu pē, mo e ʻahiʻahiʻi ʻenau tui ʻanautolú. ʻE fakamavaheʻi nai ʻa e fānaú mei heʻenau ngaahi mātuʻa Kalisitiané, ʻo hangē ko ia naʻe hoko kia Wanda. Te nau fehangahangai nai mo e tenge ʻa e toʻumeʻá ʻi he akoʻangá ke fai hala. Pe te nau fehangahangai mo ha ngaahi fakatauele mālohi. Ko e ngaahi mātuʻa Kalisitiané ʻoku nau ʻamanaki mo lotu ʻe maʻu ʻe heʻenau fānaú ha angaʻitangata faka-Kalisitiane mālohi feʻunga ke nau malava ke tuʻu ʻi he ʻahiʻahí ʻi he taimi ʻe hoko mai aí.

Ka ʻe lava fēfē ke langa hake ʻe he ngaahi mātuʻá ha ngaahi ʻulungaanga faka-Kalisitiane mālohi ki heʻenau fānaú? Ki muʻa ke tau hoko atu ki he meʻa naʻe hoko kia Wanda, tau vakai ange ki he founga ʻe tokoni ai kiate kitautolu ʻa e Tohitapú ke tali ʻa e fehuʻi ko ʻení. Ko e makatuʻunga ʻe maʻu mei ai ʻa e talí ʻoku hā ia ʻi he ngaahi lea ko ʻeni ʻa e ʻapositolo ko Paulá ki he kau Kalisitiane ʻi Kolinitoó: “He ko e meʻa ki he makatuʻunga, talaʻehai ʻe lava ʻe ha taha ke ʻai mo ha tuʻunga kehe, ka ko ia pe ne toka ʻai, ʻa ia ko Sisu Kalaisi. Pea ka fai ʻe ha taha ʻene langa ʻi he tuʻunga ko ia, ʻo ne langa koula, siliva, maka mahuʻinga, ʻakau, musie, pe veve; ʻe faifai pea eʻa ʻa e ngaue ʻa e tangata taki taha: he ʻe sivi ia ʻe he ʻaho lahi, koeʻuhi ko ʻene hoko mai mo e afi; pea ʻe sivi ʻe he afi ko ia ʻa e ngaue ʻa e tangata taki taha, pe kuo fefē.”​—1 Kolinitō 3:​11-13.

Ko e Makatuʻungá

Ko e hā naʻe tohi ai ʻe Paula ʻa e ngaahi lea ko ʻení? Naʻá ne kamata ha polokalama ʻo e langa ʻa e ngaahi angaʻitangata faka-Kalisitiané ʻi Kolinitō, ka naʻe hoko ʻo ʻi ai ʻa e ngaahi palopalema ʻi he polokalamá. Ko e moʻoni, ko e polokalama langa ʻa Paulá naʻe ʻikai ke kau tonu ia ki haʻane fānau ʻi he kakano. Naʻe kau ia kiate kinautolu naʻa nau hoko ko e kau Kalisitiané fakafou ʻi heʻene ngāue fakamalangá. Ka naʻá ne fakakaukau ko kinautolu ko ʻení ko ʻene fānau fakalaumālie, pea ko e meʻa ko ia naʻá ne leaʻakí ʻoku ʻaonga ia ki he ngaahi mātuʻá foki.​—1 Kolinitō 4:15.

Naʻe haʻu ʻa Paula ki Kolinitō ʻi ha taimi ki muʻa peá ne fokotuʻu ai ʻa e fakatahaʻanga Kalisitiané. Ko kinautolu naʻa nau tali ʻene ngāue fakamalangá naʻe hoko ha liliu lahi ʻi honau angaʻitangatá. Ko e faʻahinga naʻa nau feʻauaki, kau kaihaʻa, kau lotu ki he ʻaitoli, mo e kau konā. (1 Kolinitō 6:​9-11) Ka naʻa nau malava ke fai ha liliu ki he fakakaukau faka-Kalisitiané koeʻuhi naʻe hanga ʻe Paula ʻo fokotuʻu ha makatuʻunga lelei. Ko e hā ʻa e makatuʻunga ko iá? “Talaʻehai ʻe lava ʻe ha taha ke ʻai mo ha tuʻunga kehe, ka ko ia pe ne toka ʻai, ʻa ia ko Sisu Kalaisi.”​—1 Kolinitō 3:11.

Naʻe fēfē hono fokotuʻu ʻe Paula ʻa e makatuʻunga ko ʻení ʻi heʻene akoʻi ʻa e kau tui foʻou ko ʻeni ʻi Kolinitoó? ʻOkú ne fakahā kiate kitautolu: “Pehe, kainga, ʻi heʻeku ʻalu atu aʻaku ke malangaʻaki ʻa e ngaue ʻa e ʻOtua, naʻe ʻikai tuʻunga ʻeku ʻalu ko e pehe ʻoku ʻi ai haʻaku tokateline, pe poto, ʻoku fisifisimuʻa. He naʻe ʻikai te u tuʻutuʻuni mo ha meʻa ke u ʻilo ki ai ʻi homou lotolotonga, ko Sisu Kalaisi pe, pea naʻa mo ia ko hono kalusefai pe.” (1 Kolinitō 2:​1, 2; Ngāue 18:5) Naʻe ʻikai te ne fakahanga ʻa e tokangá kiate ia pē pe teuteuʻi ʻa e moʻoní ke hā ha fakamānako fakapoto. Ka, naʻá ne fakahanga ʻa e tokangá kia Sīsū Kalaisi pea mo e founga naʻe ngāueʻaki ai ʻa e tokotahá ni ʻe he ʻOtuá.

Ko hono moʻoní, ko Sīsū ko e makatuʻunga molumalu mālohi ki he langa faka-Kalisitiané. Naʻá ne tokonaki ʻa e feilaulau huhuʻí. Kuó ne hoko he taimí ni ko e Tuʻi fakahēvani pea ʻi heʻene peheé kuo vavé ni ke ne fakaʻauha ʻa e ngaahi fili ʻo e ʻOtuá ʻi ʻĀmaketone. Pea te ne toki fakahoko ʻa e tuʻunga māʻoniʻoni ʻa e ʻOtuá he lolotonga ʻa e pule ʻi he taʻu ʻe taha afé, pea ʻi heʻene hoko ko e Taulaʻeiki Lahi ʻa e ʻOtuá, te ne toki fokotuʻu māmālie hake ʻa e matakali ʻo e tangatá ke haohaoa. Ko e hā mo ha toe makatuʻunga ʻe fiemaʻu ʻe ha taha?

Ko ia, ʻi hono langa hake ʻa e ngaahi angaʻitangata faka-Kalisitiané ʻi heʻetau fānaú, ʻoku tau fai lelei ai ʻi he faʻifaʻitaki kia Paulá pea ke fakapapauʻi ʻoku nau houngaʻia ki he ngaahi moʻoni mātuʻaki mahuʻinga ko ʻení. ʻOku totonu ke tau akoʻi ʻetau fānaú mei heʻenau valevalé, ke nau ʻofa kia Sīsū koeʻuhi ko e meʻa kuó ne faí mo ia ʻokú ne lolotonga fai maʻatautolú.​—1 Pita 1:8.

Ko Hono Langa Hake

Kaekehe, neongo hono fokotuʻu ʻe Paula ʻa e makatuʻunga lelei ko ení, ʻi he hili ʻene ʻalú naʻe fakaholomui ʻa e ngāue langá. (1 Kolinitō 3:10) Ko e palopalemá naʻe ʻikai ke kehekehe mo ia ʻoku hokosia ʻe he ngaahi mātuʻa tokolahi ʻi he ʻaho ní. ʻOku nau ʻohake ʻenau fānaú ʻi he tui faka-Kalisitiané pea nau ongoʻi pau ʻoku mahino ki heʻenau fānaú ʻa e moʻoní. Ka ʻi he taimi ʻoku nau taʻumotuʻa ange aí, kuo tēkina atu ʻa e fānaú ia pe liʻaki ʻa e tuí. Ko e hā ʻoku pehē aí? ʻOku faʻa hoko ia koeʻuhi ko e ngaahi nāunau ʻoku ngāueʻaki ʻi he langá.

Naʻe pehē ʻe Paula ko e ngaahi angaʻitangatá ʻe malava ke langa ʻaki ʻa e ngaahi nāunau mahuʻinga: koula, siliva, mo e ngaahi maka mahuʻinga. Pe te nau lava ke langa ʻaki ha nāunau maʻamaʻa: ʻakau, musie, mo e veve. (1 Kolinitō 3:12) Kapau ʻe ngāueʻaki ʻe ha taha langa ʻa e koulá, silivá, mo e ngaahi maka mahuʻingá, ʻoku pau pē ʻokú ne fokotuʻu ha faʻahinga meʻa lelei ange, ha meʻa mahuʻinga fisifisimuʻa. Ka ko e tokotaha langa ʻokú ne ngāueʻaki ʻa e ʻakaú, musié, mo e vevé, ko ʻene langa pē ha faʻahinga meʻa ke fehikitaki, fakataimi mo mahuʻinga siʻi.

ʻOku hā ngalingali ko e ngaahi nāunau fakalaumālie manifinifi naʻe ngāueʻaki ʻi Kolinitoó. Naʻe ʻi ai ʻa e faʻahinga naʻa nau hoko atu ʻi he ngāue fokotuʻu makatuʻunga ko ia naʻe fai ʻe he ʻapositolo ko Paulá ʻo nau langa ʻaki ʻa e ngaahi meʻa maʻamaʻa, ʻo ʻikai ke langa ha ngaahi meʻa mālohi mo tolonga. Naʻe kamata ke sio ʻa e kakai Kolinitoó ki he tangatá, pea naʻe ʻi ai ʻa e taʻe fāʻūtaha, meheka, mo e kē ʻi honau lotolotongá. (1 Kolinitō 1:​10-12; 3:​1-4) Naʻe mei malava fēfē ke taʻofi ʻa e meʻá ni? ʻAki haʻanau ngāueʻaki ha ngaahi meʻa lelei ange, ko e ngaahi nāunau ʻoku tolongá.

ʻOku nau fakatātaaʻi ʻa e ngaahi ʻulungaanga mahuʻinga ko e konga mātuʻaki mahuʻinga ia ʻo e angaʻitangata faka-Kalisitiané. Ko e hā ʻa e ngaahi ʻulungaangá? ʻOku lea ʻa e ʻapositolo ko Pitá ki he meʻa ʻe taha: “Koeʻuhiā ke ha hoʻomou tui, ʻene lava ke tuʻu ʻi he sivi​—ʻa ia ko e meʻa mahuʻinga ange ʻi he koula.” (1 Pita 1:​6, 7) Naʻe lave ʻa e Tuʻi ko Solomoné ki he toe meʻa ʻe ua: ko e poto mo e mafai ke ʻilo, ʻa ia ko hono maʻu iá “oku maogooga hake ia i he fakatau oe siliva.” (Palōvepi 3:​13-15, PM) Pea naʻe fakamanatuʻi mai ʻe he Tuʻi ko Tēvitá kiate kitautolu ko e manavahē kia Sihová mo e houngaʻia ki heʻene ngaahi fekaú ko e “meʻa mahuʻinga ange ia ʻi he koula.”​—Sāme 19:​9, 10.

Ko e ngaahi nāunau mahuʻinga ko ʻení mo e ngaahi nāunau kehe ʻe lava ke langa ʻi he ngaahi angaʻitangata faka-Kalisitiané ke tokoniʻi ʻetau fānaú ke nau hao ʻi he ngaahi ʻahiʻahí. Kaekehe, ʻoku malava fēfē ke tau ʻilo pau ʻoku tau langa ʻaki ʻa e ngaahi nāunau peheé? ʻI hono fai ʻa e tokanga ki he ngaahi lotó, fakatouʻosi ʻo e fānáu mo kitautolu.

Ko e Ngāue Langa ʻOku Lavameʻá

ʻOku hā ʻa e kaunga ʻa e loto ʻo e ngaahi mātuʻá ki he ngāue langa ko ení mei he fekau naʻe fai ʻe Sihova ki he ngaahi mātuʻá ʻi he puleʻanga ʻIsileli ʻo onoʻahó: “Bea koe gaahi lea ni, aia oku ou fekau kiate koe he aho ni, e i ho loto ia.” Pea ne hoko atu ʻene folofolá: “Bea te ke faa ako aki ia ki hoo fānau.” (Teutalōnome 6:​6, 7, PM) Ko ia, ki muʻa ke tau langa hake ha niʻihi kehé, kuo pau ke tau langa hake kitautolu. ʻOku totonu ke sio ʻa ʻetau fānaú ki he ngaahi meʻa ʻoku tau leaʻaki mo faí, ʻoku ngaohiʻaki hotau ʻulungaangá ʻa e ngaahi nāunau totonu.​—Kolose 3:​9, 10.

Ko hono hokó, kuo pau ke aʻu ʻetau akonakí ki honau lotó. Ko Sīsū, ko e tokotaha langa lavameʻa lahi taha ʻo e ngaahi angaʻitangata faka-Kalisitiané, naʻá ne aʻusia ʻa e ngaahi lotó ʻi heʻene ngāueʻaki ʻa e ngaahi talanoa fakatātā mo e ngaahi fehuʻi. (Mātiu 17:​24-27; Maʻake 13:34) ʻOku ʻilo ʻe he ngaahi mātuʻá ko e faʻahinga founga faiako peheé ʻoku fuʻu ola lelei. ʻOku nau ngāueʻaki ʻa e ngaahi talanoa fakatātā ke ʻai ke ongo ʻa e ngaahi moʻoni faka-Kalisitiané ki he loto ʻo ʻenau fānau iikí, pea ʻoku nau ngāueʻaki ha ngaahi fehuʻi kuo ʻosi fakakaukauʻi lelei ke ʻilo pe ko e hā ʻa e fakakaukau moʻoni ʻa ʻenau fānau kuo motuʻa angé pea mo e anga ʻa e fakakaukau ʻo honau ngaahi lotó.​—Palōvepi 20:5.

ʻI he feinga naʻe fai ʻe Mōsese ke langa hake ʻi he kakai ʻIsilelí ʻa e holi ke tauhi maʻu ʻenau angatonú, naʻá ne pehē: “Ke tauhi ae gaahi fekau a Jihova, mo ene gaahi tuutuuni . . . ke ke lelei ai.” (Teutalōnome 10:​13, PM) ʻOku pehē pē, ʻoku lelei ki he ngaahi mātuʻá ke ʻoua ʻe ngata pē ʻi hono fakamatalaʻi mahino ki heʻenau fānaú pe ko e hā ʻa e ngaahi tuʻunga ʻa e ʻOtuá kae toe ʻai ke fakahā ʻi he fakalotoʻi pe ko e hā ʻe hoko ai ko e lelei kiate kinautolu ʻa e ngaahi meʻa ʻo hangē ko e faitotonu, ʻulungaanga maʻa, mo e feohi lelei.

Ko hono fakaʻosí, naʻe pehē ʻe Sīsū: “Pea ko eni ia ʻa e moʻui taʻengata, ke nau fai ke ʻilo koe ko e ʻOtua moʻonia pe taha, pea mo Sisu ne ke fekau mai ko e Misaia.” (Sione 17:3) ʻI he aʻusia ʻe he fānaú ke nau ʻiloʻi tonu ʻa Sihova ʻi heʻenau kei taʻu iikí, ʻo nau ako ke lea kiate ia ʻo kau ki heʻenau ngaahi palopalemá, pea ʻoku nau aʻusia ʻa ʻene tali ki heʻenau ngaahi lotú, ʻoku nau fakatupu ai ʻa e konga mahuʻinga taha ʻo e angaʻitangata faka-Kalisitiané: ko e vahaʻangatae fakafoʻituitui mo honau Tokotaha-fakatupú.

Ko e Afí

Naʻe ʻilo ʻe Paula naʻe kamata ke tupu ʻa e ngaahi ʻulungaanga fakamāmani, ʻo hangē ko e fakavahaʻavahaʻa mo e ngaahi fetuʻusi ʻi he taimi naʻe ʻikai ke fai ai ʻi he founga totonú ʻa e ngāue langa hake ʻi Kolinitoó. Naʻe fakatuʻutāmaki ʻa e meʻá ni koeʻuhi, hangē ko ʻene fakamatalá, “pea ʻe sivi ʻe he afi ko ia ʻa e ngaue ʻa e tangata taki taha, pe kuo fefē.”​—1 Kolinitō 3:13.

Ko e hā ʻa e afí? Ko ha faʻahinga ʻahiʻahi pē ʻoku fakahoko mai ʻe Sētane ki ha tokotaha Kalisitiane. Mahalo pē ko e tenge ʻa e toʻutupú, fakatauele fakakakano, holi ki he ngaahi meʻa fakamatelie, fakatanga, naʻa mo e keina mālohi ʻa e veiveiuá. Ko e ngaahi ʻahiʻahi peheé ʻoku pau ke hoko. “ʻE faifai pea eʻa ʻa e ngaue ʻa e tangata taki taha: he ʻe sivi ia ʻe he ʻaho lahi, koeʻuhi ko ʻene hoko mai mo e afi.” Ko e ngaahi mātuʻa fakapotopotó ʻoku nau langa hake ʻa e ngaahi angaʻitangata ʻo ʻenau fānaú ʻi heʻenau ʻamanekina ʻe hoko ha ʻahiʻahi ki heʻenau fānaú. Ka ʻoku nau tui pau ʻe lavaʻi ʻe heʻenau fānaú ʻa e ʻahiʻahí ʻi he tokoni meia Sihova. Kapau ʻoku maʻu ʻe he ngaahi mātuʻá ʻa e faʻahinga fakakaukau pehē, ʻe lahi ʻa e tāpuekina ʻo kinautolu.

Ko e Palé

Naʻe pehē ʻe Paula: “Kapau ʻe tuʻu ʻa e ngafa ʻa ha taha ʻi he langa fale, te ne maʻu totongi [pale, NW].” (1 Kolinitō 3:14) Naʻe maʻu ʻe he ʻapositolo ko Paulá ʻa e pale. Naʻá ne tohi ki he kau Kalisitiane ʻi he kolo lahi ko ia ko Tesalonaiká, ʻa ia naʻá ne toe fai ai ʻa e ngāue langa: “He kofaʻā ia homau ʻamanakiʻanga, mo e fiefiaʻanga mo e pale te mau polepole ai ʻi he ʻao ʻo hotau ʻEiki ko Sisu, ʻo ka hamai? ʻikai ko kimoutolu foki? ʻIo, ko kimoutolu ko homau fakalangilangi, mo homau fakafiefia.”​—1 Tesalonaika 2:​19, 20.

Naʻe maʻu ʻe he faʻē ʻa Wanda ʻa e pale ko ʻení. ʻI he taʻu 12 ʻa e motuʻa ʻo Wanda pea naʻe fakamavaheʻi ia mei heʻene faʻeé, ʻuluakí naʻá ne tangi ʻo aʻu ki heʻene mohe. Peá ne toki manatuʻi ʻa e akonaki ʻa ʻene faʻeé ke fakahā ʻene ngaahi palopalemá kia Sihova ʻi he lotu. Naʻá ne lotu pea vave ʻa e maʻu ʻa e fakakaukau ke sio ki he tohi telefoni ke vakai pe ʻoku ʻi ai ha Kau Fakamoʻoni ʻa Sihova ʻoku ofi ai. Naʻá ne fetuʻutaki kiate kinautolu peá ne ʻilo ʻoku ʻi ai ʻa e fāmili ʻoku nofo ofi mai ʻi he hala ko ia ʻoku tuʻu ai ʻa e fale ʻo ʻene tamaí. “Naʻa ku fuʻu fiefia!” ko e lea ia ʻa Wanda.

ʻI he fakalototoʻa naʻe fai ʻe he fāmili ko ʻení, naʻe fokotuʻutuʻu maau ai ʻe Wanda ia mo hono tuongaʻané mo hono kiʻi tokouá ke nau foki ki he ngāue faka-Kalisitiané. ʻOkú ne fakamatala: “Ko au naʻá ku fatongiaʻaki ke u teuteuʻi kimautolu ki he ngaahi fakatahá. Naʻe pau ke u fō homau valá, helu mo homau ʻulú, pea fakapapauʻi ʻoku mau hā maʻa mo maau.” Ko e ngāue lahi ia ki ha kiʻi taʻahine, ka naʻá ne malava ia. ʻI he taimi ʻe taha naʻe feinga ʻene tamaí ke taʻofi ʻenau ʻalu ki he ngaahi fakatahá, ka naʻe kole ʻa e fānaú kiate ia, peá ne tuku ange ke nau ʻalu.

Ki mui mai, ne toe fakataha ai ʻa e fānau mo ʻenau faʻeé. ʻI he taʻu 15 ʻa e motuʻa ʻo Wanda, naʻá ne hoko ko e tokotaha Kalisitiane ʻosi papitaiso, pea naʻá ne fakahā ko ʻene holí ke hoko ko ha misinale. ʻIo, ko e ngāue naʻe fai ʻe he faʻē ʻa Wanda kuo lava lelei ʻi he ʻahiʻahí. Naʻá ne fiefia kuó ne maʻu ʻa e pale ko ʻene sio ki heʻene kiʻi taʻahiné ʻoku tuʻu maʻu ʻiate ia pē ki he moʻoní. ʻOfa ke lavameʻa tatau pehē ʻa e ngaahi mātuʻa Kalisitiané ʻi heʻenau ngāue ke langa hake ʻa e ngaahi angaʻitangata faka-Kalisitiané ʻi heʻenau fānaú.

[Puha ʻi he peesi 27]

Neongo, ʻo hangē ko ia ʻoku fakahā ʻe he kupu ko ení, ʻoku feinga mālohi ʻa e ngaahi mātuʻá ke langa hake ʻa e ngaahi angaʻitangata faka-Kalisitiané ʻi heʻenau fānaú, ʻoku toe maʻu foki ʻe he fānaú tonu honau fatongia. Ko kinautolu, ʻo hangē pē ko e kau Kalisitiane kotoa, kuo pau ke nau fai ʻa e ngāue langa ʻiate kinautolu. (ʻEfesō 4:​22-24) Neongo ʻoku maʻu ʻe he ngaahi mātuʻá ʻa e faingamālie fakaofo ke fai ha tokoni ʻi he meʻá ni, ko hono moʻoní ko e tokotaha taki taha kuo pau ke ne fai haʻane fili ʻiate ia pē ke tauhi ʻa Sihova.