Ko Sihova Hotau Tokotaha-Tokonaki mo Maluʻí

‘Ko e meʻa ʻi heʻene tuʻu kiate au ʻene ʻofá, ko ia ai te u fakahaofi ia; te u ʻai ke ne maʻolunga pe maluʻi koeʻuhia kuó ne ʻilo hoku hingoá.’—SAAME 91:14.

ʻE FĒFĒ HAʻO TALI?

ʻOku anga-fēfē hoko ʻa Sihova ko e Tokotaha-Tokonakí?

Ko e hā ʻa e ngafa kuo fakahoko ʻe Sīsū kae malava ke tau hoko ʻo melino mo e ʻOtuá?

Kuo anga-fēfē hono maluʻi ʻe Sihova ʻa e faʻahinga ʻoku ʻofa mo talangofua kiate iá?

1, 2. Ko e hā ʻa e ngaahi faikehekehe ʻoku tau maʻu ʻi he ngaahi tuʻunga fakafāmilí pea ʻi he founga kuo tau ako ai ʻa e moʻoní?

NAʻE faʻu ʻe Sihova ʻa e fokotuʻutuʻu fakafāmilí. (ʻEf. 3:14, 15) Neongo kapau ʻoku tau kau ki he fāmili tatau, ʻoku tau maʻu kotoa ʻa e ngaahi angaʻitangata mo e ngaahi tuʻunga kehekehe. Kuo tupu hake nai ʻa e niʻihi ʻi heʻenau ongo mātuʻá. Kuo mole nai ʻa e ngaahi mātuʻa ʻa e niʻihi ʻi he maté koeʻuhi ko e puke, fakatuʻutāmaki pe ngaahi fakatamaki kehe. Ka ʻoku ʻi ai nai ʻa e niʻihi ʻoku ʻikai ke nau ʻilo ʻenau ongo mātuʻá.

² Ko e kau mēmipa kotoa kitautolu ʻo e fāmili ʻo e kau lotu ʻa Sihová pea kuo tau ako ʻa e moʻoní ʻi he ngaahi founga kehekehe. Naʻe ʻohake nai koe ʻe ha ongo mātuʻa naʻá na akoʻi koe ke moʻuiʻaki ʻa e ngaahi tefitoʻi moʻoni Fakatohitapú. (Teu. 6:6, 7) Pe mahalo ko ha taha koe ʻi he kakai ʻe laui afe kuo nau ako ʻa e moʻoní fakafou ʻi he ngāue fakamalanga ʻa e kau sevāniti kehe ʻa Sihová.—Loma 10:13-15; 1 Tīm. 2:3, 4.

 3. Ko e hā e meʻa ʻoku tau tatau kotoa aí?

³ Neongo ʻoku tau haʻu mei he ngaahi puipuituʻa kehekehe, ko kitautolu kotoa ʻoku ʻi ai ʻa e ngaahi meʻa ʻoku tau tatau ai. Koeʻuhi ko e talangataʻa ʻa ʻĀtama ki he ʻOtuá, kuo tau maʻu tukufakaholo kotoa ai ʻa e taʻehaohaoá, angahalá mo e maté. (Loma 5:12) Neongo ia, ʻi he tuʻunga ko e kau lotu moʻoní, ʻe lava ke tau ui ʻa Sihova ko ʻetau “Tamai.” ʻI he kuonga muʻá, naʻe lava ke leaʻaki ʻe he kakai fili ʻa e ʻOtuá ʻa e ngaahi lea ʻoku hiki ʻi he ʻAisea 64:8: “ʻE Sihova, ko ʻemau tamai koe.” Pehē foki, naʻe kamataʻaki ʻe Sīsū ʻene sīpinga lotú ʻa e ngaahi lea: “Ko ʻemau Tamai ʻoku ʻi hēvani, tuku ke fakamāʻoniʻoniʻi ho huafá.”—Māt. 6:9.

4, 5. Ke fakalolotoʻi ʻetau ʻofa ki heʻetau Tamai fakahēvaní, ʻa Sihova, ko e hā te tau lāulea ki aí?

⁴ ʻOku ʻoange ʻe heʻetau Tamai fakahēvaní ki hono fāmili ʻo e kau lotu moʻoní ʻa e tokanga mo e maluʻi ʻoku nau fiemaʻú. Fakatatau ki he Saame 91:14, naʻe pehē ʻe Sihova: ‘Ko e meʻa ʻi heʻene [ko ha tokotaha lotu moʻoni] tuʻu kiate au ʻene ʻofá, ko ia ai te u fakahaofi ia; te u maluʻi koeʻuhia kuó ne ʻilo hoku hingoá.’ ʻOku fakahaofi anga-ʻofa ʻe Sihova ʻene kakaí mei honau ngaahi filí pea maluʻi kinautolu, koeʻuhí ke ʻoua naʻa fakaʻauha.

⁵ Ke fakalolotoʻi ʻetau ʻofa ki heʻetau Tamai fakahēvaní, ʻa Sihova, te tau lāulea ki he founga ʻene hoko ko hotau (1) Tokotaha-Tokonaki, (2) Tokotaha-Maluʻi, mo e (3) Kaumeʻa lelei tahá. ʻI heʻetau lāulea ki he poini ʻe tolu ko ení, tau fakakaukau fakalelei fekauʻaki mo hotau vahaʻangatae fakafoʻituitui mo e ʻOtuá pea ako ki he founga ʻe lava ke tau fakalāngilangiʻi ai ia ko ʻetau Tamaí. Pehē foki, ʻoku totonu ke tau fakakaukau fekauʻaki mo e ngaahi tāpuaki ʻoku talaʻofa ʻe Sihova te ne foaki ki he faʻahinga ʻoku ʻunuʻunu ofi kiate iá.—Sēm. 4:8.

KO SIHOVA, ʻA E TOKOTAHA-TOKONAKI MAʻONGOʻONGÁ

 6. Ko e hā ʻe lava ai ke tau pehē ko Sihova ʻa e Tokotaha-Tokonaki ʻo e “meʻaʻofa lelei kotoa pē”?

⁶ Naʻe tohi ʻe he ākonga ko Sēmisí: “Ko e meʻaʻofa lelei kotoa pē mo e foaki haohaoa kotoa pē ʻoku mei ʻolunga ia, ʻoku ʻalu hifo ia mei he Tamai ʻo e ngaahi maama fakalangí.” (Sēm. 1:17) Ko e moʻuí ko ha meʻaʻofa fakaofo meia Sihova. (Saame 36:9) Kapau te tau ngāueʻaki ʻetau moʻuí ke fai ʻa e finangalo ʻo Sihová, te tau maʻu ʻa e ngaahi tāpuaki lahi he taimí ni pea mo e moʻui taʻengata ʻi he māmani foʻoú. (Pal. 10:22; 2 Pita 3:13) Ka ʻe malava fēfē eni koeʻuhí ko kitautolu kotoa ʻoku tau maʻu tukufakaholo ʻa e taʻehaohaoá, angahalá mo e maté meia ʻĀtama?

 7. Kuo anga-fēfē hono ʻai ʻe he ʻOtuá ke malava ʻo tau maʻu ha vahaʻangatae vāofi mo iá?

⁷ Ko Sihova ʻa e Tokotaha-Tokonaki Maʻongoʻongá ʻi he ngaahi founga taʻefaʻalaua. ʻOku ueʻi ia ʻe heʻene ʻofa maʻataʻataá ke ne fakahaofi kitautolu. Hangē ko ia naʻa tau ako ki aí, ʻoku tau angahala kotoa mo maʻu tukufakaholo ʻa e taʻehaohaoá meia ʻĀtama. (Loma 3:23) Kae kehe, koeʻuhí ko e ʻofa ʻa Sihová, naʻá ne tokonaki mai ha founga ke tau maʻu ai ha vahaʻangatae vāofi mo ia. Naʻe tohi ʻe he ʻapositolo ko Sioné: “Ko e meʻa ʻeni naʻe fakahaaʻi ai ʻa e ʻofa ʻa e ʻOtuá ʻi he fekauʻaki mo hotau tuʻungá, koeʻuhi naʻe fekauʻi mai ʻe he ʻOtuá hono ʻAlo tofu-pē-taha-ne-fakatupú ki he māmaní ke tau maʻu ai ʻa e moʻuí fakafou ʻiate ia. Ko e anga ʻeni ʻo e ʻofá, ʻoku ʻikai ko e pehē ne tau ʻofa ki he ʻOtuá, ka naʻá ne ʻofa kiate kitautolu peá ne fekauʻi mai hono ʻAló ko ha feilaulau fakatupuhōifuaʻanga maʻa ʻetau ngaahi angahalá.”—1 Sio. 4:9, 10.

8, 9. Naʻe hoko fēfē ʻa Sihova ko e Tokotaha-Tokonaki Maʻongoʻonga ʻi he ngaahi ʻaho ʻo ʻĒpalahame mo ʻAisaké? (Sio ki he ʻuluaki fakatātā ʻi he kupú ni.)

⁸ ʻI he taʻu ʻe 1,900 nai ki muʻa ke ʻaloʻi ʻa Sīsuú, naʻe hoko ha meʻa ʻi he moʻui ʻa ʻĒpalahamé naʻe fakahaaʻi ai ʻa e founga ʻe ʻomai anga-ʻofa ai ʻe Sihova ʻa e moʻui taʻengatá ki he kotoa ʻo e faʻahinga ʻo e tangata talangofuá. ʻOku fakamatala ʻa e Hepelū 11:17-19: “ʻI he tuí, ko ʻĒpalahame, ʻi he taimi naʻe ʻahiʻahiʻi aí, naʻe hangē ia kuó ne ʻosi feilaulauʻaki ʻa ʻAisaké—ko e tangata ʻa ia naʻá ne maʻu fiefia ʻa e ngaahi talaʻofá naʻe teu ke ne feilaulauʻi ʻa hono foha pē taha ne fanauʻí—neongo naʻe folofolaʻaki kiate ia: ‘Ko e faʻahinga ʻe ui “ko ho hakó” ʻe fou mai ia ʻia ʻAisake.’ Ka naʻá ne fakaʻuhinga ʻo pehē naʻe malava ʻe he ʻOtuá ke fokotuʻu hake ia naʻa mo e mei he maté; pea naʻá ne maʻu mai ia mei ai ʻi ha founga fakaefakatātā.” Hangē pē ko e loto-lelei ʻa ʻĒpalahame ke feilaulauʻi hono fohá, ʻa ʻAisake, naʻe foaki loto-lelei mai ʻe Sihova hono ʻAló, ʻa Sīsū Kalaisi, ke fakahaofi ʻa e faʻahinga ʻo e tangatá.—Lau ʻa e Sione 3:16, 36.

⁹ ʻE lava ke ke sioloto atu ki he ongoʻi fiemālie ʻa ʻAisake ʻi heʻene ʻiloʻi heʻikai ke ne maté? ʻOku ʻikai ha veiveiua naʻá ne houngaʻia ʻi hono tokonaki ʻe Sihova ha feilaulau fetongi, ko ha sipi tangata he tafaʻakí. (Sēn. 22:10-13) Naʻe fakahingoa ʻe ʻĒpalahame ʻa e feituʻú ko “Sihova-siaila,” ʻa ia ʻoku ʻuhingá “Tokonaki-pe-ʻe-Sihova.”—Sēn. 22:14.

FOUNGA KE TOE MELINO AI MO E ʻOTUÁ

10, 11. Ko hai kuo takimuʻa ʻi he “ngāue ʻo e fakaleleí,” pea kuo anga-fēfē ʻenau fakahoko ení?

¹⁰ ʻI he taimi ʻoku tau fakalaulauloto ai ki he ngaahi meʻa kotoa kuo tokonaki mai ʻe Sihová, ʻoku tau ʻiloʻi ai ka ne ʻikai ʻa e feilaulau ʻa Sīsuú heʻikai malava ke tau hoko ko ha kaumeʻa ʻo e ʻOtuá. Naʻe tohi ʻe Paula: “Ko e meʻa eni kuo mau fakamulituku ki aí, naʻe mate ʻa e tangata ʻe taha maʻá e faʻahinga kotoa pē; ko ia ai, tā naʻe mate ʻa e faʻahinga kotoa pē. Pea naʻá ne mate maʻá e faʻahinga kotoa pē koeʻuhi ko e faʻahinga ko ia ʻoku moʻuí ke ʻoua te nau kei moʻui maʻanautolu, ka maʻá e tokotaha naʻe mate maʻanautolu pea fokotuʻu haké.”—2 Kol. 5:14, 15.

¹¹ Koeʻuhi ko e kau Kalisitiane ʻi he ʻuluaki senitulí naʻa nau ʻofa ʻi he ʻOtuá pea houngaʻia ʻi he monū ʻo e tauhi kiate iá, naʻa nau tali fiefia ai “ʻa e ngāue ʻo e fakaleleí.” Ko e ngāue ko ení ko e ngāue fakamalanga ia naʻá ne ʻai ʻa e kakaí ke nau malava ke hoko ʻo fakamelino mo e ʻOtuá, maʻu ʻa e vahaʻangatae mo ia, pea hoko ko hono ngaahi foha. ʻI he ʻahó ni, ʻoku fakahoko ʻe he kau sevāniti pani ʻa Sihová ʻa e ngāue tatau. ʻOku nau ngāue ko ha kau fakafofonga maʻá e ʻOtuá mo Kalaisi. Ko ʻenau ngāue fakamalangá ʻoku ʻai ai ʻa e kakai loto-totonu mo anga-fakatōkilaló ke malava ʻo tohoakiʻi ʻe Sihova pea hoko ko ʻene kau sevāniti.—Lau ʻa e 2 Kolinitō 5:18-20; Sione 6:44; Ngā. 13:48.

12, 13. ʻE lava fēfē ke tau fakahāhā ʻoku tau houngaʻia ʻi he meʻa kotoa kuo foaki mai ʻe Sihova kia kitautolú?

¹² Koeʻuhi ʻoku houngaʻia ʻa e fanga sipi kehé ʻi he hoko ʻa Sihova ko e Tokotaha-Tokonaki Maʻongoʻongá, ʻoku nau kau ai mo e kau paní ʻi hono malangaʻi ʻa e ongoongo leleí. ʻI he ngāue fakamalanga ko ení, ʻoku tau ngāueʻaki ʻa e Tohi Tapú, ʻa ia ko ha meʻaʻofa fakaofo ia ʻe taha mei he ʻOtuá. (2 Tīm. 3:16, 17) ʻI he taimi ʻoku tau ngāueleleiʻaki ai ʻa e Tohi Tapú ʻi he ngāue fakafaifekaú, ʻoku tau ʻoatu ai ki he niʻihi kehé ʻa e faingamālie ke maʻu ʻa e moʻui taʻengatá. ʻOku toe ʻomai ʻe Sihova hono laumālie māʻoniʻoní kia kitautolu. Ko kitautolu taki taha ʻoku tau falala ki he tokoni ʻa e laumālie māʻoniʻoní ʻi he ngāue fakafaifekaú. (Sāk. 4:6; Luke 11:13) ʻOku fakahaaʻi ʻi he pulusinga taki taha ʻo e Yearbook of Jehovah’s Witnesses, ʻa e ngaahi ola fakaofo ʻo e ngāue fakamalangá. He monū lahi ē ke hoko ʻo kau ʻi he ngāue ko eni ʻokú ne fakalāngilangiʻi ʻetau Tamaí mo hotau Tokotaha-Tokonakí!

¹³ Koeʻuhi kuo tokonaki mai ʻe he ʻOtuá ʻa e ngaahi meʻa lahi ʻaupito, ʻoku totonu ke tau ʻeke hifo: ‘ʻOku ou fai ʻa e kotoa te u malavá ʻi he ngāue fakafaifekaú ke fakahaaʻi kia Sihova ʻeku houngaʻia ʻi he meʻa kotoa kuó ne foaki maí? ʻE lava fēfē ke u hoko ko ha tokotaha malangaʻi lelei ange ʻo e ongoongo leleí?’ Kapau ʻoku tau houngaʻia ʻi he meʻa kotoa kuo foaki mai ʻe he ʻOtuá, te tau fakamuʻomuʻa hono Puleʻangá ʻi heʻetau moʻuí. ʻI heʻetau fai ení, ʻe fakapapauʻi ʻe Sihova te tau maʻu maʻu pē ʻa e meʻa ʻoku tau fiemaʻú. (Māt. 6:25-33) Koeʻuhi ʻoku ʻofa ʻa Sihova ʻia kitautolu, ʻoku tau loto ke fai ʻa e meʻa kotoa te tau malavá ke fakahōifuaʻi ia mo ʻai hono lotó ke fiefia.—Pal. 27:11.

14. Kuo anga-fēfē ʻa e hoko ʻa Sihova ko e Faifakahaofi ʻo hono kakaí?

¹⁴ Naʻe hiva ʻa e tokotaha-tohi-saame ko Tēvitá: “Ko au oku ou majiva mo baea; ka oku finagalo ae Eiki kiate au: ko koe ko hoku tokoni mo hoku fakamoui.” (Saame 40:17, PM) ʻI he ngaahi taimi lahi kuo hoko ʻa Sihova ko e Faifakahaofi ʻo hono kakaí ʻi he tuʻunga ko ha kulupu, tautefito ʻi he taimi kuo fakatangaʻi kakaha ai mo tuli holo kinautolu ʻe honau ngaahi filí. ʻOku tau houngaʻia lahi he ʻoku ʻomai maʻu pē ʻe Sihova kia kitautolu ʻa e meʻa ʻoku tau fiemaʻú ke nofoʻaki faitōnunga kiate ia lolotonga ʻa e ngaahi taimi faingataʻa peheé.

MALUʻI ʻE SIHOVA

15. ʻOmai ha fakatātā ʻo e founga hono maluʻi ʻe ha tamai ʻofa haʻane kiʻi tama.

¹⁵ ʻOku ʻikai ngata pē hono ʻoange ʻe ha tamai ʻofa ki heʻene fānaú ʻa e meʻa ʻoku nau fiemaʻú kae toe maluʻi foki kinautolu. Te ne feinga leva ke fakahaofi kinautolu kapau te nau ʻi ha tuʻunga fakatuʻutāmaki. ʻOku manatuʻi ʻe ha tokoua ʻe taha ʻa e founga hono maluʻi ia ʻe heʻene tamaí ʻi heʻene kei siʻí. Naʻá ne foki mo ʻene tamaí ki ʻapi mei he ngāue fakafaifekaú ʻa ia naʻe pau ke na kolosi ʻi ha kiʻi vaitafe. Ko e ʻuha lahi ʻi he pongipongi ko iá naʻá ne fakatupunga ke tāfea ʻa e kiʻi vaitafé. Ko e founga pē ke kolosi ai ʻi he vaí ko e puna mei he fuʻu maka ki he fuʻu maka. ʻI he ʻalu muʻomuʻa ʻi heʻene tamaí, naʻe hala ʻa e tuʻu ʻa e kiʻi tamasiʻí, ʻo tō ki he kiʻi vaitafé peá ne meleuku tuʻo ua. Naʻe houngaʻia ʻaupito ʻa e kiʻi tamasiʻi ko iá ʻi hono fusiʻi fakavave hake ia ʻe heʻene tamaí pea fakahaofi mei he melemó. ʻI ha founga meimei tatau, ʻoku maluʻi kitautolu ʻe heʻetau Tamai fakahēvaní mei he ngaahi fakatuʻutāmaki ʻi he māmani fulikivanu ko ení pea mei hono pulé, ʻa Sētane. Ko Sihova ʻa e Tokotaha-Maluʻi lelei taha ʻe faifai ange ʻo maʻu ʻe ha taha.—Māt. 6:13; 1 Sio. 5:19.

16, 17. Naʻe anga-fēfē hono tokoniʻi mo maluʻi ʻe Sihova ʻa e kau ʻIsilelí ʻi heʻenau faitau mo e kau ʻAmalekí?

¹⁶ Naʻe maluʻi anga-ʻofa ʻe Sihova hono kakaí ʻi he taʻu 1513 ki muʻa ʻia Kalaisí. Naʻá ne ʻosi fakahaofi ʻa e kau ʻIsilelí mei he nofo pōpulá pea maluʻi kinautolu ʻi heʻenau kolosi ʻi he Tahi Kulokulá. Hili ʻenau fou atu he toafá ki Moʻunga Sainaí naʻe aʻu ʻa e kau ʻIsilelí ki Lefitimi.

¹⁷ Koeʻuhi naʻe teʻeki ai fakahoko ʻa e kikite ʻi he Sēnesi 3:15, kuo pau pē naʻe feinga vavale ʻa Sētane ke ʻohofi ʻa e kau ʻIsilelí, ʻa ia naʻa nau hā ngali ʻikai ha maluʻi. Ko e founga ʻe taha naʻá ne fai ai ení ko hono ngāueʻaki ʻa e kau ʻAmalekí, ʻa ia ko e ngaahi fili ʻo e kakai ʻa e ʻOtuá. (Nōm. 24:20) Naʻe anga-fēfē hono maluʻi ʻe Sihova ʻene kakaí mei he ngaahi fili ko ení ʻo fakafou ʻia Siosiua, Mōsese, ʻĒlone mo Hua? Naʻe tauʻi ʻe Siosiua mo ʻene kau tangatá ʻa e kau ʻAmalekí ʻi ha moʻunga ofi atu naʻe ʻi ai ʻa Mōsese, ʻĒlone mo Hua. Lolotonga ʻa e kei hiki ʻe Mōsese hono nimá ki ʻolungá, naʻe tokoniʻi ʻe Sihova ʻa e kau ʻIsilelí ke nau mālohi ange ʻi honau ngaahi filí. ʻI he ʻikai ke kei lava ʻe Mōsese ʻo hiki ai pē hono nimá, naʻe tokoniʻi ia ʻe ʻĒlone mo Hua ʻaki hono pukepuke hono nimá. Faifai atu pē, ʻi he tokoni mo e maluʻi ʻa Sihová, “naʻe ikuna ʻe Siōsiua ʻa Amaleki mo hono kakai.” (ʻEki. 17:8-13) Hili iá, naʻe langa ʻe Mōsese ha ʻōlita ai, ʻo ui ko “Sihova-Nisi,” ʻa ia ʻoku ʻuhingá “Ko ʻeku fuka ʻa Sihova.”—Lau ʻa e ʻEkisoto 17:14, 15.

MALU MEI HE ʻOHO ʻA SĒTANÉ

18, 19. Ko e hā ʻa e maluʻi kuo ʻomai ʻe he ʻOtuá ki heʻene kau sevānití ʻi he ngaahi taʻu ki mui ní?

¹⁸ ʻOku maluʻi ʻe Sihova ʻa e faʻahinga ʻoku nau ʻofa mo talangofua kiate iá. Hangē ko e kau ʻIsileli ʻi Lefitimí, ʻoku tau falala ki he ʻOtuá ke maluʻi kitautolu mei hotau ngaahi filí. Kuo maluʻi maʻu pē ʻe Sihova kitautolu ʻi he tuʻunga ko ha kulupu, pea ʻokú ne hanganaki maluʻi kitautolu mei he ngaahi ʻoho ʻa e Tēvoló. Ko e fakatātaá, kuo maluʻi ʻe he ʻOtuá ʻi he ngaahi taimi lahi hotau fanga tokoua ʻa ia naʻe fakatangaʻi koeʻuhí ko ʻenau tuʻu-ʻatā faka-Kalisitiané. Naʻe hoko eni ʻi Siamane pea ʻi he ngaahi fonua kehe ʻi he taimi naʻe pule ai ʻa e kau Nasí ʻi he 1930 tupú mo e konga ki muʻa ʻo e 1940 tupú. ʻI he taimi ʻoku tau lau ai ʻa e ngaahi talanoa ki he moʻuí mo e ngaahi hokosia ʻi he Yearbook fekauʻaki mo e maluʻi ʻa e ʻOtuá lolotonga ʻa e ngaahi taimi fakatanga peheé, ʻe hoko ʻo mālohi ai ʻetau falala kia Sihová.—Saame 91:2.

¹⁹ ʻOku toe maluʻi kitautolu ʻe Sihova ʻaki hono ʻomai ʻa e ngaahi fakamanatu anga-ʻofa fakafou ʻi heʻene kautahá mo e ʻū tohí. Fakakaukau fekauʻaki mo e anga hono maluʻi kitautolu ʻe he ngaahi fakamanatu ko ení ʻi he ngaahi taʻu ki mui ní. ʻOku hokohoko atu ʻa e hoko ʻa e māmaní ʻo maʻunimā lahi ange ʻe he fehokotaki fakasinó, ʻolokaholó mo e ʻata fakalieliá. Ka kuo ʻomai ʻe Sihova ʻa e ngaahi fakamanatu fakavavevave mo pau ke maluʻi kitautolu mei hono fai ʻa e ngaahi meʻa te ne uesia hotau vahaʻangatae mo iá. Ko e fakatātaá, ki muí ni mai, kuo tau maʻu ʻa e ngaahi akonaki mei heʻetau Tamai fakahēvaní ke fakaʻehiʻehi mei he tauhele ʻo e feohi kovi ʻi he netiueka sōsialé.a—1 Kol. 15:33.

20. Ko e hā ʻa e maluʻi mo e tataki ʻoku tau maʻu ʻi heʻetau ngaahi fakatahaʻangá?

²⁰ ʻE lava fēfē ke tau fakahāhā ʻoku tau fanongo ki he ngaahi akonaki anga-ʻofa peheé pea hoko ʻo “akonakiʻi e Jihova”? ʻAki ʻa e talangofua kakato ki heʻene ngaahi fekaú. (ʻAi. 54:13, PM) Ko ʻetau ngaahi fakatahaʻangá ko ha feituʻu malu ia ʻoku tau maʻu ai ʻa e maluʻí mo e tatakí. ʻOku ʻomai ai kia kitautolu ʻe he kau mātuʻá ʻa e tokoni mo e akonaki mei he Tohi Tapú. (Kal. 6:1) ʻOku ngāueʻaki ʻe Sihova ʻa e “ngaahi meʻaʻofa ʻi he tuʻunga ko e kau tangata” ko ení ke tokangaʻi kitautolu ʻi ha founga anga-ʻofa. (ʻEf. 4:7, 8) Ko ia, ko e hā ʻoku totonu ke tau fai kapau ʻoku ʻomai ʻe he kau mātuʻá ha akonaki? ʻOku totonu ke tau talangofua loto-lelei. Kapau te tau fai pehē, ʻe tāpuakiʻi kitautolu ʻe Sihova.—Hep. 13:17.

21. (a) Ko e hā ʻoku totonu ke tau fakapapauʻi ke faí? (e) Ko e hā te tau lāulea ki ai ʻi he kupu hoko maí?

²¹ Ko ia tau falala ki he tokoni ʻa e laumālie māʻoniʻoní pea tali ʻa e tataki ʻetau Tamai fakahēvaní. ʻOku toe fiemaʻu foki ke tau fakalaulauloto ki he moʻui ʻa Sīsuú pea fai hotau lelei tahá ke muimui ʻi heʻene ngaahi faʻifaʻitakiʻanga tuʻu-ki-muʻá. Naʻá ne maʻu ha pale lahi koeʻuhí naʻá ne “talangofua ʻo aʻu ki he tuʻunga ʻo e maté.” (Fil. 2:5-11) ʻE tāpuakiʻi foki mo kitautolu kapau te tau falala kia Sihova ʻaki hotau lotó kotoa. (Pal. 3:5, 6) Tau falala maʻu pē kia Sihova, ʻa e tokotaha te ne tokonaki mo maluʻi kitautolu ʻo lelei ange ia ʻi ha toe taha. Ko e tauhi kiate iá ko ha monū ia te ne ʻai moʻoni ke tau fiefia. Ka, ʻoku anga-fēfē hoko ʻa Sihova ko hotau Kaumeʻa lelei tahá? Ko ʻetau ʻofa kiate iá ʻe toe tupu ʻo mālohi ange ʻi heʻetau tali ʻa e fehuʻi ko ení ʻi he kupu hoko maí.

[Fakamatala ʻi lalo]

[Fakatātā ʻi he peesi 19]

ʻOku lava ke ngāueʻaki ʻe Sihova hotau kaungātuí ke tokoniʻi kitautolu ke nofoʻaki faitōnunga ʻi he taimi faingataʻá (Sio ki he palakalafi 18-20)