Ko Hoʻo Leá—‘‘Io kae Hili Iá ko e ‘Ikai’?

Sioloto atu he taimí ni: Ko ha faʻē taʻehoa ʻoku ʻi ai ʻene fānau ʻe toko ua ʻoku fakaafeʻi ʻe ha ongo meʻa mali ʻi heʻene fakatahaʻangá ki ha kiʻi kai efiafi mo kinautolu. ʻI he taimi ʻokú ne tala ange ai ki heʻene fānaú ʻa e fakaafé, ʻokú na fiefia ʻaupito. ʻOku ʻikai mei malava ke nau tatali ke aʻu ki he ʻaho ko iá. Kae kehe, ko e ʻaho ki muʻa ke nau ʻalú, ʻoku tala ange ʻe he ongo meʻa malí ki he faʻeé kuo hoko ha meʻa taʻeʻamanekina pea ʻoku fiemaʻu ai ke na kaniseli ʻa e fakaafé. ʻOkú ne toki ʻilo ki mui ʻa e ʻuhinga naʻá na kaniseli ai iá. Hili hono fakaafeʻi iá, naʻe fakaafeʻi ʻa e ongo meʻa malí ʻe ha ngaahi kaumeʻa ke na ʻaʻahi ange, pea naʻá na tali ia.

ʻI he tuʻunga ko e kau Kalisitiané, ʻoku totonu ke tau fai ki heʻetau palōmesí. ʻOku totonu ke ʻoua ʻaupito te tau lea “ʻIo kae hili iá ko e ʻIkai,” ʻa ia, ʻoku totonu ke ʻoua ʻaupito te tau loto ke fai ha meʻa pea liliu leva ʻetau fakakaukaú ʻo ʻikai ha ʻuhinga lelei. (2 Kol. 1:​18) Kae kehe, hangē ko ia ʻoku fakatātaaʻi ʻi he ongo fakatātā ʻi ʻolungá, ʻoku ʻikai ke tatau ʻa e ngaahi tuʻunga kotoa pē. ʻE ʻi ai nai ʻa e ngaahi taimi ʻe hā ngali heʻikai ke toe ʻi ai haʻatau fili pea kuo pau ke tau kaniseli ʻa e ngaahi fokotuʻutuʻu kuo tau faí. Naʻa mo e ʻapositolo ko Paulá naʻe pau ke ne fai peheni ʻi ha taimi ʻe taha.

ʻI he taʻu 55, naʻe ʻaʻahi ai ʻa Paula ki ʻEfesō ʻi heʻene fononga fakamisinale hono tolú. Naʻá ne fokotuʻutuʻu ke folau ʻo fou atu ʻi he Tahi ʻĪsiní ki Kolinitō pea fononga mei ai ki Masitōnia. Pea ʻi heʻene foki leva ki Selusalemá, naʻá ne fokotuʻutuʻu ke ʻaʻahi ki he fakatahaʻanga Kolinitoó ko hono tuʻo uá ia, ke ʻave ʻenau foaki ʻofá ki he fanga tokoua ʻi Selusalemá. (1 Kol. 16:3) ʻOku tau ʻilo eni koeʻuhí ʻi he 2 Kolinitō 1:​15, 16, ʻoku tau lau ai: “ʻI he tuipaú ni, naʻá ku tomuʻa fakataumuʻa ai ke u ʻalu atu kiate kimoutolu, ke mou lava ai ʻo toe maʻu ko hono tuʻo uá ia ha ʻuhinga ke mou fiefia ai, pea ke u ʻalu ki Masitōnia hili ia haʻaku tuʻu hifo hena ke sio kiate kimoutolu, pea ke u foki mai kiate kimoutolu mei Masitōnia pea ke mou ʻave leva au ʻi ha konga ʻo e fononga ki Siuteá.”

ʻOku hā naʻe hiki ʻe Paula ha tohi ki muʻa ki he fanga tokoua ʻi Kolinitoó, ʻo fakahaaʻi kia kinautolu ʻene fokotuʻutuʻu ke ʻaʻahi atú. (1 Kol. 5:9) ʻI ha taimi nounou hili hono hiki ʻa e tohi ko iá, naʻe fanongo ʻa Paula mei he fāmili ʻo Koloí naʻe ʻi ai ha ngaahi palopalema mafatukituki ʻi he fakatahaʻangá. (1 Kol. 1:​10, 11) Naʻe liliu ʻe Paula ʻene ʻuluaki fokotuʻutuʻú pea fili ke ʻoua ʻe ʻaʻahi ki he fakatahaʻanga Kolinitoó ʻi he taimi ko iá. Naʻá ne hiki leva ʻa e tohi ʻoku tau ʻiloʻi he taimí ni ko e 1 Kolinitō. ʻI aí naʻe ʻoatu ai ʻe Paula ha akonaki mo ha fakatonutonu. Naʻá ne toe tohi ʻo pehē naʻá ne liliu ʻene fokotuʻutuʻu ki heʻene fonongá pea te ne tomuʻa ʻalu ki Masitōnia pea toki ʻalu ki Kolinitō.​—1 Kol. 16:​5, 6.a

ʻOku hā ngali ʻi he taimi naʻe maʻu ai ʻe he fanga tokoua ʻi Kolinitoó ʻene tohí, naʻe tukuakiʻi ia ʻe he niʻihi ʻo kinautolu ki he ʻikai ke ne fai ki heʻene ngaahi palōmesí. Naʻa nau fakakaukau naʻa nau lelei ange kinautolu ʻia Paula. Naʻá ne ui ʻa e faʻahinga ko ení ko e “kau ʻapositolo makehe atú.” Ke taukapoʻi iá, naʻe ʻeke ʻe Paula: “Ko ia, ʻi heʻeku maʻu ʻa e taumuʻa ko iá, naʻe ʻikai te u fakamaʻamaʻaʻi ʻa e meʻa ko iá, ʻikai ko ia? Pe ʻoku ou fakataumuʻa ʻe au ʻa e ngaahi meʻá ʻi ha founga fakaekakano, ke u pehē ai ‘ʻIo, ʻIo’ peá u toe pehē leva ‘ʻIkai, ʻIkai’?”​—2 Kol. 1:​17; 11:5.

Te tau ʻeke nai, ʻI he ngaahi tuʻunga ko ení naʻe “fakamaʻamaʻaʻi” moʻoni ʻe he ʻapositolo ko Paulá ʻa e meʻa ko iá? ʻIkai ʻaupito! Ko e foʻi lea naʻe liliu ko e “fakamaʻamaʻaʻi” ʻoku ʻuhingá ko e taʻefalalaʻanga pea ʻe lava ke fakamatalaʻiʻaki ia ha tokotaha ʻoku ʻikai ke ne fai ki heʻene ngaahi palōmesí. Ko e fehuʻi ʻa Paulá “ʻoku ou fakataumuʻa ʻe au ʻa e ngaahi meʻá ʻi ha founga fakaekakano?” naʻe totonu ke ne tokoniʻi ʻa e kau Kalisitiane ʻi Kolinitoó ke nau sio ko e fili ʻa Paula ke liliu ʻene ngaahi fokotuʻutuʻú naʻe ʻikai koeʻuhí naʻá ne taʻefalalaʻanga.

Naʻe tali ʻe Paula ʻenau tukuakiʻí ʻi heʻene tohi: “Ka ko e ʻOtuá ʻe lava ke fai ʻa e falala ki ai ko e meʻa ʻoku mau leaʻaki kiate kimoutolú ʻoku ʻikai ko e ʻIo kae hili iá ko e ʻIkai.” (2 Kol. 1:​18) Naʻe liliu ʻene ngaahi fokotuʻutuʻu ki he fonongá koeʻuhí naʻá ne fiemaʻu ʻa e lelei tahá maʻa hono fanga tokoua mo e fanga tuofāfine ʻi Kolinitoó. ʻI he 2 Kolinitō 1:​23, ʻoku tau lau ai ʻa e ngaahi lea ʻa Paulá: “Ko ʻeku mamae koeʻuhi ko kimoutolú kuo teʻeki ke u ʻalu atu ai ki Kolinitoó.” ʻI hono liliu ʻene ngaahi fokotuʻutuʻú, naʻá ne ʻoange ai kia kinautolu ha faingamālie ke ngāueʻaki ʻene akonakí ki muʻa ke ne ʻaʻahi atú. Pea ko e meʻa ia naʻa nau faí. Lolotonga ʻene ʻi Masitōniá, naʻe fanongo ai ʻa Paula meia Taitusi naʻe tokoniʻi ʻe he tohí ʻa e kau Kolinitoó ke nau mahinoʻi naʻe hala ʻa e meʻa naʻa nau faí pea naʻa nau fakatomala. Naʻe fiefia lahi heni ʻa Paula.​—2 Kol. 6:​11; 7:​5-7.

ʻI he taimi naʻe tukuakiʻi ai ʻe he “kau ʻapositolo makehe atú” ʻa Paula ki he ʻikai ke fai ki heʻene ngaahi palōmesí, naʻa nau toe pehē nai ʻoku ʻikai ke falalaʻanga ʻene ngāue fakamalangá. Kae kehe, naʻe fakamanatu ʻe Paula ki he kau Kolinitoó naʻá ne malangaʻi kia kinautolu ʻa e pōpoaki fekauʻaki mo Sīsū Kalaisí. “Ko e ʻAlo ʻo e ʻOtuá, ʻa Kalaisi Sīsū, ʻa ia naʻe malangaʻi ʻi homou haʻohaʻongá fakafou ʻiate kimautolú, ʻa ia, fakafou ʻiate au mo Silivēnusi mo Tīmote, naʻe ʻikai te ne hoko ko e ʻIo kae hili iá ko e ʻIkai, ka kuo hoko ʻa e ʻIó ko e ʻIo ʻi hono tuʻungá.” (2 Kol. 1:19) Ko ia naʻe taʻefalalaʻanga ʻa Sīsū Kalaisi ʻi ha faʻahinga founga? ʻIkai! ʻI he kotoa ʻene moʻuí mo e ngāue fakafaifekaú, naʻe leaʻaki maʻu pē ʻe Sīsū ʻa e moʻoní. (Sione 14:6; 18:37) Kapau ko e meʻa naʻe malangaʻaki ʻe Sīsuú naʻe moʻoni fakaʻaufuli mo falalaʻanga pea naʻe malangaʻi ʻe Paula ʻa e pōpoaki tatau, ko e malanga leva ʻa Paulá naʻe falalaʻanga foki.

Ko Sihova ʻa e “ʻOtua Moʻoniā.” (Saame 31:5) ʻOku tau sio ki he meʻá ni ʻi he meʻa hono hoko ʻoku hiki ʻe Paulá: “Tatau ai pē pe ko e hā hono lahi ʻa e ngaahi talaʻofa ʻa e ʻOtuá, kuo nau hoko ʻo ʻIo ko e meʻa ʻiate ia,” ʻa ia, fakafou ʻia Kalaisi. Koeʻuhí naʻe tauhi maʻu ʻe Sīsū ʻene anga-tonú lolotonga ʻene ʻi māmaní, ʻe lava ke tau fakapapauʻi ko e ngaahi talaʻofa ʻa Sihová ʻoku falalaʻanga. ʻOku hoko atu ʻa Paula: “Ko ia ai, ʻoku toe fakafou foki ʻiate ia [Sīsū] ʻa e ‘ʻĒmeni’ ʻoku leaʻaki ki he ʻOtuá ʻa ia ʻoku ʻoange ai ki he ʻOtuá ʻa e lāngilangi fakafou ʻiate kitautolu.” (2 Kol. 1:​20) ʻOku ʻuhinga ki he hā ʻa e pehē ko Sīsū ʻa e “ʻĒmeni”? ʻOku ʻuhinga iá ko Sīsū ʻa e fakapapauʻiʻanga ʻe hoko moʻoni ʻa e kotoa ʻo e ngaahi talaʻofa ʻa Sihová.

ʻOku hā mahino leva ʻi he taimi naʻe pehē ai ʻe Paula “ʻIo” naʻá ne ʻuhinga moʻoni ko e “ʻIo.” Hangē ko Sīsū Kalaisi mo e ʻOtua ko Sihová, naʻá ne ʻuhingaʻi ʻa e meʻa naʻá ne leaʻakí. (2 Kol. 1:​19) Naʻá ne alafalalaʻanga; naʻe ʻikai ko ha tokotaha ia naʻá ne fai ha ngaahi palōmesi “ʻi ha founga fakaekakano.” (2 Kol. 1:​17) Ka, naʻe tataki ia ʻe he laumālie ʻo e ʻOtuá. (Kal. 5:​16) Ko e meʻa kotoa naʻá ne faí naʻe fakamoʻoniʻi ai naʻá ne fiemaʻu ʻa e lelei tahá maʻa hono fanga tokouá mo e fanga tuofāfiné. Ko ʻene ʻIó naʻe ʻuhingá ko e ʻIo!

ʻI he ʻahó ni, ʻoku angamaheniʻaki ʻe he kakaí ke nau fai ʻa e ngaahi palōmesi pea ʻikai leva fai ki ai koeʻuhí ko ha kiʻi palopalema pe koeʻuhí ʻoku nau saiʻia ange ke fai ha meʻa kehe. ʻI he ngaahi meʻa fakapisinisí, ko e “ʻIó” ʻoku ʻikai ʻuhinga maʻu pē ko e “ʻIo,” naʻa mo e taimi kuo fai ai ha fakamoʻoni ʻi ha aleapau. ʻOku ʻikai kei vakai ʻa e tokolahi ki he malí ko ha palōmesi ʻa ia kuo pau ke nau tauhi ʻi he toenga ʻenau moʻuí, neongo ʻa e ngaahi faingataʻa te nau fehangahangai nai mo iá. Ko e tokolahi ʻo e kakai ʻoku nau veté ʻoku tupulaki fakautuutu, pea ʻoku fakahaaʻi heni ʻoku vakai ʻa e tokolahi ki heʻenau fuakava malí ko ha palōmesi taʻemahuʻinga ʻa ia ʻe lavangofua ke veteki.​—2 Tīm. 3:​1, 2.

Fēfē koe? ʻOku ʻuhinga hoʻo ʻIó ko e ʻIo? Hangē ko ia naʻa tau sio ki ai ʻi he kamataʻanga ʻo e kupú ni, ʻe hoko nai ha taimi ʻa ia ʻe fiemaʻu ke ke kaniseli ha fokotuʻutuʻu, ʻo ʻikai koeʻuhí ʻokú ke taʻefalalaʻanga, ka koeʻuhí ko ha ngaahi tuʻunga heʻikai lava ke ke mapuleʻi. Ka ʻo kapau te ke fai ha palōmesi, ko e moʻoni ʻoku totonu ke ke fai ʻa e meʻa kotoa te ke malavá ke fakahoko ia. (Saame 15:4; Māt. 5:​37) Kapau te ke fai eni, te ke hoko ai ʻo ʻiloa ko ha tokotaha ʻoku falalaʻanga, ko ha tokotaha ʻoku leaʻaki maʻu pē ʻa e moʻoní. (ʻEf. 4:​15, 25; Sēm. 5:​12) ʻI he taimi ʻoku ʻiloʻi ai ʻe he kakaí ʻokú ke falalaʻanga ʻi he ngaahi meʻa fakaʻahó, te nau loto-lelei ange nai ke fanongo ʻi he taimi ʻokú ke talanoa ai kia kinautolu fekauʻaki mo e Puleʻanga ʻo e ʻOtuá. Ko ia ʻoku totonu ke tau fakapapauʻi ko ʻetau ʻIó ʻoku ʻuhinga moʻoni ko e ʻIo!