ʻOkú Ke Manatuʻi?

Kuó ke fiefia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

• Ko e hā nai ʻe fai ʻe ha Kalisitiane ʻi heʻene hokosia ʻa e helaʻia fakaeongo mo fakalaumālié?

ʻOku fiemaʻu ke tau ʻiloʻi ʻa e tupuʻanga ʻo ʻetau helaʻiá. ʻE tokoni nai ke hiki ha lisi ʻo ʻetau ngaahi tōʻongá mo e ngaahi koloá, ʻo huʻihuʻi ʻa e fakamamafa kotoa pē ʻoku ʻikai fiemaʻú. ʻE lava ke tau fokotuʻu ha ngaahi taumuʻa moʻoni ʻo fakatatau ki hotau ngaahi tuʻungá. Ko e tokanga ki heʻetau moʻui lelei fakalaumālié ʻoku mahuʻinga pea ʻoku totonu ke kau ki ai ʻa e lotu mo e fakalaulauloto tuʻumaʻu.​—8/15, peesi 23-6.

• Ko e hā ʻoku mahinoʻi ai ʻe he Kau Fakamoʻoni ʻa Sihová ko e fika moʻoni ʻa e 144,000?

Hili hono fakahā ki he ʻapositolo ko Sioné ʻa e toko 144,000, naʻá ne sio ki ha “fuʻu kakai lahi, ʻa ia ʻe ʻikai lava ʻe ha taha hono lau.” (Fakaʻītali ʻamautolu; Fakahā 7:​4, 9) Kapau ko e fika 144,000 naʻe fakaefakatātā, ʻe mole ʻa e mālohi ʻo e faikehekehé. Naʻe lea ʻa Sīsū ʻo kau ki he faʻahinga ʻa ia te nau pule mo iá ʻi he tuʻunga ko ha “fanga sipi toko siʻi.” (Fakaʻītali ʻamautolu; Luke 12:32)​—9/1, peesi 30.

• Ko e hā naʻe lava ai ke fakatau atu ʻe ha ʻIsileli ha manu mate taʻefakatafe ki ha mulí?

Ko ha muli pe ʻāunofo ʻa ia naʻe ʻikai ke hoko ko ha ului Siú naʻe ʻikai ke ʻi he malumalu ia ʻo e Laó. Ko ia naʻe fakangofua ai ke foaki pe fakatau kiate ia ʻe ha ʻIsileli ha fanga manu pehē. (Teutalonome 14:21) Ka naʻe haʻihaʻi ha ului Siu ʻe he Laó pea naʻe ʻikai te ne kai ʻa e kakano taʻefakatafe ʻo ha manu pehē. (Livitiko 17:10)​—9/15, peesi 26.

• Ko e hā ʻa e paiomimētika, pea ko e hā nai ʻoku mahuʻinga ai ki he kau Kalisitiané?

Ko e malaʻe ia ʻo e saienisí ʻoku feinga ke faʻifaʻitaki ki he ngaahi tisaini ʻoku maʻu ʻi natulá. Ko e fakatātaá, naʻe tisaini ʻe he ongo tautehina Wright ha vakapuna hili ʻena ako ʻa e puna ʻa e fanga manupuna lalahí. Ko ia ai, ko e paiomimētiká ʻoku lava ke ne ueʻi ha Kalisitiane ke ʻoange ʻa e lāngilangí ki he Tokotaha-Fakatupú.​—10/1, peesi 9.

• Ko hai naʻe lave ki ai ʻi he 2 Kolinito 12:​2-4 naʻe punakaki ki palataisí?

ʻOku hoko mai ʻa e kupu ko iá ʻi he hili pē ʻa e ngaahi veesi ʻa ia naʻe taukapoʻi ai ʻe Paula ʻa hono tuʻunga ʻapositoló. Koeʻuhi ʻoku ʻikai ke lau ʻa e Tohi Tapú ki ha toe tokotaha kehe ʻa ia naʻá ne hokosia ha meʻa pehē pea koeʻuhi ko Paula ʻokú ne tala mai kia kitautolu ʻa e meʻa ko iá, ʻoku ngalingali ko Paula naʻá ne maʻu ʻa e vīsone ko ení.​—10/15, peesi 8.

• Ko e hā ʻa e ngaahi anga ʻe niʻihi ʻo Sīsū naʻá ne ʻai ai ia ke ne taau ke hoko ko e Taki naʻe fili ʻe he ʻOtuá?

Naʻe tauhi maʻu ʻe Sīsū ʻa e anga-tonu haohaoá, ʻo ne faitotonu mo totonu ʻi hono ʻulungāangá. Naʻá ne fakatapui kakato ki he ʻOtuá. Naʻe maʻu ʻe Sīsū ʻa e tokanga loloto ki he kakaí pea naʻá ne loto-lelei ke ngāue.​—11/1, peesi 6-7.

• ʻE ʻi fē ʻa e kau tēmenioó lolotonga ʻa e Taʻu ʻe Taha Afé?

ʻE lava ke tau fakaʻosiʻaki totonu ʻi he lolotonga ʻa e Pule Taʻu ʻe Taha Afe ʻa Kalaisí, te nau ʻi he luo taʻehanotakelé fakataha mo Sētane. (Fakahā 20:​1-3) Naʻe tomuʻa tala ʻi he Senesi 3:15 ʻa e laiki ʻo e ʻulu ʻo e ngatá, ʻa ia ʻoku kau ki ai ʻa hono tuku ki he luo taʻehanotakelé lolotonga ʻa e Taʻu ʻe Taha Afé. Ko hono hakó ʻoku kau ki ai ʻa e kau ʻāngelo fulikivanú, pe ko e kau tēmenioó. Ko e moʻoniʻi meʻa ko ia ʻenau fakahaaʻi ʻa e manavahē ki he luo taʻehanotakelé ʻoku fakahaaʻi ai ʻoku nau lāuʻilo ki he fakangatangata ko eni ka hoko maí. (Luke 8:​31)​—11/15, peesi 30-1.

• Ko e hā ʻoku totonu ai ke tokanga ha tokotaha fekauʻaki mo hono inu ʻo e ngaahi inu ʻolokaholó, neongo kapau ʻokú ne fakaʻehiʻehi mei hono fai ia ʻo aʻu ki he tuʻunga ʻo ʻene hā ʻoku konaá?

ʻOku fakahaaʻi ʻe he kakai ʻe niʻihi ʻa e fakaʻilonga siʻisiʻi ʻo e konaá naʻa mo e hili ʻenau inu ha ngaahi inu lahi. Kae kehe, ʻe fakatupunga māmālie nai ʻe ha taha ha fakafalala ki he ʻolokaholó pea hoko ai ʻo “popula ki he inu kava lahi.” (Taitusi 2:3) Naʻe fakatokanga ʻa Sīsū fekauʻaki mo e hoko ʻo “mafatukituki homou loto, ko e meʻa ʻi he faʻa kai, mo e faʻa inu.” (Luke 21:​34, 35) ʻOku ʻikai fiemaʻu ke aʻu ʻa e inú ki he lēvolo ʻo e konaá ki muʻa ke ne ʻai ha taha ke ne hoko ai ʻo tulemohe pea fakapikopiko—fakaesino pea pehē foki ki he fakalaumālié.​—12/1, peesi 19-​21.