ʻE Lava Ke Ke Ikuʻi ʻa e Taʻelatá

KO HAI ia ha taha ʻe lava ke ne taukaveʻi kuo ʻikai ʻaupito te ne hokosia ʻa e mamahi ʻoku ʻomai ʻe he taʻelatá? ʻOku lahi ʻa e ngaahi meʻa tefito ʻe lava ke ne ʻai kitautolu ke tau ongoʻi taʻelata. Neongo ia, ʻoku lahi tautefito ʻa e malava ke hoko ʻo taʻelata ʻa e kakai fefine kuo ʻikai ʻaupito te nau malí pe ko e faʻahinga ko ia ʻoku nau uitou pe vete malí.

Ko e fakatātaá, ko ha finemui Kalisitiane ko hono hingoá ko Falanisesi ʻokú ne fakamatala: “ʻI he taimi naʻá ku aʻu ai ki he taʻu 23, ne hā ngali ko e kotoa ʻo hoku ngaahi kaumeʻá naʻa nau mali, pea naʻá ku toe pē tokotaha.”a Ko e ongoʻi ʻo e nofo tokotahá ʻe fakautuutu nai ia ʻi he ʻalu ʻa e taʻú pea hoko ai ʻo toe fakangatangata ange ʻa e ʻamanaki ki he nofo malí. “Naʻe ʻikai ʻaupito te u fakataumuʻa ke nofo taʻemali, pea te u kei saiʻia pē ke mali kapau ʻe hoko mai ha faingamālie,” ko e fakamatala ia ʻa Senitulā, ʻokú ne ʻi hono taʻu 40 tupu lahi ʻi he taimí ni. Ko ʻEniselā, ʻi hono taʻu 50 tupú, ʻokú ne fakahaaʻi: “Naʻe ʻikai te u fai ha fili fakapapau ke nofo taʻemali, ka ko e tuʻunga ia ʻoku ou ʻi aí. Naʻe tokosiʻi ʻaupito ʻa e fanga tuongaʻane taʻemali ʻi he feituʻu naʻe vaheʻi au ki ai ʻi he tuʻunga ko ha tāimuʻa makehé.”

ʻOku taau ke fakaongoongoleleiʻi ʻa e kau fefine Kalisitiane tokolahi ʻoku nau fili ke ʻoua ʻe mali koeʻuhi ko ʻenau fai mateaki ki he akonaki ʻa Sihova ke mali “i he Eiki be.” (1 Kolinito 7:​39, PM) ʻOku angangofua ʻa e niʻihi ki he tuʻunga taʻemalí, ka ʻoku ʻiloʻi ʻe he niʻihi kehe ko e holi ke mali pea maʻu fānaú ʻoku fakautuutu ia ʻi he faai mai ʻa e ngaahi taʻú. “Ko ha tuʻunga halaʻatā fakaeongo, tupu mei he ʻikai maʻu ha hoa malí, ʻoku ʻiate au maʻu pē ia,” ko e fakamatala ia ʻa Senitulaá.

Ko e ngaahi meʻa tefito ʻe niʻihi, hangē ko hono tokangaʻi ʻa e ngaahi mātuʻa taʻumotuʻá, ʻokú ne fakalahi nai ʻa e ongoʻi taʻelatá. “Koeʻuhi ko e ʻikai te u malí, naʻe ʻamanekina au ʻe he fāmilí ke u tokangaʻi ʻemau ongo mātuʻa taʻumotuʻá,” ko e lau ia ʻa Senitulaá. “Feʻunga mo e taʻu ʻe 20 ʻa ʻeku fua ʻa e konga lahi taha ʻo e fatongia ko ení, neongo ko e taha au ʻi he fānau ʻe toko ono. Ne mei faingofua lahi ange ʻa e moʻui fakataha mo ha husepāniti ʻa ia naʻe mei lava ke ne poupouʻi au.”

ʻOku lave ʻa Falanisesi ki ha toe tafaʻaki ʻe taha ʻokú ne fakalahi ʻa ʻene taʻelatá. ʻOkú ne fakamatala: “ʻI he taimi ʻe niʻihi ʻoku ʻeke hangatonu mai ai kiate au ʻe he kakaí, ‘Ko e hā kuo ʻikai ai te ke malí?’ Ko ha lea pehē ʻokú ne ʻai au ke u ongoʻi ʻi ha tuʻunga ko e foʻui pē ʻoʻoku ʻa ʻeku taʻemalí. ʻI he meimei mali kotoa pē ʻoku ou ʻalu ki ai, ʻoku ʻeke mai ai ʻe ha taha ʻa e fehuʻi ʻoku ʻikai te u fie fanongo ki ai, ‘Ko ia, te ke malí ʻafē?’ Pea ʻoku kamata ke u fakakaukau, ‘Kapau ʻoku ʻikai ke tokanga mai kiate au ʻa e fanga tuongaʻane ʻi he tuí ʻa ia ʻoku nau tokanga ki he meʻa fakalaumālié, mahalo pē ʻoku ʻikai te u maʻu ʻa e ngaahi ʻulungaanga faka-Kalisitiane ʻoku fiemaʻú pe mahalo pē ʻoku ʻikai te u fakaʻofoʻofa.’”

ʻE lava fēfē ke ikuʻi ʻa e ongoʻi ʻo e nofo tokotahá mo e taʻelatá? Ko e hā ʻe lava ke fai ʻe he niʻihi kehé ke tokoni, kapau ʻoku ʻi ai moʻoni ha meʻa?

Falala kia Sihova

Naʻe hiva ʻa e tokotaha-tohi-sāmé: “Li hoʻo kavenga kia Sihova, he te ne poupou koe ʻe ia: ʻe ʻikai te ne tuku ʻa e maʻoniʻoni ke ueʻia ʻo taʻengata.” (Sāme 55:22) Ko e foʻi lea “kavenga” ʻi he konga tohi faka-Hepeluú ʻoku ʻuhinga moʻoni iá ko e “ʻinasi,” pea ʻoku ʻuhinga ia ki he ngaahi fakahohaʻa mo e loto-moʻua ʻoku tau faingataʻaʻia nai ai koeʻuhi ko hotau tuʻunga ʻi he moʻuí. ʻOku lāuʻilo lahi ange ʻa Sihova fekauʻaki mo e ngaahi kavenga ko ení ʻi ha toe taha kehe pē pea ʻe lava ke ne ʻomai kia kitautolu ʻa e mālohi ke fakaleleiʻi ʻaki kinautolú. Ko e falala kia Sihova ko e ʻOtuá ʻa e meʻa kuó ne tokoniʻi ʻa ʻEniselā ke ne fekuki ai mo e ongoʻi taʻelatá. ʻI he lave ki heʻene ngāue fakafaifekau taimi-kakató, ʻokú ne manatuʻi: “ʻI heʻeku kamata tāimuʻá, ko au mo hoku hoa ngāué naʻá ma nofo ʻi he feituʻu mamaʻo mei he fakatahaʻanga ofi tahá. Naʻá ma ako ke falala kakato kia Sihova, pea ko e falala ko ení kuó ne tokoniʻi au ʻi he kotoa ʻo ʻeku moʻuí. ʻI heʻeku maʻu ʻa e fakakaukau taʻepaú, ʻoku ou talanoa kia Sihova pea ʻokú ne tokoniʻi au. Kuo hoko maʻu pē ʻa e Sāme 23 ko ha fakafiemālie lahi, pea ʻoku ou lau maʻu pē ia.”

Naʻe maʻu ʻe he ʻapositolo ko Paulá ha kavenga mahuʻinga ke fuesia. ʻIkai siʻi hifo he tuʻo tolú, naʻá ne ‘kōlenga ai ki he ʻEikí ke mavahe meiate ia ʻa e tolounua ʻi hono kakanó.’ Naʻe ʻikai ke tokoniʻi fakaemana ʻa Paula, ka naʻá ne maʻu ha palōmesi ko e ʻaloʻofa maʻataʻatā ʻa e ʻOtuá te ne fakaivia ia. (2 Kolinito 12:​7-9) Naʻe toe ʻiloʻi ʻe Paula ʻa e fakapulipuli ʻo e fiemālié. Naʻá ne tohi ki mui: “Ne akoʻi au, ʻi heʻeku meʻa tāu taha mo hono kotoa, kau potopotoʻi ʻi he nofo makona mo e nofo fiekaia, mo e nofo mohumeʻa mo e nofo masiva. ʻOku ou mafeia ʻa e meʻa kotoa pe ʻiate ia ʻoku ne fakakaukaua au.”​—Filipai 4:​12, 13.

ʻE lava fēfē ke maʻu ʻe ha taha ʻa e mālohi ʻo e ʻOtuá ʻi he taimi ʻokú ne ongoʻi loto-siʻi ai pe taʻelatá? Naʻe tohi ʻa Paula: “Neongo pe ko e ha ʻa e meʻa, ʻoua te mou lotomoʻua ai; ka ʻi he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi. Pea ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi homou loto mo hoʻomou ngaahi fakakaukau ʻia Kalaisi Sisu.” (Filipai 4:​6, 7) Naʻe ngāueʻaki ʻe Senitulā ʻa e fakahinohino ko ení. ʻOkú ne fakamatala: “ʻI he hoko ʻo taʻemalí, ʻoku lahi ʻa e taimi ʻoku ou ngāue tokotaha aí. ʻOku ʻomai kiate au ʻe he meʻá ni ʻa e faingamālie feʻunga ke lotu ai kia Sihova. ʻOku ou ongoʻi ofi ʻaupito ai kiate ia pea lava ke talanoa tauʻatāina kiate ia fekauʻaki mo ʻeku ngaahi palopalemá mo e fiefiá.” Pea ʻoku pehē ʻe Falanisesi: “Ko hono tauʻi ʻiate au pē ʻa e ngaahi fakakaukau taʻepaú ko ha faitau hokohoko ia. Ka ko hono fakahaaʻi hangatonu hake ʻeku ngaahi ongoʻí kia Sihová ʻoku tokoni lahi ia. ʻOku ou tuipau ʻoku mahuʻingaʻia ʻa Sihova ʻi ha meʻa pē te ne uesia nai ʻa hoku tuʻunga lelei fakalaumālié mo fakaeongó.”​—1 Timote 5:5.

“Mou Fetoutou Fefuaaki Hoo Mou Kavega”

ʻI loto ʻi he fetokouaʻaki faka-Kalisitiané, ʻoku ʻikai pau ai ke fua tokotaha pē ʻa e ngaahi kavengá. “Mou fetoutou fefuaaki hoo mou kavega, bea fakamooni ai ki he fono a Kalaisi,” ko e enginaki ia ʻa e ʻapositolo ko Paulá. (Kaletia 6:​2, PM) Fakafou ʻi heʻetau feohi mo e kaungā Kalisitiané, ʻe lava ke tau maʻu ai ʻa e “lea lelei” ʻo e fakalototoʻa ʻa ia ʻe lava ke ne fakamaʻamaʻaʻi ʻa e kavenga ʻo e taʻelatá.​—Palovepi 12:25.

Toe fakakaukau foki ki he meʻa ʻoku leaʻaki ʻe he ngaahi Konga Tohitapú fekauʻaki mo e ʻofefine ʻo e fakamaau ʻIsileli ko Sēfitá. Ki muʻa ʻi heʻene ikunaʻi ʻa e ngaahi kongakau fili ʻo ʻĀmoní, naʻe fuakava ai ʻa Sēfita ke foaki kia Sihova ʻa e ʻuluaki tokotaha pē ʻi hono falé ʻe hū mai ke talamonū kiate iá. Ne hoko ko e tokotaha ko iá ʻa hono ʻofefiné. (Fakamaau 11:​30, 31, 34-​36) Neongo naʻe ʻuhinga iá te ne nofo taʻemali ai pē pea tukuange ʻa ʻene taumuʻa fakanatula ke maʻu ha fāmilí, naʻe fakamoʻulaloa loto-lelei ʻa e ʻofefine ʻo Sēfitá ki heʻene fuakavá ʻo ne ngāue ʻi he temipale ʻi Sailó ʻi he toenga ʻo ʻene moʻuí. Naʻe taʻefakatokangaʻi ʻa ʻene feilaulaú? ʻI hono kehé: “Ko e taʻu kotoa pe naʻe ʻalu ʻa e kau taʻahine Isileli ke sani [“fakaongoongoleleiʻi,” NW] ʻa e ʻofefine ʻo Sefita, ko e tangata Kiliati, ʻo ʻaho fa ʻi he taʻu.” (Fakamaau 11:40) ʻIo, ko e fakaongoongoleleí ʻe lava ke ne fakalotolahiʻi ʻa e faʻahinga ʻoku nau maʻu iá. Ko ia ai, ʻoua te tau tuku hono fakaongoongoleleiʻi ʻa e faʻahinga tāú.

ʻOku lelei ke tau toe fakakaukau ki he faʻifaʻitakiʻanga ʻa Sīsuú. Neongo naʻe ʻikai ko e tōʻonga faka-Siú ia ke talanoa ʻa e kakai tangatá mo e kakai fefiné, naʻe vaheʻi ʻe Sīsū ʻa e taimi kia Mele pea mo Māʻata. Ngalingali, ko e ongo uitou kinaua pe ko e ongo fefine ne ʻikai te na mali. Naʻe fiemaʻu ʻe Sīsū kinaua fakatouʻosi ke na maʻu ʻa e ngaahi ʻaonga fakalaumālie ʻo hono tuʻunga ko e kaumeʻá. (Luke 10:​38-​42) ʻE lava ke tau faʻifaʻitaki ki he faʻifaʻitakiʻanga ʻa Sīsuú ʻaki hono fakakau hotau fanga tuofāfine fakalaumālie taʻemalí ʻi he ngaahi taimi fakasōsialé pea ʻi hono fai ʻa e ngaahi fokotuʻutuʻu ke kau mo kinautolu ʻi he ngāue fakamalangá. (Loma 12:13) ʻOku nau houngaʻia ʻi he tokanga peheé? Naʻe pehē ʻe ha tuofefine ʻe taha: “ʻOku ou ʻiloʻi ʻoku ʻofa mo mahuʻingaʻia ʻiate au ʻa e fanga tuongaʻané, ka ʻoku ou houngaʻia ʻi he taimi ʻoku nau mahuʻingaʻia fakafoʻituitui lahi ange ai ʻiate aú.”

“Koeʻuhi ʻoku ʻikai te mau maʻu fāmili,” ko e fakamatala ia ʻa Senitulaá, “ʻoku mau fiemaʻu lahi ange ke ʻofaʻi, ke mau ongoʻi ko ha konga ʻo e fāmili ʻo e fanga tuongaʻane mo e fanga tokoua fakalaumālié.” ʻOku hā mahino, ʻoku tokanga ʻa Sihova ki he faʻahinga peheé, pea ʻoku tau fāitaha mo ia ʻi he taimi ʻoku tau ʻai ai ke nau ongoʻi ʻoku fiemaʻu mo ʻofaʻi kinautolú. (1 Pita 5:​6, 7) Ko e tokanga peheé ʻe ʻikai ke taʻefakatokangaʻi, he “ko ia oku manavaofa ki he majiva oku foaki eia kia Jihova: bea ko ia kuo ne foaki te ne [Sihova ko e ʻOtuá] toe totogi kiate ia.”​—Palovepi 19:​17, PM.

“Kuo Pau ke Taki Taha Fua ʻEne Kavenga Aʻana”

Neongo ʻe lava ke tokoni ʻa e niʻihi kehé, pea ʻe lava ke hoko ʻo mātuʻaki fakalototoʻa ʻenau poupoú, “kuo pau ke taki taha fua ʻene kavenga aʻana.” (Kaletia 6:5) Ko ia ai, ʻi hono fua ʻa e kavenga ʻo e taʻelatá, ʻoku fiemaʻu ke tau tokanga fekauʻaki mo e ngaahi fakatuʻutāmaki pau. Hangē ko ení, ʻe ikunaʻi nai kitautolu ʻe he taʻelatá kapau te tau holomui ki ha tuʻunga ʻo e ʻikai fai ha fetuʻutakí. ʻI he tafaʻaki ʻe tahá, ʻe lava ke tau ikunaʻi ʻa e taʻelatá ʻaki ʻa e ʻofá. (1 Kolinito 13:​7, 8) Ko e foakí mo e vahevahe atú, ʻa e founga lelei taha ke maʻu ai ʻa e fiefiá​—ʻo tatau ai pē pe ko e hā hotau ngaahi tuʻungá. (Ngāue 20:35) “ʻOku ʻikai te u maʻu ha fuʻu taimi lahi ke fakakaukau ai fekauʻaki mo ʻeku taʻelatá,” ko e lau ia ʻa ha tuofefine tāimuʻa ngāue mālohi ʻe taha. “ʻI he taimi ʻoku ou ongoʻi ʻaonga ai mo femoʻuekiná, ʻoku ʻikai ai te u ongoʻi taʻelata.”

Kuo pau ke tau toe tokanga ke ʻoua naʻa tenge kitautolu ʻe he taʻelatá ki ha vā fakaemanako taʻefakapotopoto. Ko e fakatātaá, he fakamamahi ē ke fakaʻatā ʻa e holi ki he nofo malí ke ne fakakuihi kitautolu ki he ngaahi palopalema lahi ʻa ia ʻoku tupu mei he mali mo ha tokotaha taʻetuí pea tautefito ki he akonaki Fakatohitapu ke fakaʻehiʻehi mei he ʻioke peheé! (2 Kolinito 6:​14) Naʻe pehē ʻe ha fefine Kalisitiane naʻe vete: “ʻOku ʻi ai ʻa e meʻa ʻe taha ʻoku kovi ange ia ʻi he hoko ʻo taʻemalí. Ko e mali mo e tokotaha halá.”

Ko ha palopalema ʻa ia ʻe ʻikai lava ke fakaleleiʻi ʻe pau nai ke kātakiʻi ʻi ha tuʻunga he taimí ni. ʻI he tokoni ʻa e ʻOtuá, ʻe lava ke kātekina ai ʻa e ongoʻi taʻelatá. ʻI heʻetau hokohoko atu ʻi he tauhi kia Sihová, ʻofa ke tau hoko ʻo tuipau ʻe ʻi ai ʻa e ʻaho ʻe fakatōliʻa ai ʻetau ngaahi holí kotoa ʻi he founga lelei taha ʻe ala lavá.​​—Sāme 145:16.

[Fakamatala ʻi lalo]

[Fakatātā ʻi he peesi 28]

ʻE lava ke ikunaʻi ʻa e taʻelatá ʻaki ʻa e foakí mo e vahevahe atú