ʻOua ʻe Fiu ʻi he Faileleí

“MOU ʻai ke tāu hoʻomou fakafeangai ki he Senitaile,” ko e kōlenga ia ʻa e ʻapositolo ko Pitá. (1 Pita 2:12) Ko e foʻi lea faka-Kalisi naʻe liliu ko e “failelei” ʻoku ʻuhinga ia ki ha meʻa ʻoku “fakaʻofoʻofa, fakaʻeiʻeiki, lāngilangiʻia mo lelei ʻaupito.” ʻI he ngaahi ʻahó ni, ʻoku hā ngali taʻemoʻoni ʻo ʻikai ha ʻamanaki nai ke ʻamanekina ha ʻulungāanga fakaʻeiʻeiki mo fakaʻapaʻapa mei he kakaí ʻi he tuʻunga fakalūkufuá. Ka neongo ia, ʻi he tuʻunga fakalūkufuá, ko e kakai ʻa Sihova ʻi he ʻaho ní kuo nau lavameʻa ʻi he muimui ki he ekinaki ʻa Pitá. Ko hono moʻoní, ʻoku nau ʻiloa ʻi he māmaní kotoa ʻi heʻenau ʻulungāanga leleí.

ʻOku tautefito ʻa e taau ke fakatokangaʻi ʻení ʻi he taimi ʻoku tau fakakaukau atu ai ki he ngaahi loto-mafasia mo e loto-moʻua ʻoku tau fetaulaki mo ia lolotonga ʻa e “ngaahi taimi faingataʻa.” (2 Timote 3:1) Ko e ngaahi ʻahiʻahí ko e konga ia ʻo ʻetau moʻui fakaʻahó, pea ko e fakafepaki ki he founga moʻui faka-Kalisitiané ko ha meʻa anga-maheni ia. Tānaki atu ki aí, lolotonga ʻoku fuonounou pē ʻa e ngaahi ʻahiʻahi ʻe niʻihi, ʻoku kei hokohoko atu pē ʻa e niʻihi ia ʻo ʻikai taʻofi, naʻa mo ʻene fakautuutu ʻa hono mālohí. Ka neongo ia, naʻe naʻinaʻi mai ʻa e ʻapositolo ko Paulá: “Ka ʻoua naʻa ta fiu ʻi he failelei, he te ta utu ʻi hono faʻahitaʻu, ʻo kapau ʻe ʻikai te ta vaivai.” (Kaletia 6:9) Ka ʻoku malava fēfē nai ke fai—pea hokohoko atu ke fai—ʻa e meʻa ʻoku leleí ʻi he fehangahangai mo e ngaahi ʻahiʻahi fakamamahí pea mo e ngaahi fakafili hokohokó?

Tokoni ki he Faileleí

Ko e hoko ʻo “fakaʻeiʻeiki, lāngilangiʻia mo lelei ʻaupitó” ʻoku hā mahino ko ha tuʻunga ia ʻo e tokotaha ʻi lotó, ko ha tuʻunga ʻo e lotó. Ko ia ai, ko hono tauhi maʻu ha ʻulungāanga lelei ʻi he fehangahangai mo e ngaahi ʻahiʻahí mo e faingataʻá, ʻoku ʻikai ko ha tali fakatuʻupakē pē ia, ka ko ha ola ia ʻo e muimui fakaʻaho mo hono ngāueʻaki ʻa e ngaahi tefitoʻi moʻoni ʻa e Tohi Tapú ʻi he ngaahi tafaʻaki kotoa ʻo e moʻuí. Ko e hā ʻa e niʻihi ʻo e ngaahi meʻa ʻe lava ke tokoni ʻi he fekauʻaki mo e meʻá ni? Fakakaukau ange ki he meʻa hokó.

Fakatupulekina ʻa e fakakaukau fakaʻatamai ʻa Kalaisí. ʻOku fiemaʻu ʻa e anga-fakatōkilalo ke kātekina ʻa e meʻa ʻoku hā ngali taʻetotonú. Ko ha tokotaha ʻoku fakakaukau māʻolunga kiate ia ʻoku hā ngali ʻe ʻikai te ne kātekina ʻa e ngaohikoviʻí. Ka neongo ia, ko Sīsū, “naʻa ne fakamoʻulaloaʻi ia, heʻene hoko ko e fai talangofua ʻo aʻu ki heʻene mate.” (Filipai 2:​5, 8) ʻI he faʻifaʻitaki kiate iá, ʻe ʻikai ai te tau ‘fiu pe vaivai’ ʻi heʻetau ngāue toputapú. (Hepelu 12:​2, 3, PM) Ngāueʻaki ʻa e talangofua anga-fakatōkilaló ʻaki ʻa e loto-lelei ke fāitaha mo e faʻahinga ko ia ʻoku nau takimuʻa ʻi hoʻo fakatahaʻanga fakalotofonuá. (Hepelu 13:17) Ako ke vakai ki he niʻihi kehé ʻoku nau “lelei hake” ʻiate koe, ʻo fakamuʻomuʻa ʻenau ngaahi mahuʻingaʻiá ʻi haʻaú.—Filipai 2:​3, 4.

Manatuʻi ʻoku ʻofa ʻa Sihova ʻiate koe. Kuo pau ke tau tuipau ko Sihová “ʻoku ʻi ai ia, pea te ne hanga ʻo totongi kiate kinautolu ʻoku kumi hakili kiate ia.” (Hepelu 11:6) ʻOkú ne tokanga moʻoni mai kia kitautolu pea ʻokú ne fiemaʻu ke tau maʻu ʻa e moʻui taʻengatá. (1 Timote 2:4; 1 Pita 5:7) ʻI hono manatuʻi ʻoku ʻikai lava ʻe ha meʻa ke ne taʻofi ʻa e ʻofa ʻa e ʻOtuá kiate kitautolú te ne tokoniʻi kitautolu ke ʻoua te tau foʻi ʻi he malumalu ʻo e ʻahiʻahí.—Loma 8:​38, 39.

Falala kakato kia Sihova. ʻOku mātuʻaki fiemaʻu ʻa e falala kia Sihová, tautautefito ʻi he taimi ʻoku hā ngali ʻikai hano ngataʻanga pe ngali fakamanamana ai ki heʻetau moʻuí ʻa e ngaahi ʻahiʻahí. Kuo pau ke tau maʻu ʻa e falala kakato ʻe ʻikai fakaʻatā ʻe Sihova ha faʻahinga ʻahiʻahi pē ke ‘makehe atu ʻi hotau mafaí,’ ka te ne “ngaohi [maʻu pē] . . . hono haoʻanga foki mei ai.” (1 Kolinito 10:13) Naʻa mo e fakamanamana ʻo e maté ʻe lava pē ke tau fehangahangai loto-toʻa mo ia, ʻi he taimi ʻoku tau falala ai kia Sihová.—2 Kolinito 1:8, 9.

Kītaki ʻi he lotu. Ko e lotu ʻoku haʻu moʻoni mei he lotó ʻoku mahuʻinga. (Loma 12:12) Ko e lotu loto-moʻoní ko e taha ia ʻo e ngaahi founga ʻoku tau ʻunuʻunu ofi ai kia Sihová. (Semisi 4:8) Fakafou ʻi he hokosia fakafoʻituituí, ʻoku tau ako ai “ka tau ka kole ha meʻa . . . ʻoku ne tokanga kiate kitautolu.” (1 Sione 5:14) Kapau ʻe fakaʻatā ʻe Sihova hotau ʻahiʻahí ke hokohoko atu ko ha siviʻi ʻo ʻetau mateakí, tau lotu ki heʻene tokoní ke kātekina ia. (Luke 22:​41-43) ʻOku akoʻi mai kia kitautolu ʻe heʻetau lotú ʻoku ʻikai ʻaupito ke tau tuēnoa, ʻi he kau ʻa Sihova mo kitautolú, te tau ikuna maʻu pē.—Loma 8:​31, 37.

Ngaahi Ngāue Leleí —‘Lava Ai ʻa e Fakamālō mo e Fakaʻapaʻapaʻia’

ʻI he taimi ki he taimi, ʻoku “moʻua [ai] ʻi he ngaahi ʻahiʻahi kehekehe” ʻa e kotoa ʻo e kau Kalisitiané. Ka neongo ia, kuo pau ke “ʻoua naʻa ta fiu ʻi he failelei.” ʻI he taimi ʻo e loto-mafasiá, maʻu ʻa e mālohi mei he ʻilo ko hoʻo faitōnungá ʻe faai atu pē ʻo ‘lava ai ʻa e fakamālō mo e langilangiʻia mo e fakaʻapaʻapaʻia.’ (1 Pita 1:​6, 7) Maʻu ʻaonga kakato mei he kotoa ʻo e ngaahi tokonaki fakalaumālie meia Sihova ke fakaivimālohiʻi ʻaki koé. ʻI he taimi ʻokú ke fiemaʻu ai ha tokanga fakafoʻituituí, ʻalu ki he faʻahinga ʻoku nau hoko ko e kau tauhi-sipi, kau faiako mo e kau faleʻi ʻi he fakatahaʻanga Kalisitiané. (Ngāue 20:28) Maʻu tuʻumaʻu ʻa e ngaahi fakataha kotoa ʻa e fakatahaʻangá, ʻa ia ʻoku ‘fakaʻaiʻai ai ʻa kitautolu ki he feʻofaʻaki mo e ngaue lelei.’ (Hepelu 10:24) Ko ha polokalama ʻo e lau Tohi Tapu mo e ako fakafoʻituitui fakaʻahó ʻe tokoni ia ke ke hanganaki ʻāʻā ai mo mālohi fakalaumālie; ʻe pehē pē ʻi hoʻo kau tuʻumaʻu ki he ngāue fakafaifekau faka-Kalisitiané.—Sāme 1:​1-3; Mātiu 24:14.

Ko e lahi ange ko ia hoʻo hokosia ʻa e ʻofa mo e tokanga ʻa Sihová, ko e lahi ange ia hoʻo holi ke “fai velega ae gaahi gaue lelei.” (Taitusi 2:​14, PM) Manatuʻi, “ko ia te ne kataki ʻo aʻu ki he ngataʻanga, ko e toko taha ko ia te ne moʻui.” (Mātiu 24:13) ʻIo, fakapapauʻi ke ‘ʻoua ʻe fiu ʻi he faileleí’!

[Fakamatala ʻi he peesi 29]

Kuo pau ke tau maʻu ʻa e falala kakato ʻe ʻikai fakaʻatā ʻe Sihova ha faʻahinga ʻahiʻahi pē ke ‘makehe atu ʻi hotau mafaí,’ ka te ne “ngaohi [maʻu pē] . . . hono haoʻanga foki mei ai”

[Fakatātā ʻi he peesi 30]

Ko e femoʻuekina ai pē ʻi he ngāue fakateokalatí ʻe lava ke tokoni ke teuʻi kitautolu ke tau fehangahangai mo e ʻahiʻahí