Hoko ʻo Fakalakalaka​—Fai ha Laka ki Muʻa

ʻI HOʻO ʻuluaki ako ke ngāueʻaki ʻa e ngaahi tefitoʻi moʻoni faka-Tohitapú, ko e ngaahi sīpinga fakakaukau, lea, pea mo e tōʻonga kuo tō lolotó ʻoku kamata māmālie ia ke liliu. Ko e konga lahi ʻo e meʻá ni naʻe hoko ia ki muʻa ke ke kau ʻi he Ako Fakafaifekau Fakateokalatí. ʻI he taimi ní ngalingali kuó ke aʻu ki he tuʻunga ʻa ia kuó ke fakatapui ai hoʻo moʻuí kia Sihova. ʻOku ʻuhinga iá ʻe lava leva ke ke taʻofi hoʻo fai ha fakalakalaká? ʻIkai ʻaupito. Ko hoʻo papitaisó ko ha kamataʻanga pē ia.

Ko e ākonga ko Tīmoté naʻe ʻosi ngāue ia ko ha mātuʻa Kalisitiane ʻi hono tala ange kiate ia ʻe Paula ke “fakalaulauloto” fakatouʻosi ki he akonaki naʻe ʻoange kiate iá pea mo e ngaahi monū ʻo e ngāue kuo tuku kiate iá—ke “moʻua” ki he ngaahi meʻá ni—koeʻuhi ke ‘ha mai ʻene fakaau ki muʻá i he mea kotoabe.’ (1 Tim. 4:​12-​15, PM) Pe ko hoʻo toki kamata pē ia ke fou ʻi he hala ʻo e moʻoní pe maʻu ha taukei lahi ʻi he moʻui faka-Kalisitiané, ʻoku totonu ke ke mahuʻingaʻia ʻi hono fai ʻa e laka ki muʻá.

ʻI he Efeso 3:​14-​19, ʻoku tau lau ai naʻe lotu ʻa e ʻapositolo ko Paulá ke hoko hono kaungātuí ʻo “lava ʻaupito ke laveʻi . . . hono māukupu, mo hono loloa, mo hono maʻolunga, mo hono loloto” ʻo e moʻoní. Ki he taumuʻa ko iá, naʻe ʻomai ai ʻe Sīsū ʻa e meʻaʻofa ʻi he kau tangata ke nau faiako, fakatonutonu, mo langa hake ʻa e fakatahaʻangá. Ko e fakalaulauloto tuʻumaʻu ki he Folofola fakamānavaʻi ʻa e ʻOtuá, fakataha mo e tataki mei he kau faiako taukeí, ʻe lava ke ne tokoniʻi kitautolu ke tau “tupu hake” fakalaumālie.—Ef. 4:​11-15.

Ko e tupu ko iá ʻoku kau ai ʻa e hoko ʻo “fakafoʻou ʻe he Laumalie ʻo homou ʻatamai.” ʻOku kau ki he meʻá ni ʻa hono fokotuʻu ha hehema fakaeʻatamai mālohi ʻo fehoanaki mo e tuʻunga ko ia ʻo e ʻOtuá mo Kalaisí. ʻOku fiemaʻu ki ai ʻa e fakamoʻulaloa tuʻumaʻu ki heʻena fakakaukaú, koeʻuhi ke “kofuʻaki ʻa e tangata foʻou.” (Ef. 4:​23, 24) ʻI hoʻo ako ʻa e ngaahi Kōsipelí, ʻokú ke vakai ki he ngaahi fakamatala fekauʻaki mo e moʻui ʻa Kalaisí ko ha sīpinga ia kia koe ke ke muimui ai? ʻOkú ke feinga ke ʻiloʻi ʻa e ngaahi fasi-ʻa-anga pau ʻoku fakahaaʻi ʻe Sīsuú pea fai leva ha feinga moʻoni ke faʻifaʻitaki ki he ngaahi meʻá ni ʻi hoʻo moʻuí tonu?​—1 Pita 2:​21.

Ko e ngaahi tuʻunga-lea ʻokú ke fakakau ʻi he fetalanoaʻakí ʻe lava ke hoko ko e fakahaaʻi ia ʻo e tuʻunga lahi ʻa ia kuó ke fai ai ʻa e laka ki muʻa ko iá. Ko e faʻahinga ko ia kuo nau kofuʻaki ʻa e angaʻitangata foʻoú ʻoku ʻikai te nau kau ʻi he lea ʻoku taʻetotonu, kovi, fakalielia, pe taʻepaú. ʻI hono kehé, ko ʻenau leá ʻoku “lelei o aoga ke laga aki hake . . . ke tubu ai ae tokoni ki he kau fanogo.” (Ef. 4:​25, 26, 29, 31, PM; 5:​1, 3 [3, 4, PM]; Siu. 16) Ko ʻenau ngaahi leá mo e ngaahi fakamatalá fakatouʻosi ʻi he fakatāutahá pea ʻi he ngaahi fakataha ʻa e fakatahaʻangá ʻoku fakahaaʻi ai ʻoku liliuʻi ʻe he moʻoní ʻenau moʻuí.

Kapau ʻoku ʻikai kei “felīlīʻaki mo feʻaveaki fano [koe] ʻe he matangi fakaakonaki kotoa pe,” ko e meʻá ni foki ko e fakamoʻoni ia ʻo e laka ki muʻá. (Ef. 4:14) Ko e fakatātaá, ko e hā hoʻo talí, ʻi he taimi ʻoku nafui ʻaki ai koe ʻe he māmaní ʻa e ngaahi fakakaukau foʻou, tefitoʻi moʻoni, pe ngaahi founga ʻo e fakafiefiá? ʻOku fakataueleʻi koe ke ke vaheʻi ha taimi mei he ngaahi fatongia fakalaumālié koeʻuhi ke tuli ai ki he ngaahi meʻa peheé? Ko hono fai iá ʻe lava ke ne taʻofi ai ʻa e laka ki muʻa fakalaumālié. He fakapotopoto ange ē ke fakatau mai ʻa e taimi ki he ngaahi ngāue fakalaumālié!​—Ef. 5:​15, 16.

Ko e founga ʻo hoʻo feangainga mo e kakai kehé ʻe toe lava ke hoko ia ko ha meʻa ʻokú ne fakahaaʻi ʻa e laka ki muʻa fakalaumālié. Kuó ke ako ke ‘manavaʻofa, pea mo fakamolemoleʻi’ ho fanga tokouá mo e fanga tuofāfiné?—Ef. 4:32.

Ko hoʻo fakalakalaka ʻi hono fai ʻa e ngaahi meʻá ʻi he founga ʻa Sihová ʻoku totonu ke fakahāhā ia fakatouʻosi ʻi he fakatahaʻangá pea ʻi ʻapi. ʻOku totonu ke toe hā mahino ia ʻi he ʻapiakó, ʻi he ngaahi feituʻu fakapuleʻangá, pea ʻi ho feituʻu ngāueʻanga fakamāmaní. (Ef. 5:21–​6:9) Kapau ko e kotoa ʻo e ngaahi tuʻunga peheé ʻokú ke fakahāhā ai ʻa e ngaahi ʻulungaanga fakaʻotuá ʻi ha tuʻunga kakato ange, ko hoʻo laka ki muʻá leva ʻoku fakahaaʻi tonu ai.

Kuo tuku mai ʻe Sihova kia kitautolu taki taha ʻa e ngaahi malava mo e ngaahi talēniti. ʻOkú ne ʻamanekina mai te tau ngāueʻaki ʻa e ngaahi meʻá ni maʻá e niʻihi kehé ʻi ha founga ʻa ia ʻi he fakafou mai ʻia kitautolú, ʻe lava ke ne fakahāhā ai ʻene ʻaloʻofa maʻataʻataá. ʻI he fekauʻaki mo e meʻá ni naʻe tohi ʻe he ʻapositolo ko Pitá: “Ke mou fetauhiʻaki kimoutolu ʻaki ʻa e mafai [“tufakanga,” NW] fakalaumalie ne mou taki taha maʻu, ʻi he ʻalunga o ʻene maʻu, ʻo tāu mo ha kau setuata lelei ʻo e kelesi faifio [“ʻofa maʻataʻatā,” NW] ʻa e ʻOtua.” (1 Pita 4:10) ʻOku fēfē hoʻomou fakahoko homou tuʻunga fakasētuatá?

ʻOku hoko atu ʻa Pita: “Kapau ko e fai malanga ʻa ha taha, ke ne fai ko e folofola ʻa e ʻOtua.” (1 Pita 4:11) Ko e foʻi vēsí ni ʻokú ne fai ʻa e fakamamafa ʻi he fatongia ke leá ʻo fehoanaki kakato mo e Folofola ʻa e ʻOtuá, koeʻuhi ke fakalāngilangiʻi ai ʻa e ʻOtuá. Ko e founga ʻa ia ʻoku fai ai ʻa e lea ko iá ʻoku totonu ke toe fakalāngilangiʻi ai ʻa Sihova. Ko e ako ʻoku tokonaki mai fakafou ʻi he Ako Fakafaifekau Fakateokalatí ʻe lava ke ne tokoniʻi koe ke ke ngāueʻaki ho tufakangá ʻi he founga ko ia—ʻe fakalāngilangiʻi ai ʻa e ʻOtuá ʻi he anga ʻo hoʻo tokoniʻi ʻa e niʻihi kehé. ʻI he hoko ia ko hoʻo taumuʻá, ʻoku totonu ke fēfē hoʻo fakafuofua ʻa hoʻo fakalakalaka ʻi he akó?

ʻI he ʻikai fakakaukau ʻo fekauʻaki mo e lahi ʻo e ngaahi poini kuó ke kāpui ʻi hoʻo foomu akonakiʻi ʻi he leá pe ko e faʻahinga ʻo e ngaahi konga kuo ʻoatu kia koé, fakakaukau ki he tuʻunga kuo fakaleleiʻi ai ʻe he akó ʻa e anga ʻo hoʻo feilaulau ʻo e fakahīkihikí. ʻOku teuteuʻi kitautolu ʻe he akó ke tau hoko ʻo ola lelei ange ʻi he malaʻe ngāue fakafaifekaú. Ko ia, ʻeke hifo kiate koe: ‘ʻOku ou teuteuʻi moʻoni ʻa e meʻa ke leaʻaki ʻi he malaʻe ngāué? Kuó u ako ke fakahaaʻi ʻa e mahuʻingaʻia fakafoʻituitui ʻi he faʻahinga ʻoku ou faifakamoʻoni ki aí? ʻOku ou fakatoka ha makatuʻunga ki he ngaahi toe ʻaʻahí ʻaki hono tuku ki he kakaí ha foʻi fehuʻi ke lāulea ki ai ʻi he taimi hoko maí? Kapau ʻoku ou ako ʻa e Tohitapú mo ha taha, ʻoku ou ngāue ke u fakalakalaka ʻi he tuʻunga ko ha faiako ʻoku aʻu ki he lotó?’

ʻOua ʻe vakai ki he fakalakalaká ko ha meʻa pē ʻoku fekauʻaki mo e ngaahi monū ʻo e ngāué ʻoku tuku atu kia koe. Ko hoʻo laka ki muʻá ʻoku hā ia, ʻikai ʻi he kongá, ka ʻi he meʻa ʻokú ke fai ki aí. Kapau ʻoku ʻoatu ha konga ʻoku kau ki ai ʻa e faiakó, ʻeke hifo kiate koe: ‘Naʻá ku ngāueʻaki moʻoni ʻa e pōtoʻi ʻi he faiakó? Naʻá ku fakahoko ʻa e fakamatalá ʻi he founga ko ia naʻá ne ʻai ai ke ʻi ai ha liliu ʻi he moʻui ʻa e faʻahinga naʻa nau fanongo ki aí?’

Ko e enginaki ke ngāueʻaki ho tufakangá ʻoku fakahuʻunga ai ʻa hono ngāueʻaki ʻa e tomuʻá. ʻOkú ke tamuʻomuʻa ke ngāue mo e niʻihi kehé ʻi he malaʻe fakafaifekaú? ʻOkú ke kumi ki ha ngaahi faingamālie ke tokoniʻi ʻa e kau mēmipa ʻi hoʻo fakatahaʻangá ʻa ē ʻoku nau foʻoú, kei siʻí, pe mahamahakí? ʻOkú ke pole ke fakamaʻa ʻa e Fale Fakatahaʻangá pe tokoni ʻi he ngaahi founga kehekehe ʻi he ngaahi fakataha-lahí mo e ngaahi ʻasemipilií? ʻE lava ke ke kau fakataimi ʻi he tuʻunga ko ha tāimuʻa tokoni? ʻOkú ke malava ke ngāue ko ha tāimuʻa tuʻumaʻu pe fai ha tokoni ʻi ha fakatahaʻanga ʻa ia ʻoku lahi ange ai ʻa e fiemaʻú? Kapau ko ha tokoua koe, ʻokú ke kakapa atu ke aʻusia ʻa e ngaahi tuʻunga taau Fakatohitapu ki he kau sevāniti fakafaifekaú mo e kau mātuʻá? Ko hoʻo loto-lelei ke fai ha tokoni mo tali ʻa e fatongiá ko ha fakaʻilonga ia ʻo e laka ki muʻá.​—Sāme 110:3.

Kapau ʻokú ke ongoʻi fakangatangata koeʻuhi ko e ʻikai ha taukei ʻi he moʻui faka-Kalisitiané, loto-toʻa. ʻE lava ʻe he Folofola ʻa e ʻOtuá ʻo “fakapoto ai siʻi taʻe fie vale.” (Sāme 19:7; 119:130; Pal. 1:​1-4) Ko hono ngāueʻaki ʻa e akonaki faka-Tohitapú ʻoku fakaʻatā ai kitautolu ke tau maʻu ʻaonga mei he poto haohaoa ʻo Sihová, ʻa ia ʻoku mahuʻinga lahi ange ia ʻi ha ʻilo pē kuo maʻu fakafou ʻi he taukeí pē taha. Neongo ia, ʻi heʻetau fai ʻa e laka ki muʻa ʻi heʻetau ngāue kia Sihová, ʻoku tau maʻu moʻoni ai ʻa e taukei mahuʻinga. ʻE lava fēfē ke tau ngāueʻaongaʻaki ia?

ʻI he fakaʻasi atu ki ha ngaahi tuʻunga kehekehe ʻi he moʻuí, ʻe lava ke fakataueleʻi ai ha taha ke fakaʻuhinga: ‘Kuó u fehangahangai ki muʻa mo e tuʻungá ni. ʻOku ou ʻiloʻi ʻa e meʻa ke faí.’ ʻE hoko eni ko e ʻalunga ʻo e potó? ʻOku fakatokanga mai ʻa e Palovepi 3:7: “ʻOua te ke lau ʻe koe ʻoku ke poto.” Ko e taukeí ʻoku totonu ke ne fakalahi moʻoni ʻetau vakai ki he ngaahi meʻa tefito ke fakakaukau ki ai ʻi he taimi ʻoku feangai ai mo e ngaahi tuʻunga ʻi he moʻuí. Ka ʻo kapau ʻoku tau fai ha fakalakalaka fakalaumālie, ko ʻetau taukeí ʻoku totonu ke toe ʻai ia ke maongo ki hotau ʻatamaí mo e lotó ʻoku tau fiemaʻu ʻa e tāpuaki ʻa Sihová koeʻuhi ka tau lavameʻa. Ko ʻetau laka ki muʻá leva ʻoku fakahaaʻi ia, ʻikai ʻaki ʻetau fehangahangai mo e ngaahi tuʻungá fakataha mo e fakapapauʻi fakaekita ʻi he tuipau, ka ʻi heʻetau hanga ʻosi mateuteu kia Sihova ki ha tataki ʻi heʻetau moʻuí. ʻOku fakahaaʻi ia ʻaki ʻetau hoko ʻo tuipau ʻe ʻikai ha meʻa ʻe lava ke hoko taʻekau ai ʻene fakangofuá pea ʻi heʻetau tauhi maʻu ha vahaʻangatae falalaʻanga mo ʻofa pea mo ʻetau Tamai fakahēvaní.

Ko e ʻapositolo ko Paulá, neongo ʻa ʻene hoko ko ha Kalisitiane pani matuʻotuʻa fakalaumālié, naʻá ne ʻiloʻi naʻe fiemaʻu ke hanganaki “kakapa atu ki he ngaahi meʻa mei muʻa” ke aʻusia ʻa e taumuʻa ʻo e moʻuí. (Fili. 3:​13-16) ʻOkú ke kau ʻi he fakakaukau ko iá?

Ko e hā ʻa e tuʻunga kuo ʻi ai hoʻo fakalakalaká? Fakafuofua hoʻo tupú ʻi he fekauʻaki mo e anga ʻo hoʻo kofu kakato ʻaki ʻa e angaʻitangata foʻoú, anga ʻo e kakato ʻo hoʻo fakamoʻulaloa ki he tuʻunga-hau ʻo Sihová, pea mo e anga ʻo e tōtōivi ʻi hoʻo ngāueʻaki ʻa ho ngaahi tufakangá ke fakalāngilangiʻi ʻa Sihová. ʻI hoʻo maʻu ʻaonga mei he Ako Fakafaifekau Fakateokalatí, ko e ngaahi ʻulungaanga ʻoku fakamamafaʻi mai ʻi he Folofola ʻa e ʻOtuá ʻoku totonu ke hā mahino ʻa ʻene fakalakalaka ʻi he founga hoʻo leá mo e faiakó. Hanganaki tokangataha ki he ngaahi tafaʻaki ko eni hoʻo tupú. ʻIo, fiefia ai, pea ʻe hā mahino ʻa hoʻo laka ki muʻá.