Ngaahi Fehuʻi mei he Kau Lautohí

• ʻE lava fēfē ke tau fakamamahiʻi ʻa e laumālie māʻoniʻoni ʻo e ʻOtuá, koeʻuhí ʻoku ʻikai ko ha tokotaha ia?

Ko e ʻapositolo ko Paulá ia naʻá ne tohí: “ʻOua ʻe ʻai ke mamahi ʻa e Laumalie Maʻoniʻoni ko ia ʻo e ʻOtua.” (Efeso 4:30) ʻOku ʻuhingaʻi ʻe he niʻihi ʻa e ngaahi leá ni ko ha fakahaaʻi ia ko e laumālie māʻoniʻoní ko ha tokotaha. Kae kehe, ko e ngaahi tohi ʻa e “setuata anga-tonú” kuo faʻa ʻomai ai ʻa e fakamoʻoni Fakatohitapu mo fakahisitōlia naʻe vakai ʻa e muʻaki kau Kalisitiané ki he laumālie māʻoniʻoní ʻoku ʻikai ko ha tokotaha ia pe ko ha ʻotua ʻo tatau mo e Fungani Māʻolungá ko ha konga tokua ʻo ha Tolu-Tahaʻi-ʻOtua.a (Luke 12:​42, NW) Ko ia ai, naʻe ʻikai ke ʻuhinga ʻa Paula ia ki he laumālie māʻoniʻoni ʻo e ʻOtuá ko ha tokotaha.

Ko e laumālie māʻoniʻoni ʻo e ʻOtuá ko hono ivi ngāue taʻehāmaí ia. (Senesi 1:2) Ko Sīsuú naʻe pau ke ne faipapitaiso “ʻe ia ʻi he Laumālie Māʻoniʻoni,” ʻo hangē pē ko e faipapitaiso ʻaki ʻe Sione ʻa e vaí. (Luke 3:16) ʻI he Penitekosi 33 T.S., ko e kau ākonga nai ʻe toko 120 naʻe “fāʻofale ʻiate kinautolu . . . ʻa e Laumālie Maʻoniʻoni”—ʻo hā mahino naʻe ʻikai fakafonu ʻaki kinautolu ha tokotaha. (Ngāue 1:​5, 8; 2:​4, 33) Ko e faʻahinga pani ko iá naʻa nau maʻu ha ʻamanaki fakahēvani, pea naʻe tataki kinautolu ʻe he laumālie ʻo e ʻOtuá ki ha moʻui faitōnunga. (Loma 8:​14-​17; 2 Kolinito 1:​22) Naʻe fakatupu ʻe he laumālié ʻa e fua fakaʻotua pea tokoniʻi kinautolu ke fakaʻehiʻehi mei he “ngaahi ngaue [angahalaʻia] ʻa Kakano” ʻa ia ʻe lava ʻo iku ki he taʻefakahōifua fakaʻotuá.​—Kaletia 5:​19-25.

Kapau ko e kau sevāniti kitautolu ʻa e ʻOtuá fakataha mo ha ʻamanaki fakamāmani, kuo ʻikai ke paniʻaki kitautolu ʻa e laumālie māʻoniʻoní. Ka neongo ia, ʻe lava ke tau maʻu tatau ʻa e laumālie ʻo e ʻOtuá mo e faʻahinga ʻoku nau maʻu ʻa e ʻamanaki fakahēvaní. Ko ia ai, ko kitautolu foki ʻe lava ke tau fakamamahiʻi ʻa e laumālié. Ka ʻe anga-fēfē?

Kapau ʻoku tau tukunoaʻi ʻa e akonaki Fakatohitapu naʻe hiki ʻi he malumalu ʻo e tataki ʻa e laumālie māʻoniʻoní, ʻe lava ke tau fakatupulekina ʻa e ngaahi anga ʻa ia ʻe lava ke iku ia ki he angahala loto-lelei ki he laumālié, ko e mole ʻa e hōifua ʻa Sihová pea iku ai ki he ʻauha. (Mātiu 12:​31, 32) ʻOku teʻeki ai nai ke tau faiangahala mamafa, ka ʻe lava ke tau kamata ʻi he hala ʻoku fehālaakí, ʻa e hala ko ia ʻe lava ke iku ʻo ne ʻave kitautolu ki ha feituʻu ʻoku kehe ʻaupito mei he tataki ʻa e laumālié. ʻI he malumalu ʻo e ngaahi tuʻunga peheé, te tau fakamamahiʻi ai ʻa e laumālie māʻoniʻoní.

ʻE lava fēfē leva ke tau fakaʻehiʻehi mei hono fakamamahiʻi ʻa e laumālie ʻo e ʻOtuá? Kuo pau moʻoni ke tau mapuleʻi ʻetau ngaahi fakakaukaú mo e ngaahi ngāué. ʻI heʻene tohi ki he kau ʻEfesoó, ʻi he Efeso vahe 4, naʻe lea ai ʻa e ʻapositolo ko Paulá fekauʻaki mo e fakaʻehiʻehi mei he ngaahi hehema ki he ngaahi fakamatala taʻefaitotonu, tauhi ʻa e ʻitá, fakapikopikó mo e lea taʻefeʻungá. Kapau kuo tau ʻai ʻa e “tangata foʻou” pea neongo ia ʻoku tau fakaʻatā kitautolu ke toe foki ki he ngaahi meʻa peheé, ko e hā te tau faí? Te tau fakafepakiʻi ai ʻa e akonaki fakamānavaʻi ʻe he laumālié ʻi he Folofola ʻa e ʻOtuá, ʻa e Tohi Tapú. ʻI hono fai ení, te tau fakamamahiʻi ai ʻa e laumālie māʻoniʻoní.

ʻI he Efeso vahe 5, ʻoku tau lau ai ʻa e akonaki ʻa Paula fekauʻaki mo e fakaʻehiʻehi mei he mahuʻingaʻia ʻikai lelei ʻi he feʻauakí. ʻOku toe ekinaki ʻa e ʻapositoló ki he kaungātuí ke nau fakaʻehiʻehi mei he ngaahi ʻulungāanga fakamaá mo e hua fakalieliá. Kapau ʻoku ʻikai te tau loto ke fakamamahiʻi ʻa e laumālie māʻoniʻoni ʻo e ʻOtuá, ʻoku fiemaʻu ke tau manatuʻi eni ʻi hono fili ʻa e fakafiefiá. Ko e hā ke tau mahuʻingaʻia ai ʻi he ngaahi meʻa peheé ʻaki ʻa e talanoa fekauʻaki mo ia, lautohi fekauʻaki mo ia pea sio ʻi honau ʻata ʻi he televīsoné pe ʻi ha toe feituʻu kehe?

Ko e moʻoni, ʻe lava ke tau fakamamahiʻi ʻa e laumālié ʻi he ngaahi founga kehe. ʻOku pouaki ʻe he laumālie ʻo Sihová ʻa e fāʻūtaha ʻi he fakatahaʻangá, tau pehē ʻoku tau fakamafola ha lau fakatupu maumau pe fakaʻaiʻai ʻa e ngaahi fakafaʻafaʻahi ʻi he fakatahaʻangá. ʻIkai te tau ngāue ai ʻo fepaki mo e tataki ʻa e laumālié ki he fāʻūtahá? ʻI ha founga fakalūkufua, te tau fakamamahiʻi ai laumālie māʻoniʻoní, hangē ko e faʻahinga ko ia naʻa nau fakatupunga ʻa e ngaahi māvahevahe ʻi he fakatahaʻanga ʻi Kolinitoó. (1 Kolinito 1:​10; 3:​1-4, 16, 17) Te tau toe fakamamahiʻi ʻa e laumālié kapau ʻoku tau fakavaivaiʻi ʻosi fakakaukauʻi ʻa e fakaʻapaʻapa ki he kau tangata kuo fakanofo ʻe he laumālié ʻi he fakatahaʻangá.​—Ngāue 20:28; Siutasi 8.

ʻOku hā mahino leva, ʻoku fakapotopoto ke vakaiʻi ʻetau fakakaukaú mo e ngaahi ngāué ʻi he vakai atu ki he meʻa ʻoku tau ʻiloʻi ko e tataki ia ʻa e laumālie māʻoniʻoní hangē ko ia ʻoku tapua mai ʻi he Tohi Tapú pea ʻi he fakatahaʻanga Kalisitiané. Ke tau toe “lotu ʻi he Laumalie Maʻoniʻoni,” ʻo tukulolo ki heʻene tatakí pea ngāue maʻu pē ʻo fehoanaki mo e meʻa ʻoku leaʻaki ʻi he Folofola fakamānavaʻi ʻa e ʻOtuá. (Siutasi 20) ʻOfa ko ʻetau fakapapaú ia ke ʻoua ʻaupito ʻe fakamamahiʻi ʻa e laumālié kae tuku maʻu pē ia ke ne fai ʻa e tatakí ki he lāngilangi ʻo e huafa māʻoniʻoni ʻo Sihová.

• Naʻe fakahoa ʻe Sīsū Kalaisi ha faingataʻa ki ha tangata koloaʻia ke hū ki he Puleʻangá ki ha kāmeli ʻa ia ʻoku feinga ke hū ʻi ha avaʻi hui. Naʻe ʻi he fakakaukau ʻa Sīsuú ha kāmeli moʻoni mo ha foʻi hui tuitui moʻoni?

Ko e ua ʻi he lave Fakatohitapu ʻe tolu ki he fakamatala ko ení ʻokú na mātuʻaki tatau. Fakatatau ki he fakamatala ʻa Mātiú, naʻe pehē ai ʻe Sīsū: “Oku faigofua ke hu ae kameli i ha avaʻi hui, i he hu ae tagata koloaia ki he buleaga oe Otua.” (Mātiu 19:​24, PM) ʻI he tuʻunga tatau, ʻoku lau ʻi he Maake 10:25 (PM): “Oku faingofua ke hu ae kameli i he avaʻi hui, ʻi he hu ae tagata koloaia ki he buleaga oe Otua.”

Ko e ngaahi maʻuʻanga fakamatala ʻe niʻihi ʻoku pehē ai ko e “avaʻi hui” ko ha kiʻi matapā siʻisiʻi ia ʻi he taha ʻo e ngaahi fuʻu matapā lalahi ʻo Selusalemá. Kapau naʻe tāpuni ʻa e matapā lahí ʻi he poʻulí, naʻe lava ke fakaava ʻa e matapā siʻisiʻí. ʻOku tui ʻo pehē naʻe lava ke hao ai ha kāmeli. Ko e meʻa ia naʻe ʻi he fakakaukau ʻa Sīsuú?

ʻOku hā mahino ʻoku ʻikai. Ngalingali naʻe ʻuhinga ʻa Sīsuú ki ha foʻi hui tuitui. Koeʻuhi ko e ngaahi foʻi hui naʻe ngaohi fakatouʻosi mei he huiʻi manú mo e mētalé ʻi he kuonga muʻá naʻe maʻu ʻi he feituʻu ko iá, kuo pau pē ko e ngaahi meʻa anga-maheni ia naʻe ngāueʻaki ʻi he fāmilí. ʻOku toʻo ʻe he Luke 18:25 ha veiveiua pē ʻo fekauʻaki mo e ngaahi lea ʻa Sīsuú, he ʻoku lave ai kiate ia ʻi heʻene pehē: “ʻOku faingofua ke hu ha kameli ʻi ha avaʻi hui tuitui, ʻi he hu ʻa ha koloaʻia ki he Puleʻanga ʻo e ʻOtua.”

ʻOku loto-tatau ʻa e kau faʻu-tikisinale kehekehe mo e fakalea “hui tuitui” hangē ko ia ʻoku maʻu ʻi he New World Translation. Ko e foʻi lea faka-Kalisi ki he ‘huí’ ʻi he Mātiu 19:24 mo e Maake 10:25 (rha·phisʹ) ko e toʻo ia mei ha foʻi veape ko hono ʻuhingá ko e “tuitui.” Pea ko e foʻi lea faka-Kalisi ʻoku maʻu ʻi he Luke 18:25 (be·loʹne) ʻoku ngāueʻaki ia ʻi he ʻuhinga moʻoni ki ha foʻi hui tafa. ʻOku pehē ʻe he Vine’s Expository Dictionary of Old and New Testament Words: “Ko e foʻi fakakaukau ʻo hono ngāueʻaki ʻa e ‘avaʻi huí’ ki he fanga kiʻi matapā īkí ʻoku hā ngali ko ha fakakaukau fakaeonopooni ia; ʻoku ʻikai ha fakamoʻoni naʻe ngāueʻaki ia ʻi he kuonga muʻá. Ko e taumuʻa ʻa e ʻEikí ʻi he fakamatalá ke fakahāhā ʻa e taʻemalava fakaetangatá pea ʻoku ʻikai ha fiemaʻu ke feinga ke fakavaivaiʻi ʻa e faingataʻá ʻaki hono fakaʻuhingakeheʻi ʻa e foʻi huí mei he meʻangāue anga-mahení.”​—1981, Voliume 3, peesi 106.

ʻOku pehē ʻe he niʻihi ʻoku totonu ke fakalea ʻa e “kameli” ʻi he ngaahi veesi ko ení ko e “maea.” Ko e ongo foʻi lea faka-Kalisi ki he maeá (kaʹmi·los) mo e kāmelí (kaʹme·los) ʻokú na meimei tatau. Kae kehe, ko e foʻi lea Kalisi ki he “kameli” kae ʻikai ko e foʻi lea ki he “maeá” ʻoku hā ʻi he Mātiu 19:24 ʻi he ngaahi maniusikilipi motuʻa taha ʻoku kei ʻi ai ʻo e Kōsipeli ʻa Mātiú (ko e Sinaitic, ko e Vatican Fika 1209, mo e Alexandrine). Fakatatau ki he līpōtí, naʻe tomuʻa tohi ʻe Mātiu ʻa ʻene Kōsipelí ʻi he lea faka-Hepeluú pea liliuʻi fakafoʻituitui nai ia ki he faka-Kalisí. Naʻá ne ʻiloʻi tonu ʻa e meʻa naʻe leaʻaki ʻe Sīsuú pea ko ia ai naʻá ne ngāueʻaki ʻa e foʻi lea totonú.

Ko ia ai, naʻe ʻuhinga ʻa Sīsuú ki ha foʻi hui tuitui moʻoni mo ha kāmeli moʻoni. Naʻá ne ngāueʻaki ʻa e ongo meʻa ko ení ke fakamamafaʻi ʻaki ʻa e taʻemalava ʻo ha meʻa. Ka naʻe ʻuhinga ʻa Sīsuú ʻe ʻikai ha tangata koloaʻia ʻe faifai pea lava ʻo hū ki he Puleʻangá? ʻIkai, he ko e fakamatala ʻa Sīsuú naʻe ʻikai ʻuhinga iá ke mahinoʻi fakahangatonu. Naʻá ne ngāueʻaki ʻa e lea fakalahí ke fakatātaaʻi ʻaki ʻe hangē pē ko e ʻikai lava ha kāmeli moʻoni ke hū ʻi ha ava ʻo ha foʻi hui tuitui moʻoní, ʻa e taʻemalava ki ha tangata koloaʻia ke hū ki he Puleʻangá kapau ʻokú ne hokohoko atu ʻa e pipiki ki heʻene ngaahi koloá pea ʻikai fakamuʻomuʻa ʻa Sihova ʻi heʻene moʻuí.​—Luke 13:24; 1 Timote 6:​17-​19.

Naʻe fai ʻe Sīsū ʻa e fakamatalá ni ʻi he hili pē hono siʻaki ʻe ha talavou pule koloaʻia ʻa e monū maʻongoʻonga ʻo e hoko ko e tokotaha muimui ʻo Sīsuú. (Luke 18:​18-​24) Ko ha tokotaha koloaʻia ʻokú ne maʻu ha ʻofa lahi ange ki heʻene koloá ʻi he ngaahi meʻa fakalaumālié ʻe ʻikai lava ke ʻamanekina te ne maʻu ʻa e moʻui taʻengatá ʻi he fokotuʻutuʻu ʻa e Puleʻangá. Neongo ia, naʻe hoko moʻoni ʻa e kakai koloaʻia ʻe niʻihi ko e kau ākonga ʻa Sīsū. (Mātiu 27:57; Luke 19:​2, 9) Ko ia ko ha tokotaha koloaʻia ʻa ia ʻoku lāuʻilo fekauʻaki mo ʻene fiemaʻu fakalaumālié pea ʻoku kumi ki he tokoni fakaʻotuá ʻe lava ke ne maʻu ʻa e fakamoʻui ʻoku ʻomai ʻe he ʻOtuá.​—Mātiu 5:3; 19:​16-​26.

[Fakamatala ʻi lalo]