Ko e Vakai ʻa e Tohi Tapú

Ko e Hā e ʻUhinga Moʻoni ʻo e Tuʻunga-ʻUlú ʻi he Nofo Mali?

ʻI HE ngaahi fonua lahi ko e ngaahi kātoanga mali tukufakaholó ʻoku kau ai ʻa e fai ʻo e ngaahi fuakava ʻa ia ʻoku palōmesi ai ʻa e fefine malí ke talangofua ki hono husepānití. Ka, ʻoku tokolahi ʻa e kau fefine ʻoku ʻikai te nau saiʻia ʻi he fakakaukau ko e tangatá ʻa e ʻulu ʻi he nofo malí. Fakakaukau ki he akonaki ʻa e Tohi Tapú ki he tuʻunga-leá ni. Te ke ʻilo ai ʻoku ʻaonga mo feʻunga ʻa e tuʻungá ni.

Ko e Fokotuʻu ʻe he ʻOtuá ʻa e Tuʻunga-ʻUlú

Ko e fakamatala tefito ʻa e Tohi Tapú ki he tuʻunga-ʻulú ʻoku hā ia ʻi he Efeso 5:22-24: “ʻA e kau fefine, mou anganofo ki siʻomou ngaahi husepaniti, ʻo hange ki he ʻEiki. He ko e husepaniti ko e ʻulu ʻo e uaifi, ʻo hange foki ko Kalaisi ko e ʻulu ʻo e Siasi; . . . Ka neongo ia, kae hange ʻoku anganofo ʻa e Siasi kia Kalaisi, ke pehe foki mo e kau fefine ki honau ngaahi husepaniti ʻi he meʻa kotoa.” ʻI he hoko ko e “ʻulu ʻo e uaifi,” ko e husepānití ʻokú ne tataki ʻa e fāmilí, kae muimui ʻa e uaifí ki heʻene takí mo ʻapasia ki hono tuʻunga-ʻulú.—Efeso 5:33.

Ko e mafai ʻo e husepānití ʻoku fakangatangata ia ʻe hono tuʻunga moʻulaloa ki he ʻOtuá mo Kalaisi. ʻOku ʻikai fakamafaiʻi ia ke hinoiʻi hono uaifí ke maumauʻi ʻa e ngaahi lao ʻa e ʻOtuá pe tukunoaʻi ʻa hono konisēnisi kuo akoʻi mei he Tohi Tapú. Kae kehe, ʻi loto he fakangatangata ko ʻení, kuo vaheʻi ki ai ʻe he ʻOtuá ʻa e fatongia ke ne fai ʻa e ngaahi fili mahuʻinga maʻá e fāmilí.—Loma 7:2; 1 Kolinito 11:3.

ʻOku fekauʻi ʻe he Tohi Tapú ʻa e husepānití ke ngāueʻaki taʻesiokita hono tuʻunga-ʻulú ʻo fakamuʻomuʻa ʻa e fiemaʻu ʻa hono uaifí ʻiate ia. ʻOku pehē ʻi he Efeso 5:25: “ʻA e kau tangata, mou ʻofa ki ho mou ngaahi uaifi, ʻo hange foki ko Kalaisi ne ne ofaʻi ʻa e Siasi, ʻo ne liʻoa ʻEne ʻAfio koeʻuhi ko ia.” Ko ha husepāniti ʻoku muimui ki he faʻifaʻitakiʻanga māʻolunga ʻa Kalaisi ʻo e ʻofá ʻokú ne tekeʻi ʻa e ngāueʻaki siokita ʻo e tuʻunga-ʻulú.

ʻIkai ko ia pē, ʻoku toe akonaki ʻa e Tohi Tapú ki he tangatá ke nofo mo hono uaifí “o fakatatau ki he ilo.” (1 Pita 3:7, PM) ʻOku kau ki ai ʻa e meʻa lahi ange ia ʻi he ʻiloʻi pē ʻo e kehekehe fakasino mo e fakaeongo ʻi he vahaʻa ʻo e tangatá mo e fefiné. ʻOku totonu ke ne mahinoʻi ʻa e fiemaʻu ʻa hono uaifí.

“Ko Ho Kaumeʻa Ia”

Ko e anganofo ʻa e uaifí ʻoku fiemaʻu kiate ia ke ʻoua ʻe toe ueʻi? Fakakaukau kia Sela, ʻoku fakahā ʻi he Tohi Tapú ko e faʻifaʻitakiʻanga ʻo e talangofua ki hono husepāniti, ko ʻĒpalahamé. (1 Pita 3:5, 6) Naʻá ne anganofo kiate ia ʻi he meʻa lahi mo e siʻi, ʻi heʻene tuku ʻa e ʻapi fiemālie kae haʻu ʻo nofo tēniti holo pea pehē ki hono teuteu fakavave ʻo ha meʻakai. (Senesi 12:5-9; 18:6) Kae kehe, ʻi he fekauʻaki mo ha meʻa mahuʻinga, naʻá ne toutou fakahā ʻa e vakai naʻe kehe meia ʻĒpalahame. Naʻe hoko ʻeni ʻi heʻene fiemaʻu ko ia ke kapusi ʻa e sinifu ʻa ʻĒpalahame ko Hekaʻaá, mo hono ʻuluaki foha, ko ʻIsimeʻelí, mei he ʻapí. ʻI he ʻikai ke valokiʻi ʻa Selá, naʻe folofola ʻa e ʻOtua kia ʻĒpalahame ke “tuitala pe ki heʻene lea.” Lolotonga iá, naʻe hokohoko atu ʻa e anganofo ʻa Sela kia ʻĒpalahamé ʻi heʻene talitali ke ne fai ʻa e filí kae ʻikai te ne kapusi ʻe ia ʻa Hekaʻā mo ʻIsimeʻeli.—Senesi 21:8-14.

Ko e faʻifaʻitakiʻanga ʻa Selá ʻoku fakahā ai ʻoku ʻikai ko e nofo pē he malumalu ʻo hono husepānití, ko e uaifí ʻoku fiemaʻu ke ne hoko ko e “kaumeʻa” ʻo hono husepānití, ʻoku ʻi ai hono tuʻunga lāngilangiʻia. (Malakai 2:14) ʻI he hoko ko hono kaumeʻá, te ne ʻoatu ʻa e fakakaukau mahuʻinga ki he fāmilí ʻi hono fai ha fili pea ʻoku ʻoange kiate ia ha tuʻunga mafai ʻi he fāmilí ʻo ne faʻa fai ʻa e ngaahi meʻa lahi ʻi he ʻapí ʻo aʻu ki he meʻa fakapaʻangá. Ko e moʻoni, ʻi he tuʻunga ko e ʻulu ʻo e fāmilí, ko e husepānití ko hono fatongiá ko e fai ʻa e fili aofangatukú.—Palovepi 31:10-31; 1 Timote 5:14.

ʻApasia ki he Tupuʻangá

Naʻe fakatupu ʻe Sihova ko e ʻOtuá ʻa e tangatá mo e fefiné, pea naʻá ne fokotuʻu ai ʻa e nofo malí ko e fāʻūtaha toputapu ʻi hona vaá. (Senesi 2:18-24) Naʻá ne toe fakahaaʻi papau mo e ngaahi ngafa ki he husepānití mo e uaifí ʻa ia te na maʻu ai ʻa e fiefia lahi tahá.—Teutalonome 24:5; Palovepi 5:18.

ʻI he tuʻunga ko e Tupuʻanga ʻo e nofo malí, ʻoku maʻu ai ʻe Sihova ʻa e totonu mo e pōtoʻi ke fokotuʻu ʻa e ngaahi tuʻunga ki hono fai ʻo ha mali. Ko e ongo hoa mali ʻokú na fakahoko hona ngaahi ngafá taki taha mo muimui ki he fokotuʻutuʻu ʻa e ʻOtuá ki he tuʻunga-ʻulú, ʻo ʻikai koeʻuhi pē ko hono ʻaongá ka ko e ʻapasia foki ki he mafai māʻolunga ʻo e ʻOtuá, te na maʻu ai ʻa ʻene poupoú mo ʻene hōifuá.

KUÓ KE FIFILI?

◼ Ko hai naʻá ne fokotuʻu ʻa e faʻifaʻitakiʻanga haohaoa ʻo e tuʻunga-ʻulu?—Efeso 5:25.

◼ ʻOku fakangatangata ʻe he ʻOtuá ʻa e mafai ʻo e husepāniti?—1 Kolinito 11:3.

◼ Ko e hā ʻa e taumuʻa ʻo e nofo malí mo e fokotuʻutuʻu ʻo e tuʻunga-ʻulu?—Palovepi 5:18.

[Fakatātā ʻi he peesi 28]

Ko e tuʻunga-ʻulu ʻoku ngāueʻaki ʻo fakatatau ki he faʻifaʻitakiʻanga ʻa Kalaisí ʻoku taki atu ia ki he fiefia mo e fiemālie ʻa e ongo hoá fakatouʻosi