ʻE Lava Fēfē ke Fiefia Ho Fāmilí?​—Konga 1

ʻOku ʻamanaki ʻa e faʻahinga toki mali foʻoú ko e fiefia ʻoku nau ongoʻi ʻi he ʻaho malí ʻe tuʻuloa. Pea ʻoku malava. Ko e kau Kalisitiane kuo fuoloa ʻenau malí pea kuo nau ngāue mālohi ke ngāueʻaki e faleʻi ʻa e Tohi Tapú ʻoku nau ʻilo ʻoku malava eni.

1. Ko e hā ʻa e faleʻi ʻoku ʻomai ʻe he Tohi Tapú ki he ngaahi husepānití?

Kuo fakanofo ʻe Sihova ʻa e husepānití ko e ʻulu ʻo e fāmilí. (Lau ʻa e ʻEfesō 5:23.) ʻOku fiemaʻu ʻe Sihova ke ne fai ʻa e ngaahi fili ʻe maʻu ʻaonga mei ai ʻa e fāmilí. ʻOku ekinaki ʻa e Tohi Tapú ki he ngaahi husepānití: “Hokohoko atu hoʻomou ʻofa ki homou ngaahi uaifí.” (ʻEfesō 5:25) ʻOku ʻuhinga eni ki he hā? Ko ha husepāniti ʻofa ʻokú ne fakafeangai anga-lelei ki hono uaifí, ʻi ʻapi pea naʻa mo e ʻi he kakaí. ʻOkú ne feinga ke fakapapauʻi ʻokú ne malu mo fiefia pea tokonaki mo ʻene ngaahi fiemaʻú. (1 Tīmote 5:8) Ko e mahuʻinga tahá, ʻokú ne tokoniʻi ia ke maʻu ha kaumeʻa ofi mo Sihova. (Mātiu 4:4) Ko e fakatātaá, ʻoku lava ke ne lotu mo lau ʻa e Tohi Tapú mo hono uaifí. ʻI hono tokangaʻi anga-ʻofa ʻe ha husepāniti hono uaifí, ʻokú ne tauhi maʻu hono vahaʻangatae tonu mo Sihová.​—Lau ʻa e 1 Pita 3:7.

2. Ko e hā ʻa e faleʻi ʻoku ʻomai ʻe he Tohi Tapú ki he ngaahi uaifí?

ʻOku pehē ʻe he Folofola ʻa e ʻOtuá ko ha uaifi “ʻoku totonu . . . ke ne fakaʻapaʻapa loloto ki hono husepānití.” (ʻEfesō 5:33) ʻE lava fēfē ke ne fai ení? ʻOku lava ke ne fakakaukau ki he ngaahi ʻulungaanga lelei hono husepānití pea mo ʻene feinga ke tokangaʻi ia mo ʻena fānaú. ʻOku toe lava ke ne fakahāhā ʻa e fakaʻapaʻapá ʻaki hono poupouʻi ʻa e ngaahi fili ʻokú ne faí pea lea anga-lelei kiate ia pea fekauʻaki mo ia, neongo kapau ʻoku ʻikai ke ne lotu kia Sihova.

3. ʻOku lava fēfē ke fakaivimālohiʻi ʻe ha ongo meʻa ʻena nofo malí?

ʻI he fekauʻaki mo e ongo meʻa malí ʻoku pehē ʻe he Tohi Tapú: “ʻE hoko ʻa e toko uá ko e kakano pē taha.” (Mātiu 19:5) ʻOku ʻuhinga ení kuo pau ke na faitau mo ha faʻahinga meʻa pē te ne ʻai ke vaivai ʻena ʻofá. ʻOkú na fai eni ʻaki ʻena toutou feohi fakataha peá na fevahevaheʻaki ʻena ngaahi fakakaukaú mo e ngaahi ongoʻí ʻi he faitotonu mo e ʻofa. Heʻikai ke na fakaʻatā ha meʻa pe ha taha ke mahuʻinga ange ʻiate kinaua, tuku kehe ʻa Sihova. ʻOkú na mātuʻaki tokanga ke ʻoua ʻe fakatupulekina ha vahaʻangatae fuʻu ofi tōtuʻa mo ha taha kehe.

KELI LOLOTO ANGE

4. Husepāniti, ʻofa mo tokangaʻi lelei ho uaifí

VITIŌ: Husepāniti, ʻOfa ki Ho Uaifí ʻo Hangē Pē ko Hoʻo ʻOfa ʻIate Koé (9:53)

• Ko e hā ha ngaahi founga ʻe fakahāhā ai ʻe ha husepāniti ʻene ʻofa mo e tokanga ki hono uaifí?

Lau ʻa e Kolose 3:12, pea lāulea leva ki he fehuʻi ko ení:

• ʻE anga-fēfē hano fakahāhā ʻe ha husepāniti ʻa e ngaahi ʻulungaanga ko ení ʻi heʻene nofo malí?

5. Uaifi, ʻofa mo fakaʻapaʻapaʻi ho husepānití

ʻOku ekinaki ʻe he Tohi Tapú ki he uaifí ke ne fakaʻapaʻapaʻi hono husepānití ʻo tatau ai pē pe ʻokú ne tauhi kia Sihova pe ʻikai. Lau ʻa e 1 Pita 3:1, 2, pea lāulea leva ki he ongo fehuʻi ko ení:

• Kapau ʻokú ke maʻu ha husepāniti taʻetui, ʻoku ʻikai ha veiveiua ʻokú ke loto ke ne tauhi kia Sihova. Ko e hā ʻa e founga lelei taha ke tokoniʻi iá, ko e malanga maʻu pē kiate ia, pe ʻoku lelei ange ke ke hoko ko ha uaifi lelei, anga-lelei mo fakaʻapaʻapa? Ko e hā hono ʻuhingá?

ʻOku lelei ange hono fai fakataha ʻa e ngaahi filí ʻe he husepānití mo e uaifí. Ka ʻi he taimi ʻe niʻihi, heʻikai loto-tatau nai ʻa e uaifí mo e husepānití. Te ne fakahaaʻi nai ʻi he anga-mokomoko mo e fakaʻapaʻapa ʻene ngaahi fakakaukaú. Ka kuo pau ke ne ʻiloʻi kuo ʻoange ʻe Sihova ki he husepānití ʻa e fatongia ke ne fili ʻa e meʻa ʻoku lelei tahá maʻá e fāmilí. ʻOku totonu ke ne fai hono lelei tahá ke poupou ki heʻene filí. ʻI hono fai iá, ʻokú ne tokoni ki he fiefia ʻa e fāmilí kotoa. Lau ʻa e 1 Pita 3:3-5, pea lāulea leva ki he fehuʻi ko ení:

• Ko e hā ʻa e ongoʻi ʻa Sihová ʻi he fakahāhā ʻe he uaifí ʻa e fakaʻapaʻapa ki hono husepānití?

6. ʻOku lava ke ke ikuʻi ʻa e ngaahi palopalema ʻi hoʻo nofo malí

VITIŌ: Founga Hono Fakaivimālohiʻi e Haʻi ʻo e Nofo Malí (5:44)

• ʻI he vitioó, ko e hā ʻa e ngaahi fakaʻilonga naʻe hā mei ai ʻoku ʻikai ke kei vāofi ʻa e vahaʻangatae ʻo e ongo meʻá?

• Ko e hā naʻá na fai ke fakaivimālohiʻi ʻena nofo malí?

Lau ʻa e 1 Kolinitō 10:24 mo e Kolose 3:13. Hili hono lau ʻa e konga Tohi Tapu taki taha, lāulea ki he fehuʻi ko ení:

• ʻE lava fēfē ke fakaivimālohiʻi ha nofo mali ʻi hono ngāueʻaki ʻa e faleʻi ko ení?

ʻOku pehē ʻe he Tohi Tapú ʻoku totonu ke tau fefakaʻapaʻapaʻaki. Ko hono fakahāhā ʻa e fakaʻapaʻapá ʻoku kau ai ʻa e fakafeangai anga-lelei mo fakangeingeia ki ha taha. Lau ʻa e Loma 12:10, pea lāulea leva ki he ongo fehuʻi ko ení:

• ʻOku totonu ki he husepānití pe uaifí ke ne tatali ki hono hoá ke ʻuluaki fakahāhā mai ʻa e fakaʻapaʻapá? Ko e hā hono ʻuhingá?

FAKANOUNOU

ʻOku lava ha husepāniti mo ha uaifi ʻo fiefia ʻi he taimi ʻokú na feʻofaʻaki, fefakaʻapaʻapaʻaki pea ngāueʻaki ʻa e ngaahi tefitoʻi moʻoni ʻi he Tohi Tapú.

Fakamanatu

• ʻE lava fēfē ʻe ha husepāniti ke tokoni ki ha nofo mali fiefia?

• ʻE lava fēfē ʻe ha uaifi ke tokoni ki ha nofo mali fiefia?

• Kapau ʻokú ke mali, ko fē ha tefitoʻi moʻoni Fakatohitapu ʻoku lava ke tokoni ke fakaivimālohiʻi hoʻo nofo malí?

AKO LAHI ANGE

Ako ki he ngaahi fokotuʻu ʻaonga ʻe lava ke ne tokoniʻi koe ke maʻu ha fāmili fiefia.

ʻE Lava ke Fiefia Ho Fāmilí (polosiua)

Sivisiviʻi ʻa e ʻuhinga ke fakaʻapaʻapaʻi ai ʻa e fatongia ʻo ha husepāniti ko e ʻulu ʻo e fāmilí.

“Kau Fefine, Ko e Hā ke Fakamoʻulaloa Ai ki he Tuʻunga-ʻUlú?” (Ko e Taua Leʻo, Mē 15, 2010)

Naʻe anga-fēfē hono ikuʻi ʻe ha ongo meʻa ʻa e ngaahi palopalema mafatukitukí—kau ai ʻena veté?

Naʻá Ma Fakaleleiʻi ʻEma Nofo Malí i he Tokoni ʻa e ʻOtuá (5:14)