ʻE Maluʻi Koe ʻe Sihova​—Anga-Fēfē?

 1. Ko e hā naʻe kole ai ʻe Sīsū kia Sihova ke ne tokangaʻi ʻene kau ākongá?

ʻI HE pō fakaʻosi ʻo e moʻui ʻa Sīsū ko ha tangatá, naʻá ne fakakaukau fekauʻaki mo e ngaahi pole ʻe fehangahangai mo ʻene kau ākongá. ʻI hono ueʻi ʻa Sīsū ʻe heʻene ʻofa ki hono ngaahi kaumeʻá, naʻá ne kole ki heʻene Tamaí ke ne “tokangaʻi kinautolu koeʻuhi ko e tokotaha fulikivanú.” (Sione 17:14, 15) Naʻe ʻiloʻi ʻe Sīsū hili ʻene foki ki hēvaní, ko Sētane ko e Tēvoló ʻe hokohoko atu ʻene faitau mo ha taha pē ʻoku loto ke tauhi kia Sihova. ʻOku hā mahino, ko e kakai ʻa Sihová te nau fiemaʻu ʻa e maluʻi.

 2. ʻOku lava fēfē ke tau fakapapauʻi ʻe tali ʻe Sihova ʻetau ngaahi lotú?

² Naʻe tali ʻe Sihova ʻa e lotu ʻa Sīsuú koeʻuhi ko ʻEne ʻofa ʻi Hono ʻAló. Kapau ʻoku tau fai hotau lelei tahá ke fakahōifuaʻi ʻa Sihova, te ne ʻofa foki ʻiate kitautolu, pea te ne tokanga ki heʻetau ngaahi lotu ki ha tokoni mo ha maluʻí. ʻI he tuʻunga ko ha ʻUluʻi fāmili tokangá, ʻoku hokohoko atu hono tokangaʻi anga-ʻofa ʻe Sihova ʻene fānaú. ʻOku kaunga ia ki hono huafá pe ongoongó tonu!

 3. Ko e hā ʻoku tau fiemaʻu ai ʻa e maluʻi ʻa Sihová ʻi he ʻaho ní?

³ ʻOku ʻikai mo ha toe taimi te tau fiemaʻu ai ʻa e maluʻi ʻa Sihová ka ko e taimí ni. Kuo lī hifo ʻa Sētane mei hēvani, “ʻokú ne ʻita lahi.” (Fkh. 12:12) Kuó ne fakalotoʻi ʻa e niʻihi ʻoku nau fakatangaʻi kitautolú ke nau fakakaukau ʻoku nau “fai ha ngāue toputapu ki he ʻOtuá.” (Sione 16:2) Ko e niʻihi, ʻoku ʻikai ke nau tui ki he ʻOtuá, ʻoku nau fakatangaʻi kitautolu koeʻuhi ko e ʻikai ke tau fakaʻatā ke fakafuo kitautolu ʻe he māmaní. Neongo pe ko e hā ʻa e tuʻungá, ʻoku tau maʻu ʻa e falala pau. Ko e hā hono ʻuhingá? Koeʻuhi ʻoku pehē ʻe he Folofola ʻa e ʻOtuá: “ʻOku faitōnunga ʻa e ʻEikí, pea te ne fakaivimālohiʻi kimoutolu pea maluʻi kimoutolu mei he tokotaha fulikivanú.” (2 Tes. 3:3) ʻOku anga-fēfē hono maluʻi kitautolu ʻe Sihová? Tau lāulea angé ki he founga ʻe ua.

 4. Fakatatau ki he ʻEfesō 6:13-17, ko e hā kuo tokonaki mai ʻe Sihova ke maluʻi kitautolú?

⁴ Kuo tokonaki mai ʻe Sihova ha teunga tau ʻe lava ke ne maluʻi kitautolu mei he ngaahi ʻoho ʻa Sētané. (Lau ʻa e ʻEfesō 6:13-17.) Ko e teunga tau fakalaumālie ko ení ʻoku mālohi mo ola lelei! Ka te ne maluʻi kitautolu kapau pē te tau tui ʻa e konga taki taha ʻo e teunga taú​—pea tui maʻu pē. Ko e hā ʻoku fakafofongaʻi ʻe he konga taki taha? Tau sivisiviʻi angé.

 5. Ko e hā ʻa e leta ko e moʻoní, pea ko e hā kuo pau ai ke tau tuí?

⁵ Ko e leta ko e moʻoní ʻokú ne fakafofongaʻi ʻa e ngaahi moʻoni ʻi he Folofola ʻa e ʻOtuá, ʻa e Tohi Tapú. Ko e hā kuo pau ai ke tau tui ʻa e leta ko ení? Koeʻuhi ko Sētane “ko e tamai ia ʻa e loí.” (Sione 8:44) Kuo laui afeʻi taʻu ʻene ngāueʻaki ʻa e loí pea kuó ne takihalaʻi “ʻa e kotoa ʻo e māmani kuo nofoʻí”! (Fkh. 12:9) Ka ʻoku maluʻi kitautolu ʻe he ngaahi moʻoni ʻi he Tohi Tapú mei hono kākāʻí. ʻOku anga-fēfē ʻetau tui ʻa e leta fakaefakatātā ko ení? ʻOku tau fai ia ʻaki hono ako ʻa e moʻoni fekauʻaki mo Sihová, lotu kiate ia “ʻi he laumālie mo e moʻoni,” pea faitotonu ʻi he meʻa kotoa pē.​—Sione 4:24; ʻEf. 4:25; Hep. 13:18.

 6. Ko e hā ʻa e sifa-fatafata ko e māʻoniʻoní, pea ko e hā kuo pau ai ke tau tuí?

⁶ Ko e sifa-fatafata ko e māʻoniʻoní ʻokú ne fakafofongaʻi ʻa e ngaahi tuʻunga māʻoniʻoni ʻa Sihová. Ko e hā kuo pau ai ke tau tui ʻa e sifa-fatafatá? Hangē pē ko hono maluʻi ʻe ha sifa-fatafata ʻa e mafu ʻo ha sōtia mei hano hokaʻi, ko e sifa-fatafata ko e māʻoniʻoní ʻokú ne maluʻi hotau lotó pe ko e tangata ʻi lotó, mei he ngaahi tākiekina fakameleʻi ʻa e māmaní. (Pal. 4:23) ʻOku ʻamanekina mai ʻe Sihova ke tau ʻofa mo tauhi kiate ia ʻaki hotau lotó kotoa. (Māt. 22:36, 37) Ko ia ʻoku feinga ʻa Sētane ke ʻai hotau lotó ke māvahevahe ʻaki hono ʻai ke tau ʻofa ki he ngaahi meʻa ʻoku tuʻuaki mai ʻe he māmaní​—ʻa e ngaahi meʻa ʻoku fehiʻa ai ʻa Sihová. (Sēm. 4:4; 1 Sio. 2:15, 16) Pea kapau heʻikai ola lelei ia, te ne feinga ke fakamanamanaʻi kitautolu ke siʻaki ʻa e ngaahi tuʻunga ʻa Sihová.

 7. ʻOku anga-fēfē ʻetau tui ʻa e sifa-fatafata ko e māʻoniʻoní?

⁷ ʻOku tau tui ʻa e sifa-fatafata ko e māʻoniʻoní ʻaki hono tali ʻa e ngaahi tuʻunga ʻa Sihova ki he tonú mo e halá pea moʻui ʻo fehoanaki mo e ngaahi tuʻunga ko iá. (Saame 97:10) ʻOku ongoʻi nai ʻe he niʻihi ko e ngaahi tuʻunga ʻa Sihová ʻoku fakataputapui. Ka ʻo kapau te tau tuku hono ngāueʻaki ʻa e ngaahi tefitoʻi moʻoni Fakatohitapú ʻi heʻetau moʻuí, te tau hangē ai ko ha sōtia ʻokú ne vete hono sifa-fatafatá ʻi he lolotonga ʻa e taú koeʻuhi naʻá ne fakakaukau ʻoku fuʻu mamafa. He fakavalevale ē ko ia! Ko e ngaahi fekau ʻa Sihová, “ʻoku ʻikai ke fakamafasia” ia ki he faʻahinga ʻoku ʻofa kiate iá, ka ʻoku fakahaofi moʻui.​—1 Sio. 5:3.

 8. ʻOku ʻuhinga ki he hā ʻa e tui ʻi hotau vaʻé ʻa e sū ko e mateuteu ke talaki ʻa e ongoongo leleí?

⁸ ʻOku toe ekinaki mai ʻa Paula ke tau tui ʻi hotau vaʻé ʻa e sū ko e mateuteu ke talaki ʻa e ongoongo lelei ʻo e melinó. ʻI hono fakalea ʻe tahá, ʻoku totonu ke tau mateuteu maʻu pē ke malangaʻi ʻa e ongoongo lelei ʻo e Puleʻangá. ʻI heʻetau vahevahe ʻa e pōpoaki mei he Tohi Tapú ki he niʻihi kehé, ʻoku fakaivimālohiʻi ai ʻetau tuí. ʻOku fakalototoʻa moʻoni ke sio ki he kakai ʻa Sihova takatakai ʻi he māmaní ʻoku nau kumi ki ha faingamālie ke talaki ai ʻa e ongoongo leleí​—ʻi he ngāueʻangá, ʻapiakó, feituʻu pisinisí pea ʻi he malanga fale ki he falé, feituʻu faiʻanga fakataú, ʻaʻahi ki ha kāinga taʻetui, talanoa ki ha ngaahi maheni pea naʻa mo e nofo maʻu ʻi ʻapí. Kapau ʻe ikuʻi kitautolu ʻe he manavasiʻí pea tuku ʻetau malangá, te tau hangē ai ko ha sōtia naʻá ne vete hono senitoló ʻi he lolotonga ʻa e taú; ʻe faingofua ke lavea hono vaʻé. Ko hono olá, te ne tuʻu laveangofua ki hano ʻohofi, pea heʻikai malava ke ne muimui ki he angi ʻa e ʻeikitaú.

 9. Ko e hā ʻoku fiemaʻu ai ke tau toʻo ʻa e pā lahi ko e tuí?

⁹ Ko e pā lahí ko e tuí ʻokú ne fakafofongaʻi ʻetau tui kia Sihová. ʻOku tau falala te ne fakahoko ʻene ngaahi talaʻofá kotoa. ʻE tokoni ʻa e tui ko iá ke tau “tāmateʻiʻaki ʻa e ngaahi ngahau vela kotoa ʻa e tokotaha fulikivanú.” Ko e hā ʻoku fiemaʻu ai ke tau toʻo ʻa e pā lahi ko ení? Koeʻuhi ʻokú ne maluʻi kitautolu mei hano ueʻia ʻe he ngaahi akonaki ʻa e kau tafoki ʻo fakafepaki ki he moʻoní pe ko hano fakamanavaheeʻi kitautolu ʻe he ngaahi fakamatala fakaangá. ʻI he ʻikai ha tuí, heʻikai ke tau maʻu ʻa e mālohi ke talitekeʻi hano fakalotoʻi kitautolu ke tukunoaʻi ʻa e ngaahi tuʻunga ʻa Sihová. ʻI he tafaʻaki ʻe tahá, ʻi he taimi kotoa pē ʻoku tau taukapoʻi ai ʻetau tuí ʻi he ngāueʻangá pe ʻi he ʻapiakó, ʻoku tau toʻo ai ʻetau paá. (1 Pita 3:15) ʻI he taimi kotoa ʻoku tau tuku ange ai ha ngāue totongi lelei te ne uesia ʻetau taimi-tēpile tuʻumaʻu ki he lotú, ʻoku tau toʻo ai ʻetau paá. (Hep. 13:5, 6) Pea ʻi he taimi taki taha ʻoku tau tauhi ai kia Sihova neongo ʻa e fakafepakí, ʻoku maluʻi ai kitautolu ʻe heʻetau paá.​—1 Tes. 2:2.

10. Ko e hā ʻa e tātā ko e fakamoʻuí, pea ko e hā kuo pau ai ke tau tuí?

¹⁰ Ko e tātā ko e fakamoʻuí ko e ʻamanaki ia ʻoku ʻomai ʻe Sihová​—ko e ʻamanaki te ne fakahaofi kitautolu mei he maté pea fakapaleʻi ʻa e faʻahinga kotoa ʻoku nau fai hono finangaló. (1 Tes. 5:8; 1 Tīm. 4:10; Tai. 1:1, 2) Hangē pē ko hono maluʻi ʻe ha tātā ʻa e ʻulu ʻo ha sōtia, ko e ʻamanaki ʻo e fakamoʻuí ʻokú ne maluʻi ʻetau malava fakaefakakaukaú. ʻI he founga fē? Ko e ʻamanaki ko iá ʻokú ne ʻai ke tau tokangataha ki he ngaahi talaʻofa ʻa e ʻOtuá pea tokoniʻi kitautolu ke maʻu ʻa e vakai totonu ki he ngaahi palopalemá. ʻOku anga-fēfē ʻetau tui ʻa e tātā ko ení? ʻOku tau fai ia ʻaki hono tauhi ʻetau fakakaukaú ke fehoanaki mo e ngaahi fakakaukau ʻa e ʻOtuá. Ko e fakatātaá, ʻoku tau fokotuʻu ʻetau ʻamanakí, ʻo ʻikai ʻi he ngaahi koloa taʻepaú, ka ʻi he ʻOtuá.​—Saame 26:2; 104:34; 1 Tīm. 6:17.

11. Ko e hā ʻa e heletā ʻo e laumālié, pea ko e hā ʻoku fiemaʻu ai ke tau ngāueʻaki iá?

¹¹ Ko e heletā ʻo e laumālié ko e Folofola ia ʻa e ʻOtuá, ʻa e Tohi Tapú. Ko e heletā ko iá ʻokú ne maʻu ʻa e mālohi ke ne vaetuʻua ʻa e faʻahinga kākā kotoa pē pea fakatauʻatāinaʻi ʻa e kakaí mei he ngaahi akonaki halá mo e ngaahi tōʻonga fakatupu maumaú. (2 Kol. 10:4, 5; 2 Tīm. 3:16, 17; Hep. 4:12) ʻOku tau ako ke ngāueʻaki totonu ʻa e heletā ko iá fakafou ʻi he ako fakafoʻituituí mo e ako ʻoku tau maʻu mei he kautaha ʻa e ʻOtuá. (2 Tīm. 2:15) Tānaki atu ki he teunga taú, ʻoku toe ʻomai ʻe Sihova ha tokonaki mālohi ʻe taha ʻo e maluʻí. Ko e hā ia?

12. Ko e hā mo ha toe meʻa ʻoku tau fiemaʻu, pea ko e hā hono ʻuhingá?

¹² Ko ha sōtia pōtoʻi ʻi he taú ʻokú ne ʻiloʻi heʻikai lava ke ne ikuna kapau te ne faitau toko taha mo ha fuʻu kau tau; ʻokú ne fiemaʻu ʻa e tokoni ʻa hono kaungā-sōtiá. ʻI he tuʻunga meimei tatau, heʻikai ke tau ikuna kapau te tau faitau ʻiate kitautolu pē mo Sētane mo hono kau muimuí; ʻoku tau fiemaʻu ʻa e poupou ʻa hotau fanga tokouá mo e fanga tuofāfiné. Kuo tokonaki mai ʻe Sihova ha ‘haʻohaʻonga ʻo e fanga tokoua’ ʻi māmani lahí ʻa ia ʻoku nau ʻi ai ke tokoniʻi kitautolu.​—1 Pita 2:17.

13. Fakatatau ki he Hepelū 10:24, 25, ko e hā ʻa e ngaahi ʻaonga ʻo hono maʻu ʻetau ngaahi fakatahá?

¹³ Ko e founga ʻe taha ʻoku tau maʻu ai ʻa e poupoú ko hono maʻu ʻetau ngaahi fakatahá. (Lau ʻa e Hepelū 10:24, 25.) ʻI heʻetau ongoʻi loto-siʻí​—hangē ko ia ʻoku tau hokosia kotoa ʻi he taimi ʻe niʻihi​—ko e ngaahi fakatahá ʻe lava ke fakalototoʻa. ʻOku fakalototoʻaʻi kitautolu ʻe he ngaahi tali loto-moʻoni ʻa hotau fanga tokouá mo e fanga tuofāfiné. Ko e ngaahi malanga mo e ngaahi fakahāhā makatuʻunga ʻi he Tohi Tapú ʻoku nau fakahokó ʻoku fakaivimālohiʻi ai ʻetau fakapapau ke tauhi kia Sihová. Pea ko ʻetau talanoa fakatupu langa hake ʻi he ki muʻa mo e tuku ʻa e fakatahá ʻoku fakalototoʻaʻi ai kitautolu. (1 Tes. 5:14) ʻIkai ko ia pē, ʻoku ʻomai ʻi heʻetau ngaahi fakatahá ʻa e faingamālie ke hokosia ʻa e fiefia ʻoku maʻu mei hono tokoniʻi ʻa e niʻihi kehé. (Ngā. 20:35; Loma 1:11, 12) ʻOku toe tokoniʻi kitautolu ʻe he ngaahi fakatahá ʻi he ngaahi founga kehe. ʻOku fakaleleiʻi ai ʻetau pōtoʻi ʻi he taú, hangē ko e laú, ʻaki hono teuʻi kitautolu ki he ngāue fakafaifekaú. Ko e fakatātaá, ʻoku tau ako ke ngāueʻaki ola lelei ʻetau Puha Meʻangāue Fakafaiakó. Ko ia teuteu lelei ki he ngaahi fakataha ʻa e fakatahaʻangá. Lolotonga ʻa e fakatahá, fanongo tokanga. Hili ʻa e fakatahá, ngāueʻaki ʻa e meʻa naʻá ke akó. ʻI hoʻo fai ʻa e ngaahi meʻa ko iá, te ke hoko ai “ko ha sōtia lelei ʻa Kalaisi Sīsuú.”​—2 Tīm. 2:3.

14. Ko e hā ha toe tokoni ʻoku tau maʻu?

¹⁴ ʻOku tau toe maʻu ʻa e poupou ʻa e kau ʻāngelo mālohi ʻe laui mano. Fakakaukau atu ki he meʻa ʻoku lava ke fakahoko ʻe ha ʻāngelo pē ʻe taha! (ʻAi. 37:36) Fakakaukau atu he taimí ni ki he meʻa ʻe lava ke fakahoko ʻe ha kongakau ʻāngelo mālohi. ʻOku ʻikai ha tangata pe ko ha tēmeniō ʻoku tatau mo e fuʻu kau tau mālohi ʻa Sihová. Kuo leaʻaki ʻo pehē ʻi he kau ʻa Sihova mo ha Fakamoʻoni faitōnunga ʻe toko taha ʻoku tatau ia mo ha fuʻu kau tau tokolahi. (Fkm. 6:16) He moʻoni ē ko ia! Tauhi maʻu ʻa e ngaahi meʻa ko iá ʻi hoʻo fakakaukaú ʻi he taimi ʻokú ke manavasiʻi ai ʻi ha meʻa ʻoku leaʻaki pe fai ʻe ha kaungāngāue, kaungāako pe ko ha kāinga taʻetui. Manatuʻi, ʻoku ʻikai te ke faitau toko taha. ʻOkú ke muimui ʻi he tataki ʻa Sihová.

15. Fakatatau ki he ʻAisea 54:15, 17, ko e hā heʻikai ʻaupito ke fakasīlongoʻi ai ʻa e kakai ʻa e ʻOtuá?

¹⁵ Ko e māmani ʻoku puleʻi ʻe Sētané ʻoku nau maʻu ʻa e ngaahi ʻuhinga ke fehiʻa ʻiate kitautolu. ʻOku tau hanganaki tuʻu-ʻatā fakapolitikale pea ʻoku ʻikai ke tau kau ʻi he taú. ʻOku tau talaki ʻa e huafa ʻo e ʻOtuá, pouaki hono Puleʻangá ko e ʻamanakiʻanga pē ia ʻe taha ki he melinó, pea pouaki ʻene ngaahi tuʻunga māʻoniʻoní. ʻOku tau fakaeʻa ʻa e kau pule ʻo e māmaní ko ha kau loi fakalilifu mo e kau fakapō. (Sione 8:44) Pea ʻoku tau fanongonongo ʻa e vavé ni ke fakaʻauha ʻa e māmani ʻo Sētané. Neongo ia, heʻikai ʻaupito ke fakasīlongoʻi kitautolu ʻe Sētane mo hono kau muimuí. ʻI hono kehé, te tau hanganaki fakahīkihikiʻi ʻa Sihova, ʻo ngāueʻaki ʻa e founga kotoa pē ʻoku tau malavá! Neongo ʻoku mālohi ʻa Sētane, kuo ʻikai malava ke ne taʻofi ʻa e pōpoaki ʻo e Puleʻangá mei heʻene aʻu ki he kakai kotoa ʻi he kolopé. ʻOku malava pē eni koeʻuhi ko e maluʻi ʻa Sihová.​—Lau ʻa e ʻAisea 54:15, 17.

16. ʻE anga-fēfē hono fakahaofi ʻe Sihova ʻene kakaí lolotonga ʻa e fuʻu mamahi lahí?

¹⁶ Ko e hā ʻoku toka mei muʻá? Lolotonga ʻa e fuʻu mamahi lahí, ʻe fakahaofi kitautolu ʻe Sihova ʻi ha founga fakaofo ʻe ua. ʻUluakí, te ne fakahaofi ʻene kau sevāniti mateakí lolotonga ʻa e taimi te ne ʻai ai ʻa e ngaahi tuʻi ʻo e māmaní ke fakaʻauha ʻa Pāpilone ko e Lahí, ʻa e ʻemipaea ʻo e lotu loí. (Fkh. 17:16-18; 18:2, 4) Te ne fakahaofi leva ʻene kakaí ʻi heʻene fakaʻauha ʻosi ʻa e toenga ʻo e ngaahi ʻelemēniti ʻo e māmani ʻo Sētané ʻi ʻĀmaketone.​—Fkh. 7:9, 10; 16:14, 16.

17. ʻOku anga-fēfē ʻetau maʻu ʻaonga mei he nofo ofi ai pē kia Sihová?

¹⁷ ʻI heʻetau nofo ofi ai pē kia Sihová, heʻikai lava ke fai mai ʻe Sētane ha maumau tuʻuloa. Ko hono moʻoní, ko ia ʻa e toko taha ʻe fakaʻauha tuʻuloá. (Loma 16:20) Ko ia tui ʻa e teunga tau kakató​—pea ʻoua ʻe toe vete! ʻOua ʻe feinga ke faitau toko taha. Poupouʻi ho fanga tokouá mo e fanga tuofāfiné. Pea muimui ʻi he tataki ʻa Sihová. Kapau te ke fai pehē, ʻe lava ke ke falala pau ʻe fakaivimālohiʻi mo maluʻi koe ʻe hoʻo Tamai fakahēvani anga-ʻofá.​—ʻAi. 41:10.