Founga ke ʻIloʻi Ai mo Ikuʻi ha Faʻahinga Vaivai Fakalaumālie Pē

FAKATATAU KI HE TALATUPUʻA FAKA-KALISÍ, KO ʻAKILISI ʻA E TOKOTAHA NAʻE loto-toʻa taha ʻi he kau tangata tau ʻa Kalisi ʻi he Tau ʻi Tuloí, ko ha feingatau fakafepakiʻi ʻa e kolo ko Tuloí. ʻOku pehē ʻe he talatupuʻá ʻi he taimi naʻe kei valevale ai ʻa ʻAkilisí, naʻe unu ia ʻe heʻene faʻeé ʻi he ngaahi vai ʻo e Vaitafe Sītiki, ʻo ʻai ia ke taʻemafakalaveaʻi tuku kehe ʻa e feituʻu naʻe pukepuke ai ia ʻe heʻene faʻeé​—ko e muiʻivaʻe naʻe lea takaʻaki ʻo ʻAkilisí. Ko e feituʻu tofu pē ia naʻe tau ai ʻa e foʻi ngahau fakatupu mate naʻe fanaʻi ʻe Pālesi, foha ʻo Tuʻi Palaiemi ʻo Tuloí, ʻo mate ai ʻa ʻAkilisi.

Ko e kau Kalisitiané ko e kau sōtia ʻa Kalaisi, ʻoku nau kau ki ha tau fakalaumālie. (2 Timote 2:3) “Talaʻehai ko ʻetau milimilisino ni,” ko e fakamatala ia ʻa e ʻapositolo ko Paulá, “ko e fai mo ha toto mo kakano; kaekehe, ko e fai mo e faʻahinga pule, mo faʻahinga maʻu tuʻunga, mo e houʻeiki fakaleveleva ʻo e fakapoʻuli ni, mo e ngaahi kongakau laumalie ʻa e kovi ʻi he ngaahi feituʻu ʻo langi.” ʻIo, ko hotau ngaahi filí ʻoku ʻikai mo ha toe taha kehe ka ko Sētane ko e Tēvoló mo e kau tēmenioó.​—Efeso 6:12.

ʻOku hā mahino, ʻe hoko ʻeni ko ha faitau faʻahi-taha pē kapau naʻe ʻikai te tau maʻu ʻa e tokoni meia Sihova ko e ʻOtuá, ʻa ia kuo fakamatalaʻi “ko e pāteʻitau.” (Ekisoto 15:3) Ke maluʻi kitautolu mei hotau ngaahi fili fulikivanú, ʻoku ʻomai kiate kitautolu ha teunga-tau fakalaumālie. Ko e ʻuhinga ia naʻe naʻinaʻi mai ai ʻa e ʻapositolo ko Paulá: “ʻAi kiate kimoutolu ʻa e mahafukotoa ʻa e ʻOtua, koeʻuhi ke mou lava ke tuʻu ki he ngaahi tuʻutuʻuni kākā ʻa e Tevolo.”​—Efeso 6:11.

Ko e teunga-tau naʻe tokonaki mai ʻe Sihova ko e ʻOtuá, ʻoku ʻikai ha toe veiveiua, ko e lelei tahá ia, ʻo malava ke matuʻuaki ai ha faʻahinga ʻoho fakalaumālie pē ʻoku fai mai. Kiʻi sio ange ki he fakahokohoko naʻe ʻomai ʻe Paulá: noʻo ko e moʻoní, kofutau ko e maʻoniʻoní, topuvaʻeʻaki ʻa e kosipelí, pā lahi ko e tuí, tatātau ko e fakamoʻuí, pea mo e heletā ko e laumālié. Ko e hā ha naunau lelei ange ʻe lava ke toe ʻamanaki atu ki ai ha taha? ʻAki hano tui ha teunga-tau pehē, ʻoku maʻu faingamālie maʻu pē ai ha sōtia Kalisitiane ke ne ikuna, neongo ko ha ngaahi meʻa fakatupu lōmekina kāfakafa.​—Efeso 6:​13-17.

Neongo ko e teunga-tau fakalaumālie meia Sihová ko e lelei tahá ia pea ko ha matavai ia ʻo e maluʻanga kiate kitautolú, kuo pau ke ʻoua te tau fakamaʻamaʻaʻi ʻa e ngaahi meʻá. ʻI hono manatuʻi ʻa e tokotaha hā ngali ikuʻingataʻa ko ʻAkilisí, ʻoku malava mo kitautolu ke tau maʻu nai ha tafaʻaki vaivai, ha muiʻivaʻe ʻo ʻAkilisi fakalaumālie? ʻOku malava ke fakamoʻoniʻi ʻene fakatupu maté kapau ʻoku maʻu kitautolu taʻeʻiai haʻatau ʻilo ki ai.

Sivisiviʻi Ho Teunga-Tau Fakalaumālié

Ko ha tokotaha sikeiti ʻaisi maʻu mētali koula tuʻo ua he ʻOlimipikí, ʻa ia naʻe hā mahino naʻá ne ʻi he tuʻunga lelei fakaesinó, naʻe fakafokifā pē ʻene tō ʻo mate ʻi he lolotonga ʻo ha foʻi taimi fakaangaanga. Hili mei ai ha taimi siʻi naʻe hā ai ha konga fakatupu fakakaukau ʻo e ngaahi ongoongó ʻi he The New York Times: “Ko e vaeua ʻo e kau ʻAmelika ʻe toko 600,000 ʻoku tuʻu e tā honau mafú ʻi he taʻu taki taha ʻoku ʻikai ha ngaahi fakaʻilonga ia ke ʻilo ai ki muʻa.” ʻOku hā mahino, ko e tuʻunga ʻo ʻetau moʻui leleí heʻikai lava ke fakapapauʻi pē ia mei he anga ʻo ʻetau ongoʻí.

ʻOku tatau pē ʻi he hoko mai ki heʻetau moʻui lelei fakalaumālié. Ko e faleʻi ʻa e Tohitapú: “ʻIlonga ʻa ia ʻoku ne pehe kuo ne tuʻu, ke vakavakai naʻa ne hinga.” (1 Kolinito 10:12) Neongo ko hotau teunga-taú ko e lelei taha ia ʻoku ala maʻú, ʻoku malava ke tupulekina ʻa e vaivaí. ʻOku hoko ʻení koeʻuhi ʻoku fanauʻi mai kitautolu ʻi he angahala, pea ko hotau natula angahalaʻia mo taʻehaohaoá ʻoku faingofua ʻena puleʻi ʻetau fakapapau ke fai ʻa e finangalo ʻo e ʻOtuá. (Sāme 51:5) Neongo ʻetau ngaahi fakataumuʻa ki he leleí, ʻoku malava ʻe hotau loto kākaá ʻo kākaaʻi kitautolu ʻaki ʻa e ngaahi fakaʻuhinga pe ngaahi kalofanga faʻu fakangalilelei, koeʻuhi ke faingofua ai ʻetau tukunoaʻi hotau vaivaiʻangá pea kākaaʻi ai kitautolu ke tau fakakaukau ʻoku lelei pē e meʻa kotoa.​—Selemaia 17:9; Loma 7:​21-23.

ʻIkai ngata aí, ʻoku tau moʻui ʻi ha māmani ʻa ia ʻoku faʻa fakapuputuʻuʻi pe mioʻi ai ʻa e ongo ki he tonú mo e halá. Pe ko e meʻa ko iá ʻoku tonu pe hala ʻoku fakapapauʻi nai ʻaki ia ʻa e anga ʻo e ongoʻi ʻa e tokotahá. ʻOku poupouʻi ʻa e faʻahinga fakakaukau ko ʻení ʻi he ngaahi tuʻuakí, fakafiefia manakoá, pea mo e mītiá. ʻOku hā mahino, kapau ʻoku ʻikai te tau tokanga, ʻe lava ke fakamohemoheʻi kitautolu ke fakakaukau pehē, pea ʻe kamata nai ai ke vaivai hotau teunga-tau fakalaumālié.

ʻI he lelei ange ke ʻoua ʻe tō ki ha faʻahinga tuʻunga fakatuʻutāmaki peheé, ʻoku totonu ke tau tokanga ki he faleʻi ʻa e Tohitapú: “Eke kiate kimoutolu, be oku mou i he tui; ahiahiʻi akimoutolu.” (2 Kolinito 13:​5, PM) ʻI heʻetau fai peheé, ʻe lava ai ke tau ʻiloʻi ha faʻahinga vaivai pē kuo tupulekina pea fai leva ʻa e ngaahi laka ʻoku fiemaʻú ke fakaleleiʻi kinautolu ki muʻa ke ʻilo ia ʻe hotau ngaahi filí pea kamata ai ʻenau ʻohó. Ko ia, ʻe anga-fēfē ʻetau fai ha ʻahiʻahiʻi pehē? Ko e hā ha niʻihi ʻo e ngaahi fakaʻilongá ʻoku totonu ke tau tokanga ki ai ʻi he sivisiviʻi-kita ko ʻení?

Ko Hono ʻIloʻi ʻa e Ngaahi Fakaʻilongá

Ko e fakaʻilonga anga-maheni ʻe taha ʻokú ne fakahaaʻi nai ʻa e vaivai fakalaumālié ko hano fakangaloku ʻo ʻetau angaʻaki ʻa e ako fakafoʻituituí. ʻOku ongoʻi ʻe he niʻihi ʻoku totonu ke nau ako lahi ange, ka ʻoku ʻikai pē te nau malava ke feinga ki ai. ʻI he moʻui moʻumoʻua ʻo e ʻaho ní, ʻoku faingofua ke tō ki ha tuʻunga kovi pehē. Kae kehe, ko e meʻa ʻoku kovi angé, ko e faʻa fakaʻuhinga ʻa e kakaí ʻo pehē ʻoku ʻikai te nau fuʻu loko kovi, koeʻuhi ʻoku nau lau ʻa e ngaahi tohi faka-Tohitapú ʻi he taimi pē ʻoku nau malava aí pea ʻoku malava ke nau aʻu ki he ngaahi fakataha faka-Kalisitiane ʻe niʻihi.

Ko e fakaʻuhinga peheé ko ha founga ia ʻo e kākaaʻi-kitá. ʻOku hangē ia ha tangata ʻokú ne ongoʻi ʻokú ne fuʻu femoʻuekina ke tangutu hifo ʻo kai ha meʻakai totonu, ko ia ʻokú ne kiʻi uʻu takai holo pē ʻi heʻene fakavave mei he meʻa ʻe taha ki he meʻa taha. Neongo ʻoku ʻikai nai te ne faingataʻaʻia tupu mei he mate he fiekaiá, ʻoku lava ke hoko ai ha ngaahi palopalema fakaemoʻuilelei ʻi ha taimi vavé ni mai pe ko ʻamui ange. ʻI he tuʻunga meimei tatau, ʻi he ʻikai ke maʻu tuʻumaʻu ʻa e meʻakai fakatupu-moʻuilelei fakalaumālié, ʻoku malava vave ke tupulaki ai ha ngaahi tafaʻaki vaivai ʻi hotau teunga-tau fakalaumālié. ʻI he hoko ʻo ʻohofia maʻu pē ʻe he ngaahi tuʻuaki fakakaukau mo e ngaahi fakakaukau fakaemāmaní, ʻoku malavangofua ai ke tau tō ʻi he ngaahi ʻohofi fakatupu mate ʻa Sētané.

Ko e toe fakaʻilonga ʻe taha ʻo e vaivai fakalaumālié ko e mole ʻa e ongoʻi ʻo e fakavavevave ʻi heʻetau faitau fakalaumālié. Ko ha sōtia ʻi he taimi melinó ʻoku ʻikai te ne ongoʻi ʻe ia ʻa e fakakaukau hohaʻa mo e fakatuʻutāmaki ʻo e taú. ʻOku ʻikai nai te ne ongoʻi fakavavevave ke mateuteu. Kapau ʻe fakafokifā pē hano ui ia ke ne kau mai, mahalo pē te ne mātuʻaki taʻemateuteu. ʻOku tatau tofu pē mo e tafaʻaki fakalaumālié. Kapau ʻoku tau fakaʻatā ʻa e ongoʻi ʻo e fakavavevavé ke mole atu, ʻe lava ke tau hoko ai ʻo taʻemateuteu ke tekeʻi ʻa e ngaahi ʻohofi ʻoku fai mai nai kiate kitautolú.

Ko ia, ʻoku lava fēfē ke tau tala kapau kuo tau tō ki he tuʻunga ko ʻení? ʻE lava ke tau ʻeke hifo kiate kitautolu ha ngaahi fehuʻi te nau fakahaaʻi nai ʻa e tuʻunga totonu ʻo e ngaahi meʻá: ʻOku ou vēkeveke ke kau ʻi he ngāue fakafaifekaú ʻo hangē ko ia ko ʻeku teu ʻalu ʻo ʻevá? ʻOku ou loto-lelei ke fakamoleki ha taimi ʻi he teuteu ki he ngaahi fakatahá ʻo hangē ko ia ko haʻaku fai ki ha fakatau pe mata TV? ʻOku ou toe fakakaukau fekauʻaki mo e ngaahi tulitāupau pe ngaahi faingamālie naʻá ku liʻaki atu ʻi he taimi naʻá ku hoko ai ko ha Kalisitiané? ʻOku ou fakaʻamua ʻa e founga moʻui lelei manakoa ʻoku moʻui ai ʻa e niʻihi kehé? Ko e ngaahi fehuʻi fakatupunga fakakaukau ʻeni, ka ʻoku tokoni ia ki hono ʻiloʻi ha faʻahinga vaivaiʻanga pē ʻi hotau teunga-tau fakalaumālié.

Koeʻuhi ko e teunga-tau malu ʻoku tau maʻú ʻoku fakalaumālie ia, ʻoku mātuʻaki fiemaʻu ke tafe tauʻatāina ʻa e laumālie ʻo e ʻOtuá ʻi heʻetau moʻuí. ʻOku tapua atu ʻeni ʻi he lahi ʻo e hā ʻa e fua ʻo e laumālie ʻo e ʻOtuá ʻi heʻetau ngaahi ngāué kotoa. ʻOkú ke vave ke ʻiteʻita pe naʻa mo e loto-mamahi ʻi he taimi ʻoku fai pe leaʻaki ai ʻe he niʻihi kehé ha meʻa ʻoku ʻikai te ke saiʻia ai? ʻOku faingataʻa ke ke tali ʻa e akonakí, pe ʻokú ke ongoʻi ʻoku nofo pē ʻa e niʻihi kehé ia ʻo siofi koe? ʻOkú ke fuʻu meheka ʻi he ngaahi tāpuaki pe ngaahi lavameʻa ʻa e kakai kehé? ʻOku faingataʻa kiate koe ke ke feohi mo e niʻihi kehé, tautefito ki ho toʻú? Ko e fakamahuʻingaʻi-fakaekita faitotonú te ne tokoniʻi kitautolu ke tau sio pe ʻoku fakafonu ʻetau moʻuí ʻaki ʻa e fua ʻo e laumālie ʻo e ʻOtuá pe ʻoku kamata fakapulipuli ke hā mai ai ʻa e ngaahi ngāue ia ʻa e kakanó.​—Kaletia 5:​22-​26; Efeso 4:​22-​27.

Ngaahi Laka Pau ki Hono Ikuʻi ʻa e Vaivai Fakalaumālié

Ko e meʻa ia ʻe taha ke ʻiloʻi ʻa e ngaahi fakaʻilonga ʻo e vaivai fakalaumālié; ko e meʻa kehe ʻaupito ʻa e fehangahangai mo kinautolú pea fai ʻa e ngaahi laka ke fakatonutonu kinautolú. Ko hono pangó, ʻoku hehema ʻa e tokolahi ke kumi kalofanga, ke fakaʻuhinga, ke fakasiʻisiʻi ʻa e palopalemá, pe ke fakaʻikaiʻi ʻa e ʻi ai ʻa e meʻa ko iá. He fakatuʻutāmaki lahi ē ko ia​—hangē ha ʻalu ki he taú ʻo tui ha teunga-tau ʻoku mole mei ai ha ngaahi konga! ʻOku fakaʻatā atu ai kitautolu ʻe he ʻalunga peheé ki he ʻohofi ʻa Sētané. Kae kehe, ʻoku totonu ke tau fai ʻa e ngaahi laka pau fakavavevave ke fakatonutonu ha faʻahinga mele pē ʻoku tau fakatokangaʻi nai. Ko e hā ʻe lava ke tau faí?​—Loma 8:​13; Semisi 1:​22-​25.

ʻI he kau ki he faitau fakalaumālié​—ko ha tau ʻoku kau ki ai ʻa e mapuleʻi ʻo e ʻatamai mo e loto ʻo e Kalisitiané​—kuo pau ke tau fai ʻa e kotoa te tau malavá ke maluʻi ʻetau mafai fakaefakakaukaú. Manatuʻi ʻi he lotolotonga ʻo e ngaahi konga ʻo hotau teunga-tau fakalaumālié ʻoku ʻi ai “ʻa e kofutau ko e maʻoniʻoni,” ʻa ia ʻokú ne maluʻi hotau lotó, pea mo e “tatātau ko e fakamoʻui,” ʻa ia ʻokú ne maluʻi hotau ʻatamaí. Ko e ako ke ngāueʻaki ola lelei ʻa e ongo tokonaki ko ʻení ʻoku lava ke ʻi ai ai ʻa e kehekehe ʻi he ikuná mo e foʻí.​—Efeso 6:​14-​17; Palovepi 4:​23; Loma 12:2.

Ko hono tui totonu “ʻa e kofutau ko e maʻoniʻoni” ʻoku fiemaʻu ai ke tau vakaiʻi maʻu pē kitautolu ʻi he fekauʻaki mo ʻetau ʻofa ki he māʻoniʻoní pea fehiʻa ki he maumau-laó. (Sāme 45:7; 97:10; Emosi 5:​15) Kuo faai hifo hotau ngaahi tuʻungá fakataha mo e māmaní? ʻOku tau ʻilo he taimí ni ko ha meʻa fakaefakafiefia ia​—pe ʻoku ʻi he moʻuí tonu pe ʻoku fakahāhā mai ʻi he TV mo e ngaahi faivá, ʻi he ngaahi tohí mo e ngaahi makasiní​—ʻa e ngaahi meʻa naʻe fakaʻohovale nai pe fakalotomamahi kiate kitautolu ki muʻa? ʻE tokoniʻi kitautolu ʻe he ʻofa ki he māʻoniʻoní ke tau sio ko e meʻa ʻoku fakalāngilangiʻi ʻi he māmaní ʻo hangē ko e tauʻatāina ia mo e poto fakaemāmaní ko e moʻoni ko e fakaʻaluʻalu nai mo e loto-pōlepole ʻi he tuʻunga fakapuli.​—Loma 13:​13, 14; Taitusi 2:​12.

Ko hono ʻai “ʻa e tatātau ko e fakamoʻui” ʻoku kau ki ai ʻa hono tauhi ke maʻalaʻala ʻi he fakakaukaú ʻa e ngaahi tāpuaki fakaofo ʻoku hanga mai mei muʻá, ʻoua ʻe fakaʻatā kitautolu ke afeʻi ʻe he fetapaki mo e fakaʻofoʻofa ʻo e māmaní. (Hepelu 12:​2, 3; 1 Sione 2:​16) ʻI hono maʻu ʻa e anga ʻo e fakakaukau ko ʻení ʻe tokoniʻi ai kitautolu ke ʻai ʻa e ngaahi meʻa mahuʻinga fakalaumālié ke muʻomuʻa ia ʻi he koloa fakamatelié pe lelei fakafoʻituituí. (Mātiu 6:33) Ko ia, ke fakapapauʻi ʻoku tau maʻu ʻa e konga ko ʻeni ʻo e teunga-taú ʻi hono feituʻu totonú, kuo pau ke tau ʻeke faitotonu hifo kiate kitautolu: Ko e hā ʻoku ou tuli ki ai ʻi he moʻuí? ʻOku ʻi ai haʻaku ngaahi taumuʻa pau fakalaumālie? Ko e hā ʻoku ou fai ke lavaʻi ai kinautolú? Tatau ai pē pe ʻoku tau ʻo e toenga ʻo e kau Kalisitiane paní pe ko e “fuʻu kakai lahi” taʻefaʻalauá, ʻoku totonu ke tau faʻifaʻitaki kia Paula, ʻa ia naʻá ne pehē: “ʻOku ʻikai te u lau au kuo u maʻu: ka ko e meʻa pe taha ʻoku ou fai; ʻoku ou fakangalongaloʻi ʻa e ngaahi meʻa kuo tuku ki mui, kau kakapa atu ki he ngaahi meʻa mei muʻa: ʻou tuli atu pe ki he ngataʻanga.”​—Fakahā 7:9; Filipai 3:​13, 14.

Ko e fakamatala ʻa Paula ki hotau teunga-tau fakalaumālié ʻoku fakaʻosiʻaki ʻa e enginaki ko ʻení: “ʻI he faingamalie kotoa pe mou fai hoʻomou lotu ʻi he Laumalie ʻaki ʻa e faʻahinga hu kehekehe mo e kole, ʻo mou lama ke maʻu ʻa e meʻa ko ia ʻi he fuʻu fakaʻutumauku ʻo e hufia ʻo e kainga lotu kotoa pe.” (Efeso 6:18) ʻOku fakahaaʻi mai ʻe he meʻá ni ʻa e ongo sitepu pau ʻe ua ʻoku lava ke tau laka ai ke ikuʻi mo taʻofi ha faʻahinga vaivai fakalaumālie: Fakatupulekina ha vahaʻangatae lelei mo e ʻOtuá, pea fokotuʻu ha haʻi vāofi mo e kaungā Kalisitiané.

ʻI heʻetau angaʻaki ke hanga kia Sihova ʻi he ngaahi lotu ʻo e ‘faʻahinga kehekehe’ (vete ʻetau ngaahi angahalá, kole ki ha fakamolemole, kole ki ha tataki, fakamālō ki he ngaahi tāpuakí, fakahīkihikiʻi mei he lotó) pea “ʻi he faingamalie kotoa pe” (ʻi he feituʻu kakai, fakapulipuli, fakafoʻituitui, ake tuʻungaʻa hake pē), ʻoku tau maʻu ai ha vā fekoekoeʻi mo Sihova. Ko e maluʻanga lahi taha ia ʻoku malava ke tau maʻú.​—Loma 8:​31; Semisi 4:​7, 8.

ʻI he tafaʻaki ʻe tahá, ʻoku enginakiʻi mai kitautolu ke tau lotu maʻá e “kainga lotu kotoa pe,” ʻa ia, ko hotau kaungā Kalisitiané. ʻOku tau manatuʻi nai ʻi heʻetau ngaahi lotú ʻa hotau ngaahi tokoua fakalaumālie ʻi he ngaahi fonua mamaʻó ʻoku nau tofanga ʻi he fakatanga pe ngaahi faingataʻa kehe. Kae fēfē ʻa e kau Kalisitiane ko ia ʻoku tau ngāue mo feohi ʻi he ʻaho ki he ʻahó? ʻOku totonu ke lotu maʻanautolu foki, naʻa mo Sīsū naʻá ne lotu maʻá e kau ākonga ʻaʻaná. (Sione 17:9; Semisi 5:​16) ʻOku hanga ʻe he ngaahi lotu peheé ʻo tohoaki kitautolu ke tau vāofi pea fakaivimālohiʻi kitautolu ke tau matuʻuaki ʻa e ngaahi ʻoho ʻa e “Fili.”​—2 Tesalonaika 3:​1-3.

Fakaʻosí, tauhi maʻu ʻi he ʻatamaí ʻa e enginaki ʻofa ʻa e ʻapositolo ko Pitá: “Kuo panaki ʻa e ngataʻanga ʻo e meʻa kotoa pe: ko ia mou fakamaʻumaʻu muʻa, ʻo mou moʻui fakaʻehiʻehi, koeʻuhi ke mou faʻa lotu. Sinoemeʻa ke mou tauhi ai pe hoʻomou feʻofaʻaki ke tukuingata pe: he ko e ʻofa ʻoku ne ʻufiʻufi ha fufuʻunga angahala.” (1 Pita 4:​7, 8) ʻOku mātuʻaki faingofua ke fakaʻatā ʻa e ngaahi taʻehaohaoa fakaetangata​—ʻa e kakai kehé mo haʻatautolú tonu​—ke nau hū ki hotau lotó mo hotau ʻatamaí pea hoko ko e ngaahi fakafaingataʻaʻiaʻanga, mo e ngaahi maka tūkiaʻanga. ʻOku ʻiloʻi lelei ʻe Sētane ʻa e vaivai fakaetangata ko ʻení. Ko e fakamavahevaheʻi kae ikuná ko e taha ia ʻo ʻene ngaahi founga anga-kākaá. Ko ia ai, kuo pau ke tau fakavave ke ʻufiʻufi ʻa e ngaahi angahala peheé ʻaki ʻa e feʻofaʻaki lahi ʻaupito pea ʻoua “naʻa tuku ha ava ki he Tevolo.”​—Efeso 4:​25-27.

Hanganaki Mālohi Fakalaumālie he Taimí Ni

ʻI hoʻo fakatokangaʻi ʻoku mafuefue ho louʻulú, pe ʻoku manumi ho hēkesí, ko e hā ʻokú ke faí? ʻOku hangehangē te ke fakatonutonu leva ʻa e ngaahi meʻá ʻi he vave taha ʻe malavá. Ko e kakai tokosiʻi pē te nau tukunoaʻi kinautolú, ʻi he ongoʻi ʻoku ʻikai ko ha fuʻu loko meʻa ʻa e ngaahi hā kehe fakaesino peheé ia. Tau fai ha tali vave pehē tofu pē ʻi he taimi ʻoku hoko mai ai ki hotau ngaahi vaivaiʻanga fakalaumālié. ʻE fakaafeʻi mai nai ʻe he ngaahi mele fakaesinó ha ngaahi hila taʻeleleiʻia mai ʻa e kakaí, ka ko e ngaahi mele fakalaumālie ko ia ʻoku tuku taʻefakatonutonú ʻoku lava ke iku ia ki he taʻehōifua mai ʻa Sihova.​—1 Samiuela 16:7.

Kuo foaki ʻofa mai ʻe Sihova kiate kitautolu ʻa e meʻa kotoa ʻoku fiemaʻu ki hono tokoniʻi kitautolu ke toʻo fakaʻaufuli atu ha faʻahinga vaivai fakalaumālie pē pea ke hanganaki mālohi fakalaumālié. Fakafou mai ʻi he ngaahi fakataha Kalisitiané, ngaahi tohi faka-Tohitapú, mo e kaungā Kalisitiane matuʻotuʻa mo tokangá, ʻokú ne tokonaki mai ai ʻa e ngaahi fakamanatu tuʻumaʻu mo e ngaahi fakahinohino ki he meʻa kuo pau ke tau faí. ʻOku fakatuʻunga pē ʻiate kitautolu ʻa hono tali mo ngāueʻaki kinautolú. ʻOku fiemaʻu heni ʻa e feinga mo e akonekinaʻi-kita. Kae manatuʻi ange ʻa e meʻa naʻe lea faitotonu ʻaki ʻe he ʻapositolo ko Paulá: “Ko e anga ʻeni o ʻeku lele aʻaku, ʻoku ʻikai ke hamumu; ko e anga ʻeni o ʻeku fuhu, ʻoku ʻikai te u tuki matangi. Kae kehe, ʻoku te tokeia hoto sino, mo takipopulaʻi: naʻa ʻiloange, hili ʻeku fai ʻa e angi ki he kakai kehe, pea u hoko au ko e liʻekina.”​—1 Kolinito 9:​26, 27.

Ke tokanga, pea ʻoua ʻaupito naʻa fakaʻatā ha muiʻivaʻe fakalaumālie ʻo ʻAkilisi ke tupulaki. Ka, ke tau ʻai anga-fakatōkilalo mo loto-toʻa kitautolu ke fai ʻa e meʻa ʻoku fiemaʻu he taimí ni ke ʻiloʻi mo ikuʻi ai ha faʻahinga vaivai fakalaumālie pē ʻoku tau maʻu.

[Fakamatala ʻi he peesi 19]

“EKE KIATE KIMOUTOLU, BE OKU MOU I HE TUI; AHIAHIʻI AKIMOUTOLU.”—2 Kolinito 13:​5, PM.

[Fakamatala ʻi he peesi 21]

“KE MOU FAʻA LOTU. SINOEMEʻA KE MOU TAUHI AI PE HOʻOMOU FEʻOFAʻAKI KE TUKUINGATA PE: HE KO E ʻOFA ʻOKU NE ʻUFIʻUFI HA FUFUʻUNGA ANGAHALA.”​—1 Pita 4:​7, 8.

[Puha/Fakatātā ʻi he peesi 20]

ʻEKE HIFO KIATE KOE . . .

◆ ʻOku ou loto-lelei ke fakamoleki ha taimi ʻi he teuteu ki he ngaahi fakatahá ʻo hangē ko ia ko haʻaku fai ha fakatau pe mata TV?

◆ ʻOku ou fakaʻamua ʻa e founga moʻui lelei manakoa ʻoku moʻui ai ʻa e niʻihi kehé?

◆ ʻOku ou vave ke ʻiteʻita ʻi he taimi ʻoku fai pe leaʻaki ai ʻe he niʻihi kehé ha meʻa ʻoku ʻikai te u saiʻia ai?

◆ ʻOku faingataʻa ke u tali ʻa e akonakí, pe ʻoku ou ongoʻi ʻoku nofo pē ʻa e niʻihi kehé ia ʻo siofi au?

◆ ʻOku faingataʻa kiate au ke u feohi mo e niʻihi kehé?

◆ Kuo faai hifo hoku ngaahi tuʻungá fakataha mo e māmaní?

◆ ʻOku ʻi ai haʻaku ngaahi taumuʻa pau fakalaumālie?

◆ Ko e hā ʻoku ou fai ke lavaʻi ai ʻeku ngaahi taumuʻa fakalaumālié?

[Maʻuʻanga ʻo e Tā ʻi he peesi 18]

ʻAkilisi: From the book Great Men and Famous Women; kau sōtia Lomá mo e peesi 21: Historic Costume in Pictures/Dover Publications, Inc., New York