ʻAi ke Mālohi ʻa Hoʻo Falala kia Sihová

ʻOku fai ha faʻufaʻu fakafufū mātuʻaki fakatuʻutāmaki. Kuo alēlea ʻa e kotoa ʻo e kau ʻōfisa māʻolunga ʻo e fonuá pea kuo nau fokotuʻu ai ke faʻu ha foʻi lao foʻou. ʻOku nau loto ke ʻai ko ha hia tautea mate ia ki ha taha pē ʻe kau ki ha lotu ʻoku ʻikai ke fakangofua ʻe he Puleʻangá.

ʻOKU ongo maheni ʻa e meʻá ni? ʻOku fonu ʻa e hisitōliá ʻi he ngaahi fakatātā ʻo e kakai naʻa nau hanga ki he laó ʻi hono faʻufaʻu ko ia ha maumau. Ko e meʻa ʻi ʻolungá naʻe hoko ia ʻi he ʻEmipaea Pēsiá ʻi he ngaahi ʻaho ʻo e palōfita ko Tanielá. Ko e Laó, ʻa ia naʻe hanga ʻe Tuʻi Talaiasi ʻo fakapāsí, naʻe tuʻutuʻuni ai: “ʻIlonga ha tangata te ne fai ha kole ki ha ʻotua pe ha tangata ʻi he tolungofuluʻi ʻaho ka hoko mai, ngata pe ki he [tuʻí], ʻe li ia ki he ʻana ʻo e fanga laione.”—Taniela 6:​7-9.

Ko e hā ʻe fai ʻe Taniela ʻi he malumalu ʻo e fakamanamana fekauʻaki mo e maté? Te ne hokohoko atu ʻene falala ki hono ʻOtuá, ʻa Sihova, pe te ne fakangaloku ʻo fai ʻa e meʻa naʻe tala ʻe he tuʻí? ʻOku tala mai kiate kitautolu ʻe he lēkōtí: “ʻI he ʻilo leva ʻe Taniela kuo silaʻi ʻa e tohi, naʻa ne ʻalu ki hono fale; (pea naʻe ai ʻi hono loki ʻi ʻolunga ʻa e ngaahi kātupa naʻe ava, ʻi he hangai ki Selusalema): pea ʻi he taimi tuʻutuʻuni, tuʻo tolu ʻi he ʻaho, naʻa ne tuʻulutui, ʻo ne lotu mo fai ʻene fakafetaʻi ʻi he ʻao ʻo hono ʻOtua, ʻo hange tofu pe ko ʻene fai ʻi he teʻeki ke hoko ʻa e meʻa.” (Taniela 6:10) ʻOku ʻilolahia ʻa e toenga ʻo e fakamatalá. Naʻe lī ʻa Taniela ki he ʻana ʻo e fanga laioné koeʻuhi ko ʻene tuí, ka naʻe hanga ʻe Sihova ʻo “tapuni ʻa e ngutu ʻo e fanga laione” pea fakahaofi ʻa ʻene sevāniti mateakí.—Hepelu 11:33; Taniela 6:​16-​22.

Taimi ki he Sivisiviʻi-Kita

ʻI he ʻahó ni, ʻoku nofo ʻa e kau sevāniti ʻa Sihová ʻi ha māmani fakafili, ʻo fehangahangai mo e ngaahi fakamanamana lahi ki heʻenau lelei fakaesinó mo fakalaumālié. Ko e fakatātaá, ʻi he mapuna anga-fakamanu hake ʻa e tāufehiʻa fakamatakalí ʻi he ngaahi fonua ʻe niʻihi, kuo tāmateʻi ai ʻa e Kau Fakamoʻoni tokolahi. ʻI he ngaahi feituʻu kehé, kuo fehangahangai ai ʻa e kau sevāniti ʻa Sihová mo e ngaahi nounou fakameʻatokoni, ngaahi faingataʻa fakaʻekonōmika, ngaahi fakatamaki fakanatula, puke lahi, pea mo e ngaahi tuʻunga fakamanamana kehe ki he moʻuí. Tānaki atu ki ai, kuo pau ke nau feangainga mo e fakatangá, ngaahi tenge mei he ngāueʻangá, pea mo e ngaahi ʻahiʻahi kehekehe ke faihalá, ʻa ia ko e kotoa ʻo e meʻá ni ʻoku fakamanamanaʻi nai ai ʻa honau tuʻunga fakalaumālié. Ko e moʻoni, ko e Fili lahí, ʻa Sētane, ʻokú ne fakapapauʻi ke fakaʻauha ʻa e kau sevāniti ʻa Sihová ʻaki ha ngaahi founga pē ʻe ngali lavameʻá.​—1 Pita 5:8.

ʻI he fehangahangai mo e ngaahi tuʻunga peheé, ko e hā ʻe lava ke tau faí? Lolotonga ʻoku fakanatula pē ke hokosia ʻa e manavahē ʻi he taimi ʻoku fakamanamanaʻi ai ʻa ʻete moʻuí, ʻoku lava ke tauhi maʻu ʻi heʻetau fakakaukaú ʻa e ngaahi lea fakapapau ʻa e ʻapositolo ko Paulá: “Kuo folofola mai [ʻa Sihova], ʻE ʻikai siʻi te u mahuʻi meiate koe, kaeʻumaʻa haʻaku momoʻi liʻaki koe. Ko ia ʻoku tau malohi ai ke lea ʻo pehe, Ko e ʻEiki ko hoku tokoni; ʻe ʻikai te u manavahe: ko e ha tu ha meʻa ʻe fai kiate au ʻe ha tangata?” (Hepelu 13:​5, 6) ʻOku lava ke tau tuipau ʻoku ongoʻi tatau pehē ʻa Sihova ʻo fekauʻaki mo ʻene kau sevāniti ʻi he ʻaho ní. Kae kehe, ko e meʻa kehe ʻa hono ʻiloʻi ʻa e talaʻofa ʻa Sihová pea ko e meʻa kehe ʻa e hoko ʻo tuipau te ne ngāue mai maʻatautolú. Ko ia ai, ʻoku mātuʻaki mahuʻinga ke tau sivisiviʻi ʻa e makatuʻunga ʻa ia ʻoku langa ai ʻa e falala kia Sihová pea tau fai ʻa e meʻa kotoa pē te tau malavá ke ʻai ke mālohi pea mo tauhi maʻu ʻa e falala ko iá. Kapau te tau fai ia, ‘ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi hotau lotó mo ʻetau ngaahi fakakaukaú ʻia Kalaisi Sisu.’ (Filipai 4:7) Pea ʻi he taimi leva ʻe hoko mai ai ʻa e ʻahiʻahí, te tau malava ai ke fakakaukau lelei pea feangainga fakapotopoto mo kinautolu.

Makatuʻunga ki he Falala kia Sihová

ʻOku tau maʻu moʻoni ʻa e ngaahi ʻuhinga lahi ke falala ai ki hotau Tokotaha-Fakatupú, ʻa Sihova. Ko e ʻuluaki meʻa ʻia kinautolú ko e moʻoniʻi meʻa ko ia ko Sihová ko ha ʻOtua ʻofa ʻa ia ʻoku tokanga moʻoni mai ki heʻene kau sevānití. ʻOku ʻi ai ʻa e ngaahi taimi taʻefaʻalaua ʻoku lēkooti ʻi he Tohitapú ʻoku fakamatala ai fekauʻaki mo e tokanga ʻofa ʻa Sihova ki heʻene kau sevānití. ʻI hono fakamatalaʻi ʻa e ngaahi feangainga ʻa Sihova mo ʻene kakai filí, ʻa ʻIsilelí, naʻe tohi ʻe Mōsese: “Naʻa ne ʻilo ia he fonua toafa, ʻi he fonua mamate mo uʻulu mo lālāfuaʻa; naʻa ne kapui ia, naʻa ne nofoʻaki lama, naʻa ne tauhi ia hange hono tamaʻimata.” (Teutalonome 32:10) ʻI onopooni, ʻoku hokohoko atu ʻa Sihova ʻi hono tokangaʻi lelei ʻa ʻene kau sevānití, fakatouʻosi ʻi he tuʻunga ko ha kulupú pea ʻi he tuʻunga tāutahá. Ko e fakatātaá, ʻi he taimi naʻe hokosia ai ʻe ha Kau Fakamoʻoni ʻa e nounou fakameʻatokoni lahi lolotonga ʻa e tau fakalotofonua ʻi Posiniá, naʻe tokangaʻi kinautolu ʻe Sihova ke nau maʻu ʻa e ngaahi tokonaki naʻe fiemaʻu lahí fakafou ʻi he feinga loto-toʻa ʻa honau fanga tokoua mei Kolōtia pea mo ʻAosituliá, ʻa ia naʻa nau tuku ʻenau moʻuí ki ha tuʻunga fakatuʻutāmaki ʻaki ʻenau fononga ʻi he feituʻu mātuʻaki fakatuʻutāmaki ke ʻave ʻa e naunau tokoni ki honau fanga tokouá.a

Koeʻuhi ko Sihova ko e ʻOtuá ʻa e Māfimafi-Aoniú, ʻokú ne malava moʻoni ke maluʻi ʻa ʻene kau sevānití ʻi he malumalu ʻo ha tuʻunga pē. (Aisea 33:22; Fakahā 4:8) Ka naʻa mo e taimi ʻoku fakaʻatā ai ʻe Sihova ʻa e niʻihi ʻo ʻene kau sevānití ke nau fakamoʻoniʻi ʻenau faitōnungá ʻo aʻu ki he maté, ʻokú ne kei fakaivia pē kinautolu mo tokoniʻi kinautolu ke tauhi maʻu ʻenau anga-tonú, ʻo fakamafeia ai kinautolu ke nau hanganaki tuʻumaʻu, fiefia, mo nonga ʻo aʻu ai pē ki he ngataʻangá. ʻOku tau lava ai ke maʻu ʻa e tuipau tatau hangē ko ia ko e tokotaha-tohi-sāmé: “Ko e huafa ʻo e ʻOtua kiate kitautolu, mo ha malohi, ko e tokoni ʻi he mamahi matuʻaki ofi. Ko ia ai, ʻe ʻikai te tau manavahe neongo ʻe liliu ʻa mamani, pea hiki ʻa e ngaahi moʻunga ki loto tahi.”—Sāme 46:​1, 2.

ʻOku toe fakahā ʻe he Tohitapú ko Sihová ko ha ʻOtua ʻo e moʻoni. ʻOku ʻuhinga ení ʻokú ne fai moʻoni maʻu pē ki heʻene ngaahi talaʻofá. Ko hono moʻoní, ʻoku fakamatalaʻi ia ʻe he Tohitapú ko ha ʻOtua ʻoku “taʻe faʻa loi.” (Taitusi 1:2) Koeʻuhi ʻoku toutou fakahaaʻi ʻe Sihova ʻa ʻene loto-lelei ke maluʻi mo fakahaofi ʻa ʻene kau sevānití, ʻoku lava ke tau fakapapauʻi fakaʻaufuli ai ʻoku ʻikai ngata pē ʻi heʻene malavá ka ʻokú ne toe mateuteu foki ke fakahoko ʻa ʻene ngaahi talaʻofá.​—Siope 42:2.

Ngaahi Founga ke ʻAi Ai ke Mālohi ʻEtau Falalá

Neongo ʻoku tau maʻu ʻa e ʻuhinga kakato ke tuku ai kia Sihova ʻetau falalá, kuo pau ke ʻoua te tau tukunoaʻi ia. ʻOku ʻuhinga ení ko e māmaní fakalūkufua ʻoku siʻi ʻenau tui ki he ʻOtuá, pea ko ha fakakaukau pehē ʻoku malava ngofua ke ne fakavaivaiʻi ʻetau falala kia Sihová. Ko ia ai, kuo pau ke tau fai ha feinga mālohi ke ʻai ke mālohi pea mo tauhi maʻu ʻa e falala ko iá. ʻOku ʻafioʻi lelei ʻe Sihova ʻa e meʻá ni, pea kuó ne tokonaki mai ʻa e ngaahi founga ʻa ia ʻe lava ai ke tau fai pehē.

ʻUluakí, kuó ne tokonaki mai ʻa ʻene Folofola tohí, ʻa e Tohitapú, ʻa ia ʻoku lēkooti ai ʻa e ngaahi ngāue maʻongoʻonga lahi naʻá ne fakahoko maʻa ʻene kau sevānití. Kiʻi fakakaukau angé, ko e hā hono lahi ʻo e falala te ke maʻu ki ha taha kapau ko e meʻa pē ʻokú ke ʻiloʻí ko hono hingoá? Ngalingali kapau ʻoku ʻi ai, ʻoku siʻisiʻi ʻaupito. ʻOku fiemaʻu ke ke ʻiloʻi ʻa ʻene ngaahi foungá mo ʻene ngaahi ngāué ke ke maʻu ai ha falala kiate ia, ʻikai ko ia? ʻI heʻetau lau mo fakalaulauloto ki he ngaahi fakamatala pehē ʻi he Tohitapú, ʻoku loloto ange ai ʻetau ʻiloʻi ʻa Sihova mo ʻene ngaahi founga fakaofó, pea tau hoko ai ʻo ʻiloʻi lahi mo lahi ange ʻa ʻene falalaʻangá. ʻOku ʻai ai ʻo mālohi ʻetau falala kiate iá. ʻOku fokotuʻu mai ʻe he tokotaha-tohi-sāmé ha faʻifaʻitakiʻanga lelei ʻaupito ʻi heʻene fai ha lotu tōtōivi ki he ʻOtuá: “Kau fakamatala ʻa e ngaahi ngaue ʻa Iaa: he ʻoku ou fie fakamanatu hoʻo fai mana talu mei muʻa. Pea u fakakaukau ki hoʻo fai kotoa pe, ʻo fakalaulauloto ki hoʻo ngaahi ngaue.”—Sāme 77:​11, 12.

Tānaki atu ki he Tohitapú, ʻoku tau maʻu ha matavai lahi ʻo e meʻakai fakalaumālié ʻi he ngaahi tohi faka-Tohitapu kuo faʻu ʻe he kautaha ʻa Sihová. Tuku kehe ʻa e ngaahi meʻa kehé, ʻoku faʻa ʻi he ngaahi tohí ni ʻa e ngaahi talanoa fakaueʻiloto fekauʻaki mo e kau sevāniti ʻa e ʻOtuá ʻi onopōní, ʻo fakahaaʻi ai ʻa e anga ʻo e malava ʻe Sihova ke tokonaki mai ʻa e tokoni mo e fakafiemālie ʻi he taimi naʻa nau fetaulaki ai mo e ngaahi tuʻunga faingatāmakí. Ko e fakatātaá, ko Martin Poetzinger, ʻa ia naʻe hoko ki mui ko ha mēmipa ʻo e Kulupu Pule ʻa e Kau Fakamoʻoni ʻa Sihová, naʻá ne hoko ʻo puke lahi lolotonga ʻa ʻene ngāue ko ha tāimuʻa ʻi he ngaahi feituʻu ʻo ʻIulopé ʻo mamaʻo mei hono fonua tupuʻangá. Naʻe ʻikai haʻane paʻanga, pea naʻe ʻikai loto ha toketā ke sio kiate ia. Ka naʻe ʻikai ke liʻaki ia ʻe Sihova. Faifai atu pē, naʻe fai ʻa e fetuʻutaki ki he tokotaha talatala māʻolunga ʻo e falemahaki fakalotofonuá. Koeʻuhi ko ha tokotaha tui mālohi ia ki he Tohitapú, naʻe tokangaʻi ʻe he tangata anga-ʻofa ko ení ʻa Tokoua Poetzinger ʻo hangē haʻane fai ki hano fohá, ʻo ne fai ia taʻetotongi. Ko hono lau ʻa e ngaahi talanoa fakafoʻituitui peheé ʻoku lava moʻoni ke ne ʻai ke mālohi ʻetau falala ki heʻetau Tamai fakahēvaní.

Ko ha tokoni taʻehanotatau ʻe taha ʻoku tokonaki mai ʻe Sihova ke ʻai ke mālohi ʻetau falala kiate iá ko e monū mahuʻinga ʻo e lotú. ʻOku tala anga-ʻofa mai ʻe he ʻapositolo ko Paulá kiate kitautolu: “Neongo pe ko e ha ʻa e meʻa, ʻoua te mou lotomoʻua ai; ka ʻi he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi.” (Filipai 4:6) Ko e “meʻa kotoa” ʻoku lava ke kau ai ʻetau ngaahi ongoʻí, ngaahi fiemaʻú, ngaahi manavaheé, mo e ngaahi loto-moʻuá. Ko e lahi ange hono toutou fai pea mo e fakamātoato ʻa ʻetau ngaahi lotú, ko e mālohi ange ia ʻetau falala kia Sihová.

ʻI he taimi naʻe ʻi māmani ai ʻa Sīsū Kalaisí, naʻá ne ʻalu ʻi he taimi ʻe niʻihi ki ha feituʻu lōngonoa ʻiate ia pē ke lotu ai ʻo ʻikai fakahohaʻasi. (Mātiu 14:23; Maake 1:​35) Ki muʻa ʻi hono fai ha ngaahi fili mahuʻingá, naʻe aʻu ʻo ne fakamoleki ʻa e poó kotoa ʻi he lotu ki heʻene Tamaí. (Luke 6:​12, 13) ʻOku ʻikai ha ofo ʻi he mātuʻaki mālohi ʻa e falala ʻa Sīsū kia Sihová ʻo ne malava ai ke kātekina ʻa e ʻahiʻahi fakalilifu taha kuo hoko ki ha taha. Ko ʻene ngaahi lea fakaʻosi ʻi he ʻakau fakamamahí naʻe pehē: “ʻE Tamai, ʻoku ou tuku hoku laumalie ki ho nima.” Ko e kupuʻi lea ko ia ʻo e falalá naʻe fakahāhā ai naʻe ʻikai hōloa ʻa ʻene falala ki heʻene Tamaí ʻo aʻu pē ki he ngataʻangá, neongo naʻe ʻikai ke kau mai ʻa Sihova ke fakahaofi ia.—Luke 23:46.

Ko e toe founga ʻe taha ke langa hake ai ʻetau falala kia Sihová ko e feohi tuʻumaʻu mo e faʻahinga ʻoku nau falala ʻaufuatō kiate iá. Naʻe fekauʻi ʻe Sihova ʻa hono kakaí ke nau fakatahataha maʻu pē ke ako lahi ange ai fekauʻaki mo ia pea ke nau fefakalototoʻaʻaki ai. (Teutalonome 31:12; Hepelu 10:​24, 25) Ko e feohi peheé naʻe ʻai ai ke mālohi ʻenau falala kia Sihová, ʻo ʻai ai ke nau malava ʻo kātekina ʻa e ngaahi ʻahiʻahi fefeka ʻo e tuí. ʻI ha fonua ʻAfilika ʻa ia naʻe tapui ai ʻa e ngāue fakamalangá, naʻe fakataleʻi ai ʻa e Kau Fakamoʻoni ʻa Sihová mei he maluʻi fakapolisí, ngaahi pepa folaú, ngaahi tohi malí, faitoʻo fakafalemahakí, mo e maʻu ngāué. ʻI he taimi naʻe mapuna hake ai ha tau fakalotofonua ʻi ha feituʻu ʻe taha, ko e kau mēmipa ʻe toko 39, kau ai ʻa e fānaú, ʻi ha fakatahaʻanga ofi mai ʻa ia naʻa nau nofo ʻo feʻunga nai mo e māhina ʻe fā ʻi ha lalo halafakakavakava māʻulalo ʻi he toafá koeʻuhi ke nau hao mei he laku pomu ʻi honau koló. ʻI he malumalu ʻo e faingataʻa lahi peheé, ko ʻenau fetalanoaʻaki fakaʻaho fekauʻaki mo ha konga Tohitapú pea mo e ngaahi fakataha kehé naʻe ʻoange ai kiate kinautolu ʻa e mālohi lahi. Ko ia naʻa nau malava ai ke kātekina ʻa e tuʻunga mātuʻaki faingataʻa ko iá ʻo ʻikai uesia honau tuʻunga fakalaumālié. ʻOku fakahaaʻi mahino ʻi he meʻa ko eni naʻe hokosiá ʻa e mahuʻinga ʻo e fakataha maʻu pē mo e kakai ʻa Sihová.

Fakaʻosí, ke ʻai ke mālohi ʻetau falala kia Sihová, kuo pau ke tau hanganaki longomoʻui ʻi he ngāue malangaʻi ʻo e Puleʻangá, ʻo mateuteu maʻu pē ke vahevahe atu ʻa e ongoongo leleí ki he niʻihi kehé. Naʻe fakahāhā eni ʻe he meʻa fakaueʻiloto naʻe hokosia ʻe ha tokotaha malanga kei siʻi ʻi Kānata ʻa ia naʻe puke ʻi he kanisā totó ʻo ʻikai toe ʻi ai ha ʻamanaki. Neongo ʻa ʻene puke lahí, naʻá ne loto ke ne hoko ko ha tāimuʻa tuʻumaʻu, ʻa ia ko ha faifekau taimi-kakato. Lolotonga ha tuʻu taimi nounou ʻa ʻene puké, naʻá ne moʻuilelei feʻunga ai ke fakamoleki ha māhina ʻe taha ʻi he ngāue fakafaifekaú ko ha tāimuʻa tokoni. Naʻe faai leva ki he kovi ange ʻa hono tuʻungá, pea naʻá ne mate ʻi ha ngaahi māhina siʻi ki mui ai. Neongo ia, naʻá ne kei mālohi fakalaumālie ai pē ʻo aʻu ki he ngataʻangá, naʻe ʻikai ʻaupito vaivai ʻi ha mōmeniti ʻa ʻene falala kia Sihová. ʻOku manatu ʻa ʻene faʻeé: “ʻI he aʻu ki he ngataʻangá, naʻá ne tokanga lahi ange fekauʻaki mo e niʻihi kehé ʻi he fekauʻaki mo iá tonu. Naʻá ne fakalotolahiʻi kinautolu ke nau ako ʻa e Tohitapú, ʻi heʻene tala ange kiate kinautolu, ‘Te tau fakataha ʻi Palataisi.’”

Fakamoʻoniʻi ʻEtau Falala kia Sihová

“He hangeā ʻoku mate ʻa e sino ʻo ka mavahe mei he laumalie, pehe foki ʻoku mate ʻa e tui ʻo ka mavahe mo e ngaue.” (Semisi 2:26) Ko e meʻa naʻe leaʻaki ʻe Sēmisi fekauʻaki mo e tui ki he ʻOtuá ʻe toe lava pē ke leaʻaki fekauʻaki mo ʻetau falala kiate Iá. Tatau ai pē pe ko e hā hono lahi ʻo ʻetau leaʻaki ʻoku tau falala ki he ʻOtuá, ʻoku taʻeʻuhinga ia kae ʻoua kuo tau fakahāhā ʻa e tui ko iá ʻaki ʻetau ngaahi ngāué. Naʻe falala taʻetoeveiveiua ʻa ʻĒpalahame kia Sihova pea fakamoʻoniʻi ʻa e falala ko iá ʻaki ʻa e talangofua taʻetoefehuʻia ki heʻene ngaahi fekaú, naʻa mo e aʻu ki he tuʻunga ʻo ʻene mateuteu ke feilaulauʻi ʻa hono foha, ko ʻAisaké. Koeʻuhi ko e falala tuʻu-ki-muʻa mo e talangofua peheé, naʻe hoko ai ʻa ʻĒpalahame ʻo ʻiloa ko e kaumeʻa ʻo Sihova.​—Hepelu 11:​8-​10, 17-​19; Semisi 2:​23.

ʻOku ʻikai fiemaʻu ia ke tau tatali ki ha ʻahiʻahi mamafa ke hoko mai kiate kitautolu ki muʻa ke tau fakahaaʻi ʻetau falala kia Sihová. Naʻe tala ʻe Sīsū ki heʻene kau ākongá: “Ko ia oku agatonu i he mea jii, oku agatonu foki ia i he mea lahi; bea ko ia oku taeagatonu i he mea jii, oku taeagatonu ia i he mea lahi.” (Luke 16:​10, PM) ʻOku totonu ke tau ako ke falala kia Sihova ʻi he kotoa ʻo ʻetau ngaahi ngāue fakaʻahó, ʻo talangofua kiate ia ʻo aʻu ki he ngaahi meʻa nai ʻoku hā ngali taʻemahuʻingá. ʻI he taimi ʻoku tau sio ai ki he ngaahi ʻaonga ʻoku hoko mai ʻi he talangofua peheé, ʻoku ʻai ai ʻo mālohi ʻetau falala ki heʻetau Tamai fakahēvaní, ʻo fakamafeia ai kitautolu ke tau fehangahangai mo e ngaahi ʻahiʻahi lalahi mo ikuʻingataʻa angé.

ʻI he fakaofiofi atu ʻa e māmaní ki hono ngataʻanga fakalilifú, ʻoku pau ʻe hokosia ʻe he kakai ʻa Sihová ʻa e ngaahi ʻahiʻahi mo e ngaahi fakatuʻutāmaki lahi ange. (Ngāue 14:22; 2 Timote 3:​12) ʻI hono langa hake ʻa e falala mālohi mo taʻetoeveiveiua kia Sihova ʻi he taimi ní, ʻe lava ke tau fakatuʻotuʻa ai ki ha hao atu ki heʻene māmani foʻou naʻe talaʻofá—pe ko e hao moʻui atu ʻi he mamahi lahí pe ko e maʻu ha toetuʻu. (2 Pita 3:​13) ʻOfa ke ʻoua ʻaupito te tau fakaʻatā ha taʻefalala ʻi heʻetau tafaʻakí ke ne maumauʻi hotau vahaʻangatae mahuʻinga mo Sihová. Pea, ko e meʻa leva naʻe leaʻaki ʻe Taniela hili hono fakahaofi mei he ʻana ʻo e fanga laioné ʻe toe lava ke leaʻaki ia fekauʻaki mo kitautolu: “Nae ikai ilo ha lavea jii iate ia, koeuhi naa ne [falala] ki hono Otua.”—Taniela 6:​23, PM.

[Fakamatala ʻi lalo]

[Fakatātā ʻi he peesi 9]

Ko hono lau ʻa e ngaahi fakamatala fekauʻaki mo e kau sevāniti loto-tōnunga ʻa Sihová, hangē ko Martin Poetzinger, ʻoku fakatuimālohi