ʻOku Teuteu ʻe Sihova ʻa e Halá

“Pea ʻe ʻoua ke fanongonongo . . . ʻa e ongoongolelei ko eni ʻo e puleʻanga.”​—MĀTIU 24:14.

 1. Ko e hā kuo fakahoko ʻe he ngāue fakamalangá fakatouʻosi ʻi he ʻuluaki senitulí mo e senituli hono 20?

KOEʻUHI ko Sihová ko ha ʻOtua ia ʻo e ʻofa, ko hono finangaló ia ke “maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Timote 2:4) Kuo fiemaʻu ki he meʻá ni ha malanga mo ha feingangāue fakafaiako fakavahaʻapuleʻanga. ʻI he ʻuluaki senitulí, naʻe ʻai ʻe he malangá ni ʻa e fakatahaʻanga Kalisitiané ke hoko “ko e pou mo e tuʻunga ʻo e Moʻoni.” (1 Timote 3:​15) Hili iá naʻe hoko mai ha vahaʻa taimi lōloa ʻo e tafoki mei he moʻoní ʻa ia naʻe hoko ai ʻa e maama ʻo e moʻoní ʻo poipoila. ʻI he ngaahi taimi ki mui ní, lolotonga ʻa e “taimi fakamui,” kuo toe hoko ai ʻa e “ʻilo” ʻo fakautuutu, ʻo ʻomai ai ha ʻamanaki makatuʻunga ʻi he Tohitapú ʻo e fakamoʻui taʻengata ki he laui miliona.​—Taniela 12:4.

 2. Ko e hā kuo fai ʻe Sihova ʻi he felāveʻi mo e ngāue fakamalangá?

² Neongo ʻa e ngaahi feinga mālohi ʻa Sētane ke fakafepakiʻi ʻa e taumuʻa ʻa e ʻOtuá, ko e ngāue fakamalangá fakatouʻosi ʻi he ʻuluaki senitulí pea mo e senituli hono 20 kuo fetaulaki ia mo ha lavameʻa fakaofo. ʻOkú ne fakamanatu mai ʻa e kikite ʻa ʻAiseá. Fekauʻaki mo e toe foki ʻa e kau Siu fakahēʻí ki Siuta ʻi he senituli hono ono K.M., naʻe tohi ʻa ʻAisea: “ʻIlonga ha teleʻa pea ʻe tanu, pea ko e moʻunga mo e tafungofunga ʻe holoki: pea ʻe liliu ʻa e hangatamaki ke tokamalie, mo e koto makatuʻu ke lautoka.” (Aisea 40:4) Kuo toe teuteu ʻe Sihova mo fakatokaleleiʻi ʻa e halá ki he ongo feingangāue fakamalanga lahi fakatouʻosi ʻi he ʻuluaki senitulí pea mo e senituli hono 20.

 3. ʻI he ngaahi founga fē ʻoku malava ai ʻa Sihova ke fakahoko ʻa ʻene ngaahi taumuʻá?

³ ʻOku ʻikai ke ʻuhinga eni ia ne tākiekina fakahangatonu ʻe Sihova ʻa e ngāue kotoa pē ʻi he foʻi māmaní koeʻuhi ke laka ki muʻa ʻa hono malangaʻi ʻo e ongoongo leleí; pea ʻoku ʻikai ke ʻuhinga ia ʻoku ngāueʻaki ʻe Sihova ʻa ʻene tomuʻa ʻafioʻí ke ʻiloʻi ʻa e fakaikiiki tonu matematē ʻo e meʻa kotoa pē ʻe hokó. Ko hono moʻoní, ʻokú ne malava fakatouʻosi ke tomuʻa ʻafioʻi pea ke fakafuo ʻa e ngaahi meʻa ʻe hoko ʻi he kahaʻú. (Aisea 46:​9-​11) Ka ʻokú ne toe malava ke fai ha tali ki he ngaahi meʻa ʻoku hokó ʻi heʻenau hā mahinó. ʻOku tataki ʻe Sihova ʻa ʻene kakaí, ʻo hangē ha tauhi-sipi taukei ʻokú ne ʻiloʻi fakatouʻosi ʻa e founga ke tataki pea mo e founga ke maluʻiʻaki ʻa ʻene tākangá. ʻOkú ne taki kinautolu ki he fakamoʻuí, maluʻi ʻa honau tuʻunga fakalaumālié mo ueʻi kinautolu ke ngāueʻaongaʻaki ʻa e ngaahi tuʻunga mo e ngaahi meʻa ʻoku hoko ʻa ia ʻokú ne poupouʻi ʻa hono malangaʻi lavameʻa ʻo e ongoongo leleí ʻi māmani lahí.​—Sāme 23:​1-4.

Ko ha Vāhenga-Ngāue Faingataʻa

4, 5. Ko e hā kuo hoko ai ko ha pole ʻa e vāhenga-ngāue ko hono malangaʻi ʻo e ongoongo leleí?

⁴ Hangē ko hono langa ko ia ʻo e ʻaʻaké ʻi he ʻaho ʻo Noá, kuo hoko ʻa e ngāue ʻo e malangaʻi ʻo e Puleʻangá ko ha fuʻu ngāue lahi​—fakatouʻosi ʻi he ʻuluaki senitulí pea ʻi onopooni. Ko e fatongia ʻo e aʻu ki he kakai kotoa pē mo ha pōpoakí ʻoku faingataʻa feʻunga, ka ko e fatongiá ni naʻe tautefito ʻa ʻene hoko ko e polé. ʻI he ʻuluaki senitulí, naʻe kiʻi tokosiʻi pē ʻa e kau ākongá. Ko honau Takí, ʻa Sīsū, ne tautea mate ia ʻo taku ko ha tokotaha angatuʻu. Naʻe fokotuʻu lelei ʻa e lotu faka-Siú. Naʻe tuʻu ha temipale fisifisimuʻa ʻi Selusalema. Naʻe toe fokotuʻu lelei mo e ngaahi lotu ʻikai faka-Siu ʻi he feituʻu Metiteleniané, mo honau ngaahi temipale mo e ngaahi tuʻunga taulaʻeiki. ʻI he tuʻunga meimei tatau, ʻi he kamata ʻa e “taimi fakamui” ʻi he 1914, naʻe tokosiʻi ʻa e kau Kalisitiane paní, pea ko e kau muimui ki he ngaahi lotu kehe naʻa nau taukaveʻi naʻa nau tauhi ki he ʻOtuá naʻe tokolahi.​—Taniela 12:9.

⁵ Naʻe fakatokanga ʻa Sīsū ki hono kau muimuí ʻe fakatangaʻi kinautolu. Naʻá ne pehē: “Te nau tukuange kimoutolu ki he fakamamahi, pea te nau tamateʻi kimoutolu: pea te mou fehiʻanekina ʻe he ngāhi kakai kehekehe, ko e meʻa ʻi he hingoa oʻoku.” (Mātiu 24:9) Tānaki atu ki he ngaahi palopalema peheé, tautefito ʻi he “kuonga fakamui,” ʻe ʻiloʻi ʻe he kau Kalisitiané ʻoku nau ʻi he lotolotonga ʻo e “ngaahi taimi faingataʻa.” (2 Timote 3:1) Ko e lahi ʻo e ngāué, ko e pau ʻa e fakatangá, pea mo e faingataʻa ʻo e taimí kuo nau ʻai ʻa e ngāue ʻo e malangá ko ha pole pea faingataʻa. Kuo hoko ʻo fiemaʻu ʻa e tui lahi.

 6. Ko e hā ʻa e fakapapau ʻo e lavameʻá naʻe ʻoange ʻe Sihova ki hono kakaí?

⁶ Lolotonga ʻoku ʻafioʻi ʻe Sihova ʻe ʻi ai ʻa e ngaahi faingataʻá, naʻá ne toe ʻafioʻi ʻe ʻikai ha meʻa te ne taʻofi ʻa e ngāué. Naʻe tomuʻa tala ʻa e lavameʻá ʻi ha kikite ʻiloa kuo fakahoko mahuʻinga fakatouʻosi ʻi he ʻuluaki senitulí mo e senituli hono 20: “Pea ʻe ʻoua ke fanongonongo ki mamani katoa ʻa e ongoongolelei ko eni ʻo e puleʻanga.”​—Mātiu 24:14, fakaʻītali ʻamautolu.

 7. Naʻe lahi fēfē ʻa e ngāue fakamalangá ʻi he ʻuluaki senitulí?

⁷ ʻI hono fakafonu ʻe he tuí mo e laumālie māʻoniʻoní, ko e kau sevāniti ʻa e ʻOtuá ʻi he ʻuluaki senitulí naʻa nau ʻalu atu ke fakahoko ʻa e ngāue kuo vaheʻi kiate kinautolú. Koeʻuhi ʻoku fakamoʻoniʻi naʻe ʻiate kinautolu ʻa Sihova, naʻa nau maʻu ai ʻa e lavameʻa naʻe laka mamaʻo atu ia ʻi he meʻa naʻa nau ʻamanaki nai ki aí. ʻI he aʻu mai ki he taimi naʻe tohi ai ʻa Paula ki he kau Kolosé, ko e taʻu nai ʻe 27 ʻi he hili ʻa e pekia ʻa Sīsuú, naʻe lava ke ne lea ai fekauʻaki mo e ongoongo leleí naʻe “malangaʻaki ki he meʻa moʻui kotoa pe ʻi he lalo langi.” (Kolose 1:​23) ʻI he tuʻunga meimei tatau, ʻi he aʻu mai ki he fakaʻosiʻosi ʻo e senituli hono 20, kuo malangaʻaki ʻa e ongoongo leleí ʻi he ngaahi fonua ʻe 233.

 8. ʻI he malumalu ʻo e ngaahi tuʻunga fēfē kuo koloaʻaki ai ʻe he tokolahi ʻa e ongoongo leleí? ʻOmai ha ngaahi fakatātā.

⁸ Kuo koloaʻaki ʻe he laui miliona ʻa e ongoongo leleí ʻi he ngaahi hongofuluʻi taʻu ki muí ni maí. Kuo fai ia ʻe he tokolahi ʻi he ngaahi tuʻunga faingatāmaki​—lolotonga ʻa e ngaahi vahaʻa taimi ʻo e taú, fakataputapuí, mo e fakatanga lahí. Naʻe toe pehē foki ʻi he ʻuluaki senitulí. ʻI he taimi ʻe taha, naʻe tā anga-fakamanu ai ʻa Paula mo Sailosi ʻaki ʻa e ngaahi vaʻakau pea lī ki he pilīsoné. He tuʻunga moʻoni ia ʻoku taʻengali ke hoko ʻi he ngaohi-ākongá! Ka, naʻe ngāueʻaki ʻe Sihova ʻa e tuʻungá ke fai ʻa e meʻa tofu pē ko iá. Naʻe tukuange ʻa Paula mo Sailosi, pea ko e selá fakataha mo hono fāmilí naʻa nau hoko ko e kau tui. (Ngāue 16:​19-​33) Ko e ngaahi meʻa pehē ne hokosiá ʻoku fakahaaʻi ai ʻe ʻikai lava ke fakalongolongoʻi ʻa e ongoongo leleí ʻe he faʻahinga ko ia ʻoku nau fakafepaki ki aí. (Aisea 54:17) Neongo ia, ko e hisitōlia ʻo e lotu faka-Kalisitiané ʻoku ʻikai ko ha hisitōlia ia ʻo e fakafili mo e fakatanga mālohi. Tau hanga angé he taimí ni ki he ngaahi meʻa lelei naʻe hoko ʻa ia ne tokoni ia ki hono fakatokalelei ʻa e hala ki hono malangaʻi lavameʻa ʻo e ongoongo leleí fakatouʻosi ʻi he ʻuluaki senitulí pea mo e senituli hono 20.

ʻĀtakai Fakalotú

9, 10. Naʻe anga-fēfē hono fakatupu ʻe Sihova ʻa e ʻamanaki ki hono malangaʻi ʻo e ongoongo leleí ʻi he ʻuluaki senitulí mo e senituli hono 20?

⁹ Fakakaukau atu ki hono taimiʻi ʻo e ongo feingangāue fakamalanga ʻi he foʻi kolopé. Fekauʻaki mo e ʻātakai ʻi he ʻuluaki senitulí, ko e kikite fekauʻaki mo e uike ʻe 70 ʻo e ngaahi taʻú, ʻoku maʻu ʻi he Taniela 9:​24-​27, ʻokú ne fakapapauʻi ʻa e taʻu naʻe pau ke hā ai ʻa e Mīsaiá​—ko e 29 T.S. Neongo naʻe ʻikai mahino ki he kau Siu ʻo e ʻuluaki senitulí ʻa e taimi tonu matematē ʻo e ngaahi meʻá, naʻa nau ʻamanaki ki ai, ʻo tatali ki he Mīsaiá. (Luke 3:​15) ʻOku pehē ʻe he Manuel Biblique Falaniseé: “Naʻe ʻiloʻi ʻe he kakaí ko e uike ʻe 70 ʻo e ngaahi taʻu naʻe fokotuʻu ʻe Tanielá naʻe ofi ke ʻosi ia; ne ʻikai ofo ha taha ʻi he fanongo ki hono fanongonongo ʻe Sione Papitaiso kuo ofi ʻa e Puleʻanga ʻo e ʻOtuá.”

¹⁰ Fēfē ʻa e ʻātakai ʻi onopōní? Sai ko ha meʻa tuʻu-ki-muʻa naʻe hoko ko hono fakanofo tuʻi ko ia ʻo Sīsū ʻi hēvaní, ʻa ia naʻá ne fakaʻilongaʻi ʻa e kamataʻanga ʻo ʻene ʻi ai ʻi he mafai ʻo e Puleʻangá. ʻOku fakahaaʻi ʻe he kikite ʻa e Tohitapú naʻe hoko eni ʻi he 1914. (Taniela 4:​13-​17) Ko e fakatuʻotuʻa ki he meʻa ko eni naʻe hokó naʻá ne toe fakatupunga ʻa e ngaahi kakai lotu ʻe niʻihi ʻi onopooni ke nau fonu ʻamanaki. Naʻe toe hā mahino ʻa e ʻamanakí ʻi he haoʻohaʻonga ʻo e kau Ako Tohitapu loto-moʻoni ko ia naʻa nau kamata ke pulusi ʻa e makasini ko ení ʻi he 1879 ko e Zion’s Watch Tower and Herald of Christ’s Presence. Ko ia ai, fakatouʻosi ʻi he ʻuluaki senitulí pea ʻi onopooni, naʻe teuteu ʻe he ngaahi ʻamanaki fakalotú ʻa e ʻātakai ki hono malangaʻi ʻa e ongoongo leleí.a

11. Ko e hā ʻa e ngaahi makatuʻunga fakalotu naʻe fakatoka ke tokoni ki hono malangaʻi ʻo e ongoongo leleí?

¹¹ Ko e toe meʻa tefito ʻe taha naʻá ne tokoniʻi ʻa e ngāue ʻa e kau Kalisitiané fakatouʻosi ʻi he ongo kuongá ko e maheni ko ia ʻa e kakai tokolahi mo e ngaahi Konga Tohitapu Toputapú. ʻI he ʻuluaki senitulí, naʻe movete holo ʻa e ngaahi feituʻu faka-Siú ʻi he kotoa ʻo e ngaahi puleʻanga Senitaile takatakaí. Ko e ngaahi feituʻu ko iá naʻe ʻi ai ʻa e ngaahi sinakoke ʻa ia naʻe fakataha maʻu pē ai ʻa e kakaí ke fanongo ki hono lau mo e lāulea ʻi he ngaahi Konga Tohitapú. Ko ia ai, naʻe malava ʻa e muʻaki kau Kalisitiané ke langa hake ʻi he ʻilo fakalotu ne ʻosi maʻu ʻe he kakaí. (Ngāue 8:​28-​36; 17:​1, 2) Ki muʻa ʻi hotau kuongá, naʻe fiefia ai ʻa e kakai ʻa Sihová ʻi ha ʻātakai meimei tatau ʻi he ngaahi fonua lahi. Naʻe ala maʻu lahi ʻa e Tohitapú ʻi he kotoa ʻo e nofoʻanga ʻo Puleʻanga-Haʻa-Kalisitiané, tautefito ʻi he ngaahi fonua Palotisaní. Naʻe lau ia ʻi he ngaahi siasi lahi; ʻo maʻu ʻe he laui miliona ha tatau. Ne ʻosi ʻi he nima ʻo e kakaí ʻa e Tohitapú, ka naʻa nau fiemaʻu ʻa e tokoni ke mahinoʻi ʻa e meʻa naʻa nau maʻú.

Ko e Ngaahi ʻAonga ʻo e Laó

12. Naʻe anga-fēfē ʻa e faʻa hoko ʻa e lao faka-Lomá ko ha maluʻi ia ʻi he ʻuluaki senitulí?

¹² Kuo faʻa maʻu ʻaonga ʻa e malanga ʻa e Kalisitiané mei he lao fakapuleʻangá. Naʻe puleʻi ʻe he ʻEmipaea Lomá ʻa e māmani ʻo e ʻuluaki senitulí, pea ko ʻene ngaahi lao kuo hikí naʻe ʻi ai ʻene tākiekina lahi ʻa e moʻui fakaʻahó. Naʻe tokonaki mai ʻi he ngaahi laó ni ʻa e ngaahi maluʻi, pea naʻe maʻu ʻaonga ʻa e muʻaki kau Kalisitiané meiate kinautolu. Ko e fakatātaá, ko e tangi ʻa Paula ki he lao ʻa Lomá naʻe iku ai ki hono tukuange ia mei pilīsone pea fakahaofi ia mei hono hahá. (Ngāue 16:​37-​39; 22:​25, 29) Ko e lave ki he tokonaki ʻo e fokotuʻutuʻu fakaelao ʻa Lomá naʻe tokoni ia ke fakanonga hifo ai ha fuʻu kau ʻita tokolahi ʻi ʻEfesō. (Ngāue 19:​35-​41) ʻI he taimi ʻe taha, naʻe fakahaofi ai ʻa Paula mei ha fakamālohi ʻi Selusalema koeʻuhi he ko ha tangataʻifonua Loma ia. (Ngāue 23:27) Ki mui ai, naʻe fakaʻatā ia ʻe he lao faka-Lomá ke ne fai hano taukapoʻi fakalao ʻo ʻene tuí ʻi he ʻao ʻo Sisá. (Ngāue 25:11) Neongo naʻe pule ʻa e kau Sisa ʻe niʻihi ko e faʻahinga anga-kakaha, ko e ngaahi lao ʻi he ʻuluaki senitulí naʻá ne faʻa fakaʻatā ʻa hono “taukapoʻi mo poupou [fakalao] ʻa e Kosipeli.”​—Filipai 1:7.

13. Kuo anga-fēfē ʻa e faʻa maʻu ʻaonga ʻa e ngāue fakamalanga ʻi hotau taimí mei he laó?

¹³ ʻOku hoko moʻoni ʻa e meʻa tatau ʻi he ngaahi fonua lahi ʻi he ʻahó ni. Neongo kuo ʻi ai ʻa e faʻahinga naʻa nau “faʻu lao fakamamahi,” ko e ngaahi lao kuo hiki ʻi he lahi taha ʻo e ngaahi fonuá ʻoku tokanga ai ki he tauʻatāina ʻo e lotú ko ha totonu tefito ia. (Sāme 94:20) ʻI hono ʻiloʻi ʻoku ʻikai ke fai ʻe he Kau Fakamoʻoni ʻa Sihová ha fakamanamana ki he maau fakasōsialé, kuo tuku mai ai kiate kitautolu ʻe he ngaahi founga-pule lahi ʻa ʻetau totonu fakalaó. ʻI he ʻIunaite Seteté, ʻa ia ko e lahi ʻo e pulusi tohi ʻa e Kau Fakamoʻoní kuo fai mei aí, ko e ngaahi lao ʻoku ʻi aí kuo ʻai ai ke malava ʻo faʻu hokohoko ʻa e makasini Taua Leʻo ʻi he taʻu ʻe 120 pea ke lau ia ʻi māmani lahi.

Ngaahi Vahaʻa Taimi ʻo e Melino mo e Kātaki

14, 15. Naʻe anga-fēfē ʻa e ʻaonga ʻa e tuʻumaʻu ʻi he tuʻunga fakasōsialé ki he ngāue fakamalanga ʻi he ʻuluaki senitulí?

¹⁴ Kuo toe maʻu ʻaonga ʻa e ngāue fakamalangá mei he ngaahi vahaʻa taimi ʻo e tuʻunga melino. Neongo naʻe tomuʻa tala totonu ʻe Sīsū ko e taimi ʻoku kau ki aí “ʻe tuʻu ha kakai ki ha kakai,” naʻe ʻi ai ʻa e ngaahi vahaʻa taimi ʻo e tuʻumaʻu ʻa ia naʻá ne ʻai ai ke malava ʻa hono malangaʻi lahi ʻo e Puleʻangá. (Mātiu 24:7) Naʻe nofo ʻa e kau Kalisitiane ʻi he ʻuluaki senitulí ʻi he malumalu ʻo e Pax Romana, pe Melino faka-Lomá. Naʻe tohi ha faihisitōlia ʻe taha: “Naʻe mātuʻaki ikunaʻi fakaʻaufuli ʻe Loma ʻa e kakai ʻo e māmani Metiteleniané ʻo ne fakangata ai maʻanautolu ʻa e ngaahi kuonga ʻo e meimei tau hokohoko.” Ko e tuʻumaʻu ko ení naʻá ne fakaava ai ʻa e hala ki he muʻaki kau Kalisitiané ke nau fononga ʻi he tuʻunga malu ʻi he kotoa ʻo e māmani Lomá.

¹⁵ Naʻe feinga ʻa e ʻEmipaea Lomá ke fakafāʻūtahaʻi ʻa e kakaí ʻi he malumalu ʻo hono toʻukupu mālohí. Ko e founga ko ení naʻá ne tokoniʻi ʻo ʻikai ngata pē ʻi he fefonongaʻakí, kātakí, pea mo e fetongi ʻo e ngaahi fakakaukaú kae toe pehē ki he foʻi fakakaukau ʻo e fetokouaʻaki fakavahaʻapuleʻangá. ʻOku pehē ʻe he tohi On the Road to Civilization: “Ko e fāʻūtaha ʻo e ʻEmipaea [Lomá] naʻá ne ʻai ʻa e malaʻe [ki he malanga faka-Kalisitiané] ko ha meʻa lelei. Naʻe holoki hifo ai ʻa e ngaahi ʻā vahevahe fakapuleʻangá. Ko ha tangataʻifonua Loma naʻe hoko ia ko ha tangataʻifonua ʻo e māmaní. . . . ʻIkai ko ia pē, ko ha lotu naʻá ne akoʻi ʻa e fetokouaʻaki ʻa e tangatá naʻe lava ke mahinoʻi ia ko ha kautaha ʻa ia kuó ne fakatupulekina ʻa e foʻi fakakaukau ʻo e tangataʻifonua fakalūkufuá.”​—Fakafehoanaki mo Ngāue 10:​34, 35; 1 Pita 2:​17.

16, 17. Ko e hā kuó ne ueʻi ʻa e ngaahi feinga ke tokoni ki he melinó ʻi onopooni, pea ko e hā ʻa e fakamulituku kuo aʻu ki ai ʻa e kakai tokolahi?

¹⁶ Fēfē hotau taimí? Kuo mātā ʻe he senituli hono 20 ʻa e ngaahi tau fakaefakaʻauha lahi taha ʻi he hisitōliá, pea ʻoku hokohoko atu ʻa e fakamoveuveu ʻa e ngaahi tau fakalotofonuá ʻi he ngaahi fonua ʻe niʻihi. (Fakahā 6:4) Neongo ia, kuo ʻi ai foki mo e ngaahi vahaʻa taimi ʻo e tuʻunga melino. Ko e ngaahi mafai lalahi taha ʻo e māmaní kuo teʻeki ke nau fetauʻaki ʻi ha tau lahi ʻo laka hake ʻi he taʻu ʻe 50. Kuo tokoni lahi ʻa e tuʻungá ni ki hono malangaʻi ʻo e ongoongo leleí ʻi he ngaahi fonua ko iá.

¹⁷ Ko e ngaahi tuʻunga fakamanavahē ʻo e tau ʻi he senituli hono 20 kuo taki atu ai ʻa e kakai tokolahi ke nau lāuʻilo ki he fiemaʻu ʻo ha founga-pule ki he māmaní. Ko e manavahē ki he tau ʻa e māmaní naʻe taki atu ai ki hono faʻu fakatouʻosi ʻo e Kautaha ʻa e Ngaahi Puleʻangá pea mo e Ngaahi Puleʻanga Fakatahatahá. (Fakahā 13:14) Ko ha taumuʻa kuo fakahā ʻe he ongo kautahá fakatouʻosi ko hono tokoniʻi ʻo e fāitaha pea mo e melino fakavahaʻapuleʻangá. Ko e kakai ʻoku nau lāuʻilo ki he fiemaʻu peheé ʻoku nau faʻa tali lelei ʻa e ongoongo lelei fekauʻaki mo ha founga-pule ki he māmaní ʻa ia te ne ʻomai ʻa e melino moʻoni mo tuʻuloá​—ko e Puleʻanga ʻo e ʻOtuá.

18. Ko e hā ʻa e fakakaukau ki he lotú kuo lelei ki he ngāue fakamalangá?

¹⁸ Neongo kuo fakatangaʻi lahi ʻa e kau Kalisitiané ʻi ha ngaahi taimi, kuo mātā fakatouʻosi ʻe he ʻuluaki senitulí mo e senituli hono 20 ʻa e ngaahi vahaʻa taimi ʻo e kātaki fakalotu. (Sione 15:20; Ngāue 9:​31) Naʻe ohi tauʻatāina pea feʻunuʻaki ʻa e kau Lomá ki he ngaahi ʻotua mo e ngaahi ʻotua fefine ʻo e kakai naʻa nau ikunaʻí. Naʻe tohi ʻe Palōfesa Rodney Stark: “ʻI he ngaahi tafaʻaki lahi naʻe tokonaki ʻa Loma ki ha lēvolo lahi ange ia ʻo e tauʻatāina fakalotú ʻi he meʻa ko ia naʻe toe mamata ki ai ʻi he hili ʻa e Liukava ʻa ʻAmeliká.” ʻI onopooni, kuo hoko ʻa e kakaí ʻi he ngaahi fonua lahi ʻo fanongo lahi ange ki he ngaahi fakakaukau ʻa e niʻihi kehé, ʻo iku ai ki heʻenau loto-lelei ke fanongo ki he pōpoaki ʻa e Tohitapú ʻoku ʻoatu ʻe he Kau Fakamoʻoni ʻa Sihová.

Ko e Ngafa ʻo e Tekinolosiá

19. Naʻe anga-fēfē hono ngāueʻaki ʻe he muʻaki kau Kalisitiané ʻa e codex?

¹⁹ Fakaʻosí, fakakaukau angé ki he anga hono ʻai ʻe Sihova ke malava ʻa ʻene kakaí ʻo maʻu ʻaonga mei he ngaahi fakalakalaka fakatekinolosiá. Neongo naʻe ʻikai ke moʻui ʻa e muʻaki kau Kalisitiané ʻi ha kuonga ʻo e fakalakalaka fakatekinolosia vave, ko e fakalakalaka ʻe taha naʻa nau ngāueʻaki ko e codex, pe ko e tohi-fakapeesi. Naʻe fetongi ʻe he codex ʻa e takainga tohi mamafá. Ko e tohi The Birth of the Codex ʻoku pehē ai: “ʻI he faikehekehe mei he faʻu māmālie mo fakakongokonga ʻa ia naʻe fetongi ai ʻe he codex ʻa e takainga tohí ʻi he tohi fakaemāmaní, ko hono ohi mai ʻe he Kalisitiané ʻa e codex ʻoku hā naʻe vave mo ʻi he feituʻu kotoa pē.” ʻOku toe pehē ʻe he tohi ko eni ʻoku lave ki aí: “Naʻe mātuʻaki ngāueʻaki ʻa e codex ʻe he Kalisitiané ʻi he feituʻu kotoa pē ʻi he senituli hono uá ʻa ia ko hono fuofua ʻomí kuo pau ko hono taimí naʻe ki muʻa ʻaupito ia ʻi he T.S. 100.” Naʻe faingofua ange ke ngāueʻaki ʻa e codex ʻi he takainga tohí. Naʻe lava ke maʻu vave ange ai ʻa e ngaahi Konga Tohitapú. Naʻe tokoniʻi moʻoni ʻe he meʻá ni ʻa e muʻaki kau Kalisitiané, ʻa ia, hangē ko Paulá, naʻe ʻikai ngata pē ʻi heʻenau fakamatalaʻi ʻa e ngaahi Konga Tohitapú kae toe ‘fakamoʻoniʻi ʻaki ʻa e ngaahi lave’ ki he ngaahi meʻa naʻa nau akoʻí.​—Ngāue 17:2, 3, NW.

20. Kuo anga-fēfē hono ngāueʻaki ʻe he kakai ʻa e ʻOtuá ʻa e tekinolosia fakaeonopōní ʻi he ngāue fakamalanga ʻi he foʻi kolopé, pea ko e hā hono ʻuhingá?

²⁰ Ko e ngaahi fakalakalaka fakatekinolosia ʻi hotau senitulí kuo fakaofo. Ko e ngaahi mīsini pulusi vave ʻaupitó kuo nau tokoni ke ʻai ke malava ʻo pulusi taimi taha ʻa e ngaahi tohi faka-Tohitapú ʻi he ngaahi lea lahi. Kuo fakavaveʻi ʻe he tekinolosia fakaeonopōní ʻa e ngāue ʻo e liliu Tohitapú. Ko e ngaahi lolí, ngaahi lēlué, ngaahi vaká, mo e ngaahi vakapuná kuo nau ʻai ke malava ʻo uta vave atu ʻa e ngaahi tohi faka-Tohitapú ki māmani kotoa. Kuo ʻai ʻe he ngaahi telefoní mo e ngaahi mīsini fēkisí ke hoko moʻoni ʻa e vave ʻa e fetuʻutakí. Fakafou ʻi hono laumālié, kuo ueʻi ʻe Sihova ʻa ʻene kau sevānití ke ngāueʻaongaʻaki ʻa e tekinolosia peheé ke tokoni ki hono fakamafola atu ʻo e ongoongo leleí ki māmani lahi. ʻOku ʻikai te nau ngāueʻaki ʻa e ngaahi fakalakalaka peheé ʻi ha holi ke ʻiloʻi mo ngāueʻaki ha ʻilo pē ʻoku fakamuimui taha ʻi he māmani ko ení. ʻI hono kehé, ko e meʻa ʻoku nau mahuʻingaʻia muʻomuʻa mo tuʻu-ki-muʻa taha aí ko e meʻa te ne tokoniʻi kinautolu ke fakahoko ola lelei taha ai ʻenau ngāue fakamalangá.

21. Ko e hā te tau tuipau nai ki aí?

²¹ “Pea ʻe ʻoua ke fanongonongo ki mamani katoa ʻa e ongoongolelei ko eni ʻo e puleʻanga,” ko hono tomuʻa tala ia ʻe Sīsuú. (Mātiu 24:14) Hangē pē ko e sio ʻa e muʻaki kau Kalisitiané ki hano fakahoko ʻo e kikite ko iá, ko kitautolu ʻi he ʻaho ní ʻoku tau sio ki he meʻa ko iá ʻi ha tuʻunga lahi. Neongo ʻa e lahi mo e faingataʻa ʻo e ngāué, lolotonga ʻa e taimi lelei mo ʻikai lelei, ʻi he lotolotonga ʻo e ngaahi lao mo e fakakaukau feliliuaki, ʻi he tau pea ʻi he melino, pea ʻi he lotolotonga ʻo e faʻahinga fakalakalaka fakatekinolosia kotoa, kuo malangaʻi pea ʻoku malangaʻi ai ʻa e ongoongo leleí. ʻIkai ʻoku fakafonu koe ʻe he meʻá ni ʻaki ʻa e ofo ʻi he poto mo e tomuʻa ʻafioʻi fakaofo ʻoku ʻia Sihová? ʻOku tau fakapapauʻi fakaʻaufuli nai ʻe fakakakato ʻa e ngāue fakamalangá ʻo fakatatau ki he taimi-tēpile ʻa Sihová pea ko ʻene taumuʻa anga-ʻofá ʻe fakahoko ki hono tāpuakiʻi ʻo e māʻoniʻoní. Te nau hoko mai ʻo maʻu ʻa e māmaní pea nofo ai ʻo taʻengata. (Sāme 37:29; Hapakuke 2:3) Kapau ʻoku tau fakafehoanaki ʻetau moʻuí mo e taumuʻa ʻa Sihová, te tau hoko ai ʻo ʻi honau haʻohaʻongá.​—1 Timote 4:​16.

[Fakamatala ʻi lalo]

Ngaahi Poini ke Fakamanatu

◻ Ko e hā kuo hoko ai ko ha pole ʻa e vāhenga-ngāue ko hono malangaʻi ʻo e ongoongo leleí?

◻ Ko e hā ʻa e ngaahi founga kuo maʻu ʻaonga ai ʻa e ngāue ʻa e kau Kalisitiané mei he ngaahi fokotuʻutuʻu fakapuleʻangá pea mo e tuʻunga tuʻumaʻu fakasōsialé?

◻ Ko e tāpuakiʻi ʻe Sihova ʻa e ngāue fakamalangá ʻokú ne fakapapauʻi mai kiate kitautolu ʻa e ngaahi fakalakalaka ko e hā ʻi he kahaʻú?