Tīmote—Ko ha “Foha Mooni i he Tui”

NAʻE kei siʻi ʻa Tīmote ʻi he taimi naʻe fili ai ia ʻe he ʻapositolo Kalisitiane ko Paulá ko hono kaungāfonongá. Naʻe kamata ʻe he meʻá ni ha tuʻunga ʻo ha hoa ʻa ia ʻe hokohoko atu ʻi ha taʻu nai ʻe 15. Ko e vahaʻangatae naʻe tupulekina ʻi he vahaʻa ʻo e ongo tangatá naʻe ʻi ha tuʻunga naʻe lava ke ui ai ʻe Paula ʻa Tīmote “ko hoku foha ʻoku ou ʻofa ai, pea ko e tōnunga ʻi he ngaue ʻa e ʻEiki” mo e “foha mooni i he tui.”​—1 Kolinito 4:​17; 1 Timote 1:2, PM.

Ko e hā e meʻa fekauʻaki mo e ʻulungaanga ʻo Tīmoté naʻá ne ʻai ai ʻa Paula ke mātuʻaki ʻofa ʻiate iá? Naʻe anga-fēfē ʻa e hoko ʻa Tīmote ko ha kaungāmeʻa mahuʻinga peheé? Pea ko e hā ʻa e ngaahi lēsoni ʻaonga ʻoku lava ke tau ako mei he lēkooti fakamānavaʻi fekauʻaki mo e ngaahi ngāue ʻa Tīmoté?

Fili ʻe Paula

Naʻe ʻilo ʻe Paula ʻa e talavou ākonga ko Tīmoté ʻi he taimi naʻe ʻaʻahi ai ʻa e ʻapositoló ki Līsita (ʻi Toake ʻi onopōní) ʻi heʻene fononga fakamisinale hono uá ʻi he 50 T.S. nai. Hangehangē ʻi he konga ki mui ʻo hono taʻu hongofulu tupú pe konga ki muʻa ʻo hono 20 tupú, naʻe talanoaʻi lelei ʻa Tīmote ʻe he kau Kalisitiane ʻi Līsita mo ʻAikoniumé. (Ngāue 16:​1-3) Naʻá ne moʻui ʻo tatau mo hono hingoá, ʻa ia ʻoku ʻuhingá ko e “Tokotaha ʻOkú Ne Fakalāngilangiʻi ʻa e ʻOtuá.” Mei heʻene kei siʻí, ne akoʻi ʻa Tīmote mei he ngaahi Konga Tohitapu Māʻoniʻoní ʻe he ʻene kui-fefiné ko Loisi pea mo ʻene faʻeé, ʻa ʻIunisi. (2 Timote 1:5; 3:​14, 15) Ngalingali naʻá na maʻu ʻa e lotu faka-Kalisitiané lolotonga ʻa e ʻuluaki ʻaʻahi ʻa Paula ki honau koló ʻi ha taʻu ʻe ua ki muʻa. ʻI he taimi ko ení, fakafou ʻi he ngāue ʻa e laumālie māʻoniʻoní, naʻe fakahaaʻi ai ʻe ha kikite ʻa e meʻa ʻe hoko ki he kahaʻu ʻo Tīmoté. (1 Timote 1:​18) ʻI he fehoanaki mo e tataki ko iá, naʻe hilifaki nima ʻi he talavoú ʻa Paula mo e kau mātuʻa ʻo e fakatahaʻangá, ʻo fakamavaheʻi ai ia ki ha ngāue makehe, pea naʻe fili ia ʻe he ʻapositoló ko hano kaungā misinale.​—1 Timote 4:​14; 2 Timote 1:6.

Koeʻuhi ko ʻene tamaí ko ha Kalisi taʻetui, naʻe teʻeki kamu ai ʻa Tīmote. Ko e moʻoni, naʻe ʻikai ko ha fiemaʻu faka-Kalisitiane eni. Kae kehe, ke toʻo ha maka tūkiaʻanga ki he kau Siu te na ʻaʻahi ki aí, naʻe tuku atu ai ʻa Tīmote ki he founga fakamamahi ko ení.​—Ngāue 16:3.

Naʻe fai ha vakai kia Tīmote ki muʻa ko ha Siu? ʻOku kikihi ʻa e kau mataotao ʻe niʻihi ʻo pehē fakatatau ki he ngaahi maʻuʻanga fakamatala faka-Lāpaí, “ko e tuʻunga fakalao ʻo e fānau ko ia mei ha mali matakali kehekehé ʻoku fakapapauʻi ia ʻi he faʻeé, ʻikai ʻi he tamaí.” ʻA ia, “ko ha fefine Siu ʻokú ne fanauʻi mai ʻa e fānau Siu.” Ka, ko e tokotaha-tohi ko Shaye Cohen ʻokú ne fehuʻia pe ko e “lao faka-Lāpai pehē ki he kakaí ne ʻosi ʻi ai ia ʻi he ʻuluaki senituli T.S.” pe naʻe tauhi ia ʻe he kau Siu ʻo ʻĒsia Mainá. Hili ʻene fakakaukau ki he fakamoʻoni fakahisitōliá, ʻokú ne fakaʻosiʻaki ʻo pehē ʻi he taimi naʻe mali ai ʻa e kau tangata Senitailé mo e kau fefine ʻIsilelí, “ko e fānau ʻi he ngaahi mali ko ení naʻe vakai kiate kinautolu ko e kau ʻIsileli kapau pē naʻe nofo ʻa e fāmilí ʻi he haʻohaʻonga ʻo e kau ʻIsilelí. Naʻe ʻi he laine faʻeé ʻa e laine hohokó ʻi he taimi naʻe ʻi he fonua ai ʻo e faʻeé. ʻI he taimi naʻe hiki ai ʻa e fefine ʻIsilelí ke fakataha mo hono husepāniti Senitailé, naʻe lau leva ʻene fānaú ko e kau Senitaile.” Kae kehe, ko e fio ʻi he ongo mātuʻa ʻa Tīmoté naʻe pau ʻa ʻene hoko ʻo mahuʻinga ʻi he ngāue fakamalangá. Heʻikai pē haʻane palopalema ʻana felāveʻi mo e kau Siú pe kau Senitailé, mahalo pē naʻá ne ʻai ia ke ne malava ʻo fakafehokotaki ʻa e ngaahi faikehekehe ʻi honau vahaʻá.

Naʻe fakaʻilongaʻi ʻe he ʻaʻahi ʻa Paula ki Līsitá ha meʻa mahuʻinga ʻi he moʻui ʻa Tīmoté. Ko e loto-lelei ʻa e talavoú ke muimui ʻi he tataki ʻa e laumālie māʻoniʻoní pea fāitaha anga-fakatōkilalo mo e kau mātuʻa Kalisitiané naʻe iku ia ki he ngaahi tāpuaki lahi mo e ngaahi monū ʻi he ngāué. Pe naʻá ne ʻiloʻi ia ʻi he taimi ko iá pe ʻikai, ʻi he malumalu ʻo e tataki ʻa Paulá naʻe ngāueʻaki ai ki mui ʻa Tīmote ʻi he ngaahi vāhenga-ngāue fakateokalati mahuʻinga, ʻo ʻave ai ia ʻo mamaʻo mei ʻapi ki Loma, ʻa e kolomuʻa ʻo e ʻemipaeá.

Naʻe Pouaki ʻe Tīmote ʻa e Ngaahi Meʻa ʻo e Puleʻangá

ʻOku tau maʻu ha lēkooti fakakonga pē ʻo e ngaahi ngāue ʻa Tīmoté, ka naʻá ne fononga takai ke pouaki ʻa e ngaahi meʻa ʻo e Puleʻangá. Ko e ʻuluaki fononga ʻa Tīmote mo Paula mo Sailosi ʻi he 50 T.S. naʻe ʻave ai ia ʻo fou atu ʻi ʻĒsia Maina pea ki ʻIulope. Naʻá ne kau ai ʻi he ngaahi feingangāue fakamalanga ʻi Filipai, Tesalonaika, mo Pēlea. Hili hono fakatupunga ʻe he fakafepakí ʻa Paula ke hoko atu ki ʻAtenisí, naʻe tuku ai ʻa Tīmote mo Sailosi ʻi Pēlea ke na tokangaʻi ʻa e kulupu ʻo e kau ākonga naʻe fokotuʻu aí. (Ngāue 16:6–17:14) Ki mui ai, naʻe fekauʻi ʻe Paula ʻa Tīmote ki Tesalonaika ke ne fakaivimālohiʻi ʻa e fakatahaʻanga foʻou aí. Naʻe ʻomi ʻe Tīmote ʻa e ongoongo lelei fekauʻaki mo e fakalakalaka ʻa e fakatahaʻangá ʻi he taimi naʻá ne fetaulaki ai mo Paula ʻi Kolinitoó.​—Ngāue 18:5; 1 Tesalonaika 3:​1-7.

ʻOku ʻikai ke tala ʻe he ngaahi Konga Tohitapú ʻa hono fuoloa ʻo e nofo ʻa Tīmote mo e kau Kolinitoó. (2 Kolinito 1:​19) Kae kehe, ngalingali ʻi he 55 T.S. nai, naʻe fakakaukau ai ʻa Paula ke fakafoki mai ia kiate kinautolu koeʻuhi he naʻá ne maʻu ʻa e ngaahi ongoongo fakatupu hohaʻa fekauʻaki mo honau tuʻungá. (1 Kolinito 4:​17; 16:10) Ki mui ai, naʻe fekauʻi ai ʻa Tīmote fakataha mo ʻElasito mei ʻEfesō ki Masitōnia. Pea ʻi he taimi naʻe tohi ai ʻa Paula ki he kau Lomá mei Kolinitoó, naʻe toe ʻi ai ʻa Tīmote fakataha mo ia.​—Ngāue 19:​22; Loma 16:21.

Naʻe mavahe ʻa Tīmote mo e niʻihi kehe mei Kolinitō fakataha mo Paula ʻi heʻene fononga ki Selusalemá, pea naʻa nau ō fakataha mo e ʻapositoló ʻo aʻu ki Taloasi. ʻOku ʻikai ʻiloʻi pe naʻe hokohoko atu ʻa Tīmote ki Selusalema. Ka ʻoku ʻasi hono hingoá ʻi he ngaahi lea fakafeʻiloaki ʻo e tohi ʻa Paula ʻe tolu naʻá ne tohi mei he pilīsone ʻi Lomá ʻi he 60-61 T.S. nai.a (Ngāue 20:4; Filipai 1:1; Kolose 1:1; Filimone 1) Naʻe palani ʻa Paula ke fekauʻi ʻa Tīmote mei Loma ki Filipai. (Filipai 2:​19) Pea ʻi he hili hono tukuange ʻo Paula mei pilīsoné, naʻe nofo pē ʻa Tīmote ʻi ʻEfesō ʻi he fakahinohino ʻa e ʻapositoló.​—1 Timote 1:3.

Koeʻuhi naʻe ʻikai faingofua pe fakafiemālie ʻa e fononga ʻi he ʻuluaki senitulí, ko e loto-lelei ʻa Tīmote ke fai ʻa e ngaahi fononga lahi koeʻuhi ko e ngaahi fakatahaʻangá naʻe taau moʻoni ke fakaongoongoleleiʻi. (Sio ki he The Watchtower, ʻAokosi 15, 1996, peesi 29, puha.) Fakakaukau atu ki he taha pē ʻo ʻene ngaahi fononga ne ʻamanekiná pea mo e meʻa ʻoku tala mai ʻe he meʻá ni kiate kitautolu fekauʻaki mo Tīmoté.

Fakamaama ki he ʻUlungaanga ʻo Tīmoté

Naʻe ʻia Paula ʻa Tīmote ʻi Loma ʻi he taimi naʻe tohi ai ʻa e ʻapositolo nofo pōpulá ki he kau Kalisitiane naʻe fakatangaʻi ʻi Filipaí ʻo pehē: “ʻOku ou ʻamanaki pe ʻi he ʻEiki ko Sisu, ʻe toe siʻi pea u fekau atu ʻa Timote, koeʻuhi ke u fiemalie ʻe au foki ʻi haʻaku ʻilo ki hoʻomou ngaahi meʻa. He ʻoku ʻikai te u maʻu mo ha taha ʻoku loto tatau mo au; ha taha te ne lotomoʻua moʻoni ki hoʻomou ngaahi meʻa: he ko kinautolu ni kotoa pe ʻoku nau kumi ʻenau meʻa ʻanautolu, ʻo ʻikai ko e meʻa ʻa Sisu Kalaisi. Ka ʻoku mou ʻilo ia ko e moʻonia, heʻene nofo kiate au, ʻo hange ko e foha mo e tamai, ʻo ngaue mo au ki he Kosipeli.”​—Filipai 1:​1, 13, 28-​30; 2:​19-​22.

ʻOku fakamamafaʻi ʻe he ngaahi lea ko iá ʻa e hohaʻa ʻa Tīmote ki he kaungātuí. Tuku kehe kapau naʻá ne ʻalu vaka, ko ha fononga pehē naʻe fiemaʻu ai ha fononga lalo ʻaho ʻe 40 mei Loma ki Filipai, fakataha mo ha kolosi nounou ʻi he Tahi ʻEtiliatikí, pea mo e toe ʻaho leva ʻe 40 ke foki ai ki Loma. Naʻe mateuteu ʻa Tīmote ke fai kotoa ʻa e meʻa ko iá ke tokangaʻi ʻa hono fanga tokouá mo e tuofāfiné.

Neongo naʻe fononga lahi ʻa Tīmote, naʻe ʻi ai ʻa e ngaahi taimi naʻe ʻikai ai te ne moʻui lelei. Naʻe fakamoʻoniʻi naʻá ne maʻu ha faʻahinga faingataʻaʻia ʻi hono keté peá ne hokosia ʻa e “faʻa mahamahaki.” (1 Timote 5:​23) Ka naʻá ne feinga mālohi ʻiate ia koeʻuhi ko e ongoongo leleí. ʻOku ʻikai ha ofo ʻi he maʻu ʻe Paula ha vahaʻangatae vāofi pehē mo iá!

ʻI he malumalu ʻo e maluʻi ʻa e ʻapositoló pea fakafou ʻi heʻena ngaahi meʻa naʻe hokosia fakatahá, ʻoku hā mahino naʻe hoko ai ʻa Tīmote ʻo tapua mei ai ʻa e ʻulungaanga ʻo Paulá. Ko ia, naʻe lava ke tala ange ʻe Paula kiate ia: “Naʻa ke maʻu moʻao faʻifaʻitakiʻanga ʻa e faiako aʻaku, a ʻeku toʻonga, a ʻeku tuʻutuʻuni pau, a ʻeku tui, a ʻeku angamokomoko, a ʻeku ʻofa, a ʻeku kataki; ʻa hoku faʻa fakatangaʻi, ʻa e ngaahi fuʻu mamahi naʻe to kiate au ʻi Aniteoke mo Aikoniume mo Lisita, ʻa e ngaahi fuʻu fakatanga ko ia naʻa ku moʻua ai.” Naʻe fakatōloʻimata fakataha ʻa Tīmote mo Paula, naʻá ne ʻi heʻene ngaahi lotú, pea kaungātamaioʻeiki ʻi hono tafaʻakí ke pouaki ʻa e ngaahi meʻa ʻo e Puleʻangá.​—2 Timote 1:​3, 4; 3:​10, 11.

Naʻe fakalototoʻaʻi ʻe Paula ʻa Tīmote ke ‘oua naa manukiʻi ʻene kei jií e ha taha.’ ʻOku fakahaaʻi nai ʻe he meʻá ni naʻe kiʻi mā ʻa Tīmote, ʻo toumoua ʻi hono fakahaaʻi ʻa hono tuʻunga mafaí. (1 Timote 4:​12, PM; 1 Kolinito 16:​10, 11) Kae kehe, naʻe lava ke ne tuʻu tokotaha, pea naʻe lava ke falala pau ʻa Paula ke fekauʻi atu ia ʻi ha ngaahi vāhenga-ngāue fua fatongia. (1 Tesalonaika 3:​1, 2) ʻI he taimi naʻe ʻiloʻi ai ʻe Paula ʻa e fiemaʻu ki ha tokangaʻi fakateokalati mālohi ʻi he fakatahaʻanga ʻi ʻEfesoó, naʻá ne enginaki kia Timote ke nofo ai ke ne “fekau ha niʻihi ke tuku ʻenau akoʻaki ʻa e meʻa kehe.” (1 Timote 1:3, fakaʻītali ʻamautolu.) Kae kehe, neongo hono tuku kiate ia ʻa e ngaahi fatongia lahi, naʻe anga-fakanānā ʻa Tīmote. Pea neongo ha tuʻunga mā nai naʻá ne maʻu, naʻá ne loto-toʻa. Hangē ko ení, naʻá ne ʻalu ki Loma ke tokoniʻi ʻa Paula, ʻa ia naʻe fai ʻene hopo koeʻuhi ko ʻene tuí. Ko hono moʻoní, naʻe faingataʻaʻia ʻa Tīmote tonu ʻi ha vahaʻa taimi ʻo e tuku pōpulá, ngalingali ʻi he ʻuhinga tatau.​—Hepelu 13:23.

ʻOku ʻikai ha veiveiua, naʻe ako lahi ʻa Tīmote meia Paula. Ko e fakahīkihikiʻi naʻe fai ʻe he ʻapositoló ki hono kaungāngāué ʻoku fakamoʻoniʻi feʻunga ʻānoa ia ʻe he moʻoniʻi meʻa ko ia ʻo ʻene tohi kiate ia ʻa e ongo tohi fakamānavaʻi ʻe ua ʻoku maʻu ʻi he Ngaahi Konga Tohitapu Faka-Kalisi Kalisitiané. ʻI he 65 T.S. nai, ʻi hono ʻiloʻi ʻe Paula naʻe tuʻunuku mai ʻa ʻene mate fakamāʻatá tonu, naʻá ne toe ui mai ʻa Tīmote. (2 Timote 4:​6, 9) Pe naʻe lava ʻa Tīmote ke sio kia Paula ki muʻa ʻi hono tāmateʻi ʻa e ʻapositoló, ʻoku ʻikai ke fakahaaʻi ia ʻi he ngaahi Konga Tohitapú.

Fakafaingamālieʻi Koe!

ʻOku lahi ʻa e meʻa ʻe lava ke ako mei he faʻifaʻitakiʻanga lelei ʻa Tīmoté. Naʻá ne maʻu ʻaonga lahi mei he feohi mo Paulá, ʻo tupu hake mei ha talavou mā ki ha ʻovasia. ʻOku lava ke maʻu ʻa e meʻa lahi ʻe he kau tangata mo e kau fefine kei talavou Kalisitiané mei he feohi meimei tatau ʻi he ʻaho ní. Pea kapau te nau ʻai ʻa e ngāue ʻa Sihová ko ʻenau ngāue tuʻumaʻú ia, te nau maʻu ʻa e ngāue ʻaonga ʻoku lahi ke fai. (1 Kolinito 15:58) Te nau hoko nai ko e kau tāimuʻa, pe kau malanga taimi-kakato, ʻi heʻenau fakatahaʻangá, pe te nau malava nai ke ngāue ʻi he feituʻu ʻoku lahi ange ai ʻa e fiemaʻu ki he kau fanongonongo ʻo e Puleʻangá. ʻOku kau ʻi he ngaahi faingamālie lahi ko iá ʻa e ngāue fakamisinale ʻi ha toe fonua ʻe taha pe ngāue ʻi he ngaahi ʻuluʻiʻapitanga ʻo e Sōsaieti Taua Leʻó ʻi he māmaní pe ʻi ha taha ʻo hono ngaahi vaʻá. Pea ko e moʻoni, ʻoku lava ʻe he Kalisitiane kotoa pē ke ne fakahāhā ʻa e laumālie tatau hangē ko ia naʻe fakahāhā ʻe Tīmoté, ʻaki hono fai ʻa e ngāue ʻaufuatō kia Sihova.

ʻOkú ke holi ke hokohoko atu ʻa e tupu fakalaumālié, ke hoko ʻo ʻaonga ki he kautaha ʻa Sihová ko e hā pē ʻa e malava te ne fakakaukau ʻoku feʻungamālié? Fai leva ʻa e meʻa naʻe fai ʻe Tīmoté. Ki he lahi taha ʻe ala lavá, fakafaingamālieʻi ʻa koe tonu. Ko hai ʻokú ne ʻilo ʻa e ngaahi monū ʻo e ngāue ʻi he kahaʻú ʻe fakaava mai nai kiate koé?

[Fakamatala ʻi lalo]

[Fakatātā ʻi he peesi 31]

“ʻOku ʻikai te u maʻu mo ha taha ʻoku loto tatau mo au”