Fiefia ʻIa Sihova!

“Fiefia mau ai be i he Eiki: oku ou toe behe, Fiefia.”​—FILIPAI 4:4, PM.

 1. Ko e hā te tau fifili nai ai pe ko e hā ʻa e ʻuhinga ʻa Paula ʻi heʻene pehē ʻoku totonu ke fiefia maʻu ai pē ʻa e kau Kalisitiané?

ʻI HE ngaahi ʻahó ni, ʻoku siʻisiʻi nai ʻa e ngaahi ʻuhinga ke fiefia aí. Ko e tangatá ʻa ia naʻe ngaohi mei he efú, naʻa mo e kau Kalisitiane moʻoní, ʻoku nau fepaki mo e ngaahi tuʻunga ʻoku fakatupu loto-mamahi​—ʻo hangē ko e ʻikai ke maʻu ha ngāué, moʻui mahamahakí, ko e mate ʻa ha tokotaha ʻofeina, ngaahi palopalema ʻo e angaʻitangatá, pe fakafepaki mei he ngaahi mēmipa ʻo e fāmilí ʻoku ʻikai ke tuí pe ngaahi kaumeʻa ki muʻá. Ko ia, ʻe anga-fēfē ʻa ʻetau maʻu ʻa e mahino ki he enginaki ʻa Paulá, “Fiefia mau ai be”? ʻOku malava ke hoko ia, neongo ʻa e ngaahi tuʻunga kovi mo fakapāhia ʻa ia ʻoku tau lava ke fekuki kotoa mo iá? Ko ha fakamatala ki he potutohi ʻo e ngaahi lea ko ʻení ʻe tokoni ia ke fakamahino ʻa e meʻá ni.

Fiefia​—Ko e ʻUhingá mo Anga-Fēfē?

 2, 3. Ko e hā ʻa e mahuʻinga ʻo e fiefiá, ʻo hangē ko ia kuo fakatātaaʻi ʻi he meʻa naʻe hoko kia Sīsū mo e kau ʻIsileli ʻo e kuonga muʻá?

² “Fiefia mau ai be i he Eiki: oku ou toe behe, Fiefia.” ʻOku fakamanatu mai nai kiate kitautolu ʻe he meʻá ni ʻa e ngaahi lea naʻe fai ki he kau ʻIsilelí ʻi he senituli nai ʻe 24 kuo ʻosí: “He koe fiefia a Jihova ko ho mou malohi,” pe fakatatau ki he liliu ʻa Moffatt: “Ko e fiefia ʻi he Taʻengatá ko homou mālohi ia.” (Nehemaia 8:​10, PM) ʻOku maʻu mei he fiefiá ha mālohi pea ʻoku hangē ha kolo mālohí ʻa ia ʻoku lava ke ʻalu ki ai ha taha ke maʻu ai ha fiemālie mo ha maluʻanga. Naʻe meʻangāueʻaki ʻa e fiefiá ko ha tokoni naʻa mo e tangata haohaoa ko Sīsū ke ne kātaki ai. “Ko e meʻa ke ne maʻu ʻa e fiefia naʻe tala humaki kiate ia, ko ia naʻa ne kataki ʻa e mate kalusefai, naʻe ʻikai te ne tokaʻi hono fakamāʻi, pea kuo ne nofo hifo foki mei he toʻomataʻu ʻo e taloni ʻo e ʻOtua.” (Hepelū 12:2) ʻOku hā mahino, ko e lava ke fiefia neongo ʻa e ngaahi faingataʻá ʻoku mahuʻinga ʻaupito ia ki he fakamoʻuí.

³ Ki muʻa ke hū ki he Fonua ʻo e Talaʻofá, naʻe fekau ki he kau ʻIsilelí: “Pea te ke fakafiefia ʻi he ngaahi lelei kehekehe kuo ʻomi ʻe Sihova ko ho ʻOtua kiate koe, pea ki ho fale, ʻe koe, mo e Livai, mo e muli ʻoku nofo ho lotolotonga.” Naʻe fakatuʻutāmaki ʻa e ngaahi nunuʻa ʻo e ʻikai ke tauhi fiefia ʻa Sihová. “Pea ʻe aʻu ʻa e ngaahi mala ni kiate koe, ʻio te nau toupili kiate koe, mo maʻu koe, kaeʻoua ke ke ʻauha . . . Ko e meʻa ʻi he ʻikai te ke tauhi kia Sihova ko ho ʻOtua ʻi he fiefia mo e loto lelei, tupu ʻi he mahu ʻo e meʻa kotoa.”​—Teutalōnome 26:11; 28:​45-47.

 4. Ko e hā ʻe ʻikai nai ai te tau fiefiá?

⁴ Ko ia ai, ko ha fiemaʻu lahi ē ki he toenga ʻo e kau paní ʻi he ʻaho ní mo honau takangá ko e “fanga sipi kehe” ke nau fiefia! (Sione 10:16) ʻI hono toe ʻai ʻe Paula ʻa ʻene enginakí, “oku ou toe behe,” naʻe fakamamafaʻi ai ʻa e mahuʻinga ʻo e fiefia ʻi he lelei hono kotoa pē kuo fai ʻe Sihova maʻatautolú. ʻOku tau pehē? Pe ʻoku tau fuʻu femoʻuekina ʻi he ngaahi ngāue fakaʻaho ʻo e moʻuí pea ngalo ai ʻiate kitautolu ʻi he taimi ʻe niʻihi ʻa e ngaahi ʻuhinga lahi ke tau fiefia ai? ʻOku fokotuʻuna ʻa e ngaahi palopalemá ʻo fuʻu māʻolunga ia ʻo nau tāpuni ʻetau sio ki he Puleʻangá mo hono ngaahi tāpuakí? ʻOku tau fakaʻatā ʻa e ngaahi meʻa kehé​—talangataʻa ki he ngaahi lao ʻa e ʻOtuá, ʻikai tokaʻi ʻa e ngaahi tefitoʻi moʻoni mei he ʻOtuá, pe fakalīlīʻaki ʻa e ngaahi fatongia faka-Kalisitiané—​ke ne ʻave meiate kitautolu ʻa ʻetau fiefiá?

 5. Ko e hā ʻoku faingataʻa ai ke fiefia ha tokotaha ʻoku ʻikai faituʻunga?

⁵ “Tuku ke ilo e he kakai kotoabe hoo mou ulugaaga lelei. Oku ofi ae Eiki.” (Filipai 4:5, PM) Ko ha tokotaha ʻoku ʻikai faituʻunga ʻoku ʻikai ke fakakaukau mafamafatatau. ʻOku moʻua hono sinó ʻi he fuʻu mafasia pe loto-hohaʻa ko e ʻikai lava nai ke ne tokangaʻi ʻa ʻene moʻui leleí. Ngalingali kuo ʻikai te ne ako ke tali ʻa hono ngaahi ngātangá mo moʻui ʻo fakatatau pē ki ai. ʻOkú ne fokotuʻu nai ʻene ngaahi koló ʻo fuʻu māʻolunga pea feinga ke lavaʻi ia tatau ai pē pe ko e hā ʻa e meʻa ʻe hokó. Pe ʻokú ne ngāueʻaki nai ʻa hono ngaahi ngātangá ko ha kalofanga ia ki heʻene fakamāmālie pe ʻikai ke faʻa ngāué. ʻOku faingataʻa ke fiefia koeʻuhí ko e ʻikai ke fakakaukau mafamafatataú mo ʻikai faituʻungá.

 6. (a) Ko e hā ʻoku totonu ke hā atu meiate kitautolu ki hotau kaungā-Kalisitiané, pea ʻi he taimi fē pē ʻoku hoko ai ʻa e meʻá ni? (e) ʻOku anga-fēfē ʻa e tokoni kiate kitautolu ʻa e ngaahi lea ʻa Paula ʻi he 2 Kolinitō 2:2 (1:​24, PM) mo Loma 14:4 ke tau faituʻunga?

⁶ Neongo kapau ʻoku pehē ʻe he kau fakafepakí ia ko e kau loto-māfana tōtuʻa kitautolu, ʻoku totonu ki he kaungā-Kalisitiané ke nau malava maʻu pē ʻo sio ki heʻetau faituʻungá. Pea te nau malavá kapau ʻoku tau fakakaukau mafamafatatau mo ʻikai te tau ʻamanekina ʻa e haohaoá meiate kitautolu pe mei he niʻihi kehé. Sinoemeʻa, kuo pau ke tau fakaʻehiʻehi mei hono fakakavengaʻi ʻa e niʻihi kehé ʻo laka atu ia ʻi he ngaahi meʻa ʻoku fiemaʻu ʻe he Folofola ʻa e ʻOtuá. Naʻe pehē ʻe he ʻaposetolo ko Paulá: “Ka ʻoku ʻikai ko ʻeku pehe ʻoku ʻamautolu ke pule ki hoʻomou tui: kae kehe ko e kau tokoni pe kimautolu ki he langaʻi ʻo hoʻomou fiefia.” (2 Kolinitō 2:2 [2 Kolinitō 1:24, PM]) Pea koeʻuhi he ko e Fālesi ia ki muʻa, naʻe ʻilo lelei ʻe Paula ko e ngaahi lao fefeka mo fakakavenga naʻe ʻai ʻe he kau maʻu mafaí naʻe fakakavenga mo lōmia ai ʻa e fiefiá, ka ko e ngaahi fokotuʻu ʻaonga ʻoku fai ʻe he kaungāngāué ʻokú ne fakalahi ange ʻa e fiefiá. Ko e moʻoniʻi meʻa ko ia ʻoku “ofi ae Eiki” ʻoku totonu ke ne fakamanatu ki he tokotaha faituʻungá ʻoku ʻikai te tau ‘fakamaauʻi ha sevāniti ʻi ha fale ʻo ha taha. Ko e meʻa ia ʻa hono ʻeikí ʻa ʻene tuʻú pe ko ʻene toó.’​—Loma 14:4.

 7, 8. Ko e hā kuo pau ai ke ʻamanaki ʻa e kau Kalisitiané ʻe ʻi ai ʻa e ngaahi palopalema, ka ʻoku anga-fēfē ke nau kei fiefia hokohoko atu pē?

⁷ “Oua naa tokaga mamahi ki ha mea e taha; kae fakaha atu hoo mou holi i he mea kotoabe, ki he Otua, i he lotu moe lotu tāumau moe fakafetai.” (Filipai 4:6, PM) ʻOku tau hokosia ʻi he ʻahó ni ʻa e “ngaahi taimi faingataʻa” ke fekuki mo ia ʻa ia naʻe tohi ʻe Paulá. (2 Tīmote 3:​1-5) Ko ia ko e kau Kalisitiané kuo pau ke nau ʻamanaki ke fehangahangai mo e ngaahi palopalemá. Ko e ngaahi lea ʻa Paula ʻo pehē “fiefia mau ai be” ʻoku ʻikai te ne taʻofi ʻe ia ʻa e malava ʻi he taimi ʻe niʻihi ke hoko ki ha Kalisitiane mateaki ʻa e loto-mamahí pe fakalotosiʻí. ʻI he meʻa naʻe hoko tonu kia Paulá, naʻá ne fakahā ko e moʻoni: “Ko homau anga é, ko e fetekeekina kimautolu mei he potu kotoa pe, kae ʻikai ʻefituʻua; ko e fakapalalauatuʻu kae ʻikai hē ʻaupito; ko e tulia kae ʻikai liʻekina ki he fili; ko e teʻia kae ʻikai fakamate.” (2 Kolinitō 4:​8, 9) Kae kehe, ko e fiefia faka-Kalisitiané, ʻokú ne fakasiʻisiʻi pea faifai atu ʻo ne liliu ʻa e ngaahi vahaʻa taimi ʻo e loto-moʻuá mo e loto-mamahí. ʻOkú ne ʻomai ʻa e mālohi ʻoku fiemaʻú ke hanganaki ʻunu atu, ʻo ʻoua ʻaupito ʻe puli ʻa e ngaahi ʻuhinga lahi ke fiefia aí.

⁸ ʻI he taimi ʻoku hoko ai ha ngaahi palopalema, tatau ai pē pe ko e hā, ko e Kalisitiane fiefiá ʻokú ne kole ʻi he anga-fakatōkilalo ki ha tokoni meia Sihova ʻo fakafou ʻi he lotu. ʻOku ʻikai te ne foʻi ki he loto-moʻua ʻo fuʻu hulú. ʻI ha ʻosi ʻene fai ʻe ia ʻa e meʻa ʻoku totonu mo malava ke fakaleleiʻiʻaki ʻa e palopalemá, ʻokú ne tuku ʻa hono ola ki he nima ʻo Sihová ʻo fetaiaki mo e fakaafé ni: “Li hoʻo kavenga kia Sihova, he te ne poupou koe ʻe ia.” Lolotonga iá, ʻoku hokohoko atu ʻa e Kalisitiané ke fakamālō kia Sihova ki he ʻEne ngaahi lelei kotoa pē.​—Sāme 55:22; sio foki kia Mātiu 6:​25-34.

 9. ʻI he founga fē ʻe taufetuku mai ai ʻe he ʻilo ʻo e moʻoní ʻa e ʻatamai nonga, pea ko e hā ʻa e ola lelei ʻokú ne fakahoko ki ha Kalisitiane?

⁹ “Bea koe melino oe Otua, aia oku lahi hake aubito i he faa iloa, te ne maluʻi ho mou laumalie mo ho mou loto ia Kalaisi Jisu.” (Filipai 4:7, PM) ʻOku hanga ʻe he ʻilo ʻo e moʻoni ʻi he Tohi Tapú ʻo fakatauʻatāinaʻi ʻa e fakakaukau ʻa e Kalisitiané mei he loí mo tokoni kiate ia ke fakatupu ha ngaahi sīpinga fakakaukau haohaoa. (2 Tīmote 1:13) ʻOku tokoniʻi ai ia ke fakaʻehiʻehi mei he faihalá pe ʻulungāanga taʻefakapotopoto ʻe lava ke fakatuʻutāmaki ki he felāveʻi melino mo e niʻihi kehé. ʻOku ʻikai te ne ongoʻi laufānō ʻi he fakamaau taʻetotonú mo e fulikivanú, ʻoku tuku ʻa ʻene falalá kia Sihova ke ne fakaleleiʻi ʻa e ngaahi palopalema ʻa e faʻahinga ʻo e tangatá ʻo fakafou mai ʻi he Puleʻangá. ʻOku maluʻi ʻe he ʻatamai melino peheé ʻa hono lotó, tauhi ke maʻa ʻa ʻene ngaahi fakakaukaú, mo tataki ʻa ʻene fakakaukaú ʻi he founga māʻoniʻoní. ʻOku tokonaki mai ʻe he ngaahi ʻuhinga maʻa mo e fakakaukau totonú ʻa e ngaahi ʻuhinga taʻefaʻalaua ke fiefia ai, neongo ʻa e ngaahi palopalemá mo e ngaahi fakaʻaiʻai ʻoku hoko mei he māmani maveuveu ʻaupitó ni.

10. ʻOku lava ke hokosia ʻa e fiefia moʻoni ʻi he talanoa mo fakakaukau ʻo fekauʻaki mo e hā?

¹⁰ “E kaiga, ko hono fakaoji eni, ke iloga ae gaahi mea oku mooni, ke iloga ae gaahi mea oku matamata lelei, ke iloga ae gaahi mea oku totonu, ke iloga ae gaahi mea oku maonioni, ke iloga ae gaahi mea oku fakaofoofa, ke iloga ae gaahi mea oku ogoogo lelei; kabau oku ai ha lelei, be ha mea ke fakamaloia, tokaga ki he gaahi mea koia.” (Filipai 4:8, PM) ʻOku ʻikai ke maʻu ʻe ha Kalisitiane ia ha fiefia ʻi he leaʻaki pe fakakaukau ʻo fekauʻaki mo e ngaahi meʻa ʻoku koví. ʻOku fakataʻeʻaongaʻi ai pē ʻe he meʻa ko ʻení ʻa e lahi ʻo e fakafiefia ʻoku tokonaki mai ʻe he māmaní. ʻOku ʻikai ha taha ia ʻe lava ke ne tauhi maʻu ʻa e fiefia faka-Kalisitiané kapau ʻokú ne fakafonuʻaki ʻa ʻene fakakaukaú mo hono lotó ʻa e loí, talanoa launoá, mo e ngaahi meʻa ʻoku ʻikai māʻoniʻoní, angamousaʻá, anga-ʻulí, tāufehiʻá, mo e fakalieliá. Kuo fakahā mahino, ʻoku ʻikai ke lava ʻo maʻu ʻa e fiefia moʻoní ʻe ha taha ʻokú ne fakafonuʻaki ʻene fakakaukaú mo hono lotó ʻa e mousaʻá. ʻI he māmani fulikivanu ʻo Sētané, ko ha meʻa fakatupu langa hake ē ke ʻilo ʻoku lahi ʻaupito ʻa e ngaahi meʻa lelei ke fakakaukau mo fetalanoaʻaki ki ai ʻa e kau Kalisitiané!

Ngaahi ʻUhinga Taʻefaʻalaua ke Fiefiá

11. (a) Ko e hā ʻoku totonu ke ʻoua ʻaupito naʻa fakamaʻamaʻaʻi, pea ko e hā ʻa hono ʻuhingá? (e) Ko e hā naʻe malave ki ha fakafofonga mo hono uaifi naʻá na kau ki ha fakataha fakavahaʻapuleʻanga?

¹¹ ʻI he lave ki he ngaahi ʻuhinga ke fiefiá, ʻoua naʻa ngalo ʻiate kitautolu ʻa ʻetau fetokouaʻaki fakavahaʻapuleʻangá. (1 Pita 2:17) Lolotonga ʻoku fakahāhā ʻa e mātuʻaki fetāufehiʻaʻaki ʻa e ngaahi falukunga kakai ʻi he fonua ʻo e māmaní mo e ngaahi haʻá, ʻoku fakatahataha vāofi ange ʻa e kakai ia ʻa e ʻOtuá ʻi he ʻofá. ʻOku tautefito ʻa hono fakamoʻoniʻi ʻo ʻenau fāʻūtahá ʻi he ngaahi fakataha fakavahaʻapuleʻangá. Ko e taha naʻe fai ʻi he 1993 ʻi Kiev, ʻUkalaine, naʻe tohi ʻe ha tangata fakafofonga mei he ʻIunaite Seteté ʻo fekauʻaki mo ia: “Ko e ngaahi loʻimata ʻo e fiefiá, ko e ngaahi mata fiefiá, ko e hokohoko ʻo e ngaahi fāʻufua ʻo hangē ha fāmilí, mo e ngaahi talamonū ʻoku ʻoatu ʻi he malaʻe vaʻingá ʻe he ngaahi kulupu naʻa nau tākalo ʻa e ngaahi fakamalu lanu fakaʻofoʻofa mo e ngaahi holoholó ko e fakahāhā mahino ia ʻo e fāʻūtaha fakateokalatí. Naʻe fonu ʻa homa lotó ʻi he pōlepole ki he meʻa kuo fakahoko hangē ha maná ʻe Sihova ʻi he fetokouaʻaki ʻi māmani lahí. Naʻe malave ʻiate au mo hoku uaifí ʻa e meʻá ni pea naʻe toe maʻu ai ʻa e ʻuhinga foʻou ki heʻema tuí.”

12. Kuo anga-fēfē ʻa hono fakahoko ʻo e ʻAisea 60:22 ʻo tau sio tonu ai?

¹² Ko ha fakatupu tui mālohi ē ki he kau Kalisitiane ʻi he ʻaho ní ʻa ʻenau sio tonu ki he fakahoko ʻo e ngaahi kikite ʻi he Tohi Tapú! Ko e fakatātaá, fakatokangaʻi ʻa e ngaahi lea ʻi he ʻAisea 60:22: “Ko e kiʻi siʻi ʻe hoko ko e toko afe, pea ko e momoʻi meʻa ko e puleʻanga malohi: Ko au Sihova te u fakavave ia ʻi hono taimi.” ʻI hono fānauʻi ʻo e Puleʻangá ʻi he 1914, ko e toko 5,100 pē​—ko e kiʻi siʻi—​naʻa nau malanga longomoʻuí. Ka ʻi he lolotonga ʻo e taʻu ʻe nima kuo hilí, kuo tokolahi ange ʻa e fetokouaʻaki ʻi māmani lahí ʻo ʻavalisi ko e Kau Fakamoʻoni kuo papitaiso foʻou ʻe toko 5,628 ʻi he uike taki taha! ʻI he 1993, naʻe aʻusia ai ha tumutumu ko e kau faifekau longomoʻui ʻe toko 4,709,889. Fakakaukau angé! ʻOku ʻuhinga ʻa e meʻá ni “ko e kiʻi siʻi” ʻi he 1914 ʻoku ofi moʻoni ia ke hoko “ko e toko afe”!

13. (a) Ko e hā kuo hoko talu mei he 1914? (e) Ko e hā ʻa e meʻa ʻoku fai ʻe he Kau Fakamoʻoni ʻa Sihová ke tauhi ʻa e tefitoʻi moʻoni ʻi he ngaahi lea ʻa Paula ʻi he 2 Kolinitō 9:7?

¹³ Talu mei he 1914 kuo ʻalu atu ʻa e Tuʻi Faka-Mīsaiá ʻo pule ʻi he lotolotonga ʻo hono ngaahi filí. Kuo poupouʻi ʻa ʻene pulé ʻe he kau muimui ʻi he faʻahinga ʻo e tangatá ʻoku nau loto lelei ke foaki atu honau taimí, iví, mo e paʻangá ke faiʻaki ʻa e ngāue fakamalanga ʻi māmani lahi pea pehē ki he feingatau langa fakavahaʻapuleʻangá. (Sāme 110:​2, 3) ʻOku fiefia ʻa e Kau Fakamoʻoni ʻa Sihová koeʻuhi ko e ngaahi tokoni fakapaʻanga kuo nau maʻu ke fakaʻosiʻaki ʻa e ngaahi ngāue ko ʻení, neongo ʻoku siʻi ʻa e lave ki he paʻangá ʻi heʻenau ngaahi fakatahá.a (Fakafehoanaki mo 1 Kalonikali 29:9.) ʻOku ʻikai ke fiemaʻu ke fakaʻaiʻai ʻa e kau Kalisitiane moʻoní ia ke nau foaki; ʻoku nau lau ia ko ha monū ke poupou ki honau Tuʻí ʻi he lahi taha ʻoku malava ʻi honau ngaahi tuʻungá, ʻo “taki taha fai ki he meʻa kuo ne tuʻutuʻuni ʻi hono loto; pea ʻoua ʻe fai ʻi he mamahi, pe ko e puʻia.”​—2 Kolinitō 9:7.

14. Ko e hā ʻa e tuʻunga ʻi he lotolotonga ʻo e kakai ʻa e ʻOtuá kuo hoko ʻo hā mahino talu mei he 1919, pea ko e hā ʻa e ʻuhinga ʻoku nau fiefia aí?

¹⁴ Ko e ola ʻo e kikite ki hono toe fakafoʻou ʻo e lotu moʻoni ʻi he lotolotonga ʻo e kakai ʻa e ʻOtuá kuo tupu mei ai ʻa e palataisi fakalaumālié. Kuo fakalakalaka ʻa hono fakalahi ange ʻo hono ngaahi ngataʻangá talu mei he 1919. (Sāme 14:7; ʻAisea 52:​9, 10) Ko e olá? ʻOku hokosia ʻe he kau Kalisitiane moʻoní ʻa e “fiefia mo e nekeneka.” (ʻAisea 51:11) Ko e ikuʻangá ko e ngaahi fua lelei ko e fakamoʻoni ia ʻo e meʻa ʻoku malava ʻo fai ʻe he laumālie māʻoniʻoni ʻo e ʻOtuá ʻo fakafou ʻi he faʻahinga ʻo e tangata taʻehaohaoá. Ko e ongoongo lelei mo e lāngilangi kotoa ʻoku ʻa Sihova pē ia, ka ko e hā mo ha toe monū ʻoku lahi ange ʻi he hoko ko e kaungāngāue mo e ʻOtuá? (1 Kolinitō 3:9) ʻOku mālohi feʻunga pē ʻa Sihova ia ke ne ʻai ʻa e ngaahi maká ke nau tala ʻa e pōpoaki ʻo e moʻoní kapau ʻe fiemaʻu ke pehē. Ka neongo ia, kuó ne fili ke ʻoua ʻe ngāueʻaki ʻa e founga ko ʻení, ka ke ueʻi ʻa e ngaahi meʻamoʻui lotolelei naʻe ngaohi mei he efú ke nau fai ʻa hono finangaló.​—Luke 19:40.

15. (a) Ko e hā ʻa e ngaahi meʻa ʻi onopooni ʻoku tau mahuʻingaʻia ʻo tokanga ki aí? (e) Ko e hā ʻa e meʻa ʻoku tau fakatuʻamelie fiefia ki aí?

¹⁵ ʻOku vakai fakatokanga lahi fakaʻulia ʻa e kau sevāniti ʻa Sihová ʻi he taimi ní ki he ngaahi meʻa ʻoku hoko ʻi he māmaní he ʻoku felāveʻi ia mo e ngaahi kikite tuʻu-ki-muʻa ʻi he Tohi Tapú. ʻOku feinga mālohi ʻa e ngaahi puleʻangá​—ka ʻoku ʻikai felave—​ke maʻu ha melino ʻoku tolongá. ʻOku fakamālohiʻi kinautolu ʻe he ngaahi meʻa ʻoku hokó ke nau kole ki he kautaha ʻa e Ngaahi Puleʻanga Fakatahatahá ke nau fai ha ngāue ki he ngaahi feituʻu ʻo e māmaní ʻoku faingataʻaʻiá. (Fakahā 13:​15-17) Lolotonga iá, kuo hanga atu ʻa e kakai ʻa e ʻOtuá mo e fakatuʻamelie lahi ki he taha ʻo e ngaahi meʻa fakafiefia lahi taha ʻe fakahokó, ʻa ia ʻoku ofi ange ʻi he ʻaho taki taha. “Tau fiefia mo hakailangitau, ʻio te tau tuku ʻa e kololia kiate ia: He kuo hokosia ʻa e taʻane ʻa e Lami, pea ko hono uaifi kuo ʻosi hono teuteu.”​—Fakahā 19:7.

Malangá​—Ko ha Kavenga pe Fakafiefia?

16. Fakamatalaʻi ʻa e malava ke mole ʻa e fiefia ʻa e Kalisitiané koeʻuhi ko e ʻikai ke ngāueʻaki ʻa e meʻa kuó ne akó.

¹⁶ “Koe gaahi mea koia, naa mou akonekina ai, mo maʻu, mo ogoʻi, mo mamata ki ai, iate au, fai ia: bea e iate kimoutolu ae Otua oe melino.” (Filipai 4:9, PM) ʻI hono ngāueʻaki ʻa e meʻa kuo nau akó, ʻoku lava ke ʻamanaki ai ʻa e kau Kalisitiané ke maʻu ʻa e tāpuaki ʻa e ʻOtuá. Ko e taha ʻo e ngaahi meʻa mahuʻinga lahi taha kuo nau akó ko e fiemaʻu ʻo e malangaʻi ʻa e ongoongo leleí ki he niʻihi kehé. Ko e moʻoni, ko hai ʻe lava ke ne maʻu ʻa e melino ʻo e fakakaukaú pe fiefiá kapau ʻokú ne taʻofi ʻa hono ʻoatu ʻa e fakamatalá ki he faʻahinga loto-moʻoní ʻa ia ko ʻenau moʻuí tonu ʻoku fakatuʻunga ia mei haʻanau fanongo ki he fakamatala ko iá?​—ʻIsikeli 3:​17-21; 1 Kolinitō 9:16; 1 Tīmote 4:16.

17. Ko e hā ʻoku totonu ai ke hoko ʻa ʻetau ngāue fakamalangá ko ha matavai maʻu ai pē ʻo e fiefia?

¹⁷ Ko ha fiefia lahi ē ke ʻilo ha faʻahinga ʻoku hangē ha sipí ʻoku nau loto-lelei ke ako ʻo fekauʻaki mo Sihova! Ko e moʻoni, ko e faʻahinga ʻoku nau ngāue mo e fakakaukau totonú ʻoku nau ʻilo maʻu ai pē ko e ngāue ʻo e Puleʻangá ko ha matavai ʻo e fiefia. ʻOku hoko ʻeni koeʻuhi he ko e ʻuhinga tefito ʻo e hoko ko ha Fakamoʻoni ʻa Sihová ke fakamālōʻia Hono huafá pea mo pouaki Hono tuʻunga ko e Pule Aoniú. (1 Kalonikali 16:31) Ko e tokotaha ʻokú ne ʻiloʻi ʻa e moʻoniʻi meʻa ko ʻení ʻe fiefia pē ia neongo ʻoku talitekeʻi taʻefakapotopoto ʻe he kakaí ʻa e ongoongo lelei ʻokú ne ʻoatú. ʻOkú ne ʻilo ko e malanga ki he kau taʻetuí ʻe ngata ia ʻi ha ʻaho; ko e fakamālōʻia ʻo e huafa ʻo Sihová ia ʻe hokohoko atu ai pē ia ʻo taʻengata.

18. Ko e hā ʻokú ne ueʻi ha Kalisitiane ke ne fai ʻa e finangalo ʻo Sihová?

¹⁸ Ko e lotu moʻoní ʻokú ne ueʻi ʻa e faʻahinga ʻoku nau ngāueʻaki iá ke nau fai ʻa e ngaahi meʻa kuo fiemaʻu ʻe Sihová, ʻo ʻikai koeʻuhi kuo pau ke nau fai ia, ka koeʻuhi ʻoku nau loto ke fai ia. (Sāme 40:8; Sione 4:34) ʻOku faingataʻa ki he kakai tokolahi ke nau maʻu ʻa e mahino ki he meʻa ko ʻení. Naʻe fakahā ʻe ha fefine ʻe taha ki ha Fakamoʻoni naʻe ʻaʻahi ange ki ai: “ʻOkú ke ʻilo, ʻoku taau ke u fakaongoongoleleiʻi koe. ʻE ʻikai ʻaupito te u ʻalu au mei he fale ki he fale ʻo malanga fekauʻaki mo ʻeku lotú ʻo hangē ko ia ʻokú ke faí.” Naʻe malimali ʻa e Fakamoʻoní ʻo ne tali ange: “ʻOku mahino kiate au ʻa e anga ʻo hoʻo fakakaukaú. Ki muʻa ke u hoko ko e taha ʻo e Kau Fakamoʻoni ʻa Sihová, ʻe ʻikai te ke lava ʻo ʻai au ke u ʻalu ki he kakai kehé ʻo talanoa fekauʻaki mo e lotú. Ka ʻi he taimí ni ʻoku ou loto ke u fai pehē.” Naʻe fakakaukau ʻa e fefiné ʻi ha taimi siʻi peá ne fakaʻosiʻaki: “ʻOku hā mahino ʻoku ʻi ai ha meʻa ʻoku tuʻuaki ʻe he lotu ʻokú ke kau aí ka ko e lotu ʻoku ou kau aí ʻoku ʻikai. ʻOku totonu ke u fakaʻekeʻeke.”

19. Ko e hā ko e taimi ai ʻeni ke fiefia ʻa ia kuo teʻeki ai hano tatau ki muʻa?

¹⁹ Ko e potutohi fakataʻu ʻo e 1994, kuo fakaʻaliʻali mahino ʻi hotau ngaahi Kingdom Hall, ʻokú ne toutou fakamanatu mai kiate kitautolu: “Falala kia Jihova aki ho loto kotoa.” (Palōvepi 3:5, PM) ʻOku toe ʻi ai ha ʻuhinga lahi ange ki he fiefiá ʻi he malava ke tau falala kia Sihova, ko hotau kolotau ʻa ia ʻoku tau hufanga ki ai? ʻOku fakamatala ʻi he Sāme 64:10: “Ko siʻi maʻoniʻoni te ne fiefia ʻia Sihova, pea te ne hufanga kiate ia.” ʻOku ʻikai ko ha taimi ʻeni ia ke fakaholoholomui ai pe foʻi. ʻI he ʻosi ʻa e māhina taki taha ʻoku tau toe ofi ange ki he moʻoniʻi meʻa ʻa ia naʻe ʻunaloto mai ki ai ʻa e kau sevāniti ʻa Sihová talu mei he ngaahi ʻaho ʻo ʻĒpelí. Ko e taimi ʻeni ke falala kia Sihova ʻaki hotau lotó kotoa, ʻi he ʻilo kuo ʻikai ha toe taimi ia ki muʻa kuo tau maʻu ai ha ngaahi ʻuhinga lahi ke tau fiefia ai!

[Fakamatala ʻi lalo]

Ko e Hā Haʻo Tali?

◻ Fakatatau ki he Nehemaia 8:10, ko e hā ʻoku totonu ai ke tau fiefiá?

◻ ʻOku anga-fēfē ʻa hono fakahā ʻi he Teutalōnome 26:11 mo e 28:​45-47 ʻa e mahuʻinga ʻo e fiefiá?

◻ ʻOku anga-fēfē ʻa e lava ke tokoni kiate kitautolu ʻa e Filipai 4:​4-9 ke tau fiefia maʻu ai pē?

◻ Ko e hā ʻa e ʻuhinga ʻoku fakahā mai kiate kitautolu ʻe he potutohi fakataʻu ʻo e 1994 ke tau fiefia ai?

[Fakatātā ʻi he peesi 18]

ʻOku fiefia ʻa e Kau Fakamoʻoni Lūsia mo Siamané ke hoko ko ha konga ʻo e fetokouaʻaki fakavahaʻapuleʻangá

[Fakatātā ʻi he peesi 19]

Ko ha meʻa fakafiefia ia ke fakahā ʻa e moʻoní ki he niʻihi kehé