ʻOua ʻe Fakamāvae ʻa e Meʻa Kuo Fakahoko ʻe he ʻOtuá

“ʻOku ʻikai te na kei ua, ka ko e kakano pe taha. ʻAua; pea ko e meʻa kuo fakahoko ʻe he ʻOtua, ke ʻoua naʻa fakamavae ʻe ha tangata.”​—MĀTIU 19:6.

1, 2. Ko e hā ʻoku fakatou Fakatohitapu ai mo totonu ke ʻamanekina ko e ngaahi hoa malí ʻe ʻi ai ʻenau ngaahi palopalema ʻi he taimi ki he taimi?

FAKAʻUTA atu ʻokú ke teu ke kamata ha fononga meʻalele lōloa. Te ke fehangahangai mo ha ngaahi palopalema ʻi he halá? ʻE fakavalevale ke pehē heʻikai hoko! Ko e fakatātaá, te ke fetaulaki nai mo e kovi ʻa e ʻeá, ʻo fiemaʻu ai ke ke lele māmālie pea hokohoko atu fakataha mo e tokanga. ʻE aʻu ki ha tuʻunga te ke fetaulaki nai ai mo ha palopalema ʻi he mīsiní heʻikai malava ke ke fakaleleiʻi, ʻo fiemaʻu ai ke ke tuʻu he veʻehalá ʻo kumi tokoni. ʻOku totonu ke fakatupunga ʻe he ngaahi tuʻunga peheé ke ke fakaʻosiʻaki ai naʻe hala hoʻo kamata fonongá pea ʻoku totonu ke ke liʻaki ʻa e meʻalelé? ʻIkai. ʻI he fononga lōloá, ʻokú ke ʻamanekina ʻa e ngaahi palopalema pea kumi fakapotopoto ki he ngaahi founga ke fekuki ai mo ia.

² Ko e meʻa tatau pē ʻi he nofo malí. ʻOku taʻealakalofi ʻa e ngaahi palopalemá, pea ʻe fakavalevale ki ha ongo meʻa ʻokú na fakakaukau ke mali ke na ʻamanekina ha moʻui ʻe fiefia fakaʻaufuli. ʻI he 1 Kolinito 7:28 (PM), ʻoku fakahaaʻi totonu ai ʻe he Tohi Tapú ko e ngaahi husepānití mo e ngaahi uaifí “te nau maʻu ekinautolu ae mamahi i he jino.” Ko e hā ko e tuʻungá ai ení? ʻI hono ʻai mahinó, koeʻuhí ko e ngaahi husepānití mo e ngaahi uaifí ʻoku nau taʻehaohaoa, pea ʻoku tau moʻui ʻi he “ngaahi taimi faingataʻa.” (2 Timote 3:1; Loma 3:23) Ko ia ai, naʻa mo ha ongo meʻa hoamālie, mo tokanga ki he meʻa fakalaumālié te na fehangahangai ʻi he taimi ki he taimi mo e ngaahi palopalema.

3. (a) ʻOku anga-fēfē ʻa e vakai ʻa e tokolahi ʻi he māmaní ki he nofo malí? (e) Ko e hā ʻoku feinga ai ʻa e kau Kalisitiané ke fakatolonga ʻenau nofo malí?

³ ʻI he māmani ʻi onopōní, ʻi he taimi ʻoku fetaulaki ai ʻa e ngaahi hoa mali ʻe niʻihi mo e ngaahi palopalemá, ko ʻenau ʻuluaki tali pē ki aí ke fakangata ʻa e nofo malí. ʻI he ngaahi fonua lahi, ʻoku mahiki ai he ʻataá ʻa e tuʻunga ʻo e vete malí. Kae kehe, ko e kau Kalisitiane moʻoní ʻoku nau fakaleleiʻi ʻa e ngaahi palopalemá kae ʻikai hola mei ai. Ko e hā hono ʻuhingá? Koeʻuhi oku nau vakai ki he nofo malí ko ha meʻaʻofa maʻongoʻonga ia meia Sihova. Naʻe pehē ʻe Sīsū fekauʻaki mo e ngaahi hoa malí: “Ko e meʻa kuo fakahoko ʻe he ʻOtua, ke ʻoua naʻa fakamavae ʻe ha tangata.” (Mātiu 19:6) Ko ia ai, ko e moʻui ʻo fakatatau ki he tuʻunga ko iá ʻoku ʻikai maʻu pē ke faingofua. Hangē ko ení, ko e ngaahi kāingá mo e niʻihi kehé​—ʻo kau ai ʻa e kau faleʻi ʻe niʻihi ʻo e nofo malí—​ʻa ia ʻoku ʻikai te nau ʻiloʻi ʻa e ngaahi tefitoʻi moʻoni Fakatohitapú ʻoku nau faʻa fakaʻaiʻai ʻa e ngaahi hoa malí ke nau māvae pe vete ʻi he ngaahi ʻuhinga taʻefakatohitapu.a Ka ʻoku ʻiloʻi ʻe he kau Kalisitiané ʻoku lelei mamaʻo ange ke fakaleleiʻi mo fakatolonga ha nofo mali ʻi hono fakangata fakavave iá. Ko e moʻoni, ʻoku mātuʻaki mahuʻinga ke tau fakapapauʻi ʻi he kamatá pē ke fai ʻa e ngaahi meʻá ʻi he founga ʻa Sihová—ʻo ʻikai fakatatau ki he faleʻi ʻa e niʻihi kehé.—Palovepi 14:12.

ʻIkuʻi ʻo e Ngaahi Faingataʻá

4, 5. (a) Ko e hā ʻa e ngaahi palopalema kuo pau ke fetaulaki mo ia ʻi ha nofo mali? (e) Ko e hā ʻoku ola lelei moʻoni ai ʻa e ngaahi tefitoʻi moʻoni ʻoku maʻu ʻi he Folofola ʻa e ʻOtuá, naʻa mo e taimi ʻoku malanga hake ai ʻa e ngaahi palopalema ʻi he nofo malí?

⁴ Ko hono moʻoní ko e nofo mali kotoa pē ʻoku fiemaʻu ki ai ʻa e tokanga ʻi he taimi ki he taimi. ʻI he ngaahi tuʻunga lahi tahá, ʻe kau ki he meʻa ko iá ʻa hono fakaleleiʻi ʻo e fanga kiʻi taʻefelotoi iiki. Neongo ia, ʻi he ngaahi nofo mali ʻe niʻihi, ʻoku ʻi ai nai ʻa e ngaahi palopalema mafatukituki ange ʻokú ne fakamanamanaʻi ʻa e tuʻunga tefito ʻo e vahaʻangataé. ʻI he taimi ʻe niʻihi, ʻe fiemaʻu nai ai ke ke kole tokoni ki ha mātuʻa mali Kalisitiane taukei. Kae kehe, ko e ngaahi tuʻungá ni ʻoku ʻikai ʻuhinga ai iá ʻoku taʻelavameʻa ʻa hoʻo nofo malí. ʻOku fakamamafaʻi pē ai ʻa e mahuʻinga ʻo e pipiki ofi ki he ngaahi tefitoʻi moʻoni Fakatohitapú ʻi he kumi ki he ngaahi fakaleleiʻangá.

⁵ ʻI hono tuʻunga ko e Tokotaha-Fakatupu ʻo e matakali ʻo e faʻahinga ʻo e tangatá mo e Tupuʻanga ʻo e fokotuʻutuʻu ki he nofo malí, ʻoku ʻafioʻi lelei ange ʻe Sihova ʻi ha toe taha ʻa e meʻa ʻoku tau fiemaʻu koʻeuhi ke maʻu ai ha vahaʻangatae fakaemali lavameʻá. Ko e fehuʻí, Te tau fanongo ki he faleʻi ʻoku maʻu ʻi heʻene Folofolá pea talangofua ki ai? Te tau maʻu ʻaonga moʻoni ʻo kapau te tau fai pehē. Naʻe fakahaaʻi ʻe Sihova ki hono kakai ʻi he kuonga muʻá: “Taumaiā naʻa ke tokanga ki heʻeku ngaahi tuʻutuʻuni! pehe kuo hange ha vaitafe hoʻo fiemalie, pea ko hoʻo [maʻoniʻoni] hange ko e ngaahi peau ʻo e tahi.” (Aisea 48:18) Ko e pipiki ki he ngaahi fakahinohino ʻoku fokotuʻu ʻi he Tohi Tapú ʻe lava ke ne ʻai ke lavameʻa ha nofo mali. Tau ʻuluaki lāulea angé ki he akonaki ʻoku ʻomai ʻe he Tohi Tapú ki he ngaahi husepānití.

Hokohoko “ʻOfa ki Homou Ngaahi Uaifi”

6. Ko e hā ʻa e akonaki Fakatohitapu ki he ngaahi husepānití?

⁶ Ko e tohi ʻa e ʻapositolo ko Paulá ki he kau ʻEfesoó ʻoku ʻi ai ʻa e ngaahi fakahinohino māʻalaʻala ki he ngaahi husepānití. Naʻe tohi ʻe Paula: “ʻA e kau tangata, mou ʻofa ki homou ngaahi uaifi, ʻo hange foki ko Kalaisi ne ne ofaʻi ʻa e Siasi, ʻo ne liʻoa ʻa ʻEne ʻAfio koeʻuhi ko ia: ʻOku totonu ke pehe foki ʻa e ʻofa ʻa e ngaahi husepaniti ki siʻonau ngaahi uaifi, he ko siʻonau sino kinautolu. Ko ia ʻoku ne ʻofa ki hono uaifi ʻoku ne ʻofa kiate ia. Seuke, ʻanefē ia ʻa e fehiʻa ʻa ha taha ki hono kakano oʻona; kaekehe ʻoku ne fafanga mo tauhi ia, ʻo hangē foki ko e fai ʻa Kalaisi ki he Siasi. Ka ko kimoutolu foki fakafoitangata—ʻe, ke taki taha ʻofa ki siʻono uaifi ʻo hange ko ʻene ʻofa kiate ia.”—Efeso 5:​25, 28, 29, 33.

7. (a) Ko e hā ʻoku totonu ke hoko ko e konga tuʻu-ki-muʻa ʻo e makatuʻunga ʻo ha nofo mali Kalisitiané? (e) ʻI he founga fē ʻe hokohoko atu ai ʻa e ngaahi husepānití ke ʻofa ki honau ngaahi uaifí?

⁷ ʻOku ʻikai ke lāulea ʻa Paula ki he palopalema kotoa pē ʻoku ala hoko ʻa ia ʻe malanga hake nai ʻi he vahaʻa ʻo ha husepāniti mo ha uaifi. ʻI hono kehé, ʻokú ne aʻu ki he tefito ʻo e palopalemá ʻaki hono fakahaaʻi ʻa e meʻa ʻoku totonu ke hoko ko ha konga tuʻu-ki-muʻa ʻo e makatuʻunga ki he nofo mali Kalisitiane kotoa pē—ko e ʻofá. Ko hono moʻoní, ʻoku lave tuʻo ono ki he ʻofá ʻi he ngaahi veesi ʻi ʻolungá. Toe fakatokangaʻi foki ʻoku tala ʻe Paula ki he ngaahi husepānití: “[Hokohoko] ʻofa ki homou ngaahi uaifi.” ʻOku ʻikai ha veiveiua, naʻe ʻiloʻi ʻe Paula ko e kamata ke ʻofá ʻoku ngali faingofua ange ia ʻi he nofo maʻu ʻi he ʻofá. ʻOku tautefito ʻene peheé lolotonga ʻa e “kuonga fakamui” ko ení, ʻa ia ko e tokolahi ai ʻoku “nau ʻofa kiate kinautolu pe” pea “taʻe fakamolemole.” (2 Timote 3:​1-3) Ko e ngaahi ʻulungāanga kovi peheé ʻokú ne veuki ʻa e ngaahi nofo mali lahi he ʻahó ni, ka ko ha husepāniti ʻofa heʻikai te ne tuku ʻa e ngaahi tōʻonga siokita ʻa e māmaní ke ne tākiekina ʻa ʻene fakakaukaú mo e tōʻongá.—Loma 12:2.

ʻE Lava Fēfē Ke Ke Tokangaʻi e Fiemaʻu ʻa Ho Uaifí?

8, 9. ʻI he ngaahi founga fē ʻoku tokangaʻi ai ʻe ha husepāniti Kalisitiane ʻa e fiemaʻu ʻa hono uaifí?

⁸ Kapau ko ha husepāniti Kalisitiane koe, ʻe lava fēfē ke ke talitekeʻi ʻa e ngaahi hehema siokitá pea fakahāhā ʻa e ʻofa moʻoni ki ho uaifí? ʻI heʻene lea ki he kau ʻEfesoó naʻe lave ki ai ki muʻá, naʻe fakahaaʻi ai ʻe Paula ʻa e meʻa ʻe ua ʻoku fiemaʻu ke ke fai—tokonaki maʻa ho uaifí, pea tauhi ia ʻo hangē tofu pē ko hoʻo fai ki ho sino ʻoʻoú. ʻE lava fēfē ke ke tokangaʻi e fiemaʻu ho hoá? Ko e founga ʻe taha ko e tokangaʻi fakamatelie—ko hono tokangaʻi ʻa e ngaahi fiemaʻu fakaesino ʻa ho uaifí. Naʻe tohi ʻa Paula kia Tīmote: “Ka ʻo ka ai ha taha ʻoku ʻikai tokanga ki hono kainga, kaeʻumaʻā hono famili, ʻoku ne fakaʻikaiʻi ʻene lotu, ʻio, ʻoku ne koviange ʻi ha hiteni.”​—1 Timote 5:8.

⁹ Kae kehe, ʻoku kau ki ai ʻa e meʻa lahi ange ʻi hono tokangaʻi pē ʻo e meʻakai, vala mo e maluʻangá. Ko e hā hono ʻuhingá? Koeʻuhí ʻe lava ke lelei ʻaupito ha husepāniti ʻi hono tokonaki mai ʻa e ngaahi fiemaʻu fakamatelie ʻa hono uaifí ka neongo ia ʻokú ne tōnounou ʻi hono fakalato ʻa ʻene ngaahi fiemaʻu fakaeongó mo fakalaumālié. Ko hono tokangaʻi ʻene fiemaʻú ʻi he ongo meʻa fakamuimuí ʻoku mātuʻaki fiemaʻu. Ko e moʻoni, ʻoku femoʻuekina ʻaupito ʻa e kau tangata Kalisitiane tokolahi ʻi hono tokangaʻi ʻa e ngaahi meʻa felāveʻi mo e fakatahaʻangá. Ka ko hono maʻu ʻa e ngaahi fatongia fakaefakatahaʻanga mafatukitukí ʻoku ʻikai ʻuhinga iá ʻe totonu ke liʻaki ai ʻe ha husepāniti ia hono fakahoko ʻa hono ngaahi fatongia kuo ʻoange ʻe he ʻOtuá ʻi he tuʻunga ko ha ʻulu ʻi he fāmilí. (1 Timote 3:​5, 12) ʻI he lave ki he meʻá ni, naʻe fai ai ʻe he pepá ni ʻi he ngaahi taʻu kuo maliu atú ʻa e fakamatala ko ení: “ʻI he fakatatau ki he ngaahi fiemaʻu Fakatohitapú, ʻoku lava ke pehē ko e ‘ngāue tauhí ʻoku kamata ia ʻi ʻapi.’ Kapau ʻoku liʻaki ʻe ha mātuʻa ʻa hono fāmilí, ʻoku lava ke mole ai meiate ia ʻa hono monū ʻo e hoko ko ha mātuʻá.”b ʻOku hā mahino, ʻoku fiemaʻu ke ke tokangaʻi e fiemaʻu ho uaifí—fakaesino, fakaeongo pea mahulu ai ʻa e fiemaʻu fakalaumālié.

ʻOku ʻUhinga ki he Hā ʻa e Tauhi Ho Uaifí?

10. ʻOku lava fēfē ke tauhi ʻe ha husepāniti ʻa hono uaifí?

¹⁰ Kapau ʻokú ke tauhi ho uaifí, ʻokú ke tokangaʻi lelei ia koeʻuhí ʻokú ke ʻofa ʻiate ia. ʻOku lahi ʻa e ngaahi founga ʻa ia ʻe lava ke ke fai ai ení. ʻUluakí, fakamoleki ʻa e taimi feʻunga mo ho hoá. Kapau ʻokú ke liʻaki ho uaifí ʻi he meʻá ni, ʻe hoko nai ai ʻo momoko ʻene ʻofa kiate koé. Toe fakakaukau foki, ko e meʻa ʻokú ke pehē ko e lahi ia ʻo e taimi mo e tokanga ʻoku fiemaʻu ʻe ho uaifí ʻoku ʻikai nai ko e meʻa ia ʻokú ne ongoʻi ʻokú ne fiemaʻú. Heʻikai lava ke ke pehē pē ʻokú ke tauhi ho hoá. Kuo pau ke ongoʻi ʻe ho uaifí ʻoku tauhi ia. Naʻe tohi ʻe Paula: “Ke ʻoua naʻa kumi ʻe ha taha ʻene lelei aʻana, ka ko e lelei ʻa e taha.” (1 Kolinito 10:24) ʻI he hoko ko ha husepāniti ʻofá, ʻokú ke loto ke fakapapauʻi ʻokú ke mahinoʻi ʻa e ngaahi fiemaʻu moʻoni ʻa ho uaifí.—Filipai 2:4.

11. ʻOku anga-fēfē hono uesia ʻa e vahaʻangatae ʻo ha husepāniti mo e ʻOtuá pea mo e fakatahaʻangá ʻi he anga ʻo ʻene tōʻongafai ki hono uaifí?

¹¹ Ko e toe founga ʻe taha ke fakahaaʻi ai ʻokú ke tauhi ho uaifí ko e fai fakaalaala kiate ia, fakatouʻosi ʻi he leá pea mo e ngāué. (Palovepi 12:18) Naʻe tohi ʻa Paula ki he kau Kolosé: “Ae kau tagata, ofa ki ho mou unoho, bea oua naa fai aga fakaita kiate kinautolu.” (Kolose 3:​19, PM) Fakatatau ki he maʻuʻanga fakamatala ʻe taha, ko e konga fakaʻosi ʻo e lea ʻa Paulá ʻe lava ke fakalea fakaefakatātā ia ʻo pehē “ʻoua ʻe fai kiate ia ʻo hangē ha sevāniti ʻo e ʻapí” pe “ʻoua ʻe ʻai ia ke ne hangē ha pōpulá.” Ko ha husepāniti ʻoku fakaaoao—ʻi he tuʻunga tāutahá pe ʻi he kakaí—ʻoku ʻikai moʻoni te ne fakahaaʻi ʻokú ne tauhi ʻa hono uaifí. ʻI he tōʻongafai anga-fefeka ki hono uaifí, ʻe lava ke ne uesia ai hono vahaʻangatae mo e ʻOtuá. Naʻe tohi ʻa e ʻapositolo ko Pitá ki he ngaahi husepānití: “Ke mou nonofo mo [homou ngaahi uaifí] o fakatatau ki he ilo, o fakaabaaba ki he unoho, o tāu moe ibu vaivai, bea ke hage koe kauga hoko mo ia ki he ofa fakamoui; bea koeuhi ke oua naa taofia hoo mou gaahi lotu.”c—1 Pita 3:​7, PM.

12. Ko e hā ʻe lava ke ako ʻe ha husepāniti Kalisitiane mei he anga ʻo e tōʻongafai ʻa Sīsū ki he fakatahaʻanga Kalisitiané?

¹² ʻOua ʻaupito ʻe fakamaʻamaʻaʻi ʻa e ʻofa ʻa ho uaifí. Fakapapauʻi kiate ia ʻa hoʻo ʻofa taʻetūkuá. Naʻe fokotuʻu ʻe Sīsū ha faʻifaʻitakiʻanga ki he ngaahi husepāniti Kalisitiané ʻi he anga ʻo ʻene tōʻongafai ki he fakatahaʻanga Kalisitiané. Naʻá ne anga-malū, anga-lelei pea faʻa fakamolemole—naʻa mo e taimi naʻe toutou fakahāhā ai ʻe hono kau muimuí ʻa e ngaahi anga ʻoku ʻikai leleí. Naʻe lava ke pehē ai ʻe Sīsū ki he niʻihi kehé: “Haʻu kiate au, . . . he ʻoku ou faʻa kataki mo angafākatuʻa, pea te mou ʻilo ha mālōlō ʻi homou laumalie.” (Mātiu 11:​28, 29) ʻI he faʻifaʻitaki kia Sīsuú, ko ha husepāniti Kalisitiane ʻokú ne tōʻongafai ki hono uaifí ʻi he founga tatau mo e tōʻongafai ʻa Sīsū ki he fakatahaʻangá. Ko ha tangata ʻokú ne tauhi moʻoni ʻa hono uaifí, ʻo fakahaaʻi eni ʻi he lea mo e ngāue, ʻe hoko ia ko ha matavai ʻo e fakaivifoʻou moʻoni ki he uaifí.

Ngaahi Uaifi ʻOku Nau Moʻui ʻAki ʻa e Ngaahi Tefitoʻi Moʻoni Fakatohitapú

13. Ko e hā ʻa e ngaahi tefitoʻi moʻoni ʻoku ʻi he Tohi Tapú ʻe lava ke tokoni ki he ngaahi uaifí?

¹³ ʻOku toe ʻi he Tohi Tapú ʻa e ngaahi tefitoʻi moʻoni ʻa ia ʻe lava ke tokoni ki he ngaahi uaifí. ʻOku pehē ʻi he Efeso 5:​22-​24, 33: “ʻA e kau fefine, mou anganofo ki siʻomou ngaahi husepaniti, ʻo hange ki he ʻEiki. He ko e husepaniti ko e ʻulu ʻo e uaifi, ʻo hange foki ko Kalaisi ko e ʻulu ʻo e Siasi; ʻio ko ia ia ko e fakamoʻui ʻo e sino. Ka neongo ia, kae hange ʻoku anganofo ʻa e Siasi kia Kalaisi, ke pehe foki mo e kau fefine ki honau ngaahi husepaniti ʻi he meʻa kotoa. . . . ko e uaifi ke ne fakaʻapaʻapa ki hono husepaniti.”

14. Ko e hā ʻoku ʻikai fakamāʻulaloʻi ai ʻa e kakai fefiné ʻi he tefitoʻi moʻoni Fakatohitapu ʻo e anganofó?

¹⁴ Fakatokangaʻi ʻa e fakamamafa naʻe fai ʻe Paula ki he anganofó mo e fakaʻapaʻapá. ʻOku fakamanatu ki ha uaifi ke ne anganofo ki hono husepānití. ʻOku fehoanaki eni mo e fokotuʻutuʻu ʻa e ʻOtuá. Ko e meʻamoʻui kotoa pē ʻi langi pea ʻi māmani ʻoku anganofo ia ki ha taha. Naʻa mo Sīsū ʻokú ne anganofo kia Sihova ko e ʻOtuá. (1 Kolinito 11:3) Ko e moʻoni, ko ha husepāniti ʻokú ne ngāueʻi ʻa hono tuʻunga-ʻulú ʻi ha founga totonú te ne ʻai ai ke faingofua ange ki hono uaifí ke anganofo ai pē.

15. Ko e hā ʻa e akonaki ʻe niʻihi ki he ngaahi uaifí ʻoku maʻu ʻi he Tohi Tapú?

¹⁵ Naʻe toe fakahaaʻi ʻe Paula ʻoku totonu ki ha uaifi “ke ne fakaʻapaʻapa ki hono husepaniti.” Ko ha uaifi Kalisitiane ʻoku totonu ke ne fakahāhā ha laumālie “angavavai mo e angamalū,” ʻo ʻikai fehuʻia anga-hīkisia ʻa e mafai ʻo hono husepānití pe fou ʻi ha ʻalunga faʻifaʻiteliha. (1 Pita 3:4) Ko ha uaifi anga-fakaʻotua ʻokú ne ngāue mālohi ki he lelei ʻa e fāmilí pea ʻoatu ai ʻa e lāngilangi ki hono ʻulú. (Taitusi 2:​4, 5) Te ne feinga ke lea lelei fekauʻaki mo hono husepānití pea ko ia ʻoku ʻikai ai te ne fai ha meʻa ke fakatupunga ʻa e niʻihi kehé ke nau taʻefakaʻapaʻapa ki he husepānití. Te ne toe ngāue mālohi ke ʻai ke lavameʻa ʻa e ngaahi fili ʻa hono husepānití.​—Palovepi 14:1.

16. Ko e hā ʻe lava ke ako ʻe he ngaahi uaifi Kalisitiané mei he faʻifaʻitakiʻanga ʻa Sela mo Lepeká?

¹⁶ Ko hono maʻu ʻo ha laumālie anga-vaivai mo anga-maluú ʻoku ʻikai ʻuhinga iá ʻoku ʻikai ʻi ai ha ngaahi fakakaukau ia ʻa ha fefine Kalisitiane pe ko ʻene fakakaukaú ʻoku taʻemahuʻinga. Ko e kakai fefine anga-fakaʻotua ʻo e kuonga muʻá, hangē ko Sela mo Lepeká, naʻá na tamuʻomuʻa ke fakahā ʻena hohaʻa fekauʻaki mo e ngaahi meʻá, pea ʻoku fakahaaʻi ʻi he lēkooti he Tohi Tapú naʻe hōifua ʻa Sihova ki heʻena ngāué. (Senesi 21:​8-​12; 27:46–28:4) Ko e ngaahi uaifi Kalisitiané foki ʻoku lava ke nau ʻai ke ʻiloʻi ʻenau ngaahi ongoʻí. Kae kehe, ʻoku totonu ke nau fai pehē ʻi he anga-fakaʻatuʻi, ʻo ʻikai ʻi ha tō ʻo e leʻó ʻoku fai ai ʻa e fakamāʻulaloʻi. ʻOku ngalingali te nau ʻiloʻi ʻe toe lelei ange ai mo ʻaonga ʻenau fetuʻutaki peheé.

Ko e Ngafa ʻo e Tukupaá

17, 18. Ko e hā ʻa e niʻihi ʻo e ngaahi founga ʻa ia ʻoku lava ke talitekeʻi ai ʻe he ngaahi husepānití mo e uaifí ʻa e ngaahi feinga ʻa Sētane ke veuki ʻa e fāʻūtaha ʻo e nofo malí?

¹⁷ Ko e malí ko ha tukupā ia ʻi he kotoa ʻo e moʻuí. Ko ia ai, ko e husepānití mo e uaifí fakatouʻosi ʻoku totonu ke na maʻu ha holi moʻoni ke ʻai ke lavameʻa ʻena nofo malí. Ko e ʻikai ha fetuʻutaki hangatonú ʻe lava ke ne ʻai ke fakautuutu ʻa e palopalemá ʻo hoko ai ko ha meʻa mafatukituki. ʻOku faʻa tuku ʻa e fetuʻutaki ʻa e ongo meʻa malí ʻi he taimi ʻoku hoko ai ʻa e ngaahi palopalemá, ʻo fakatupunga loto-mamahi. ʻOku aʻu ʻo kumi ʻa e ngaahi hoa mali ʻe niʻihi ki ha founga ke fakangata ai honau vahaʻangataé, ʻi hono fakatupulekina nai ha mahuʻingaʻia fakaemanako ʻi tuʻa mei he nofo malí. Naʻe fakatokanga ʻa Sīsū: “ʻIlonga ʻa ia te ne fakasio ki ha fefine ke tafunaki ʻene holi ki ai, kuo ne tonoʻi ia ʻi hono loto.”—Mātiu 5:28.

¹⁸ Naʻe akonaki ʻa e ʻapositolo ko Paulá ki he kau Kalisitiané kotoa, ʻo kau ai ʻa e kau Kalisitiane malí: “ʻIta pe, kae ʻoua ʻe angahala ai: ʻoua ʻe tuku ke to ʻa e laʻa ʻoku mou kei mamahi; kaeʻumaʻā, ʻoua naʻa tuku ha ava ki he Tevolo.” (Efeso 4:​26, 27) Ko hotau fili tefitó, ʻa Sētane, ʻokú ne feinga ke ngāueʻaongaʻaki ʻa e ngaahi tō kehekehe ʻoku malanga hake nai ʻi he vahaʻa ʻo e kau Kalisitiané. ʻOua ʻe tuku ke ne ikuná! ʻI he malanga hake ʻa e ngaahi palopalemá, fekumi ki he meʻa ʻoku leaʻaki ʻe he Tohi Tapú fekauʻaki mo e fakakaukau ʻa Sihova ki he ngaahi meʻa ko iá, ʻo ngāueʻaki ʻa e ʻū tohi makatuʻunga ʻi he Tohi Tapú. Lāulea anga-mokomoko mo faitotonu ki he ngaahi tō kehekehé. ʻAi ke fehoanaki ʻa e meʻa ʻokú ke ʻilo fekauʻaki mo e ngaahi tuʻunga ʻa Sihová mo e meʻa moʻoni ʻokú ke faí. (Semisi 1:​22-​25) ʻI he fekauʻaki mo hoʻo nofo malí, fakapapauʻi ke hokohoko atu ʻa e ʻaʻeva mo e ʻOtuá ʻi he tuʻunga ko ha ongo meʻa mali, pea ʻoua ʻe tuku ha taha pe ko ha meʻa pē ke ne fakamāvae ʻa e meʻa kuo fakahoko ʻe he ʻOtuá!—Maika 6:8.

[Fakamatala ʻi lalo]

ʻOkú Ke Manatuʻi?

• Ko e hā ʻoku aʻu ai ʻo lava ke hokosia ʻe he ngaahi nofo mali Kalisitiané ʻa e ngaahi palopalemá?

• ʻOku lava fēfē ke tokangaʻi ʻe ha husepāniti ʻa e fiemaʻu ʻa hono uaifí pea fakahāhā ʻokú ne tauhi ia?

• Ko e hā ʻoku lava ke fai ʻe ha uaifi ke fakahāhā ai ʻokú ne fakaʻapaʻapa loloto ki hono husepānití?

• ʻE lava fēfē ke ʻai ʻe ha husepāniti mo ha uaifi ke mālohi ʻa ʻena tukupaá?

[Fakatātā ʻi he peesi 20]

Ko ha husepāniti ʻoku totonu ke ne hoko ko ha tokotaha tokonaki lelei, ʻo ʻikai ʻi he fakamatelié pē ka ʻi he fakalaumālié foki

[Fakatātā ʻi he peesi 21]

Ko ha tangata ʻokú ne tauhi ʻa hono uaifí ko ha matavai ia ʻo e fakaivifoʻou kiate ia

[Fakatātā ʻi he peesi 23]

Ko e ngaahi uaifi Kalisitiané ʻoku nau ʻai ke ʻiloʻi ʻenau ngaahi ongoʻí ʻi ha founga fakaʻapaʻapa