Ko Hono Liliu ʻa e Anga Fakaetangatá

“ʻOKU ʻikai ke moʻui pē ʻa e tangatá ʻi he faitau mo e ngaahi koví. ʻOku nau moʻui ʻi he ngaahi taumuʻa pau, fakafoʻituitui mo fakatahatahaʻi,” ko e lau ia ʻa filōsefa Sir Isaiah Berlin. Ka ko e toko fiha ʻoku nau maʻu ʻa e “ngaahi taumuʻa pau” peheé? ʻOku faʻa hehema ʻa e anga fakaetangatá ki he meʻa ʻoku taʻepau mo fakatupu ʻauha.

Hangē ko ʻení, ʻi Pilitānia, naʻe toki mahiki hake ʻaki ʻa e peseti ʻe 11 ʻa e ngaahi faihia ʻo e fakamālohí. ʻOku pehē ʻe he palēmia Pilitāniá: “Ko ʻetau ngāué ke feinga ke maʻu ha ngaahi meʻa ke taʻofiʻaki koeʻuhi kae lava ke hoko atu ʻa e sivilaise lahí.” Ka ʻe lava ʻe he ngaahi lao mo e ngaahi tenge fakapolitikalé, neongo ʻoku taumuʻa lelei, ke liliu moʻoni ʻa e hehema ʻa e kakaí ke fai ʻa ia ʻoku halá? Ko e moʻoniʻi meʻa ʻoku ʻi ai ʻa e maumaulao pea ʻoku fakautuutu ia neongo ʻa e ngaahi laó, pea neongo ʻoku fakahoko ʻa e laó, ʻokú ne fakahā ʻoku ʻikai malava ke nau fai eni. ʻOku fiemaʻu ʻa e meʻa lahi ange ia ʻi he ngaahi meʻa taʻofi fakaelaó. Kuo pau ke liliu ʻa e anga ʻo e kakaí.

ʻI hono fai ha vakai moʻoni ki he moʻuí ʻoku fakamatalaʻi ʻe he Tohitapu ʻa e ngaahi fasi-ʻa-anga kovi ʻo e tangatá. Hangē ko ʻení, naʻe tohi ʻa e ʻapositolo ko Paulá ki hono kaungā Kalisitiane ʻi Kalētiá ʻo kau ki he “ngaahi tōʻonga taʻetaau, mousaʻa mo fakalielia . . . ʻOku hoko ʻa e kakai ko e ngaahi fili pea ʻoku nau fuhu; ʻoku nau hoko ʻo fuaʻa, ʻita pea . . . ʻoku nau meheka, hoko ʻo konā, fai ʻa e ngaahi kātoanga konā mo longoaʻa, pea fai ʻa e ngaahi meʻa kehe ʻo hangē ko eni.” Fakatatau ki he Today’s English Version, ʻa ia ʻoku lave ki ai heni, ko e ngaahi tōʻonga ololalo kotoa ko ʻení “ko e ngaahi meʻa ia ʻoku fai ʻe he anga fakaetangatá.”​—Kalētia 5:​19-21.

Ko e Aka ʻo e Palopalemá

Kaekehe, ko e Today’s English Version ko e liliu tauʻatāina pē ia pea ko e kupuʻi lea “ko e ngaahi meʻa ia ʻoku fai ʻe he anga fakaetangatá” ko hono ʻai ia ke mahino ange ʻa e lea naʻe fai moʻoni ʻe Paulá. Ko e foʻi lea faka-Kalisi naʻe ngāueʻaki ʻe Paula ko e sarx, ko hono ʻuhingá ko e “kakano,” kae ʻikai ko e “anga fakaetangata.” ʻI he ʻuhinga ko ʻení, ko e liliu totonu ʻoku lave ki ai heni ʻo kau ki he “ngaahi ngāue ʻa e kakano” ko hono ʻomai totonu ia ʻa e fakamatala ʻa Paulá ki heʻetau lea ʻi he ʻaho ní.a

Ko e fakamatala ʻa e Tohitapú ki he hū mai ʻa e angahalá ki he faʻahinga ʻo e tangatá ʻoku mahino mo faingofua​—ko hono moʻoní, ʻoku faingofua fau ʻoku fili ai ʻe he tokolahi ke ʻoua te nau tui ki ai. Ko e anga ʻeni ʻa hono fakamatalaʻi ʻe Paulá: “Mo e hoko ʻa e angahala ki mamani, ʻi he tangata pe taha; mo e hoko ʻa e mate ʻi he angahala; mo ʻene aʻusia pehe ʻa e kakai kotoa pe ʻe he mate, koeʻuhi ne angahala kotoa pe.” (Loma 5:12) Ko e lave ʻeni ʻa Paula kia Sēnesí, ko e ʻuluaki tohi ʻo e Tohitapú, pea ki he fakatupu ʻo e ʻuluaki tangatá, ko ʻĀtama, mo hono uaifi ko ʻIví. ʻOku ʻiloa ʻa ʻena talangataʻa loto pē ki aí. Koeʻuhi ko e meʻá ni, naʻe tautea ai ke na mate. Naʻe maʻu tukufakaholo ʻe hona hakó ʻa ʻena taʻehaohaoá pea naʻa nau mate foki. Ko ia ai, “kuo fai angahala kotoa pe, pea ʻoku ʻikai te nau aʻusia ʻa e hōifua ʻa e ʻOtua.” ʻI he ʻuhinga tefito ko ʻení, ko e anga fakaetangata ʻo e ʻaho ní ʻoku ʻikai te ne fakahāhā lelei ʻa e anga fakaetangata naʻe ʻi ai ʻi he taimi naʻe fakatupu ai ʻe he ʻOtuá ʻa e tangatá ʻi he tuʻunga haohaoá.​—Loma 3:23; Sēnesi, vahe 2 mo e 3.

ʻOku Liliu ʻa e Anga Fakaetangatá!

Kaekehe, ʻoku malava ke lavaʻi ʻa e ngaahi fasi-ʻa-anga kovi taha ʻo e anga fakaetangatá. Ko hono moʻoní, ʻoku pehē ʻe he Tohitapú ʻe malava ke tau liliu hotau angá ʻi he ʻuhinga ko e liliu hotau angaʻitangatá. ʻO anga-fēfē? ʻI he tokoni ʻa e laumālie māʻoniʻoni ʻo e ʻOtuá.​—Loma 8:9.

ʻOku pehē hono fakalea ʻe Paula ʻi heʻene tohi ki he kaungā Kalisitiane ʻi Kolosé: “Mou huʻihuʻi ʻa e motuʻa tangata, mo ʻene ngaahi falengā ngaue; pea kuo mou ʻai ʻa e tangata foʻou, ʻa ia ʻoku fai ai pe hono fakafoʻou ʻi he ʻimisi ʻo ʻEne ʻAfio naʻa ne ngaohi ia.” ʻOkú ne fakahokohoko ai ʻi he lotolotonga ʻo e ngaahi angafai ʻo e angaʻitangata motuʻá, ʻa e niʻihi ʻo e ngaahi fasi-ʻa-anga ʻokú ne ueʻi ʻa e kakaí ke hehema atu ki he meʻa ʻoku fakatupuʻauhá: holi pango, ʻita, lili, mo e anga-kovi.​—Kolose 3:​5-10.

ʻI heʻene tohi meimei tatau pē ki he kau Kalisitiane ʻi ʻEfesoó, ʻoku toe lave ai ʻa Paula ki he fiemaʻu ʻo e “tangata foʻou,” ʻa ia ʻokú ne tala kiate kinautolu naʻe “ngaohi ke hoko ki he ʻOtua ʻi he angatonu mo e maʻoniʻoni ʻa moʻoni.” ʻOkú ne hoko atu ʻene lavé ʻo pehē: “Ko e fakamahū kotoa pe mo e lili mo e ʻita mo e feʻiohoʻaki mo e lauʻikovi, tuku ke hiki ia meiate kimoutolu, ʻio mo e lotokovi kotoa. Ka mou angaʻofa muʻa ʻi hoʻomou feangai, mo manavaʻofa.”​—ʻEfesō 4:​24, 31, 32.

ʻOku malava ke ngāueʻaki moʻoni ʻa e ngaahi lea ʻa Paulá? ʻOku malava moʻoni ke liliu ʻa e ngaahi angaʻitangatá? Ko e kau muʻaki Kalisitiané naʻa nau fai ha ngaahi liliu lahi ʻaupito ʻi heʻenau ngaahi moʻuí. ʻI he tuʻunga ko ha falukunga kakai, naʻa nau tuʻu makehe mei he māmani takatakai ʻiate kinautolú. Naʻe tohi ʻa Justin Martyr, ko ha faihisitōlia ʻi he taimi ʻo e muʻaki kau Kalisitiané: “Ko kitautolu naʻe fetaufehiʻaʻaki mo fefakaʻauhaʻaki, pea koeʻuhi ko e faikehekehe ʻo e ngaahi ʻulungaangá, naʻa tau fakafisi ke nofo mo e kau tangata ʻo e matakali kehé, ʻi he taimi ko ʻení, talu mei he ʻasi ʻa Kalaisí, ʻoku tau fetuʻutaki lelei mo kinautolu, pea lotu maʻa hotau ngaahi filí, mo feinga ke fakalotoʻi kinautolu ʻoku nau fehiʻa taʻeʻuhinga kiate kitautolú ke nau nofo mo muimui ki he ngaahi tuʻutuʻuni haohaoa ʻa Kalaisí.”

ʻOku fēfē ʻa e ʻahó ni? ʻOku kei malava ke fai ha ngaahi liliu lahi ʻaupito pehē ʻi he anga ʻo ha taha? ʻIo! ʻOku laui mano ʻa e ngaahi faʻifaʻitakiʻanga ʻoku hā ai ʻoku kei fai pē ʻa e ngaahi liliu lahi. Ko e meʻa ʻoku hoko maí ko e taha ia ʻo kinautolu.

Naʻe tupu hake ʻa Sitīveni ʻi he taha ʻo e ngaahi senitā ngāueʻanga ʻo ʻIngilaní. Naʻe ʻikai ke tui ʻene tamaí ki he ʻOtuá. ʻI hono taʻu 12, naʻe tautea ai ʻa Sitīveni ki he taʻu ʻe tolu ʻi ha akoʻanga ki he kau faihia kei taʻu siʻí. Naʻá ne vetehia ki he ngaahi hia kaihaʻa ʻe 64! Naʻe vave ʻa e ʻikai ke toe fakaʻapaʻapa ia ki ha kau maʻu mafai, pea ʻi heʻene tupu haké, naʻe hoko ʻo toe mamafa ange ʻa ʻene ngaahi hiá. Naʻe kau ki ai ʻa e kākā, konā, ʻulungaanga fakamoveuveu, mo e ngaohikoviʻi ʻo ha polisi, pea naʻe tautea ai ʻa Sitīveni ke nofo pilīsone koeʻuhi ko e hia fakamuimui ko ení. Naʻe hoko ʻo fuʻu fakamālohi hono angá. Naʻá ne pehē: “ʻOku ʻikai ha hia ia ʻe taʻelava ke fai ʻe ha tangata fakaʻotuamate ʻo kapau ʻoku lahi feʻunga ʻa ʻene ngaahi fiemaʻu.”

Ko e hā ʻe lava ke ne liliu ha faihia mahimangu pehē? Naʻe faifai atu pē pea naʻe tali ʻe Sitīveni ʻa e tokoni ʻa hono tokoua naʻe hoko ko e taha ʻo e Kau Fakamoʻoni ʻa Sihová. ʻI he hili ʻene ako ʻa e Tohitapú ʻi ha taimi siʻi, naʻe kamata ke ʻai ʻe Sitīveni ʻa e “angaʻitangata foʻou.” Naʻe fakaofo moʻoni ʻa e ngaahi liliu naʻá ne faí. Taimí ni, ʻi he ʻosi ha taʻu ʻe nima mei ai, ʻoku mali fiefia ia pea ko ha mēmipa falalaʻanga ia ʻi ha fakatahaʻanga ʻo e Kau Fakamoʻoni ʻa Sihová, ʻa ia ʻokú ne ngāue ai ko ha sevāniti.

Ko ia ko e anga fakaetangatá ʻe lava ke liliu ʻi he tuʻunga fakafoʻituituí. Ka ko e ngaahi vaivai fakaetangatá ko e ʻuhinga tefito pē ia ki hono ‘fakavaivaiʻi ʻa e nofo fakasivilaise’ ʻi he ʻaho ní?

“Ko e Tevolo ʻo e Tohitapu”

Naʻe tohi ʻe he ʻapositolo ko Paulá ha kikite fakaofo ʻo fekauʻaki mo e ‘ngaahi ʻaho fakaʻosi’ ni. Ko ʻene ngaahi leá ʻoku hā ʻi he puha ʻi ʻolungá. Fakatokangaʻi ko e lahi ange ʻa e fakamālohí mo e faikoví ʻoku hoko ai “ha ngaahi taimi faingataʻa.” Ko e tupu ʻa e ngaahi meʻá ni hono kotoa mei he anga fakaetangatá pē?​—2 Tīmote 3:1.

ʻIkai, ʻoku ʻi ai ha meʻa kehe ia, ko ha mālohi kovi ʻaupito ki he fulikivanú ʻokú ne ngāue kākāʻaki ʻa e ngaahi vaivaiʻanga ʻo e faʻahinga ʻo e tangatá. ʻOku tatau tofu pē mo e faingataʻa ki he kakaí ke tui ki he maʻu ʻe he tangatá ʻa e angahalá ʻi he tukufakaholó, ʻa ʻenau faingataʻaʻia ke tali ʻoku ʻi ai ha mālohi māʻolunga ange ʻi he tangatá ʻokú ne feinga ke ngāue kākāʻaki ia. Ka ʻoku pehē ʻe he Tohitapú ʻoku ʻi ai ʻa e mālohi pehē: ko Sētane ko e Tēvolo.

Ko e foʻi lea “Tēvolo” (ʻoku ʻuhinga, ko e “tokotaha lauʻikovi”) ʻoku hā tuʻo 33 ʻi he Tohitapú, pea ko “Sētane” (ʻoku ʻuhinga, ko e “tokotaha fakafepaki”) ʻoku hā tuʻo 52. Ko e lahi taha ʻo e ngaahi lave ko ʻení ʻoku fekauʻaki mo e tokotaha laumālie angafulikivanu tatau pē. Ka neongo ia, ko e niʻihi ʻoku nau fakaʻikaiʻi ʻa e ʻi ai ha Sētané, ʻo nau pehē: “Ko e anga fakaetangatá mo ʻene hehema ki he angahalá ko e tevolo ia ʻo e Tohitapú.”b Ka neongo ia, ko e meʻa fakatupu tokanga, ʻi he fakamatala ʻo kau ki he sevāniti angatonu ʻa Sihova ko Siope, ʻoku ngāueʻaki ʻe he potutohi lea faka-Hepeluú ʻa e kupuʻi lea ko e has·Sa·tanʹ, ko e Sētane, pea ʻia Luke 4:​2, ʻoku tau lau ai ko e Tēvolo (faka-Kalisi, ho di·aʹbo·los) ia naʻá ne ʻahiʻahiʻi ʻa Sīsuú. (Siope 1:6) ʻI he ongo tuʻunga ko ʻení, ko ha tokotaha pau ʻoku fakahaaʻi fakakalama. ʻOku ʻikai ke kau ai ʻa e anga fakaetangatá.

ʻOku tānaki mai ʻe Paula ke tau maʻu ʻa e mahino ʻo kau ki he lahi ʻa e mālohi ʻa Sētané, ʻi heʻene lave ʻi he tohi ki he kau ʻEfesoó ki he “kau bule oe fakabouli oe mamani, moe kau laumalie kovi i he gaahi botu i oluga.” (ʻEfesō 6:​12, PM) Fakataha mo Sētane ko e Tēvoló, ko e “kau bule . . . oe mamani” ko e fanga temeniō, ko e ngaahi meʻa moʻui laumālie anga-fulikivanu taʻehāmai. ʻOku nau “kākāʻi ʻa mamani kātoa,” ʻo ngaueʻaki ʻa e tuʻunga vaivai ʻo e tangatá ki he lahi taha ʻe malavá. (Fakahā 12:9) Ko e ʻuhinga ʻeni ʻoku ekinaki mālohi ai ʻa Paula ki he Kalisitiane taki taha ke “tuu hake ki he gaahi tuutuuni kākā ae Tevolo.” Ko e fakatupunga tefito ia ʻo e fakaʻau ke kovi ange ʻa e faʻahinga ʻo e tangatá ʻa ia ʻoku tau vakai ʻoku ʻātakaiʻi kitautolú.​—ʻEfesō 6:​11, PM.

Toe Fakafoʻou

Ko Pita, ʻa ia naʻe moʻui taimi tatau mo Paula, ʻokú ne fakapapauʻi kiate kitautolu ʻe ʻikai ke kei ʻi ai pē ʻo taʻengata ʻa Sētane mo ʻene kau temenioó ke fakakoviʻi ʻa e faʻahinga ʻo e tangatá. ʻOkú ne pehē: “Ka ʻi he funga ʻo e talaʻofa ʻa ʻEne ʻAfio ʻoku tau ʻamanaki ki ha ngaahi langi foʻou mo ha fonua foʻou, ʻa ia ʻoku nofoʻanga ai ʻa maʻoniʻoni.” (2 Pita 3:13) Ko e moʻoni, ʻoku vavé ni, ko e kovi mo e kotoa ʻo e ngaahi meʻa ʻoku fekauʻaki mo iá ʻe ʻikai ke kei hoko ia ko e konga ʻo e faʻahinga ʻo e tangatá. ʻE fakaʻauha ʻa Sētane mo ʻene kau temenioó. (Loma 16:20; Fakahā 20:​1-3) ʻI he taimi ko iá, ko e anga fakaetangatá ʻe hā ai ʻa e “langilangi ʻo e ʻOtua,” pea ʻe hoko ʻa e moʻui taʻengatá ko e ʻamanaki papau ki he fāmili ʻo e faʻahinga ʻo e tangatá.​—Loma 3:​23, NW.

Naʻe pehē ʻe he palesiteni ʻAmelika ko Thomas Jefferson: “Kuó u leaʻaki maʻu pē pea te u leaʻaki maʻu pē, ko e faʻa ako mo lau fakatokanga ʻo e Voliume Toputapú ʻe fakatupu ai ha kau tangataʻifonua lelei ange . . . ʻOku ngaohi ʻe he Tohitapú ʻa e kakai lelei taha ʻi he māmaní.” Hangē pē ko ia kuo tau sio ki aí, ko hotau angá ʻe lava pē ke liliu ʻo kapau te tau tuku ha faingamālie ki he pōpoaki mālohi ʻo e Tohitapú ke ne tākiekina ʻetau moʻuí. (Loma 12:2) ʻE lava ke tau fili ke kakapa atu ke tuʻuaki ʻa ia ʻoku fakaʻeiʻeikí mo fakaʻotuá. Pea ke fakatupu mālohi kiate kitautolu ʻi heʻetau feinga ke fakalakalaká, ʻe lava ke tau fili ke feohi mo kinautolu ʻoku nau saiʻia loto moʻoni ke fai ʻa e meʻa tatau. (Hepelū 10:​24, 25) ʻOku fie tokoni ʻa e Kau Fakamoʻoni ʻa Sihová kiate koe ʻi ha tafaʻaki pē ʻe malava. Fēfē ke ke fetuʻutaki kiate kinautolu he taimi̇́ ni!

[Fakamatala ʻi lalo]

[Puha ʻi he peesi 6]

‘KO E NGAAHI ʻAHO FAKAʻOSI’—Ko e Fakamatala ʻa e Tohitapú

“Ka ko eni ʻa e meʻa ke ke sinaki ʻilo ki ai; ka hokosia ʻa e kuonga fakamui, ʻe ai ha ngaahi taimi faingataʻa. He ko hono kakai te nau ʻofa kiate kinautolu pe, te nau ʻofa ki he paʻanga, te nau fielahi, te nau angataʻetokaʻi, te nau lea fieʻotua, te nau talangataʻa ki he matuʻa; ko e kau taʻehounga, ko e kau angataʻemolumalu, ko e kau taʻeʻofa-ki-hoʻota, ko e kau taʻe fakamolemole, ko e kau fakakovi, ko e kau taʻefakamaʻumaʻu, ko e kau angafakamanu, ko e kau taʻeʻofa ki he lelei, ko e kau lavaki, ko e kau ʻohonoa, ko e kau loto ʻaoʻaofia ʻi he ʻafungi, ko e kau ʻofa ki he malie ʻo ʻikai ʻofa ki he ʻOtua, ko e kakai ʻoku maʻu ʻa e ngeʻesi ʻo e lotu, ka kuo nau liʻaki hono kakano: ke ke fulituʻa ki he kakai pehe foki.”​—2 Tīmote 3:​1-5.

[Fakatātā ʻi he peesi 7]

ʻOku vavé ni, pea ʻe fakahāhā kakato mei he anga ʻo e tangatá ʻa e lāngilangi ʻo e ʻOtuá