Founga Ke Tau Kofuʻaki pea Hokohoko Atu Hono ʻAi ʻa e Angaʻitangata Foʻoú

1, 2. (a) ʻOku anga-fēfē ʻetau ʻiloʻi ʻoku malava ke tau kofuʻaki ʻa e angaʻitangata foʻoú? (e) Ko e hā ʻa e ngaahi ʻulungaanga ʻa ia ko e konga ia ʻo e angaʻitangata foʻoú te tau ako ki ai ʻi he Kolose 3:10-14?

ʻI HE Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní, ʻoku tuʻo ua ai ʻetau maʻu ʻa e kupuʻi lea “angaʻitangata foʻou.” (ʻEf. 4:24; Kol. 3:10) ʻOku ʻuhinga ení ki ha angaʻitangata “naʻe fakatupu ʻo fakatatau ki he finangalo ʻo e ʻOtuá.” ʻOku malava ke tau kofuʻaki ʻa e angaʻitangata foʻou ko ení? ʻIo. Naʻe fakatupu ʻe Sihova ʻa e faʻahinga ʻo e tangatá ʻi hono ʻīmisí, ko ia ʻoku malava ai ke tau faʻifaʻitaki ki hono ngaahi ʻulungaanga fakaʻofoʻofá.​—Sēn. 1:26, 27; ʻEf. 5:1.

² Ko e moʻoni koeʻuhí ko ʻetau maʻu tukufakaholo ʻa e taʻehaohaoá, ʻoku tau maʻu kotoa ai ʻa e ngaahi holi fehālaaki ʻi he taimi ʻe niʻihi. ʻOku toe uesia foki kitautolu ʻe hotau ʻātakaí. Ka ʻi he tokoni mohu meesi ʻa Sihová, ʻoku lava ai ke tau hoko ko e faʻahinga kakai ʻokú ne fiemaʻu mai kitautolu ki aí. Ke tokoniʻi kitautolu ke tau fakapapauʻi ke fai ení, tau lāulea angé ki ha ngaahi ʻulungaanga ʻa ia ko e konga ia ʻo e angaʻitangata foʻoú. (Lau ʻa e Kolose 3:10-14.) Pea te tau sio leva ki he founga ʻe lava ke tau fakahāhā ai ʻa e ngaahi ʻulungaanga ko ení ʻi heʻetau ngāue fakafaifekaú.

 3. Ko e hā ʻa e ʻulungaanga ʻe taha ʻa ia ko e konga ia ʻo e angaʻitangata foʻoú?

³ Naʻe fakamatalaʻi ʻe Paula ko e taʻefilifilimānakó ko ha konga mahuʻinga ia ʻo e angaʻitangata foʻoú. Naʻá ne pehē: “ʻOku ʻikai ʻi ai ha faikehekehe ʻi he Kalisí mo e Siú, kamú mo e taʻekamú, muli, Sitia, pōpula, pe tangata tauʻatāiná.”a (Sio ki he fakamatala ʻi lalo.) ʻI he fakatahaʻangá, ʻoku ʻikai totonu ke ongoʻi ʻe ha taha ʻokú ne lelei ange ia ʻi he niʻihi kehé koeʻuhí ko e matakali, fonua pe ko hono tuʻunga ʻi he koló. Ko e hā hono ʻuhingá? Koeʻuhí ʻi he tuʻunga ko e kau muimui ʻo Kalaisí, ʻoku tau “taha pē.”​—Kol. 3:11; Kal. 3:28

 4. (a) ʻOku fiemaʻu ke fēfē ʻa e fakafeangai ʻa e kau sevāniti ʻa Sihová ki he niʻihi kehé? (e) Ko e hā ʻa e tuʻunga ʻe lava ke hoko ko e pole ki he fāʻūtaha faka-Kalisitiané?

⁴ ʻI he taimi ʻoku tau kofuʻaki ai ʻa e angaʻitangata foʻoú, ʻoku tau fakafeangai ai ki he kakai kotoa pē ʻi he anga-fakaʻapaʻapa mo e ngeia, ʻo tatau ai pē pe ko e hā ʻa honau matakalí pe puipuituʻá. (Loma 2:11) ʻI he feituʻu ʻe niʻihi ʻo e māmaní, ʻoku lava ke mātuʻaki faingataʻa eni. Ko e fakatātaá, ʻi he kuohilí ʻi ʻAfilika Tonga, naʻe vaheʻi ai ʻe he puleʻangá ʻa e ngaahi feituʻu ke nofo fakamatakali ai ʻa e kakaí. Ko e tokolahi taha ʻo e kakai aí, ʻo kau ai ʻa e Kau Fakamoʻoní, ʻoku nau kei nofo pē ʻi he feituʻu ko ení. Naʻe fiemaʻu ʻe he Kulupu Pulé ke fakalototoʻaʻi hotau fanga tokouá ke nau “fano atu.” Ko ia ʻi ʻOkatopa 2013, naʻa nau tali ai ha fokotuʻutuʻu makehe ʻa ia naʻe tokoni ia ki he fanga tokoua mei he ngaahi matakali kehekehe ke nau feʻilongaki lelei ange ai.​—2 Kol. 6:13, fakamatala ʻi lalo.

5, 6. (a) Ko e hā ʻa e ngaahi fokotuʻutuʻu naʻe fai ʻi ha fonua ʻe taha ke tokoniʻi ai ʻa e kakai ʻa e ʻOtuá ke nau toe fāʻūtaha angé? (Sio ki he ʻuluaki fakatātā ʻi he kupú ni.) (e) Ko e hā ʻa e ola naʻe maʻu mei aí?

⁵ Naʻe fai ʻe he fanga tokouá ha ngaahi fokotuʻutuʻu ke lava ʻi he fakaʻosinga uike ʻe niʻihi ʻo feohi fakataha ai ʻa e Kau Fakamoʻoni ʻo ha fakatahaʻanga ʻe ua ʻokú na lea kehekehe pe matakali kehekehe. Ko e fanga tokoua mo e fanga tuofāfine mei he ongo fakatahaʻangá naʻa nau kau atu ʻi he ngāue fakamalangá, ʻalu fakataha ki he ngaahi fakatahá, pea feʻaʻahiʻaki ki honau ngaahi ʻapí. Ko e ngaahi fakatahaʻanga ʻe lauingeau naʻa nau kau ʻi he fokotuʻutuʻu ko ení, pea naʻe maʻu ai ʻe he ʻōfisi vaʻá ha ngaahi līpooti lelei. Naʻe aʻu ʻo maongo eni ki he faʻahinga naʻe ʻikai ko e Kau Fakamoʻoni. Ko e fakatātaá, naʻe pehē ʻe ha faifekau ʻe taha: “ʻOku ʻikai ko ha Fakamoʻoni au, ka te u pehē ʻoku mou maʻu ha ngāue fakamalanga ʻoku tuʻu-ki-muʻa ʻene fokotuʻutuʻu māú, pea ʻoku mou fāʻūtaha fakamatakali.” Naʻe fēfē ʻa e ongoʻi ʻa e fanga tokouá mo e fanga tuofāfiné ʻo fekauʻaki mo e fokotuʻutuʻu ko ení?

⁶ ʻI he ʻuluaki taimí, naʻe ongoʻi manavasiʻi ai ha tuofefine lea faka-Kosa ko Noma ke ne fakaafeʻi ʻa e Kau Fakamoʻoni mei he fakatahaʻanga lea faka-Pilitāniá ki hono kiʻi ʻapi masivá. Ka ʻi he hili ʻene malanga fakataha mo e Kau Fakamoʻoni pālangí mo ʻaʻahi ki honau ʻapí, naʻá ne ongoʻi fiemālie ange. Naʻá ne pehē: “Ko e kakai anga-maheni pē kinautolu ʻo hangē ko kitautolú!” Ko ia ʻi he taimi naʻe haʻu ai ʻa e fanga tokoua mo e fanga tuofāfine mei he fakatahaʻanga lea faka-Pilitāniá ʻo malanga fakataha mo e fakatahaʻanga lea faka-Kosá, naʻe fakaafeʻi ai ʻe Noma ʻa e niʻihi ʻo kinautolu ke nau kai ʻi hono ʻapí. Naʻe maongo kiate ia ʻi heʻene fakatokangaʻi atu ʻa e taha ʻo ʻene kau ʻaʻahí, ko ha tokotaha mātuʻa pālangi naʻá ne tangutu fiefia pē ʻi ha kiʻi ngeʻesi puha pelesitiki. Mālō mo e polokalama hokohoko ko ení, ke maʻu ai ʻe he fanga tokouá mo e fanga tuofāfine tokolahi, ha ngaahi kaumeʻa foʻou pea hokohoko atu ai ʻenau maheni mo e faʻahinga mei he ngaahi puipuituʻa kehekehe.

 7. Ko e hā ʻoku fiemaʻu ai ke tau fakahāhā maʻu pē ʻa e manavaʻofá?

⁷ ʻE kei fetaulaki pē ʻa e kakai ʻa Sihová mo e ngaahi ʻahiʻahi kae ʻoua kuo ngata ʻa e māmani ʻo Sētané. ʻE uesia kotoa nai kitautolu ʻe he taʻemaʻungāué, puke lahi, fakatanga, fakatamaki fakanatula, mole ʻo e ngaahi koloá koeʻuhi ko e faihiá pe ngaahi faingataʻa kehe. Ke tau fetokoniʻaki lolotonga ʻa e ngaahi ʻahiʻahí, ʻoku fiemaʻu ke tau maʻu ʻa e manavaʻofa moʻoni. ʻE ueʻi kitautolu ʻe he manavaʻofa kaungāongoʻí ke tau fakafeangai ai ki he niʻihi kehé ʻi he anga-lelei. (ʻEf. 4:32) Ko e ongo ʻulungaanga ko ení ko e konga ia ʻo e angaʻitangata foʻoú. Te na tokoniʻi kitautolu ke tau faʻifaʻitaki ki he ʻOtuá pea fakafiemālieʻi ʻa e niʻihi kehé.​—2 Kol. 1:3, 4. 

 8. Ko e hā ʻa e ngaahi meʻa lelei ʻe lava ke hoko ʻi heʻetau manavaʻofa mo anga-lelei ki he tokotaha kotoa ʻi he fakatahaʻangá? ʻOmai ha fakatātā.

⁸ ʻE lava fēfē ke tau fakahāhā ʻa e anga-lelei lahi ange ki he faʻahinga ʻi heʻetau fakatahaʻangá kuo hiki mai mei ha fonua ʻe taha pe ʻoku nau tukuhāusia? ʻOku fiemaʻu ke tau talitali lelei kinautolu, hoko ko honau ngaahi kaumeʻa, pea ʻai ke nau ongoʻi lata. (1 Kol. 12:22, 25) Ko e fakatātaá, ko Dannykarl naʻá ne hiki mei Filipaini ki Siapani. Koeʻuhí ko ha muli ia, naʻe ʻikai ke fakafeangai lelei kiate ia ʻo hangē ko e kau ngāue kehe ʻi he ngāueʻangá. Pea naʻá ne maʻu ha fakataha ʻa e Kau Fakamoʻoni ʻa Sihová. Naʻe pehē ʻe Dannykarl: “Meimei ko e kotoa ʻo e kau maʻu fakatahá ko e kau Siapani, neongo ia naʻa nau talitali māfana au, ʻo hangē pē naʻa mau maheni fuoloá.” Ko e anga-lelei ʻa e fanga tokouá naʻe hokohoko atu ai ʻenau tokoniʻi ia ke ne ʻunuʻunu ofi kia Sihova. Naʻe faai atu pē ʻo papitaiso ʻa Dannykarl, pea ʻokú ne ngāue ʻi he ʻahó ni ko ha mātuʻa. ʻOku fiefia ʻa hono kaungāmātuʻá ʻi heʻene hoko mo hono uaifí, ko Jennifer, ko e konga ʻo e fakatahaʻangá pea ʻoku nau pehē: “ʻOkú na maʻu ha moʻui faingofua ʻi hona tuʻunga ko e ongo tāimuʻa pea ʻokú na fokotuʻu ʻa e faʻifaʻitakiʻanga lelei ʻi he fuofua kumi ki he Puleʻangá.”​—Luke 12:31.

9, 10. ʻOmai ha ongo fakatātā ʻo e ngaahi ola lelei ʻoku maʻu ʻi heʻetau fakahaaʻi ʻa e manavaʻofá ʻi he ngāue fakafaifekaú.

⁹ ʻOku tau maʻu ʻa e faingamālie ke fai “ha ngāue ʻoku leleí ki he tokotaha kotoa” ʻi he taimi ʻoku tau malangaʻi ai ʻa e ongoongo lelei ʻo e Puleʻangá. (Kal. 6:10) Ko e Kau Fakamoʻoni tokolahi ʻoku nau ongoʻi manavaʻofa ki he faʻahinga ʻoku hiki maí pea ʻoku nau feinga ke ako ʻenau leá. (1 Kol. 9:23) Ko ʻenau ngaahi feingá kuo maʻu ai ʻa e ngaahi ola lelei. Ko e fakatātaá, ko ha tuofefine tāimuʻa ʻi ʻAositelēlia ko Tiffany, naʻá ne ako ʻa e lea faka-Suahilí kae lava ke ne tokoni ki ha fakatahaʻanga Suahili ʻi he kolo ko Pilisipeiní. Neongo naʻe faingataʻa hono ako ʻa e leá, naʻe hoko ʻo toe mohu ʻuhinga ange ʻene moʻuí. ʻOku pehē ʻe Tiffany: “Kapau ʻokú ke loto ke maʻu ha ngāue fakafaifekau fakafiefia, ko e ngāue ʻi ha fakatahaʻanga lea muli ʻoku feʻunga ia mo koe. ʻOku hangē ia ʻokú ke folau ʻeveʻeva ʻo ʻikai mavahe mei ho koló. Te ke hokosia ai ʻetau fetokouaʻaki ʻi māmani lahí mo siotonu ʻi he fāʻūtaha fakaofo ko iá.”

¹⁰ Naʻe fai ʻa e meʻa meimei tatau ʻe ha fāmili ʻi Siapani. Ko e ʻofefiné ko Sakiko, ʻokú ne pehē: “Naʻa mau faʻa fetaulaki ʻi he ngāue fakafaifekaú mo e kau Pelēsila naʻa nau hiki mai. ʻI he taimi naʻa mau fakahaaʻi ange ai ʻa e ngaahi konga Tohi Tapu mei heʻenau Tohi Tapu faka-Potukalí, ʻo hangē ko e Fakahā 21:3, 4 pe ko e Saame 37:10, 11, 29, naʻa nau tokanga lelei pea ʻi he taimi ʻe niʻihi naʻe aʻu ʻo nau tangi.” Naʻe ongoʻi manavaʻofa ʻa e fāmilí ki he kau hiki mai ko ení pea naʻa nau loto ke tokoniʻi kinautolu ke nau ako ʻa e moʻoní, ko ia naʻe kamata ke nau ako ʻa e lea faka-Potukalí ʻi he tuʻunga ko ha fāmili. Ki mui ai, naʻe tokoni ʻa e fāmilí ke kamataʻi ha fakatahaʻanga lea faka-Potukali. ʻI he faai mai ʻa e ngaahi taʻú, kuo nau tokoniʻi ai ʻa e tokolahi ʻi he faʻahinga kuo hiki maí ke nau hoko ko e kau sevāniti ʻa Sihova. ʻOku pehē ʻe Sakiko: “Naʻe fiemaʻu ʻa e ngāue lahi ke ako ai ʻa e lea faka-Potukalí, ka ko e ngaahi tāpuakí ʻoku mahulu atu ia ʻi he ngaahi feinga naʻa mau faí. ʻOku mau fakamālō lahi ai kia Sihova.”​—Lau ʻa e Ngāue 10:34, 35.

11, 12. (a) Ko e hā ʻoku fiemaʻu ai ke tau maʻu ʻa e taumuʻa totonu ki he kofuʻaki ʻa e angaʻitangata foʻoú? (e) Ko e hā te ne tokoniʻi kitautolu ke tau nofoʻaki anga-fakatōkilaló?

¹¹ Ko ʻetau taumuʻa ki he kofuʻaki ʻa e angaʻitangata foʻoú kuo pau ke fakalāngilangiʻi ai ʻa Sihova, ʻo ʻikai ko hono maʻu ʻa e fakahīkihikí mei he niʻihi kehé. Manatuʻi naʻa mo ha ʻāngelo haohaoa naʻá ne hoko ʻo pōlepole mo faiangahala. (Fakafehoanaki mo e ʻIsikeli 28:17.) ʻOku tau taʻehaohaoa, ko ia ʻoku toe faingataʻa ange kiate kitautolu ke tau fakaʻehiʻehi mei he pōlepolé. Neongo ia, ʻe lava ke tau kofuʻaki kitautolu ʻa e anga-fakatōkilaló. Ko e hā te ne tokoniʻi kitautolu ke tau fai ení?

¹² Ko e meʻa ʻe taha te ne tokoniʻi kitautolu ke tau hoko ʻo anga-fakatōkilaló, ko hono lau ʻa e Folofola ʻa e ʻOtuá ʻi he ʻaho kotoa pē pea fakalaulauloto ki he meʻa ʻoku tau laú. (Teu. 17:18-20) ʻOku fiemaʻu ke tau fakalaulauloto tautefito ki he meʻa naʻe akoʻi mai ʻe Sīsuú pea mo e faʻifaʻitakiʻanga fisifisimuʻa ʻo ʻene anga-fakatōkilaló. (Māt. 20:28) Naʻe anga-fakatōkilalo ʻaupito ʻa Sīsū ʻo ne fufulu ai ʻa e vaʻe ʻo ʻene kau ʻapositoló. (Sione 13:12-17) Ko e toe meʻa ʻe taha ʻe lava ke tau faí ko e lotu kia Sihova ki hono laumālié. ʻE lava ʻe hono laumālié ke tokoniʻi kitautolu ke tauʻi ha faʻahinga hehema pē ke ongoʻi ʻoku tau lelei ange ʻi he niʻihi kehé.​—Kal. 6:3, 4; Fil. 2:3.

13. Ko e hā ʻa e ngaahi pale ʻi he hoko ʻo anga-fakatōkilaló?

¹³ Lau ʻa e Palōveepi 22:4. ʻOku fiemaʻu ʻe Sihova ke tau hoko ʻo anga-fakatōkilalo. ʻOku ʻomai ʻe he anga-fakatōkilaló ʻa e ngaahi pale lahi. ʻI he taimi ʻoku tau anga-fakatōkilalo aí, ʻe hoko ʻa e fakatahaʻangá ʻo toe melino mo fāʻūtaha ange. ʻIkai ko ia pē, ʻe ʻomai ai ʻe Sihova ʻene ʻofa maʻataʻataá. Naʻe pehē ʻe he ʻapositolo ko Pitá: “Ko kimoutolu kotoa ke mou kofuʻaki kimoutolu ʻa e feangafakatōkilaloʻaki, koeʻuhí ʻoku talitekeʻi ʻe he ʻOtuá ʻa e kau hīkisiá, ka ʻokú ne foaki ʻa e ʻofa maʻataʻataá ki he kau anga-fakatōkilaló.”​—1 Pita 5:5.

14. Ko hai ʻa e faʻifaʻitakiʻanga lelei taha ʻi he anga-maluú mo e kātakí?

¹⁴ ʻI he māmani ʻo e ʻaho ní, kapau ʻoku anga-malū mo kātaki ha taha, ʻoku faʻa fakakaukau ʻa e niʻihi kehé ʻokú ne vaivai. Ka ʻoku ʻikai ke moʻoni eni. Ko e ongo ʻulungaanga fakaʻofoʻofa ko ení ko e haʻu ia meia Sihova, ʻa e Tokotaha mālohi taha ʻi he ʻunivēsí. Ko ia ʻa e faʻifaʻitakiʻanga lelei taha ʻi he anga-maluú mo e kātakí. (2 Pita 3:9) Ko e fakatātaá, fakakaukau ki he kātaki ʻa Sihova ʻi he taimi naʻe fehuʻi ai kiate ia ʻa ʻĒpalahame mo Loté. (Sēn. 18:22-33; 19:18-21) Fakakaukau atu ki he anga ʻo e kātaki ʻa Sihova ʻi heʻene feangainga mo e puleʻanga talangataʻa ʻo ʻIsilelí ʻo laka hake ʻi he taʻu ʻe 1,500.​—ʻIsi. 33:11.

15. Ko e hā ʻa e faʻifaʻitakiʻanga naʻe fokotuʻu ʻe Sīsū ʻi hono fakahāhā ʻa e anga-maluú mo e kātakí?

¹⁵ Ko Sīsuú naʻe “anga-malū.” (Māt. 11:29) Naʻá ne mātuʻaki kātakiʻi ʻa e ngaahi vaivaiʻanga ʻo ʻene kau ākongá. Lolotonga ʻene ngāue fakafaifekau ʻi he māmaní, naʻe faʻa fakaangaʻi mo tukuakiʻi taʻetotonu ʻa Sīsū. Ka naʻá ne anga-malū pē mo kātaki ʻo aʻu ki heʻene pekia. ʻI he taimi naʻe faingataʻaʻia lahi ai ʻa Sīsū ʻi he ʻakau fakamamahí, naʻá ne kole ki heʻene Tamaí ke fakamolemoleʻi ʻa e kau tangata naʻa nau tāmateʻi iá. Naʻá ne pehē: “ʻOku ʻikai te nau ʻilo ʻa e meʻa ʻoku nau faí.” (Luke 23:34) Naʻa mo e taimi naʻe mafasia pe faingataʻaʻia ai ʻa Sīsuú, naʻá ne hanganaki anga-malū mo kātaki.​—Lau ʻa e 1 Pita 2:21-23.

16. ʻE lava fēfē ke tau fakahāhā ʻa e anga-maluú mo e kātakí?

¹⁶ Naʻe lave ʻa Paula ki he founga ʻe taha ʻe lava ke tau fakahāhā ai ʻa e anga-maluú mo e kātakí ʻi heʻene tohi: “Hokohoko atu ʻa e fekātakiʻaki mo e fefakamolemoleʻaki loto-lelei neongo ai pē ʻo kapau ʻoku ʻi ai ha taha ʻokú ne maʻu ha ʻuhinga ke lāunga ai fekauʻaki mo ha taha. Hangē tofu pē ko ia ne fakamolemoleʻi loto-lelei kimoutolu ʻe Sihová, kuo pau foki ke mou fai ʻa e meʻa tatau.” (Kol. 3:13) Ke tau lava ʻo fakamolemoleʻi ʻa e niʻihi kehé, ʻoku fiemaʻu ke tau anga-malū mo kātaki. ʻE pouaki mo tauhi maʻu ai heni ʻa e fāʻūtaha ʻi he fakatahaʻangá.

17. Ko e hā ʻoku mahuʻinga ai ʻa e anga-maluú mo e kātakí?

¹⁷ ʻOku fiemaʻu mai ʻe Sihova ke tau anga-malū mo kātakiʻi ʻa e niʻihi kehé. Ko e ongo ʻulungaanga ko ení ʻoku mātuʻaki mahuʻinga ia kapau ʻoku tau loto ke moʻui ʻi hono māmani foʻoú. (Māt. 5:5; Sēm. 1:21) ʻI heʻetau anga-malū mo kātakí, ʻoku tau fakalāngilangiʻi ai ʻa Sihova mo tokoniʻi ʻa e niʻihi kehé ke nau fai ʻa e meʻa tatau.​—Kal. 6:1; 2 Tīm. 2:24, 25.

18. ʻOku anga-fēfē ʻa e fehokotaki ʻa e ʻofá mo e taʻefilifilimānakó?

¹⁸ Ko e ngaahi ʻulungaanga ko eni kuo tau lāulea ki aí ʻoku fehokotaki kotoa ia mo e ʻofá. Ko e fakatātaá, ko e ākonga ko Sēmisí naʻe pau ke ne akonakiʻi hono fanga tokouá koeʻuhi naʻa nau fakafeangai lelei ange kinautolu ki he kakai tuʻumālié ʻi he kau masivá. Naʻá ne fakamatalaʻi ʻoku fepaki eni mo e fekau ʻa e ʻOtuá ke “ʻofa ki ho kaungāʻapí ʻo hangē pē ko hoʻo ʻofa kiate koé.” Naʻá ne toe pehē: “Kapau ʻoku hokohoko atu hoʻomou filifilimānakó, ʻoku mou faiangahala ai.” (Sēm. 2:8, 9) Kapau ʻoku tau ʻofa ki he kakaí, heʻikai ai ke tau tomuʻa fehiʻa ki ha taha koeʻuhí ko hono tuʻunga fakaakó, matakalí pe fakasōsialé. Heʻikai lava ke tau fakangalingali pē ʻoku tau taʻefilifilimānako. Ko e taʻefilifilimānakó ʻoku fiemaʻu ke hoko ia ko e konga moʻoni ʻo kitautolu.

19. Ko e hā ʻoku mahuʻinga ai ke kofuʻaki kitautolu ʻa e ʻofá?

¹⁹ Ko e ʻofá ʻoku toe “kātaki mo anga-lelei” pea “ʻoku ʻikai te ne fakafuofuolahi.” (1 Kol. 13:4) ʻOku fiemaʻu ke tau kātaki, anga-lelei mo anga-fakatōkilalo, kae lava ke tau hokohoko atu hono vahevahe ʻa e ongoongo leleí ki hotau ngaahi kaungāʻapí. (Māt. 28:19) Ko e ngaahi ʻulungaanga ko ení ʻoku ʻai ke toe faingofua ange ai ʻetau feohi mo hotau fanga tokoua mo e fanga tuofāfine kotoa ʻi he fakatahaʻangá. ʻI heʻetau fakahāhā kotoa ʻa e ʻofa peheé, ʻe hoko ai ʻetau fakatahaʻangá ʻo fāʻūtaha pea ʻoatu ai ʻa e lāngilangí kia Sihova. ʻE vakai ʻa e niʻihi kehé ki he fāʻūtaha ko ení pea ʻe tohoakiʻi ai kinautolu ki he moʻoní. Ko ia ʻoku fakaʻosiʻaki ʻi hono fakamatalaʻi ʻe he Tohi Tapú ʻa e angaʻitangata foʻoú: “Tuku kehe ʻa e ngaahi meʻá ni kotoa, mou kofuʻaki kimoutolu ʻa e ʻofá, he ko ha fakamaʻu haohaoa ia ʻo e fāʻūtahá.”​—Kol. 3:14.

20. (a) Ko e hā ʻa e ongo fehuʻi ʻoku totonu ke tau ʻeke hifo kiate kitautolú? Ko e hā hono ʻuhingá? (e) Ko e hā ʻa e kahaʻu fakaofo ʻe lava ke tau fakatuʻamelie atu ki aí?

²⁰ ʻOku totonu ke tau ʻeke hifo kiate kitautolu kotoa, ‘Ko e hā ʻa e ngaahi liliu ʻoku kei fiemaʻu ke u fai kae lava ke u huʻi atu pea siʻaki ai pē ʻa e angaʻitangata motuʻá?’ Kuo pau ke tau lotu kia Sihova pea kōlenga kiate ia ke ne tokoniʻi kitautolu. ʻOku fiemaʻu ke tau ngāue mālohi ke liliu ʻa e ngaahi fakakaukau pe ngāue halá koeʻuhí kae lava ke tau “maʻu tofiʻa ʻi he Puleʻanga ʻo e ʻOtuá.” (Kal. 5:19-21) ʻOku toe fiemaʻu ke tau ʻeke hifo, ‘ʻOku ou hokohoko atu ʻi hono liliu ʻa e anga ʻo ʻeku fakakaukaú ke u hoko ai ʻo fakahōifua kia Sihova?’ (ʻEf. 4:23, 24) ʻOku tau taʻehaohaoa, ko ia ʻoku fiemaʻu ke tau hanganaki ngāue mālohi ke tau kofuʻaki pea hokohoko atu ʻa hono ʻai ʻa e angaʻitangata foʻoú. Ko ha foʻi ngāue hokohoko eni. He moʻui fakaofo ē ʻe hoko ʻi he taimi ʻe kofuʻaki ai ʻe he tokotaha kotoa ʻa e angaʻitangata foʻoú, pea faʻifaʻitaki haohaoa ki he ngaahi ʻulungaanga fakaʻofoʻofa ʻo Sihová!