ʻOkú Ke Kātaki Moʻoni?

KUO ʻi ai ha taimi kuó ke ongoʻi ʻita lahi ai koeʻuhi ko ha ʻulungaanga taʻetotonu ʻo ha taha? ʻOkú ke vave ke fai ha meʻa ʻi he taimi ʻoku uesia lahi ai ʻe ha ngaahi tākiekina fakameleʻi ho ngaahi kaungāmeʻa ofí?

Ko e ngāue vave mo taʻefakavaivaí ʻoku fiemaʻu ʻi he taimi ʻe niʻihi ke taʻofiʻaki ʻa hono fakamafola ʻa e angahala mamafá. Ko e fakatātaá, ʻi he taimi naʻe fakamanaʻi ai ʻe ha faihala mamafa ke ʻuliʻi ʻa e kau ʻIsilelí ʻi he senituli hono 15 K.M., naʻe fai ai ʻe he mokopuna ʻo ʻĒlone ko Fineasí ha ngāue naʻe fakapapauʻi ke fakaleleiʻi ai ʻa e meʻa naʻe koví. Naʻe hōifua ʻa Sihova ko e ʻOtuá ki he meʻa naʻá ne faí, ʻo ne pehē: “Ko Fineasi . . . kuó ne fakafoki mai ʻa ʻeku houhaú mei he ngaahi foha ʻo ʻIsilelí ʻaki ʻa e ʻikai te ne kātakiʻi ha fakafeʻauhi ʻe taha kiate au ʻi honau lotolotongá.”​​—Nomipa 25:​1-​11, NW.

Naʻe fai ʻe Fineasi ʻa e ngāue feʻungamālie ke taʻofiʻaki ʻa e mafola ʻo e fakameleʻí. Kae fēfē ʻa e ʻita taʻemapuleʻi ʻi he ngaahi tōnounou fakaetangata pē ʻa e niʻihi kehé? Kapau naʻa tau fakavave ki hono fai ha meʻa pe ʻikai ha ʻuhinga totonu, te tau hoko ai ʻo ʻikai ko ha toʻa ʻi he māʻoniʻoní ko ha tokotaha taʻekātaki​—ko ha taha ʻoku ʻikai te ne fakamolemoleʻi ʻa e ngaahi taʻehaohaoa ʻa e niʻihi kehé. Ko e hā ʻe lava ke ne tokoniʻi kitautolu ke fakaʻehiʻehi ai mei he tōʻanga ko ení?

‘Ko Sihová ʻOkú Ne Fakamolemoleʻi Hoʻo Fehālaaki Kotoa Pē’

Ko Sihová ko “ha ʻOtua ʻa ia ʻoku fuaʻa; ko ha ʻOtua ʻoku ʻikai te ne kātakiʻi ʻa e fakafeʻauhí.” (Ekisoto 20:​5, NW, fakamatala ʻi lalo) ʻI heʻene hoko ko e Tokotaha-Fakatupú, ʻokú ne maʻu ʻa e totonu ke kounaʻi ʻetau anga-līʻoa maʻataʻataá. (Fakahā 4:11) Neongo ia, ko Sihová ʻokú ne kātakiʻi ʻa e ngaahi vaivaiʻanga fakaetangatá. ʻI he fekauʻaki mo iá, naʻe hiva ai ʻa e tokotaha-tohi-sāmé: “Ko Sihová ʻoku mohu meesi mo manavaʻofa, tuai ki he houhaú pea lahi ʻa ʻene ʻaloʻofá. ʻE ʻikai te ne hanganaki kumi mele ʻi he taimi kotoa pē . . . Kuo ʻikai te ne fai mai kiate kitautolu ʻo fakatatau ki heʻetau ngaahi angahalá; pe kuó ne ʻomai kiate kitautolu ʻa hotau tuha ʻo fakatatau ki heʻetau ngaahi fehālaakí.” ʻIo, kapau ʻoku tau fakatomala, ko e ʻOtuá ‘ʻokú ne fakamolemoleʻi ʻetau fehālaaki kotoa pē.’​​—Sāme 103:​3, 8-​10, NW.

Koeʻuhi ʻokú ne mahinoʻi ʻa e natula angahalaʻia ʻo e tangatá, ko Sihová ʻoku ʻikai ke “hanganaki kumi mele” ʻi he kau faihala taʻefakatomalá. (Sāme 51:5; Loma 5:​12) Ko hono moʻoní, ko ʻene taumuʻá ke fakangata ʻa e angahalá mo e taʻehaohaoá. ʻI he teʻeki ke fakahoko kakato iá, ʻi he ʻikai ke ʻomai kiate kitautolu “ʻa hotau tuha,” ʻoku fakalahi manavaʻofa mai ʻe he ʻOtuá ʻa e fakamolemole ʻo makatuʻunga ʻi he feilaulau huhuʻi ʻa Sīsū Kalaisí. ʻOku ʻikai ha taha ʻiate kitautolu ne mei fakamāuʻi ʻoku taau ke hao kapau naʻe ʻikai ke fakahaaʻi ʻe Sihova ʻa e mēsí ʻi he taimi naʻe feʻungamālie aí. (Sāme 130:3) He houngaʻia ē ko kitautolu ʻi he hoko ʻetau Tamai fakahēvaní, ʻa ia ʻokú ne kounaʻi totonu ʻa e anga-līʻoa maʻataʻataá, ko ha ʻOtua mohu meesi!

ʻOku Fiemaʻu ʻa e Mafamafatatau

Koeʻuhi ko e ʻEiki Hau ʻo e ʻunivēsí ʻokú ne fakahāhā ʻa e kātaki ʻi he feangai mo e tangata taʻehaohaoá, ʻikai ʻoku totonu ke tau fai ʻa e meʻa tatau? Kuo fakahaaʻi ʻa e kātakí “ko e hehema ke kātakiʻi ʻa e ngaahi fakakaukau pe ngaahi tōʻongafai ʻa e niʻihi kehé.” ʻOku tau maʻu fakafoʻituitui ʻa e hehema peheé​—ko ha hehema ke ngāueʻi ʻa e kātaki mo e ʻūkuma ʻi he taimi ʻoku leaʻaki ai pe fai ʻe he niʻihi kehé ʻa e ngaahi meʻa ʻa ia ʻoku ʻikai ko ha angahala mamafa kae mahalo ko ha lea pe ngāue taʻefeʻunga ia?

Ko e moʻoni, ʻoku fiemaʻu ke tau fakaʻehiʻehi mei he hoko ʻo kātaki tōtuʻá. Hangē ko ení, ʻoku hoko ʻa e maumau fakalilifu ʻi hono kātakiʻi ʻe he ngaahi mafai fakalotú ʻa e kau pātele faipāʻusiʻi ʻa ia ʻoku nau hokohoko alakoviʻi ʻa e fanga kiʻi tamaiki tangatá mo e fanga kiʻi tamaiki fefiné. “ʻI he fai ki he fānaú ʻo hangē ko ha ngaahi faingamālie pē ki he faiangahalá,” ko ha fakamatala ia ʻa ha faiongoongo ʻi ʻAilani, “ko e ngaahi mafai ʻi he siasí ʻoku nau hiki pē ʻa e pātele faihalá [ki ha feituʻu ʻe taha].”

Ko ha fakatātā ia ʻo e kātaki totonú ʻa hono hiki pē ki ha feituʻu ʻe taha ha tangata pehē? Halaʻatā! Tau pehē kuo fakaʻatā ʻe ha poate fakafaitoʻo ha toketā tafa fakavaʻivaʻinga ke hokohoko atu ʻene faitafá, ʻo fehikitaki holo ia mei he falemahaki ki he falemahaki, neongo naʻá ne tāmateʻi pe fakalaveaʻi ʻene kau mahakí. Ko ha ongoʻi fehālaaki ʻo e mateaki fakapalōfesinalé ʻokú ne fakatupunga nai ha “kātakiʻi” pehē. Kae fēfē ʻa e faʻahinga maʻukovia ʻa ia naʻe mole ʻenau moʻuí pe uesia kovi koeʻuhi ko e taʻetokangá pe naʻa mo e ngaahi tōʻonga faihiá?

ʻOku toe ʻi ai foki ha fakatuʻutāmaki ʻi hono fakahaaʻi ʻo fuʻu siʻisiʻi ʻa e kātakí. ʻI he taimi naʻe ʻi māmani ai ʻa Sīsuú, ko e kau Siu ʻe niʻihi naʻe ʻiloa ko e kau Sēlotí naʻa nau feinga ʻi he founga hala ke ngāueʻaki ʻa e faʻifaʻitakiʻanga ʻa Fineasí ʻi ha feinga ke fakatonuhiaʻi ʻenau ngaahi ngāue pē ʻanautolú. Ko e ngāue tōtuʻa ʻe taha ʻa e kau Sēloti ʻe niʻihi ko e “hū holo ʻi he fuʻu kakai ʻi Selusalemá lolotonga ʻa e ngaahi kātoangá pea mo e ngaahi meʻa meimei tatau ʻo hoka ʻaki taʻeʻamanekina ʻa e fanga kiʻi hele tui ʻa e faʻahinga ʻoku ʻikai te nau saiʻia aí.”

ʻI he tuʻunga ko e kau Kalisitiané, ʻe ʻikai ʻaupito te tau fai ʻo hangē ko e meʻa naʻe fai ʻe he kau Sēlotí ʻi hono ʻohofi fakaesino ʻa e faʻahinga ko ia ʻoku ʻikai te tau leleiʻia aí. Ka ʻoku ʻi ai ha tuʻunga moʻoni ʻo e taʻekātakí ʻokú ne taki kitautolu ke tau ʻohofi ʻi ha ngaahi founga kehe ʻa e faʻahinga ʻoku ʻikai te tau leleiʻia aí​—ʻi hano leakoviʻi nai kinautolu? Kapau ʻoku tau kātaki moʻoni, ʻe ʻikai te tau hanga ki hono ngāueʻaki ʻa e lea fakatupu loto-lavea peheé.

Ko e kau Fālesi ʻi he ʻuluaki senitulí ko e toe kulupu taʻekātaki ia ʻe taha. Naʻa nau toutou fakahalaiaʻi ʻa e niʻihi kehé pea ʻikai fakamolemoleʻi ʻa e taʻehaohaoa fakaetangatá. Ko e kau Fālesi hīkisiá naʻa nau sio lalo ki he kakai lāuvalé, ʻo lau kovi kiate kinautolu ko e ‘kakai malaia.’ (Sione 7:​49, PM) ʻI ha ʻuhinga lelei, naʻe tukuakiʻi ʻe Sīsū ʻa e kau tangata māʻoniʻoni fakaekita peheé, ʻi heʻene pehē: “ʻOiaue kimoutolu, sikalaipe mo e Falesi, he maʻoniʻoni loi! he ʻoku mou ʻatu ki he siasi ʻa e vahe hongofulu ʻo hoʻomou minite mo e aneto mo e kumino; ka kuo mou tuku ʻa e ngāhi meʻa mamafa ʻo e Lao, ʻa e fakamāu totonu, mo e fai mesi, mo e lototō: ka naʻe totonu ke fai ʻeni, pea ʻoua naʻa tuku ʻena.”​—Mātiu 23:23.

ʻI hono fai ʻa e fakamatala ko ení, naʻe ʻikai ke tuku hifo ai ʻe Sīsū ia ʻa e mahuʻinga ʻa hono tauhi ʻo e Lao ʻa Mōsesé. Naʻá ne fakahaaʻi pē ai ko e “ngaahi meʻa mamafa,” pe mahuʻinga angé, ʻa e ngaahi tafaʻaki ʻo e Laó naʻe fiemaʻu ai ke ngāueʻaki ʻa e fakaʻatuʻí mo e mēsí. He tuʻu mavahe ē ko Sīsū mo ʻene kau ākongá mei he kau Fālesi mo e kau Sēloti taʻekātakí!

ʻOku ʻikai fakamolemoleʻi ʻe Sihova ko e ʻOtuá pe ko Sīsū Kalaisi ʻa e koví. ʻOku vavé ni ʻa e ‘fai sauni ki he kau taʻeʻilo ʻOtuá, pea ki he kau taʻetalangofua ki he Kosipelí.’ (2 Tesalonaika 1:​6-​10) Kae kehe, ʻi heʻene faivelenga ki he māʻoniʻoní, naʻe ʻikai ʻaupito taʻemalava ʻe Sīsū ke tapua atu ʻa e kātaki, mohu meesi, mo e tokanga ʻofa ʻa ʻene Tamai fakahēvaní ki he tokotaha kotoa ʻoku loto ke fai ʻa e meʻa ʻoku totonú. (Aisea 42:​1-3; Mātiu 11:​28-​30; 12:​18-​21) Ko ha faʻifaʻitakiʻanga lelei moʻoni ē naʻe fokotuʻu mai ʻe Sīsū kiate kitautolú!

Mou Fekātakiʻaki

Neongo ʻoku tau maʻu nai ʻa e faivelenga lahi ki he meʻa ʻoku totonú, tau ngāueʻaki ʻa e akonaki ʻa e ʻapositolo ko Paulá: “Mou toutou fekātakiʻaki mo fefakamolemoleʻaki maʻataʻatā, kapau ʻoku maʻu ʻe ha taha ha ʻuhinga ke lāunga ai fekauʻaki mo ha taha. Hangē ko ia naʻe fakamolemoleʻi maʻataʻatā kimoutolu ʻe Sihová, ke pehē mo kimoutolu foki.” (Kolose 3:​13, NW; Mātiu 6:​14, 15) Ko e kātakí ʻoku fiemaʻu ki ai ʻa e fefakamolemoleʻaki ʻa e ngaahi tōnounou mo e ngaahi fehālaaki ʻi he māmani taʻehaohaoa ko ení. ʻOku fiemaʻu ke tau fakaʻatuʻi fekauʻaki mo e meʻa ʻoku tau ʻamanekina mei he niʻihi kehé.​—Filipai 4:5.

Ko e hoko ʻo kātakí ʻoku ʻikai te ne fakahuʻunga ʻe ia ʻi ha founga ha leleiʻia ʻi he faihalá pe hoko ʻo sio kehe mei he ngaahi fehālaakí. Ko ha tafaʻaki ʻo e fakakaukau pe ʻulungaanga ʻo ha kaungātui ʻe kiʻi taʻefehoanaki nai mo e ngaahi tuʻunga ʻa Sihová. Neongo ʻoku ʻikai nai ke fuʻu mamafa ʻa e mavahe ko iá ke iku ai ʻo talitekeʻi ʻe he ʻOtuá, ʻe ʻomai nai ai ha fakaʻilonga fakaefakatokanga ʻo fakahaaʻi ʻoku fiemaʻu ke fai ha feʻunuʻaki. (Senesi 4:​6, 7) He anga-ʻofa ē ko ia ʻi he taimi ʻoku feinga ai ʻa e faʻahinga ʻoku nau maʻu ʻa e ngaahi tuʻunga taau fakalaumālié ke fakatonutonu ʻa e tokotaha faihalá ʻi ha laumālie anga-mokomokó! (Kaletia 6:1) Ko ia ai, ke lavameʻa ʻi he feinga ko ení, ʻoku fiemaʻu ke ngāue ki ai ʻi he tokanga kae ʻikai ʻaki ha laumālie fakaanga.

“ʻAki ha Loto Anga-Vaivai mo e ʻApasia Loloto”

Fēfē ʻa e ngāueʻi ʻo e kātakí ki he kakai ʻa ē ʻoku kehe ʻenau ngaahi fakakaukau fakalotú mei haʻatautolú? Ko ha “Lēsoni Fakalūkufua” ʻa ia naʻe fokotuʻu ʻi he kotoa ʻo e ngaahi Akoʻanga Fakafonua naʻe fokotuʻu ʻi ʻAilani ʻi he 1931 ʻoku pehē ai: “Naʻe ʻikai fakataumuʻa ʻe Sīsū Kalaisi ia ʻa ʻene lotú ke fakamālohiʻi ki he tangatá ʻaki ʻa e ngaahi founga fakamālohi. . . . Ko e kē mo hotau ngaahi kaungāʻapí mo ngaohikoviʻi kinautolú ʻoku ʻikai ko e founga ia ke fakatuipauʻi ai kinautolu ʻoku tau tonu pea ʻoku nau hala kinautolu. ʻOku ngalingali lahi ange te ne fakatuipauʻi kiate kinautolu ʻoku ʻikai te tau maʻu ha laumālie faka-Kalisitiane.”

Naʻe faiako mo ngāue ʻa Sīsū ʻi ha founga naʻe tohoakiʻi mai ai ʻa e kakaí ki he Folofola ʻa e ʻOtuá, pea ʻoku totonu ke pehē pē mo kitautolu. (Maake 6:​34; Luke 4:​22, 32; 1 Pita 2:​21) ʻI he tuʻunga ko ha tangata haohaoa fakataha mo e vavanga makehe ʻa ia naʻe foaki ange ʻe he ʻOtuá, naʻe lava ke ne ʻiloʻi ʻa e ngaahi lotó. Ko ia ai, ʻi he taimi naʻe fiemaʻu aí, naʻe malava ʻa Sīsū ke ne fakahaaʻi ʻa e ngaahi fakahalaiaʻi fefeka ʻo e ngaahi fili ʻo Sihová. (Mātiu 23:​13-​33) Naʻe ʻikai ko haʻane taʻekātaki ʻa hono fai ení.

ʻI he ʻikai hangē ko Sīsuú, ʻoku ʻikai te tau malava ke ʻilo ʻa e ngaahi lotó. Ko ia ai, ʻoku totonu ke tau muimui ki he akonaki ʻa e ʻapositolo ko Pitá: “Fakamāʻoniʻoniʻi ʻa Kalaisi ko e ʻEikí ʻi homou lotó, mateuteu maʻu pē ke fai ha taukapo ʻi he ʻao ʻo e tokotaha kotoa te ne ʻekea koe fekauʻaki mo ha ʻuhinga ki he ʻamanaki ʻoku ʻiate koé, kae fai fakataha ia ʻaki ha loto anga-vaivai mo e ʻapasia loloto.” (1 Pita 3:​15, NW) ʻI he tuʻunga ko e kau sevāniti ʻa Sihová, ʻoku totonu ke tau taukapoʻi ʻa e meʻa ʻoku tau tui ki aí koeʻuhi he ʻoku makatuʻunga fefeka ia ʻi he Folofola ʻa e ʻOtuá. Ka ʻoku fiemaʻu ke tau fai eni ʻi ha founga ʻoku fakahaaʻi ai ʻa e ʻapasia ki he niʻihi kehé pea ki heʻenau ngaahi tui loto-moʻoní. Naʻe tohi ʻa Paula: “Ke kelesiʻia ai pe hoʻomou lea ki ai, mo fakaifo ʻaki ha masima, ʻo mou ʻilo ʻa e anga ʻo e tali ʻoku totonu ke fai kiate kinautolu taki taha.”​—Kolose 4:6.

ʻI heʻene Malanga ʻiloa he Moʻungá, naʻe pehē ai ʻe Sīsū: “ʻIlonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu.” (Mātiu 7:12) Ko ia ai, tau fekātakiʻaki pea fakahaaʻi ʻa e ʻapasia ki he faʻahinga ko ia ʻoku tau malanga ʻaki ki ai ʻa e ongoongo leleí. ʻI hono ʻai ke mafamafatatau ʻetau faivelenga ki he māʻoniʻoní fakataha mo e kātaki makatuʻunga ʻi he Tohitapú, te tau fakahōifuaʻi ai ʻa Sihova pea te tau hoko ai ʻo kātaki moʻoni.

[Fakatātā ʻi he peesi 23]

Fakaʻehiʻehi mei he fakakaukau taʻekātaki ʻa e kau Fālesí

[Fakatātā ʻi he peesi 23]

Naʻe tapua atu ʻe Sīsū ʻa e laumālie kātaki ʻo ʻene Tamaí. ʻOkú ke fai pehē?