Ko ʻĀmaketone ko ha Ongoongo Lelei!

1-2. (a) Ko e hā ko ha ongoongo lelei ai ʻa ʻĀmaketone ki he faʻahinga ʻo e tangatá? (e) Ko e hā ʻa e ngaahi fehuʻi te tau lāulea ki ai ʻi he kupu ko ení?

KUÓ KE fanongo ʻi hono ngāueʻaki ʻe he kakaí ʻa e foʻi lea “ʻĀmaketone” ki ha tau fakaniukilia pe ki ha fakatamaki fakaeʻātakai? ʻI hono kehé, ko e meʻa ʻoku leaʻaki ʻe he Tohi Tapú fekauʻaki mo ʻĀmaketoné ʻoku kau ai ha ongoongo lelei, ha meʻa fakafiefia! (Fkh. 1:3) Ko e tau ʻo ʻĀmaketoné heʻikai ke fakaʻauha ai ʻa e faʻahinga ʻo e tangatá kae fakahaofi kinautolu! Anga-fēfē?

² ʻOku fakahaaʻi ʻi he Tohi Tapú ko e tau ʻo ʻĀmaketoné ʻe fakahaofi ai ʻa e faʻahinga ʻo e tangatá ʻaki hono fakangata ʻa e pule fakaetangatá. Ko e tau ko iá ʻe fakahaofi ai ʻa e faʻahinga ʻo e tangatá ʻaki hono toʻo atu ʻa e fulikivanú pea fakahaofi ʻa e māʻoniʻoní. Pea ʻe fakahaofi ai ʻa e faʻahinga ʻo e tangatá ʻaki hono maluʻi hotau foʻi palanité mei hono fakaʻauhá. (Fkh. 11:18) Ke tokoni ke tau mahinoʻi māʻalaʻala ange ʻa e ngaahi poini ko ení, tau lāulea angé ki ha fehuʻi ʻe fā: Ko e hā ʻa e ʻĀmaketone? Ko e hā ʻa e ngaahi meʻa ʻe hoko ʻo taki atu ki aí? ʻE lava fēfē ke tau kau ʻi he faʻahinga ʻe fakahaofi ʻi ʻĀmaketoné? ʻE lava fēfē ke tau hanganaki faitōnunga ʻi he ofi mai ʻa ʻĀmaketoné?

 3. (a) ʻOku ʻuhinga ki he hā ʻa e foʻi lea “ʻĀmaketone”? (e) Makatuʻunga ʻi he Fakahā 16:14, 16, ko e hā ʻoku tau pehē ai ko ʻĀmaketoné ʻoku ʻikai ko ha feituʻu moʻoni?

³ Lau ʻa e Fakahā 16:14, 16. Ko e foʻi lea “ʻĀmaketone” ʻoku hā tuʻo taha pē ʻi he Folofolá, pea ko e haʻu mei he kupuʻi lea faka-Hepelū ʻoku ʻuhingá ko e “Moʻunga ʻo Mekito.” (Fkh. 16:16; fkm. ʻi lalo) Ko Mekito ko e kolo ʻi ʻIsileli ʻo e kuonga muʻá. (Sios. 17:11) Ka ʻoku ʻikai ʻuhinga ʻa e ʻĀmaketoné ia ki ha feituʻu moʻoni he māmaní. Ko hono moʻoní, ʻoku ʻuhinga ia ki he meʻa ʻe hoko ʻi he fakatahataha mai ʻa e “ngaahi tuʻi ʻo e māmani kotoa kuo nofoʻí” ke fakafepaki kia Sihová. (Fkh. 16:14) Neongo ia, ʻi he kupu ko ení, te tau toe ngāueʻaki ʻa e foʻi lea “ʻĀmaketone” ki he tau ʻa ia ʻe hoko ʻi he hili pē hono fakatahatahaʻi ʻa e ngaahi tuʻi ʻo e māmaní. ʻOku anga-fēfē ʻetau ʻilo ko ʻĀmaketoné ʻoku ʻuhinga ki ha feituʻu fakaefakatātā? ʻUluakí, ʻoku ʻikai ha moʻunga ia ʻoku ui ko Mekito. Uá, ko e ʻēlia takatakai ʻi Mekitó ʻoku fuʻu siʻisiʻi fau ia ke hao ai ʻa e “ngaahi tuʻi ʻo e māmani kotoa kuo nofoʻí” mo ʻenau kau taú mo e ngaahi naunau taú. Tolú, hangē ko ia te tau toki vakai ki ai ʻi he kupu ko ení, ko e tau ʻo ʻĀmaketoné ʻe kamata ia ʻi he taimi ʻe ʻohofi ai ʻe he ‘ngaahi tuʻí’ ʻa e kakai ʻa e ʻOtuá, ʻa ia ʻoku nau movete atu ʻi he kotoa ʻo e māmaní.

 4. Ko e hā naʻe fakafehokotaki ai ʻe Sihova ʻa e tau lahi fakaʻosí mo Mekitó?

⁴ Ko e hā naʻe fakafehokotaki ai ʻe Sihova ʻa e tau lahi fakaʻosí mo Mekitó? Ko Mekito mo e teleʻa ofi atu ʻo Sisililí naʻe lahi ʻa e ngaahi tau naʻe fai aí. ʻI he taimi ʻe niʻihi, naʻe kau fakahangatonu mai ʻa Sihova ʻi he ngaahi tau ko iá. Ko e fakatātaá, “ʻi he veʻe vai ʻo Mekitó” naʻe tokoni ʻa e ʻOtuá ki he Fakamaau ʻIsileli ko Pēlaké ke ne ikunaʻi ʻa e kau tau Kēnani naʻe taki ʻe he ʻeikitau ko Sīselá. Ko Pēlake mo e palōfita fefine ko Tēpolá naʻá na fakamālō kia Sihova ʻi heʻena ikuna fakaemaná. Naʻá na hiva: “Naʻe tau ʻa e ngaahi fetuʻú mei langi; naʻa nau tauʻi ʻa Sīsela. Ko e vaitafe ʻo Kīsoní naʻá ne tafiʻi atu kinautolu.”​—Fkm. 5:19-21.

 5. Ko e hā ʻa e founga mahuʻinga ʻe kehe ai ʻa e tau ʻo ʻĀmaketoné mei he faitau ʻa Pēlaké?

⁵ Naʻe fakaʻosiʻaki ʻe Pēlake mo Tēpola ʻena hivá ʻa e ngaahi lea: “Ko ia tuku ke ʻauha ho ngaahi filí kotoa, ʻe Sihova, kae tuku ki he faʻahinga ʻoku ʻofa kiate koé ke nau hangē ko e hopo ʻa e laʻaá ʻi hono nāunaú.” (Fkm. 5:31) ʻI ʻĀmaketone, ʻe pehē pē mo hono fakaʻauha ʻa e ngaahi fili ʻo e ʻOtuá, lolotonga iá ko e faʻahinga ʻoku ʻofa ki he ʻOtuá ʻe fakahaofi. Ka ʻoku ʻi ai ʻa e kehekehe mahuʻinga ʻe taha ʻi he ongo fepaki ko ení. ʻI ʻĀmaketone, ko e kakai ʻa e ʻOtuá heʻikai ke nau faitau. Naʻa mo e ʻikai haʻanau meʻatau! Ko honau “mālohí ʻe hoko ia [ʻi heʻenau] hanganaki nonga mo fakahāhā ʻa e falalá” kia Sihova mo ʻene kau tau fakahēvaní.​—ʻAi. 30:15; Fkh. 19:11-15.

 6. ʻE anga-fēfē nai hono ikunaʻi ʻe Sihova hono ngaahi filí ʻi ʻĀmaketone?

⁶ ʻE anga-fēfē hono ikunaʻi ʻe he ʻOtuá hono ngaahi filí ʻi ʻĀmaketone? Te ne ngāueʻaki nai ʻa e ngaahi founga kehekehe. Ko e fakatātā, te ne ngāueʻaki nai ʻa e ngaahi mofuiké, ʻuha-ʻaisí mo e ʻuhilá. (Siope 38:22, 23; ʻIsi. 38:19-22) Te ne ʻai nai hono ngaahi filí ke nau fetauʻaki. (2 Kal. 20:17, 22, 23) Pea te ne ngāueʻaki nai ʻene kau ʻāngeló ke tāmateʻi ʻa e kau fulikivanú. (ʻAi. 37:36) Tatau ai pē pe ko e hā ʻa e founga ʻe ngāueʻaki ʻe he ʻOtuá, ko ʻene ikuná ʻe kakato. Ko e kotoa hono ngaahi filí ʻe fakaʻauha. Pea ko e kotoa ʻo e kau māʻoniʻoní ʻe fakahaofi.​—Pal. 3:25, 26.

7-8. (a) Fakatatau ki he 1 Tesalonaika 5:1-6, ko e hā ʻa e fanongonongo mātuʻaki ngali kehe ʻe fai ʻe he kau taki ʻo e māmaní? (e) Ko e hā ʻe hoko ai eni ko ha loi fakatuʻutāmakí?

⁷ Ko e fanongonongo ʻo e “melino mo malu” ʻe hoko ia ki muʻa ʻi he “ʻaho ʻo Sihová.” (Lau ʻa e 1 Tesalonaika 5:1-6.) ʻI he 1 Tesalonaika 5:2, ʻoku ʻuhinga ʻa e “ʻaho ʻo Sihová” ki he “fuʻu mamahi lahí.” (Fkh. 7:14) ʻE anga-fēfē ʻetau ʻiloʻi ʻa e taimi ʻe kamata ai ʻa e mamahi lahi ko iá? ʻOku tala mai ʻi he Tohi Tapú ʻe ʻi ai ha fanongonongo mātuʻaki ngali kehe. ʻE hoko ʻa e fanongonongo ko iá ko ha fakaʻilonga ʻo e kamata ʻo e fuʻu mamahi lahí.

⁸ Ko e fanongonongo ia ne tomuʻa tala ʻo e “melino mo malu.” Ko e hā ʻe lea pehē ai ʻa e kau taki ʻo e māmaní? ʻE kau ki ai ʻa e kau taki lotú? Mahalo pē. Kae kehe, ko e fanongonongo ko iá ko ha toe loi fakamānavaʻi fakatēmeniō ia. Ka ko e loi ko ení ʻe tautefito ʻene fakatuʻutāmakí koeʻuhi ʻe ʻoatu ai ki he kakaí ha ongoʻi malu ʻoku loi ki muʻa pē ke kamata ʻa e fuʻu mamahi lahi taha ʻi he hisitōlia ʻo e tangatá. ʻIo, “ʻe hoko fakafokifā mai leva ʻa e fakaʻauhá ʻi he taimi pē ko iá kiate kinautolu, ʻo hangē tofu pē ko e langā ʻa ha fefine feitama.” Kae fēfē ʻa e kau sevāniti mateaki ʻa Sihová? Te nau ʻohovale nai ʻi he kamata fakafokifā ʻa e ʻaho ʻo Sihová, ka te nau ʻosi mateuteu ki ai.

 9. ʻE fakaʻauha fakaʻangataha ʻe Sihova ʻa e māmani ʻo Sētané? Fakamatalaʻi.

⁹ Heʻikai ke fakaʻauha ʻosi fakaʻangataha ʻe Sihova ʻa e māmani kotoa ʻo Sētané, ʻo hangē ko ia naʻá ne fai ʻi he ʻaho ʻo Noá. ʻI hono kehé, te ne fakaʻauha ia ʻi ha konga lalahi ʻe ua. ʻUluakí, te ne fakaʻauha ʻa Pāpilone ko e Lahi, ʻa e ʻemipaea ʻi māmani ʻo e lotu loí. Pea ʻi ʻĀmaketone leva, te ne fakaʻauha ʻa e toenga ʻo e māmani ʻo Sētané, ʻo kau ai ʻa hono ngaahi tuʻunga fakapolitikale, fakakautau mo fakakomēsialé. Tau lāulea fakaikiiki angé ki he meʻa tefito ʻe ua ko iá.

10. Fakatatau ki he Fakahā 17:1, 6 mo e 18:24, ko e hā ʻe fakaʻauha ai ʻe Sihova ʻa Pāpilone ko e Lahí?

¹⁰ Ko e “fakamaau ʻoku fai ki he fuʻu fefine feʻauaki.” (Lau ʻa e Fakahā 17:1, 6; 18:24.) Kuo lumaʻi lahi ʻe Pāpilone ko e Lahi ʻa e huafa ʻo e ʻOtuá. Kuó ne akoʻi ʻa e ngaahi loi fekauʻaki mo e ʻOtuá. Kuó ne faifeʻauaki fakalaumālie ʻaki hono fokotuʻu ʻa e ngaahi fepikitaki mo e kau taki ʻo e māmaní. Kuó ne ngāueʻaki hono mālohí mo e mafaí ke lōmekina ʻene tākangá. Pea kuó ne lilingi ʻa e toto lahi, kau ai ʻa e toto ʻo e kau sevāniti ʻa e ʻOtuá. (Fkh. 19:2) ʻE anga-fēfē hono fakaʻauha ʻe Sihova ʻa Pāpilone ko e Lahí?

11. Ko hai ʻa e ‘manu fekai lanu kula ʻahoʻahó,’ pea ʻoku anga-fēfē hono ngāueʻaki ia ʻe he ʻOtuá ʻi he fekauʻaki mo Pāpilone ko e Lahí?

¹¹ ʻE fakaʻauha ʻe Sihova ʻa e ‘fuʻu fefine feʻauakí’ fakafou ʻi he “meʻatui ʻe hongofulu” ʻo e ‘manu fekai lanu kula ʻahoʻahó.’ Ko e manu fekai fakaefakatātā ko iá ʻokú ne fakafofongaʻi ʻa e Ngaahi Puleʻanga Fakatahatahá. Ko e meʻatui ʻe hongofulú ʻokú ne fakafofongaʻi ʻa e ngaahi mafai fakapolitikale lolotonga ʻoku nau poupou ki he kautaha ko iá. ʻI he taimi kotofa ʻa e ʻOtuá, ʻe ʻohofi ʻe he ngaahi mafai fakapolitikale ko iá ʻa Pāpilone ko e Lahi. “Te nau ʻai ia ke hoko ko e koto halaʻatā mo telefua” ʻaki hono faʻao fakamālohi ʻene koloá pea fakaeʻa ʻene fulikivanú. (Fkh. 17:3, 16) Ko e fakaʻauha vave ko iá​—ʻo hangē ʻi ha ʻaho pē tahá—​ʻe hoko ʻo fakaʻohovale ia ki he faʻahinga ʻoku poupou kiate iá. He ko ē, kuo fuoloa ʻene pōlepolé: “ʻOku ou nofo ko ha kuini, pea ʻoku ʻikai ko ha uitou au, pea ʻe ʻikai ʻaupito te u sio ʻi he mamahí.”​—Fkh. 18:7, 8.

12. Ko e hā heʻikai ke fakaʻatā ʻe Sihova ʻa e ngaahi puleʻangá ke nau faí, pea ko e hā hono ʻuhingá?

¹² Heʻikai fakaʻatā ʻe he ʻOtuá ʻa e ngaahi puleʻangá ke nau fakaʻauha ʻene kakaí. ʻOku nau laukauʻaki hono fataki ʻa hono huafá, pea kuo nau talangofua ki heʻene fekau ke hola mei Pāpilone ko e Lahí. (Ngā. 15:16, 17; Fkh. 18:4) Kuo nau ngāue mālohi foki ke tokoniʻi ʻa e niʻihi kehé ke hola meiate ia. Ko ia ko e kau sevāniti ʻa Sihová heʻikai ke nau “maʻu ha konga ʻo hono ngaahi tauteá.” Neongo ia, ko ʻenau tuí ʻe ʻahiʻahiʻi.

13. (a) Ko hai ʻa Koki? (e) Fakatatau ki he ʻIsikeli 38:2, 8, 9, ko e hā ʻe hoko ʻo taki atu ai ʻa Koki ki he feituʻu fakaefakatātā ʻoku ui ko ʻĀmaketoné?

¹³ Ko e ʻoho ʻa Kokí. (Lau ʻa e ʻIsikeli 38:2, 8, 9.) Hili hono fakaʻauha ʻa e kotoa ʻo e ngaahi lotu loí, ʻe hoko ʻo hā mahino ʻa e kakai ʻa e ʻOtuá ʻo hangē ha fuʻu ʻakau pē ʻe taha naʻe hao ʻi ha fuʻu afā fakamanavahē. Ko e moʻoni, ʻe ʻita lahi ʻa Sētane. Te ne fakahaaʻi ʻene ʻitá ʻaki hono ngāueʻaki ʻa e fakamatala fakangalilelei fakatēmeniō​—“ngaahi lea fakamānavaʻi taʻemaʻa”—​ke fakatupunga ʻa e ngaahi kulupu ʻo e ngaahi puleʻangá ke nau ʻohofi ʻa e kau sevāniti ʻa Sihová. (Fkh. 16:13, 14) Ko e kulupu ʻo e ngaahi puleʻanga ko iá ʻoku ui ko “Koki ʻo e fonua ko Mēkokí.” ʻI he fai ʻe he ngaahi puleʻangá ʻenau ʻohofí, ko ʻenau aʻu atu ia ki he feituʻu fakaefakatātā ʻoku ui ko ʻĀmaketoné.​—Fkh. 16:16.

14. Ko e hā ʻe ʻiloʻi ʻe Kokí?

¹⁴ ʻE falala ʻa Koki ki heʻene ‘mālohi fakaetangatá’​—ʻa ʻene kau tau mālohí. (2 Kal. 32:8) Te tau falala kia Sihova ko hotau ʻOtuá​—ko ha meʻa ia ʻe hā ngali fakavalevale ki he ngaahi puleʻangá. Ko e hā hono ʻuhingá? Koeʻuhí naʻe mālohi ʻa Pāpilone ko e Lahi, ka naʻe ʻikai ke fakahaofi ia ʻe hono ngaahi ʻotuá mei he “manu fekaí” mo hono “meʻatui ʻe hongofulu”! (Fkh. 17:16) Ko ia ʻe ʻamanekina ʻe Koki ʻe faingofua ʻene ikunaʻi kitautolú. “Hangē ha ngaahi konga ʻao ʻokú ne ʻufiʻufi ʻa e fonuá,” te ne ʻohofi ʻa e kakai ʻa Sihová. (ʻIsi. 38:16) Ka ʻe vave hono ʻiloʻi ʻe Koki ʻokú ne laka atu ki ha tauhele. Hangē ko Felo ʻi he Tahi Kulokulá, ʻe ʻiloʻi ʻe Koki ʻokú ne faitau mo Sihova.​—ʻEki. 14:1-4; ʻIsi. 38:3, 4, 18, 21-23.

15. ʻI he ngaahi founga fē ʻe ikuna kakato ai ʻa Kalaisí?

¹⁵ Ko Kalaisi mo ʻene kau tau fakahēvaní te nau maluʻi ʻa e kakai ʻa e ʻOtuá pea laiki ʻa e ngaahi puleʻangá mo ʻenau kau taú. (Fkh. 19:11, 14, 15) Kae fēfē ʻa e fili tefito ʻo Sihová, ʻa Sētane, ʻa ia ʻokú ne fai ʻa e ngaahi fakamatala loi ke taki atu ai ʻa e ngaahi puleʻangá ki ʻĀmaketoné? ʻE hanga ʻe Sīsū ʻo lī ia mo ʻene kau tēmenioó ki he luo taʻehanotakelé, ʻa ia ʻe tuku ai ʻi he taʻu ʻe taha afe.​—Fkh. 20:1-3.

16. (a) ʻE anga-fēfē ʻetau fakahaaʻi ʻoku tau “ʻiloʻi ʻa e ʻOtuá”? (e) Ko e hā ʻe hoko ai ʻa hono ʻiloʻi ʻa Sihová ko ha tāpuaki ʻi ʻĀmaketone?

¹⁶ Tatau ai pē pe kuo tau kau ki he moʻoní ʻi he laui taʻu pe ʻikai, ke fakahaofi ʻi ʻĀmaketoné, kuo pau ke tau fakahaaʻi ʻoku tau “ʻiloʻi ʻa e ʻOtuá” pea ʻoku tau “talangofua ki he ongoongo lelei fekauʻaki mo hotau ʻEiki ko Sīsuú.” (2 Tes. 1:7-9) ʻOku tau “ʻiloʻi ʻa e ʻOtuá” ʻi he taimi ʻoku tau ʻiloʻi ai ʻa e meʻa ʻokú ne saiʻia mo fehiʻa aí mo ʻene ngaahi tuʻungá. ʻOku tau toe fakahaaʻi ʻoku tau ʻiloʻi iá ʻi he taimi ʻoku tau ʻofa mo talangofua ai kiate ia pea ʻoange kiate ia ʻetau anga-līʻoa maʻataʻataá. (1 Sio. 2:3-5; 5:3) Kapau te tau fai ʻa e ngaahi meʻá ni, ʻe “ʻafioʻi mai” foki kitautolu ʻe he ʻOtuá, ʻa ia, te tau maʻu ʻene hōifuá. (1 Kol. 8:3) Ko hono olá, ʻe fakahaofi kitautolu lolotonga ʻa e tau ʻo ʻĀmaketoné!

17. ʻOku ʻuhinga ki he hā ʻa e “talangofua ki he ongoongo lelei fekauʻaki mo hotau ʻEiki ko Sīsuú”?

¹⁷ Ko e “ongoongo lelei fekauʻaki mo hotau ʻEiki ko Sīsuú” ʻoku kau ai ʻa e ngaahi moʻoni kotoa naʻe akoʻi ʻe Sīsuú, ʻa ia ʻoku maʻu ʻi he Folofola ʻa e ʻOtuá. ʻOku tau talangofua ki he ongoongo leleí ʻi he taimi ʻoku tau ngāueʻaki ai ia ʻi heʻetau moʻuí. Ko e talangofua ko iá ʻoku kau ai ʻa hono fakamuʻomuʻa ʻa e ngaahi meʻa ʻo e Puleʻangá, moʻuiʻaki ʻa e ngaahi tuʻunga māʻoniʻoni ʻa e ʻOtuá, pea fanongonongo ʻa e Puleʻanga ʻo e ʻOtuá. (Māt. 6:33; 24:14) ʻOku toe kau ki ai ʻetau poupou ki he fanga tokoua pani ʻo Kalaisí ʻi heʻenau tokangaʻi honau ngaahi fatongia mafatukitukí.​—Māt. 25:31-40.

18. ʻI he founga fē ʻe malava ke fakapaleʻi ai ʻe he fanga tokoua pani ʻo Kalaisí ʻa e anga-lelei naʻe fakahaaʻi kiate kinautolú?

¹⁸ Ko e kau sevāniti pani ʻa e ʻOtuá ʻe vavé ni ke nau fakapaleʻi ʻa e ‘fanga sipi kehé’ koeʻuhi ko e anga-lelei naʻa nau fakahaaʻi ange kiate kinautolú. (Sione 10:16) Anga-fēfē? Ki muʻa ke kamata ʻa e tau ʻo ʻĀmaketoné, ko e kotoa ʻo e toko 144,000 ʻe fokotuʻu hake ki hēvani ko e ngaahi laumālie taʻefaʻamate. Te nau hoko leva ko e konga ʻo e ngaahi kau tau fakahēvani ʻa ia te nau laiki ʻa Kokí pea maluʻi “ha fuʻu kakai lahi” ʻo e faʻahinga hangē ha sipí. (Fkh. 2:26, 27; 7:9, 10) ʻIo, he fiefia lahi ē ko e fuʻu kakai lahí ʻi he malava ke nau poupou ki he kau sevāniti pani ʻa Sihová lolotonga ʻenau kei ʻi heni ʻi he māmaní!

19-20. Neongo hotau ngaahi ʻahiʻahí, ʻe lava fēfē ke tau nofoʻaki faitōnunga ʻi he ofi mai ʻa ʻĀmaketoné?

¹⁹ Lolotonga ʻa e ngaahi ʻaho fakaʻosi faingataʻa ko ení, ʻoku hokosia ʻe he kakai tokolahi ʻa Sihová ʻa e ngaahi ʻahiʻahi. Naʻa mo ia, ʻe lava ke tau kātaki fakataha mo e fiefia. (Sēm. 1:2-4) Ko e meʻa ʻe taha ʻe tokoni lahi ko e kītaki ʻi he lotu loto-moʻoni. (Luke 21:36) Kuo pau foki ke muimui atu ʻi heʻetau ngaahi lotú ʻa hono ako fakaʻaho ʻa e Folofola ʻa e ʻOtuá pea fakalaulauloto ki ai, ʻo kau ai ʻa e ngaahi kikite fakaofo fekauʻaki mo hotau taimí. (Saame 77:12) Ko e ngaahi ngāué ni, fakataha mo ʻetau kau kakato ʻi he ngāue fakafaifekaú, ʻe hanganaki ʻai ai ke mālohi ʻetau tuí mo ʻetau ʻamanakí!

²⁰ Fakakaukau atu ki hoʻo fiefiá ʻi hono fakaʻauha atu ʻo Pāpilone ko e Lahí pea mo e ngata ʻa ʻĀmaketoné! Ko e mahuʻinga angé, sioloto atu ki hoʻo mātuʻaki fiefia ʻi he taimi ʻe fakatonuhiaʻi fakaʻaufuli ai ʻa e huafa ʻo e ʻOtuá mo hono tuʻunga-haú! (ʻIsi. 38:23) ʻIo, ʻe hoko ʻa ʻĀmaketone ko ha ongoongo lelei ki he faʻahinga ʻoku nau ʻiloʻi ʻa e ʻOtuá, talangofua ki hono ʻAló, pea kātaki ʻo aʻu ki he ngataʻangá.​—Māt. 24:13.