ʻAmanaki Lelei kia Sihova, pea ke Loto-Toʻa

“Amanaki lelei kia Jihova: bea ke loto toʻa, bea te ne fakamalohi ho loto: oku ou behe, amanaki lelei kia Jihova.”​—SĀME 27:​14, PM.

 1. ʻOku mahuʻinga fēfē ʻa e ʻamanakí, pea ʻoku anga-fēfē hono ngāueʻaki ʻa e foʻi leá ni ʻi he Tohi Tapú?

KO E ʻamanaki moʻoní ʻoku hangē ha maama ulo lahí. ʻOkú ne tokoniʻi kitautolu ke tau sio fakalaka atu mei he ngaahi ʻahiʻahi lolotongá pea fehangahangai mo e kahaʻú ʻaki ʻa e loto-toʻa mo e fiefia. Ko Sihova pē ʻoku malava ke ne ʻomai kiate kitautolu ha ʻamanaki papau, ʻa ia ʻokú ne fai ia fakafou mai ʻi heʻene Folofola fakamānavaʻí. (2 Timote 3:16) Ko hono moʻoní, ko e ngaahi foʻi lea “ʻamanaki,” “naʻe ʻamanaki,” mo e “ʻamanaki atu” ʻoku hā ʻo laka hake ʻi he tuʻo 160 ʻi he Tohi Tapú pea ʻoku ʻuhinga fakatouʻosi ki he fakatuʻotuʻa vēkeveke mo pau atu ki ha meʻa lelei pe ki ha meʻa ʻoku ʻamanekina.a ʻOku mahulu hake ʻa e ʻamanaki peheé ia ʻi ha fakaʻamu pē, ʻa ia ʻoku ʻikai nai hano makatuʻunga pe ko ha tuʻunga malava ke fakahoko.

 2. Ko e hā ʻa e kaunga ʻo e ʻamanakí ki he moʻui ʻa Sīsuú?

² ʻI he taimi ʻo e fehangahangai mo e ngaahi ʻahiʻahí mo e ngaahi faingataʻá, naʻe sio ʻa Sīsū ʻo fakalaka atu mei he lolotongá pea ʻamanaki kia Sihova. “Ne ne kataki ae bekia i he akau, mo ne taetokaga ki he fakama, koe mea i he fiefia nae tuku i hono ao, bea kuo nofo eni i he nima toomatau oe afioaga oe Otua.” (Hepelu 12:​2, PM) Koeʻuhi naʻá ne vēkeveke tokangataha ʻo fakatuʻotuʻa atu ki hono fakatonuhiaʻi ʻa e tuʻunga-hau ʻo Sihová pea mo hono fakamāʻoniʻoniʻi ʻa Hono huafá, naʻe ʻikai ʻaupito ke afe ʻa Sīsū mei hono ʻalunga talangofua ki he ʻOtuá, tatau ai pē pe ko e hā hono nunuʻa kiate iá.

 3. Ko e hā ʻa e kaunga ʻa e ʻamanakí ki he moʻui ʻa e kau sevāniti ʻa e ʻOtuá?

³ ʻOku lave ʻa Tuʻi Tēvita ki he fekauʻaki ʻa e ʻamanakí mo e loto-toʻá, ʻo pehē: “Amanaki lelei kia Jihova: bea ke loto toʻa, bea te ne fakamalohi ho loto: oku ou behe, amanaki lelei kia Jihova.” (Sāme 27:​14, PM) Kapau ʻoku tau fiemaʻu ke mālohi hotau lotó, kuo pau ke ʻoua ʻaupito te tau fakaʻatā ʻetau ʻamanakí ke hoko ʻo tamatemate kae ʻai maʻu pē ia ke hā mahino ʻi heʻetau fakakaukaú pea tauhi maʻu ʻi hotau lotó. Ko hono fai iá ʻe tokoniʻi ai kitautolu ke tau faʻifaʻitaki kia Sīsū ʻi hono fakahāhā ʻa e loto-toʻa mo e faivelenga ʻi heʻetau kau ʻi he ngāue naʻá ne fekau ki heʻene kau ākongá ke nau faí. (Mātiu 24:14; 28:​19, 20) Ko e moʻoni, ʻoku lave ki he ʻamanakí fakataha mo e tuí pea mo e ʻofá ko ha ʻulungāanga mahuʻinga mo tuʻuloa ʻoku fakaʻilongaʻiʻaki ʻa e moʻui ʻa e kau sevāniti ʻa e ʻOtuá.—1 Kolinito 13:13.

ʻOkú Ke “Tupulekina ʻi he ʻAmanaki Lelei”?

 4. Ko e hā ʻoku fakatuʻamelie vēkeveke atu ki ai ʻa e kau Kalisitiane paní mo honau takanga ko e “fanga sipi kehe”?

⁴ ʻOku maʻu ʻe he kakai ʻa e ʻOtuá ha kahaʻu fakaofo ʻi muʻa ʻia kinautolu. ʻOku tatali vēkeveke ʻa e kau Kalisitiane paní ke ngāue fakataha mo Kalaisi ʻi hēvani, lolotonga iá ʻoku ʻamanaki ʻa e “fanga sipi kehe” ke “fakaʻataʻatā mei heʻene popula ki he ʻauha, kae fakahoko ia ki he tauʻataina fakalangi [pe lāngilangiʻia] ʻa e fanau [fakaemāmani] ʻa e ʻOtua.” (Sione 10:16; Loma 8:​19-21; Filipai 3:20) Ko e ‘tauʻataina lāngilangiʻia’ ko iá ʻoku kau ki ai ʻa e fakahaofi mei he angahalá mo hono ngaahi nunuʻa palakuú. Ko e moʻoni, ko Sihova, ʻa e Tokotaha-Foaki ʻo e “foaki lelei kotoabe moe foaki haohaoa kotoabe,” te ne ʻomai ʻa e meʻa lelei tahá pē ki heʻene kakai mateakí.—Semisi 1:17; Aisea 25:8.

 5. ʻE lava fēfē ke tau hoko ʻo “tupulekina ʻi he ʻamanaki lelei”?

⁵ ʻOku totonu ke lahi fēfē ʻa e kaunga ʻa e ʻamanaki faka-Kalisitiané ki heʻetau moʻuí? ʻI he Loma 15:​13, ʻoku tau lau ai: “Ko e ʻOtua ʻoku ʻa ʻEne ʻAfio ʻa e fakaʻamanaki, ʻofa ke ne fakafonu kimoutolu ʻaki ha fuʻu fiefia mo melino ʻi hoʻomou tui; koeʻuhi ke mou tupulekina ʻi he ʻamanaki lelei, ʻi he ngaue ʻa e Laumalie Maʻoniʻoni.” (Fakaʻītali ʻamautolu). ʻIo, ko e ʻamanakí ʻoku malava ke fakatatau ia, ʻikai ki ha foʻi teʻelango ʻi he fakapoʻulí, ka ki he ngaahi huelo ngingila ʻo e laʻā pongipongí, ʻo fakafonu ʻa ʻete moʻuí ʻaki ʻa e melino, fiefia, taumuʻa, mo e loto-toʻa. Fakatokangaʻi ʻoku tau “tupulekina ʻi he ʻamanaki lelei” ʻi heʻetau tui ki he Folofola tohi ʻa e ʻOtuá pea maʻu ʻa hono laumālie māʻoniʻoní. ʻOku pehē ʻe he Loma 15:4: “ʻIlonga ha meʻa naʻe tohi muʻa naʻe tohi moʻotau akonekina; koeʻuhi ko e meʻa ʻi he fakakataki mo e poupou ʻoku fai ʻe he folofola ke tau maʻu ai ʻa e ʻamanaki lelei.” Ko ia, ʻeke hifo kiate koe: ‘ʻOku ou tauhi ʻeku ʻamanakí ke hā mahino ʻaki ʻeku hoko ko ha tokotaha ako lelei ʻo e Tohi Tapú, ʻo lau fakaʻaho ia? ʻOku ou faʻa lotu ʻo kole ʻa e laumālie ʻo e ʻOtuá?’—Luke 11:13.

 6. Ke tauhi ke hā māʻalaʻala ʻetau ʻamanakí, ko e hā kuo pau ke tau maluʻi kitautolu mei aí?

⁶ Ko Sīsū, ʻa hotau Faʻifaʻitakiʻangá, naʻá ne maʻu ʻa e mālohi mei he Folofola ʻa e ʻOtuá. ʻI heʻetau vakai ofi kiate iá, ʻoku tau kalofi ai ʻa e ‘mafasia he poʻepoʻea hotau laumalié.’ (Hepelu 12:3) ʻOku ʻuhinga lelei ke pehē kapau ʻe tamatemate ʻetau ʻamanaki kuo ʻomai ʻe he ʻOtuá ʻi hotau ʻatamaí mo hotau lotó pe kapau ʻoku hiki ʻetau tokangatahá ki ha meʻa kehe, ki he ngaahi meʻa fakamatelié pe ki ha ngaahi taumuʻa fakamāmani nai, ʻe vave ʻetau hoko ʻo ongosia fakalaumālie, pea faai atu ʻo iku ki he mole ʻa e mālohi mo e loto-toʻa ke tauhi maʻu ʻa e maʻa fakaeʻulungāangá. ʻI he fakakaukau ko iá, te tau aʻu nai ai ʻo “tūkia ʻi he meʻa ʻoku kau ki [heʻetau] tui.” (1 Timote 1:19) ʻI he tafaʻaki ʻe tahá, ʻoku fakaivimālohiʻi ʻe he ʻamanaki moʻoní ʻetau tuí.

ʻOku Kaunga Tonu ʻa e ʻAmanakí ki he Tuí

 7. ʻI he founga fē ʻoku kaunga tonu ai ʻa e ʻamanakí ki he tuí?

⁷ “Ko e anga ʻo tui, ʻoku ne fakasino ʻa e ngaahi meʻa ʻoku ʻamanekina, ʻoku ne mafakamoʻoni ʻa e ngaahi meʻa ʻoku ʻikai ha,” ko e lau ia ʻa e Tohi Tapú. (Hepelu 11:1) Ko ia ai, ko e ʻamanakí ʻoku ʻikai ko ha meʻa noa pē ʻoku tānaki atu ki he tuí; ʻoku kaunga tonu ia ki he tuí. Fakakaukau atu kia ʻĒpalahame. Mei he anga ʻo e vakai ʻa e tangatá, ko ia mo hono uaifí, ʻa Sela, naʻá na mahili kinaua mei he taʻu ʻo e maʻu fānaú ʻi he taimi naʻe talaʻofa ai ʻa Sihova kiate kinaua ʻo kau ki ha ʻeá. (Senesi 17:​15-17) Naʻe anga-fēfē ʻa e tali ʻa ʻĒpalahamé? “Bea naa ne amanaki, ka kuo ikai hano tuuga o ene amanaki, bea tui, ke ne hoko koe tamai ae gaahi kakai lahi.” (Fakaʻītali ʻamautolu; Loma 4:​18, PM) ʻIo, naʻe hanga ʻe he ʻamanaki ʻa ʻĒpalahame naʻe ʻoange ʻe he ʻOtuá ʻo ʻoange ha makatuʻunga fefeka ki heʻene tuí te ne maʻu ha foha. Ko hono olá, naʻe hā māʻalaʻala ai ʻene tuí pea fakaivimālohiʻi ai ʻene ʻamanakí. He ko ē, naʻe aʻu ʻo maʻu ʻe ʻĒpalahame mo Sela ʻa e loto-toʻa ke na mavahe mei hona ʻapí mo hona kāingá pea nofo ʻi he toenga ʻo ʻena moʻuí ʻi ha ngaahi tēniti ʻi ha fonua muli!

 8. ʻI he founga fē ʻoku fakaivimālohiʻi ai ʻe he kātaki faitōnungá ʻa e ʻamanakí?

⁸ Naʻe tauhi ʻe ʻĒpalahame ʻene ʻamanakí ʻo papau ʻaki ʻene talangofua kakato kia Sihova, naʻa mo e taimi naʻe faingataʻa ai ke fai peheé. (Senesi 22:​2, 12) ʻI he tuʻunga meimei tatau, ʻi he talangofua mo kātaki ʻi he ngāue ʻa Sihová, ʻoku malava ai ke tau falala pau ki hotau palé. Ko e “kataki,” naʻe tohi ʻe Paula, ʻoku iku ai ki ha ‘tuʻunga lelei,’ ʻa ia ʻoku fakatupu ai ʻa e ʻamanaki, ‘bea oku ikai fakama ae amanaki leleí.’ (Loma 5:​4, 5, PM) Ko e ʻuhinga ia naʻe toe tohi ai ʻe Paula: “Ko ho mau loto, ke taki taha fakaha ekimoutolu ae faa fakakukafi koia ki he ilo bau oe amanaki lelei o aʻu ki he gataaga.” (Fakaʻītali ʻamautolu; Hepelu 6:​11, PM) Ko ha fakatuʻamelie pehē, ʻa ia ʻoku fakatuʻunga ʻi ha vahaʻangatae fekoekoeʻi mo Sihová, ʻe lava ke ne tokoniʻi kitautolu ke tau fehangahangai mo ha faʻahinga faingataʻa pē ʻaki ʻa e loto-toʻa, naʻa mo e fiefia.

“Fiefia i he Amanaki Lelei”

 9. Ko hono fai maʻu pē ʻo e hā ʻe lava ke ne tokoniʻi kitautolu ke tau “fiefia i he amanaki lelei”?

⁹ Ko ʻetau ʻamanaki kuo ʻomai ʻe he ʻOtuá ʻoku māʻolunga mamaʻo ange ia ʻi ha meʻa pē ʻoku lava ke tuʻuaki mai ʻe he māmaní. ʻOku pehē ʻe he Sāme 37:34: “Tatali [ʻi he ʻamanaki] kia Sihova, pea tauhi hono ʻalunga, pea te ne hakeakiʻi koe ke maʻu ʻa e fonua: ka hoko ʻa e motuhi ʻo haʻa faikovi te ke mātā ia.” ʻIo, ʻoku tau maʻu ʻa e ʻuhinga kotoa ke tau “fiefia i he amanaki lelei.” (Loma 12:​12, PM) Kae kehe, ke fai iá, kuo pau ke tau tauhi ʻetau ʻamanakí ke foʻou ʻi heʻetau fakakaukaú. ʻOkú ke fakakaukau maʻu pē ki hoʻo ʻamanaki kuo ʻomai ʻe he ʻOtuá? ʻE lava ke ke sioloto atu kiate koe ʻi Palataisi, ʻokú ke hākahaka ʻi he moʻui leleí, ʻataʻatā mei he ngaahi loto-moʻuá, takatakaiʻi ʻe he kakai ʻokú ke ʻofa ai, pea kau ʻi hono fakahoko moʻoni ʻo e ngāue fakafiemālié? ʻOkú ke fakakaukauloto atu ki he ngaahi feituʻu ʻo Palataisi ʻoku fakahaaʻi ʻi heʻetau ʻū tohí? ʻE lava nai ke fakatatau ʻa e fakakaukauloto peheé ki hono fakamaʻa ʻo ha matapā sioʻata kae lava ke te sio leleí. Kapau te tau liʻaki hono fakamaʻa ʻa e sioʻatá, tuaiekemo ʻe hanga ʻe he ʻulí mo e tuhituhí ʻo fakanenefuʻi ʻetau sio lelei ki ha meʻa fakaholomamata. ʻE tohoakiʻi leva nai ʻe he ngaahi meʻa kehé ia ʻetau tokangá. ʻOfa ke ʻoua ʻaupito te tau fakaʻatā ia ke hoko!

10. Ko e hā ʻoku kaunga lelei ai ki hotau vahaʻangatae mo Sihová ʻa ʻetau hanga atu ki he palé?

¹⁰ Ko hono moʻoní, ko ʻetau ʻuhinga tefito ki hono tauhi ʻo Sihová ko ʻetau ʻofa kiate iá. (Maake 12:30) Kae kehe, ʻoku totonu ke tau hanga vēkeveke atu ki he palé. Ko hono moʻoní, ʻoku ʻamanekina mai ʻe Sihova ke tau fai pehē! ʻOku pehē ʻe he Hepelu 11:6: “ʻO ka taʻekau ʻa e tui, ʻoku ʻikai momoʻi lava haʻate fakahōifua ia: he ko ia ʻoku ʻunuʻunu ki he ʻOtua, kuo pau ʻoku ne tui ʻoku ʻi ai ia, pea te ne hanga ʻo totongi [pe hoko ko e tokotaha-fakapale] kiate kinautolu ʻoku kumi hākili kiate ia.” Ko e hā ʻoku fiemaʻu mai ai ʻe Sihova ke tau vakai kiate ia ko e Tokotaha-Fakapalé? Koeʻuhi ʻi heʻetau fai peheé, ʻoku tau fakahaaʻi ai ʻoku tau ʻiloʻi lelei ʻetau Tamai fakahēvaní. ʻOkú ne nima-homo pea ʻokú ne ʻofa ʻi heʻene fānaú. Fakakaukau atu ki he loto-mamahi mo e loto-siʻi ngofua te tau ʻi aí kapau naʻe ʻikai ke tau maʻu “ha ʻamui mo ha ʻamanaki.”—Selemaia 29:11.

11. Naʻe anga-fēfē hono tokoniʻi ʻo Mōsese ʻe heʻene ʻamanaki kuo ʻomai ʻe he ʻOtuá ke ne fai ha ngaahi fili fakapotopotó?

¹¹ Ko ha faʻifaʻitakiʻanga tuʻu-ki-muʻa ʻo e taha naʻá ne hanganaki tokangataha ki heʻene ʻamanaki kuo ʻomai ʻe he ʻOtuá ko Mōsese. ʻI he tuʻunga “ko e tama ʻa e ʻofefine ʻo Felo,” naʻe maʻu ai ʻe Mōsese ʻa e mafai, tuʻunga, mo e koloa ʻo ʻIsipité ke ne faʻiteliha ai. Te ne tuli ki he ngaahi meʻá ni, pe te ne tauhi ʻa Sihova? Naʻe fili loto-toʻa ʻa Mōsese ke ne tauhi ʻa Sihova. Ko e hā hono ʻuhingá? Koeʻuhi naʻá ne “sio fakamamaʻu atu ki he totongi.” (Fakaʻītali ʻamautolu; Hepelu 11:​24-26) ʻIo, ʻoku pau naʻe ʻikai ke fakataʻetaʻetokanga ʻa Mōsese fekauʻaki mo e ʻamanaki naʻe fokotuʻu ʻe Sihova ʻi muʻa ʻiate iá.

12. Ko e hā ʻoku tatau ai ʻa e ʻamanaki faka-Kalisitiané mo ha tataá?

¹² Naʻe fakahoa ʻe he ʻapositolo ko Paulá ʻa e ʻamanakí ki ha tatā. ʻOku hanga ʻe hotau tatā fakaefakatātaá ʻo maluʻi ʻetau ngaahi mafai fakaefakakaukaú, ʻo fakamafeia kitautolu ke tau fai ha ngaahi fili fakapotopoto, fokotuʻu ʻa e ngaahi meʻa ʻoku totonu ke muʻomuʻá, pea tauhi maʻu ʻa e anga-tonú. (1 Tesalonaika 5:8) ʻOkú ke tui ho tatā fakaefakatātaá ʻi he taimi kotoa pē? Kapau ko ia, ʻi he hangē leva ko Mōsese mo Paulá, te ke fokotuʻu hoʻo ʻamanakí, ʻo ʻikai ʻi he “koto taʻemaʻu na ko e koloa; ka ki he ʻOtua, ʻa ia ʻoku ne ʻomi ʻa e meʻa kehekehe ʻo fuʻu lahi, maʻatau fiemalie pe.” Ko e moʻoni, ko hono ʻikai tali ʻo e ngaahi ʻalunga manakoá ʻaki hoʻo sītuʻa mei he ngaahi ngāue siokitá ʻoku fiemaʻu ki ai ʻa e loto-toʻa, ka ʻoku tuha moʻoni ʻa e feinga ko iá! He ko hono moʻoní, ko e hā ke fiemālie ai ʻi ha meʻa pē ʻoku siʻisiʻi ange ia ʻi he “moʻui moʻoni,” ʻa ē ʻoku fakatatali mai ki he faʻahinga ʻoku nau ʻamanaki mo ʻofa kia Sihová?—1 Timote 6:​17, 19.

“ʻE ʻIkai Siʻi Te U Mahuʻi Meiate Koe”

13. Ko e hā ʻoku fakapapauʻi mai ʻe Sihova ki heʻene kau sevāniti mateakí?

¹³ Ko e kakai ko ia ʻoku nau fokotuʻu ʻenau ʻamanakí ʻi he ngaahi meʻa ʻo e fokotuʻutuʻu lolotongá kuo pau ke nau fakakaukau fakamātoato fekauʻaki mo e ngaahi meʻa fakalilifu te nau fehangahangai mo ia ʻi he ʻapongipongí ʻi he faingataʻaʻia ʻa e māmaní he fakautuutu ai pē ʻa e “gaahi mamahi.” (Mātiu 24:​8, PM) Ka ko e faʻahinga ʻoku nau ʻamanaki kia Sihová ʻoku ʻikai te nau maʻu ʻa e ngaahi manavahē peheé. Te nau hokohoko atu ke “nofo nonga, pea te [nau] ʻatā mei he manavahe ki he kovi.” (Palovepi 1:33) Koeʻuhi ʻoku ʻikai te nau ʻamanaki ki he fokotuʻutuʻu lolotongá, ʻoku nau tokanga fiefia ki he akonaki ʻa Paulá: “Ke taʻemanumanu hoʻomou toʻonga; pea mou fiemalie ʻi he ngaahi meʻa ʻoku mou maʻu ni: he kuo folofola mai ʻe he ʻEne ʻAfio, ʻE ʻikai siʻi te u mahuʻi meiate koe, kaeʻumaʻā haʻaku momoʻi liʻaki koe.”—Hepelu 13:5.

14. Ko e hā ʻoku ʻikai fiemaʻu ai ki he kau Kalisitiané ke nau loto-moʻua tōtuʻa fekauʻaki mo ʻenau ngaahi fiemaʻu fakamatelié?

¹⁴ “ʻE ʻikai siʻi,” ‘kaeʻumaʻā ha momoʻi’—ʻoku fakahaaʻi mahino mai ʻe he ngaahi foʻi lea fakamamafá ni ʻe tokanga mai ʻa e ʻOtuá kiate kitautolu. ʻOku toe fakapapauʻi mai ʻe Sīsū kiate kitautolu ʻa e tokanga ʻofa ʻa e ʻOtuá, ʻo pehē: “Ka mou kumi muʻa ki hono puleʻanga, mo e maʻoniʻoni aʻana, pea ʻe ʻatu mo ia foki ʻa e ngāhi meʻa ko ia [ngaahi fiemaʻu pau fakamatelie ʻo e moʻuí] kotoa. Ko ia ʻoua te mou lotomoʻua koeʻuhi ko e ʻapongipongi, he ʻe moʻua ʻa e ʻapongipongi ʻi he meʻa ko ia.” (Mātiu 6:​33, 34) ʻOku ʻafioʻi ʻe Sihova ʻoku faingataʻa kiate kitautolu ke tau faivelenga ki hono Puleʻangá pea ʻi he taimi tatau ke fua ʻa e fatongia mafatukituki kakato ʻo e tokangaʻi ʻo ʻetau ngaahi fiemaʻu fakamatelié. Ko ia, ʻai ke tau falala kakato ki heʻene malava mo ʻene holi ke tokangaʻi ʻa ʻetau ngaahi fiemaʻú.—Mātiu 6:​25-32; 11:​28-30.

15. ʻOku anga-fēfē hono tauhi ʻe he kau Kalisitiané ha ‘mata huʻufatahá’?

¹⁵ ʻOku tau fakahaaʻi ʻetau falala kia Sihová ʻi he taimi ʻoku tau tauhi ai ha ‘mata huʻufatahá.’ (Mātiu 6:​22, 23) Ko ha mata huʻufataha ʻoku totonu, maʻa ʻi he taumuʻa, pea ʻatā mei he mānumanú mo e sio tuʻunga siokitá. ʻOku ʻikai ʻuhinga ʻa hono maʻu ha mata huʻufatahá ia ke moʻui ʻi ha tuʻunga masiva ʻangoʻango pe hoko ʻo taʻetokanga ki hotau ngaahi fatongia faka-Kalisitiané. ʻI hono kehé, ʻoku ʻuhinga ia ki hono fakahāhā ʻa e “loto fakabotoboto” ʻi heʻetau tauhi ke muʻomuʻa ʻa e ngāue ʻa Sihová.—2 Timote 1:​7, PM.

16. Ko e hā ʻoku fiemaʻu ai ʻa e tuí mo e loto-toʻá ki hono tauhi ha mata huʻufatahá?

¹⁶ Ko hono tauhi ha mata huʻufatahá ʻoku fiemaʻu ki ai ʻa e tui mo e loto-toʻa. Ko e fakatātaá, kapau ʻoku vili atu ha pule ngāue ke ke ngāue tuʻumaʻu ʻi ha taimi ʻoku fakataimitēpileʻi ia ki he ngaahi fakataha faka-Kalisitiané, te ke pīkitai loto-toʻa ki hoʻo ngaahi meʻa fakalaumālie ʻoku fakamuʻomuʻá? Kapau ʻoku veiveiua ha taha pe ʻe fakahoko ʻe Sihova ʻEne talaʻofa ke tokangaʻi ʻa ʻEne kau sevānití, tā ko e meʻa pē ke fai ʻe Sētané ia ko ʻene fakatupulekina ʻa e tengé pea ʻe tuku ʻosi nai ʻe he tokotaha ia ko iá ʻene maʻu ʻa e ngaahi fakatahá. ʻIo, ko ha siʻi ʻetau tuí ʻe fakaʻatā ai ʻa Sētane ke ne puleʻi kitautolu ʻo ne hanga ai ʻe ia, ʻo ʻikai ko Sihova, ʻo fokotuʻu mai ʻa e ngaahi meʻa ke tau fakamuʻomuʻá. Ko ha toki meʻa fakamamahi ē ko ia!—2 Kolinito 13:5.

‘Tatali ʻi he ʻAmanaki kia Sihova’

17. ʻOku anga-fēfē hono tāpuakiʻi he taimí ni ʻa e faʻahinga ko ia ʻoku falala kia Sihová?

¹⁷ ʻOku toutou fakahaaʻi mai ʻe he Tohi Tapú ko e faʻahinga ko ia ʻoku nau ʻamanaki mo falala kia Sihová heʻikai ʻaupito te nau taʻelavameʻa. (Palovepi 3:​5, 6; Selemaia 17:7) Ko e moʻoni, ʻi he taimi ʻe niʻihi kuo pau ke nau fiemālie pē ʻi ha kiʻi meʻa siʻi, ka ʻoku nau fakakaukau ki he meʻá ni ko ha kiʻi feilaulau siʻisiʻi ia ʻi hono fakahoa atu ki he ngaahi tāpuaki ʻoku tuku tauhi mai maʻanautolú. ʻOku nau fakahāhā ai ʻoku nau ‘tatali ʻi he ʻamanaki kia Sihova’ pea ʻoku nau falala ʻe faai atu pē ʻo ne foaki ki heʻene faʻahinga mateakí ʻa e ngaahi holi totonu kotoa ʻo honau lotó. (Sāme 37:​4, 34) Ko ia ai, ʻoku nau fiefia moʻoni he taimí ni. “Ko e fakatuʻa ʻa e faitotonu ko e koto fiefia: ka ko e ʻamanaki ʻa e angahala ʻe ʻauha.”—Palovepi 10:28.

18, 19. (a) Ko e hā ʻa e fakapapau anga-ʻofa ʻoku ʻomai ʻe Sihova kiate kitautolú? (e) ʻE anga-fēfē ʻetau ʻai maʻu pē ʻa Sihova ʻi hotau “toʻomataʻu”?

¹⁸ ʻI he luelue fetakinima ʻa ha kiʻi tamasiʻi mo ʻene tamaí, ʻokú ne ongoʻi malu ai. ʻOku hoko tatau pē ʻiate kitautolu ʻi heʻetau ʻaʻeva mo ʻetau Tamai fakahēvaní. Naʻe pehē ʻe Sihova ki ʻIsileli: “ʻOua ʻe manavahe, he ʻoku ou ʻiate koe ʻe au; . . . te u tokoni kiate koe; . . . He ko au Sihova ko ho ʻOtua te u puke ho toʻomataʻu, ʻa au ʻoku ou pehe atu, ʻOua ʻe manavahe; ko au ʻoku ou tokoniʻi koe.”—Aisea 41:​10, 13.

¹⁹ Ko ha foʻi fakatātā anga-ʻofa ē ʻoku ʻomai aí—ʻe puke ʻe Sihova hoto nimá! Naʻe tohi ʻe Tēvita: “Kuo u ʻai ʻa Sihova ʻi hoku ʻao maʻu pē; ko e meʻa ʻi heʻene ʻi hoku toʻomataʻu ko ia ai ʻe ʻikai te u ngaūe.” (Sāme 16:8) ʻE anga-fēfē ʻetau ʻai maʻu pē ʻa Sihova ʻi hotau “toʻomataʻu”? ʻOku tau fai ia ʻo ʻikai toe siʻi hifo ʻi he founga ʻe ua. ʻUluakí, ʻoku tau fakaʻatā ʻene Folofolá ke ne tataki kitautolu ʻi he tafaʻaki kotoa pē ʻo e moʻuí; pea ko e uá, ʻoku tau hangataha atu ki he pale lāngilangiʻia kuo fokotuʻu ʻe Sihova ʻi muʻa ʻiate kitautolú. Naʻe hiva ʻa e tokotaha-tohi-saame ko ʻĒsafé: “Ko e ko au ko ia ʻoku ta feʻao maʻu: kuo ke puke hoku toʻomataʻu. Te ke faleʻi au, ʻo taki hala, pea hili ia te ke tali fakahu au ki he kololia.” (Sāme 73:​23, 24) ʻAki ʻa e fakapapau peheé, ʻe lava ai ke tau fehangahangai moʻoni mo e kahaʻú ʻi he loto-pau.

“ʻOku Ofi Ai Homou Huhuʻi”

20, 21. Ko e hā ʻa e kahaʻu ʻoku fakatatali mai ki he faʻahinga ʻoku nau ʻamanaki kia Sihová?

²⁰ ʻI he ʻosi atu ʻa e ʻaho taki taha, ʻoku hoko ʻo toe fiemaʻu fakavavevave ange ai ke tau ʻai maʻu pē ʻa Sihova ʻi hotau toʻomataʻú. Kuo vavé ni, ʻo kamataʻaki ʻa hono fakaʻauha ʻo e lotu loí, ke hokosia ʻe he māmani ʻa Sētané ha fuʻu mamahi kuo teʻeki ʻaupito ke ne hokosia ki muʻa. (Mātiu 24:21) ʻE kāpui ʻe he manavaheé ʻa e faʻahinga taʻetui ʻo e tangatá. Neongo ia, ʻi he lolotonga ʻo e taimi maveuveu ko iá, ʻe fiefia ʻa e kau sevāniti loto-toʻa ʻa Sihová ʻi heʻenau ʻamanakí! Naʻe pehē ʻe Sīsū: “ʻI he kamata hoko ʻa e ngaahi meʻa ko ia, mou hiki homou ʻulu, ʻo hanga hake; he ʻoku ofi ai homou huhuʻi.”—Luke 21:28.

²¹ Ko ia ai, tau fiefia ʻi heʻetau ʻamanaki kuo foaki mai ʻe he ʻOtuá pea ʻoua ʻe hoko ʻo kākaaʻi pe fakataueleʻi ʻe he ngaahi fakahohaʻa pōtoʻi ʻa Sētané. ʻI he taimi tatau, tau ngāue mālohi ke fakatupulekina ʻa e tui, ʻofa mo e manavahē ʻOtuá. Ko hono fai iá, te tau maʻu ai ʻa e loto-toʻa ke talangofua kia Sihova ʻi he ngaahi tuʻunga kotoa pē pea ke fakafepakiʻi ʻa e Tēvoló. (Semisi 4:​7, 8) ʻIo, “ke mou loto toʻa, bea te ne fakamalohi ho mou loto, akimoutolu kotoabe oku amanaki lelei kia Jihova.”—Sāme 31:​24, PM.

[Fakamatala ʻi lalo]

ʻE Lava Ke Ke Tali?

• ʻI he founga fē naʻe tokoni ai ʻa e ʻamanaki ʻa Sīsuú ki hono fakatupunga ʻene loto-toʻá?

• ʻOku anga-fēfē ʻa e fekauʻaki ʻa e tuí mo e ʻamanakí?

• ʻE malava fēfē ke ʻoange ʻe he ʻamanakí fakataha mo e tuí ki ha Kalisitiane ʻa e loto-toʻa ke ne fokotuʻu ʻa e ngaahi meʻa ʻoku totonu ke fakamuʻomuʻa ʻi he moʻuí?

• Ko e hā ʻoku malava ai ki he faʻahinga ʻoku nau ‘tatali ʻi he ʻamanaki kia Sihová’ ke nau hanga atu ki he kahaʻú mo e loto-pau?

[Fakatātā ʻi he peesi 28]

Pe kei siʻi pe taʻumotuʻa, ʻe lava ke ke sioloto atu kiate koe ʻi he Palataisí?