“ʻOku ʻi Ai ha Taimi” ki he Ngāue mo e Mālōlō

 1. Ko e hā ʻa e vakai ʻa e kakai tokolahi ki he ngāué?

ʻOKU anga-fēfē ʻa e vakai ʻa e kakai tokolahi taha ʻi he feituʻu ʻokú ke nofo aí ki he ngāué? ʻI he ngaahi fonua ʻe niʻihi, ʻoku ngāue mālohi ange mo lōloa ange ʻa e kakaí ʻi ha toe taimi ki muʻa. Ko e kakai ʻoku tōtuʻa ʻenau ngāué ʻoku nau faʻa femoʻuekina ʻo ʻikai ai ke nau mālōlō, fakamoleki ha taimi mo honau fāmilí pe fakalato ʻenau fiemaʻu fakalaumālié. (Tml. 2:23) ʻI he tafaʻaki ʻe tahá, ʻoku ʻi ai ʻa e kakai ʻe niʻihi ʻoku ʻikai pē ke nau saiʻia ke ngāue pea kumi kalofanga ki he ʻikai ke nau ngāué.—Pal. 26:13, 14.

2-3. Ko e hā ʻa e faʻifaʻitakiʻanga naʻe fokotuʻu mai ʻe Sihova mo Sīsū fekauʻaki mo e ngāué?

² ʻI he kehe mei he vakai ʻikai mafamafatatau ʻa e māmaní, fakakaukau ki he anga ʻo e vakai ʻa Sihova mo Sīsuú. ʻOku ʻikai toe ala fehuʻia ko Sihova ko ha tokotaha ngāue. Naʻe fakamahino ia ʻe Sīsū ʻi heʻene pehē: “Kuo ngāue maʻu ai pē ʻeku Tamaí ʻo aʻu mai ki he taimí ni, pea ʻoku ou ngāue maʻu ai pē.” (Sione 5:17) Fakakaukau ki he ngāue kotoa naʻe fai ʻe he ʻOtuá ʻi hono fakatupu ʻa e ngaahi meʻamoʻui laumālie taʻefaʻalauá mo e ʻuniveesi kāfakafá. ʻOku tau toe sio ki he fakamoʻoni feʻungaʻānoa ʻo e ngaahi ngāue fakaefakatupu ʻa e ʻOtuá ki he māmani fakaʻofoʻofa ʻoku tau nofo aí. Naʻe moʻoni ʻa e pehē ʻe he tokotaha-tohi-sāmé: “He lahi moʻoni ē ko hoʻo ngaahi ngāué, ʻe Sihova! Kuó ke ngaohi kotoa kinautolu ʻi ho potó. ʻOku fonu ʻa e māmaní ʻi he meʻa kuó ke ngaohí.”—Saame 104:24.

³ Naʻe faʻifaʻitaki ʻa Sīsū ki heʻene Tamaí. Ko e ʻAló, ʻa e tokotaha ko potó, naʻá ne kau fakataha mo e ʻOtuá ʻi hono “teuteu ʻa e langí.” Naʻá ne ʻi he tafaʻaki ʻo Sihová “ko ha tufunga pōtoʻi.” (Pal. 8:27-31) Ki mui ʻaupito ai, ʻi he ʻi māmani ʻa Sīsuú, naʻá ne fai ʻa e ngāue tuʻu-ki-muʻa. Naʻe hangē ʻa e ngāue ko iá ko ha meʻakai kiate ia, pea ko ʻene ngaahi ngāué naʻe fakamoʻoniʻi ai naʻe fekauʻi mai ia ʻe he ʻOtuá.—Sione 4:34; 5:36; 14:10.

 4. Ko e hā ʻe lava ke tau ako meia Sihova mo Sīsū fekauʻaki mo e mālōloó?

⁴ ʻI he faʻifaʻitakiʻanga naʻe fokotuʻu mai ʻe Sihova mo Sīsū ʻi he ngāue mālohí ʻoku ʻuhinga iá ʻoku ʻikai fiemaʻu ia ke tau mālōlō? ʻIkai ʻaupito. ʻOku ʻikai ʻaupito ke helaʻia ʻa Sihova, ko ia ʻoku ʻikai fiemaʻu ia ke ne mālōlō. ʻOku pehē ʻi he Tohi Tapú ʻi he hili hono fakatupu ʻe Sihova ʻa e langí mo e māmaní, “naʻe tuku ai ʻene ngāué peá ne mālōlō.” (ʻEki. 31:17) Kae kehe, ʻoku hā mahino ʻoku ʻuhinga iá naʻe kiʻi tuku ʻe Sihova ʻene ngāue fakaefakatupú pea vaheʻi ha taimi ke fiefia ʻi he meʻa naʻá ne ngaohí. Pea neongo naʻe ngāue mālohi ʻa Sīsū ʻi heʻene ʻi māmaní, naʻá ne kei vaheʻi pē ʻa e taimi ke mālōlō pea kai fakataha mo hono kaungāmeʻá.—Māt. 14:13; Luke 7:34.

 5. Ko e hā ʻoku fāinga ʻa e tokolahi mo iá?

⁵ ʻOku fakalototoʻaʻi ʻe he Tohi Tapú ʻa e kakai ʻa e ʻOtuá ke nau ngāue. Ko ʻene kau sevānití ʻoku totonu ke nau ngāue mālohi kae ʻikai ko e fakapikopiko. (Pal. 15:19) Mahalo ʻokú ke ngāue fakamāmani ke tokangaʻi ho fāmilí. Pea ko e kau ākonga kotoa ʻa Kalaisí ʻoku nau maʻu ʻa e fatongia ke kau ʻi he ngāue malangaʻi ʻo e ongoongo leleí. Neongo ia, ʻoku fiemaʻu foki ke ke maʻu ha mālōlō feʻunga. ʻOkú ke fāinga ʻi he taimi ʻe niʻihi ke ʻai ke mafamafatatau ho taimi ki he ngāue fakamāmaní, ngāue fakafaifekaú mo e mālōloó? ʻOku tau ʻilo fēfē ʻa e lahi ʻo e taimi ke ngāué mo e taimi ke mālōlō aí?

 6. ʻOku anga-fēfē hono fakahaaʻi ʻi he Maʻake 6:30-34 naʻe maʻu ʻe Sīsū ha vakai mafamafatatau ki he ngāué mo e mālōloó?

⁶ ʻI he fekauʻaki mo e ngāué, ko e mafamafatataú ʻoku mahuʻinga. Naʻe fakamānavaʻi ʻa Tuʻi Solomone ke ne tohi: “ʻOku ʻi ai ha taimi ki he . . . ngāue kotoa pē.” Naʻá ne lave ki he tō, langa hake, kata, meʻe, pea mo e ngaahi ngāue kehe. (Tml. 3:1-8) ʻOku hā mahino, ko e tafaʻaki mahuʻinga ʻe ua ʻo e moʻuí ko e ngāue mo e mālōlō. Naʻe maʻu ʻe Sīsū ha vakai mafamafatatau ki he ngāué mo e mālōloó. ʻI he taimi ʻe taha, naʻe foki ʻa e kau ʻapositoló mei ha fononga fakamalanga. Naʻa nau fuʻu femoʻuekina ʻo “ʻikai ai hanau taimi ʻatā ʻo aʻu ki hano maʻu ha meʻatokoni.” Naʻe pehē ʻe Sīsū: “Mou haʻu, ʻa kimoutolu pē, ki ha potu lala ʻo kiʻi mālōlō.” (Lau ʻa e Maʻake 6:30-34.) Neongo ko ia mo ʻene kau ākongá naʻe ʻikai malava maʻu pē ke nau maʻu ha mālōlō feʻunga, naʻe ʻiloʻi ʻe Sīsū naʻe fiemaʻu ke nau mālōlō kotoa.

 7. ʻE lava fēfē ke tokoniʻi kitautolu ʻe he lāulea ki he lao ʻo e Sāpaté?

⁷ ʻI he taimi ʻe niʻihi, ʻoku fiemaʻu moʻoni ha mālōlō pe ko ha fengaʻunuʻaki. ʻOku lava ke tau vakai ki ai ʻi ha fokotuʻutuʻu naʻe fai ʻe he ʻOtuá maʻa hono kakai ʻi he kuonga muʻá—ko e Sāpate fakauiké. ʻOku ʻikai ke tau ʻi he malumalu ʻo e Lao ʻa Mōsesé, neongo ia ʻe lava ke tau maʻu ʻaonga mei he lāulea ki he meʻa naʻe leaʻaki fekauʻaki mo e Sāpaté. Ko e meʻa ʻoku tau akó ʻe lava ke tokoniʻi ai kitautolu ke sivisiviʻi ʻetau vakai ki he ngāué mo e mālōloó.

 8. Fakatatau ki he ʻEkisoto 31:12-15, ko e Sāpaté ko ha ʻaho ʻo e hā?

⁸ ʻOku pehē ʻe he Folofola ʻa e ʻOtuá hili ʻa e “ʻaho” hono ono ʻo e fakatupú, naʻe mālōlō ʻa e ʻOtuá mei heʻene ngāue ki he māmaní. (Sēn. 2:2) Neongo ia, ʻoku saiʻia ʻa Sihova ʻi he ngāué pea kuó ne “ngāue maʻu ai pē” ʻi he ngaahi founga kehé. (Sione 5:17) Ko e Sāpate fakauiké naʻe muimui ia ki ha sīpinga meimei tatau mo e ʻaho mālōlō ko ia ʻa Sihova ʻoku fakamatalaʻi ʻi he Sēnesí. Naʻe pehē ʻe he ʻOtuá ko e Sāpaté ko ha fakaʻilonga ia ʻi hono vahaʻá mo e kau ʻIsilelí. Ko ha ʻaho ia ʻo e “mālōlō fakaʻaufuli . . . , ko ha meʻa ia ʻoku māʻoniʻoni kia Sihova.” (Lau ʻa e ʻEkisoto 31:12-15.) Ko hono tapui ʻa e ngāué naʻe tatau ki he tokotaha kotoa kau ai ʻa e fānau, kau pōpula, pea naʻa mo e fanga manu lalatá. (ʻEki. 20:10) Naʻe fakaʻatā ai ki he kakaí ke nau tokanga lahi ange ki he ngaahi meʻa fakalaumālié.

 9. Ko e hā ʻa e vakai ʻikai mafamafatatau fekauʻaki mo e Sāpaté ʻi he ʻaho ʻo Sīsuú?

⁹ Ko e ʻaho Sāpaté naʻe lelei ki he kakai ʻa e ʻOtuá; kae kehe, ko e tokolahi ʻo e kau taki lotu ʻi he taimi ʻo Sīsuú naʻa nau vakai ki ai ʻo fuʻu tōtuʻa. Naʻa nau taukaveʻi naʻe ʻikai ngofua ke paki ʻa e uité ʻi he Sāpaté pe fakamoʻui ha tokotaha naʻe puke. (Mk. 2:23-27; 3:2-5) Ko e ngaahi vakai ko iá naʻe ʻikai tapua atu ai ʻa e fakakaukau ʻa e ʻOtuá, pea naʻe fakamahino ia ʻe Sīsū ki he faʻahinga ʻe fanongó.

10. Ko e hā ʻoku lava ke tau ako mei he Mātiu 12:9-12 fekauʻaki mo e vakai ʻa Sīsū ki he Sāpaté?

¹⁰ Naʻe tauhi ʻe Sīsū mo hono kau muimui Siú ʻa e Sāpaté koeʻuhi naʻa nau ʻi he malumalu ʻo e Lao ʻa Mōsesé.b Ka naʻe fakahaaʻi ʻe Sīsū ʻi heʻene leá mo e ngāué ko hono tauhi ʻo e Sāpaté naʻe mafamafatatau pea naʻe ngofua pē ke fai ha ngāue ʻaonga mo anga-lelei. Naʻá ne fakahaaʻi mahino: “ʻOku ngofua ke fai ha meʻa lelei ʻi he Sāpaté.” (Lau ʻa e Mātiu 12:9-12.) Naʻe ʻikai ke ne vakai ki hono fai ʻa e ngāue ʻaonga mo anga-leleí ko hano maumauʻi ia ʻa e Sāpaté. Ko e ngāue ʻa Sīsuú naʻe fakamamafaʻi ai ha tafaʻaki tefito ʻo e Sāpaté. Koeʻuhi naʻe mālōlō ʻa e kakai ʻa e ʻOtuá mei heʻenau ngāue fakaʻahó, naʻe malava ke nau tokangataha ai ki he ngaahi meʻa fakalaumālié. Naʻe tupu hake ʻa Sīsū ʻi ha fāmili kuo pau pē ko e ʻaho Sāpaté naʻa nau ngāueʻaki ia ki he lotu ki he ʻOtuá. Naʻe tapua mai eni ʻi he meʻa ʻoku tau lau fekauʻaki mo Sīsū ʻi he taimi naʻá ne ʻi hono kolo ko Nāsaletí: “Fakatatau ki he meʻa naʻá ne [Sīsū] anga ki ai ʻi he ʻaho Sāpaté, naʻá ne hū ki he sinakoké pea naʻá ne tuʻu hake ke lau ʻa e Folofolá.”—Luke 4:15-19.

11. Ko e hā ʻa e faʻifaʻitakiʻanga lelei naʻe fokotuʻu mai ʻe Sīsū fekauʻaki mo e ngāué?

¹¹ Naʻe maʻu moʻoni ʻe Siosifa ʻa e vakai ʻa e ʻOtuá fekauʻaki mo e ngāué ʻi heʻene akoʻi ʻa Sīsū, ʻa hono foha ohí, ke hoko ko ha tufunga. (Māt. 13:55, 56) Pea kuo pau pē naʻe sio ʻa Sīsū ki he ngāue mālohi ʻa Siosifá ʻi he ʻaho ki he ʻaho ke poupouʻi hono fāmili tokolahí. Ko e meʻa ʻoku fakatupu tokangá, naʻe tala ʻe Sīsū ki mui ai ki heʻene kau ākongá: “ʻOku taau ʻa e tokotaha ngāué mo ʻene totongí.” (Luke 10:7) ʻIo, naʻe maheni pē ʻa Sīsū ia mo e ngāue mālohí.

12. Ko e hā ʻa e konga Tohi Tapu ʻoku fakahaaʻi ai ʻa e lau ʻa e Tohi Tapú fekauʻaki mo e ngāue mālohí?

¹² Naʻe meimei tatau pē mo e ʻapositolo ko Paulá. Ko ʻene ngāue tefitó ko e faifakamoʻoni fekauʻaki mo e huafa ʻo Sīsuú mo ʻene pōpoakí. Ka, naʻe ngāue ʻa Paula ke poupouʻi ʻa ia tonu. Naʻe lāuʻilo ʻa e kau Tesalonaiká ki heʻene “ngāue mālohi mo e fakaongosia,” ko ʻene “ngāue . . . ʻi he pō mo e ʻaho” koeʻuhí ke ʻoua naʻa ne hilifaki “ha kavenga fakamole lahi” ki ha taha. (2 Tes. 3:8; Ngā. 20:34, 35) ʻI he lave ʻa Paula ki heʻene ngāué mahalo pē naʻá ne ʻuhinga ki he ngaohi-tēnití. ʻI heʻene ʻi Kolinitoó, naʻá ne nofo mo ʻAkuila mo Pīsila “ʻo nau ngāue, he ko kinautolú ko e kau ngaohi-tēniti.” Ko e ngāue ʻa Paula “ʻi he pō mo e ʻaho” naʻe ʻikai ʻuhinga ia naʻá ne ngāue taʻemālōlō. Naʻá ne mālōlō mei he ngaohi-tēnití, hangē ko e Sāpaté. Naʻá ne maʻu ʻi he ʻaho ko iá ha faingamālie ke faifakamoʻoni ki he kau Siú, ʻa ia naʻe ʻikai foki ke nau ngāue ʻi he Sāpaté.—Ngā. 13:14-16, 42-44; 16:13; 18:1-4.

13. Ko e hā ʻoku lava ke tau ako mei he faʻifaʻitakiʻanga ʻa Paulá?

¹³ Naʻe fokotuʻu ʻe he ʻapositolo ko Paulá ha faʻifaʻitakiʻanga lelei. Naʻe pau ke ne ngāue fakamāmani; ka, naʻá ne fakapapauʻi ke kau maʻu pē “ʻi he ngāue toputapu ʻo e ongoongo lelei ʻa e ʻOtuá.” (Loma 15:16; 2 Kol. 11:23) Naʻá ne enginaki ki he niʻihi kehé ke nau fai pehē. Ko ia ai, ko ʻAkuila mo Pīsilá ko hono “ongo kaungāngāue ʻia Kalaisi Sīsū.” (Loma 12:11; 16:3) Naʻe enginaki ʻa Paula ki he kau Kolinitoó ke nau “femoʻuekina ai pē ʻi he ngāue ʻa e ʻEikí.” (1 Kol. 15:58; 2 Kol. 9:8) Naʻe aʻu ʻo fakamānavaʻi ʻe Sihova ʻa e ʻapositolo ko Paulá ke ne tohi: “Kapau ʻoku ʻi ai ha taha ʻoku ʻikai ke fie ngāue, ʻoua naʻa tuku ia ke ne kai.”—2 Tes. 3:10.

14. Ko e hā naʻe ʻuhinga ki ai ʻa Sīsū ʻi heʻene lea ʻoku hiki ʻi he Sione 14:12?

¹⁴ Ko e ngāue mahuʻinga taha ʻi he ngaahi ʻaho fakaʻosi ko ení ko e malangá mo e ngaohi ākongá. Ko hono moʻoní, naʻe tomuʻa tala ʻe Sīsū ko ʻene kau ākongá te nau fai ʻa e ngāue lahi ange ia ʻiate ia! (Lau ʻa e Sione 14:12.) Naʻe ʻikai ke ne ʻuhingá te tau fai ʻa e ngaahi mana ʻo hangē ko iá. ʻI hono kehé, ko hono kau muimuí te nau malanga mo faiako ʻi ha feituʻu ngāue lahi ange, ki ha kakai tokolahi ange, pea ʻi ha vahaʻa taimi lōloa ange ʻiate ia.

15. Ko e hā ʻa e ngaahi fehuʻi ʻoku totonu ke tau ʻeke hifó, pea ko e hā hono ʻuhingá?

¹⁵ Kapau ʻokú ke ngāue fakamāmani, ʻeke hifo ʻa e fehuʻi ko ení: ‘ʻOku ʻiloʻi au he ngāueʻangá ko ha tokotaha ngāue mālohi? ʻOku ou fakakakato taimi totonu ʻeku ngāué pea fai ʻa e lelei taha ʻo ʻeku malavá?’ Kapau ko hoʻo talí ko e ʻio, ʻoku ngalingali leva ʻoku falala atu kiate koe ʻa ho pule ngāué. Te ke ʻai foki ai ʻa e pōpoaki ʻo e Puleʻangá ke fakamānako ange ki he faʻahinga ʻi he ngāueʻangá. ʻI heʻene haʻu ki he ngāue fakamalangá mo e faiakó, ʻeke hifo ʻa e ngaahi fehuʻi ko ení: ‘ʻOku ʻiloʻi au ko ha tokotaha ngāue mālohi ʻi he ngāue fakafaifekaú? ʻOku ou teuteu lelei ki he ʻuluaki ʻaʻahí? ʻOku ou foki vave ke talanoa mo e kakai mahuʻingaʻiá? Pea ʻoku ou kau tuʻumaʻu ʻi he ngaahi tafaʻaki kehekehe ʻo e ngāue fakafaifekaú?’ Kapau ko hoʻo talí ko e ʻio, te ke fiefia ʻi hoʻo ngāué.

16. Ko e hā ʻa e kehekehe ʻi he vakai ʻa Sīsū mo ʻene kau ʻapositoló ki he mālōloó mei he tokolahi ʻi he ʻahó ni?

¹⁶ Naʻe ʻiloʻi ʻe Sīsū ʻi he taimi ʻe niʻihi ko ia mo ʻene kau ʻapositoló naʻe fiemaʻu ke nau mālōlō. Kae kehe, ko e kakai tokolahi ʻi he taimi ko iá mo e ʻahó ni ʻoku lava ke fakatatau kinautolu ki he tangata koloaʻia ʻi he talanoa fakatātā ʻa Sīsuú. Naʻe tuipau ʻa e tangata ko iá: “Te u mālōlō ā ʻo kai, inu, mo fiefia.” (Luke 12:19; 2 Tīm. 3:4) Naʻá ne tuku taha hono lotó ʻi he mālōloó mo e mālié. ʻI hono kehé, ko Sīsū mo ʻene kau ʻapositoló naʻe ʻikai ke nau fakatefito ʻenau moʻuí ʻi hono fakahōhōʻiaʻi kinautolú.

17. ʻOku anga-fēfē ʻetau ngāueʻaki ʻa e taimi ʻoku tau mālōlō ai mei he ngāue fakamāmaní?

¹⁷ ʻI he ʻahó ni, ʻoku tau feinga ke faʻifaʻitaki kia Sīsū ʻaki ʻa e ʻikai ngata pē ʻetau mālōlō ʻi he taimi ʻoku ʻikai ke tau ngāue aí ka ʻoku tau toe fai foki ʻa e meʻa ʻoku lelei ʻaki ʻa e faifakamoʻoni ki he niʻihi kehé pea maʻu ʻa e ngaahi fakataha faka-Kalisitiané. Ko hono moʻoní, ko e ngaohi ākongá mo e maʻu fakatahá ʻoku mātuʻaki mahuʻinga kiate kitautolu ko ia ʻoku tau feinga lahi ke kau tuʻumaʻu ʻi he ngaahi ngāue toputapu ko iá. (Hep. 10:24, 25) Naʻa mo e taimi ʻoku tau mālōlō ʻeveʻeva aí, ʻoku tau pipiki ki heʻetau taimi-tēpile fakalaumālie ʻo hono maʻu ʻa e ngaahi fakatahá ʻo tatau ai pē pe ʻoku tau ʻi fē, pea ʻoku tau kumi ki ha faingamālie ke faifakamoʻoni ki he faʻahinga ʻoku tau fetaulaki mo iá.—2 Tīm. 4:2.

18. Ko e hā ʻoku loto ʻa hotau Tuʻí, ʻa Kalaisi Sīsū, ke tau faí?

¹⁸ He houngaʻia ē ko kitautolu ʻi hotau Tuʻí, ʻa Kalaisi Sīsū, ʻokú ne fakaʻatuʻi pea tokoniʻi kitautolu ke maʻu ʻa e vakai mafamafatatau ki he ngāué mo e mālōloó! (Hep. 4:15) ʻOkú ne loto ke tau maʻu ha mālōlō feʻunga. ʻOkú ne loto foki ke tau ngāue mālohi ke tokonaki ʻetau ngaahi fiemaʻu fakaesinó pea kau ʻi he ngāue fakaivifoʻou ʻo e ngaohi ākongá. ʻI he kupu hono hokó, te tau lāulea ai ki he ngafa ʻo Sīsū ʻi heʻene fakatauʻatāinaʻi kitautolu mei ha founga anga-fakamamahi ʻo e pōpulá.