Ngaahi Fehuʻi mei he Kau Lautohí

Ko e ‘fakailogaʻi’ ko ia ʻoku lave ki ai ʻi he 2 Tesalonaika 3:​14 (PM) ko ha foʻi ngāue fakaefakatahaʻanga, pe ko ha meʻa ia ke fai fakatāutaha ʻe he kau Kalisitiané ʻi he fakaʻehiʻehi ko ia mei he faʻahinga taʻemapuleʻí?

ʻOku fakahaaʻi ʻe he meʻa naʻe tohi ʻe he ʻapositolo ko Paulá ki he kau Tesalonaiká ʻoku maʻu ʻe he kau mātuʻa ʻo e fakatahaʻangá ha ngafa pau ʻi he “fakailogaʻi” peheé. Kae kehe, ʻoku muimui leva ai ʻa e kau Kalisitiane tāutaha, ʻo fai ia mo e fakakaukau ki he ngaahi taumuʻa fakalaumālie. ʻOku malava ke tau mahinoʻi lelei taha ʻení ʻaki hono fai ha fakakaukau atu ki he akonaki ʻa Paulá ʻi hono muʻaki tuʻungá.

Naʻe tokoni ʻa Paula ki hono fokotuʻu ʻa e fakatahaʻanga Tesalonaiká, ʻo tokoniʻi ʻa e kau tangata mo e kau fefine ke nau hoko ko e kau tui. (Ngāue 17:​1-4) Naʻá ne tohi ki mui ai mei Kolinitō ʻo fakaongoongoleleiʻi mo fakalototoʻaʻi kinautolu. Naʻe ʻoatu foki ʻe Paula ʻa e akonaki naʻe fiemaʻú. Naʻá ne naʻinaʻi kiate kinautolu ‘ke nau aga fakalogobe, bea ke nau fai taki taha ʻenau gaue, bea ke gaue aki ho nau nimá.’ Naʻe ʻi ai ʻa e niʻihi naʻe ʻikai te nau fai pehē, ko ia naʻe tānaki atu ʻe Paula: “Oku mau eginaki kiate kimoutolu, e kaiga, valokiʻi akinautolu oku fakamaveuveu, fakafiemalie ki he kau loto foi, boubou ae vaivai.” ʻOku hā mahino, naʻe ʻi ai ʻa e kau “fakamaveuveu”a ʻi honau lotolotongá ʻa ia naʻe fiemaʻu ke akonakiʻi.​—1 Tesalonaika 1:​2-10; 4:​11, PM; 5:​14, PM.

Hili ha ngaahi māhina mei ai, naʻe tohi ai ʻe Paula ʻa ʻene tohi hono ua ki he kau Tesalonaiká, fakataha mo e toe ngaahi fakamatala fekauʻaki mo e ʻi ai ʻa Sīsū ʻi he kahaʻú. Naʻe toe ʻoange ai ʻe Paula ha tākiekina lahi ange fekauʻaki mo e founga ke feangainga ai mo e kau fakamaveuveu ko ia naʻe ‘ikai gaue, ka koe kau kaunoa.’ Ko ʻenau ngaahi meʻa naʻe faí naʻe kehe ʻaupito ia fakatouʻosi mei he faʻifaʻitakiʻanga ʻa Paula ʻi he tuʻunga ko ha tokotaha ngāue mālohí pea mo ʻene tuʻutuʻuni mahino fekauʻaki mo e ngāue ke te tokoniʻi pē kitá. (2 Tesalonaika 3:​7-12, PM) Naʻe fakahinohino ʻe Paula ʻa e ngaahi lākanga pau ke faí. Naʻe hoko mai ʻa e ngaahi lākanga ko ʻení ʻi he hili hono ʻosi fai ʻe he kau mātuʻá ia ʻa e enginaki pe akonaki ki he kau fakamaveuveú. Naʻe tohi ʻe Paula:

“Bea koeni, e kaiga, oku mau fekau kiate kimoutolu, . . . ke mou mavahe akimoutolu mei he kaiga kotoabe oku eveeva, taetotonu bea ikai tatau moe fekau naa ne maʻu meiate kimoutolu. Ka ko kimoutolu, e kaiga, oua naa mou fiu i he fai lelei. Bea kabau oku ikai talagofua ha taha ki he e mau fekau i he tohi ni, fakailogaʻi ae tagata koia, bea oua naa fakataha mo ia, koeuhi ke ma ai ia. Kae oua naa lau ia koe fili, kae valokiʻi o tāu mo ha kaiga.”​—2 Tesalonaika 3:​6, 13-15, PM.

Ko ia ko e toe ngaahi lākanga naʻe fakakau ʻi he mavahe mei he kau fakamaveuveú, ko hono fakaʻilongaʻi kinautolu, taʻofi ʻa e feohi mo kinautolú, kae akonakiʻi kinautolu ʻi he tuʻunga ko e fanga tokoua. Ko e hā te ne taki atu ʻa e kau mēmipa ʻo e fakatahaʻangá ke nau laka ʻi he ngaahi lākanga ko iá? Ko ha tokoni ke fakamahino ʻení, tau fakapapauʻi ange ʻa e ngaahi tuʻunga ʻe tolu naʻe ʻikai fakahangataha ki ai ʻa Paula hení.

1. ʻOku tau ʻilo ko e kau Kalisitiané ʻoku nau taʻehaohaoa mo ʻi ai ʻenau ngaahi tōnounou. Ka, ʻoku kei hoko ʻa e ʻofá ko ha fakaʻilonga ia ʻo e lotu faka-Kalisitiane moʻoní, ʻo fiemaʻu ai kiate kitautolu ke tau mahinoʻi mo fakamolemoleʻi ʻa e ngaahi hala ʻa e niʻihi kehé. Ko e fakatātaá, ʻoku maʻu nai ʻe ha Kalisitiane ha ʻita tōlili ʻoku tātātaha, ʻo hangē ko ia naʻe hoko ʻi he vahaʻa ʻo Panepasa mo Paulá. (Ngāue 15:​36-40) Pe koeʻuhi ko e helaʻiá, ʻe hoko nai ai ha taha ʻo lea ʻaki ʻa e ngaahi lea kakaha mo fakatupu loto-mamahi. ʻI he ngaahi taimi peheé, ʻi hono fakahāhā ʻa e ʻofá pea ngāueʻaki ʻa e akonaki ʻa e Tohitapú, ʻoku malava ai ke tau ʻufiʻufi ʻa e fehālaakí, pea hokohoko atu ʻa e nofo, feohi, mo ngāue fakataha mo hotau kaungā Kalisitiané. (Mātiu 5:​23-​25; 6:​14; 7:​1-5; 1 Pita 4:8) ʻOku hā mahino, ko e ngaahi tōnounou ko ʻení naʻe ʻikai ko e meʻa ia naʻe lave ki ai ʻa Paula ʻi he 2 Tesalonaiká.

2. Naʻe ʻikai lave ʻa Paula ia ki ha tuʻunga ʻa ia ʻoku fili fakafoʻituitui ai ha Kalisitiane ia ke fakangatangata ʻene feohi mo ha taha ʻa ia ko ʻene ngaahi foungá pe ngaahi fakakaukaú ʻoku ʻikai lelei​—ko e fakatātaá, ko ha taha ʻoku hangē ʻoku tōtuʻa ʻene tokangá ki he fakafiefiá pe ko e ngaahi meʻa fakamatelié. Pe ko ha mātuʻa ʻokú ne fakangatangata nai ʻa e feohi ʻene kiʻi tamá mo e toʻutupu ʻoku nau taʻetokaʻi ʻa e mafai fakaemātuʻá, vaʻinga ʻi ha founga makaka pe fakatuʻutāmaki, pe ʻoku ʻikai te nau fakamātoato ʻi he lotu faka-Kalisitiané. Ko e ngaahi fili fakafoʻituitui pē ia ʻoku fehoanaki mo e meʻa ʻoku tau lau ʻi he Palovepi 13:20: “Ko ia ʻoku fafale ki he kau poto, te ne hoko ko e poto: ka ko ia ʻoku kaumeʻa mo e sesele ʻe hoko ko e lusa.”​—Fakafehoanaki mo 1 Kolinito 15:33.

3. ʻI ha tuʻunga mafatukituki kehe, naʻe tohi ʻa Paula ki he kau Kolinitoó ʻo fekauʻaki mo e tokotaha ʻokú ne fai ʻa e angahala mamafa pea ʻoku ʻikai ke fakatomala. Ko e kau faiangahala taʻefakatomala peheé naʻe pau ke fakamavaheʻi ia mei he fakatahaʻangá. Ko e tangata ‘fai koví,’ hangē ko e laú, naʻe pau ke tuku atu ia kia Sētane. Talu mei ai, ko e kau Kalisitiane mateakí naʻe fiemaʻu ke ʻoua te nau feohi mo e faʻahinga faikovi peheé; naʻe naʻinaʻi ʻa e ʻapositolo ko Sioné ki he kau Kalisitiané ke ʻoua foki ʻe fakalea kiate kinautolu. (1 Kolinito 5:​1-13; 2 Sione 9-11) Kae kehe, ʻoku ʻikai feʻunga foki ʻeni ia mo e akonaki ʻo e 2 Tesalonaika 3:​14 (PM).

ʻOku kehe mei he ngaahi tuʻunga ʻe tolu ʻi ʻolungá ʻa e meʻa ia ʻoku fekauʻaki mo e kau “fakamaveuveu” ʻoku lāulea ki ai ʻi he 2 Tesalonaiká. Naʻe tohi ʻa Paula ʻo pehē ko e faʻahingá ni naʻe kei hoko pē ko e “kaiga,” ke akonakiʻi mo fakafeangai pehē ki ai. Ko ia, ko e palopalema fekauʻaki mo e fanga tokoua ‘fakamaveuveú’ naʻe ʻikai ke ʻi ha tuʻunga ko ha meʻa fakafoʻituitui pē ʻi he vahaʻa ʻo e kau Kalisitiané pea ʻikai ko ha meʻa mafatukituki feʻunga ke kau mai ai ʻa e kau mātuʻa ʻo e fakatahaʻangá ʻo fai ha tuʻusi, ʻo hangē ko ia naʻe fai ʻe Paula ʻi he fekauʻaki mo e tuʻunga taʻetaau ko ia ʻi Kolinitoó. Naʻe ʻikai ke halaia ʻa e kau “fakamaveuveu” ia ʻi ha angahala mamafa, ʻo hangē ko ia naʻe fai ʻe he tangata naʻe tuʻusi ʻi Kolinitoó.

Ko e kau “fakamaveuveu” ia ʻi Tesalonaiká naʻa nau halaia kinautolu ʻi he ngaahi ʻalu hē lahi mei he lotu faka-Kalisitiané. Naʻe ʻikai te nau ngāue, koeʻuhi pē naʻa nau fakakaukau ko e toe foki mai ʻa Kalaisí naʻe panaki, pe koeʻuhi naʻa nau fakapikopiko. ʻIkai ngata aí, naʻa nau fakatupunga ʻa e vālau lahi ʻaki ʻa e ‘kaunoa.’ ʻOku hangehangē pē naʻe toutou akonakiʻi kinautolu ʻe he kau mātuʻa ʻo e fakatahaʻangá, ʻo fehoanaki mo e faleʻi ʻa Paula ʻi heʻene ʻuluaki tohí pea mo e toe faleʻi fakaʻotua kehe. (Palovepi 6:​6-​11; 10:​4, 5; 12:​11, 24; 24:​30-​34) Ka naʻa nau kei vilitaki pē ʻi ha ʻalunga naʻe hā kovi ai ʻa e fakatahaʻangá mo malava ko ia ke mafola atu ki he kau Kalisitiane kehé. Ko ia ko e tokotaha mātuʻa Kalisitiane ko Paulá, ʻi he ʻikai lave ki he hingoa ʻo e faʻahinga tāutahá, naʻá ne fakahanga fakahāhā ʻa e tokangá ki heʻenau fakamaveuveú, ʻo fakaeʻa honau ʻalunga fehālaakí.

Naʻá ne toe ʻai ke ʻilo ʻe he fakatahaʻangá ʻe feʻungamālie kiate kinautolu ʻi honau tuʻunga fakatāutaha ko e kau Kalisitiané ke nau ‘fakailogaʻi’ ʻa e kau fakamaveuveú. Naʻe fakahuʻuhuʻunga ʻeni ke ʻiloʻi ai ʻe he faʻahinga tāutaha ʻa e faʻahinga ko ia ko ʻenau ngaahi tōʻongá ʻoku fehoanaki ia mo e ʻalunga ko ia naʻe fakatokanga fakahāhā ki ai ʻa e fakatahaʻangá. Naʻe faleʻi ai ʻe Paula ke nau ‘mavahe mei he kaiga kotoabe oku eveeva taetotonú.’ ʻOku pau pē naʻe ʻikai ʻuhinga ʻeni ia ke fakamamaʻo fakaʻaufuli mei ha taha pehē, he naʻe fiemaʻu ke nau kei “valokiʻi o tāu mo ha kaiga.” Te nau kei hokohoko atu ke maʻu ʻa e fetuʻutaki faka-Kalisitiane ʻi he ngaahi fakatahá pea ʻi he ngāue fakafaifekaú nai. Te nau ʻamanaki nai ʻe tali ʻe honau tokouá ʻa e akonakí pea liʻaki ʻene ngaahi founga fakamoveuveú.

ʻI he ʻuhinga fē te nau “mavahe” ai meiate iá? ʻOku hā mahino mai, naʻe kaunga ʻeni ia ki ha tuʻunga fakasōsiale. (Fakafehoanaki mo Kaletia 2:12.) Ko ʻenau tuku ko ia ʻa e ngaahi feangainga mo e fakafiefia fakasōsiale mo iá ʻe fakahāhaaʻi nai ai kiate ia ʻoku ʻikai ke saiʻia ʻa e kakai ʻoku moʻui tāú ʻi heʻene ngaahi foungá. Neongo kapau naʻe ʻikai te ne mā ai pea liliu, ʻe tātātaha leva ke ako ʻe he niʻihi kehé ia ʻene ngaahi foungá pea hoko ʻo hangē ko iá. ʻI he taimi tatau pē, ʻoku totonu ki he kau Kalisitiane tāutaha ko ʻení ke nau tokangataha ki he ngaahi meʻa ʻoku langa haké. Naʻe faleʻi kinautolu ʻe Paula: “Ka ko kimoutolu, e kaiga, oua naa mou fiu i he fai lelei.”​—2 Tesalonaika 3:13, PM.

ʻOku hā mahino, ko e akonaki fakaʻapositolo ko ʻení ʻoku ʻikai ko ha makatuʻunga ia ke sio lalo pe fakamāuʻi ai hotau fanga tokoua ko ia ʻoku nau fai ha kiʻi humu pe laka hala. Ka, ʻoku fakataumuʻa ia ke tokoniʻi ai ʻa e tokotaha ko ia ʻokú ne laka ʻi ha ʻalunga fakamaveuveu ʻoku fepaki lahi mo e lotu faka-Kalisitiané.

Naʻe ʻikai ke fakatoka ʻe Paula ia ha ngaahi tuʻutuʻuni fakaikiiki ʻo hangē ko ha feinga ke fakatupunga ha founga ʻoku fihí. Ka ʻoku hā mahino ʻoku totonu ki he kau mātuʻá ke nau ʻuluaki akonakiʻi mo feinga ke tokoniʻi ha taha ʻoku fakamaveuveu. Kapau ʻoku ʻikai te nau lavameʻa pea ʻoku vilitaki pē ʻa e tokotahá ia ʻi ha founga ʻoku fakamaveuveu pea ʻe malava ke mafola atu ia, te nau fakaʻosiʻaki nai ʻo pehē ʻoku totonu ke fakatokanga ki ai ʻa e fakatahaʻangá. ʻE malava ke nau fokotuʻutuʻu ke fai ha malanga ki he ʻuhinga ke fakaʻehiʻehi ai mei he fakamaveuveu peheé. ʻE ʻikai te nau lave ki ha ngaahi hingoa, ka ʻe tokoni ʻenau malanga fakatokangá ke maluʻi ai ʻa e fakatahaʻangá koeʻuhi ke fai ʻe he faʻahinga tali-angí ha toe tokanga lahi ange ke fakangatangata ʻa e ngaahi ngāue fakasōsiale mo ha taha pē ʻokú ne fakahāhā mahino ʻa e tuʻunga fakamaveuveu peheé.

ʻOku ʻamanaki pē, ʻi he faai atu ʻa e taimí ʻe mā ai ʻa e tokotaha fakamaveuveú ʻi heʻene ngaahi foungá pea ʻe ueʻi ai ia ke ne liliu. ʻI he sio ʻa e kau mātuʻá mo e niʻihi kehe ʻi he fakatahaʻangá ki he liliú, ʻe lava ke nau fili fakatāutaha ai ke fakangata ʻa e fakangatangata kuo nau fokotuʻu fakafoʻituitui ki he feohi mo iá.

Ko hono fakanounoú leva: Ko e kau mātuʻa ʻi he fakatahaʻangá te nau taki muʻa ʻi hono fai ʻa e tokoní mo e akonakí kapau ʻoku laka hala ha taha. Kapau ʻoku ʻikai te ne sio ia ki he hala ʻo ʻene foungá kae kei hokohoko atu pē ʻo hoko ko ha tākiekina taʻetotonu, ʻe fakatokanga nai ʻa e kau mātuʻá ki he fakatahaʻangá ʻo fakafou ʻi ha malanga ʻoku fakahaaʻi mahino ai ʻa e vakai ʻa e Tohitapú​—pe ko e faialea mo e kau taʻetuí, pe ko e hā pē ha ʻalunga taʻetotonu ʻoku hoko. (1 Kolinito 7:39; 2 Kolinito 6:14) Ko e kau Kalisitiane ʻi he fakatahaʻangá ʻa ia ʻoku fai ki ai ʻa e fakatokangá ʻoku malava ke nau fili fakatāutaha ke fakangatangata ha faʻahinga feohi fakasōsiale pē mo e faʻahinga ʻoku hā mahino ʻoku nau tulimui ki ha ʻalunga fakamaveuveu ka ʻoku nau kei hoko ko e fanga tokouá.

[Fakamatala ʻi lalo]

[Fakatātā ʻi he peesi 31]

ʻOku akonakiʻi ʻe he kau mātuʻa Kalisitiané ʻa e kau fakamaveuveú, ka ʻoku nau kei vakai pē kiate kinautolu ko e kaungātui