Levaʻi Lelei Hoʻo Paʻangá

KO E lea ʻoku taka ko e “Paʻangá ʻa e aka ʻo e kovi kotoa peé” ʻoku faʻa pehē ko e haʻu ia mei he Tohi Tapú. Ko e meʻa eni ʻoku lea moʻoni ʻaki ʻe he Tohi Tapú: “Ko e ʻofa ki he paʻanga ko e aka ʻoku tupu mei ai ʻa e ngaahi kovi kotoa pe.” (1 Timote 6:10) Kuo fakatupulekina moʻoni ʻe he kakai ʻe niʻihi ha ʻofa ki he paʻangá pea kuo nau līʻoa kinautolu ki hono tānaki ʻo fokotuʻuna ʻa e koloá. Kuo hoko ʻa e niʻihi ko e kau tamaioʻeiki ki he paʻangá pea kuo nau utu ai ʻa e ngaahi nunuʻa fakamamahi. Kae kehe, ʻi hono ngāueʻaki leleí ʻoku lava ke hoko ʻa e paʻangá ko ha meʻangāue ʻaonga. ʻOku fakahaaʻi ʻe he Tohi Tapú ko e “paʻangá ʻokú ne solova ha ngaahi palopalema lahi.”—Koheleti 10:19, Holy Bible—Easy-to-Read Version.

Neongo ʻoku ʻikai taukaveʻi ko e Tohi Tapú ko ha tohi ia ki he meʻa fakapaʻangá, ʻoku ʻi ai ha faleʻi ʻaonga ʻa ia ʻe lava ke ne tokoniʻi koe ke ke levaʻi lelei ʻa e paʻangá. Ko e sitepu ʻe nima hoko maí ʻoku fakaongoongoleleiʻi lahi ia ʻe he kau faleʻi ki he meʻa fakapaʻangá, pea ʻoku huʻufataha ia mo e ngaahi tefitoʻi moʻoni kuo hiki fuoloa ʻi he Tohi Tapú.

Tauhi. ʻOku fakahaaʻi ʻi he lēkooti he Tohi Tapú naʻe akoʻi ki he kau ʻIsileli ʻo e kuonga muʻá ʻa e mahuʻinga ʻo e tauhi ʻo e paʻangá. Naʻe tala kia kinautolu ke nau vaheʻi ha vahe hongofulu (pe peseti ʻe 10) ʻi he taʻu taki taha ke ngāueʻaki ʻataʻatā pē ki hono maʻu ʻo e ngaahi kātoanga fakafonuá. (Teutalonome 14:22-27) Naʻe fakalototoʻaʻi tatau ʻe he ʻapositolo ko Paulá ʻa e muʻaki kau Kalisitiané ke nau vaheʻi ʻo tuku tauhi ʻa e paʻanga ʻi he uike taki taha koeʻuhi ke nau foaki ʻamui ha meʻa ke tokoni ki he kaungātui ʻoku masivá. (1 Kolinito 16:1, 2) Ko e tokolahi taha ʻo e kau faleʻi ki he meʻa fakapaʻangá ʻoku nau fakaʻaiʻai ʻa e tuku tauhi ʻo e paʻangá. ʻAi ke muʻomuʻa hono tuku tauhi ʻo e paʻangá. ʻI hoʻo maʻu pē hoʻo vahé, fakahū ʻa e lahi ʻo e paʻanga ʻokú ke loto ke tauhí ʻi ha pangikē pe ko ha feituʻu kehe ke malu ai. ʻE tokoniʻi ai koe ke ke tauʻi ha fakatauele ke ngāueʻaki ʻa e paʻanga ko iá.

Patiseti. Ko e founga ʻaonga pē eni ʻe taha ke tokangaʻi ai, puleʻi, pe fakasiʻisiʻi hoʻo fakamolé. Ko ha patiseti lelei ʻe lava ke ne ʻai ke ke mahinoʻi ʻa e feituʻu ʻoku ʻalu ki ai hoʻo paʻangá, pea ʻe lava ke ne tokoniʻi koe ke ke aʻusia hoʻo ngaahi taumuʻa fakapaʻangá. ʻAi ke ʻiloʻi hoʻo paʻanga hū maí, pea fakamole ke siʻi ange ʻi he meʻa ʻokú ke maʻu maí. Ako ke ʻilo ʻa e faikehekehe ʻi he fiemaʻú mo e saiʻiá. Fakatatau ki he meʻá ni, naʻe ekinaki fakapotopoto ʻa Sīsū ki heʻene kau fanongó ke nau ‘fatu ʻa e totongí’ ki muʻa ke kamata ha faʻahinga ngāue pē. (Luke 14:28) ʻOku faleʻi mai ʻa e Tohi Tapú ke tau fakaʻehiʻehi mei he fakamoʻua ʻoku ʻikai fiemaʻú.—Palovepi 22:7.

Palani. Fakakaukau fakalelei ki hoʻo fiemaʻu ʻi he kahaʻú. Hangē ko ení, kapau ʻokú ke palani ke fakatau ha fale pe ko ha ʻapaatimeni, ko hono maʻu ha nō kelekele ʻi ha totongi feʻunga ko ha fili lelei nai ia. ʻI he tuʻunga meimei tatau, ʻe ongoʻi nai ʻe ha tangata maʻu fāmili ʻa e fiemaʻu ke totongi ha maluʻi moʻui, moʻui lelei, faingataʻaʻia fakasino, pe ngaahi founga kehe ke maluʻi ʻaki ʻa e faʻahinga ʻoku ʻofa aí. Ko e fakakaukauʻi hoʻo ngaahi fiemaʻu ki he kahaʻú ʻe toe kau nai ai ʻa e palani ki he mālōlō mei he ngāué. ʻOku fakamanatu mai ʻe he Palovepi 21:5 ʻo pehē “ko e ngaahi tuʻutuʻuni [pe palani] ʻa e faʻa ngaue ʻoku iku pe ki he maʻu ha meʻa.”

Ako. Fakamoleki ʻa e taimi kiate koe ke maʻu ai ʻa e pōtoʻi pea tokangaʻi hoʻo moʻui lelei fakaesinó mo fakaeongó. Ko e ngaahi fakamole eni ʻe ʻi ai hono totongi fakafoki. ʻAi ke tōʻongaʻaki ʻa e akó ʻi he kotoa ʻo hoʻo moʻuí. ʻOku fakamahuʻingaʻi lahi ʻe he Tohi Tapú ʻa e “poto ʻaongá mo e malava fakaefakakaukaú” pea ʻoku ekinaki mai kia kitautolu ke hanganaki fakatupulekina ia.—Palovepi 3:21, 22, NW; Koheleti 10:10.

Palanisi. Tauhi ʻa e paʻangá ʻi hono feituʻu totonú. ʻOku fakahaaʻi ʻi he ngaahi savea lahi ko e faʻahinga ʻoku nau tokanga lahi ange ki he kakaí ʻi heʻenau tokanga ki he paʻangá ʻoku nau fiefia ange. ʻOku fakaʻatā ʻe he niʻihi ʻa e mānumanú ke ne toʻo ʻenau palanisí. Anga-fēfē? Hili ʻenau fakalato feʻunga ʻenau ngaahi fiemaʻu tefitó, ʻoku nau kamata tuli ki he koloá. Neongo ia, mahulu atu ʻi he meʻakaí, valá, mo e nofoʻangá, ko e hā hono lahi ʻo e meʻa ʻoku fiemaʻu moʻoni ʻe ha taha? ʻOku ʻikai ha ofo ʻi he toe tohi ʻe he tokotaha-tohi Tohi Tapu naʻe lave ki ai ʻi he kamataʻanga ʻo e kupu ko ení: “I he e tau maʻu ae mea kai moe kofu ke tau fiemalie ai.” (1 Timote 6:8, PM) Ko hono fakatupulekina ʻo e fiemālié ʻokú ne taʻofi ai kitautolu mei hono fakatupulekina ʻa e ʻofa ki he paʻangá mo e palopalema kotoa ʻoku haʻu fakataha mo iá.

Ko e ʻofa ki he paʻangá ko e aka moʻoni ia ʻo e kovi kotoa pē. ʻE hoko ʻa e paʻangá ko ho pule kapau te ke fakaʻatā ia. Kae kehe, ʻi hono ngāueʻaki leleí, ʻe lava ke ʻoatu ʻe he paʻangá kiate koe ʻa e tauʻatāina ke tuli ki he ngaahi meʻa mahuʻinga ange ʻi he moʻuí, hangē ko ha haʻi vāofi mo e fāmilí, ngaahi kaungāmeʻá pea mo e ʻOtuá. Neongo ia, ʻi he māmani ko ení ʻoku hā ngali taʻemalava ai ke ʻatā fakaʻaufuli mei he hohaʻa ki he paʻangá. ʻE hoko maʻu pē ʻa e paʻangá ko ha tupuʻanga ia ʻo e loto-moʻuá? Ko e hā ʻa e ʻamanaki ʻoku ʻi ai ke fakangata ai ʻa e masivá? Ko e kupu fakaʻosi ʻi he konga hokohoko ko ení te ne tali ʻa e ongo fehuʻi ko iá.

[Fakatātā ʻi he peesi 5]

ʻAi ke ʻiloʻi hoʻo paʻanga hū maí, pea fakamole ke siʻi ange ʻi he meʻa ʻokú ke maʻu maí

[Fakatātā ʻi he peesi 5]

Ako ke ʻilo ʻa e faikehekehe ʻi he fiemaʻú mo e saiʻiá

[Fakatātā ʻi he peesi 6]

Mahulu atu ʻi he meʻakaí, valá, mo e nofoʻangá, ko e hā hono lahi ʻo e meʻa ʻoku fiemaʻu moʻoni ʻe ha taha?

[Fakatātā ʻi he peesi 7]

AKOʻI HOʻO FĀNAÚ KE NAU LEVAʻI LELEI ʻA E PAʻANGÁ

ʻI he fuʻu tokolahi ʻa e kakai lalahi ʻoku nau faingataʻaʻia fakapaʻanga he ʻaho ní, ʻoku fakaʻaiʻai ai ʻe he kau mataotaó ʻa e ngaahi mātuʻá ke nau akoʻi ʻenau fānaú fekauʻaki mo e paʻangá—pea ke kamata tōmuʻa ia. ʻEke ki he tokolahi taha ʻo e fānaú ʻa e feituʻu ʻoku haʻu mei ai ʻa e paʻangá, pea te nau pehē nai, ko “Teti” pe “ko e pangikeé.” Kapau ʻe lava ke ke akoʻi hoʻo fānaú ki he mahuʻinga ʻo e paʻangá—ʻa e founga ke fakafaikehekeheʻi ai ʻa e fiemaʻú mei he saiʻiá, founga ke tuku tauhi ai ʻa e paʻangá, mo e founga hono ngāueʻakí—te ke tokoniʻi nai ai kinautolu ke nau fakaʻehiʻehi mei he loto-mamahi ʻi he moʻua lahi fau mo e pōpula ki he meʻa fakaʻekonōmiká. Ko ha ngaahi fokotuʻu eni.

1. Hoko ko ha faʻifaʻitakiʻanga lelei. ʻE faʻifaʻitaki lahi hoʻo fānaú ki he meʻa ʻokú ke faí ʻi he meʻa ʻokú ke leaʻakí.

2. Fokotuʻu ʻa e fakangatangata ki he fakamolé. Lāulea ki he lahi ʻo e paʻanga te ke ngāueʻaki mo lava ke nau ngāueʻakí. Ako ke lea ʻikai, pea fai ki ai.

3. Fakaʻatā ke nau levaʻi lelei ʻa e paʻangá. Kapau ʻoku nau maʻu ha kiʻi paʻanga ke nau ngāueʻaki pe maʻu ha paʻanga mei ha ngāue, ʻoange kia kinautolu ha fakahinohino. Pea fakaʻatā leva ke nau fai ha ngaahi fili.

4. Akoʻi ke nau vahevahe ki he niʻihi kehé. Fakaʻaiʻai hoʻo fānaú ke nau vahevahe ʻa e meʻa ʻoku nau maʻú ki he niʻihi kehé pea pehē ki hono vaheʻi maʻu pē ha meʻa ke fakalāngilangiʻiʻaki ʻa e ʻOtuá.