Ngaahi Fehuʻi mei he Kau Lautohí

Ko e hā naʻe tohi ai ʻa Paula fekauʻaki mo ha uaifi Kalisitiane: “Ko hono hala ki he moʻui ʻoku fou ʻi he fai fānau”?—1 Timote 2:15.

Ko e hā ʻoku fakahaaʻi ʻe he potutohi ʻo e vēsí ni fekauʻaki mo e meʻa naʻe ʻuhinga ki ai ʻa Paulá? ʻI he malumalu ʻo e fakamānavaʻí naʻá ne fai ha akonaki ʻi he ngafa ʻo e fefine Kalisitiane ʻi he fakatahaʻangá. Naʻá ne tohi: “Ko hoku loto ki he kau fefine, ke nau teuʻaki kinautolu ʻa e kofu ʻoku ngali ke ʻai, pea ō mo e angamā mo e angafakamaʻumaʻu: ʻo ʻoua ʻe fai ʻaki ʻa e fafatu ʻo e louʻulu, pe ko e koula mo e mataʻitofe mo e kofu mahuʻinga; ka nau fai ke teungaʻia ʻi he ngaahi ngaue lelei, ʻa ia ko e meʻa ʻoku tāu mo e kau fefine ʻoku nau lavutu ke tauhi ki he ʻOtua.” (1 Timote 2:​9, 10) Naʻe ekinaki ʻa Paula ki hono fanga tuofāfine Kalisitiané ke nau anga-mā, ke nau hoko ʻo mafamafatatau ʻi hono fili ʻa e teuteu fakafoʻituituí pea ke “teuʻaki” ʻa e ngaahi ngāue leleí.

Ko hono hokó, naʻe fakamatalaʻi ʻe Paula ʻa e fokotuʻutuʻu ki he tuʻunga-ʻulu ʻi he fakatahaʻangá, ʻo pehē: “Ko e fai akonaki ʻoku ʻikai te u tuku ki he fefine; ʻumaʻā ʻa e pule ki he tangata; ka ke nofo fakalongope.” (1 Timote 2:12; 1 Kolinito 11:3) ʻOkú ne fakamatalaʻi ʻa e makatuʻunga ki he fokotuʻutuʻu ko ení ʻaki hono fakahaaʻi ʻo pehē lolotonga naʻe ʻikai kākaaʻi ʻa ʻĀtama ʻe Sētane, ko ʻIvi naʻe “kākāʻia . . . ʻo ne tō ai ki he faihala.” ʻE lava fēfē ke maluʻi ha fefine Kalisitiane mei he faihala ʻa ʻIví? ʻOku tali ʻe Paula: “Ka ko hono hala ki he moʻui ʻoku fou ʻi he fai fānau; ʻo kapau te nau nofo maʻu ʻi he tui mo e ʻofa mo e maʻoniʻoni, ō mo e fakamaʻumaʻu. (1 Timote 2:​14, 15) Ko e hā naʻe ʻuhinga ki ai ʻa Paula ʻi he ngaahi lea ko ení?

ʻOku hā ngali fakahuʻunga ʻe he kau liliu ʻe niʻihi ʻo pehē ʻoku fakatuʻunga ʻa e fakamoʻui ʻo ha fefine ʻi heʻene maʻu fānaú. Ko e fakatātaá, ʻoku pehē ʻe he Today’s English Version: “ʻE fakamoʻui ha fefine fakafou ʻi heʻene maʻu fānaú.” Kae kehe, ko e fakaʻuhinga ko eni ʻo e ngaahi lea ʻa Paulá ʻoku ʻikai totonu. ʻOku fakahaaʻi ʻe he ngaahi konga Tohi Tapu lahi ke hoko ʻo fakamoʻuí, kuo pau ke hoko ʻa e tokotahá ʻo ʻiloʻi ʻa Sihova, tui kia Sīsū, pea ngāueʻi ʻa e tuí, ʻi hono fakahāhaaʻi ʻa e tui ko iá ʻaki ʻa e ngaahi ngāue. (Sione 17:3; Ngāue 16:​30, 31; Loma 10:10; Semisi 2:​26) Tānaki atu ki ai, naʻe ʻikai ʻuhinga ʻa Paulá ʻoku fakapapauʻi ʻa e malu ʻo e fāʻelé ki he kau fefine tuí. Kuo hoko ʻo hao ha kakai fefine ʻi he hokosia ʻo e fāʻelé ʻo tatau ai pē pe naʻa nau tui pe ʻikai. Pea ko e meʻa fakamamahí, he kuo mate ʻa e niʻihi ʻi he fāʻelé, ʻo tatau ai pē pe naʻa nau tui pe ʻikai.—Senesi 35:​16-18.

Ko e akonaki lahi ange ki mui ʻa Paula fekauʻaki mo e kakai fefiné ʻi he tohi tatau ko ení ʻoku tokoniʻi ai kitautolu ke mahinoʻi ʻa ʻene ʻuhingá. ʻOkú ne fakatokanga ai fekauʻaki mo e kau uitou kei siʻi ange ʻe niʻihi ʻa ia naʻa nau “fakapikopiko ʻi heʻenau ʻalu fano ʻi he ngaahi ʻapi; ʻo ʻikai ko e fakapikopiko pe, ka ko e faʻa lau, mo kaunoa, ʻo talanoaʻaki ʻa e ngaahi meʻa naʻe totonu ke ʻoua ʻe lau.” Ko e hā ʻa e faleʻi ʻa Paulá? ʻOkú ne hoko atu: “Ko ia ko hoku loto ki he kau uitou ʻoku mālōlō, ke nau toe mali, ke nau fānau, ke nau pule [pe fakalele ha] famili, ʻo ʻoua ʻe ʻatu moʻo e fili ha meʻa ke tuʻunganaki ʻaki ʻene lauʻikovi.”—1 Timote 5:​13, 14.

ʻOku fakamamafaʻi ʻe Paula ʻa e ngafa ʻaonga ʻo e kakai fefiné ʻi he fokotuʻutuʻu fakafāmilí. ʻI he nōfoʻi he ngaahi ngāue peheé hangē ko e ‘maʻu fānaú mo e fakalele ha fāmilí,’ ko ha fefine, ʻa ia ʻoku hokohoko atu “ʻi he tui mo e ʻofa mo e maʻoniʻoni, ō mo e fakamaʻumaʻu” ʻe ʻikai te ne hehema ai ki he ʻulungāanga ʻa ia ʻoku ʻikai ke fakatupu langa haké. Ko hono tuʻunga fakalaumālié ʻe fakatolonga pe “moʻui.” (1 Timote 2:15) Ko e muimui ʻi ha ʻalunga peheé ʻe tokoniʻi ai ʻa e kau finemui tokolahi ke nau kalofi ʻa e ngaahi tauhele ʻa Sētané.

Ko e ngaahi lea ʻa Paula kia Tīmoté ʻoku fakamanatuʻi mai ai kia kitautolu kotoa, ʻa e kakai tangata mo e kakai fefine, ke fakafemoʻuekinaʻi hotau taimí ʻi ha founga ʻaonga. ʻOku faleʻi ʻe he Folofola ʻa e ʻOtuá ki he kau Kalisitiané kotoa: “Mou tokanga ki hoʻomou laka fakatuʻutuʻuni, pe ʻoku fefe hono anga, ʻo ʻoua te mou ngali taʻepoto ai, kae ngali poto.”—Efeso 5:15.