ʻOkú Ke Kakapa Atu?

“Kapau ʻoku kakapa atu ha tangata ki he lakanga ko e ʻovasia, ko ʻene holi ki ha ngāue lelei.”​—1 TIMOTE 3:1, “NW”.

 1. Ko e fakahoko ʻo e taumuʻa hā ʻoku mahuʻinga lahi taha ki he Kau Fakamoʻoni ʻa Sihová?

ʻOKU maʻu ʻe he Kau Fakamoʻoni ʻa Sihová ʻa e ngaahi taumuʻa totonu ko ia kuo fakahaá pea kuo fai ia ʻi ha founga fakaʻotua. ʻOku ʻikai ke fakaofo ʻeni, koeʻuhi he ko honau ʻOtuá ʻoku ʻi ai ʻene ngaahi taumuʻa molumalu pea ʻokú ne fakahoko maʻu ai pē ʻene ngaahi taumuʻá. (ʻAisea 55:​8-11) ʻOku ʻikai totonu ki he kau sevāniti ʻa Sihová ke nau hangē ko e kakai ʻoku ʻikai ke ʻi ai ha taumuʻa leleí pea hamumunoa ai pē ʻi he moʻuí ʻo fai ha kiʻi meʻa siʻi pē ke ʻaonga ki ha niʻihi kehé. Ko e meʻa ʻoku mahuʻinga lahi taha ki he Kau Fakamoʻoni ʻa e ʻOtuá ko hono fakahoko ʻo e taumuʻa molumalu ko hono fanongonongo ʻa e pōpoaki ʻo e Puleʻangá mo vahevahe mo e niʻihi kehé ʻa e ʻilo foaki-moʻui ʻo e Folofola ʻa e ʻOtuá.​—Sāme 119:105; Maʻake 13:10; Sione 17:3.

 2. Ko e hā ʻa e taumuʻa ki he kau tangata Kalisitiané naʻe lave ki ai ʻa Paula ʻi he 1 Tīmote 3:1?

² ʻI he kautaha ʻa Sihová ʻoku ʻi ai foki mo e ngaahi taumuʻa molumalu kehe. Naʻe lave ʻa e ʻapositolo ko Paulá ki ha taha ʻo e ngaahi meʻá ni ʻi heʻene tohi: “ʻOku moʻoni ʻa e lea. Kapau ʻoku kakapa atu ha tangata ki he lakanga ko e ʻovasia, ko ʻene holi ki ha ngāue lelei.” Ko ha tangata pehē ʻokú ne loto ke fakahoko ha meʻa koeʻuhi ko e lelei maʻá e niʻihi kehé. ʻOkú ne holi “ki ha ngāue lelei,” ʻo ʻikai ko ha moʻui fiemālie mo ha lāngilangi. ʻOku pehē ʻe ha liliu ʻe taha: “ʻOku mātuʻaki moʻoni ʻa e pehē ko ha tangata kuó ne fokotuʻu hono lotó ki he tuʻunga takí ʻoku ʻi ai ʻa e loto-feinga ʻoku taau ke fakaongoongoleleiʻi.”​—1 Tīmote 3:​1, Phillips.

Ngaahi Fakatuʻutāmaki ki he Kau Mātuʻá

 3, 4. Ko e hā ʻoku totonu ai ki ha tangata ʻoku kakapa atu ke hoko ko ha ʻovasiá ke ne maluʻi hono lotó?

³ ʻI he founga fē ʻoku maʻu ai ʻa e “loto-feinga ʻoku taau ke fakaongoongoleleiʻi” ʻe ha tangata ʻokú ne fokotuʻu hono lotó ke hoko ko ha ʻovasia Kalisitiane? Sai, ko e loto-feingá ko ha holi loto māfana ʻaupito ke aʻusia ha taumuʻa pau. Ko e moʻoni, ʻoku ʻi ai ʻa e ngaahi loto-feinga molumalu mo taʻemolumalu. Ka ʻo kapau ʻoku kakapa anga-fakatōkilalo atu ha tangata ki he lakanga ko e ʻovasiá koeʻuhi ʻokú ne loto ke ngāue maʻá e niʻihi kehé, ko ʻene ngāué ʻoku fai ia ʻaki ʻa e ngaahi taumuʻa totonu pea ʻe lava ke iku ki he ngaahi tāpuaki fakalaumālie. Ka ʻoku fiemaʻu ke ne maluʻi hono lotó.​—Palōvepi 4:23.

⁴ Ko ha kakai loto-feinga ʻe niʻihi ʻoku nau fekumi ki he lāngilangí. Ko ha niʻihi ʻoku nau loto ke pule ki honau kaungā faʻahinga ʻo e tangatá. Ko e mānumanu ki he tuʻunga māʻolungá pe mafaí ʻoku hangē ia ha aka kuo pala ʻa ia ʻe lava ke ne fakatupunga ha fuʻu ʻakau ʻoku hā moʻui lelei ke ne holofa ki lalo. ʻOku malava ke tō foki ha Kalisitiane ki ha faʻahinga loto-feinga hala pehē. (Palōvepi 16:18) Naʻe pehē ʻe he ʻapositolo ko Sioné: “Naʻe ʻi ai ha meʻa naʻa ku tohi ai ki he siasi na; ka ko ia ʻoku ne fie tāfataha ʻiate kinautolu, ʻa Taiotifi, [“ʻoku ne loto ke ʻulu ʻi he meʻa kotoa pē,” Phillips], ʻoku ʻikai te ne tali kimautolu. Ko ia kapau te u ʻalu atu te u fakamanatu hake ʻene ngaahi ngaue, ʻa e koto laukovi ʻoku ne fai kiate kimautolu, mo e ʻikai te ne topono ai ka ne fakafisi ʻe ia ʻa e kainga ni, mo ne taʻofi foki ʻa kinautolu naʻe loto ke tali, mo ne kapusi mei he siasi.” (3 Sione 9, 10) Ko e loto-feinga ʻa Taiotifí naʻe taʻefaka-Kalisitiane. Ko e anga-hikí mo e loto-feinga ke puleʻi ʻa e niʻihi kehé ʻoku ʻikai ke ʻi ai hano tuʻunga ʻi he lotolotonga ʻo e kau muimui moʻoni ʻo Sīsuú.​—Palōvepi 21:4.

 5. Ko e hā ʻa e fakakaukau ʻoku totonu ke maʻu ʻe he kau ʻovasiá ʻi he fai honau ngaahi fatongiá?

⁵ Ko ha ʻovasia Kalisitiane ʻoku tokanga ki hono ngaahi fatongiá ʻaki ʻa e taumuʻa totonú heʻikai te ne muia ha ngaahi loto-feinga siokita. Te ne lau ʻa e ngāue lelei ko ʻeni ʻo e tauhi faka-Kalisitiané ko ha monū foaki mei he ʻOtuá pea te ne tauhi ʻa e tākanga ʻa e ʻOtuá “ʻo ʻoua naʻa fai fakakoloto hono leʻohi, ka ʻi he loto fiefai ʻi he funga ʻo e finangalo ʻo e ʻOtua; ʻo ʻikai ko e sio paʻanga ʻuli, ka ʻi he ʻofa ki he ngaue; pea ʻoua te [ne] fakafieʻeiki ki he ngaahi potungaue, kae hoko ko e faʻifaʻitakiʻanga ki he fanga sipi.” (1 Pita 5:​2, 3) ʻIo, ʻoku totonu ki he kau ʻovasiá ke nau tokanga ke ʻoua ʻe fakatupu ha loto-mahikihiki mo ngāuekoviʻaki ʻa e mafaí.

 6. Ko e hā ʻoku ʻikai totonu ai ki ha taha ʻo e kau mātuʻá ke ne fakafieʻeiki ki he kakai ʻa e ʻOtuá?

⁶ Ko ha taha ʻo e kau mātuʻá ʻoku ʻikai totonu ke fakafieʻeiki ia ki he kau Kalisitiane kehé, he ko e kaungāngāue ia mo kinautolu, ʻo ʻikai ko e ‘pule ki heʻenau tui.’ (2 Kolinitō 1:24) ʻI he feinga ʻa e kau ʻapositolo ʻe niʻihi ki he tuʻunga māʻolungá, naʻe pehē ai ʻe Sīsū: “ʻOku mou ʻilo pe, ko kinautolu ʻoku pule ki he Senitaile ʻoku nau fakafieʻeiki ki he kakai, pea ko honau kau maʻolunga ʻoku nau fakamoʻulaloaʻi ʻa e kakai. Ka ʻe ʻikai pehe ʻiate kimoutolu: ka ko ia ʻoku ne holi ke hoko ko e lahi ʻiate kimoutolu te ne nofo ko homou sevaniti; pea ko ia ʻoku ne holi ke tuʻukimuʻa ʻiate kimoutolu te ne nofo ko hoʻomou tamaioʻeiki: ʻo hange foki ko e Fanautama ʻa tangata naʻe ʻikai te ne haʻu ke maʻu sevaniti, ka ke sevaniti pe ʻe ia, pea ke tuku ʻene moʻui ke huhuʻiʻaki ha tokolahi, heʻene fetongi kinautolu.” (Mātiu 20:​20-28) Ko ha taha ʻo e kau mātuʻá ʻoku ʻikai ko e Tauhisipi Pule ia ka ko e tauhi sipi tokoni pē. Kapau ʻokú ne fakafieʻeiki ki he tākangá, kuó ne fakahāhā ʻa e laumālie ʻo e angahikí. ʻE fakatautautefito ʻa e hoko ʻo fakatuʻutāmakí ʻo kapau te ne feingaʻi mo e niʻihi kehé ke tokoni kiate ia ke fai ʻa ʻene ngaahi loto-feinga angahikí. ʻOku pehē ʻe ha palōvepi: “ʻOku fakaliliʻa ʻa Sihova kiate kinautolu fua pe ʻoku loto afungi: kuo mole ha taimi mo ha taimi kae ʻikai alu taʻetautea.”​—Palōvepi 16:5.

 7, 8. (a) Ko e hā ʻoku mātuʻaki mahuʻinga ai ki he kau mātuʻa Kalisitiané ke nau anga-fakatōkilaló? (e) ʻOmai ha fakatātā ʻo ha mātuʻa anga-fakatōkilalo?

⁷ Ko ia ai, ʻoku totonu ki he kau mātuʻa Kalisitiané ke ‘nau fakavaivaiʻi kinautolu ʻi he malumalu ʻi he lalo nima mafimafi ʻo e ʻOtuá.’ Ko e angahikí ʻokú ne fakafaingataʻaʻiaʻi ha ʻaonga ʻi he founga fakalaumālié, he ko e anga-fakatōkilaló pē ʻoku ʻi ha tuʻunga totonu ʻo e lotó mo e fakakaukaú ke fai ʻa e finangalo fakaʻotuá. “He ʻoku tali tekeʻi ʻe he ʻOtua ʻa e ʻafungi, ka ʻoku ne foaki kelesi ki he angavaivai.” (1 Pita 5:​5, 6) ʻIo, ʻoku tāpuakiʻi ʻe Sihova ʻa e faʻahinga anga-fakatōkilaló. ʻOku mei he lotolotonga ʻo e faʻahinga ko ʻení ʻa e kau tangata alafua ʻoku fakanofo ke hoko ko e kau mātuʻa Kalisitiané.

⁸ Ko e hisitōlia ʻi onopooni ʻo e Kau Fakamoʻoni ʻa Sihová ʻoku fonu ia ʻi he ngaahi fakamatala ʻo e ngāue anga-fakatōkilalo naʻe fai ʻe ha niʻihi anga-fakaʻotua. Hangē ko ʻení, fakatokangaʻi ʻa e ʻulungaanga anga-vaivai ʻo W. J. Thorn, ko ha pilikimi, pe ko ha ʻovasia fefonongaʻaki, pea ko ha tokotaha ngāue fuoloa ʻi Pēteli. ʻOku pehē ʻe ha Kalisitiane ʻe taha ʻo fekauʻaki mo ia: “ʻE ʻikai pē ke ngalo ʻiate au ʻa e fakamatala naʻe fai ʻe Tokoua Thorn ʻa ia kuó ne tokoniʻi au ʻo aʻu mai ki he ʻahó ni. Naʻá ne pehē, pea ko ʻene lea ʻení, ‘ʻI ha taimi pē ʻoku ou fakakaukau lahi ai kiate au, ʻoku hangē ʻoku ou hanga ʻo ʻave au ki he tulikí, ʻo pehē kiate au: “ʻE kiʻi meʻi efu. Ko e hā ʻokú ke maʻu ke ke pōlepole ai?”’” Ko ha ʻulungaanga taau ke fakaongoongoleleiʻi ē ke fakahāhā ʻe he kau mātuʻá mo e niʻihi kehé! Manatuʻi, “ʻoku tataʻo mai ki he angamalu ʻa e ʻapasia kia Sihova: haʻu ai mo e koloa mo e ongoongo mo e moʻui.”​—Palōvepi 22:4.

Ko e Holi Foaki-Fakaʻotua ke Ngāue

 9. Ko e hā ʻoku lava ai ke pehē ko e holi ki he ngāue ko ha ʻovasiá ko ha foaki-fakaʻotua ia?

⁹ Ko e holi ke ngāue ko ha ʻovasiá ko ha foaki-fakaʻotua ia? ʻIo, he ko e laumālie ʻo Sihová ʻokú ne ʻomai ʻa e fakaueʻi-lotó, lototoʻa, mo e mālohi ke fai ʻa e ngāue tapu kiate iá. Hangē ko ʻení, ko e hā ʻa e meʻa naʻe hoko ʻi he lotu ʻa e kau muimui kuo fakatangaʻi ʻo Sīsuú ke maʻu ha lototoʻa ke malangá? “Naʻe ngalulululu ʻa e potu ʻoku nau fakataha ai; pea naʻe fakafonu ʻa kinautolu katokatoa ʻi he laumālie māʻoniʻoni: pea naʻa nau malangaʻaki ʻa e folofola ʻa e ʻOtua ʻo taʻemāluʻia.” (Ngāue 4:​27-31) Koeʻuhi naʻe fakatupu ʻe he laumālie māʻoniʻoní ha ngaahi ola pehē, ʻe toe lava foki ke ne ueʻi ha tokotaha ke kakapa atu.

10. (a) Ko e hā ha ʻuhinga ʻe taha ʻoku ʻikai ke kakapa atu nai ai ha tangata Kalisitiane? (e) Kapau ʻoku ʻomai ʻe he ʻOtua kiate kitautolu ha monū ke ngāue, ko e hā ʻa e meʻa ʻoku lava ke tau ʻilo paú?

¹⁰ Ko e hā nai ʻe ʻikai kakapa atu ai ha Kalisitiane matuʻotuʻa? Ko ha tangata fakalaumālie nai ia ka ʻokú ne ongoʻi taʻefeʻunga. (1 Kolinitō 2:​14, 15) Ko hono moʻoní, ʻoku totonu ke tau maʻu ha fakakaukau angavaivai kiate kitautolu, ke tau ʻilo ʻa e ngaahi meʻa ʻoku tau lavá. (Maika 6:8) ʻOku lelei ke manatuʻi “oku i he agavaivai ae boto,” kae ʻoua te tau tomuʻa fakakaukau ʻafungi ko kitautolu pē ʻoku taau lahi taha ki ha fatongia pau. (Palōvepi 11:2, PM) Ka ʻoku totonu foki ke tau fakatokangaʻi kapau kuo ʻomai ʻe he ʻOtuá ha monū ʻi he ngāue, te ne toe ʻomai foki mo e ivi ʻoku fiemaʻu ke faiʻaki iá. Hangē ko ia naʻe pehē ʻe Paula: “ʻOku ou mafeia ʻa e meʻa kotoa pe ʻiate ia ʻoku ne fakakaukaua au.”​—Filipai 4:13.

11. Ko e hā ʻa e meʻa ʻe lava ke fai ʻe ha Kalisitiane ʻoku ʻikai ke kakapa atu koeʻuhi he ʻokú ne ongoʻi ʻoku ʻikai ke feʻunga hono potó ke fai ha akonaki?

¹¹ ʻE ʻikai ke kakapa atu nai ha Kalisitiane he kuó ne ongoʻi ʻoku ʻikai te ne maʻu ha poto feʻunga ke faiʻaki ha akonaki. Mahalo ʻe lava ke ne maʻu ʻa e potó ʻaki haʻane ako fakamākukanga ange ʻa e Folofola ʻa e ʻOtuá, pea ko e moʻoni ʻoku totonu ke ne lotu ke maʻu ʻa e potó. Naʻe tohi ʻe Sēmisi: “Ka ʻo kapau ko e poto ʻoku masiva ai ha taha, ke ne kole mei he ʻOtua, ʻa ia ʻoku ne foaki ʻataʻatā pe ki he kakai kotoa pe, ʻo ʻikai ʻatu mo e lau; pea ʻe foaki ia ki ai. Ka ke ne kole tui pe, ʻo ʻoua ʻe talaʻa. He ko ia ʻoku talaʻa ʻoku ne hange ko e peau ʻo e tahi ʻoku fakateka ʻo fepaleʻekina ʻe he matangi. ʻIo, ke ʻoua naʻa mahalo ʻe he tangata ko ia te ne maʻu ha meʻa mei he ʻEiki. Ko e tangata lotolotoua ia, taʻemāu ʻene anga kotoa pe.” (Sēmisi 1:​5-8) ʻI he tali ʻo e lotú, naʻe ʻoange ʻe he ʻOtuá kia Solomone ha “loto boto mo faa fakakaukau” ʻo malava ai kiate ia ke ne fakafaikehekeheʻi ʻa e leleí mei he koví ʻi heʻene fai fakamaaú. (1 Tuʻi 3:​9-14, PM) Naʻe makehe ʻa e tuʻunga ia ʻo fekauʻaki mo Solomoné, ka ʻi he ako fakamākukangá, mo e tokoni ʻa e ʻOtuá, ʻe lava ʻa e kau tangata kuo tuku ki ai ʻa e ngaahi fatongia ʻi he fakatahaʻangá ke fai akonaki ki he niʻihi kehé ʻi he angatonu. “He ʻoku foaki poto ʻe Sihova; ʻoku mei hono fofonga ʻa e ʻilo mo e fakahinohino.”​—Palōvepi 2:6.

12. Kapau ʻoku ʻikai ke kakapa atu ha taha koeʻuhi ko e ongoʻi loto-hohaʻá, ko e hā ʻe tokoni kiate iá?

¹² Ko ha ongoʻi loto-hohaʻa ʻe lava ke ne taʻofi nai ha tangata mei haʻane kakapa atu. Te ne fakakaukau nai heʻikai malava ke ne fua ʻa e fatongia mamafa ʻo e hoko ko ha taha ʻo e kau mātuʻá. Naʻa mo Paula naʻá ne pehē: “Ka ʻoku ʻi ai ʻeku kavenga ʻoku hilifaki mai ʻi he ʻaho kotoa pe, ko e lotomoʻua he tauhi ʻo e ngaahi siasi.” (2 Kolinitō 11:28) Ka naʻe ʻilo ʻe he ʻapositoló ʻa e meʻa ke fai ʻi he taimi ʻoku hokosia ai ʻa e ongoʻi loto-hohaʻá, he naʻá ne tohi: “Neongo pe ko e ha ʻa e meʻa, ʻoua te mou lotomoʻua ai; ka ʻi he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi. Pea ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi homou loto mo hoʻomou ngaahi fakakaukau ʻia Kalaisi Sisu.” (Filipai 4:​6, 7) ʻIo, ko e lotu mo e falala ki he ʻOtuá ʻe lava ke tokoni ia ke fakasiʻisiʻi ʻa e ongoʻi loto-hohaʻá.

13. ʻE anga-fēfē ha lotu ʻa ha tangata ʻo kapau ʻoku taʻefiemālie ia ke kakapa atu?

¹³ Kapau ʻoku kei ʻi ai ha ongoʻi loto-hohaʻa, ko ha taha ʻoku ʻikai ke fiemālie ʻo fekauʻaki mo haʻane kakapa atu ʻe lotu nai ʻo hangē ko ia naʻe fai ʻe Tēvitá: “Hakule au, Ela, ʻo ʻilo hoku loto ni: Sivi au, ʻo ʻilo ʻeku ngaoʻi [ngaahi fakakaukau hohaʻa, NW]: ʻO vakai naʻa ʻoku ʻiate au ha hala ʻomi mala, pea taki au ʻi he hala taʻengata.” (Sāme 139:​23, 24) Pe ko e hā pē ha tuʻunga ʻo ʻetau ngaahi fakakaukau “hohaʻa”, ʻoku lava ʻe he ʻOtuá ke tokoni ke tau fekuki mo kinautolu kae lava ke tau fai ha fakalakalaka fakalaumālie. (Sio ki he The New International Version.) ʻOku fakalea lelei ia ʻi ha Sāme ʻe taha: “Ka ʻi heʻeku pehe, kuo heke hoku vaʻe; ko hoʻo ʻofa, ʻEiki, naʻa ne puke hake. ʻI he lahi ʻa e hohaʻa ʻi hoku loto e ko hoʻo ngaahi fakanaʻa naʻe fakafiefiaʻi hoku laumalie.”​—Sāme 94:​18, 19.

Ngāue Fiefia ʻo Fetāiaki mo e Finangalo ʻo Sihová

14. Ko e hā ʻoku totonu ai ki ha tangata ʻoku ʻikai ke kakapa atu ke ne lotu ʻo kole ʻa e laumālie māʻoniʻoni ʻo e ʻOtuá?

¹⁴ Kapau koeʻuhi ko e ongoʻi loto-hohaʻá, ongoʻi ʻo e taʻefeʻungá, pe ko e ʻikai ke fakaueʻi-lotó ʻoku ʻikai ke kakapa atu ai ha tangata Kalisitiane, ʻoku totonu ke lotu ke maʻu ʻa e laumālie ʻo e ʻOtuá. Naʻe pehē ʻe Sīsū: “Pea kapau ʻoku mou ʻilo ke foaki meʻaʻofa lelei ki hoʻomou fanau, neongo ko e faʻahinga kovi kimoutolu: huanoa ʻa e Tamai ʻi he langi ʻene foaki ʻa e laumālie māʻoniʻoni kiate kinautolu ʻoku kole kiate ia.” (Luke 11:13) Koeʻuhi ko e melinó mo e mapuleʻi-kitá ʻokú na kau ʻi he ngaahi fua ʻo e laumālié, ko e laumālie ko ʻení ʻe lava ke ne tokoni kiate kitautolu ke tau fekuki mo e ongoʻi loto-hohaʻá pe ongoʻi ʻo e taʻefeʻungá.​—Kalētia 5:​22, 23.

15. Ko e hā ʻa e faʻahinga lotu ʻe lava ke tokoni kiate kinautolu ʻoku ʻikai ke ueʻi ke ʻai kinautolu ke nau tali ʻa e ngaahi monū ʻo e ngāué?

¹⁵ Fēfē ʻa e ʻikai ke fakaueʻi-lotó? ʻI he tuʻunga ko e kau Kalisitiane kuo papitaisó, ʻoku fiemaʻu ke tau lotu ke ʻai kitautolu ʻe he ʻOtuá ke tau fai ʻa e meʻa ʻokú ne finangalo ki aí. Naʻe kole ʻe Tēvita: “Sihova, ʻai au ke u ʻilo ho ngaahi hala . . . ʻAi au ke u ʻaʻeva ʻi hoʻo moʻoní mo akoʻi au.” (Sāme 25:​4, 5, NW) Ko e ngaahi lotu ʻo hangē ko ʻení ʻe tokoni ia kiate kitautolu ke fakaʻehiʻehi mei ha founga hala, pea ʻe lava ke tau lotu ʻi ha founga meimei tatau ʻo kapau ʻoku ʻikai ke ueʻi kitautolu ke kakapa atu. ʻE lava ke tau kole kia Sihova ke ʻai kitautolu ke tau loto ke talia ʻa e ngaahi monū ʻo e ngāué. Ko hono moʻoní, kapau te tau lotu ke maʻu ʻa e laumālie ʻo e ʻOtuá pea ʻulutukua ki heʻene tatakí, ʻe ʻikai toe veiveiua te tau fakaʻatā kitautolu ki he ngaahi monū ʻo e ngāué ʻo kapau kuo ʻomai kiate kitautolu. He ʻoku ʻikai ke fiemaʻu ʻa e kau sevāniti ʻa e ʻOtuá ke nau talitekeʻi hono laumālié ʻi ha faʻahinga founga pē.​—ʻEfesō 4:30.

16. Ko e hā ʻa e faʻahinga fakakaukau ʻoku tokonaki ke ʻai ha fakaueʻi-loto mālohi ke kakapa atu ki he fatongia ʻi he fakatahaʻangá?

¹⁶ ʻI he maʻu ʻa e “fakakaukau ʻa Kalaisi,” ʻoku tau fiefia ʻi hono fai ʻo e finangalo fakaʻotuá. (1 Kolinitō 2:​16, NW) Naʻe maʻu ʻe Sīsū ʻa e fakakaukau tatau ʻo hangē ko ia ko e tokotaha tohi-sāme, ʻa ia naʻá ne pehē: “ʻE hoku ʻOtua, ʻoku ou manako ke u fai hoʻou finangalo; pea ʻoku ʻi hoku loto fatu hoʻo lao.” (Sāme 40:8) Naʻe pehē ʻe Kalaisi “Vakai, oku ou haʻu ke fai ho finagalo,” pea naʻe hoko ia ʻo aʻu ki he mate ʻi he ʻakau fakamamahí. (Hepelū 10:​9, 10, PM) Ko ha holi ke fai ʻa e meʻa kotoa pē ʻoku malava ʻi he ngāue ʻa Sihová ʻokú ne tokonaki mai ha fakaueʻi-loto mālohi ke kakapa atu ki he ngaahi fatongia ʻi he fakatahaʻangá.

Vakai Atu ki he Kahaʻu

17. (a) Ko e hā ʻoku totonu ai ki he kau tangata ʻoku ʻikai te nau kei ngāue lahi ʻo hangē ko ia naʻa nau faí ke ʻoua te nau ongoʻi lotosiʻí? (e) Ko e hā ʻa e monū lahi tahá?

¹⁷ Koeʻuhi ko ha ngaahi palopalema ʻo e moʻuí pe ngaahi ʻuhinga kehe, ko ha niʻihi naʻa nau fai ha ngaahi fatongia mahuʻinga ʻi he fakatahaʻangá kuo ʻikai te nau toe kei maʻu ʻa e ngaahi monū ko iá he taimí ni. ʻOku totonu ke ʻoua ʻe ongoʻi lotosiʻi heni. ʻOku tau ʻilo ʻoku tokolahi ʻa e kau tangata angatonu ʻoku ʻikai te nau kei malava ke ngāue kakato ʻo hangē ko ia naʻa nau ʻuluaki faí ʻoku nau kei tuʻumaʻu pē ko e kau tauhi angatonu. (Sāme 25:21) Ko e moʻoni, ko e kau mātuʻa anga-fakatōkilalo kuo nau ngāue fuoloa maí ʻe lava ke hokohoko atu ke kei malava ʻo maʻu ʻenau fakataukeí ʻaki ʻenau kei kau ki he kulupu ʻo e kau mātuʻá. Neongo kuo nau faingataʻaʻia koeʻuhi ko e taʻu motuʻá pe ko e ngaahi taʻemalavá ʻoku ʻikai fiemaʻu ke nau mālōlō mei he tuʻungá ni. Lolotonga iá, ʻofa ke koloaʻaki ʻe he Kau Fakamoʻoni ʻa Sihova kotoa pē ʻa e monū lelei taha ko e talanoa ‘ʻo kau ki he lāngilangi ʻo e tuʻunga pule ʻa e ʻOtuá’ ʻi he hoko ko e kau poupou ki hono huafa toputapú.​—Sāme 145:​10-13.

18. (a) Kapau kuo fakahifo ha tokotaha ʻo e kau mātuʻá pe ko ha sevāniti, ko e hā ʻa e meʻa ʻoku fiemaʻú? (e) Ko e hā ʻa e fakakaukau lelei naʻe fakahāhā ʻe ha taha ʻo e kau mātuʻá naʻe fakahifo?

¹⁸ Kapau ko ha taha koe ʻo e kau mātuʻá pe ko ha sevāniti ka ʻoku ʻikai ke kei ngāue ʻi he tuʻunga ko iá ʻi he taimí ni, ke ke ʻilo pau ʻoku kei tokangaʻi pē koe ʻe he ʻOtuá, pea mahalo te ne ʻoatu kiate koe ha ngaahi monū taʻeʻamanekina ʻi he kahaʻú. (1 Pita 5:​6, 7) Kapau ʻoku fiemaʻu ke ke fai ha ngaahi liliu, loto lelei ke fakahā ha fehālaaki pea ngāue ki ai fakataha mo e tokoni ʻa e ʻOtuá. Ko e niʻihi ʻo e kau mātuʻá naʻe fakahifo kinautolu kuo nau maʻu ha fakakaukau taʻefaka-Kalisitiane, pea ko ha tokosiʻi ai kuo nau hoko ʻo ʻikai ke toe ngāue pe kuo nau mavahe mei he moʻoní. Ka ko ha fakapotopoto ē ke tau hangē ko kinautolu kuo nau fakahāhā ʻa e laumālie leleí! Hangē ko ʻení, ʻi he fakahifo ʻo ha taha ʻo e kau mātuʻá naʻá ne ngāue ʻi ha ngaahi taʻu ʻi ʻAmelika Lotoloto, naʻá ne pehē: “ʻOku ou ongoʻi lahi ʻaupito ʻa e mole meiate au ʻa e monū naʻá ku lau ko ʻeku koloa ʻi ha vahaʻa taimi fuoloa. Ka te u ngāue mālohi ʻi ha founga pē ʻe loto ai ʻa e fanga tokouá ke ngāueʻaki au pea u feinga ke toe maʻu ʻa e monū ʻo e ngāué.” Naʻe faifai atu pē, pea hoko ʻa e tokoua ko ʻení ʻo toe maʻu ʻa e monū ke hoko ko ha taha ia ʻo e kau mātuʻá.

19. Ko e hā ʻa e akonaki feʻunga ʻoku ʻomai ki ha tokoua kuo fakahifo ia mei he taha ʻo e kau mātuʻá pe ko ha sevāniti?

¹⁹ Ko ia, kapau kuo fakahifo koe ka ko ha taha ʻo e kau mātuʻá pe ko ha sevāniti, tauhimaʻu ʻa e laumālie ʻo e anga-fakatōkilaló. Fakaʻehiʻehi mei ha fakakaukau loto kona ʻa ia te ne ʻai koe ke taʻetaau ai ki ha ngaahi monū ʻi he kahaʻú. Ko e laumālie fakaʻotuá ʻokú ne maʻu ʻa e fakaʻapaʻapa. ʻI he ʻikai ke hoko ʻo lotosiʻí, fakakaukau ʻo kau ki he tāpuaki ʻa Sihova ʻi hoʻo ngāue fakamalangá pe ko ho fāmilí. Langa hake fakalaumālie ho fāmilí, ʻaʻahi ki he mahakí, pea fakalotolahiʻi ʻa kinautolu ʻoku vaivaí. Ka ko e mahuʻinga ange ʻi he meʻa kotoa, koloaʻaki ho monū ke fakahīkihikiʻi ʻa e ʻOtuá mo fanongonongo atu ʻa e ongoongo leleí ʻo taau mo e taha ʻo e Kau Fakamoʻoni ʻa Sihová.​—Sāme 145:​1, 2; ʻAisea 43:​10-12.

20. ʻOku anga-fēfē nai ke tokoni ʻa e kulupu ʻo e kau mātuʻá ki ha ʻovasia pe ko ha sevāniti ki muʻa?

²⁰ ʻOku totonu ke ʻilo ʻe ha kulupu ʻo e kau mātuʻá ko hano fai ha fakahifo ʻe fakatupu mamahi ki ha tokotaha ʻovasia pe sevāniti ki muʻa, ʻo aʻu ki haʻane fie nofo pē ʻaʻana ia mei he monū ko iá. Kapau ʻoku ʻikai ke tuʻusi ia, ka ʻoku sio ʻa e kau mātuʻá ko e tokoua ko ʻení ʻoku loto-mafasia, ʻoku totonu ke nau fai ha tokoni ʻofa fakalaumālie. (1 Tesalonaika 5:14) ʻOku totonu ke nau tokoni kiate ia ke ne ʻiloʻi ʻoku fiemaʻu ia ʻi he fakatahaʻangá. Neongo kapau kuo fiemaʻu ha akonaki, ʻoku ʻikai ko ha taimi fuoloa nai ia ki ha tokotaha anga-fakatōkilalo mo loto-hounga ke ne toe maʻu ha ngaahi monū ʻo e ngāue ʻi he fakatahaʻangá.

21. Ko hai naʻe tatali ki he ngaahi monū ʻo e ngāué, pea ko e hā ʻa e fokotuʻu atu kiate kinautolu ʻoku talitali ki ai he ʻaho ní?

²¹ Kapau ʻokú ke kakapa atu, te ke talitali nai ha kiʻi taimi ki muʻa ke maʻu ha ngaahi monū lahi ange ʻo e ngāué. ʻOua te ke fiu he talí. Naʻe tatali ʻa Mōsese ia ʻi he taʻu ʻe 40 ki muʻa ke ngāueʻaki ia ʻe he ʻOtuá ki hono fakatauʻatāinaʻi ʻa e kau ʻIsilelí mei he nofo pōpula ʻi ʻIsipité. (Ngāue 7:​23-36) Naʻe ngāue fuoloa ʻa Siōsiua ko e tokoni kia Mōsese ki muʻa ke fakanofo ia ko e fetongi ʻo Mōsesé. (ʻEkisoto 33:11; Nōmipa 27:​15-23) Naʻe tatali foki ʻa Tēvita ʻi ha taimi ke fakahoko ia ki he taloni ʻo ʻIsilelí. (2 Sāmiuela 2:7; 5:3) Ngalingali naʻe ʻi ai ha vahaʻa taimi naʻe fakaleleiʻi ai ʻa Pita mo Sione Maʻake. (Mātiu 26:​69-75; Sione 21:​15-19; Ngāue 13:13; 15:​36-41; Kolose 4:10) Ko ia kapau ʻoku ʻikai ke ʻi ai hao fatongia fakaefakatahaʻanga ʻi he taimí ni, ʻoku fakaʻatā nai koe ʻe Sihova ke fakafōtunga ke ke maʻu ha toe taukei ʻoku lahi angé. Tatau ai pē pe ko e hā ʻa e tuʻungá, kumi ki he tokoni ʻa e ʻOtuá ʻi hoʻo kakapa atu, pea te ne tāpuakiʻi nai koe ʻaki ʻa e ngaahi monū ʻo e ngāué. Lolotonga ʻení, ngāue fakamātoato ke ke taau ki he ngaahi fatongia ʻi he fakatahaʻangá pea fakahāhā ʻa e laumālie ʻo Tēvitá, ʻa ia naʻá ne pehē: “ʻE fai ʻe hoku ngutu ʻa e fakalangilangiʻi ʻo Sihova; pea ke fakamaloʻia ʻe he kakano kotoa hono huafa tapuhā, ʻo lauikuonga ʻo taʻengata.”​—Sāme 145:21.

[Fakatātā ʻi he peesi 11]

Naʻe fokotuʻu ʻe W. J. Thorn ha faʻifaʻitakiʻanga lelei ʻi he hoko ko ha tokotaha anga-fakatōkilalo ʻo e kau mātuʻá