‘Fakahāhā ʻa e Fakaʻapaʻapa ki he Faʻahinga ʻOku Ngāue Mālohi ʻi Homou Lotolotongá’

‘Fakahāhā ʻa e fakaʻapaʻapa ki he faʻahinga ʻoku ngāue mālohi ʻi homou lotolotongá mo tokangaʻi kimoutolu ʻi he ʻEikí mo faienginaki atu kiate kimoutolú.’—1 TES. 5:12, NW.

1, 2. (a) Ko e hā e tuʻunga ʻo e fakatahaʻanga Tesalonaiká he taimi ne fai ai ʻe Paula ʻene ʻuluaki tohi kia kinautolú? (e) Ko e hā naʻe fakalototoʻaʻi ʻe Paula e kau Tesalonaiká ke nau faí?

SIOLOTO ATU kia koe ko ha mēmipa ʻo e fakatahaʻanga Tesalonaika he ʻuluaki senitulí, ʻa e taha ʻo e muʻaki fakatahaʻanga ne fokotuʻu ʻi ʻIulopé. Naʻe fakamoleki ʻe he ʻapositolo ko Paulá ʻa e taimi lahi ʻi hono langa hake ʻa e fanga tokoua ʻi aí. ʻOku pau naʻá ne fakanofo nai e kau mātuʻa ke nau takimuʻa, ʻo hangē ko e tuʻunga ʻi he fakatahaʻanga kehé. (Ng. 14:23) Ka ʻi he hili hono fokotuʻu ʻa e fakatahaʻangá, naʻe fokotuʻutuʻu ʻe he kau Siú ha fuʻu kakai fakamoveuveu ke nau tuli ʻa Paula mo Sailosi mei he koló. Ko e kau Kalisitiane naʻe kei ʻi aí ne nau ongoʻi līʻekina nai, mahalo pē ne aʻu ʻo nau manavahē.

² ʻOku mahinongofua, hili e mavahe mei Tesalonaiká, ne hohaʻa ʻa Paula fekauʻaki mo e fakatahaʻanga foʻoú. Naʻá ne feinga ke toe foki, ka ‘naʻe felei ʻe Setane’ hono halá. Ko ia naʻá ne fekauʻi atu ʻa Tīmote ke ne fakalototoʻaʻi e fakatahaʻangá. (1 Tes. 2:18; 3:2) ʻI he taimi ne foki mai ai ʻa Tīmote mo ha līpooti leleí, ne ueʻi ai ʻa Paula ke ne faitohi ki he kau Tesalonaiká. Naʻe kau ʻi he meʻa kehe naʻe fakalototoʻaʻi kinautolu ʻe Paula ki aí ke nau ‘fakahāhā ʻa e fakaʻapaʻapa ki he faʻahinga naʻa nau tokangaʻi kinautolú.’—Lau ʻa e 1 Tesalonaika 5:12, 13.a

 3. Ko e hā e ngaahi ʻuhinga naʻe maʻu ʻe he kau Kalisitiane ʻi Tesalonaiká ki hono fai e fakaʻatuʻi ʻoku mahulu ki he kau mātuʻá?

³ Ko e fanga tokoua naʻa nau takimuʻa he lotolotonga ʻo e kau Kalisitiane Tesalonaiká ne ʻikai te nau taukei ʻo hangē ko Paula mo hono kaungā fonongá; pea naʻe ʻikai te nau maʻu e tofiʻa fakalaumālie lelei ʻo e kau mātuʻa ʻi Selusalemá. He ko ē, ko e fakatahaʻangá ne ʻi ai ʻo siʻi hifo he taʻu ʻe taha! Neongo ia, ko e faʻahinga ʻi he fakatahaʻangá ne ʻi ai e ʻuhinga ke nau houngaʻia ai ki heʻenau kau mātuʻa, ʻa ia naʻa nau ‘ngāue mālohi’ mo ‘tokangaʻi’ ʻa e fakatahaʻangá pea ‘faienginaki’ ki he fanga tokouá. Ko e moʻoni, naʻe ʻi ai ʻenau ʻuhinga lelei ke ‘fakahāhā [ki he kau mātuʻá] ʻa e fakaʻatuʻi ʻi he ʻofa ʻoku mahulu lahi ʻaupito hake.’ Ko e kole ko ení ne hoko atu ai e akonaki ʻa Paula ke nau ‘nofo femelinoʻaki.’ Kapau naʻá ke ʻi ai ʻi Tesalonaika, naʻá ke mei fakahāhā e houngaʻia loloto ki he ngāue ʻa e kau mātuʻá? ʻOku anga-fēfē hoʻo vakai ki he ‘meʻaʻofa ko e kau tangata’ ʻa ia kuo tokonaki mai ʻe he ʻOtuá fakafou ʻia Kalaisi ki hoʻo fakatahaʻangá?—Ef. 4:8.

‘Ngāue Mālohi’

4, 5. Ko e hā ko ha ngāue mālohi ai ki he kau mātuʻa ʻi he ʻaho ʻo Paulá ke akoʻi ʻa e fakatahaʻangá, pea ko e hā ʻoku pehē ai he ʻaho ní?

⁴ Hili hono fekauʻi ʻo Paula mo Sailosi ki Pēleá, ne anga-fēfē ʻa e ‘ngāue mālohi’ ʻa e kau mātuʻa ʻi Tesalonaiká? ʻI he faʻifaʻitaki kia Paulá, ʻoku ʻikai ha veiveiua ne nau akoʻi e fakatahaʻangá, ʻo ngāueʻaki ʻa e Tohi Tapú. ‘Naʻe maʻu ʻe he kau Kalisitiane Tesalonaiká ʻa e houngaʻia ki he Folofola ʻa e ʻOtuá?’ ko hoʻo fifilí nai ia. He ko ē, ʻoku pehē ʻe he Tohi Tapú ko e kau Pēleá naʻa nau ‘anga fakaʻeiʻeiki ange ʻiate kinautolu ʻi Tesalonaiká, ʻo nau kumi ʻi he Tohitapú ʻi he ʻaho kotoa pe.’ (Ng. 17:11) Kae kehe, ko e fakafehoanakí naʻe ʻi he kau Siu Tesalonaiká fakalūkufua, ʻo ʻikai ko e kau Kalisitiané. Ko e faʻahinga ne nau hoko ʻo tuí naʻa nau ‘tali ʻa e folofola ʻa e ʻOtuá ne ʻikai ko e lea ʻa e tangata ka ko e folofola ʻa e ʻOtua.’ (1 Tes. 2:13) Ko e kau mātuʻá kuo pau ne nau ngāue mālohi ke fafangaʻi fakalaumālie e faʻahinga ko iá.

⁵ ʻI he ʻahó ni, ʻoku tokonaki mai ai ʻe he kalasi tamaioʻeiki anga-tonu mo potó ki he fanga sipi ʻa e ʻOtuá e “mea kai i hono taimi totonu.” (Mt. 24:45, PM) ʻI he malumalu ʻo e tataki ʻa e tamaioʻeikí, ʻoku ngāue mālohi e kau mātuʻa fakalotofonuá ke fafangaʻi fakalaumālie honau fanga tokouá. Ko e faʻahinga ko ia ʻi he fakatahaʻangá ʻoku lahi fau nai ʻenau ʻū tohi makatuʻunga he Tohi Tapú, pea ʻi he lea ʻe niʻihi ko e meʻangāue ko ia hangē ko e Watch Tower Publications Index mo e Watchtower Library ʻi he CD-ROM ʻoku ala maʻu ai. Ke fakalato e fiemaʻu fakalaumālie ʻa e fakatahaʻangá, ʻoku fakamoleki ʻe he kau mātuʻá ʻa e ngaahi houa ʻi hono teuteuʻi e konga ki he fakatahá koeʻuhi ke nau lava ʻo fakahoko ʻa e fakamatala kuo vaheʻi maí ʻi ha founga mohu ʻuhinga. Kuó ke fakakaukau fekauʻaki mo e lahi ʻo e taimi ʻoku fakamoleki ʻe he kau mātuʻá ʻi hono teuteu ʻenau konga ki he ngaahi fakatahá, ʻasemipilií, mo e fakataha-lahí?

6, 7. (a) Ko e hā e faʻifaʻitakiʻanga ne maʻu ʻe he kau mātuʻa Tesalonaiká meia Paulá? (e) Ko e hā nai ʻe hoko ai ko ha pole ki he kau mātuʻa he ʻaho ní ke nau faʻifaʻitaki kia Paulá?

⁶ Ko e kau mātuʻa ʻi Tesalonaiká ne nau manatuʻi e faʻifaʻitakiʻanga lelei naʻe fokotuʻu ʻe Paula ʻi hono tauhi e fanga sipí. Naʻe ʻikai ko haʻane fai ia ʻo ha ʻaʻahi ʻo fakafounga pe fakafatongia. Hangē ko ia ne lāulea ki ai ʻi he kupu ki muʻá, ko Paulá naʻá ne “angalelei pe; hange tofu pe ha fefine toutama ʻa ia ʻoku ne tauhi siʻene fanau aʻana.” (Lau ʻa e 1 Tesalonaika 2:7, 8.) Ne aʻu ʻo ne loto-lelei ke ‘ʻatu ʻene moʻuí tonu’! ʻI he taimi ʻo e tauhí, naʻe fiemaʻu ke hangē ko iá e kau mātuʻá.

⁷ Ko e kau tauhi-sipi Kalisitiane he ʻaho ní ʻoku nau faʻifaʻitaki kia Paula ʻi hono ʻofaʻi e fanga sipí. ʻI he fakanatulá, ko e fanga sipi ʻe niʻihi heʻikai nai ke nau loto-māfana mo fakafeohi. Kae kehe, ko e kau mātuʻá ʻoku nau feinga ke fakahāhā e tokanga pea sio ʻo “ʻilo ha lelei” ʻia kinautolu. (Pal. 16:20) Ko e moʻoni, ʻi he taʻehaohaoá, ʻe fāinga nai ai ha mātuʻa ke maʻu ha fakakaukau pau ki he tokotaha taki taha. Neongo ia, heʻene feinga ʻaki ʻene lelei tahá ke anga-malū ki he tokotaha kotoá, ʻikai ʻoku totonu ke fakaongoongoleleiʻi ia ʻi heʻene feinga ke hoko ko ha tauhi-sipi lelei he malumalu ʻo Kalaisí?

8, 9. Ko e hā e founga ʻe niʻihi ʻoku hoko ai ʻa e kau mātuʻa ʻi he lolotonga ní ʻo hanganaki ‘ʻā ke leʻohi hotau laumālié’?

⁸ ʻOku tau maʻu kotoa e ʻuhinga ke “fakavaivai” ai ki he kau mātuʻá. Hangē ko ia ne tohi ʻe Paulá, ‘ʻoku nau ʻā ke leʻohi hotau laumalié.’ (Hep. 13:17) Ko e lea ko iá ʻoku fakamanatu mai ai kia kitautolu ʻa e tauhi-sipí ʻa ia ʻoku ʻikai te ne mohe koeʻuhí ke maluʻi ʻene fanga sipí. ʻI he founga meimei tatau, ko e kau mātuʻa he ʻaho ní ʻoku nau feilaulauʻi nai ha mohe lolotonga hono tokangaʻi e fiemaʻu ʻa e faʻahinga ʻoku mahamahaki pe palopalemaʻia fakaeongo pe fakalaumālié. Ko e fakatātaá, ko e fanga tokoua ʻi he Kōmiti Fetuʻutaki Fakafalemahakí kuo fakaʻaaki ʻenau mohé ke fakafeangai ki ha tuʻunga faingataʻa fakafaitoʻo. Kae kehe, ʻi he taimi ʻoku tau fehangahangai ai mo ha tuʻunga peheé, he houngaʻia ē ko kitautolu heʻenau ngāué!

⁹ Ko e kau mātuʻa ʻi he Kōmiti Langa Fakafeituʻú mo e kōmiti tokoní ʻoku nau ngāue mālohi ke tokoniʻi ʻa e fanga tokouá. ʻOku nau tuha mo ʻetau poupou ʻaufuatoó! Fakakaukau angé ki he feinga tokoni hili hono taaʻi ʻe he Saikolone Nargis ʻa Maienimā ʻi he 2008. Ke aʻu ki he Fakatahaʻanga Bothingone ʻi he vahefonua Irrawaddy Delta ʻa ia ne uesia lahí, naʻe fononga ai ʻa e timi tokoní he feituʻu ne fola holo ai e kau maté. ʻI he sio e fanga tokoua fakalotofonuá ne kau ʻenau ʻovasia sēketi ki muʻá ʻi he ʻuluaki timi tokoni naʻe aʻu ki Bothingone, ne nau kalanga: “Vakai atu! Ko ʻetau ʻovasia sēketí ena! Kuo fakahaofi kitautolu ʻe Sihova!” ʻOkú ke houngaʻia ʻi he ngāue mālohi ʻoku fai ʻaho mo e pō ʻe he kau mātuʻá? Ko e kau mātuʻa ʻe niʻihi ʻoku fakanofo kinautolu ke nau ngāue ʻi he kōmiti makehe ke nau fakaleleiʻi e ngaahi palopalema fakaefakamaau ʻoku faingataʻá. Ko e kau mātuʻa ko ení ʻoku ʻikai te nau fakamafutofuta fekauʻaki mo e meʻa kuo nau lavaʻí; neongo ia ko e faʻahinga ʻoku maʻu ʻaonga mei heʻenau ngāué ʻoku nau houngaʻia moʻoni.—Mt. 6:2-4.

10. Ko e hā e ngāue ʻikai loko ʻiloa ʻoku fai ʻe he kau mātuʻá?

¹⁰ Ko e kau mātuʻa tokolahi he ʻahó ni ʻoku ʻi ai ʻenau ngāue fakapepa ke fai. Ko e fakatātaá, ko e sea ʻo e kulupu ʻo e kau mātuʻá ʻokú ne teuteu e taimi-tēpile ki he fakataha fakauiké. Ko e sekelitali ʻo e fakatahaʻangá ʻokú ne tānaki e līpooti fakamāhina mo fakataʻu ʻi he ngāue fakamalangá. Ko e ʻovasia akó ʻokú ne fai e fakakaukau fakamākukanga ki he taimi-tēpile akó. ʻI he māhina ʻe tolu kotoa pē, ʻoku ʻaotitaʻi ai e fakamatala paʻanga ʻa e fakatahaʻangá. ʻOku lau ʻe he kau mātuʻá ʻa e ʻū tohi mei he ʻōfisi vaʻá pea ngāueʻaki e fakahinohinó ʻa ia ʻoku tokoni ia ke tauhi maʻu ai ʻa e “tui taha.” (Ef. 4:3, 13) Fakafou he feinga ʻa e kau mātuʻa ngāue mālohi ko iá ‘ko e meʻa kotoa pe ʻoku faí ʻoku tāu mo māu.’—1 Kol. 14:40.

‘Tokangaʻi Kimoutolu’

11, 12. Ko hai ʻokú ne tokangaʻi e fakatahaʻangá, pea ko e hā ʻoku kau ki hono fai iá?

¹¹ Naʻe fakamatalaʻi ʻe Paula e kau mātuʻa ngāue mālohi ʻi Tesalonaiká ʻoku nau ‘tokangaʻi’ ʻa e fakatahaʻangá. Ko e foʻi lea ʻi he muʻaki leá ʻoku fakahuʻunga ai e ‘tuʻu ʻi muʻa’ pea ʻoku lava ke fakalea ia ko e ‘tataki; ʻo takimuʻa ʻi ha haʻohaʻonga.’ (1 Tes. 5:12, NW) Naʻe lave ʻa Paula ki he kau mātuʻa tatau ʻoku nau ‘ngāue mālohi.’ Naʻá ne talanoá, ʻo ʻikai fekauʻaki mo e “ʻovasia tauhi” ʻe taha, kae fekauʻaki mo e kau mātuʻa kotoa ʻi he fakatahaʻangá. ʻI he ʻahó ni, ko e tokolahi taha ʻo e kau mātuʻá ʻoku nau tuʻu ʻi muʻa ʻi he fakatahaʻangá ʻo tataki e fakatahá. Ko e feʻunuʻaki ki muí ni ke ngāueʻaki e hingoa “sea ʻo e kulupu ʻo e kau mātuʻá” ʻoku tokoniʻi ai kitautolu ke tau vakai ki he kau mātuʻá kotoa ko e ngaahi mēmipa ʻo ha kulupu fāʻūtaha.

¹² Ko hono ‘tokangaʻi’ ʻo e fakatahaʻangá ʻoku kau ki ai e meʻa lahi ange ʻi he faiakó pē. ʻOku ngāueʻaki e foʻi lea tatau ʻi he 1 Timote 3:4 (NW). Naʻe pehē ai ʻe Paula ko ha ʻovasia ʻoku totonu ke hoko ‘ko ha tangata ʻokú ne tokangaʻi lelei ʻa hono falé, ko ʻene fānaú ʻoku nau fakamoʻulaloa ʻi he anga-fakamātoato fakaʻaufuli.’ Ko e foʻi lea heni ko e ‘tokangaʻi’ ʻoku hā mahino ʻoku kau ki ai ʻo ʻikai ngata pē ʻi hono akoʻi ʻene fānaú kae pehē foki ki he takimuʻa he fāmilí pea ‘ko ʻene fānaú ʻoku nau fakamoʻulaloa.’ ʻIo, ko e kau mātuʻá ʻoku nau takimuʻa ʻi he fakatahaʻangá, ʻo tokoniʻi ʻa e tokotaha kotoa ke nau fakamoʻulaloa kia Sihova.—1 Tim. 3:5.

13. Ko e hā ʻe fiemaʻu nai ai e taimi ke aʻu ai ki ha fili ʻoku fai ʻi ha fakataha ʻa e kau mātuʻá?

¹³ Koeʻuhi ke tokangaʻi lelei e fanga sipí, ʻoku fetalanoaʻaki e kau mātuʻá fakaekinautolu ki he founga ke ngāue ai ki he fiemaʻu ʻa e fakatahaʻangá. ʻE ngali ola lelei ange kapau naʻe fai ʻe ha mātuʻa ʻe taha ʻa e filí kotoa. Neongo ia, ko e muimui he faʻifaʻitakiʻanga ʻa e kulupu pule he ʻuluaki senitulí, ʻoku fetalanoaʻaki tauʻatāina ai ʻa e kulupu ʻo e kau mātuʻa ʻi onopōní, ʻo kumi e fakahinohino mei he Tohi Tapú. Ko ʻenau taumuʻá ke ngāueʻaki e ngaahi tefitoʻi moʻoni Fakatohitapú ki he fiemaʻu ʻa e fakatahaʻanga fakalotofonuá. ʻOku ola lelei taha ení ʻi he taimi ʻoku teuteu ai ʻa e mātuʻa taki taha ki he fakataha ʻa e kau mātuʻá, ʻo fakakaukau ki he Tohi Tapú mo e fakahinohino mei he kalasi tamaioʻeiki anga-tonu mo potó. Ko e moʻoni, ʻoku fiemaʻu ki heni ʻa e taimi. ʻI he taimi ʻoku ʻi ai ai ha kehekehe he fakakaukaú, hangē ko ia ne hoko he lāulea ʻa e kulupu pule ʻi he ʻuluaki senitulí ki he meʻa fekauʻaki mo e kamú, ʻe fiemaʻu nai ai e taimi mo e fekumi lahi ke aʻu ai ki ha felotoi makatuʻunga he Tohi Tapú.—Ng. 15:2, 6, 7, 12-14, 28.

14. ʻOkú ke houngaʻia ʻi he ngāue fakataha fāʻūtaha ʻa e kulupu ʻo e kau mātuʻá? Ko e hā ʻokú ke ongoʻi pehē aí?

¹⁴ Ko e hā nai ʻe hokó kapau ʻe vilitaki ha mātuʻa ʻe taha ke fai ʻene foungá pe feinga ke pouaki ʻene fakakaukau pē ʻaʻaná? Pe fēfē kapau ʻoku ʻi ai ha taha—hangē ko Taiotifi ʻi he ʻuluaki senitulí—ʻokú ne feinga ke fakatupunga ha movetevete? (3 Sione 9, 10) Ko e moʻoni ʻe faingataʻaʻia e fakatahaʻangá fakakātoa. Kapau ne feinga ʻa Sētane ke veuki e fakatahaʻanga ʻi he ʻuluaki senitulí, ʻoku lava ke tau fakapapauʻi ʻokú ne loto ke veuki e melino ʻa e fakatahaʻanga he ʻaho ní. Te ne ʻai nai ke hā fakamānako e hehema siokita fakaetangatá, hangē ko e holi ke tuʻu-ki-muʻá. Ko ia ai, ʻoku fiemaʻu ke fakatupulekina ʻe he kau mātuʻá e anga-fakatōkilalo pea ngāue fakataha ko ha kulupu fāʻūtaha. He houngaʻia ē ko kitautolu he anga-fakatōkilalo ʻa e kau mātuʻa ʻoku nau fāitaha ko ha kulupú!

‘Faienginaki Atu Kiate Kimoutolu’

15. Ko e hā e taumuʻa ʻoku maʻu ʻe he kau mātuʻá ʻi he enginaki ki ha tokoua pe ko ha tuofefine?

¹⁵ Ne fakamamafaʻi leva ʻe Paula ha ngāue faingataʻa kae mahuʻinga ʻa e kau mātuʻá: ko e enginaki ki he fanga sipí. ʻI he Ngaahi Konga Tohi Tapu Faka-Kalisi Kalisitiané, ko Paula pē taha naʻá ne ngāueʻaki e foʻi lea faka-Kalisi ne liliu ko e ‘enginakí.’ ʻOku lava ke ʻuhinga ia ki he akonaki mālohi ka ʻoku ʻikai ke fakahaaʻi ai ha tāufehiʻa. (Ng. 20:31, NW; 2 Tes. 3:15, NW) Hangē ko ení, ne tohi ʻa Paula ki he kau Kolinitoó: ‘ʻOku ou tohi atu ʻa e ngaahi meʻá ni, ʻo ʻikai ko e ʻai ke fakamaaʻi kimoutolu, ka ke enginaki atu kiate kimoutolu ko ʻeku fānau ʻofeina.’ (1 Kol. 4:14, NW) Ko ʻene taumuʻa ʻi he enginaki ko iá ko e tokanga ʻofa ki he niʻihi kehé.

16. Ko e hā ʻoku lelei ke manatuʻi ʻe he kau mātuʻá heʻenau enginaki ki he niʻihi kehé?

¹⁶ Ko e kau mātuʻá ʻoku nau manatuʻi e mahuʻinga ʻo e founga ʻo ʻenau enginaki ki he niʻihi kehé. ʻOku nau feinga mālohi ke faʻifaʻitaki kia Paula ʻi he anga-lelei, ʻofa, mo e faʻa tokoni. (Lau ʻa e 1 Tesalonaika 2:11, 12.) Ko e moʻoni, ko e kau mātuʻá ʻoku nau ‘buke ke mau ae lea mooní, koeuhi ke nau faa fai ke eginaki aki ae akonaki totonú.’—Tai. 1:5-9, PM.

17, 18. Ko e hā ʻoku totonu ke ke manatuʻí kapau ʻoku fai atu kia koe ha enginaki mei ha mātuʻa?

¹⁷ Ko e moʻoni, ko e kau mātuʻá ʻoku nau taʻehaohaoa pea te nau leaʻaki nai ʻa e meʻa te nau fakaʻiseʻisa ai ʻamui. (1 Tuʻi 8:46; Sem. 3:8) Pehē foki, ʻoku ʻilo ʻa e kau mātuʻá, ko hono maʻu ʻe he fanga tokoua mo e fanga tuofāfine fakalaumālié e akonakí ʻoku fakanatula ʻa e ʻikai ke ‘fakafiefia ka ʻoku fakamamahi.’ (Hep. 12:11) Ko ia ʻi he taimi ʻoku fakaofiofi ai ha mātuʻa ki ha taha mo e lea ʻo e enginakí, ngalingali ʻokú ne fai ia hili e fakakaukau lahi ki he meʻa ko iá pea lotu fekauʻaki mo ia. Kapau kuo fai atu ha enginaki kiate koe, ʻokú ke houngaʻia ʻi he tokanga ʻofa ʻa e mātuʻa ko iá?

¹⁸ Tau pehē pē ne ʻi ai hoʻo palopalema fakaemoʻuilelei ne hā ngali ʻikai mahinoʻi fakafaitoʻo. Naʻe fakahaaʻi totonu leva ʻe ha toketā e palopalemá, ka ko e ʻiloʻi ʻo e mahakí naʻe kiʻi faingataʻa ke tali. Te ke tukulotoa ha ʻita ki he toketā ko iá? ʻIkai! Tatau ai pē pe naʻá ne fakahaaʻi ke fai ha faitoʻo, ngalingali te ke loto-lelei ki he faitoʻó, ʻi he tui ko e lelei pē ia maʻau. Ko e founga hono fakahaaʻi ʻe he toketaá e fakamatalá ʻe ʻi ai nai ʻene kaunga ki hoʻo ongoʻí, ka te ke fakaʻatā e meʻa ko iá ke ne fakapapauʻi hoʻo filí? Ngalingali ʻe ʻikai. ʻI he founga meimei tatau, ʻoua ʻe fakaʻatā e founga ʻo e enginaki ʻoku fai kia koé ke taʻofi ai koe mei he fanongo ki he faʻahinga ʻoku ngāueʻaki nai ʻe Sihova mo Sīsū ke nau ʻai ke ke ʻiloʻi ʻa e founga ʻe lava ke tokoniʻi ai koe tonu pe maluʻi fakalaumālié.

Houngaʻia ʻi he Tokonaki ʻa Sihova ko e Kau Mātuʻá

19, 20. ʻE fēfē nai haʻo fakahaaʻi e houngaʻia ki he ‘ngaahi meʻaʻofa ko e kau tangatá’?

¹⁹ Ko e hā te ke faí kapau naʻá ke maʻu ha meʻaʻofa naʻe ngaohi tautefito maʻau? Te ke fakahaaʻi hoʻo houngaʻiá ʻaki hano ngāueʻaki ia? Ko e ‘meʻaʻofa ko e kau tangatá’ ʻa e meʻa kuo tokonaki mai ʻe Sihova maʻau fakafou ʻia Sīsū Kalaisi. Ko e founga ʻe taha ʻe lava ke ke fakahāhā ai hoʻo houngaʻia ki he meʻaʻofa ko ení ko e fanongo tokanga ki he malanga ʻoku fai ʻe he kau mātuʻá pea feinga ke ngāueʻaki ʻa e poini ʻoku nau ʻomaí. ʻE toe lava ke ke fakahāhā hoʻo houngaʻiá ʻaki hono fai ʻa e tali mohu ʻuhinga ʻi he fakatahá. Poupou ki he ngāue ʻa ia ʻoku takimuʻa ai e kau mātuʻá, hangē ko e ngāue fakamalangá. Kapau kuó ke maʻu ʻaonga mei he akonaki kuó ke maʻu mei ha mātuʻa pau, ko e hā ʻoku ʻikai te ke tala ange ai kiate iá? ʻIkai ko ia pē, ko e hā ʻoku ʻikai te ke fakahāhā ai hoʻo houngaʻiá ki he fāmili ʻo e kau mātuʻá? Manatuʻi, ke ngāue mālohi ha mātuʻa ʻi he fakatahaʻangá, ʻoku feilaulauʻi ʻe hono fāmilí ʻa e taimi ʻoku nau feohi ai mo iá.

²⁰ ʻIo, ʻoku tau maʻu e ʻuhinga feʻunga ke fakahāhā ai e houngaʻia ki he kau mātuʻá, ʻa ē ʻoku nau ngāue mālohi ʻi hotau haʻohaʻongá, ʻi hono tokangaʻi kitautolu, mo faienginaki kia kitautolu. Ko e ‘ngaahi meʻaʻofa ko e kau tangata’ ko ení ko ha tokonaki ʻofa moʻoni kinautolu meia Sihova!

[Fakamatala ʻi lalo]

ʻOkú Ke Manatuʻi?

• Ko e hā e ngaahi ʻuhinga ne pau ke houngaʻia ai ʻa e kau Kalisitiane Tesalonaiká ʻi he faʻahinga naʻa nau takimuʻa ʻi honau haʻohaʻongá?

• ʻOku anga-fēfē ʻa e ngāue mālohi maʻau ʻa e kau mātuʻa ʻi hoʻo fakatahaʻangá?

• ʻOku anga-fēfē hoʻo maʻu ʻaonga mei he kau mātuʻa ʻoku nau tokangaʻi koé?

• Kapau ʻe fai atu ʻe ha mātuʻa ha enginaki, ko e hā ʻoku totonu ke ke manatuʻí?

[Fakatātā ʻi he peesi 27]

ʻOkú ke houngaʻia ʻi he founga lahi ʻoku tauhi ai ʻe he kau mātuʻá ʻa e fakatahaʻangá?