Aʻu ki he Ngaahi Lotó ʻAki ʻa e Pōtoʻi ʻi he Fakalotoʻí

ʻOKU fakakaukau ʻa e kakai tokolahi ki he foʻi lea “fakalotoʻí” fakataha mo e huʻuhuʻu. Te ne fokotuʻu mai nai ki hoto ʻatamaí ha tokotaha tuʻuaki koloa fakaaoao pe ko ha tuʻuaki kuo faʻufaʻu ke ne kākaaʻi pe puleʻi ʻa e tokotaha fakataú. Naʻa mo e ʻi he Tohitapú, ko e foʻi fakakaukau ʻo e fakalotoʻí ʻi he taimi ʻe niʻihi ʻoku ʻi ai ʻa e ngaahi fakaʻuhinga taʻefakafiemālie ai, ʻoku fakahuʻunga mai ai ha takikoviʻi pe ko ha takiheeʻi. Ko e fakatātaá, naʻe tohi ʻa e ʻapositolo Kalisitiane ko Paulá ki he kau Kalētia: “ʻA, ne mālō hoʻomou lele. Kohai tū ne taʻofi kimoutolu mei he talangofua ki he totonu? Ko homou fakalotoʻi ko ia, ʻoku ʻikai fou meiate ia ʻoku fai homou fakaului.” (Kaletia 5:​7, 8) Naʻe toe fakatokanga foki ʻa Paula ki he kau Kolosé ke ʻoua ʻe tuku ha taha ke ne ‘fakahalaʻi kimoutolu, ʻi haʻane [“fakakikihi faifakalotoʻi,” NW] lea fakaoleole.’ (Kolose 2:4) Ko e fakalotoʻi peheé ʻoku fakatuʻunga ia ʻi he ngaahi fakakikihi pōtoʻi kuo langa hake ʻi he ngaahi makatuʻunga loi.

Kae kehe, ʻi heʻene tohi hono ua kia Tīmoté, naʻe ngāueʻaki ai ʻe he ʻapositolo ko Paulá ʻa e fakakaukau ʻo e fakalotoʻí ʻi ha ʻuhinga kehe. Naʻá ne tohi: “Ke ke nofo ʻi he ngaahi meʻa naʻa ke ako ai, ʻa ia naʻe fakalotoʻi atu [“fakalotoʻi ke ke tui ki aí,” NW], ko hoʻo ʻilo ki he anga ʻo e kakai naʻa ke ako mei ai.” (2 Timote 3:​14) ʻI hono ‘fakalotoʻi ke ne tuí,’ naʻe ʻikai ke kākaaʻi ʻa Tīmote ʻe heʻene faʻeé mo ʻene kuí, ʻa ia naʻá ne ako mei ai ʻa e ngaahi moʻoni Fakatohitapú.​—2 Timote 1:5.a

Lolotonga hono tukupōpulafaleʻi ʻi Lomá, naʻe fai ai ʻe Paula ha fakamoʻoni fakaʻāuliliki ki he tokolahi, “ʻo ne ʻahiʻahi [“fakalotoʻi,” NW] ki he ngaahi meʻa ʻoku kau kia Sisū, ʻo tefito ʻene lea ki he Lao ʻa Mosese mo e Tohi Palōfita fakatouʻosi; ʻo ne fai mei he hengihengi ki he poʻuli.” (Ngāue 28:23) Naʻe kākaaʻi ʻe Paula ʻa ʻene kau fanongó? ʻIkai ʻaupito! ʻOku hā mahino leva, ko e fakalotoʻí ʻoku ʻikai ke hala maʻu pē ia.

ʻI hono ngāueʻaki ʻi ha ʻuhinga pau, ko e tupuʻi-lea faka-Kalisi naʻe liliu ko e “fakalotoʻi” ʻoku ʻuhingá ko e fakatuipauʻi, ke liliuʻi ʻa e fakakaukaú fakafou ʻi he fakaʻuhinga lelei, mo moʻoni. Ko ia, ʻoku lava ha faiako ke langa hake ʻi ha makatuʻunga Fakatohitapu, ʻo ngāueʻaki ʻa e fakalotoʻí ke fakahūhū ki he niʻihi kehé ha fakatuipauʻi ki he moʻoni ʻo e Tohitapú. (2 Timote 2:​15) Ko e moʻoni, ko ha fakaʻilonga ʻeni ʻo e ngāue fakafaifekau ʻa Paulá. Naʻa mo e tufunga tuki siliva ko Temetelió, ʻa ia naʻá ne fakakaukau ʻoku loi ʻa e ngaahi akonaki faka-Kalisitiané, naʻá ne pehē: “Ko e siana ko Paula kuo ne fakalotoʻi mo taki kehe ha fuʻu kakai, ʻo ʻikai ʻi Efeso pe, ka meimei ko hono kotoa ʻo Esia, heʻene pehē ʻoku ʻikai ko e ngaahi ʻOtua é ʻa ia kuo ngaohi ʻe he nima ʻo e tangata.”​—Ngāue 19:26.

Ngāueʻaki ʻa e Fakalotoʻí ʻi he Ngāue Fakafaifekaú

Naʻe fakahinohino ʻe Sīsū Kalaisi ki hono kau muimuí: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu ki he Huafa ʻo e Tamai mo e ʻAlo mo e Laumalie Maʻoniʻoni, mo e akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu. Pea ko eni, ʻoku ou ʻiate kimoutolu ʻe au ʻi he ngaahi ʻaho kotoa pe, ʻo aʻu ki he ngataʻanga ʻo mamani.” (Mātiu 28:​19, 20) ʻI he ngaahi fonua laka hake ʻi he 230, ʻoku talangofua ai ʻa e Kau Fakamoʻoni ʻa Sihová ki he tuʻutuʻuni ko ʻení. ʻI he māhina taki taha lolotonga honau taʻu fakangāue 1997, naʻa nau fai ai ʻo fakaʻavalisi ha ngaahi ako Tohitapu ʻi ʻapi ʻe 4,552,589 ʻi māmani lahi.

Kapau ʻoku fakamonūʻaki koe ke fai ha ako Tohitapu ʻi ʻapi, te ke malava nai ke tomuʻa fakakaukau atu ki he ngaahi pole ʻa ia ʻe fiemaʻu ai ʻa hono ngāueʻaki ʻa e pōtoʻi ʻi he fakalotoʻí. Ko e fakatātaá, pehē pē eni ʻi hoʻo taimi ako hono hokó, ʻe malanga hake ai ha fehuʻi fekauʻaki mo e Tolu-Tahaʻi-ʻOtuá. Fēfē kapau ʻokú ke ʻilo ʻoku tui hoʻo tokotaha akó ki he tokāteline ko ʻení? ʻE lava ke ke ʻoange kiate ia ha tohi ʻoku lāulea ki he tuʻunga-lea ko iá. Hili ʻene lau iá, te ke ʻilo nai ai kuo fakalotoʻi ia ke tui ko e ʻOtuá mo Sīsū ʻoku ʻikai ke na tatau. Ka ʻo kapau ʻoku kei toe pē ha ngaahi fehuʻi, ʻe fēfē haʻo hoko atu?

Fanongo lelei. ʻE tokoni ʻeni kiate koe ke ke fakapapauʻi ai ʻa e meʻa kuo ʻosi tui ki ai ʻa hoʻo tokotaha akó fekauʻaki mo ha tuʻunga-lea kuo tuku kiate ia. Ko e fakatātaá, kapau ʻoku pehē ʻe hoʻo tokotaha akó, “ʻOku ou tui ki he Tolu-Tahaʻi-ʻOtuá,” te ke lava ʻo fai ha lāulea Fakatohitapu vave ke fakaʻikaiʻiʻaki ʻa e tokāteline ko ʻení. Ka ʻoku ʻi ai ʻa e ngaahi tui kehekehe fekauʻaki mo e Tolu-Tahaʻi-ʻOtuá. ʻE tui nai ʻa hoʻo tokotaha akó ki ha meʻa ʻoku mātuʻaki kehe mei he meʻa ko ia te ke fakamatalaʻi ko e tokāteline Tolu-Tahaʻi-ʻOtuá. ʻOku lava ke leaʻaki nai ʻa e meʻa tatau fekauʻaki mo e ngaahi tui kehé, hangē ko e toe fanauʻi sino foʻoú, ko e taʻefaʻamate ʻa e soulú, mo e fakamoʻuí. Ko ia, fanongo lelei ki muʻa ke ke leá. ʻOua ʻe fai ha fakamahamahalo fekauʻaki mo e meʻa ʻoku tui ki ai ʻa e tokotaha akó.​—Palovepi 18:13.

ʻEke ʻa e ngaahi fehuʻi. ʻE fakakau atu nai ʻeni ki ai: ‘Kuó ke tui maʻu pē ki he Tolu-Tahaʻi-ʻOtuá? Naʻá ke teitei fai ha ako fakaʻāuliliki ki he meʻa ʻoku leaʻaki ʻe he Tohitapú fekauʻaki mo e tuʻunga-lea ko ʻení? Kapau ko e ʻOtuá ko ha konga ia ʻo e tolu-tahaʻi-ʻOtuá, ʻikai ʻe hanga ʻe heʻene Folofolá, ko e Tohitapú, ʻo tala maʻalaʻala mo hangatonu mai ia kiate kitautolu?’ ʻI hono akoʻi ʻa e tokotaha akó, taʻofi ʻi ha vahaʻa taimi ʻo ʻeke ʻa e ongo fehuʻi hangē ko ʻení: ‘ʻOku ʻuhinga lelei kiate koe ʻa e ngaahi meʻa kuó ta ʻosi vakai ki aí?’ ‘ʻOkú ke tui ki he fakamatala ko ʻení?’ ʻI hoʻo ngāueʻaki pōtoʻi ʻa e ngaahi fehuʻí, ʻokú ke fakakau ai ʻa e tokotaha akó ʻi hono fai ʻo e akó. ʻOku ʻikai totonu ke foʻi fanongo pē ia ki hoʻo fakamatalaʻi ʻa e tuʻunga-leá.

Ngāueʻaki ʻa e fakaʻuhinga lelei. Ko e fakatātaá, ʻi he lāulea ki he tokāteline Tolu-Tahaʻi-ʻOtuá, ʻe lava ke ke pehē ki hoʻo tokotaha akó: ‘ʻI he taimi naʻe papitaiso ai ʻa Sīsuú, naʻe ongo mai ha leʻo mei he langí, ʻo pehē: “Ko hoku ʻAlo Pele koe, ko koe kuo u hōifua ai.” Kapau naʻe ʻi māmani moʻoni ʻa e ʻOtuá ʻo papitaiso, naʻá ne faʻufaʻu ke ʻohake ʻa hono leʻó ki ʻolunga ki hēvani pea fakafoki mai koeʻuhi ke ongo ʻa e ngaahi lea ko iá ʻi he māmaní? ʻIkai ʻe fakatupu takihalaʻi ia? ʻE fai ʻe he ʻOtua, “taʻefaʻa loi,” ha meʻa kākā pehē?’​—Luke 3:​21, 22; Taitusi 1:​1, 2.

Ko e fakaʻuhinga lelei ʻo fai ʻi ha ʻulungaanga pōtoʻí ʻoku faʻa mātuʻaki ola lelei ia. Fakakaukau ange ki he faʻifaʻitakiʻanga ʻa ha fefine te tau ui ko Barbara. ʻI he kotoa ʻo ʻene moʻuí, naʻá ne tui ko Sīsuú ko e ʻOtuá ia pea ko e konga ia ʻo ha tolu-tahaʻi-ʻOtua ʻa ia naʻe kau ai ʻa e laumālie māʻoniʻoní. Ka naʻe tala ange leva ʻe ha taha ʻo e Kau Fakamoʻoni ʻa Sihová ko e ʻOtuá mo Sīsuú ko e toko ua mavahevahe, peá ne fakahā ange kiate ia ʻa e ngaahi konga Tohitapu ke poupouʻiʻaki ʻa ʻene fakamatalá.b Naʻe ʻikai lava ke fakaʻikaiʻi ʻe Barbara ʻa e Tohitapú. ʻI he taimi tatau pē, naʻá ne ongoʻi feifeitamaki. Hili iá, naʻá ne tukulotoa ʻa e tokāteline Tolu-Tahaʻi-ʻOtuá.

Naʻe fakaʻuhinga anga-kātaki ʻa e tokotaha Fakamoʻoní kia Barbara. “Kapau naʻá ke feinga ke akoʻi mai kiate au ʻoku tatau pē ha ongo meʻa ʻe toko ua,” ko ʻene ʻeké ange ia, “ko e hā ʻa e vahaʻangatae fakafāmili te ke ngāueʻaki ke fakatātaaʻi iá?” Naʻá ne fakakaukau ʻi ha mōmeniti peá ne toki tali leva: “Te u ngāueʻaki nai ha ongo tautehina.” “Ko ia tofu pē,” naʻe tali ange ʻe he tokotaha Fakamoʻoní. “Naʻa mo ha ongo māhanga faitatau nai. Ka ʻi heʻene akoʻi kitautolu ke fakakaukau ki he ʻOtuá ʻi he tuʻunga ko e Tamai pea mo ia tonu ʻi he tuʻunga ko e ʻAló, ko e hā ʻa e pōpoaki naʻe fakahaaʻi ʻe Sīsuú?” “ʻOku mahino kiate au,” naʻe tali ange ʻe Barbara, ʻokú ne mataʻi ʻohovale. “ʻOkú ne fakamatalaʻi ʻa e tokotaha ʻoku taʻumotuʻa lahi ange ia peá ne maʻu ʻa e mafai lahi ange.”

“ʻIo,” naʻe tali ange ʻe he tokotaha Fakamoʻoní, “pea ko e kau fanongo Siu ʻa Sīsuú, ʻoku nau nofo ʻi ha sōsaieti fakapēteliaké, naʻa nau aʻu tautefito ki he fakamulituku ko iá.” ʻI hono fakamamafaʻi ʻa ʻene poiní, naʻe fakaʻosiʻaki ʻe he tokotaha Fakamoʻoní: “Kapau naʻá ta maʻu ha fakatātā feʻungamālie ke akoʻiʻaki ʻa e faitataú​—hangē ko ia ko e ongo tautehiná pe ongo māhanga faitataú​—ʻoku pau pē ko Sīsū, ʻa e Faiako Lahí, naʻá ne mei lava ke fai pehē foki. Ka naʻe ʻikai, naʻá ne ngāueʻaki ʻa e kupuʻi lea ko e ‘tamai’ mo e ‘ʻalo’ ke fakamatalaʻiʻaki ʻa e vahaʻangatae ʻo ia tonu mo e ʻOtuá.”

Naʻe faifai atu pē ʻo mahino kia Barbara ʻa e poiní, pea naʻá ne tali ia. Naʻe aʻu ki hono lotó ʻaki hono ngāue pōtoʻiʻaki ʻa e fakalotoʻí.

Feangai mo e Ngaahi Ongo ʻo e Lotó

Ko e ngaahi tui fakalotu kuo fokotuʻu mālohí ʻoku faʻa kau ki ai ʻa e tafaʻaki fakaeongó. Fakakaukau ki he tuʻunga ʻo Edna, ko ha Katolika līʻoa. Naʻe ʻoange kiate ia ʻe hono ongo mokopuna tangata taʻu hongofulu tupú ha fakamoʻoni maʻalaʻala Fakatohitapu ko e ʻOtuá mo Sīsū ʻoku ʻikai ko e tokotaha tatau pē. Naʻe mahino kia Edna ʻa e meʻa naʻá ne fanongo ki aí. Ka neongo ia, naʻá ne pehē anga-ʻofa kae mālohi: “ʻOku ou tui ki he Tolu-Tahaʻi-ʻOtua toputapú.”

Mahalo pē kuó ke aʻusia ha meʻa meimei tatau. ʻOku fakakaukau ʻa e tokolahi ki he ngaahi tokāteline ʻo ʻenau lotú ʻo hangē pē ʻa e ngaahi meʻá ni ko hanau kongá tonu. Ke fakalotoʻi ʻa e kau ako Tohitapu peheé, ʻoku fiemaʻu ʻa e meʻa lahi ange ia ʻi ha moʻoni taʻehaongo pe naʻa mo ha hokohoko ʻo ha ngaahi konga Tohitapu ʻokú ne fakamoʻoniʻi ʻoku hala ʻa e fakakaukau ʻa e tokotahá. Ko e ngaahi tuʻunga peheé ʻe lava lelei ke fakaleleiʻi ia ʻaki hono fakamafamafatatau ʻa e pōtoʻi ʻi he fakalotoʻí fakataha mo e manavaʻofá. (Fakafehoanaki mo Loma 12:15; Kolose 3:​12.) Ko e moʻoni, ko ha faiako ola lelei ʻoku totonu ke ne maʻu ha ngaahi fakatuipau mālohi. Ko e fakatātaá, naʻe ngāueʻaki ʻe Paula ʻa e ngaahi kupuʻi lea hangē ko e “ʻoku te tui” mo e “ʻoku ou ʻiloʻi pea kuo fakalotoʻi au ʻi he ʻEiki ko Sīsū Kalaisí.” (Loma 8:​38; 14:​14, NW) Kae kehe, ʻi hono fakahaaʻi ʻetau tuipaú, ʻoku ʻikai totonu ke tau ʻai ha leʻo fakamatematē, māʻoniʻoni fakaekita, pea ʻoku ʻikai totonu ke tau manuki pe anga-māʻulalo ʻi hono ʻoatu ʻa e ngaahi moʻoni ʻo e Tohitapú. ʻOku ʻikai moʻoni ke tau loto ke fakaʻitaʻi pe aʻu ʻo ngāhiʻi ʻa e tokotaha akó.​—Palovepi 12:18.

ʻOku ola lelei mamaʻo ange ke tokaʻi ʻa e tui ʻa e tokotaha akó pea ʻiloʻi ʻa ʻene totonu ke maʻu iá. Ko e anga-fakatōkilaló ʻa e kií. Ko ha faiako ʻoku fakakaukau fakatōkilaló ʻoku ʻikai te ne ongoʻi māʻolunga ange ʻi hono ʻulungāngá ʻi heʻene tokotaha akó. (Luke 18:​9-​14; Filipai 2:​3, 4) Ko e fakalotoʻi fakaʻotuá ʻoku kau ki ai ha anga-fakatōkilalo ʻa ia ko hono moʻoní, ʻokú ne pehē: ‘Kuo tokoniʻi au ʻe Sihova ʻi he meesi ke sio ki heni. Tuku ke u vahevahe ia mo koe.’

Naʻe tohi ʻa Paula ki hono kaungā Kalisitiane ʻi Kolinitoó: “Ko e mahafu ʻo e tau ʻoku mau fai ʻoku ʻikai ko e koto kakano, ka ko e mahafu kuo oloi ʻe he ʻOtua moʻo holoki ʻo e ngaahi kolotau. ʻO mau holoki ʻaki ʻa e ngaahi fakakaukau, mo e maʻolunga kotoa pe ʻoku fokotuʻu ke taʻofi ʻa e ʻilo ki he ʻOtua; pea mau taki popula ʻa e feinga kotoa pe ʻa e loto ke Fakavaivai kia Kalaisi.” (2 Kolinito 10:​4, 5) ʻI he ʻahó ni, ʻoku ngāueʻaki ʻe he Kau Fakamoʻoni ʻa Sihová ʻa e Folofola ʻa e ʻOtuá ke fakaʻauhaʻaki ʻa e ngaahi tokāteline loi kuo mālohi hono fokotuʻú pehē foki ki he ngaahi tōʻongafai mo e ngaahi tōʻonga kuo nofo loloto ʻa ia ʻoku taʻefakahōifua kiate iá. (1 Kolinito 6:​9-​11) ʻI hono fai ʻení, ʻoku manatuʻi ʻe he Kau Fakamoʻoní kuo anga-ʻofa ʻa Sihova ʻo kātaki kiate kinautolu. He fiefia ē ko kinautolu ke maʻu ʻa ʻene Folofolá, ko e Tohitapú, pea ke ngāueʻaki ʻa e meʻangāue mālohi ko ʻení ke taʻaki fuʻu hake ʻaki ʻa e ngaahi akonaki loí pea aʻu ki he ngaahi lotó fakataha mo e pōtoʻi ʻi he fakalotoʻí!

[Fakamatala ʻi lalo]

[Puha ʻi he peesi 23]

Aʻu ki he Loto ʻo Hoʻo Tokotaha Akó

◻ Lotu ki he tataki ʻa Sihová ke aʻu ki he loto ʻo e tokotaha ako Tohitapú.​—Nehemaia 2:​4, 5; Aisea 50:4.

◻ ʻIloʻilo ki he ngaahi meʻa ʻoku tui ki ai ʻa e tokotaha akó mo e ʻuhinga te ne ʻilo nai ai ʻoku fakamānako ha tui loi.​—Ngāue 17:​22, 23.

◻ ʻI ha ʻulungaanga anga-ʻofa, mo kātaki, langa hake ha fakaʻuhinga totonu, Fakatohitapu lolotonga ia ʻa e tauhi maʻu ʻo e tuʻunga anga-mahení.​—Ngāue 17:​24-​34.

◻ Kapau ʻe ala lava, ʻai ke mālohi ange ʻa e ngaahi moʻoni Fakatohitapú ʻaki ʻa e ngaahi fakatātā ʻaonga.​—Maake 4:​33, 34.

◻ Fakahāhā ki he tokotaha akó ʻa e ngaahi ʻaonga ʻo hono tali ʻa e ʻilo totonu mei he Tohitapú.​—1 Timote 2:​3, 4; 2 Timote 3:​14, 15.