Kau Talavou—Tuli ki he Ngaahi Taumuʻa ʻOku Fakalāngilangiʻi Ai ʻa e ʻOtuá
“Teuʻi koe ki he taumuʻa ko e anga-līʻoa fakaʻotuá.”—1 TIMOTE 4:7, NW.
1, 2. (a) Ko e hā naʻe fakaongoongoleleiʻi ai ʻe Paula ʻa Tīmoté? (e) ʻOku anga-fēfē ʻa e hanga ʻe he kau talavou ʻi he ʻaho ní ʻo ‘teuʻi kinautolu ki he taumuʻa ko e anga-līʻoa fakaʻotuá’?
“OKU ikai iate au ha taha oku na loto tatau mo ia, ke tokaga mooni kiate kimoutolu. . . . Hage koe foha moe tamai, kuo behe ene gaue mo au i he ogoogolelei.” (Filipai 2:20, 22, PM) Ko e fakaongoongolelei loto-māfana ko ení naʻe fakakau ia ʻe he ʻapositolo ko Paulá ʻi heʻene tohi ki he kau Kalisitiane ʻi Filipai ʻi he ʻuluaki senitulí. Ko hai naʻá ne lave ki aí? Kia Tīmote, ʻa hono kaungā fononga taʻu siʻi angé. Fakaʻuta atu ki he māfana ʻoku pau naʻe ʻi ai ʻa e loto ʻo Tīmoté ʻi he fakapapauʻi ange ko eni ʻo e ʻofa mo e falala ʻa Paulá!
2 Kuo hoko maʻu pē ʻa e kau talavou anga-fakalaumālie hangē ko Tīmoté ko ha koloa mahuʻinga ʻi he haʻohaʻonga ʻo e kakai ʻa Sihová. (Sāme 110:3) ʻI he ʻahó ni, ʻoku tāpuakiʻi ʻa e kautaha ʻa e ʻOtuá ʻaki ʻa e kau talavou tokolahi ʻoku nau ngāue ko e kau tāimuʻa, kau misinale, kau ngāue pole ʻi he langá mo e kau ngāue ʻi he Pētelí. ʻOku toe fakaongoongoleleiʻi lahi foki mo e faʻahinga ʻoku nau kau faivelenga ʻi he ngaahi ngāue ʻa e fakatahaʻangá lolotonga ia ʻoku nau tokangaʻi ʻa e ngaahi fatongia kehe. ʻOku maʻu ʻe he kau talavou ko ení ʻa e fiemālie moʻoni ʻa ia ʻoku hoko mai ʻi he tuli ki he ngaahi taumuʻa ʻoku fakalāngilangiʻi ai ʻa ʻetau Tamai fakahēvani ko Sihová. ʻOku nau ‘teuʻi [moʻoni] kinautolu ki he taumuʻa ko e anga-līʻoa fakaʻotuá.’—1 Timote 4:7, 8, NW.
3. Ko e hā ʻa e ngaahi fehuʻi ʻe fai ki ai ʻa e lāulea ʻi he kupu ko ení?
3 ʻI ho tuʻunga ko ha talavoú, ʻokú ke kakapa atu ki ha ngaahi taumuʻa pau fakalaumālie? Ko fē ʻe malava ke ke maʻu ai ʻa e tokoni mo e fakalototoʻa ke fai peheé? ʻE lava fēfē ke ke talitekeʻi ʻa e ngaahi tenge ʻo e māmani fakamatelie ko ení? Ko e hā ʻa e ngaahi tāpuaki te ke ʻamanaki atu ke utu kapau te ke tuli ki he ngaahi taumuʻa ʻoku fakalāngilangiʻi ai ʻa e ʻOtuá? Tau kumi angé ʻa e tali ki he ngaahi fehuʻí ni ʻaki ʻa e lāulea ki he moʻui mo e ngāue ʻa Tīmoté.
Puipuituʻa ʻo Tīmoté
4. Fakamatalaʻi nounou angé ʻa e ngāue faka-Kalisitiane ʻa Tīmoté.
4 Naʻe tupu hake ʻa Tīmote ʻi Līsita, ko ha kiʻi kolo ʻi he vahefonua Loma ko Kalētiá. Ngalingali naʻá ne ʻilo ʻa e lotu faka-Kalisitiané ʻi heʻene taʻu hongofulu tupú, ʻi he taimi naʻe malanga ai ʻa Paula ʻi Līsita ʻi he 47 T.S. nai. Naʻe hoko vave ʻa Tīmote ʻo ongoongo lelei ʻaupito ʻi he haʻohaʻonga ʻo e ngaahi tokoua Kalisitiane ʻi honau feituʻú. ʻI he foki atu ʻa Paula ki Līsita ʻi he taʻu ʻe ua mei ai ʻo ne ʻilo ʻa ʻene fakalakalaká, naʻá ne fili ai ʻa Tīmote ke hoko ko hono kaungā misinale. (Ngāue 14:5-20; 16:1-3) ʻI he matuʻotuʻa ʻa Tīmoté, naʻe tuku kiate ia ʻa e toe ngaahi fatongia lahi ange, ʻo kau ai ʻa e ngaahi fononga mahuʻinga ke fakaivimālohiʻi ʻa e ngaahi tokouá. ʻI he taimi naʻe tohi atu ai ʻa Paula kia Tīmote mei he pilīsone ʻi Lomá ʻi he 65 T.S. nai, naʻe ngāue ai ʻa Tīmote ko ha mātuʻa Kalisitiane ʻi ʻEfesō.
5. Fakatatau ki he 2 Timote 3:14, 15, ko e hā ʻa e meʻa ʻe ua naʻe tokoni ki he fili ʻa Tīmote ke tuli ki he ngaahi taumuʻa fakalaumālié?
5 ʻOku hā mahino naʻe fili ʻa Tīmote ke tuli ki he ngaahi taumuʻa fakalaumālié. Ka ko e hā naʻá ne ueʻi ia ke ne fai peheé? ʻI he tohi hono ua ʻa Paula kia Tīmoté, naʻá ne lave ai ki ha meʻa ʻe ua. Naʻá ne tohi: “Ke ke nofo ʻi he ngaahi meʻa naʻa ke ako ai, ʻa ia naʻe fakamahino atu, ko hoʻo ʻilo ki he anga ʻo e kakai naʻa ke ako mei ai, pea mo e talu hoʻo valevale kuo ke maheni mo e Tohitapu.” (Fakaʻītali ʻamautolu; 2 Timote 3:14, 15) Tau ʻuluaki vakai angé ki he tākiekina naʻe fakahoko ʻe he kau Kalisitiane kehé ʻi he ngaahi fili naʻe fai ʻe Tīmoté.
Maʻu ʻAonga mei he Ngaahi Tākiekina Leleí
6. Ko e hā ʻa e akoʻi naʻe maʻu ʻe Tīmoté, pea naʻe anga-fēfē ʻene fakafeangai ki aí?
6 Naʻe tauhi hake ʻa Tīmote ʻi ha ʻapi naʻe māvahevahe fakalotu. Ko ʻene tamaí ko e Kalisi pea ko ʻene faʻeé, ʻa ʻIunisi mo ʻene kui fefine ko Loisí ko e ongo tupuʻi Siu. (Ngāue 16:1) Mei heʻene kei valevalé, naʻe akoʻi ʻe ʻIunisi mo Loisi kia Tīmote ʻa e ngaahi moʻoni mei he Ngaahi Konga Tohi Tapu Faka-Hepeluú. Hili ʻena ului ki he lotu faka-Kalisitiané, ʻoku pau naʻá na tokoni ke fakatuipauʻi ia ki he ngaahi akonaki faka-Kalisitiané. ʻOku hā mahino naʻe ngāueleleiʻaki ʻe Tīmote ʻa e teuʻi lelei ko iá. Naʻe hiki ʻe Paula: “ʻI heʻeku manatu ki he tui taʻeloi ʻoku ʻiate koe; ʻa e tui naʻe fua nofo ʻi hoʻo kui ko Loisi, pea mo hoʻo faʻe ko Iunisi; pea ʻoku ou falala ʻoku ʻiate koe foki.”—2 Timote 1:5.
7. Ko e hā ʻa e tāpuaki ʻoku maʻu ʻe he fānau tokolahi, pea ʻe ʻaonga fēfē eni kia kinautolu?
7 ʻI he ʻahó ni, ʻoku faitāpuekina ʻa e fānau tokolahi ʻaki ʻa e ongo mātuʻa mo e ngaahi kui manavahē-ʻOtua ʻa ia ʻi he hangē ko Loisi mo ʻIunisí, ʻoku nau ʻiloʻi ʻa e mahuʻinga ʻo e ngaahi taumuʻa fakalaumālié. Ko e fakatātaá, ʻoku kei manatuʻi pē ʻe Samira ʻa ʻene ngaahi pōtalanoa fuoloa mo ʻene ongo mātuʻá ʻi heʻene kei taʻu hongofulu tupú. ʻOkú ne pehē: “Naʻe akoʻi au ʻe he tangataʻeikí mo e fineʻeikí ke u maʻu ʻa e vakai ʻa Sihova ki he ngaahi meʻá pea ke u ʻai ʻa e ngāue fakamalangá ko e meʻa muʻomuʻa tahá ia. Naʻá na ueʻi maʻu pē au ke u tuli ki he ngāue taimi-kakató.” Naʻe tali lelei ʻe Samira ʻa e fakalototoʻa ʻa ʻene ongo mātuʻá pea ʻokú ne maʻu he taimí ni ʻa e monū ʻo e hoko ko ha mēmipa ʻo e fāmili Pēteli ʻi hono fonuá. Kapau ʻoku fakalototoʻaʻi koe ʻe hoʻo ongo mātuʻá ke ke tokangataha ki he ngaahi taumuʻa fakalaumālié, fakakaukau lelei ki heʻena faleʻí. Ko hona lotó ke ke aʻusia ʻa e lelei tahá.—Palovepi 1:5.
8. Naʻe anga-fēfē ʻa e maʻu ʻaonga ʻa Tīmote mei he feohi faka-Kalisitiane fakatupu langa haké?
8 ʻOku toe mahuʻinga foki ke ke kumi ki he ngaahi feohi fakatupu langa hake ʻi he fetokouaʻaki faka-Kalisitiané. Naʻe ʻiloʻi lelei ʻa Tīmote ʻe he kau mātuʻa Kalisitiane ʻi heʻene fakatahaʻangá pea ʻe he faʻahinga ʻi ʻAikoniumé, ʻa ia ʻoku fakafuofua ko e kilomita nai ʻe 30 hono mamaʻó. (Ngāue 16:1, 2) Naʻá ne fakatupulekina ʻa e kaungāmeʻa vāofi mo Paula, ko ha tangata longomoʻui. (Filipai 3:14) Ko e ngaahi tohi ʻa Paulá ʻoku hā mei ai naʻe tali lelei ʻe Tīmote ʻa e faleʻí pea naʻá ne muimui leva ki he ngaahi faʻifaʻitakiʻanga ʻo e tuí. (1 Kolinito 4:17; 1 Timote 4:6, 12-16) Naʻe tohi ʻe Paula: “Kuó ke muimui ofi ki heʻeku akonakí, mo e anga ʻeku moʻuí, mo ʻeku taumuʻá, mo e tuí, mo e kātaki fuoloá, mo e ʻofá mo e kātakí.” (2 Timote 3:10, NW) ʻIo, naʻe muimui ofi ʻa Tīmote ki he faʻifaʻitakiʻanga ʻa Paulá. ʻI he tuʻunga tatau, kapau te ke fakaofiofi ki he faʻahinga mālohi fakalaumālie tāutaha ʻi he fakatahaʻangá, ʻe tokoniʻi ai koe ke ke fakatupulekina ʻa e ngaahi taumuʻa fakalaumālie lelei.—2 Timote 2:20-22.
Ako ʻa e “Tohitapu”
9. Tuku kehe ʻa hono fili ʻo e ngaahi feohi totonú, ko e hā ʻa e meʻa te ke fai ke ‘teuʻi ai koe ki he taumuʻa ko e anga-līʻoa fakaʻotuá’?
9 Ko hono aʻusia ʻo e ngaahi taumuʻa fakalaumālié ʻe maʻu pē ia mei he ngaahi feohi totonú? ʻIkai. Hangē ko Tīmoté, ʻoku fiemaʻu ke ke ako fakamākukanga ʻa e “Tohitapu.” ʻE ʻikai nai ko e akó ʻa e meʻa ʻokú ke manako aí, ka ke manatuʻi naʻe pau kia Tīmote ke ne ‘teuʻi ia ki he taumuʻa ko e anga-līʻoa fakaʻotuá.’ Ko e kau sipotí ʻoku nau kīvoi ʻi he fakamālohisinó ʻi he ngaahi māhina lahi koeʻuhi ke aʻusia ʻa ʻenau taumuʻá. ʻI he tuʻunga meimei tatau, ko hono aʻusia ʻo e ngaahi taumuʻa fakalaumālié ʻoku fiemaʻu ki ai ʻa e feilaulau mo e feinga fakamātoato. (1 Timote 4:7, 8, 10) ‘Ka ʻe lava fēfē,’ ko haʻo ʻeke nai ia, ‘ke tokoniʻi au ʻe hono ako ʻo e Tohi Tapú ke u aʻusia ʻa ʻeku ngaahi taumuʻá?’ Tau vakai angé ki ha ngaahi founga ʻe tolu.
10, 11. Ko e hā ʻe ueʻi ai koe ʻe he Tohi Tapú ke ke aʻusia ʻa e ngaahi taumuʻa fakalaumālié? ʻOmai ha fakatātā.
10 ʻUluakí, ʻe ʻoatu ʻe he Tohi Tapú kiate koe ʻa e fakaueʻiloto totonu. ʻOkú ne fakahā mai ʻa e ʻulungāanga fakaʻofoʻofa ʻo ʻetau Tamai fakahēvaní, ʻa ʻene fakahāhā ʻa e ʻofa taupotu tahá kiate kitautolú pea mo e ngaahi tāpuaki taʻengata ʻoku tuku tauhi mai maʻa ʻene kau sevāniti faitōnungá. (Emosi 3:7; Sione 3:16; Loma 15:4) ʻI he tupulaki ʻa hoʻo ʻilo kia Sihová, ʻe pehē foki mo hoʻo ʻofa kiate ia pea mo hoʻo holi ke fakatapui ʻa hoʻo moʻuí kiate iá.
11 ʻOku pehē ʻe he kau talavou Kalisitiane tokolahi ko hono ako fakafoʻituitui maʻu pē ʻo e Tohi Tapú ko ha meʻa tefito ia kuó ne tokoniʻi kinautolu ke nau ʻai ʻa e moʻoní ko ʻenau meʻa. Ko e fakatātaá, naʻe tupu hake ʻa Adele ʻi ha ʻapi Kalisitiane ka naʻe ʻikai ʻaupito te ne fokotuʻu ʻe ia ha ngaahi taumuʻa fakalaumālie. ʻOkú ne pehē: “Naʻe ʻave au ʻe heʻeku ongo mātuʻá ki he Fale Fakatahaʻangá ka naʻe ʻikai te u fai ha ako fakafoʻituitui pe fanongo ʻi he ngaahi fakatahá.” ʻI he hili ʻa e papitaiso ʻa hono tokouá, naʻe kamata ai ke fakakaukau fakamātoato ange ʻa Adele ki he moʻoní. “Naʻe kamata ke u lau ʻa e Tohi Tapú kātoa. Naʻá ku lau ha konga siʻi peá u hikiʻi leva ha fakamatala ʻo fekauʻaki mo e meʻa naʻá ku toki ʻosi laú. ʻOku ou kei maʻu kotoa pē ʻa ʻeku ngaahi noutí. Naʻá ku lau ʻa e Tohi Tapú ʻi he taʻu ʻe taha.” Ko e olá, naʻe ueʻi ai heni ʻa Adele ke fakatapui ʻene moʻuí kia Sihova. Neongo ʻokú ne faingataʻaʻia lahi fakaesino, ʻokú ne hoko he taimí ni ko ha tāimuʻa, pe tokotaha ngāue fakaʻevangeliō taimi-kakato.
12, 13. (a) Ko e hā ʻa e ngaahi liliu ʻe tokoni ʻa e ako Tohi Tapú ke fai ʻe ha talavou, pea ʻe anga-fēfē? (e) ʻOmai ʻa e ngaahi fakatātā ʻo e poto ʻaonga ʻoku ʻi he Folofola ʻa e ʻOtuá.
12 Ko hono uá, ʻe tokoniʻi koe ʻe he Tohi Tapú ke ke fai ʻa e ngaahi liliu ʻoku fiemaʻu ʻi ho angaʻitangatá. Naʻe tala ange ʻe Paula kia Tīmote ko e “Tohitapu” ʻoku “ʻaonga foki ki he akonaki, ki he fakaʻilo hala, ki he fakatonutonu, ki he ngaohia ke maʻoniʻoni: koeʻuhiā ke tuʻu kakato ʻa e tangata fakaʻotua, kuo ʻosi sāuni ki he ngāue lelei fulipe.” (2 Timote 3:16, 17) ʻI he fakalaulauloto maʻu pē ki he ngaahi meʻa felāveʻi mo e Folofola ʻa e ʻOtuá pea ʻi hono ngāueʻaki ʻo e ngaahi tefitoʻi moʻoni Fakatohitapú, te ke fakaʻatā ai ʻa e laumālie ʻo e ʻOtuá ke ne fakaleleiʻi ʻa ho angaʻitangatá. Te ne fakatupu ʻiate koe ʻa e ngaahi ʻulungāanga ʻoku fiemaʻu hangē ko e anga-fakatōkilalo, kītaki, faʻa ngāue mo e ʻofa moʻoni ʻi he kaungā Kalisitiané. (1 Timote 4:15) Naʻe maʻu ʻe Tīmote ʻa e ngaahi ʻulungāanga ko ení, pea naʻá ne hoko ai ʻo ʻaonga kia Paula pea mo e ngaahi fakatahaʻanga naʻá ne ngāue aí.—Filipai 2:20-22.
13 Tolú, ko e Folofola ʻa e ʻOtuá ko e feleoko ia ʻo e poto ʻaongá. (Sāme 1:1-3; 19:7; 2 Timote 2:7; 3:15) Te ne tokoniʻi koe ke ke fili fakapotopoto ʻa ho ngaahi kaungāmeʻá, fili ʻa e fakafiefia ʻoku leleí pea mo fekuki mo e ngaahi pole taʻefaʻalaua kehe. (Senesi 34:1, 2; Sāme 119:37; 1 Kolinito 7:36) Ko hono fai he taimí ni ʻa e ngaahi fili fakapotopotó ʻoku mahuʻinga ia ki hoʻo aʻusia ʻa e ngaahi taumuʻa fakalaumālié.
“Tau ʻa e Tau Lelei”
14. Ko e hā ʻoku ʻikai ai ko e ʻalunga faingofua tahá ʻa e tuli ki he ngaahi taumuʻa fakalaumālié?
14 Ko hono fakamuʻomuʻa ʻa e ngaahi taumuʻa ʻoku fakalāngilangiʻi ai ʻa Sihová ko e ʻalunga lelei tahá ia ka ʻoku ʻikai foki ko e faingofua tahá ia. Ko e fakatātaá, ʻi he taimi ʻoku pau ai ke ke fili ha ngāue, te ke fetaulaki nai mo ha tenge lahi mei he ngaahi kāingá, toʻumeʻá pea mo e kau faiako ʻa ia ʻi he ʻuhinga lelei ʻoku nau tui ko ha ako māʻolunga ange pea mo ha ngāue fakatupu-paʻanga ʻa e ongo kī ki he lavameʻa mo e fiefia moʻoní. (Loma 12:2) ʻI he hangē ko Tīmoté, ʻe fiemaʻu ke ke “tau ʻa e tau lelei ʻo e tui” koeʻuhi ke ke “puke [ke maʻu] ki he moʻui taʻengata” ʻoku tuku tauhi atu ʻe Sihova maʻaú.—1 Timote 6:12; 2 Timote 3:12.
15. Ko e hā ʻa e fakafepaki ʻoku ngalingali naʻe fehangahangai mo Tīmoté?
15 ʻI he taimi ʻoku ʻikai loto ai ʻa e fāmili taʻetuí ki he fili ʻokú ke faí, ʻe malava ke toe mālohi ange ai ʻa e ʻahiʻahí. Ngalingali naʻe pau ke ikuʻi ʻe Tīmote ha fakafepaki pehē. Fakatatau ki he maʻuʻanga fakamatala ʻe taha, ngalingali ko e fāmili ʻo Tīmoté “naʻa nau kau ki he kalasi tuʻumālie mo ako leleí.” ʻOku pau pē ne ʻamanekina ia ʻe heʻene tamaí ke ne kumi ki ha ako māʻolunga ange pea ke ne hoko atu ha pisinisi ʻa e fāmilí.a Fakaʻuta atu ki he tali ne mei fai ʻe he tamai ʻa Tīmoté ʻi heʻene ʻiloʻi naʻe fili ʻe Tīmote ʻa e tuʻunga fakatuʻutāmaki mo e ngaahi tuʻunga taʻepau fakapaʻanga ʻo e ngāue fakamisinale mo Paulá!
16. Naʻe anga-fēfē ʻa e fekuki ʻa e talavou ʻe taha mo e fakafepaki mei he mātuʻá?
16 ʻOku fehangahangai ʻa e kau talavou Kalisitiane ʻi he ʻaho ní mo e ngaahi pole meimei tatau. Ko e manatu eni ʻa Matthew, ʻa ia ʻoku ngāue ʻi he ʻōfisi vaʻa ʻo e Kau Fakamoʻoni ʻa Sihová: “ʻI he taimi naʻá ku kamata ngāue tāimuʻa aí, naʻe loto-mamahi lahi ʻaupito ʻa ʻeku tamaí. Naʻá ne ongoʻi naʻe ‘mole noa’ ʻa ʻeku akó ʻi heʻeku fai ha ngāue olo ʻuli ke tokoniʻi au ʻi heʻeku ngāue fakafaifekaú. Naʻá ne lumolumaʻi au, ʻo ne fakamanatu mai ʻa e meʻa lahi naʻe lava ke u maʻu kapau naʻá ku maʻu ha ngāue taimi-kakato.” Naʻe anga-fēfē ʻa e fekuki ʻa Matthew mo e fakafepaki ko iá? “Naʻá ku fai pau ki heʻeku taimi lau Tohi Tapú peá u lotu maʻu pē, tautefito ʻi he ngaahi mōmeniti ʻa ia ne faingofua ai ke mole ʻa ʻeku mapuleʻi-kitá.” Ko e loto-fakapapau ʻa Matthew ne fakapaleʻi. ʻI he faai atu ʻa e taimí naʻe lelei ange ʻa hono vahaʻangatae mo ʻene tamaí. Kuó ne toe ofi ange ai foki kia Sihova. ʻOkú ne pehē: “Kuó u mamata ki he tokonaki, fakalototoʻa mo e maluʻi au ʻe Sihova mei he ngaahi fili koví. Naʻe ʻikai ke u mei aʻusia ha taha ʻo e ngaahi meʻá ni kapau naʻe ʻikai te u kakapa atu ki he ngaahi taumuʻa fakalaumālié.”
Tokanga ki he Ngaahi Taumuʻa Fakalaumālié
17. ʻE anga-fēfē nai hono fakalotosiʻi fāinoa ʻe he niʻihi ʻa e faʻahinga ʻoku nau palani ke hū ki he ngāue taimi-kakató? (Mātiu 16:22)
17 Ko ha fakalotosiʻi fāinoa ki hoʻo tuli ki he ngaahi taumuʻa fakalaumālié ʻe aʻu nai ʻo haʻu ia mei he kaungātuí. ʻE pehē nai ʻe he niʻihi: ‘Ko e hā ke tāimuʻa aí? ʻE lava ke ke maʻu ha moʻui anga-maheni pea kei kau pē ʻi he ngāue fakamalangá. Kumi ha ngāue lelei pea fakapapauʻi ʻa hoʻo malu fakapaʻangá.’ ʻE hangē nai eni ha faleʻi ʻaongá, ka te ke teuʻi moʻoni koe ki he taumuʻa ko e anga-līʻoa fakaʻotuá kapau naʻá ke muimui ai?
18, 19. (a) ʻE lava fēfē ke ke tauhi maʻu ʻa hoʻo tokangá ʻi he ngaahi taumuʻa fakalaumālié? (e) Fakamatalaʻi ʻa e ngaahi feilaulau ʻokú ke fai ʻi he tuʻunga ko ha talavou koeʻuhi ko e Puleʻangá.
18 ʻOku hā ngali naʻe maʻu ʻe he kau Kalisitiane ʻe niʻihi ʻi he taimi ʻo Tīmoté ʻa e ngaahi fakakaukau meimei tatau. (1 Timote 6:17) Ke tokoniʻi ʻa Tīmote ke tauhi maʻu ʻa ʻene tokangá ʻi he ngaahi taumuʻa fakalaumālié, naʻe fakalototoʻaʻi ia ʻe Paula ʻaki ʻene pehē: “Ka ko ha sotia ʻoku moʻua ʻi he tau, talaʻehai te ne tuku ke ne fihia ʻi he ngaahi moʻua ʻo e moʻui ni, koeʻuhi ke hohóʻia ʻiate ia ʻa e ʻeiki naʻe fokotuʻu ia ki he tau.” (2 Timote 2:4) Ko ha sōtia ʻoku lolotonga faifatongia ʻoku ʻikai lava ke fakahohaʻasi ia ʻe he ngaahi meʻa ʻoku ʻikai fekauʻaki mo e taú. Ko ʻene moʻuí pea mo e moʻui ʻa e niʻihi kehé ʻoku fakatuʻunga ia ʻi heʻene mateuteu maʻu pē ke fakahoko ʻa e ngaahi tuʻutuʻuni ʻa hono pulé. ʻI he tuʻunga ko ha sōtia ʻi he malumalu ʻo Kalaisí, kuo pau ke pehē pē ʻa e huʻufataha ʻa ho ʻatamaí pea fakaʻehiʻehi mei he hoko ʻo fihia ʻi he ngaahi meʻa fakamatelie ʻoku ʻikai fiemaʻu ʻa ia ʻe malava ke ne taʻofi koe mei hoʻo fakahoko kakato ʻa hoʻo ngāue fakafaifekau fakahaofi moʻuí.—Mātiu 6:24; 1 Timote 4:16; 2 Timote 4:2, 5.
19 ʻI he ʻikai ke ʻai ha moʻui faingofua ko hoʻo taumuʻá ia, fakatupulekina ha laumālie feilaulauʻi-kita. “Mateuteu ke moʻui ʻo ʻikai ʻi he ngaahi tuʻunga fiemālie ʻo e moʻuí, ʻi he tuʻunga ko e taha ʻo e kau tau ʻa Kalaisi Sīsuú.” (2 Timote 2:3, The English Bible in Basic English) ʻI he takanga mo Paulá, naʻe ako ai ʻe Tīmote ʻa e fakapulipuli ʻo e hoko ʻo fiemālie naʻa mo e ʻi he ngaahi tuʻunga faingataʻa tahá. (Filipai 4:11, 12; 1 Timote 6:6-8) ʻE malava ke ke fai ʻa e meʻa tatau. ʻOkú ke loto-lelei ke fai ha ngaahi feilaulau koeʻuhi ko e Puleʻangá?
Tāpuaki he Taimí Ni pea ʻi he Kahaʻú
20, 21. (a) Fakamatalaʻi ʻa e niʻihi ʻo e ngaahi tāpuaki ʻoku hoko mai ʻi he tuli ki he ngaahi taumuʻa fakalaumālié. (e) Ko e hā ʻokú ke fakapapauʻi ke faí?
20 Ko e taʻu nai ʻe 15 naʻe ngāue ai ʻa Tīmote mo Paulá. Naʻe fakamoʻoni tonu ʻa Tīmote ki hono fokotuʻu ʻo e ngaahi fakatahaʻanga foʻoú ʻi he mafola ʻa e ongoongo leleí ki he meimei kotoa ʻo e feituʻu fakatokelau ʻo e Metiteleniané. Ko ʻene moʻuí naʻe fakafiefia mo fakafiemālie ange ʻi ha meʻa pē kapau naʻá ne fili ki ha moʻui “anga-maheni.” ʻI he tuli ki he ngaahi taumuʻa fakalaumālié, te ke utu ai ʻe koe foki ʻa e ngaahi tāpuaki fakalaumālie ʻoku ʻikai ala fakatataua hono mahuʻingá. Te ke ofi ai kia Sihova pea maʻu ʻa e ʻofa mo e tokaʻi ʻa e kaungā Kalisitiané. Te ke maʻu ʻo ʻikai ko e mamahi mo e feifeitamaki ko e ola ʻo e tuli ki he koloa fakamatelié, ka ko e fiefia moʻoni ʻoku hoko mai ʻi he foaki taʻesiokitá. Ko e meʻa mahuʻinga tahá, te ke “puke [maʻu ai] ki he moʻui moʻoni”—ko e moʻui taʻengata ʻi ha māmani palataisi.—1 Timote 6:9, 10, 17-19; Ngāue 20:35.
21 Ko ia kapau kuo teʻeki ai ke ke fai eni, ʻoku mau fakalototoʻaʻi loto-māfana atu koe ke ke kamata teuʻi leva koe ki he taumuʻa ko e anga-līʻoa fakaʻotuá. Fakaofiofi ki he faʻahinga ʻi he fakatahaʻangá ʻa ia ʻe lava ke nau tokoniʻi koe ke ke kakapa atu ki he ngaahi taumuʻa fakalaumālié, pea kumi ki heʻenau tatakí. ʻAi ʻa e ako fakafoʻituitui maʻu pē ʻo e Folofola ʻa e ʻOtuá ko ha meʻa ia ke muʻomuʻa. Fakapapauʻi ke talitekeʻi ʻa e laumālie fakamatelie ʻo e māmani ko ení. Pea manatuʻi maʻu pē ko e ʻOtua “ʻa ia ʻoku ne ʻomi ʻa e meʻa kehekehe ʻo fuʻu lahi, maʻatau fiemalie pe” ʻokú ne talaʻofa atu kiate koe ʻe malava ke ke maʻu ʻa e ngaahi tāpuaki lahi he taimí ni pea ʻi he kahaʻú ʻo kapau te ke fili ʻa e ngaahi taumuʻa ʻoku fakalāngilangiʻi ai iá.—1 Timote 6:17.
[Fakamatala ʻi lalo]
a Ko e sōsaieti Kalisí naʻa nau fakamahuʻingaʻi lahi ʻa e akó. Naʻe tohi ʻe Plutarch ko ha tokotaha naʻe toʻutangata taha mo Tīmote: “Ke maʻu ha ako totonu ʻa e matavai mo e aka ʻo e lelei kotoa pē. . . . Ko e meʻá ni ʻoku ou pehē, ʻoku taki atu mo tokoni ki he tuʻunga lelei taha fakaeʻulungāangá pea ki he fiefiá. . . . Ko e ngaahi ʻaonga kehé kotoa ʻoku vaivai, mo ʻikai loko mahuʻinga pea ʻoku ʻikai tuha ia mo ʻetau tokanga fakamātoató.”—Moralia, I, “The Education of Children.”
ʻOkú Ke Manatuʻi?
• Ko fē ʻe malava ke maʻu ai ʻe he kau talavoú ʻa e tokoni ke kakapa atu ki he ngaahi taumuʻa fakalaumālié?
• Ko e hā ʻoku mātuʻaki mahuʻinga ai ʻa e ako Tohi Tapu fakamākukangá?
• ʻE lava fēfē ke talitekeʻi ʻe he kau talavoú ʻa e tākiekina fakamatelie ʻo e māmani ko ení?
• Ko e hā ʻa e ngaahi tāpuaki ʻoku hoko mai ʻi he kumi ki he ngaahi taumuʻa fakalaumālié?
[Fakatātā ʻi he peesi 24]
Naʻe tuli ʻa Tīmote ki he ngaahi taumuʻa lelei
[Fakatātā ʻi he peesi 25]
Ko e hā ʻa e ngaahi tākiekina lelei naʻá ne tokoniʻi ʻa Tīmoté?
[Fakatātā ʻi he peesi 26]
ʻOkú ke kakapa atu ki ha ngaahi taumuʻa fakalaumālie?