Tauhi Maʻu Hoʻo Ongoʻi ʻo e Fakavavevavé

“Malangaʻi ʻa e folofolá, fai fakavavevave ia.”​—2 TĪM. 4:2.

ʻE LAVA KE KE FAKAMATALAʻI?

Ko e hā naʻe malanga ai ʻa e kau Kalisitiane ʻi he ʻuluaki senitulí fakataha mo e ongoʻi ʻo e fakavavevavé?

ʻE lava fēfē ke tau tauhi maʻu ʻetau ongoʻi ʻo e fakavavevavé?

Ko e hā ʻoku fakavavevave ange ai he taimí ni ʻi ha toe taimi ʻa hono malangaʻi ʻo e Puleʻangá?

1, 2. Ko e hā ʻa e ongo fehuʻi ʻoku malanga hake fekauʻaki mo e fekau ke ‘fai fakavavevave ʻetau malangá’?

KO E kakai ʻa ia ko ʻenau ngāué ia ko e fakahaofi moʻuí ʻoku nau faʻa ngāue fakataha mo ha ongoʻi ʻo e fakavavevave. Ko e fakatātaá, ko e kau tāmate afí ʻoku nau faʻa fakatovave ki ha fiemaʻu fakavavevave; ʻoku nau ʻiloʻi ʻoku ʻi ha tuʻunga fakatuʻutāmaki nai ha ngaahi moʻui.

² ʻI he tuʻunga ko e Kau Fakamoʻoni ʻa Sihová, ʻoku tau ʻamanaki ke tokoniʻi ʻa e kakaí ke nau hao. Ki he taumuʻa ko iá, ʻoku tau fakakaukau fakamātoato ai ki he fekau kuo ʻomai ke tau malangaʻi ʻa e ongoongo lelei ʻo e Puleʻangá. Ko e moʻoni, ʻoku ʻikai ke tau fakavave feifeingavale holo. Ko e hā leva ʻa e ʻuhinga ʻa e ʻapositolo ko Paulá ʻi heʻene ʻomai ʻa e ekinaki: “Malangaʻi ʻa e folofolá, fai fakavavevave ia”? (2 Tīm. 4:2) ʻE lava fēfē ke tau malanga fakataha mo e ongoʻi ʻo e fakavavevavé? Pea ko e hā ʻoku mātuʻaki fakavavevave ai ʻetau ngāué?

KO E HĀ ʻOKU FIEMAʻU FAKAVAVEVAVE AI ʻETAU MALANGÁ?

 3. Ko hono tali pe talitekeʻi ʻe he kakaí ʻa e pōpoaki ʻo e Puleʻangá ʻe lava ke ne ʻomai ʻa e ngaahi ola ko e hā?

³ ʻI hoʻo fakakaukau atu ko ia ki he meʻa ʻe hoko ʻo maʻu pe mole ko ha ola ia ʻo ʻetau malangá, te ke ongoʻi nai ai ha fiemaʻu fakavavevave ke lea ki he niʻihi kehé fekauʻaki mo e ongoongo leleí. (Loma 10:13, 14) ʻOku pehē ʻe he Folofola ʻa e ʻOtuá: “Kau ka tala ki he angahala, Te ke matuʻaki mate; ka ʻoka ne ka tafoki mei heʻene angahala ko é, ʻo ne fai ki he lao mo e totonu; . . . ʻe matuʻaki moʻui, ʻe ʻikai mate. ʻE ʻikai lau kiate ia ha taha ʻo e ngaahi angahala kuo ne fai.” (ʻIsi. 33:14-16) Ko e moʻoni, ʻoku tala ʻe he Tohi Tapú ki he faʻahinga ko ia ʻoku nau akoʻi ʻa e pōpoaki ʻo e Puleʻangá: “Te ke fakatou fakahaofi ai koe mo e faʻahinga ko ia ʻoku nau fanongo atu kiate koé.”—1 Tīm. 4:16; ʻIsi. 3:17-21.

 4. Ko e hā naʻe ʻai ai ʻe he tafoki ʻo fakafepaki ki he moʻoní ʻa e malanga ʻi he ʻuluaki senitulí ke fiemaʻu fakavavevavé?

⁴ Ke mahinoʻi ʻa e ʻuhinga naʻe ekinaki ai ʻa Paula kia Tīmote ke ne malanga fakataha mo e ongoʻi ʻo e fakavavevavé, fakakaukau atu ki he potutohi ʻe niʻihi ʻo e konga Tohi Tapu ʻetau kaveingá. ʻOku tau lau: “Malangaʻi ʻa e folofolá, fai fakavavevave ia ʻi he ngaahi taimi faingamālie mo e ngaahi taimi faingataʻa, valoki, fakatokanga mālohi, enginaki, ʻaki ʻa e anga-kātaki fakaʻaufuli mo e pōtoʻi fakafaiako. He ʻe ʻi ai ha vahaʻa taimi ʻa ia heʻikai te nau kātakiʻi ai ʻa e akonaki fakatupu moʻuí, ka, ʻi he fakatatau ki heʻenau ngaahi holi ʻanautolú, te nau fokotuʻutuʻu takatakai kiate kinautolu ha kau faiako ke nau fanongo ai ki he meʻa ʻoku ongo lelei ki honau telingá. Te nau fulituʻa mei he fanongo ki he moʻoní.” (2 Tīm. 4:2-4) Naʻe tomuʻa tala ʻe Sīsū ʻe tupulekina ha tafoki ʻo fakafepaki ki he moʻoní. (Māt. 13:24, 25, 38) ʻI he fakaofiofi mai ʻa e tupulekina ʻo e meʻa ko iá, naʻe fiemaʻu fakavavevave ai kia Tīmote ke ne “malangaʻi ʻa e folofolá” naʻa mo e ʻi loto ʻi he fakatahaʻangá koeʻuhí ke ʻoua ʻe takihalaʻi ʻa e kau Kalisitiané ʻe he matamatalelei kākā ʻa e ngaahi akonaki loí. Ko e ngaahi moʻuí naʻe ʻi he tuʻunga fakatuʻutāmaki. Fēfē nai ʻa e ʻahó ni?

5, 6. ʻE lava ke tau fetaulaki mo e ngaahi fakakaukau manakoa ko e hā ʻi heʻetau ngāue fakafaifekaú?

⁵ Ko e tafoki mei he lotu moʻoní ʻo fakafepaki ki aí kuo tupulaki ia ʻo mafola he taimí ni. (2 Tes. 2:3, 8) Ko e hā ʻa e ngaahi akonaki ʻoku ongo lelei ki he telinga ʻo e kakai he ʻaho ní? ʻI he ngaahi feituʻu lahi, ko e akonaki ʻo e ʻevalūsioó kuo pouaki ia ʻaki ʻa e faivelenga fakalotu lahi fakaʻulia. Neongo ʻoku angamaheniʻaki hono fakahaaʻi ʻa e ʻevalūsioó ko ha tuʻunga fakasaienisi ia, kuo ʻosi meimei hoko ia ko ha lotu fakamāmani, ʻo ne uesia ʻa e anga ʻo e fakakaukau ʻa e kakaí ki he ʻOtuá mo e niʻihi kehé. Ko ha toe akonaki manakoa ʻe taha ko e pehē ko ia ʻoku ʻikai ke mahuʻingaʻia ʻa e ʻOtuá ʻiate kitautolú; ko ia ʻoku ʻikai fiemaʻu ai ke tau mahuʻingaʻia ʻiate ia. Ko e hā ʻoku mātuʻaki manakoa ai ʻa e ongo akonaki ko ení ʻo na fakamohemoheʻi ai ʻa e laui miliona ke nau hoko ʻo mohe fakalaumālié? ʻOkú na ʻomai fakatouʻosi ʻa e pōpoaki tefito, ‘ʻE lava ke ke fai ha meʻa pē ʻokú ke loto ki aí koeʻuhí heʻikai fiemaʻu ia ke ke fai ha fakamatala kiate ia.’ Ko ha pōpoaki eni kuo ongo lelei moʻoni ia ki he telinga ʻo e tokolahi.—Lau ʻa e Saame 10:4.

⁶ Ka ʻoku ʻi ai mo e ngaahi founga kehe ʻoku ongo lelei ki he telinga ʻo e kakaí. Ko e niʻihi ʻoku nau kei ō ki he lotú ʻoku nau saiʻia ke maʻu ha kau faiako ʻa ia ʻoku nau tala ange kiate kinautolu, ‘Tatau ai pē pe ko e hā ʻa e meʻa ʻokú ke faí, ʻoku ʻofa ʻa e ʻOtuá ʻiate koe.’ Ko e kau pātelé mo e kau faifekaú ʻoku nau ʻai ke ongo lelei ki he telinga ʻo e niʻihi kehé ʻaki ʻenau fakatuipauʻi kiate kinautolu ko e ngaahi ouaú, ngaahi Misá, ngaahi kātoanga fakafiefiá, mo e ngaahi ʻīmisí ʻoku nau maʻu ai ʻa e tāpuaki ʻa e ʻOtuá. ʻOku siʻi hono ʻiloʻi ʻe he kau maʻu lotu ko ení ʻa e fakatuʻutāmaki ʻo e tuʻunga ʻoku nau ʻi aí. (Saame 115:4-8) Neongo ia, kapau ʻe lava ke tau fakaʻaaki fakalaumālie kinautolu koeʻuhí ke nau mahinoʻi ʻa e pōpoaki moʻoni ʻa e Tohi Tapú, ʻe lava ke nau maʻu ʻaonga ai mei he Puleʻanga ʻo e ʻOtuá.

KO E HĀ ʻA E ʻUHINGA ʻO E MALANGA FAKATAHA MO E ONGOʻI ʻO E FAKAVAVEVAVÉ?

 7. ʻE lava fēfē ke tau fakahāhā ʻetau ongoʻi ʻo e fakavavevavé?

⁷ Ko ha toketā tafa fakamākukanga kuo pau ke ne fai ha tokanga tāfataha ki heʻene ngāué koeʻuhí ko e ngaahi moʻuí ʻoku ʻi he tuʻunga fakatuʻutāmaki. ʻI heʻetau ngāue fakafaifekau faka-Kalisitiané, ʻe lava ke tau fakahāhā ai ha ongoʻi ʻo e fakavavevavé ʻaki ʻa e tokangataha ki heʻetau ngāué, ʻo hangē ko e fakakaukau fekauʻaki mo e ngaahi ʻīsiu, ngaahi fehuʻi, pe ko e fakamatala ʻe lava ke mahuʻingaʻia ai ʻa e kakai ʻoku tau fetaulaki mo iá. Ko ha ongoʻi ʻo e fakavavevavé ʻe toe lava ke tataki ai kitautolu ke tau feʻunuʻaki ʻetau taimi-tēpilé koeʻuhí ke tau ʻaʻahi ai ki he kakaí ʻi he taimi ʻoku nau hehema ange ai ke tali kitautolú.—Loma 1:15, 16; 1 Tīm. 4:16.

 8. Ko e hā ʻoku faʻa kau ki he ngāue fakataha mo e ongoʻi ʻo e fakavavevavé?

⁸ Ko hono maʻu ha ongoʻi ʻo e fakavavevavé ʻoku toe kau ki ai ʻa hono fokotuʻu ʻo e ngaahi meʻa ke fakamuʻomuʻá. (Lau ʻa e Sēnesi 19:15.) Ko e fakatātaá, tau pehē pē ʻi he hili hono maʻu mai ʻa e ngaahi ola ʻo ha sivi naʻe fai kiate koe, ʻoku ui koe ʻe hoʻo toketaá ki hono ʻōfisí ʻo ne tala atu fakamātoato kiate koe: “Sio mai! Ko ho tuʻungá ʻoku fakavavevave. Ko e lōloa taha ʻo e taimi ʻokú ke maʻú ko ha māhina pē ʻe taha ke ke fai ai ha meʻa fekauʻaki mo ho puké.” ʻOku ngalingali pē heʻikai te ke fakavave koe ki tuʻa mei hono ʻōfisí ʻo hangē ha tangata tāmate afi ʻoku ʻalu ki ha fiemaʻu fakavavevavé. Ka te ke tatali nai ke maʻu mai ʻene ngaahi faleʻí, peá ke ʻalu ki ʻapi ʻo fai ha fakakaukau fakamātoato ki he ngaahi meʻa ke ke fakamuʻomuʻá.

 9. Ko e hā ʻoku lava ai ke tau pehē naʻe malanga ʻa Paula fakataha mo e ongoʻi ʻo e fakavavevavé lolotonga ʻa ʻene ʻi ʻEfesoó?

⁹ ʻE lava ke tau maʻu ʻa e vavanga ki he ongoʻi fakavavevave ʻa Paulá ʻaki ʻa e tokanga ki he meʻa naʻá ne tala ki he kau mātuʻa mei ʻEfesoó ʻo fekauʻaki mo ʻene malangaʻi ʻa e ongoongo leleí ʻi he vahefonua ko ʻĒsiá. (Lau ʻa e Ngāue 20:18-21.) ʻOku ngalingali mei he ʻuluaki ʻaho naʻá ne aʻu atu aí, naʻá ne femoʻuekina ʻi he ʻaʻahi ki he kakaí mei he fale ki he fale mo e ongoongo leleí. Tānaki atu ki ai, naʻá ne muimui ʻi he taʻu ʻe ua ʻi ha taimi-tēpile tuʻumaʻu ʻi hono “fai fakaʻaho ha ngaahi malanga ʻi he holo ʻo e ʻapiako ʻo Tilanusí.” (Ngā. 19:1, 8-10) ʻOku hā mahino, ko e ongoʻi fakavavevave ʻa Paulá naʻá ne tākiekina ʻa e meʻa ke ne fai tuʻumaʻú. Ko e fiemaʻu ke ‘fai fakavavevave ʻetau ngāue fakafaifekaú’ ʻoku ʻikai fakataumuʻa iá ke lōmekina kitautolu ʻaki ʻa e fekau ko iá. Neongo ia, ʻoku totonu ke hoko ʻa e ngāue fakamalangá ko ha meʻa muʻomuʻa ia ʻi heʻetau moʻuí.

10. Ko e hā ʻoku lava ai ke tau fiefia ʻi he ngāue fakavavevave ʻa e kau Kalisitiané ʻi he meimei taʻu ʻe 100 kuohilí?

¹⁰ Ko e faʻifaʻitakiʻanga ʻa ha kiʻi kulupu ʻo e Kau Ako Tohi Tapú ʻa ia naʻa nau kamata ki muʻa ʻi he 1914 ke malangaʻi ʻa e ongoongo leleí, ʻoku fakatātaaʻi ai ʻa e ʻuhinga ke maʻu ai ha ongoʻi ʻo e fakavavevavé. Neongo ko honau tokolahí ko ha kiʻi laui afe pē, naʻa nau mahinoʻi ʻa e fakavavevave ʻo e taimí pea nau fai ʻi he faivelenga ʻa e ngāue malangaʻi ʻo e Puleʻangá. Naʻa nau ʻai ʻo pulusi ʻa e ngaahi malanga ʻi he nusipepa ʻe lauingeau pea hulu ha polokalama silaiti mo e faiva naʻe ui ko e “Tulama-ʻAta ʻo e Fakatupú.” ʻI he founga ko ení, naʻa nau aʻu ai ki he laui miliona mo e ongoongo leleí. Kapau naʻe ʻikai te nau maʻu ha ongoʻi ʻo e fakavavevavé, ko e toko fiha nai ʻo kitautolu naʻa tau mei fanongo ʻi he pōpoaki ʻo e Puleʻangá?—Lau ʻa e Saame 119:60.

TOKANGA NAʻA MOLE HOʻO ONGOʻI ʻO E FAKAVAVEVAVÉ

11. Ko e hā kuó ne taki atu ʻa e niʻihi ke mole ʻenau ongoʻi ʻo e fakavavevavé?

¹¹ Ko e ngaahi fakahohaʻá ʻe lava ke ne taʻofi ai ha taha mei heʻene fakakaukau fekauʻaki mo e mahuʻinga ko ia ʻa e ngāue fakamalangá. Kuo faʻufaʻu ʻa e fokotuʻutuʻu ʻa Sētané ke ʻai kitautolu ke tau nōfoʻi ʻi he ngaahi ngāue fakafoʻituituí mo e ngaahi ʻīsiu kehé. (1 Pita 5:8; 1 Sione 2:15-17) Ko e niʻihi ʻa ia naʻa nau fakamuʻomuʻa ʻi ha taimi ʻa e ngāue ʻa Sihová kuo mole ʻenau ongoʻi ʻo e fakavavevavé. Hangē ko ení, ko e Kalisitiane ko Tīmasi ʻi he ʻuluaki senitulí naʻá ne hoko ko ha ‘kaungāngāue’ ʻo Paula, ka naʻe hoko ʻo fakahohaʻasi ia ʻe he fokotuʻutuʻu anga-taʻefakaʻotua ʻo e taimi ko iá. ʻI he ʻikai ke ne hokohoko atu ʻa e fakamuʻomuʻa ʻa hono fakaivimālohiʻi ʻa hono tokouá ʻi ha taimi ʻo e faingataʻá, naʻe liʻaki ʻe Tīmasi ia ʻa Paula.—Flm. 23, 24; 2 Tīm. 4:10.

12. Ko e hā ʻa e faingamālie ʻoku fakaava mai he taimi ní, pea ko e hā ʻa e ngaahi faingamālie ʻe fakaava mai maʻatautolu ʻo taʻengatá?

¹² Kapau ʻoku fiemaʻu ke tau tauhi maʻu ʻetau ongoʻi ʻo e fakavavevavé, ʻoku fiemaʻu ke tau tauʻi ʻa e holi ke maʻu ha meʻa lahi ange mei he meʻa ʻoku tuʻuaki mai ʻe he moʻui ko ení. ʻOku totonu ke tau ngāue ke “piki maʻu ki he moʻui moʻoní.” (1 Tīm. 6:18, 19) ʻOku pau pē ʻoku ʻikai haʻo veiveiua ko e moʻui taʻengata ʻi he māmaní he malumalu ʻo e Puleʻanga ʻo e ʻOtuá ʻe ʻoatu ai kiate koe ʻa e ngaahi faingamālie taʻefaʻalaua ke ke fiefia ʻi hono fai ha ngaahi meʻa fakamānako. Ka ʻi he taimi ní, ko e faingamālie ke tokoniʻi ʻa e niʻihi kehé ke nau hao moʻui atu ʻi ʻĀmaketoné ʻoku makehe ia ʻi hotau taimí.

13. ʻI heʻetau hoko he taimí ni ko e kau Kalisitiané, ʻe lava fēfē ke tau tauhi maʻu ʻetau ongoʻi ʻo e fakavavevavé?

¹³ Koeʻuhí ko e tokolahi taha ʻi he māmani takatakai ʻiate kitautolú ʻoku nau mohe taʻefakapotopoto ʻi ha ʻuhinga fakalaumālié, ko e hā ʻe lava ke ne tokoniʻi kitautolu ke tau fakaʻehiʻehi ai mei he mole ʻa ʻetau ongoʻi ʻo e fakavavevavé? ʻE lava ke tau fakakaukau ki he moʻoniʻi meʻa ko ia ko kitautolú, hangē ko e laú, naʻe ʻi ai ʻa e taimi naʻa tau mohe ai ʻi he fakapoʻulí. Ka naʻe fakaʻaaki kitautolu, pea kuo ulo mai ʻa Kalaisi kiate kitautolu, ʻo hangē ko ia naʻe fakahaaʻi ʻe Paulá. ʻOku tau maʻu he taimí ni ʻa e monū ko e hoko ko e kau toʻo maama. (Lau ʻa e ʻEfesō 5:14.) Hili ʻa e lave ki aí, naʻe tohi ʻe Paula: “Mou mātuʻaki tokanga maʻu pē ki he anga hoʻomou laká ke ʻoua ʻe hoko ko e faʻahinga taʻefakapotopoto kae hoko ko e faʻahinga ʻoku fakapotopoto, ʻo ngāue lelei taha ʻaki ho taimí, koeʻuhí ʻoku fulikivanu ʻa e ngaahi ʻahó.” (ʻEf. 5:15, 16) ʻI he lolotonga ʻa e tuʻunga fulikivanu ko iá, tau ‘ngāue lelei taha ʻaki hotau taimí’ ki he ngaahi meʻa ʻa ia ʻe lava ke ne tauhi kitautolu ke tau ʻāʻā fakalaumālié.

ʻOKU TAU MOʻUI ʻI HE NGAAHI TAIMI MAHUʻINGA

14-16. Ko e hā ʻokú ne ʻai ʻa e malangaʻi ʻo e Puleʻangá ke toe fiemaʻu fakavavevave ange ia he taimí ni ʻi ha toe taimí?

¹⁴ Ko e ngāue fakafaifekau faka-Kalisitiané kuo fai fakavavevave maʻu pē ia, ka ʻi he taimi ní ʻoku toe fakavavevave ange ia ʻi ha toe taimi. Talu mei he 1914, kuo hoko ʻo māʻalaʻala ʻa e fakaʻilonga tuifio kuo fakamatalaʻi ʻi he Folofola ʻa e ʻOtuá. (Māt. 24:3-51) Ko e hao moʻui atu ko ia ʻa e faʻahinga ʻo e tangatá ʻoku ʻi ha tuʻunga fakatuʻutāmaki lahi ange ia ʻi ha toe taimi ki muʻa. Neongo ʻa e ngaahi aleapau ki mui ní, ko e ngaahi puleʻanga mālohí ʻoku nau kei maʻu pē ʻa e ngaahi mahafu ʻātomi ʻe 2,000 ʻa ia ʻoku mateuteu ke tukuange mai. ʻOku līpooti ʻe he kau maʻu mafaí ha ngaahi keisi ʻe lauingeau ʻo e “mole” ʻa e ngaahi meʻatau ʻātomí. ʻOku maʻu nai ha niʻihi ʻo e ngaahi meʻatau ko iá ʻe he kau tautoitoí? ʻOku pehē ʻe he faʻahinga ʻoku nau siofi iá ʻe lavangofua pē ke fakaʻauha ʻosi ʻa e faʻahinga ʻo e tangatá ʻe ha tau ʻe kamataʻi ʻe ha tokotaha tautoitoi. Kae kehe, ko e taú ʻoku ʻikai ko e fakamanamana pē ia ʻe taha ki he ʻi ai ko ia ʻa e tangatá.

¹⁵ “Ko e feliliuaki ʻa e ʻeá ko e fakamanamana fakamāmanilahi lahi taha ia ʻo e senituli hono 21,” ko e taukaveʻi ia ʻa ha līpooti he 2009 naʻe fai ʻe he The Lancet mo e ʻApiako ʻUnivēsiti Lonitoní. Naʻe pehē ai: “Ko e ngaahi nunuʻa ki he moʻuí ʻi he feliliuaki ʻa e ʻeá ʻe uesia ai ʻa e tokolahi taha ʻo e kakaí ʻi he ngaahi hongofuluʻi taʻu hoko maí pea ʻai ai ʻa e moʻui mo e tuʻunga lelei ʻo e kakai ʻe laui piliona ke ʻi ha fakatuʻutāmaki fakautuutu.” Ko e nunuʻa ʻe lava ke hokó ko e ʻauha mafolalahia tupu mei he ʻalu ke toe māʻolunga ange ʻa e lēvolo ʻo e tahí, ngaahi vahaʻa taimi laʻalaʻaá, ngaahi tāfeá, ngaahi toʻu mahakí, ngaahi afā, mo e ngaahi tau ke maʻu ʻa e ngaahi koloa ʻoku fakaʻau ke ʻosí. ʻIo, ko e ngaahi taú mo e ngaahi fakatamakí ʻoku nau fakamanamanaʻi ʻa e sōsaieti ʻo e faʻahinga ʻo e tangatá.

¹⁶ ʻE fakakaukau nai ʻa e kakai ʻe niʻihi ko e fakamanamana ʻo e tau ʻātomí ʻe lava ke taki atu ia ki he ngaahi meʻa ʻe fakahoko ai ʻa e “fakaʻilonga.” Kae kehe, ko e tokolahi tahá ʻoku ʻikai te nau mahinoʻi ʻa e ʻuhinga moʻoni ʻo e fakaʻilongá. Kuo hā mai ia ʻi he laui hongofuluʻi taʻu he taimí ni, ʻa ia ko e moʻoniʻi meʻa ko iá ʻoku fakahaaʻi ai ko e ʻi heni ʻa Kalaisí ko ha meʻa moʻoni pea ko e ngataʻanga ʻo e fokotuʻutuʻu ko ení ʻoku tuʻunuku vave mai. (Māt. 24:3) Kuo ʻikai ha toe taimi ki muʻa ʻe mātuʻaki hā mahino māʻalaʻala ai ʻa e ngaahi tafaʻaki lahi ʻaupito ʻo e fakaʻilongá. Ko e taimi eni ki he kakaí ke nau ʻā hake ai mei he mohe fakalaumālié. Ko ʻetau ngāue fakafaifekaú ʻe lava ke tokoni ia ki hono fakaʻaaki kinautolú.

17, 18. (a) ʻOku anga-fēfē hono uesia kitautolu ʻe he “kuonga”? (e) Ko e hā ʻe lava ke ne ueʻi ʻa e kakaí ke liliu ʻenau fakakaukau fekauʻaki mo e pōpoaki ʻo e Puleʻangá?

¹⁷ Ko ha taimi nounou pē ʻoku toe ke fakamoʻoniʻi ai ʻetau ʻofa kia Sihová pea ke fakaʻosi ʻa e ngāue fakamalanga kuo vaheʻi mai ki he ngaahi ʻaho fakaʻosí. Ko e meʻa naʻe leaʻaki ʻe Paula ki he kau Kalisitiane ʻi Loma ʻi he ʻuluaki senitulí ʻoku toe lahi ange ʻa hono ʻuhingá he ʻahó ni: “ʻOku mou ʻilo ʻa e kuongá, he kuo ʻosi hoko ʻa e houa kiate kimoutolu ke mou ʻā hake ai mei he mohé, he ʻoku ofi ange he taimí ni hotau fakamoʻuí ʻi he taimi ne tau hoko ai ko e kau tuí.”—Loma 13:11.

¹⁸ Ko e ngaahi meʻa naʻe tomuʻa tala fekauʻaki mo e ngaahi ʻaho fakaʻosí ʻe lava ke ne ʻai ʻa e faʻahinga tāutaha ke nau lāuʻilo fekauʻaki mo ʻenau fiemaʻu fakalaumālié. Ko e niʻihi ʻoku nau hoko ʻo lāuʻilo ki he fiemaʻu ʻe he tangatá ʻa e tokoní ʻi heʻenau fakakaukauloto atu ko ia ki he taʻelavameʻa ʻa e ngaahi founga-pule fakaetangatá ke fekuki mo e ngaahi faingataʻa fakaʻekonōmiká, ngaahi fakamanamana fakaeʻātomí, faihia fakamālohí, pe ko e ʻauha fakaeʻātakaí. Neongo ia, ʻoku ʻai ʻa e niʻihi ke nau lāuʻilo fekauʻaki mo ʻenau fiemaʻu fakalaumālié ʻe he ngaahi meʻa ʻoku hoko ʻi honau fāmilí tonu, ʻo hangē ko ha fakatamaki fakaesino, ko ha vete mali, pe ko e mate ʻa ha taha ʻofeina. ʻI heʻetau kau ʻi he ngāue fakafaifekaú, ʻoku tau fakafaingamālieʻi ai kitautolu ke tokoniʻi ʻa e kakai peheé.

UEʻI ʻE HA ONGOʻI ʻO E FAKAVAVEVAVÉ

19, 20. Kuo anga-fēfē hono ueʻi ʻe ha ongoʻi ʻo e fakavavevavé ʻa e kau Kalisitiane tokolahi ke liliu ʻenau founga moʻuí?

¹⁹ Ko ha ongoʻi ʻo e fakavavevavé kuó ne ueʻi ʻa e kau Kalisitiane tokolahi ke fakalahi ʻenau kau atu ki he ngāue fakafaifekaú. Ko e fakatātaá, ko ha ongo mātuʻa ʻEkuatoa kei siʻi naʻá na fili ke fakafaingofuaʻi ʻena moʻuí ʻi he hili ʻena fanongo ʻi he polokalama ʻaho ʻasemipilī makehe 2006 “Tauhi Ho Matá ke Huʻufataha.” Naʻá na ʻai ha lisi ʻo e ngaahi meʻa naʻe ʻikai te na fiemaʻú, pea ʻi loto ʻi he māhina ʻe tolu naʻá na hiki ai mei hona ʻapaatimeni loki mohe ʻe tolú ki ha nofoʻanga loki mohe ʻe taha, peá na fakatau atu ha ngaahi meʻa ʻe niʻihi, pea ʻikai leva ke ʻi ai haʻana moʻua. ʻIkai fuoloa naʻá na hū ki he ngāue tāimuʻa tokoní peá na tali ʻa e fokotuʻu ange ʻa e ʻovasia sēketí ke na ngāue fakataha mo ha fakatahaʻanga ʻa ia naʻe lahi ange ai ʻa e fiemaʻú.

²⁰ ʻOku tohi ʻe ha tokoua ʻAmelika Tokelau: “ʻI he taimi naʻá ku maʻu ai mo hoku uaifí ha ʻasemipilī ʻi he 2006, naʻá ma ʻosi papitaiso kimaua ʻi he taʻu ʻe 30. Lolotonga ʻa e fakaʻuli ki ʻapi hili ʻa e polokalamá, naʻá ma lāulea ai ki he founga ʻe lava ke ma ngāueʻaki ai ʻa e akonaki ne ʻomai ki hono ʻai ke faingofua ʻa ʻetau moʻuí. (Māt. 6:19-22) Naʻá ma maʻu ʻa e ʻapi ʻe tolu, konga kelekele, ngaahi meʻalele mamafa hono totongí, mo ha vaka, pea mo ha meʻalele naʻe lava ke fai ha nofo ai. Naʻá ma ongoʻi ʻoku pau pē naʻá ma hā atu ʻo hangē ha ongo Kalisitiane ʻoku valé, ka naʻá ma fili pē ke ʻai ʻa e ngāue fakafaifekau taimi-kakató ko ʻema taumuʻá ia. ʻI he 2008 naʻá ma kau fakataha ai mo homa ʻofefiné ʻi he ngāue tāimuʻa tuʻumaʻú. Ko ha meʻa fakafiefia ē ke ngāue ʻo toe vāofi ange mo e fanga tokouá! Kuó ma malava ke ngāue ʻi he feituʻu ʻoku lahi ange ai ʻa e fiemaʻú. Pehē foki, ko e hokosia ʻo hono fai ʻa e meʻa lahi ange maʻa Sihová kuó ne tohoakiʻi kimaua ke ma ofi ange ai kiate ia. Ko e meʻa ʻoku tautautefito ʻene fakafiefiá ko e monū ko ia ʻo e sio ki he fiefia lahi ʻa e kakaí ʻi he taimi ʻoku nau fanongo ai mo mahinoʻi ʻa e moʻoni ʻo e Folofola ʻa e ʻOtuá.”

21. Ko e hā ʻa e ʻilo ʻokú ne ueʻi kitautolu ke tau fai ha meʻá?

²¹ ʻOku tau ʻiloʻi ʻa e meʻa kuo vavé ni ke hoko fakafokifā mai ki he fokotuʻutuʻu fulikivanu ko ení—ko e “ʻaho ʻo e fakamāú pea mo e ʻaho ʻo hono fakaʻauha ʻa e kakai anga-taʻefakaʻotuá.” (2 Pita 3:7) Ko ʻetau ʻilo ʻa e Folofola ʻa e ʻOtuá ʻoku ueʻi ai kitautolu ke tau talaki faivelenga ʻa e mamahi lahi ka hoko maí mo e māmani foʻou ʻe hoko mai ʻi he hili iá. ʻOku hokohoko atu ʻetau maʻu ha ongoʻi lahi ʻo e fakavavevave ke ʻoatu ʻa e ʻamanaki moʻoní ki he kakaí. ʻI he kau ʻi he tuʻunga kakato tahá ki he ngāue fakavavevave ko ení, ʻoku tau fakahāhā ai ʻa e ʻofa moʻoni ki he ʻOtuá pea mo e kaungāfaʻahinga ʻo e tangatá.