ʻOku Fiemaʻu ki he Faʻahinga ʻo e Tangatá ʻa e ʻIloʻi ʻo e ʻOtuá
“Te ke toki laveʻi ʻa e ʻapasia kia Sihova, pea maʻu ʻa e ʻiloʻi ʻo e ʻOtua.”—PALŌVEPI 2:5.
1. Ko e hā ʻoku lava ai ke pehē ko e mafu ʻo e tangatá ko ha faʻu mataotao ia ʻa e ngāue fakaʻenisinia fakaʻotuá?
KO E mafu meimei ʻe 5,600,000,000 ʻo e faʻahinga ʻo e tangatá ʻoku lolotonga tā ʻi māmani he taimí ni. ʻI he ʻaho kotoa pē, ko ho mafú ʻoku tā tuʻo 100,000 pea mo pamu ʻa e toto ʻoku feʻunga mo e lita ʻe 7,600 ʻi he halanga toto ʻoku kilomita ʻe 100,000 ʻi ho sinó. ʻOku ʻikai ha uoua ʻe toe lahi ange ʻene ngāué ʻi he faʻu mataotao ko ʻeni ʻa e ngāue fakaʻenisinia fakaʻotuá.
2. ʻE anga-fēfē haʻo fakamatalaʻi ʻa e lotó?
2 ʻOku ʻi ai foki mo e ngaahi loto ʻe 5,600,000,000 ʻoku ngāue ʻi he māmaní. ʻOku nofo ʻi he lotó ʻa ʻetau ngaahi ongoʻí, ʻetau ngaahi taumuʻá, ʻetau ngaahi holí. Ko e nofoʻanga ia ʻo ʻetau fakakaukaú, ʻetau mahinó, ʻetau mafai fakaefakakaukaú. Ko e lotó ʻoku lava ke pōlepole pe anga-vaivai, fakaumiuminoa pe fiefia, fakapoʻuliʻi pe fakamāmaʻi.—Nehemaia 2:2; Palōvepi 16:5; Mātiu 11:29; Ngāue 14:17; 2 Kolinitō 4:6; ʻEfesō 1:16-18.
3, 4. ʻOku anga-fēfē ʻa e aʻu mo e ongoongo leleí ki he ngaahi lotó?
3 ʻOku lava ʻe Sihova ko e ʻOtuá ʻo ʻilo ʻa e loto ʻo e tangatá. ʻOku pehē ʻe he Palōvepi 17:3: “Ko e kulo maʻae siliva, pea ko e fonise maʻae koula, ka ko e sivi loto ko Sihova ia.” ʻI he ʻikai ke ʻiloʻi pē ʻa e loto taki taha pea fai ʻa e fakamaaú, ʻoku ngāueʻaki ʻe Sihova ʻa ʻene kau Fakamoʻoní ke nau aʻu mo e ongongo leleí ki he loto ʻo e tangatá. ʻOku fetāiaki ʻeni mo e ngaahi lea ʻa e ʻaposetolo ko Paulá: “He ʻilonga ʻa ia ʻe tautapa ki he huafa ʻo e ʻEiki [Sihova] ʻe fakamoʻui. Ka te nau lava fefe ke tautapa ki ha toko taha ʻoku teʻeki ke nau tui ki ai? pea te nau lava fefe ke tui ki ha toko taha kuo teʻeki ke nau fanongo ki ai? pea fefe haʻanau fanongo ʻoka ʻikai ha taha ke malanga? pea malanga fefe ha niʻihi ʻo kapau ʻe ʻikai fekau atu kinautolu? ʻo hange ko ia kuo tohi, Hono ʻikai fakaʻofoʻofa siʻi vaʻe ʻo e kakai ʻoku ongoongo mai ha ngaahi meʻa lelei!”—Loma 10:13-15.
4 Kuo fakahōifua kia Sihova ke fekau atu ʻa ʻene kau Fakamoʻoní ki he ngaahi ngataʻanga ʻo e māmaní ke “ongoongo mai ha ngaahi meʻa lelei” pea mo kumi ʻa e faʻahinga ʻoku nau loto-fiefanongó. Ko hotau tokolahi ʻi he taimi ní ʻoku laka hake he toko 5,000,000—ko ha fakahoatataú ko e Fakamoʻoni ʻe toko 1 ki he toko 1,200 nai ʻo e kakai ʻi he māmaní. Ko e aʻu mo e ongoongo leleí ki he laui piliona ʻi he māmaní ʻoku ʻikai ke faingofua. Ka ko e ʻOtuá ʻokú ne tataki ʻa e ngāue ko ʻení ʻo fakafou ʻia Sīsū Kalaisi pea ʻokú ne tohoaki mai ʻa e faʻahinga loto-totonú. Ko ia, ko e kikite ʻoku hiki ʻia ʻAisea 60:22 ʻoku fakamoʻoniʻi ʻoku moʻoni: “Ko e kiʻi siʻi ʻe hoko ko e toko afe, pea ko e momoʻi meʻa ko e puleʻanga mālohi: ko au Sihova te u fakavave ia ʻi hono taimi.”
5. Ko e hā ʻa e ʻiló, pea ko e hā ʻoku lava ke leaʻaki ʻo kau ki he poto ʻo e māmaní?
5 Ko e taimi ko iá ko e taimí ni ia, pea ko e meʻa ʻe taha ʻoku mahinó—ʻoku fiemaʻu ki he laui piliona ʻi he māmaní ʻa e ʻiló. Ko e meʻa tefitó, ko e ʻiló ʻoku alāanga maheni ia mo e ngaahi moʻoniʻi meʻa ʻa ia kuo maʻu ʻi he taukeí, sio ki he meʻa ʻoku hokó, pe ako ki ai. Kuo tātānaki ʻe he māmaní ʻa e ʻilo lahi. Kuo fai ʻa e fakalakalaka ʻi he ngaahi malaʻe ʻo hangē ko e fefonongaʻakí, tokanga ki he moʻui leleí, mo e fetuʻutakí. Ka ko e ʻilo fakaemāmaní ʻoku fiemaʻu moʻoni ki he faʻahinga ʻo e tangatá? ʻIkai! Ko e taú, fakafeʻātungiá, mahakí, mo e maté ʻoku hokohoko atu ʻenau fakahohaʻasi ʻa e faʻahinga ʻo e tangatá. Ko e poto ʻo e māmaní kuo faʻa fakamoʻoniʻi ʻoku feliliuaki mo taʻealafalalaʻanga.
6. ʻI he fekauʻaki mo e totó, ʻoku anga-fēfē ʻa hono fakafehoanaki ʻa e ʻiloʻi ʻo e ʻOtuá mo e poto fakaemāmaní?
6 Ke fakatātaaʻi: ʻI he ongo senituli kuohilí, naʻe angaʻaki ʻa e tukuange toto ki tuʻá ʻo pehē ko e faitoʻo. Ko George Washington, ko e ʻuluaki palesiteni ia ʻo e ʻIunaite Seteté, naʻe toutou tukuange ha toto meiate ia ki tuʻa ʻi he ngaahi houa fakaʻosi ʻo ʻene moʻuí. ʻI he taimi ʻe taha naʻá ne pehē: “Tuku au ke u mate fiemālie; ʻe ʻikai te u tolonga fuoloa.” Naʻá ne moʻoni, he naʻá ne mate ʻi he ʻaho pē ko iá—Tīsema 14, 1799. ʻI he ʻikai ke fai ʻa e tukuange toto ki tuʻá ʻoku fai ʻa e fakamamafá ia ʻi he ʻahó ni ki hono huhu ʻo e totó ki loto ki he sino ʻo e tangatá. Naʻe fonu ʻi he ngaahi palopalema fakatupu-mate ʻa e ongo foungá ni fakatouʻosi. Kae kehe, ʻi he lolotonga ʻo e taimi kotoa ko ʻení, kuo pehē ʻe he Folofola ʻa e ʻOtuá: “Fakaʻehiʻehi mei he . . . toto.” (Ngāue 15:29) Ko e ʻiloʻi ʻo e ʻOtuá ʻoku tonu maʻu pē ia, falalaʻanga, mo fakaonopooni.
7. ʻOku anga-fēfē ʻa hono fakafehoanaki ʻa e ʻilo Fakatohitapu totonú mo e poto fakaemāmaní ʻi he tafaʻaki ʻo e tauhi ʻo e fānaú?
7 Fakatokangaʻi ʻa e fakatātā ʻe taha ʻo e taʻefalalaʻanga ʻo e poto fakaemāmaní. ʻI he ngaahi taʻu kuo hili atú ko e kau toketā ki he ʻatamaí naʻa nau poupouʻi ʻa e tauhi fakapelepelekoviʻi ʻo e fānaú, ka ko e tokotaha ʻo hono kau poupoú naʻá ne fakahā ki mui mai ko ha meʻa hala ia. Ko e German Philological Association naʻe tuʻo taha ʻa ʻene pehē ko e fakapelepelekoviʻi ko iá “ko e taha ia ʻo e tupuʻanga taʻefakahangatonu ʻo e ngaahi palopalema ʻoku tau maʻu ʻi he kau talavoú.” Ko e poto fakaemāmaní ʻoku femaleleʻaki ki hē mo ē ʻo hangē ʻoku ifi ʻe he matangí, ka ko e ʻilo Fakatohitapu totonú kuo tuʻumaʻu pē ia. ʻOku ʻomai ʻe he Tohitapú ʻa e akonaki mafamafatatau ki hono akoʻi ʻo e fānaú. “Tautea ho foha, pea te ne hoko ko ho nongaʻanga; ʻio, te ne taufetuku fiemalie ki hoʻo moʻui,” ko e lau ia ʻa e Palōvepi 29:17. Ko e akonaki ko iá ʻoku fai ia ʻi he ʻofa, he naʻe tohi ʻe Paula: “Ngaahi tamai, ʻoua te mou fakaʻitaʻi hoʻomou fanau; kae akonekina ʻaki ʻa e tautea mo e valoki ʻa e ʻEiki.”—ʻEfesō 6:4.
“ʻIloʻi ʻo e ʻOtua”
8, 9. Te ke fakamatalaʻi fēfē ʻa e lea ʻa Palōvepi 2:1-6 ʻo fekauʻaki mo e ʻilo ʻoku fiemaʻu moʻoni ki he faʻahinga ʻo e tangatá?
8 Neongo ko Paula ko ha tangata naʻe ako, naʻá ne pehē: “Ka ai ha taha ʻoku ne ʻafungi ko e poto ia ʻiate kimoutolu fakaemaama ko eni, ke ne hoko muʻa ko e vale, ka ne toki poto. He ko e poto ʻo e maama ko eni, ko e koto vale ia ʻi he vakai ʻa e ʻOtua.” (1 Kolinitō 3:18, 19) Ko e ʻOtuá pē ʻoku lava ke ne tokonaki mai ʻa e ʻilo ko ia ʻoku fiemaʻu moʻoni ki he faʻahinga ʻo e tangatá. Fekauʻaki mo iá, ʻoku pehē ʻe he Palōvepi 2:1-6: “Tama, kapau te ke tali ʻeku ngaahi lea, ʻo tuku tauhi mo koe ʻeku ngaahi tuʻutuʻuni; ʻo ke tuku ai ho telinga ke fanongo ki he poto, mo ofeʻi ho loto kia Fakahinohino; kaeʻumaʻa, kapau te ke ui ʻa ʻIlomeʻa, pea haʻaki ho leʻo kia Fakahinohino; kapau te ke haʻao ia hange ha haʻao siliva, pea hakule ki ai hange ko hoʻo fai ki ha koloa fufu; te ke toki laveʻi ʻa e ʻapasia kia Sihova, pea maʻu ʻa e ʻiloʻi ʻo e ʻOtua. He ʻoku foaki poto ʻe Sihova; ʻoku mei hono fofonga ʻa e ʻilo mo e fakahinohino.”
9 Ko e faʻahinga kuo ueʻi ʻe he loto-leleí ʻoku nau tokanga ki he potó ʻaki hono ngāuetotonuʻaki ʻa e ʻilo kuo foaki mei he ʻOtuá. ʻOku nau ofeʻi honau lotó ki he ʻiló, fakakaukauʻi fakalelei ʻa e ngaahi moʻoniʻi meʻa ʻoku nau akó. Ko hono moʻoní, ʻoku nau kumi ki he mahinó, pe ko e malava ke sio ki he anga ʻo e felāveʻiʻaki ʻa e ngaahi tafaʻaki ʻo ha kaveinga. Ko e faʻahinga loto-totonú ʻoku nau ngāue ʻo hangē ʻoku nau keli ki ha siliva mo fekumi ki ha ngaahi koloa fufū. Ka ko e hā ʻa e koloa lahi ʻoku maʻu ʻe he faʻahinga ʻoku loto-fiefanongó? Ko e “ʻiloʻi ʻo e ʻOtua.” Ko e hā ia? Ko hono ʻai faingofuá, ko e ʻilo ʻoku maʻu ʻi he Folofola ʻa e ʻOtuá, ko e Tohitapú.
10. Ko e hā kuo pau ke tau fai ke tau maʻu ai ʻa e moʻui lelei fakalaumālié?
10 Ko e ʻiloʻi ʻo e ʻOtuá ʻoku totonu, ʻikai feliliuaki, pea ʻoku foaki-moʻui. ʻOkú ne hakeakiʻi ʻa e moʻui lelei fakalaumālié. Naʻe naʻinaʻi ʻa Paula kia Tīmote: “Buke ke maʻu ae jino oe gaahi lea haohaoa, aia naa ke fanogo ai iate au, i he tui moe ofa aia oku ia Kalaisi Jisu.” (2 Tīmote 1:13, PM, fakaʻītali ʻamautolu.) ʻOku ʻi ai ʻa e sīpinga lea ʻi he lea fakafonua kotoa. ʻOku meimei tatau pē, ko e “lea maʻa” ʻo e moʻoni Fakatohitapú ʻoku ʻi ai “ae jino oe gaahi lea haohaoa,” ʻo makatuʻunga tefito ʻi he kaveinga ʻo e Tohitapú ko hono fakatonuhiaʻi ʻa e tuʻunga-hau ʻo Sihová ʻo fakafou mai ʻi he Puleʻangá. (Sēfanaia 3:9) ʻOku fiemaʻu ke tau tauhi ʻa e sīpinga ko ʻeni ʻo e ngaahi lea haohaoá ʻi he fakakaukaú mo e lotó. Ke tau fakaʻehiʻehi mei he mahaki ʻo e lotó kae moʻui lelei fakalaumālie ai pē, kuo pau ke tau ngāueʻaki ʻa e Tohitapú ʻi heʻetau moʻuí pea mo ngāuekakatoʻaki ʻa e ngaahi tokonaki fakalaumālie ʻoku fai ʻe he ʻOtuá ʻo fakafou mai ʻi he “tamaioeiki agatonu mo boto.” (Mātiu 24:45-47, PM; Taitusi 2:2) Ke tau manatuʻi maʻu ai pē ke maʻu ʻa e tuʻunga moʻui lelei fakalaumālié, te tau fiemaʻu maʻu pē ʻa e ʻilo ʻo e ʻOtuá.
11. Ko e hā ʻa e ngaahi ʻuhinga ʻe niʻihi ʻoku fiemaʻu ai ki he faʻahinga ʻo e tangatá ʻa e ʻiloʻi ʻo e ʻOtuá?
11 Fakakaukau ange ki he ngaahi ʻuhinga kehe ʻoku fiemaʻu ai ki he laui piliona ʻi he māmaní ʻa e ʻiloʻi ʻo e ʻOtuá. ʻOku nau ʻilo hono kotoa ki he anga ʻo e hoko mai ʻa e māmaní mo e faʻahinga ʻo e tangatá? ʻIkai, ʻoku ʻikai te nau ʻilo. ʻOku ʻilo kotoa ʻe he faʻahinga ʻo e tangatá ʻa e ʻOtua moʻoní mo hono ʻAló? ʻOku lāuʻilo ʻe he tokotaha kotoa pē ʻa e ngaahi fakakikihi naʻe langaʻi ʻe Sētane ʻo fekauʻaki mo e tuʻunga-hau ʻo e ʻOtuá mo e tauhi anga-haohaoa ʻa e tangatá? ʻOku toe ʻikai pē. ʻOku ʻilo ʻe he kakaí fakakātoa ʻa e ʻuhinga ʻoku tau motuʻa ai pea maté? Kuo pau ke tau toe pehē ʻikai. ʻOku fakatokangaʻi ʻe he kakai kotoa ʻi he māmaní ʻoku lolotonga pule ʻa e Puleʻanga ʻo e ʻOtuá pea ʻoku tau moʻui ʻi he ngaahi ʻaho fakaʻosí? ʻOku nau lāuʻilo ki he ngaahi kongakau laumālie anga-fulikivanú? ʻOku maʻu ʻe he faʻahinga ʻo e tangatá hono kotoa ʻa e ʻilo ala falalaʻanga ʻo fekauʻaki mo e founga ke maʻu ai ʻa e fāmili moʻui fiefiá? Pea ʻoku ʻilo ʻe he kakai tokolahi ko e moʻui fiefia ʻi he Palataisí ko e taumuʻa ia ʻa hotau Tokotaha-Fakatupú ki he faʻahinga ʻo e tangata talangofuá? Ko e talí ʻoku ʻikai ki he toe ngaahi fehuʻi ko ʻení. Ko ia, ʻoku mahino, ʻoku fiemaʻu ki he faʻahinga ʻo e tangatá ʻa e ʻiloʻi ʻo e ʻOtuá.
12. ʻOku lava fēfē ke tau lotu ki he ʻOtuá “ʻi laumālie pea fai ʻi moʻoni”?
12 ʻOku toe fiemaʻu ki he faʻahinga ʻo e tangatá ʻa e ʻiloʻi ʻo e ʻOtuá koeʻuhi ko e meʻa ko ia naʻe leaʻaki ʻe Sīsū ʻi heʻene lotu ʻi he pō fakaʻosi ʻo ʻene moʻui ʻi māmaní. Kuo pau pē naʻe ueʻi loloto ʻa ʻene kau ʻaposetoló ʻi heʻenau fanongo ki heʻene pehē: “Pea ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sīsū ne ke fekau mai ko e Misaia.” (Sione 17:3) Ko hono ngāueʻaki ʻa e ʻilo ko iá ko e founga pē ia ʻo e lotu ʻoku tali ʻe he ʻOtuá. “Ko e ʻOtua ko e laumālie: pea ko kinautolu ʻe hū kiate ia, kuo pau ke nau fai ʻi laumālie pea fai ʻi moʻoni ʻenau hu,” ko e lea ia ʻa Sīsuú. (Sione 4:24) ʻOku tau lotu ki he ʻOtuá “ʻi laumalie” ʻi hono ueʻi kitautolu ʻe he loto ʻoku fonu ʻi he tui mo e ʻofa. ʻOku anga-fēfē ʻa ʻetau lotu kiate ia “ʻi moʻoni”? ʻAki ʻa e ako ʻo ʻene Folofolá mo lotu kiate ia ʻo fakatatau ki heʻene moʻoni kuo fakahaá—ko e “ʻiloʻi ʻo e ʻOtua.”
13. Ko e hā ʻa e meʻa kuo hiki ʻi he Ngāue 16:25-34, pea ko e hā ʻoku lava ke tau ako mei aí?
13 Ko e laui afe ʻoku kamata ke nau lotu kia Sihova ʻi he taʻu taki taha. Ka, kuo pau ke fai ʻa e ngaahi ako Tohitapu mo e kakai mahuʻingaʻiá ʻi ha taimi fuoloa, pe ʻoku malava ki he faʻahinga loto-totonú ke vave ange ʻenau aʻu ki he tuʻunga ko e papitaisó? Sai, fakatokangaʻi ʻa e meʻa naʻe hoko ki he tokotaha selá mo hono falé naʻe lave ki ai ʻi he Ngāue 16:25-34. Naʻe fakahū pilīsone ʻa Paula mo Sailosi ʻi Filipai, ka ʻi he tuʻuapoó, naʻe fakaava ʻa e ngaahi matapā ʻo e pilīsoné ʻe ha mofuike lahi. ʻI he fakakaukau kuo hola kotoa ʻa e kau pōpulá pea ʻe tautea mamafa iá, naʻe kamata ke taonakita ʻa e tokotaha selá ka naʻe tala ange ʻe Paula kiate ia ʻoku nau kei kakato pē. Ko Paula mo Sailosí naʻá na “lea kiate ia ʻi he folofola ʻa e ʻEiki, pea ai mo e kakai kotoa ʻo hono ʻapi.” Ko e sela ko iá mo hono fāmilí ko e kau Senitaile naʻe ʻikai te nau ʻilo ki he Tohitapú. Ka, ʻi he pō pē ko iá, naʻa nau hoko ai ko e kau tui. Mahulu atu ʻi he meʻa ko iá, “pea ne papitaiso leva, ʻa ia mo kinautolu kotoa pē naʻe ʻiate ia.” Ko e ngaahi tuʻunga tātātaha ia, ka ko e kau foʻoú ni naʻe akoʻi ki he ngaahi moʻoni tefitó pea nau toki ako ʻa e ngaahi meʻa kehe ʻi he ngaahi fakataha ʻa e fakatahaʻangá. ʻOku totonu ke malava ha meʻa meimei tatau mo ia ʻi he ʻahó ni.
Ko e Taʻú ʻOku Lahi!
14. Ko e hā ʻoku fiemaʻu ai ke feinga ke toe lahi ange ha ngaahi ako Tohitapu ola lelei ʻi ha vahaʻa taimi nounou ange?
14 ʻE lelei kapau ʻe lava ʻe he Kau Fakamoʻoni ʻa Sihová ke fai ha ngaahi ako Tohitapu lahi ange mo ola lelei ʻi ha vahaʻa taimi nounou ange. ʻOku ʻi ai ʻa e fiemaʻu moʻoni ki he meʻá ni. Hangē ko ʻení, ʻi he ngaahi fonua ʻo ʻIulope Hahaké, ko e kakaí ʻoku nau kau ki ha lisi talitali ʻo e kau fie ako Tohitapú. Ko e toe meʻa tatau pē ʻi he ngaahi feituʻu kehé. ʻI ha kolo ʻe taha ʻi he Lepupelika Tominiká, naʻe fuʻu lahi ʻa e kole ki he kau Fakamoʻoni ʻe toko nima ai pea ʻikai te nau lava ke fai kotoa ʻa e ngaahi akó. Ko e hā naʻa nau faí? Naʻa nau fakalototoʻaʻi ʻa e faʻahinga mahuʻingaʻiá ke nau haʻu ki he ngaahi fakataha ʻi he Fale Fakatahaʻangá pea hiki honau hingoá ʻi he lisi talitali ki he ngaahi ako Tohitapú. Ko e tuʻunga tatau pē ʻoku hoko ʻi he ngaahi feituʻu lahi ʻi he māmaní.
15, 16. Ko e hā kuo tokonaki ki hono fakamafola ke toe vave ange ʻa e ʻiloʻi ʻo e ʻOtuá, pea ko e hā ʻa e ngaahi moʻoniʻi meʻa ʻo fekauʻaki mo iá?
15 ʻOku hulu ʻa e ngaahi vāhenga ngāué—lahi ʻa e ngaahi manafa ʻo e ututaʻú—ʻoku fakaʻatā mai ki he kakai ʻa e ʻOtuá. Ko Sihova ʻa e “ʻEiki ʻoku aʻana ʻa e taʻu,” ʻokú ne fekau mai ha kau ngāue tokolahi ange, ka ʻoku kei lahi pē ʻa e meʻa ia ke faí. (Mātiu 9:37, 38) Ko ia ai, ke vave ange ʻa hono fakamafola ʻa e ʻiloʻi ʻo e ʻOtuá, kuo tokonaki ʻe he ‘tamaioʻeiki angatonú’ ha meʻa ʻokú ne fakanounou ʻa e fakamatala tefitó koeʻuhi ke lava ʻa e kau ako Tohitapú ʻo fai ha laka ki muʻa fakalaumālie ʻi he lēsoni taki taha. Ko ha tohi foʻou ʻe lava ke vave ʻa hono ngāueʻaki ʻi he ngaahi ako Tohitapú—mahalo ʻi ha ngaahi māhina siʻi pē. Pea ʻoku faingofua ke ʻave ʻi heʻetau ngaahi kato-takitakí, ko ʻetau ngaahi peesí, pe naʻa mo e kato ʻi hotau valá! Ko e laui kilu naʻa nau fakatahataha ʻi he Fakataha-Lahi Fakavahe “Kau Fakahīkihiki Fiefia” ʻa e Kau Fakamoʻoni ʻa Sihová naʻa nau fiefia ke maʻu ʻa e tohi foʻou ko ʻeni peesi ʻe 192 kuo fakakaveinga ko e ʻIlo ʻA Ia ʻOku Taki Atu ki he Moʻui Taʻengatá.
16 Ko e kau fatutohi ʻi he ngaahi fonua kehekehe naʻa nau teuteu fakalelei ʻa e fakamatala naʻe fakapapauʻi ki he tohi ko e ʻIlo. Ko ia ai, ʻoku totonu ke manakoa fakavahaʻapuleʻanga ia. Ka ʻe fuoloa pea toki tuku ange ʻa e tohi foʻou ko ʻení ʻi he ngaahi lea ʻa e kakai ʻi he māmaní? ʻIkai, koeʻuhi ko ha tohi peesi ʻe 192 ʻoku lava ke vave ange ʻa hono liliú ʻi he ngaahi tohi lalahi angé. ʻI ʻOkatopa 1995, naʻe fakangofua ai ʻe he Kōmiti Faitohi ʻa e Kulupu Pulé ʻa hono liliu ʻo e tohi ko ʻení mei he lea faka-Pilitāniá ki he ngaahi lea ʻoku lahi hake ʻi he 130.
17. Ko e hā ʻa e ngaahi moʻoniʻi meʻa ʻoku totonu ke nau ʻai ke faingofua ʻa hono ngāueʻaki ʻa e tohi ko e ʻIlo?
17 Ko e mahino ʻa e vahe taki taha ʻo e tohi ko e ʻIlo ʻoku totonu ke vave ange ai ʻa e fakalakalaka fakalaumālie ʻa e kau akó. ʻOku ʻomai ʻe he tohí ʻa e ngaahi moʻoni Fakatohitapú ʻi ha founga langa hake. ʻOku ʻikai ke nōfoʻi ia ʻi he ngaahi tokāteline loí. Ko e mahino ʻo e leá mo e hokohoko lelei ʻa e ʻuhinga totonú ʻoku totonu ke nau ʻai ke faingofua ʻa hono ngāueʻaki ʻa e tohí ke fai ha ngaahi ako Tohitapu mo tokoni ki he kakaí ke maʻu ʻa e ʻiloʻi ʻo e ʻOtuá. Tuku kehe ʻa e ngaahi konga tohi kuo hikí, ʻoku ʻi ai ʻa e ngaahi konga Tohitapu ʻoku lave ki ai ʻe lava ke kumi ia ʻe he tokotaha akó ʻi he teuteu ki he fetalanoaʻakí. ʻE lau nai ʻa e ngaahi konga ko ʻení ʻi he lolotonga ʻo e akó ʻo fakatatau ki he taimí, kae kehe, ʻe taʻefakapotopoto ke toe tānaki mai ha nāunau kehe ke hoko ai ha fakanenefu ki he ngaahi poini tefitó. Ka, ʻoku sai ange ki he faʻahinga ʻoku nau fai ʻa e ngaahi ako Tohitapú ke feinga ke ʻiloʻilo mo ʻoatu ki he tokotaha akó ʻa ia ʻoku fakamoʻoniʻi ʻe he tohí ʻi he vahe taki taha. ʻOku ʻuhinga ʻení kuo pau ke ako tōtōivi ʻa e faiakó, koeʻuhi ke mahino ʻaupito ʻa e ngaahi fakakaukau tefitó ʻi hono ʻatamaí.
18. Ko e hā ʻa e ngaahi fokotuʻu ʻoku ʻomai ʻo fekauʻaki mo hono ngāueʻaki ʻa e tohi ko e ʻIlo?
18 ʻOku lava fēfē ʻe he tohi ko e ʻIlo ʻA Ia ʻOku Taki Atu ki he Moʻui Taʻengatá ʻo fakavaveʻi ʻa e ngāue ngaohi ākongá? Ko e tohi peesi ʻe 192 ko ʻení ʻoku lava ke ako ia ʻi ha taimi nounou pē, pea ʻoku totonu ko kinautolu “naʻe tuʻutuʻuni ki he moʻui taʻengata” ʻe malava ke nau ako feʻunga ʻo fakafou ʻi ha ako ʻo e tohí ke fai ha fakatapui kia Sihova pea papitaiso. (Ngāue 13:48) Ko ia tau ngāueleleiʻaki ʻi he ngāue fakamalangá ʻa e tohi ko e ʻIlo. Kapau ko ha tokotaha ako kuó ne ʻosi ako ha konga lahi ʻo ha tohi ʻe taha, ʻe ʻaonga nai ke fakaʻosi ia. Ka ʻikai, ʻoku fokotuʻu atu ke fetongi ʻa e ngaahi ako Tohitapú ki he tohi ko e ʻIlo. ʻI he hili ʻa hono fakakakato ʻa e tohi foʻou ko ʻení, ʻoku ʻikai fokotuʻu atu ke toe hiki atu ʻa e ako mo e tokotaha ko ʻení ki ha toe tohi kehe. Ko kinautolu ʻoku nau makupusi ʻa e moʻoní ʻoku lava ke nau fakakakato ʻa ʻenau ʻiló ʻaki ʻa e haʻu ki he ngaahi fakataha ʻa e Kau Fakamoʻoni ʻa Sihová pea pehē ki hono lau ʻo e Tohitapú mo e ngaahi tohi kehe faka-Kalisitiané ʻe kinautolu pē.—2 Sione 1.
19. Ki muʻa ke fai ha ngaahi ako Tohitapu ʻi he tohi ko e ʻIlo, ko e hā ʻe tokoni ai ʻa hono fakamanatu ʻa e peesi 175 ki he 218 ʻo e Organized to Accomplish Our Ministry?
19 Naʻe faʻu ʻa e tohi ko e ʻIlo mo e taumuʻa ko e tokoni ki ha tokotaha ke ne tali ʻa e ngaahi fehuʻi hono kotoa ʻa ia ʻoku fakamanatu ʻe he kau mātuʻá mo e kau malanga teʻeki papitaiso ʻoku nau loto ke papitaiso ko e Kau Fakamoʻoni ʻa Sihová. Ko ia, ki muʻa ke fetongi ʻa hoʻo ngaahi ako Tohitapu lolotongá ki he tohi foʻou ko ʻení, ʻoku poupouʻi ke ke fakamoleki ha ngaahi houa siʻi ʻo fakamanatu ʻa e ngaahi fehuʻi ʻi he peesi 175 ki he 218 ʻo e tohi ko e Organized to Accomplish Our Ministry.a ʻE tokoni ʻeni kiate koe ke fakamamafaʻi ʻa e ngaahi tali ki he ngaahi fehuʻi ko iá ʻi he lolotonga ʻo e ngaahi ako Tohitapu ʻi he tohi ko e ʻIlo.
20. Ko e hā ʻokú ke palani ke fai ki he tohi ko e ʻIlo ʻA Ia ʻOku Taki Atu ki he Moʻui Taʻengatá?
20 Ko e kakai ʻi he feituʻu kotoa pē ʻoku totonu ke nau fanongo ki he ongoongo leleí. ʻIo, ʻoku fiemaʻu ki he faʻahinga ʻo e tangatá ʻa e ʻiloʻi ʻo e ʻOtuá, pea ʻoku ʻai ʻe Sihova ʻa ʻene kau Fakamoʻoní ke nau ʻai ke ʻiloa ia. ʻOku tau maʻu ʻeni ha tohi foʻou naʻe tokonaki mai ʻe heʻetau Tamai ʻofa fakahēvaní ʻo fakafou mai ʻi he tamaioʻeiki anga-tonu mo potó. Te ke ngāueʻaki ia ke akoʻi ʻa e moʻoní pea ʻoatu ai ʻa e fakalāngilangi ki he huafa toputapu ʻo Sihová? ʻE tāpuakiʻi moʻoni koe ʻe Sihova ʻi hoʻo fai ʻa e feinga kotoa ke alamaʻu ʻe ha tokolahi ʻa e ʻilo ʻoku taki atu ki he moʻui taʻengatá.
[Fakamatala ʻi lalo]
a Naʻe pulusi ʻe he Watchtower Bible and Tract Society of New York, Inc.
Ko e Hā Haʻo Tali?
◻ ʻE anga-fēfē haʻo fakamatalaʻi ʻa e lotó?
◻ Ko e hā ʻa e ʻiloʻi ʻo e ʻOtuá?
◻ Ko e hā ʻoku fiemaʻu ai ki he faʻahinga ʻo e tangatá ʻa e ʻiloʻi ʻo e ʻOtuá?
◻ Ko e hā ʻa e tohi foʻou ʻoku ala maʻú, pea ʻoku anga-fēfē ʻa hoʻo palani ke ngāueʻaki iá?
[Fakatātā ʻi he peesi 10]
ʻOku lahi ʻa e ngaahi ʻuhinga ʻoku fiemaʻu ai ki he laui piliona ʻo e māmaní ʻa e ʻiloʻi ʻo e ʻOtuá